𑁪. 𑀅𑀩𑁆𑀪𑀦𑁆𑀢𑀭𑀯𑀕𑁆𑀕𑁄

𑁨𑁮𑁧. 𑀅𑀩𑁆𑀪𑀦𑁆𑀢𑀭𑀚𑀸𑀢𑀓𑀁 (𑁩-𑁪-𑁧)

𑁯𑁧. 𑀅𑀩𑁆𑀪𑀦𑁆𑀢𑀭𑁄 𑀦𑀸𑀫 𑀤𑀼𑀫𑁄, 𑀬𑀲𑁆𑀲 𑀤𑀺𑀩𑁆𑀬𑀫𑀺𑀤𑀁 𑀨𑀮𑀁;

𑀪𑀼𑀢𑁆𑀯𑀸 𑀤𑁄𑀳𑀴𑀺𑀦𑀻 𑀦𑀸𑀭𑀻, 𑀘𑀓𑁆𑀓𑀯𑀢𑁆𑀢𑀺𑀁 𑀯𑀺𑀚𑀸𑀬𑀢𑀺.

𑁯𑁨. 𑀢𑁆𑀯𑀫𑁆𑀧𑀺 [𑀢𑁆𑀯𑀜𑁆𑀘 (𑀲𑀻. 𑀧𑀻.), 𑀢𑁆𑀯𑀁 𑀳𑀺 (𑀓.)] 𑀪𑀤𑁆𑀤𑁂 𑀫𑀳𑁂𑀲𑀻𑀲𑀺, 𑀲𑀸 𑀘𑀸𑀧𑀺 [𑀘𑀸𑀲𑀺 (𑀲𑀻. 𑀧𑀻.)] 𑀧𑀢𑀺𑀦𑁄 𑀧𑀺𑀬𑀸;

𑀆𑀳𑀭𑀺𑀲𑁆𑀲𑀢𑀺 𑀢𑁂 𑀭𑀸𑀚𑀸, 𑀇𑀤𑀁 𑀅𑀩𑁆𑀪𑀦𑁆𑀢𑀭𑀁 𑀨𑀮𑀁.

𑁯𑁩. 𑀪𑀢𑁆𑀢𑀼𑀭𑀢𑁆𑀣𑁂 𑀧𑀭𑀓𑁆𑀓𑀦𑁆𑀢𑁄, 𑀬𑀁 𑀞𑀸𑀦𑀫𑀥𑀺𑀕𑀘𑁆𑀙𑀢𑀺;

𑀲𑀽𑀭𑁄 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑀻, 𑀮𑀪𑀫𑀸𑀦𑁄 𑀪𑀯𑀸𑀫𑀳𑀦𑁆𑀢𑀺.

𑀅𑀩𑁆𑀪𑀦𑁆𑀢𑀭𑀚𑀸𑀢𑀓𑀁 𑀧𑀞𑀫𑀁.

𑁨𑁮𑁨. 𑀲𑁂𑀬𑁆𑀬𑀚𑀸𑀢𑀓𑀁 (𑁩-𑁪-𑁨)

𑁯𑁪. 𑀲𑁂𑀬𑁆𑀬𑀁𑀲𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀬𑁄 𑀲𑁂𑀬𑁆𑀬𑀫𑀼𑀧𑀲𑁂𑀯𑀢𑀺;

𑀏𑀓𑁂𑀦 𑀲𑀦𑁆𑀥𑀺𑀁 𑀓𑀢𑁆𑀯𑀸𑀦, 𑀲𑀢𑀁 𑀯𑀚𑁆𑀛𑁂 [𑀫𑀘𑁆𑀘𑁂 (𑀓.), 𑀩𑀚𑁆𑀛𑁂 (𑀓. 𑀅𑀝𑁆𑀞.)] 𑀅𑀫𑁄𑀘𑀬𑀺𑀁.

