𑁨. 𑀧𑀤𑀼𑀫𑀯𑀕𑁆𑀕𑁄

𑁨𑁬𑁧. 𑀧𑀤𑀼𑀫𑀚𑀸𑀢𑀓𑀁 (𑁩-𑁨-𑁧)

𑁩𑁧. 𑀬𑀣𑀸 𑀓𑁂𑀲𑀸 𑀘 𑀫𑀲𑁆𑀲𑀽 𑀘, 𑀙𑀺𑀦𑁆𑀦𑀁 𑀙𑀺𑀦𑁆𑀦𑀁 𑀯𑀺𑀭𑀽𑀳𑀢𑀺;

𑀏𑀯𑀁 𑀭𑀽𑀳𑀢𑀼 𑀢𑁂 𑀦𑀸𑀲𑀸, 𑀧𑀤𑀼𑀫𑀁 𑀤𑁂𑀳𑀺 𑀬𑀸𑀘𑀺𑀢𑁄.

𑁩𑁨. 𑀬𑀣𑀸 𑀲𑀸𑀭𑀤𑀺𑀓𑀁 𑀩𑀻𑀚𑀁, 𑀔𑁂𑀢𑁆𑀢𑁂 𑀯𑀼𑀢𑁆𑀢𑀁 𑀯𑀺𑀭𑀽𑀳𑀢𑀺;

𑀏𑀯𑀁 𑀭𑀽𑀳𑀢𑀼 𑀢𑁂 𑀦𑀸𑀲𑀸, 𑀧𑀤𑀼𑀫𑀁 𑀤𑁂𑀳𑀺 𑀬𑀸𑀘𑀺𑀢𑁄.

𑁩𑁩. 𑀉𑀪𑁄𑀧𑀺 𑀧𑀮𑀧𑀦𑁆𑀢𑁂𑀢𑁂 [𑀯𑀺𑀮𑀧𑀦𑁆𑀢𑁂𑀢𑁂 (𑀲𑁆𑀬𑀸. 𑀓.)], 𑀅𑀧𑀺 𑀧𑀤𑁆𑀫𑀸𑀦𑀺 𑀤𑀲𑁆𑀲𑀢𑀺;

𑀯𑀚𑁆𑀚𑀼𑀁 𑀯𑀸 𑀢𑁂 𑀦 𑀯𑀸 𑀯𑀚𑁆𑀚𑀼𑀁, 𑀦𑀢𑁆𑀣𑀺 𑀦𑀸𑀲𑀸𑀬 𑀭𑀽𑀳𑀦𑀸;

𑀤𑁂𑀳𑀺 𑀲𑀫𑁆𑀫 𑀧𑀤𑀼𑀫𑀸𑀦𑀺, 𑀅𑀳𑀁 𑀬𑀸𑀘𑀸𑀫𑀺 𑀬𑀸𑀘𑀺𑀢𑁄𑀢𑀺.

𑀧𑀤𑀼𑀫𑀚𑀸𑀢𑀓𑀁 𑀧𑀞𑀫𑀁.

𑁨𑁬𑁨. 𑀫𑀼𑀤𑀼𑀧𑀸𑀡𑀺𑀚𑀸𑀢𑀓𑀁 (𑁩-𑁨-𑁨)

𑁩𑁪. 𑀧𑀸𑀡𑀺 𑀘𑁂 𑀫𑀼𑀤𑀼𑀓𑁄 𑀘𑀲𑁆𑀲, 𑀦𑀸𑀕𑁄 𑀘𑀲𑁆𑀲 𑀲𑀼𑀓𑀸𑀭𑀺𑀢𑁄;

𑀅𑀦𑁆𑀥𑀓𑀸𑀭𑁄 𑀘 𑀯𑀲𑁆𑀲𑁂𑀬𑁆𑀬, 𑀅𑀣 𑀦𑀽𑀦 𑀢𑀤𑀸 𑀲𑀺𑀬𑀸.

