𑁫. 𑀓𑀼𑀫𑁆𑀪𑀯𑀕𑁆𑀕𑁄

𑁨𑁯𑁧. 𑀲𑀼𑀭𑀸𑀖𑀝𑀚𑀸𑀢𑀓𑀁 (𑁨-𑁫-𑁧)

𑁧𑁨𑁧. 𑀲𑀩𑁆𑀩𑀓𑀸𑀫𑀤𑀤𑀁 𑀓𑀼𑀫𑁆𑀪𑀁, 𑀓𑀼𑀝𑀁 𑀮𑀤𑁆𑀥𑀸𑀦 𑀥𑀼𑀢𑁆𑀢𑀓𑁄;

𑀬𑀸𑀯 𑀦𑀁 𑀅𑀦𑀼𑀧𑀸𑀮𑁂𑀢𑀺, 𑀢𑀸𑀯 𑀲𑁄 𑀲𑀼𑀔𑀫𑁂𑀥𑀢𑀺.

𑁧𑁨𑁨. 𑀬𑀤𑀸 𑀫𑀢𑁆𑀢𑁄 𑀘 𑀤𑀺𑀢𑁆𑀢𑁄 𑀘, 𑀧𑀫𑀸𑀤𑀸 𑀓𑀼𑀫𑁆𑀪𑀫𑀩𑁆𑀪𑀺𑀤𑀸;

𑀢𑀤𑀸 𑀦𑀕𑁆𑀕𑁄 𑀘 𑀧𑁄𑀢𑁆𑀣𑁄 𑀘, 𑀧𑀘𑁆𑀙𑀸 𑀩𑀸𑀮𑁄 𑀯𑀺𑀳𑀜𑁆𑀜𑀢𑀺.

𑁧𑁨𑁩. 𑀏𑀯𑀫𑁂𑀯 𑀬𑁄 𑀥𑀦𑀁 𑀮𑀤𑁆𑀥𑀸, 𑀧𑀫𑀢𑁆𑀢𑁄 [𑀅𑀫𑀢𑁆𑀢𑀸 (𑀲𑀻.), 𑀅𑀫𑀢𑁆𑀢𑁄 (𑀧𑀻.)] 𑀧𑀭𑀺𑀪𑀼𑀜𑁆𑀚𑀢𑀺;

𑀧𑀘𑁆𑀙𑀸 𑀢𑀧𑁆𑀧𑀢𑀺 𑀤𑀼𑀫𑁆𑀫𑁂𑀥𑁄, 𑀓𑀼𑀝𑀁 𑀪𑀺𑀢𑁆𑀯𑀸𑀯 [𑀓𑀼𑀝𑀁 𑀪𑀺𑀦𑁆𑀦𑁄𑀯 (𑀲𑀻. 𑀧𑀻.), 𑀓𑀼𑀝𑀪𑀺𑀦𑁆𑀦𑁄𑀯 (?)] 𑀥𑀼𑀢𑁆𑀢𑀓𑁄𑀢𑀺.

𑀲𑀼𑀭𑀸𑀖𑀝 [𑀪𑀤𑁆𑀭𑀖𑀝 (𑀲𑀻. 𑀧𑀻.), 𑀪𑀤𑁆𑀭𑀖𑀝𑀪𑁂𑀤𑀓 (𑀲𑁆𑀬𑀸.)] 𑀚𑀸𑀢𑀓𑀁 𑀧𑀞𑀫𑀁.

𑁨𑁯𑁨. 𑀲𑀼𑀧𑀢𑁆𑀢𑀚𑀸𑀢𑀓𑀁 (𑁩-𑁫-𑁨)

𑁧𑁨𑁪. 𑀩𑀸𑀭𑀸𑀡𑀲𑁆𑀬𑀁 [𑀩𑀸𑀭𑀸𑀡𑀲𑁆𑀲𑀁 (𑀲𑀻. 𑀧𑀻.)] 𑀫𑀳𑀸𑀭𑀸𑀚, 𑀓𑀸𑀓𑀭𑀸𑀚𑀸 𑀦𑀺𑀯𑀸𑀲𑀓𑁄 [𑀦𑀺𑀯𑀸𑀲𑀺𑀓𑁄 (𑀲𑀻. 𑀧𑀻.)];

𑀅𑀲𑀻𑀢𑀺𑀬𑀸 𑀲𑀳𑀲𑁆𑀲𑁂𑀳𑀺, 𑀲𑀼𑀧𑀢𑁆𑀢𑁄 𑀧𑀭𑀺𑀯𑀸𑀭𑀺𑀢𑁄.