𑁯𑁫. [𑀓𑀲𑁆𑀫𑀸…𑀧𑁂… 𑀲𑀕𑁆𑀕𑀁 𑀦 𑀕𑀘𑁆𑀙𑁂𑀬𑁆𑀬 (𑀓𑀢𑁆𑀣𑀘𑀺)] 𑀢𑀲𑁆𑀫𑀸 𑀲𑀩𑁆𑀩𑁂𑀦 𑀮𑁄𑀓𑁂𑀦, 𑀲𑀦𑁆𑀥𑀺𑀁 𑀓𑀢𑁆𑀯𑀸𑀦 𑀏𑀓𑀢𑁄 [𑀏𑀓𑀓𑁄 (𑀲𑀻. 𑀲𑁆𑀬𑀸. 𑀧𑀻.)];

𑀧𑁂𑀘𑁆𑀘 𑀲𑀕𑁆𑀕𑀁 𑀦𑀺𑀕𑀘𑁆𑀙𑁂𑀬𑁆𑀬 [𑀓𑀲𑁆𑀫𑀸…𑀧𑁂… 𑀲𑀕𑁆𑀕𑀁 𑀦 𑀕𑀘𑁆𑀙𑁂𑀬𑁆𑀬 (𑀓𑀢𑁆𑀣𑀘𑀺)], 𑀇𑀤𑀁 𑀲𑀼𑀡𑀸𑀣 𑀓𑀸𑀲𑀺𑀬𑀸 [𑀓𑀸𑀲𑀬𑁄 (𑀲𑀻. 𑀧𑀻.)].

𑁯𑁬. 𑀇𑀤𑀁 𑀯𑀢𑁆𑀯𑀸 𑀫𑀳𑀸𑀭𑀸𑀚𑀸, 𑀓𑀁𑀲𑁄 𑀩𑀸𑀭𑀸𑀡𑀲𑀺𑀕𑁆𑀕𑀳𑁄;

𑀥𑀦𑀼𑀁 𑀓𑀡𑁆𑀟𑀜𑁆𑀘 [𑀢𑀽𑀡𑀺𑀜𑁆𑀘 (𑀲𑀻. 𑀧𑀻.)] 𑀦𑀺𑀓𑁆𑀔𑀺𑀧𑁆𑀧, 𑀲𑀁𑀬𑀫𑀁 𑀅𑀚𑁆𑀛𑀼𑀧𑀸𑀕𑀫𑀻𑀢𑀺.

𑀲𑁂𑀬𑁆𑀬𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁨𑁮𑁩. 𑀯𑀟𑁆𑀠𑀓𑀻𑀲𑀽𑀓𑀭𑀚𑀸𑀢𑀓𑀁 (𑁩-𑁪-𑁩)

𑁯𑁭. 𑀯𑀭𑀁 𑀯𑀭𑀁 𑀢𑁆𑀯𑀁 𑀦𑀺𑀳𑀦𑀁 𑀧𑀼𑀭𑁂 𑀘𑀭𑀺, 𑀅𑀲𑁆𑀫𑀺𑀁 𑀧𑀤𑁂𑀲𑁂 𑀅𑀪𑀺𑀪𑀼𑀬𑁆𑀬 𑀲𑀽𑀓𑀭𑁂;

𑀲𑁄 𑀤𑀸𑀦𑀺 𑀏𑀓𑁄 𑀩𑁆𑀬𑀧𑀕𑀫𑁆𑀫 𑀛𑀸𑀬𑀲𑀺, 𑀩𑀮𑀁 𑀦𑀼 𑀢𑁂 𑀩𑁆𑀬𑀕𑁆𑀖 𑀦 𑀘𑀚𑁆𑀚 𑀯𑀺𑀚𑁆𑀚𑀢𑀺.

𑁯𑁮. 𑀇𑀫𑁂 𑀲𑀼𑀤𑀁 [𑀇𑀫𑀲𑁆𑀲𑀼 𑀢𑀸 (𑀲𑁆𑀬𑀸. 𑀓.)] 𑀬𑀦𑁆𑀢𑀺 𑀤𑀺𑀲𑁄𑀤𑀺𑀲𑀁 𑀧𑀼𑀭𑁂, 𑀪𑀬𑀝𑁆𑀝𑀺𑀢𑀸 𑀮𑁂𑀡𑀕𑀯𑁂𑀲𑀺𑀦𑁄 𑀧𑀼𑀣𑀼;

𑀢𑁂 𑀤𑀸𑀦𑀺 𑀲𑀗𑁆𑀕𑀫𑁆𑀫 𑀯𑀲𑀦𑁆𑀢𑀺 𑀏𑀓𑀢𑁄, 𑀬𑀢𑁆𑀣𑀝𑁆𑀞𑀺𑀢𑀸 𑀤𑀼𑀧𑁆𑀧𑀲𑀳𑀚𑁆𑀚𑀫𑁂 [𑀤𑀼𑀧𑁆𑀧𑀲𑀳𑀚𑁆𑀚𑀺𑀫𑁂 (𑀲𑁆𑀬𑀸.)] 𑀫𑀬𑀸.

