𑁨𑁭𑁭. 𑀭𑁄𑀫𑀓𑀚𑀸𑀢𑀓𑀁 (𑁩-𑁩-𑁭)

𑁭𑁯. 𑀯𑀲𑁆𑀲𑀸𑀦𑀺 𑀧𑀜𑁆𑀜𑀸𑀲 𑀲𑀫𑀸𑀥𑀺𑀓𑀸𑀦𑀺, 𑀯𑀲𑀺𑀫𑁆𑀳 𑀲𑁂𑀮𑀲𑁆𑀲 𑀕𑀼𑀳𑀸𑀬 𑀭𑁄𑀫𑀓;

𑀅𑀲𑀗𑁆𑀓𑀫𑀸𑀦𑀸 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑀸 [𑀅𑀪𑀺𑀦𑀺𑀩𑁆𑀩𑀼𑀢𑀘𑀺𑀢𑁆𑀢𑀸 (𑀲𑁆𑀬𑀸. 𑀓.)], 𑀳𑀢𑁆𑀣𑀢𑁆𑀢 [𑀳𑀢𑁆𑀣𑀢𑁆𑀣 (𑀲𑁆𑀬𑀸.)] 𑀫𑀸𑀬𑀦𑁆𑀢𑀺 𑀫𑀫𑀡𑁆𑀟𑀚𑀸 𑀧𑀼𑀭𑁂.

𑁮𑁦. 𑀢𑁂 𑀤𑀸𑀦𑀺 𑀯𑀓𑁆𑀓𑀗𑁆𑀕 𑀓𑀺𑀫𑀢𑁆𑀣𑀫𑀼𑀲𑁆𑀲𑀼𑀓𑀸, 𑀪𑀚𑀦𑁆𑀢𑀺 𑀅𑀜𑁆𑀜𑀁 𑀕𑀺𑀭𑀺𑀓𑀦𑁆𑀤𑀭𑀁 𑀤𑀺𑀚𑀸;

𑀦 𑀦𑀽𑀦 𑀫𑀜𑁆𑀜𑀦𑁆𑀢𑀺 𑀫𑀫𑀁 𑀬𑀣𑀸 𑀧𑀼𑀭𑁂, 𑀘𑀺𑀭𑀧𑁆𑀧𑀯𑀼𑀢𑁆𑀣𑀸 𑀅𑀣 𑀯𑀸 𑀦 𑀢𑁂 𑀇𑀫𑁂.

𑁮𑁧. 𑀚𑀸𑀦𑀸𑀫 𑀢𑀁 𑀦 𑀫𑀬𑀁 𑀲𑀫𑁆𑀧𑀫𑀽𑀴𑁆𑀳𑀸 [𑀦 𑀫𑀬’𑀫𑀲𑁆𑀫 𑀫𑀽𑀴𑁆𑀳𑀸 (𑀲𑀻. 𑀧𑀻.)], 𑀲𑁄𑀬𑁂𑀯 𑀢𑁆𑀯𑀁 𑀢𑁂 𑀫𑀬𑀫𑀲𑁆𑀫 𑀦𑀸𑀜𑁆𑀜𑁂;

𑀘𑀺𑀢𑁆𑀢𑀜𑁆𑀘 𑀢𑁂 𑀅𑀲𑁆𑀫𑀺𑀁 𑀚𑀦𑁂 𑀧𑀤𑀼𑀝𑁆𑀞𑀁, 𑀆𑀚𑀻𑀯𑀺𑀓𑀸 [𑀆𑀚𑀻𑀯𑀓 (𑀲𑀻. 𑀲𑁆𑀬𑀸.), 𑀆𑀚𑀻𑀯𑀺𑀓 (𑀧𑀻.)] 𑀢𑁂𑀦 𑀢𑀫𑀼𑀢𑁆𑀢𑀲𑀸𑀫𑀸𑀢𑀺.

𑀭𑁄𑀫𑀓𑀚𑀸𑀢𑀓𑀁 𑀲𑀢𑁆𑀢𑀫𑀁.