𑁩. 𑀉𑀤𑀧𑀸𑀦𑀯𑀕𑁆𑀕𑁄

𑁨𑁭𑁧. 𑀉𑀤𑀧𑀸𑀦𑀤𑀽𑀲𑀓𑀚𑀸𑀢𑀓𑀁 (𑁩-𑁩-𑁧)

𑁬𑁧. 𑀆𑀭𑀜𑁆𑀜𑀺𑀓𑀲𑁆𑀲 𑀇𑀲𑀺𑀦𑁄, 𑀘𑀺𑀭𑀭𑀢𑁆𑀢𑀁 𑀢𑀧𑀲𑁆𑀲𑀺𑀦𑁄;

𑀓𑀺𑀘𑁆𑀙𑀸𑀓𑀢𑀁 𑀉𑀤𑀧𑀸𑀦𑀁, 𑀓𑀣𑀁 𑀲𑀫𑁆𑀫 𑀅𑀯𑀸𑀳𑀲𑀺 [𑀅𑀯𑀸𑀳𑀬𑀺 (𑀲𑀻. 𑀧𑀻.), 𑀅𑀧𑀸𑀳𑀲𑀺 (𑀲𑁆𑀬𑀸.)].

𑁬𑁨. 𑀏𑀲 𑀥𑀫𑁆𑀫𑁄 𑀲𑀺𑀗𑁆𑀕𑀸𑀮𑀸𑀦𑀁, 𑀬𑀁 𑀧𑀺𑀢𑁆𑀯𑀸 𑀑𑀳𑀤𑀸𑀫𑀲𑁂;

𑀧𑀺𑀢𑀼𑀧𑀺𑀢𑀸𑀫𑀳𑀁 𑀥𑀫𑁆𑀫𑁄, 𑀦 𑀢𑀁 [𑀦 𑀦𑀁 (𑀲𑀻. 𑀧𑀻.)] 𑀉𑀚𑁆𑀛𑀸𑀢𑀼𑀫𑀭𑀳𑀲𑀺.

𑁬𑁩. 𑀬𑁂𑀲𑀁 𑀯𑁄 𑀏𑀤𑀺𑀲𑁄 𑀥𑀫𑁆𑀫𑁄, 𑀅𑀥𑀫𑁆𑀫𑁄 𑀧𑀦 𑀓𑀻𑀤𑀺𑀲𑁄;

𑀫𑀸 𑀯𑁄 𑀥𑀫𑁆𑀫𑀁 𑀅𑀥𑀫𑁆𑀫𑀁 𑀯𑀸, 𑀅𑀤𑁆𑀤𑀲𑀸𑀫 𑀓𑀼𑀤𑀸𑀘𑀦𑀦𑁆𑀢𑀺.

𑀉𑀤𑀧𑀸𑀦𑀤𑀽𑀲𑀓𑀚𑀸𑀢𑀓𑀁 𑀧𑀞𑀫𑀁.

𑁨𑁭𑁨. 𑀩𑁆𑀬𑀕𑁆𑀖𑀚𑀸𑀢𑀓𑀁 (𑁩-𑁩-𑁨)

𑁬𑁪. 𑀬𑁂𑀦 𑀫𑀺𑀢𑁆𑀢𑁂𑀦 𑀲𑀁𑀲𑀕𑁆𑀕𑀸, 𑀬𑁄𑀕𑀓𑁆𑀔𑁂𑀫𑁄 𑀯𑀺𑀳𑀺𑀬𑁆𑀬𑀢𑀺;

𑀧𑀼𑀩𑁆𑀩𑁂𑀯𑀚𑁆𑀛𑀸𑀪𑀯𑀁 𑀢𑀲𑁆𑀲, 𑀭𑀼𑀓𑁆𑀔𑁂 𑀅𑀓𑁆𑀔𑀻𑀯 𑀧𑀡𑁆𑀟𑀺𑀢𑁄.

𑁬𑁫. 𑀬𑁂𑀦 𑀫𑀺𑀢𑁆𑀢𑁂𑀦 𑀲𑀁𑀲𑀕𑁆𑀕𑀸, 𑀬𑁄𑀕𑀓𑁆𑀔𑁂𑀫𑁄 𑀧𑀯𑀟𑁆𑀠𑀢𑀺;

𑀓𑀭𑁂𑀬𑁆𑀬𑀢𑁆𑀢𑀲𑀫𑀁 𑀯𑀼𑀢𑁆𑀢𑀺𑀁, 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀧𑀡𑁆𑀟𑀺𑀢𑁄.