𑁯𑁯. 𑀦𑀫𑀢𑁆𑀣𑀼 𑀲𑀗𑁆𑀖𑀸𑀦 𑀲𑀫𑀸𑀕𑀢𑀸𑀦𑀁, 𑀤𑀺𑀲𑁆𑀯𑀸 𑀲𑀬𑀁 𑀲𑀔𑁆𑀬 𑀯𑀤𑀸𑀫𑀺 𑀅𑀩𑁆𑀪𑀼𑀢𑀁;

𑀩𑁆𑀬𑀕𑁆𑀖𑀁 𑀫𑀺𑀕𑀸 𑀬𑀢𑁆𑀣 𑀚𑀺𑀦𑀺𑀁𑀲𑀼 𑀤𑀸𑀞𑀺𑀦𑁄, 𑀲𑀸𑀫𑀕𑁆𑀕𑀺𑀬𑀸 𑀤𑀸𑀞𑀩𑀮𑁂𑀲𑀼 𑀫𑀼𑀘𑁆𑀘𑀭𑁂𑀢𑀺.

𑀯𑀟𑁆𑀠𑀓𑀻𑀲𑀽𑀓𑀭𑀚𑀸𑀢𑀓𑀁 𑀢𑀢𑀺𑀬𑀁.

𑁨𑁮𑁪. 𑀲𑀺𑀭𑀺𑀚𑀸𑀢𑀓𑀁 (𑁩-𑁪-𑁪)

𑁧𑁦𑁦. 𑀬𑀁 𑀉𑀲𑁆𑀲𑀼𑀓𑀸 𑀲𑀗𑁆𑀖𑀭𑀦𑁆𑀢𑀺, 𑀅𑀮𑀓𑁆𑀔𑀺𑀓𑀸 𑀩𑀳𑀼𑀁 𑀥𑀦𑀁;

𑀲𑀺𑀧𑁆𑀧𑀯𑀦𑁆𑀢𑁄 𑀅𑀲𑀺𑀧𑁆𑀧𑀸 𑀘, 𑀮𑀓𑁆𑀔𑀺𑀯𑀸 𑀢𑀸𑀦𑀺 𑀪𑀼𑀜𑁆𑀚𑀢𑀺.

𑁧𑁦𑁧. 𑀲𑀩𑁆𑀩𑀢𑁆𑀣 𑀓𑀢𑀧𑀼𑀜𑁆𑀜𑀲𑁆𑀲, 𑀅𑀢𑀺𑀘𑁆𑀘𑀜𑁆𑀜𑁂𑀯 𑀧𑀸𑀡𑀺𑀦𑁄;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀩𑀳𑀽 𑀪𑁄𑀕𑀸, 𑀅𑀧𑁆𑀧𑀦𑀸𑀬𑀢𑀦𑁂𑀲𑀼𑀧𑀺.

𑁧𑁦𑁨. 𑀓𑀼𑀓𑁆𑀓𑀼𑀝𑁄 [𑀓𑀼𑀓𑁆𑀓𑀼𑀝 (𑀲𑀻. 𑀧𑀻.), 𑀓𑀼𑀓𑁆𑀓𑀼𑀝𑀸 (𑀲𑀻. 𑀦𑀺𑀲𑁆𑀲𑀬, 𑀲𑀤𑁆𑀤𑀦𑀻𑀢𑀺)] 𑀫𑀡𑀬𑁄 𑀤𑀡𑁆𑀟𑁄, 𑀣𑀺𑀬𑁄 𑀘 𑀧𑀼𑀜𑁆𑀜𑀮𑀓𑁆𑀔𑀡𑀸;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀧𑀸𑀧𑀲𑁆𑀲, 𑀓𑀢𑀧𑀼𑀜𑁆𑀜𑀲𑁆𑀲 𑀚𑀦𑁆𑀢𑀼𑀦𑁄𑀢𑀺.