𑁧𑁨𑁫. 𑀢𑀲𑁆𑀲 𑀤𑁄𑀳𑀴𑀺𑀦𑀻 𑀪𑀭𑀺𑀬𑀸, 𑀲𑀼𑀨𑀲𑁆𑀲𑀸 𑀪𑀓𑁆𑀔𑀺𑀢𑀼𑀫𑀺𑀘𑁆𑀙𑀢𑀺 [𑀫𑀘𑁆𑀙𑀫𑀺𑀘𑁆𑀙𑀢𑀺 (𑀲𑀻. 𑀧𑀻.)];

𑀭𑀜𑁆𑀜𑁄 𑀫𑀳𑀸𑀦𑀲𑁂 𑀧𑀓𑁆𑀓𑀁, 𑀧𑀘𑁆𑀘𑀕𑁆𑀖𑀁 𑀭𑀸𑀚𑀪𑁄𑀚𑀦𑀁.

𑁧𑁨𑁬. 𑀢𑁂𑀲𑀸𑀳𑀁 𑀧𑀳𑀺𑀢𑁄 𑀤𑀽𑀢𑁄, 𑀭𑀜𑁆𑀜𑁄 𑀘𑀫𑁆𑀳𑀺 𑀇𑀥𑀸𑀕𑀢𑁄;

𑀪𑀢𑁆𑀢𑀼 𑀅𑀧𑀘𑀺𑀢𑀺𑀁 𑀓𑀼𑀫𑁆𑀫𑀺, 𑀦𑀸𑀲𑀸𑀬𑀫𑀓𑀭𑀁 [𑀫𑀓𑀭𑀺𑀁 (𑀲𑀻. 𑀦𑀺𑀲𑁆𑀲𑀬)] 𑀯𑀡𑀦𑁆𑀢𑀺.

𑀲𑀼𑀧𑀢𑁆𑀢𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁨𑁯𑁩. 𑀓𑀸𑀬𑀦𑀺𑀩𑁆𑀩𑀺𑀦𑁆𑀤𑀚𑀸𑀢𑀓𑀁 (𑁩-𑁫-𑁩)

𑁧𑁨𑁭. 𑀨𑀼𑀝𑁆𑀞𑀲𑁆𑀲 𑀫𑁂 𑀅𑀜𑁆𑀜𑀢𑀭𑁂𑀦 𑀩𑁆𑀬𑀸𑀥𑀺𑀦𑀸, 𑀭𑁄𑀕𑁂𑀦 𑀩𑀸𑀴𑁆𑀳𑀁 𑀤𑀼𑀔𑀺𑀢𑀲𑁆𑀲 𑀭𑀼𑀧𑁆𑀧𑀢𑁄;

𑀧𑀭𑀺𑀲𑀼𑀲𑁆𑀲𑀢𑀺 𑀔𑀺𑀧𑁆𑀧𑀫𑀺𑀤𑀁 𑀓𑀴𑁂𑀯𑀭𑀁, 𑀧𑀼𑀧𑁆𑀨𑀁 𑀬𑀣𑀸 𑀧𑀁𑀲𑀼𑀦𑀺 𑀆𑀢𑀧𑁂 𑀓𑀢𑀁.

𑁧𑁨𑁮. 𑀅𑀚𑀜𑁆𑀜𑀁 𑀚𑀜𑁆𑀜𑀲𑀗𑁆𑀔𑀸𑀢𑀁, 𑀅𑀲𑀼𑀘𑀺𑀁 𑀲𑀼𑀘𑀺𑀲𑀫𑁆𑀫𑀢𑀁;

𑀦𑀸𑀦𑀸𑀓𑀼𑀡𑀧𑀧𑀭𑀺𑀧𑀽𑀭𑀁, 𑀚𑀜𑁆𑀜𑀭𑀽𑀧𑀁 𑀅𑀧𑀲𑁆𑀲𑀢𑁄.