𑁬𑁬. 𑀏𑀣 𑀩𑁆𑀬𑀕𑁆𑀖𑀸 𑀦𑀺𑀯𑀢𑁆𑀢𑀯𑁆𑀳𑁄, 𑀧𑀘𑁆𑀘𑀼𑀧𑁂𑀣 [𑀧𑀘𑁆𑀘𑀫𑁂𑀣 (𑀲𑀻. 𑀧𑀻.)] 𑀫𑀳𑀸𑀯𑀦𑀁;

𑀫𑀸 𑀯𑀦𑀁 𑀙𑀺𑀦𑁆𑀤𑀺 𑀦𑀺𑀩𑁆𑀬𑀕𑁆𑀖𑀁, 𑀩𑁆𑀬𑀕𑁆𑀖𑀸 𑀫𑀸𑀳𑁂𑀲𑀼 𑀦𑀺𑀩𑁆𑀩𑀦𑀸𑀢𑀺.

𑀩𑁆𑀬𑀕𑁆𑀖𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁨𑁭𑁩. 𑀓𑀘𑁆𑀙𑀧𑀚𑀸𑀢𑀓𑀁 (𑁩-𑁩-𑁩)

𑁬𑁭. 𑀓𑁄 𑀦𑀼 𑀉𑀤𑁆𑀥𑀺𑀢𑀪𑀢𑁆𑀢𑁄𑀯 [𑀉𑀤𑁆𑀤𑀺𑀢𑀪𑀢𑁆𑀢𑁄𑀯 (𑀲𑀻.), 𑀯𑀟𑁆𑀠𑀺𑀢𑀪𑀢𑁆𑀢𑁄𑀯 (𑀲𑁆𑀬𑀸.)], 𑀧𑀽𑀭𑀳𑀢𑁆𑀣𑁄𑀯 𑀩𑁆𑀭𑀸𑀳𑁆𑀫𑀡𑁄;

𑀓𑀳𑀁 𑀦𑀼 𑀪𑀺𑀓𑁆𑀔𑀁 𑀅𑀘𑀭𑀺, 𑀓𑀁 𑀲𑀤𑁆𑀥𑀁 𑀉𑀧𑀲𑀗𑁆𑀓𑀫𑀺.

𑁬𑁮. 𑀅𑀳𑀁 𑀓𑀧𑀺𑀲𑁆𑀫𑀺 𑀤𑀼𑀫𑁆𑀫𑁂𑀥𑁄, 𑀅𑀦𑀸𑀫𑀸𑀲𑀸𑀦𑀺 𑀆𑀫𑀲𑀺𑀁;

𑀢𑁆𑀯𑀁 𑀫𑀁 𑀫𑁄𑀘𑀬 𑀪𑀤𑁆𑀤𑀦𑁆𑀢𑁂, 𑀫𑀼𑀢𑁆𑀢𑁄 𑀕𑀘𑁆𑀙𑁂𑀬𑁆𑀬 𑀧𑀩𑁆𑀩𑀢𑀁.

𑁬𑁯. 𑀓𑀘𑁆𑀙𑀧𑀸 𑀓𑀲𑁆𑀲𑀧𑀸 𑀳𑁄𑀦𑁆𑀢𑀺, 𑀓𑁄𑀡𑁆𑀟𑀜𑁆𑀜𑀸 𑀳𑁄𑀦𑁆𑀢𑀺 𑀫𑀓𑁆𑀓𑀝𑀸;

𑀫𑀼𑀜𑁆𑀘 𑀓𑀲𑁆𑀲𑀧 𑀓𑁄𑀡𑁆𑀟𑀜𑁆𑀜𑀁, 𑀓𑀢𑀁 𑀫𑁂𑀣𑀼𑀦𑀓𑀁 𑀢𑀬𑀸𑀢𑀺.

𑀓𑀘𑁆𑀙𑀧𑀚𑀸𑀢𑀓𑀁 𑀢𑀢𑀺𑀬𑀁.