𑀲𑀺𑀭𑀺𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁨𑁮𑁫. 𑀫𑀡𑀺𑀲𑀽𑀓𑀭𑀚𑀸𑀢𑀓𑀁 (𑁩-𑁪-𑁫)

𑁧𑁦𑁩. 𑀤𑀭𑀺𑀬𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺, 𑀢𑀺𑀁𑀲𑀫𑀢𑁆𑀢𑀸 𑀯𑀲𑀸𑀫𑀲𑁂;

𑀳𑀜𑁆𑀜𑀸𑀫 [𑀳𑀜𑁆𑀙𑁂𑀫 (𑀲𑀻. 𑀧𑀻.), 𑀳𑀜𑁆𑀙𑀸𑀫 (?)] 𑀫𑀡𑀺𑀦𑁄 𑀆𑀪𑀁, 𑀇𑀢𑀺 𑀦𑁄 𑀫𑀦𑁆𑀢𑀦𑀁 𑀅𑀳𑀼.

𑁧𑁦𑁪. 𑀬𑀸𑀯𑀢𑀸 𑀫𑀡𑀺𑀁 𑀖𑀁𑀲𑀸𑀫 [𑀬𑀸𑀯 𑀬𑀸𑀯 𑀦𑀺𑀖𑀁𑀲𑀸𑀫 (𑀲𑀻. 𑀧𑀻.)], 𑀪𑀺𑀬𑁆𑀬𑁄 𑀯𑁄𑀤𑀸𑀬𑀢𑁂 𑀫𑀡𑀺;

𑀇𑀤𑀜𑁆𑀘 𑀤𑀸𑀦𑀺 𑀧𑀼𑀘𑁆𑀙𑀸𑀫, 𑀓𑀺𑀁 𑀓𑀺𑀘𑁆𑀘𑀁 𑀇𑀥 𑀫𑀜𑁆𑀜𑀲𑀺.

𑁧𑁦𑁫. 𑀅𑀬𑀁 𑀫𑀡𑀺 𑀯𑁂𑀴𑀽𑀭𑀺𑀬𑁄, 𑀅𑀓𑀸𑀘𑁄 𑀯𑀺𑀫𑀮𑁄 [𑀯𑀺𑀧𑀼𑀮𑁄 (𑀓.)] 𑀲𑀼𑀪𑁄;

𑀦𑀸𑀲𑁆𑀲 𑀲𑀓𑁆𑀓𑀸 𑀲𑀺𑀭𑀺𑀁 𑀳𑀦𑁆𑀢𑀼𑀁, 𑀅𑀧𑀓𑁆𑀓𑀫𑀣 𑀲𑀽𑀓𑀭𑀸𑀢𑀺.

𑀫𑀡𑀺𑀲𑀽𑀓𑀭 [𑀫𑀡𑀺𑀖𑀁𑀲 (𑀓.)] 𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁨𑁮𑁬. 𑀲𑀸𑀮𑀽𑀓𑀚𑀸𑀢𑀓𑀁 (𑁩-𑁪-𑁬)

𑁧𑁦𑁬. 𑀫𑀸 𑀲𑀸𑀮𑀽𑀓𑀲𑁆𑀲 𑀧𑀺𑀳𑀬𑀺, 𑀆𑀢𑀼𑀭𑀦𑁆𑀦𑀸𑀦𑀺 𑀪𑀼𑀜𑁆𑀚𑀢𑀺;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀼𑀲𑀁 𑀔𑀸𑀤, 𑀏𑀢𑀁 𑀤𑀻𑀖𑀸𑀬𑀼𑀮𑀓𑁆𑀔𑀡𑀁.

𑁧𑁦𑁭. 𑀇𑀤𑀸𑀦𑀺 𑀲𑁄 𑀇𑀥𑀸𑀕𑀦𑁆𑀢𑁆𑀯𑀸, 𑀅𑀢𑀺𑀣𑀻 𑀬𑀼𑀢𑁆𑀢𑀲𑁂𑀯𑀓𑁄;

𑀅𑀣 𑀤𑀓𑁆𑀔𑀲𑀺 𑀲𑀸𑀮𑀽𑀓𑀁, 𑀲𑀬𑀦𑁆𑀢𑀁 𑀫𑀼𑀲𑀮𑀼𑀢𑁆𑀢𑀭𑀁.