𑁧𑁨𑁯. 𑀥𑀺𑀭𑀢𑁆𑀣𑀼𑀫𑀁 𑀆𑀢𑀼𑀭𑀁 𑀧𑀽𑀢𑀺𑀓𑀸𑀬𑀁, 𑀚𑁂𑀕𑀼𑀘𑁆𑀙𑀺𑀬𑀁 𑀅𑀲𑁆𑀲𑀼𑀘𑀺𑀁 𑀩𑁆𑀬𑀸𑀥𑀺𑀥𑀫𑁆𑀫𑀁;

𑀬𑀢𑁆𑀣𑀧𑁆𑀧𑀫𑀢𑁆𑀢𑀸 𑀅𑀥𑀺𑀫𑀼𑀘𑁆𑀙𑀺𑀢𑀸 𑀧𑀚𑀸, 𑀳𑀸𑀧𑁂𑀦𑁆𑀢𑀺 𑀫𑀕𑁆𑀕𑀁 𑀲𑀼𑀕𑀢𑀽𑀧𑀧𑀢𑁆𑀢𑀺𑀬𑀸𑀢𑀺.

𑀓𑀸𑀬𑀦𑀺𑀩𑁆𑀩𑀺𑀦𑁆𑀤 [𑀓𑀸𑀬𑀯𑀺𑀘𑁆𑀙𑀦𑁆𑀤 (𑀲𑀻.), 𑀓𑀸𑀬𑀯𑀺𑀘𑁆𑀙𑀺𑀦𑁆𑀤 (𑀧𑀻.)] 𑀚𑀸𑀢𑀓𑀁 𑀢𑀢𑀺𑀬𑀁.

𑁨𑁯𑁪. 𑀚𑀫𑁆𑀩𑀼𑀔𑀸𑀤𑀓𑀚𑀸𑀢𑀓𑀁 (𑁩-𑁫-𑁪)

𑁧𑁩𑁦. 𑀓𑁄𑀬𑀁 𑀩𑀺𑀦𑁆𑀤𑀼𑀲𑁆𑀲𑀭𑁄 𑀯𑀕𑁆𑀕𑀼, 𑀲𑀭𑀯𑀦𑁆𑀢𑀸𑀦 [𑀧𑀯𑀤𑀦𑁆𑀢𑀸𑀦 (𑀲𑀻. 𑀧𑀻.)] 𑀫𑀼𑀢𑁆𑀢𑀫𑁄;

𑀅𑀘𑁆𑀘𑀼𑀢𑁄 𑀚𑀫𑁆𑀩𑀼𑀲𑀸𑀔𑀸𑀬, 𑀫𑁄𑀭𑀘𑁆𑀙𑀸𑀧𑁄𑀯 𑀓𑀽𑀚𑀢𑀺.

𑁧𑁩𑁧. 𑀓𑀼𑀮𑀧𑀼𑀢𑁆𑀢𑁄𑀯 𑀚𑀸𑀦𑀸𑀢𑀺 [𑀓𑀼𑀮𑀧𑀼𑀢𑁆𑀢𑁄 𑀧𑀚𑀸𑀦𑀸𑀢𑀺 (𑀲𑁆𑀬𑀸. 𑀓.)], 𑀓𑀼𑀮𑀧𑀼𑀢𑁆𑀢𑀁 [𑀓𑀼𑀮𑀧𑀼𑀢𑁆𑀢𑁂 (𑀲𑀻. 𑀧𑀻.)] 𑀧𑀲𑀁𑀲𑀺𑀢𑀼𑀁;

𑀩𑁆𑀬𑀕𑁆𑀖𑀘𑁆𑀙𑀸𑀧𑀲𑀭𑀻𑀯𑀡𑁆𑀡, 𑀪𑀼𑀜𑁆𑀚 𑀲𑀫𑁆𑀫 𑀤𑀤𑀸𑀫𑀺 𑀢𑁂.