𑁨𑁭𑁪. 𑀮𑁄𑀮𑀚𑀸𑀢𑀓𑀁 (𑁩-𑁩-𑁪)

𑁭𑁦. 𑀓𑀸𑀬𑀁 𑀩𑀮𑀸𑀓𑀸 𑀲𑀺𑀔𑀺𑀦𑀻, 𑀘𑁄𑀭𑀻 𑀮𑀗𑁆𑀖𑀺𑀧𑀺𑀢𑀸𑀫𑀳𑀸;

𑀑𑀭𑀁 𑀩𑀮𑀸𑀓𑁂 𑀆𑀕𑀘𑁆𑀙, 𑀘𑀡𑁆𑀟𑁄 𑀫𑁂 𑀯𑀸𑀬𑀲𑁄 𑀲𑀔𑀸.

𑁭𑁧. 𑀦𑀸𑀳𑀁 𑀩𑀮𑀸𑀓𑀸 𑀲𑀺𑀔𑀺𑀦𑀻, 𑀅𑀳𑀁 𑀮𑁄𑀮𑁄𑀲𑁆𑀫𑀺 𑀯𑀸𑀬𑀲𑁄;

𑀅𑀓𑀢𑁆𑀯𑀸 𑀯𑀘𑀦𑀁 𑀢𑀼𑀬𑁆𑀳𑀁, 𑀧𑀲𑁆𑀲 𑀮𑀽𑀦𑁄𑀲𑁆𑀫𑀺 𑀆𑀕𑀢𑁄.

𑁭𑁨. 𑀧𑀼𑀦𑀧𑀸𑀧𑀚𑁆𑀚𑀲𑀻 𑀲𑀫𑁆𑀫, 𑀲𑀻𑀮𑀜𑁆𑀳𑀺 𑀢𑀯 𑀢𑀸𑀤𑀺𑀲𑀁;

𑀦 𑀳𑀺 𑀫𑀸𑀦𑀼𑀲𑀓𑀸 𑀪𑁄𑀕𑀸, 𑀲𑀼𑀪𑀼𑀜𑁆𑀚𑀸 𑀳𑁄𑀦𑁆𑀢𑀺 𑀧𑀓𑁆𑀔𑀺𑀦𑀸𑀢𑀺.

𑀮𑁄𑀮𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁨𑁭𑁫. 𑀭𑀼𑀘𑀺𑀭𑀚𑀸𑀢𑀓𑀁 (𑁩-𑁩-𑁫)

𑁭𑁩. 𑀓𑀸𑀬𑀁 𑀩𑀮𑀸𑀓𑀸 𑀭𑀼𑀘𑀺𑀭𑀸, 𑀓𑀸𑀓𑀦𑀻𑀴𑀲𑁆𑀫𑀺𑀫𑀘𑁆𑀙𑀢𑀺;

𑀘𑀡𑁆𑀟𑁄 𑀓𑀸𑀓𑁄 𑀲𑀔𑀸 𑀫𑀬𑁆𑀳𑀁, 𑀬𑀲𑁆𑀲 [𑀢𑀲𑁆𑀲 (𑀲𑀻. 𑀧𑀻.)] 𑀘𑁂𑀢𑀁 𑀓𑀼𑀮𑀸𑀯𑀓𑀁.

𑁭𑁪. 𑀦𑀦𑀼 𑀫𑀁 𑀲𑀫𑁆𑀫 𑀚𑀸𑀦𑀸𑀲𑀺, 𑀤𑀺𑀚 𑀲𑀸𑀫𑀸𑀓𑀪𑁄𑀚𑀦;

𑀅𑀓𑀢𑁆𑀯𑀸 𑀯𑀘𑀦𑀁 𑀢𑀼𑀬𑁆𑀳𑀁, 𑀧𑀲𑁆𑀲 𑀮𑀽𑀦𑁄𑀲𑁆𑀫𑀺 𑀆𑀕𑀢𑁄.

𑁭𑁫. 𑀧𑀼𑀦𑀧𑀸𑀧𑀚𑁆𑀚𑀲𑀻 𑀲𑀫𑁆𑀫, 𑀲𑀻𑀮𑀜𑁆𑀳𑀺 𑀢𑀯 𑀢𑀸𑀤𑀺𑀲𑀁;

𑀦 𑀳𑀺 𑀫𑀸𑀦𑀼𑀲𑀓𑀸 𑀪𑁄𑀕𑀸, 𑀲𑀼𑀪𑀼𑀜𑁆𑀚𑀸 𑀳𑁄𑀦𑁆𑀢𑀺 𑀧𑀓𑁆𑀔𑀺𑀦𑀸𑀢𑀺.

