𑁨𑁮𑁩. 𑀯𑀟𑁆𑀠𑀓𑀻𑀲𑀽𑀓𑀭𑀚𑀸𑀢𑀓𑀁 (𑁩-𑁪-𑁩)

𑁯𑁭. 𑀯𑀭𑀁 𑀯𑀭𑀁 𑀢𑁆𑀯𑀁 𑀦𑀺𑀳𑀦𑀁 𑀧𑀼𑀭𑁂 𑀘𑀭𑀺, 𑀅𑀲𑁆𑀫𑀺𑀁 𑀧𑀤𑁂𑀲𑁂 𑀅𑀪𑀺𑀪𑀼𑀬𑁆𑀬 𑀲𑀽𑀓𑀭𑁂;

𑀲𑁄 𑀤𑀸𑀦𑀺 𑀏𑀓𑁄 𑀩𑁆𑀬𑀧𑀕𑀫𑁆𑀫 𑀛𑀸𑀬𑀲𑀺, 𑀩𑀮𑀁 𑀦𑀼 𑀢𑁂 𑀩𑁆𑀬𑀕𑁆𑀖 𑀦 𑀘𑀚𑁆𑀚 𑀯𑀺𑀚𑁆𑀚𑀢𑀺.

𑁯𑁮. 𑀇𑀫𑁂 𑀲𑀼𑀤𑀁 [𑀇𑀫𑀲𑁆𑀲𑀼 𑀢𑀸 (𑀲𑁆𑀬𑀸. 𑀓.)] 𑀬𑀦𑁆𑀢𑀺 𑀤𑀺𑀲𑁄𑀤𑀺𑀲𑀁 𑀧𑀼𑀭𑁂, 𑀪𑀬𑀝𑁆𑀝𑀺𑀢𑀸 𑀮𑁂𑀡𑀕𑀯𑁂𑀲𑀺𑀦𑁄 𑀧𑀼𑀣𑀼;

𑀢𑁂 𑀤𑀸𑀦𑀺 𑀲𑀗𑁆𑀕𑀫𑁆𑀫 𑀯𑀲𑀦𑁆𑀢𑀺 𑀏𑀓𑀢𑁄, 𑀬𑀢𑁆𑀣𑀝𑁆𑀞𑀺𑀢𑀸 𑀤𑀼𑀧𑁆𑀧𑀲𑀳𑀚𑁆𑀚𑀫𑁂 [𑀤𑀼𑀧𑁆𑀧𑀲𑀳𑀚𑁆𑀚𑀺𑀫𑁂 (𑀲𑁆𑀬𑀸.)] 𑀫𑀬𑀸.

𑁯𑁯. 𑀦𑀫𑀢𑁆𑀣𑀼 𑀲𑀗𑁆𑀖𑀸𑀦 𑀲𑀫𑀸𑀕𑀢𑀸𑀦𑀁, 𑀤𑀺𑀲𑁆𑀯𑀸 𑀲𑀬𑀁 𑀲𑀔𑁆𑀬 𑀯𑀤𑀸𑀫𑀺 𑀅𑀩𑁆𑀪𑀼𑀢𑀁;

𑀩𑁆𑀬𑀕𑁆𑀖𑀁 𑀫𑀺𑀕𑀸 𑀬𑀢𑁆𑀣 𑀚𑀺𑀦𑀺𑀁𑀲𑀼 𑀤𑀸𑀞𑀺𑀦𑁄, 𑀲𑀸𑀫𑀕𑁆𑀕𑀺𑀬𑀸 𑀤𑀸𑀞𑀩𑀮𑁂𑀲𑀼 𑀫𑀼𑀘𑁆𑀘𑀭𑁂𑀢𑀺.

𑀯𑀟𑁆𑀠𑀓𑀻𑀲𑀽𑀓𑀭𑀚𑀸𑀢𑀓𑀁 𑀢𑀢𑀺𑀬𑀁.