𑁧𑁩𑁨. 𑀘𑀺𑀭𑀲𑁆𑀲𑀁 𑀯𑀢 𑀧𑀲𑁆𑀲𑀸𑀫𑀺, 𑀫𑀼𑀲𑀸𑀯𑀸𑀤𑀻 𑀲𑀫𑀸𑀕𑀢𑁂;

𑀯𑀦𑁆𑀢𑀸𑀤𑀁 𑀓𑀼𑀡𑀧𑀸𑀤𑀜𑁆𑀘, 𑀅𑀜𑁆𑀜𑀫𑀜𑁆𑀜𑀁 𑀧𑀲𑀁𑀲𑀓𑁂𑀢𑀺.

𑀚𑀫𑁆𑀩𑀼𑀔𑀸𑀤𑀓𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁨𑁯𑁫. 𑀅𑀦𑁆𑀢𑀚𑀸𑀢𑀓𑀁 (𑁩-𑁫-𑁫)

𑁧𑁩𑁩. 𑀉𑀲𑀪𑀲𑁆𑀲𑁂𑀯 𑀢𑁂 𑀔𑀦𑁆𑀥𑁄, 𑀲𑀻𑀳𑀲𑁆𑀲𑁂𑀯 𑀯𑀺𑀚𑀫𑁆𑀪𑀺𑀢𑀁;

𑀫𑀺𑀕𑀭𑀸𑀚 𑀦𑀫𑁄 𑀢𑁆𑀬𑀢𑁆𑀣𑀼, 𑀅𑀧𑀺 𑀓𑀺𑀜𑁆𑀘𑀺 𑀮𑀪𑀸𑀫𑀲𑁂.

𑁧𑁩𑁪. 𑀓𑀼𑀮𑀧𑀼𑀢𑁆𑀢𑁄𑀯 𑀚𑀸𑀦𑀸𑀢𑀺, 𑀓𑀼𑀮𑀧𑀼𑀢𑁆𑀢𑀁 𑀧𑀲𑀁𑀲𑀺𑀢𑀼𑀁;

𑀫𑀬𑀽𑀭𑀕𑀻𑀯𑀲𑀗𑁆𑀓𑀸𑀲, 𑀇𑀢𑁄 𑀧𑀭𑀺𑀬𑀸𑀳𑀺 𑀯𑀸𑀬𑀲.

𑁧𑁩𑁫. 𑀫𑀺𑀕𑀸𑀦𑀁 𑀲𑀺𑀗𑁆𑀕𑀸𑀮𑁄 [𑀓𑁄𑀢𑁆𑀣𑀼𑀓𑁄 (𑀲𑀻. 𑀧𑀻.), 𑀓𑁄𑀝𑁆𑀞𑀼𑀓𑁄 (𑀲𑁆𑀬𑀸.)] 𑀅𑀦𑁆𑀢𑁄, 𑀧𑀓𑁆𑀔𑀻𑀦𑀁 𑀧𑀦 𑀯𑀸𑀬𑀲𑁄;

𑀏𑀭𑀡𑁆𑀟𑁄 𑀅𑀦𑁆𑀢𑁄 𑀭𑀼𑀓𑁆𑀔𑀸𑀦𑀁, 𑀢𑀬𑁄 𑀅𑀦𑁆𑀢𑀸 𑀲𑀫𑀸𑀕𑀢𑀸𑀢𑀺.