𑀭𑀼𑀘𑀺𑀭𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁨𑁭𑁬. 𑀓𑀼𑀭𑀼𑀥𑀫𑁆𑀫𑀚𑀸𑀢𑀓𑀁 (𑁩-𑁩-𑁬)

𑁭𑁬. 𑀢𑀯 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘, 𑀯𑀺𑀤𑀺𑀢𑁆𑀯𑀸𑀦 𑀚𑀦𑀸𑀥𑀺𑀧;

𑀯𑀡𑁆𑀡𑀁 𑀅𑀜𑁆𑀚𑀦𑀯𑀡𑁆𑀡𑁂𑀦, 𑀓𑀸𑀮𑀺𑀗𑁆𑀕𑀲𑁆𑀫𑀺𑀁 𑀦𑀺𑀫𑀺𑀫𑁆𑀳𑀲𑁂 [𑀯𑀺𑀦𑀺𑀫𑁆𑀳𑀲𑁂 (𑀲𑁆𑀬𑀸.), 𑀯𑀦𑀺𑀫𑁆𑀳𑀲𑁂 (𑀓.)].

𑁭𑁭. 𑀅𑀦𑁆𑀦𑀪𑀘𑁆𑀘𑀸 𑀘𑀪𑀘𑁆𑀘𑀸 𑀘, 𑀬𑁄𑀥 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀢𑀺;

𑀲𑀩𑁆𑀩𑁂 𑀢𑁂 𑀅𑀧𑁆𑀧𑀝𑀺𑀓𑁆𑀔𑀺𑀧𑁆𑀧𑀸, 𑀧𑀼𑀩𑁆𑀩𑀸𑀘𑀭𑀺𑀬𑀯𑀘𑁄 𑀇𑀤𑀁.

𑁭𑁮. 𑀤𑀤𑀸𑀫𑀺 𑀯𑁄 𑀩𑁆𑀭𑀸𑀳𑁆𑀫𑀡𑀸 𑀦𑀸𑀕𑀫𑁂𑀢𑀁, 𑀭𑀸𑀚𑀸𑀭𑀳𑀁 𑀭𑀸𑀚𑀪𑁄𑀕𑁆𑀕𑀁 𑀬𑀲𑀲𑁆𑀲𑀺𑀦𑀁;

𑀅𑀮𑀗𑁆𑀓𑀢𑀁 𑀳𑁂𑀫𑀚𑀸𑀮𑀸𑀪𑀺𑀙𑀦𑁆𑀦𑀁, 𑀲𑀲𑀸𑀭𑀣𑀺𑀁 𑀕𑀘𑁆𑀙𑀣 𑀬𑁂𑀦 𑀓𑀸𑀫𑀦𑁆𑀢𑀺.

𑀓𑀼𑀭𑀼𑀥𑀫𑁆𑀫𑀚𑀸𑀢𑀓𑀁 [𑀓𑀼𑀭𑀼𑀥𑀫𑁆𑀫𑀚𑀸𑀢𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀙𑀝𑁆𑀞𑀁.

𑁨𑁭𑁭. 𑀭𑁄𑀫𑀓𑀚𑀸𑀢𑀓𑀁 (𑁩-𑁩-𑁭)

𑁭𑁯. 𑀯𑀲𑁆𑀲𑀸𑀦𑀺 𑀧𑀜𑁆𑀜𑀸𑀲 𑀲𑀫𑀸𑀥𑀺𑀓𑀸𑀦𑀺, 𑀯𑀲𑀺𑀫𑁆𑀳 𑀲𑁂𑀮𑀲𑁆𑀲 𑀕𑀼𑀳𑀸𑀬 𑀭𑁄𑀫𑀓;

𑀅𑀲𑀗𑁆𑀓𑀫𑀸𑀦𑀸 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑀸 [𑀅𑀪𑀺𑀦𑀺𑀩𑁆𑀩𑀼𑀢𑀘𑀺𑀢𑁆𑀢𑀸 (𑀲𑁆𑀬𑀸. 𑀓.)], 𑀳𑀢𑁆𑀣𑀢𑁆𑀢 [𑀳𑀢𑁆𑀣𑀢𑁆𑀣 (𑀲𑁆𑀬𑀸.)] 𑀫𑀸𑀬𑀦𑁆𑀢𑀺 𑀫𑀫𑀡𑁆𑀟𑀚𑀸 𑀧𑀼𑀭𑁂.