𑁧𑁦𑁮. 𑀯𑀺𑀓𑀦𑁆𑀢𑀁 [𑀯𑀺𑀓𑀢𑁆𑀢𑀁 (𑀲𑀻.), 𑀯𑀺𑀓𑀦𑁆𑀢𑀺𑀬𑀫𑀸𑀦𑀁 𑀙𑀺𑀦𑁆𑀤𑀺𑀬𑀫𑀸𑀦𑀁𑀢𑀺 𑀅𑀢𑁆𑀣𑁄] 𑀲𑀽𑀓𑀭𑀁 𑀤𑀺𑀲𑁆𑀯𑀸, 𑀲𑀬𑀦𑁆𑀢𑀁 𑀫𑀼𑀲𑀮𑀼𑀢𑁆𑀢𑀭𑀁;

𑀚𑀭𑀕𑁆𑀕𑀯𑀸 𑀯𑀺𑀘𑀺𑀦𑁆𑀢𑁂𑀲𑀼𑀁, 𑀯𑀭𑀫𑁆𑀳𑀸𑀓𑀁 𑀪𑀼𑀲𑀸𑀫𑀺𑀯𑀸𑀢𑀺.

𑀲𑀸𑀮𑀽𑀓𑀚𑀸𑀢𑀓𑀁 𑀙𑀝𑁆𑀞𑀁.

𑁨𑁮𑁭. 𑀮𑀸𑀪𑀕𑀭𑀳𑀚𑀸𑀢𑀓𑀁 (𑁩-𑁪-𑁭)

𑁧𑁦𑁯. 𑀦𑀸𑀦𑀼𑀫𑁆𑀫𑀢𑁆𑀢𑁄 𑀦𑀸𑀧𑀺𑀲𑀼𑀡𑁄, 𑀦𑀸𑀦𑀝𑁄 𑀦𑀸𑀓𑀼𑀢𑀽𑀳𑀮𑁄;

𑀫𑀽𑀴𑁆𑀳𑁂𑀲𑀼 𑀮𑀪𑀢𑁂 𑀮𑀸𑀪𑀁, 𑀏𑀲𑀸 𑀢𑁂 𑀅𑀦𑀼𑀲𑀸𑀲𑀦𑀻.

𑁧𑁧𑁦. 𑀥𑀺𑀭𑀢𑁆𑀣𑀼 𑀢𑀁 𑀬𑀲𑀮𑀸𑀪𑀁, 𑀥𑀦𑀮𑀸𑀪𑀜𑁆𑀘 𑀩𑁆𑀭𑀸𑀳𑁆𑀫𑀡;

𑀬𑀸 𑀯𑀼𑀢𑁆𑀢𑀺 𑀯𑀺𑀦𑀺𑀧𑀸𑀢𑁂𑀦, 𑀅𑀥𑀫𑁆𑀫𑀘𑀭𑀡𑁂𑀦 [𑀅𑀥𑀫𑁆𑀫𑀘𑀭𑀺𑀬𑀸𑀬 (𑀲𑀻. 𑀲𑁆𑀬𑀸.)] 𑀯𑀸.

𑁧𑁧𑁧. 𑀅𑀧𑀺 𑀘𑁂 𑀧𑀢𑁆𑀢𑀫𑀸𑀤𑀸𑀬, 𑀅𑀦𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀏𑀲𑀸𑀯 𑀚𑀻𑀯𑀺𑀓𑀸 𑀲𑁂𑀬𑁆𑀬𑁄 [𑀲𑁂𑀬𑁆𑀬𑀸 (𑀲𑀻. 𑀲𑁆𑀬𑀸. 𑀧𑀻.)], 𑀬𑀸 𑀘𑀸𑀥𑀫𑁆𑀫𑁂𑀦 𑀏𑀲𑀦𑀸𑀢𑀺.

𑀮𑀸𑀪𑀕𑀭𑀳𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁨𑁮𑁮. 𑀫𑀘𑁆𑀙𑀼𑀤𑁆𑀤𑀸𑀦𑀚𑀸𑀢𑀓𑀁 (𑁩-𑁪-𑁮)

𑁧𑁧𑁨. 𑀅𑀕𑁆𑀖𑀦𑁆𑀢𑀺 𑀫𑀘𑁆𑀙𑀸 𑀅𑀥𑀺𑀓𑀁 𑀲𑀳𑀲𑁆𑀲𑀁, 𑀦 𑀲𑁄 𑀅𑀢𑁆𑀣𑀺 𑀬𑁄 𑀇𑀫𑀁 𑀲𑀤𑁆𑀤𑀳𑁂𑀬𑁆𑀬;

𑀫𑀬𑁆𑀳𑀜𑁆𑀘 𑀅𑀲𑁆𑀲𑀼 𑀇𑀥 𑀲𑀢𑁆𑀢 𑀫𑀸𑀲𑀸, 𑀅𑀳𑀫𑁆𑀧𑀺 𑀢𑀁 𑀫𑀘𑁆𑀙𑀼𑀤𑁆𑀤𑀸𑀦𑀁 𑀓𑀺𑀡𑁂𑀬𑁆𑀬𑀁.