𑀅𑀦𑁆𑀢𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁨𑁯𑁬. 𑀲𑀫𑀼𑀤𑁆𑀤𑀚𑀸𑀢𑀓𑀁 (𑁩-𑁫-𑁬)

𑁧𑁩𑁬. 𑀓𑁄 𑀦𑀸𑀬𑀁 [𑀓𑁄 𑀦𑁆𑀯𑀸𑀬𑀁 (𑀲𑁆𑀬𑀸.)] 𑀮𑁄𑀡𑀢𑁄𑀬𑀲𑁆𑀫𑀺𑀁, 𑀲𑀫𑀦𑁆𑀢𑀸 𑀧𑀭𑀺𑀥𑀸𑀯𑀢𑀺;

𑀫𑀘𑁆𑀙𑁂 𑀫𑀓𑀭𑁂 𑀘 𑀯𑀸𑀭𑁂𑀢𑀺, 𑀊𑀫𑀻𑀲𑀼 𑀘 𑀯𑀺𑀳𑀜𑁆𑀜𑀢𑀺.

𑁧𑁩𑁭. 𑀅𑀦𑀦𑁆𑀢𑀧𑀸𑀬𑀻 𑀲𑀓𑀼𑀡𑁄, 𑀅𑀢𑀺𑀢𑁆𑀢𑁄𑀢𑀺 𑀤𑀺𑀲𑀸𑀲𑀼𑀢𑁄;

𑀲𑀫𑀼𑀤𑁆𑀤𑀁 𑀧𑀸𑀢𑀼𑀫𑀺𑀘𑁆𑀙𑀸𑀫𑀺, 𑀲𑀸𑀕𑀭𑀁 𑀲𑀭𑀺𑀢𑀁 𑀧𑀢𑀺𑀁.

𑁧𑁩𑁮. 𑀲𑁄 𑀅𑀬𑀁 𑀳𑀸𑀬𑀢𑀺 𑀘𑁂𑀯, 𑀧𑀽𑀭𑀢𑁂 𑀘 𑀫𑀳𑁄𑀤𑀥𑀺;

𑀦𑀸𑀲𑁆𑀲 𑀦𑀸𑀬𑀢𑀺 𑀧𑀻𑀢𑀦𑁆𑀢𑁄, 𑀅𑀧𑁂𑀬𑁆𑀬𑁄 𑀓𑀺𑀭 𑀲𑀸𑀕𑀭𑁄𑀢𑀺.

𑀲𑀫𑀼𑀤𑁆𑀤𑀚𑀸𑀢𑀓𑀁 𑀙𑀝𑁆𑀞𑀁.

𑁨𑁯𑁭. 𑀓𑀸𑀫𑀯𑀺𑀮𑀸𑀧𑀚𑀸𑀢𑀓𑀁 (𑁩-𑁫-𑁭)

𑁧𑁩𑁯. 𑀉𑀘𑁆𑀘𑁂 𑀲𑀓𑀼𑀡 𑀟𑁂𑀫𑀸𑀦, 𑀧𑀢𑁆𑀢𑀬𑀸𑀦 𑀯𑀺𑀳𑀗𑁆𑀕𑀫;

𑀯𑀚𑁆𑀚𑀸𑀲𑀺 𑀔𑁄 𑀢𑁆𑀯𑀁 𑀯𑀸𑀫𑀽𑀭𑀼𑀁, 𑀘𑀺𑀭𑀁 𑀔𑁄 𑀲𑀸 𑀓𑀭𑀺𑀲𑁆𑀲𑀢𑀺 [𑀲𑀭𑀺𑀲𑁆𑀲𑀢𑀺 (𑀓.)].

𑁧𑁪𑁦. 𑀇𑀤𑀁 𑀔𑁄 𑀲𑀸 𑀦 𑀚𑀸𑀦𑀸𑀢𑀺, 𑀅𑀲𑀺𑀁 𑀲𑀢𑁆𑀢𑀺𑀜𑁆𑀘 𑀑𑀟𑁆𑀟𑀺𑀢𑀁;

𑀲𑀸 𑀘𑀡𑁆𑀟𑀻 𑀓𑀸𑀳𑀢𑀺 𑀓𑁄𑀥𑀁, 𑀢𑀁 𑀫𑁂 𑀢𑀧𑀢𑀺 𑀦𑁄 𑀇𑀤𑀁 [𑀦𑁄 𑀇𑀥 (𑀲𑀻. 𑀲𑁆𑀬𑀸. 𑀧𑀻.)].