𑁮𑁦. 𑀢𑁂 𑀤𑀸𑀦𑀺 𑀯𑀓𑁆𑀓𑀗𑁆𑀕 𑀓𑀺𑀫𑀢𑁆𑀣𑀫𑀼𑀲𑁆𑀲𑀼𑀓𑀸, 𑀪𑀚𑀦𑁆𑀢𑀺 𑀅𑀜𑁆𑀜𑀁 𑀕𑀺𑀭𑀺𑀓𑀦𑁆𑀤𑀭𑀁 𑀤𑀺𑀚𑀸;

𑀦 𑀦𑀽𑀦 𑀫𑀜𑁆𑀜𑀦𑁆𑀢𑀺 𑀫𑀫𑀁 𑀬𑀣𑀸 𑀧𑀼𑀭𑁂, 𑀘𑀺𑀭𑀧𑁆𑀧𑀯𑀼𑀢𑁆𑀣𑀸 𑀅𑀣 𑀯𑀸 𑀦 𑀢𑁂 𑀇𑀫𑁂.

𑁮𑁧. 𑀚𑀸𑀦𑀸𑀫 𑀢𑀁 𑀦 𑀫𑀬𑀁 𑀲𑀫𑁆𑀧𑀫𑀽𑀴𑁆𑀳𑀸 [𑀦 𑀫𑀬’𑀫𑀲𑁆𑀫 𑀫𑀽𑀴𑁆𑀳𑀸 (𑀲𑀻. 𑀧𑀻.)], 𑀲𑁄𑀬𑁂𑀯 𑀢𑁆𑀯𑀁 𑀢𑁂 𑀫𑀬𑀫𑀲𑁆𑀫 𑀦𑀸𑀜𑁆𑀜𑁂;

𑀘𑀺𑀢𑁆𑀢𑀜𑁆𑀘 𑀢𑁂 𑀅𑀲𑁆𑀫𑀺𑀁 𑀚𑀦𑁂 𑀧𑀤𑀼𑀝𑁆𑀞𑀁, 𑀆𑀚𑀻𑀯𑀺𑀓𑀸 [𑀆𑀚𑀻𑀯𑀓 (𑀲𑀻. 𑀲𑁆𑀬𑀸.), 𑀆𑀚𑀻𑀯𑀺𑀓 (𑀧𑀻.)] 𑀢𑁂𑀦 𑀢𑀫𑀼𑀢𑁆𑀢𑀲𑀸𑀫𑀸𑀢𑀺.

𑀭𑁄𑀫𑀓𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁨𑁭𑁮. 𑀫𑀳𑀺𑀁𑀲𑀭𑀸𑀚𑀚𑀸𑀢𑀓𑀁 (𑁩-𑁩-𑁮)

𑁮𑁨. 𑀓𑀺𑀫𑀢𑁆𑀣 [𑀓𑀫𑀢𑁆𑀣 (𑀲𑀻. 𑀧𑀻.)] 𑀫𑀪𑀺𑀲𑀦𑁆𑀥𑀸𑀬, 𑀮𑀳𑀼𑀘𑀺𑀢𑁆𑀢𑀲𑁆𑀲 𑀤𑀼𑀩𑁆𑀪𑀺𑀦𑁄 [𑀤𑀽𑀪𑀺𑀦𑁄 (𑀲𑀻. 𑀧𑀻.)];

𑀲𑀩𑁆𑀩𑀓𑀸𑀫𑀤𑀤𑀲𑁆𑀲𑁂𑀯 [𑀤𑀼𑀳𑀲𑁆𑀲𑁂𑀯 (𑀲𑀻. 𑀲𑁆𑀬𑀸. 𑀧𑀻.), 𑀭𑀳𑀲𑁆𑀲𑁂𑀯 (𑀓.)], 𑀇𑀫𑀁 𑀤𑀼𑀓𑁆𑀔𑀁 𑀢𑀺𑀢𑀺𑀓𑁆𑀔𑀲𑀺.