𑁧𑁧𑁩. 𑀫𑀘𑁆𑀙𑀸𑀦𑀁 𑀪𑁄𑀚𑀦𑀁 𑀤𑀢𑁆𑀯𑀸, 𑀫𑀫 𑀤𑀓𑁆𑀔𑀺𑀡𑀫𑀸𑀤𑀺𑀲𑀺;

𑀢𑀁 𑀤𑀓𑁆𑀔𑀺𑀡𑀁 𑀲𑀭𑀦𑁆𑀢𑀺𑀬𑀸, 𑀓𑀢𑀁 𑀅𑀧𑀘𑀺𑀢𑀺𑀁 𑀢𑀬𑀸.

𑁧𑁧𑁪. 𑀧𑀤𑀼𑀝𑁆𑀞𑀘𑀺𑀢𑁆𑀢𑀲𑁆𑀲 𑀦 𑀨𑀸𑀢𑀺 𑀳𑁄𑀢𑀺, 𑀦 𑀘𑀸𑀧𑀺 𑀢𑀁 [𑀦𑀁 (𑀲𑀻. 𑀲𑁆𑀬𑀸.)] 𑀤𑁂𑀯𑀢𑀸 𑀧𑀽𑀚𑀬𑀦𑁆𑀢𑀺;

𑀬𑁄 𑀪𑀸𑀢𑀭𑀁 𑀧𑁂𑀢𑁆𑀢𑀺𑀓𑀁 𑀲𑀸𑀧𑀢𑁂𑀬𑁆𑀬𑀁, 𑀅𑀯𑀜𑁆𑀘𑀬𑀻 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻𑀢𑀺.

𑀫𑀘𑁆𑀙𑀼𑀤𑁆𑀤𑀸𑀦𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁨𑁮𑁯. 𑀦𑀸𑀦𑀸𑀙𑀦𑁆𑀤𑀚𑀸𑀢𑀓𑀁 (𑁩-𑁪-𑁯)

𑁧𑁧𑁫. 𑀦𑀸𑀦𑀸𑀙𑀦𑁆𑀤𑀸 𑀫𑀳𑀸𑀭𑀸𑀚, 𑀏𑀓𑀸𑀕𑀸𑀭𑁂 𑀯𑀲𑀸𑀫𑀲𑁂;

𑀅𑀳𑀁 𑀕𑀸𑀫𑀯𑀭𑀁 𑀇𑀘𑁆𑀙𑁂, 𑀩𑁆𑀭𑀸𑀳𑁆𑀫𑀡𑀻 𑀘 𑀕𑀯𑀁 𑀲𑀢𑀁.

𑁧𑁧𑁬. 𑀧𑀼𑀢𑁆𑀢𑁄 𑀘 𑀆𑀚𑀜𑁆𑀜𑀭𑀣𑀁, 𑀓𑀜𑁆𑀜𑀸 𑀘 𑀫𑀡𑀺𑀓𑀼𑀡𑁆𑀟𑀮𑀁;

𑀬𑀸 𑀘𑁂𑀲𑀸 𑀧𑀼𑀡𑁆𑀡𑀺𑀓𑀸 𑀚𑀫𑁆𑀫𑀻, 𑀉𑀤𑀼𑀓𑁆𑀔𑀮𑀁𑀪𑀺𑀓𑀗𑁆𑀔𑀢𑀺.