𑁧𑁪𑁧. 𑀏𑀲 𑀉𑀧𑁆𑀧𑀮𑀲𑀦𑁆𑀦𑀸𑀳𑁄, 𑀦𑀺𑀓𑁆𑀔𑀜𑁆𑀘𑀼𑀲𑁆𑀲𑀻𑀲𑀓𑁄𑀳𑀺𑀢𑀁 [𑀦𑀺𑀓𑁆𑀔𑀫𑀼𑀲𑁆𑀲𑀻𑀲𑀓𑁂 𑀓𑀢𑀁 (𑀲𑀻. 𑀧𑀻.), 𑀦𑀺𑀓𑁆𑀔𑀜𑁆𑀘𑀼𑀲𑁆𑀲𑀻𑀲𑀓𑁂 𑀓𑀢𑀁 (𑀲𑁆𑀬𑀸.)];

𑀓𑀸𑀲𑀺𑀓𑀜𑁆𑀘 𑀫𑀼𑀤𑀼𑀁 𑀯𑀢𑁆𑀣𑀁, 𑀢𑀧𑁆𑀧𑁂𑀢𑀼 𑀥𑀦𑀺𑀓𑀸 𑀧𑀺𑀬𑀸𑀢𑀺 [𑀥𑀦𑀓𑀸𑀫𑀺𑀬𑀸𑀢𑀺 (𑀲𑁆𑀬𑀸. 𑀧𑀻.), 𑀥𑀦𑀓𑀸𑀫𑀺𑀓𑀸𑀢𑀺 (𑀲𑀻.)].

𑀓𑀸𑀫𑀯𑀺𑀮𑀸𑀧𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁨𑁯𑁮. 𑀉𑀤𑀼𑀫𑁆𑀩𑀭𑀚𑀸𑀢𑀓𑀁 (𑁩-𑁫-𑁮)

𑁧𑁪𑁨. 𑀉𑀤𑀼𑀫𑁆𑀩𑀭𑀸 𑀘𑀺𑀫𑁂 𑀧𑀓𑁆𑀓𑀸, 𑀦𑀺𑀕𑁆𑀭𑁄𑀥𑀸 𑀘 𑀓𑀧𑀺𑀢𑁆𑀣𑀦𑀸;

𑀏𑀳𑀺 𑀦𑀺𑀓𑁆𑀔𑀫 𑀪𑀼𑀜𑁆𑀚𑀲𑁆𑀲𑀼, 𑀓𑀺𑀁 𑀚𑀺𑀖𑀘𑁆𑀙𑀸𑀬 𑀫𑀺𑀬𑁆𑀬𑀲𑀺.

𑁧𑁪𑁩. 𑀏𑀯𑀁 𑀲𑁄 𑀲𑀼𑀳𑀺𑀢𑁄 𑀳𑁄𑀢𑀺, 𑀬𑁄 𑀯𑀼𑀟𑁆𑀠𑀫𑀧𑀘𑀸𑀬𑀢𑀺;

𑀬𑀣𑀸𑀳𑀫𑀚𑁆𑀚 𑀲𑀼𑀳𑀺𑀢𑁄, 𑀤𑀼𑀫𑀧𑀓𑁆𑀓𑀸𑀦𑀺 𑀫𑀸𑀲𑀺𑀢𑁄.

𑁧𑁪𑁪. 𑀬𑀁 𑀯𑀦𑁂𑀚𑁄 𑀯𑀦𑁂𑀚𑀲𑁆𑀲, 𑀯𑀜𑁆𑀘𑁂𑀬𑁆𑀬 𑀓𑀧𑀺𑀦𑁄 𑀓𑀧𑀺;

𑀤𑀳𑀭𑁄 𑀓𑀧𑀺 [𑀤𑀳𑀭𑁄𑀧𑀺 𑀢𑀁 𑀦 (𑀲𑀻. 𑀧𑀻.), 𑀤𑀳𑀭𑁄𑀧𑀺 𑀦 (𑀲𑁆𑀬𑀸.)] 𑀲𑀤𑁆𑀥𑁂𑀬𑁆𑀬, 𑀦 𑀳𑀺 𑀚𑀺𑀡𑁆𑀡𑁄 𑀚𑀭𑀸𑀓𑀧𑀻𑀢𑀺.