𑁮𑁩. 𑀲𑀺𑀗𑁆𑀕𑁂𑀦 𑀦𑀺𑀳𑀦𑀸𑀳𑁂𑀢𑀁, 𑀧𑀤𑀲𑀸 𑀘 𑀅𑀥𑀺𑀝𑁆𑀞𑀳;

𑀪𑀺𑀬𑁆𑀬𑁄 [𑀪𑀻𑀬𑁄 (𑀲𑀻.)] 𑀩𑀸𑀮𑀸 𑀧𑀓𑀼𑀚𑁆𑀛𑁂𑀬𑁆𑀬𑀼𑀁, 𑀦𑁄 𑀘𑀲𑁆𑀲 𑀧𑀝𑀺𑀲𑁂𑀥𑀓𑁄.

𑁮𑁪. 𑀫𑀫𑁂𑀯𑀸𑀬𑀁 𑀫𑀜𑁆𑀜𑀫𑀸𑀦𑁄, 𑀅𑀜𑁆𑀜𑁂𑀧𑁂𑀯𑀁 [𑀅𑀜𑁆𑀜𑀫𑁆𑀧𑁂𑀯𑀁 (𑀲𑀻. 𑀲𑁆𑀬𑀸. 𑀧𑀻.)] 𑀓𑀭𑀺𑀲𑁆𑀲𑀢𑀺;

𑀢𑁂 𑀦𑀁 𑀢𑀢𑁆𑀣 𑀯𑀥𑀺𑀲𑁆𑀲𑀦𑁆𑀢𑀺, 𑀲𑀸 𑀫𑁂 𑀫𑀼𑀢𑁆𑀢𑀺 𑀪𑀯𑀺𑀲𑁆𑀲𑀢𑀻𑀢𑀺.

𑀫𑀳𑀺𑀁𑀲𑀭𑀸𑀚𑀚𑀸𑀢𑀓𑀁 [𑀫𑀳𑀺𑀲𑀚𑀸𑀢𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀅𑀝𑁆𑀞𑀫𑀁.

𑁨𑁭𑁯. 𑀲𑀢𑀧𑀢𑁆𑀢𑀚𑀸𑀢𑀓𑀁 (𑁩-𑁩-𑁯)

𑁮𑁫. 𑀬𑀣𑀸 𑀫𑀸𑀡𑀯𑀓𑁄 𑀧𑀦𑁆𑀣𑁂, 𑀲𑀺𑀗𑁆𑀕𑀸𑀮𑀺𑀁 𑀯𑀦𑀕𑁄𑀘𑀭𑀺𑀁;

𑀅𑀢𑁆𑀣𑀓𑀸𑀫𑀁 𑀧𑀯𑁂𑀤𑁂𑀦𑁆𑀢𑀺𑀁 [𑀧𑀯𑀤𑀦𑁆𑀢𑀺𑀁 (𑀧𑀻.)], 𑀅𑀦𑀢𑁆𑀣𑀓𑀸𑀫𑀸𑀢𑀺 𑀫𑀜𑁆𑀜𑀢𑀺;

𑀅𑀦𑀢𑁆𑀣𑀓𑀸𑀫𑀁 𑀲𑀢𑀧𑀢𑁆𑀢𑀁, 𑀅𑀢𑁆𑀣𑀓𑀸𑀫𑁄𑀢𑀺 𑀫𑀜𑁆𑀜𑀢𑀺.

𑁮𑁬. 𑀏𑀯𑀫𑁂𑀯 𑀇𑀥𑁂𑀓𑀘𑁆𑀘𑁄, 𑀧𑀼𑀕𑁆𑀕𑀮𑁄 𑀳𑁄𑀢𑀺 𑀢𑀸𑀤𑀺𑀲𑁄;

𑀳𑀺𑀢𑁂𑀳𑀺 𑀯𑀘𑀦𑀁 𑀯𑀼𑀢𑁆𑀢𑁄, 𑀧𑀝𑀺𑀕𑀡𑁆𑀳𑀸𑀢𑀺 𑀯𑀸𑀫𑀢𑁄.