𑁧𑁧𑁭. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑀸𑀫𑀯𑀭𑀁, 𑀩𑁆𑀭𑀸𑀳𑁆𑀫𑀡𑀺𑀬𑀸 𑀕𑀯𑀁 𑀲𑀢𑀁;

𑀧𑀼𑀢𑁆𑀢𑀲𑁆𑀲 𑀆𑀚𑀜𑁆𑀜𑀭𑀣𑀁, 𑀓𑀜𑁆𑀜𑀸𑀬 𑀫𑀡𑀺𑀓𑀼𑀡𑁆𑀟𑀮𑀁;

𑀬𑀜𑁆𑀘𑁂𑀢𑀁 𑀧𑀼𑀡𑁆𑀡𑀺𑀓𑀁 𑀚𑀫𑁆𑀫𑀺𑀁, 𑀧𑀝𑀺𑀧𑀸𑀤𑁂𑀣𑀼𑀤𑀼𑀓𑁆𑀔𑀮𑀦𑁆𑀢𑀺.

𑀦𑀸𑀦𑀸𑀙𑀦𑁆𑀤𑀚𑀸𑀢𑀓𑀁 𑀦𑀯𑀫𑀁.

𑁨𑁯𑁦. 𑀲𑀻𑀮𑀯𑀻𑀫𑀁𑀲𑀓𑀚𑀸𑀢𑀓𑀁 (𑁩-𑁪-𑁧𑁦)

𑁧𑁧𑁮. 𑀲𑀻𑀮𑀁 𑀓𑀺𑀭𑁂𑀯 𑀓𑀮𑁆𑀬𑀸𑀡𑀁, 𑀲𑀻𑀮𑀁 𑀮𑁄𑀓𑁂 𑀅𑀦𑀼𑀢𑁆𑀢𑀭𑀁;

𑀧𑀲𑁆𑀲 𑀖𑁄𑀭𑀯𑀺𑀲𑁄 𑀦𑀸𑀕𑁄, 𑀲𑀻𑀮𑀯𑀸𑀢𑀺 𑀦 𑀳𑀜𑁆𑀜𑀢𑀺.

𑁧𑁧𑁯. 𑀲𑁄𑀳𑀁 𑀲𑀻𑀮𑀁 𑀲𑀫𑀸𑀤𑀺𑀲𑁆𑀲𑀁, 𑀮𑁄𑀓𑁂 𑀅𑀦𑀼𑀫𑀢𑀁 𑀲𑀺𑀯𑀁;

𑀅𑀭𑀺𑀬𑀯𑀼𑀢𑁆𑀢𑀺𑀲𑀫𑀸𑀘𑀸𑀭𑁄, 𑀬𑁂𑀦 𑀯𑀼𑀘𑁆𑀘𑀢𑀺 𑀲𑀻𑀮𑀯𑀸.

𑁧𑁨𑁦. 𑀜𑀸𑀢𑀻𑀦𑀜𑁆𑀘 𑀧𑀺𑀬𑁄 𑀳𑁄𑀢𑀺, 𑀫𑀺𑀢𑁆𑀢𑁂𑀲𑀼 𑀘 𑀯𑀺𑀭𑁄𑀘𑀢𑀺;

𑀓𑀸𑀬𑀲𑁆𑀲 𑀪𑁂𑀤𑀸 𑀲𑀼𑀕𑀢𑀺𑀁, 𑀉𑀧𑀧𑀚𑁆𑀚𑀢𑀺 𑀲𑀻𑀮𑀯𑀸𑀢𑀺.

𑀲𑀻𑀮𑀯𑀻𑀫𑀁𑀲𑀓𑀚𑀸𑀢𑀓𑀁 𑀤𑀲𑀫𑀁.

𑀅𑀩𑁆𑀪𑀦𑁆𑀢𑀭𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑀼𑀫 𑀓𑀁𑀲𑀯𑀭𑀼𑀢𑁆𑀢𑀫𑀩𑁆𑀬𑀕𑁆𑀖𑀫𑀺𑀕𑀸, 𑀫𑀡𑀬𑁄 𑀫𑀡𑀺 𑀲𑀸𑀮𑀼𑀓𑀫𑀯𑁆𑀳𑀬𑀦𑁄;

𑀅𑀦𑀼𑀲𑀸𑀲𑀦𑀺𑀬𑁄𑀧𑀺 𑀘 𑀫𑀘𑁆𑀙𑀯𑀭𑁄, 𑀫𑀡𑀺𑀓𑀼𑀡𑁆𑀟𑀮𑀓𑁂𑀦 𑀓𑀺𑀭𑁂𑀦 𑀤𑀲𑀸𑀢𑀺.