𑀉𑀤𑀼𑀫𑁆𑀩𑀭𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁨𑁯𑁯. 𑀓𑁄𑀫𑀸𑀭𑀧𑀼𑀢𑁆𑀢𑀚𑀸𑀢𑀓𑀁 (𑁩-𑁫-𑁯)

𑁧𑁪𑁫. 𑀧𑀼𑀭𑁂 𑀢𑀼𑀯𑀁 𑀲𑀻𑀮𑀯𑀢𑀁 𑀲𑀓𑀸𑀲𑁂, 𑀑𑀓𑁆𑀓𑀦𑁆𑀢𑀺𑀓𑀁 [𑀑𑀓𑁆𑀓𑀦𑁆𑀤𑀺𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀓𑀻𑀴𑀲𑀺 𑀅𑀲𑁆𑀲𑀫𑀫𑁆𑀳𑀺;

𑀓𑀭𑁄𑀳𑀭𑁂 [𑀓𑀭𑁄𑀳𑀺 𑀭𑁂 (𑀓.)] 𑀫𑀓𑁆𑀓𑀝𑀺𑀬𑀸𑀦𑀺 𑀫𑀓𑁆𑀓𑀝, 𑀦 𑀢𑀁 𑀫𑀬𑀁 𑀲𑀻𑀮𑀯𑀢𑀁 𑀭𑀫𑀸𑀫.

𑁧𑁪𑁬. 𑀲𑀼𑀢𑀸 𑀳𑀺 𑀫𑀬𑁆𑀳𑀁 𑀧𑀭𑀫𑀸 𑀯𑀺𑀲𑀼𑀤𑁆𑀥𑀺, 𑀓𑁄𑀫𑀸𑀭𑀧𑀼𑀢𑁆𑀢𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲;

𑀫𑀸 𑀤𑀸𑀦𑀺 𑀫𑀁 𑀫𑀜𑁆𑀜𑀺 𑀢𑀼𑀯𑀁 𑀬𑀣𑀸 𑀧𑀼𑀭𑁂, 𑀛𑀸𑀦𑀸𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀸𑀫𑀺 [𑀛𑀸𑀦𑀸𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀸𑀫 (𑀲𑀻. 𑀧𑀻.)] 𑀆𑀯𑀼𑀲𑁄.

𑁧𑁪𑁭. 𑀲𑀘𑁂𑀧𑀺 𑀲𑁂𑀮𑀲𑁆𑀫𑀺 𑀯𑀧𑁂𑀬𑁆𑀬 𑀩𑀻𑀚𑀁, 𑀤𑁂𑀯𑁄 𑀘 𑀯𑀲𑁆𑀲𑁂 𑀦 𑀳𑀺 𑀢𑀁 𑀯𑀺𑀭𑀽𑀴𑁆𑀳𑁂 [𑀦𑁂𑀯 𑀳𑀺 𑀢𑀁 𑀭𑀼𑀳𑁂𑀬𑁆𑀬 (𑀲𑀻. 𑀧𑀻.), 𑀦 𑀳𑀺 𑀢𑀁 𑀯𑀺𑀭𑀽𑀳𑁂 (?)];

𑀲𑀼𑀢𑀸 𑀳𑀺 𑀢𑁂 𑀲𑀸 𑀧𑀭𑀫𑀸 𑀯𑀺𑀲𑀼𑀤𑁆𑀥𑀺, 𑀆𑀭𑀸 𑀢𑀼𑀯𑀁 𑀫𑀓𑁆𑀓𑀝 𑀛𑀸𑀦𑀪𑀽𑀫𑀺𑀬𑀸𑀢𑀺.

𑀓𑁄𑀫𑀸𑀭𑀧𑀼𑀢𑁆𑀢𑀚𑀸𑀢𑀓𑀁 𑀦𑀯𑀫𑀁.