𑁮𑁭. 𑀬𑁂 𑀘 𑀔𑁄 𑀦𑀁 𑀧𑀲𑀁𑀲𑀦𑁆𑀢𑀺, 𑀪𑀬𑀸 𑀉𑀓𑁆𑀓𑀁𑀲𑀬𑀦𑁆𑀢𑀺 𑀯𑀸 [𑀘 (𑀲𑀻. 𑀧𑀻.)];

𑀢𑀜𑁆𑀳𑀺 𑀲𑁄 𑀫𑀜𑁆𑀜𑀢𑁂 𑀫𑀺𑀢𑁆𑀢𑀁, 𑀲𑀢𑀧𑀢𑁆𑀢𑀁𑀯 𑀫𑀸𑀡𑀯𑁄𑀢𑀺.

𑀲𑀢𑀧𑀢𑁆𑀢𑀚𑀸𑀢𑀓𑀁 𑀦𑀯𑀫𑀁.

𑁨𑁮𑁦. 𑀧𑀼𑀝𑀤𑀽𑀲𑀓𑀚𑀸𑀢𑀓𑀁 (𑁩-𑁩-𑁧𑁦)

𑁮𑁮. 𑀅𑀤𑁆𑀥𑀸 𑀳𑀺 𑀦𑀽𑀦 𑀫𑀺𑀕𑀭𑀸𑀚𑀸, 𑀧𑀼𑀝𑀓𑀫𑁆𑀫𑀲𑁆𑀲 𑀓𑁄𑀯𑀺𑀤𑁄;

𑀢𑀣𑀸 𑀳𑀺 𑀧𑀼𑀝𑀁 𑀤𑀽𑀲𑁂𑀢𑀺, 𑀅𑀜𑁆𑀜𑀁 𑀦𑀽𑀦 𑀓𑀭𑀺𑀲𑁆𑀲𑀢𑀺.

𑁮𑁯. 𑀦 𑀫𑁂 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸, 𑀧𑀼𑀝𑀓𑀫𑁆𑀫𑀲𑁆𑀲 𑀓𑁄𑀯𑀺𑀤𑁄;

𑀓𑀢𑀁 𑀓𑀢𑀁 𑀔𑁄 𑀤𑀽𑀲𑁂𑀫, 𑀏𑀯𑀁 𑀥𑀫𑁆𑀫𑀫𑀺𑀤𑀁 𑀓𑀼𑀮𑀁.

𑁯𑁦. 𑀬𑁂𑀲𑀁 𑀯𑁄 𑀏𑀤𑀺𑀲𑁄 𑀥𑀫𑁆𑀫𑁄, 𑀅𑀥𑀫𑁆𑀫𑁄 𑀧𑀦 𑀓𑀻𑀤𑀺𑀲𑁄;

𑀫𑀸 𑀯𑁄 𑀥𑀫𑁆𑀫𑀁 𑀅𑀥𑀫𑁆𑀫𑀁 𑀯𑀸, 𑀅𑀤𑁆𑀤𑀲𑀸𑀫 𑀓𑀼𑀤𑀸𑀘𑀦𑀦𑁆𑀢𑀺.

𑀧𑀼𑀝𑀤𑀽𑀲𑀓𑀚𑀸𑀢𑀓𑀁 𑀤𑀲𑀫𑀁.

𑀉𑀤𑀧𑀸𑀦𑀯𑀕𑁆𑀕𑁄 [𑀅𑀭𑀜𑁆𑀜𑀯𑀕𑁆𑀕𑁄 (𑀲𑀻. 𑀧𑀻. 𑀓.)] 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀉𑀤𑀧𑀸𑀦𑀯𑀭𑀁 𑀯𑀦𑀩𑁆𑀬𑀕𑁆𑀖 𑀓𑀧𑀺, 𑀲𑀺𑀔𑀺𑀦𑀻 𑀘 𑀩𑀮𑀸𑀓 𑀭𑀼𑀘𑀺𑀭𑀯𑀭𑁄;

𑀲𑀼𑀚𑀦𑀸𑀥𑀺𑀧𑀭𑁄𑀫𑀓𑀤𑀽𑀲 𑀧𑀼𑀦, 𑀲𑀢𑀧𑀢𑁆𑀢𑀯𑀭𑁄 𑀧𑀼𑀝𑀓𑀫𑁆𑀫 𑀤𑀲𑀸𑀢𑀺.