𑁩𑁦𑁦. 𑀯𑀓𑀚𑀸𑀢𑀓𑀁 (𑁩-𑁫-𑁧𑁦)

𑁧𑁪𑁮. 𑀧𑀭𑀧𑀸𑀡𑀭𑁄𑀥𑀸 [𑀧𑀭𑀧𑀸𑀡𑀖𑀸𑀢𑁂 (𑀲𑁆𑀬𑀸.), 𑀧𑀭𑀧𑀸𑀡𑀭𑁄𑀘𑀁 (𑀓.)] 𑀚𑀻𑀯𑀦𑁆𑀢𑁄, 𑀫𑀁𑀲𑀮𑁄𑀳𑀺𑀢𑀪𑁄𑀚𑀦𑁄;

𑀯𑀓𑁄 𑀯𑀢𑀁 𑀲𑀫𑀸𑀤𑀸𑀬, 𑀉𑀧𑀧𑀚𑁆𑀚𑀺 𑀉𑀧𑁄𑀲𑀣𑀁.

𑁧𑁪𑁯. 𑀢𑀲𑁆𑀲 𑀲𑀓𑁆𑀓𑁄 𑀯𑀢𑀜𑁆𑀜𑀸𑀬, 𑀅𑀚𑀭𑀽𑀧𑁂𑀦𑀼𑀧𑀸𑀕𑀫𑀺;

𑀯𑀻𑀢𑀢𑀧𑁄 𑀅𑀚𑁆𑀛𑀧𑁆𑀧𑀢𑁆𑀢𑁄, 𑀪𑀜𑁆𑀚𑀺 𑀮𑁄𑀳𑀺𑀢𑀧𑁄 𑀢𑀧𑀁.

𑁧𑁫𑁦. 𑀏𑀯𑀫𑁂𑀯 𑀇𑀥𑁂𑀓𑀘𑁆𑀘𑁂, 𑀲𑀫𑀸𑀤𑀸𑀦𑀫𑁆𑀳𑀺 𑀤𑀼𑀩𑁆𑀩𑀮𑀸;

𑀮𑀳𑀼𑀁 𑀓𑀭𑁄𑀦𑁆𑀢𑀺 𑀅𑀢𑁆𑀢𑀸𑀦𑀁, 𑀯𑀓𑁄𑀯 𑀅𑀚𑀓𑀸𑀭𑀡𑀸𑀢𑀺.

𑀯𑀓𑀚𑀸𑀢𑀓𑀁 𑀤𑀲𑀫𑀁.

𑀓𑀼𑀫𑁆𑀪𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀭𑀓𑀼𑀫𑁆𑀪 𑀲𑀼𑀧𑀢𑁆𑀢𑀲𑀺𑀭𑀺𑀯𑁆𑀳𑀬𑀦𑁄, 𑀲𑀼𑀘𑀺𑀲𑀫𑁆𑀫𑀢 𑀩𑀺𑀦𑁆𑀤𑀼𑀲𑀭𑁄 𑀘𑀼𑀲𑀪𑁄;

𑀲𑀭𑀺𑀢𑀁𑀧𑀢𑀺 𑀘𑀡𑁆𑀟𑀺 𑀚𑀭𑀸𑀓𑀧𑀺𑀦𑀸, 𑀅𑀣 𑀫𑀓𑁆𑀓𑀝𑀺𑀬𑀸 𑀯𑀓𑀓𑁂𑀦 𑀤𑀲𑀸𑀢𑀺.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀲𑀗𑁆𑀓𑀧𑁆𑀧𑁄 𑀧𑀤𑀼𑀫𑁄 𑀘𑁂𑀯, 𑀉𑀤𑀧𑀸𑀦𑁂𑀦 𑀢𑀢𑀺𑀬𑀁;

𑀅𑀩𑁆𑀪𑀦𑁆𑀢𑀭𑀁 𑀖𑀝𑀪𑁂𑀤𑀁, 𑀢𑀺𑀓𑀦𑀺𑀧𑀸𑀢𑀫𑁆𑀳𑀺𑀮𑀗𑁆𑀓𑀢𑀦𑁆𑀢𑀺.

𑀢𑀺𑀓𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.