𑁩𑁫. 𑀅𑀦𑀮𑀸 𑀫𑀼𑀤𑀼𑀲𑀫𑁆𑀪𑀸𑀲𑀸, 𑀤𑀼𑀧𑁆𑀧𑀽𑀭𑀸 𑀢𑀸 [𑀤𑀼𑀧𑁆𑀧𑀽𑀭𑀢𑁆𑀢𑀸 (𑀓.)] 𑀦𑀤𑀻𑀲𑀫𑀸;

𑀲𑀻𑀤𑀦𑁆𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸𑀦, 𑀆𑀭𑀓𑀸 𑀧𑀭𑀺𑀯𑀚𑁆𑀚𑀬𑁂.

𑁩𑁬. 𑀬𑀁 𑀏𑀢𑀸 𑀉𑀧𑀲𑁂𑀯𑀦𑁆𑀢𑀺, 𑀙𑀦𑁆𑀤𑀲𑀸 𑀯𑀸 𑀥𑀦𑁂𑀦 𑀯𑀸;

𑀚𑀸𑀢𑀯𑁂𑀤𑁄𑀯 𑀲𑀁 𑀞𑀸𑀦𑀁, 𑀔𑀺𑀧𑁆𑀧𑀁 𑀅𑀦𑀼𑀤𑀳𑀦𑁆𑀢𑀺 𑀦𑀦𑁆𑀢𑀺.

𑀫𑀼𑀤𑀼𑀧𑀸𑀡𑀺𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁨𑁬𑁩. 𑀘𑀽𑀴𑀧𑀮𑁄𑀪𑀦𑀚𑀸𑀢𑀓𑀁 (𑁩-𑁨-𑁩)

𑁩𑁭. 𑀅𑀪𑀺𑀚𑁆𑀚𑀫𑀸𑀦𑁂 𑀯𑀸𑀭𑀺𑀲𑁆𑀫𑀺𑀁, 𑀲𑀬𑀁 [𑀅𑀬𑀁 (𑀓.)] 𑀆𑀕𑀫𑁆𑀫 𑀇𑀤𑁆𑀥𑀺𑀬𑀸;

𑀫𑀺𑀲𑁆𑀲𑀻𑀪𑀸𑀯𑀺𑀢𑁆𑀣𑀺𑀬𑀸 𑀕𑀦𑁆𑀢𑁆𑀯𑀸, 𑀲𑀁𑀲𑀻𑀤𑀲𑀺 [𑀲𑀁𑀲𑀻𑀤𑀢𑀺 (𑀓.)] 𑀫𑀳𑀡𑁆𑀡𑀯𑁂.

𑁩𑁮. 𑀆𑀯𑀝𑁆𑀝𑀦𑀻 𑀫𑀳𑀸𑀫𑀸𑀬𑀸, 𑀩𑁆𑀭𑀳𑁆𑀫𑀘𑀭𑀺𑀬𑀯𑀺𑀓𑁄𑀧𑀦𑀸;

𑀲𑀻𑀤𑀦𑁆𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸𑀦, 𑀆𑀭𑀓𑀸 𑀧𑀭𑀺𑀯𑀚𑁆𑀚𑀬𑁂.

𑁩𑁯. 𑀬𑀁 𑀏𑀢𑀸 𑀉𑀧𑀲𑁂𑀯𑀦𑁆𑀢𑀺, 𑀙𑀦𑁆𑀤𑀲𑀸 𑀯𑀸 𑀥𑀦𑁂𑀦 𑀯𑀸;

𑀚𑀸𑀢𑀯𑁂𑀤𑁄𑀯 𑀲𑀁 𑀞𑀸𑀦𑀁, 𑀔𑀺𑀧𑁆𑀧𑀁 𑀅𑀦𑀼𑀤𑀳𑀦𑁆𑀢𑀺 𑀦𑀦𑁆𑀢𑀺.

𑀘𑀽𑀴𑀧𑀮𑁄𑀪𑀦 [𑀘𑀼𑀮𑁆𑀮𑀧𑀮𑁄𑀪𑀦 (𑀲𑀻. 𑀲𑁆𑀬𑀸. 𑀧𑀻.)] 𑀚𑀸𑀢𑀓𑀁 𑀢𑀢𑀺𑀬𑀁.

𑁨𑁬𑁪. 𑀫𑀳𑀸𑀧𑀦𑀸𑀤𑀚𑀸𑀢𑀓𑀁 (𑁩-𑁨-𑁪)

𑁪𑁦. 𑀧𑀦𑀸𑀤𑁄 𑀦𑀸𑀫 𑀲𑁄 𑀭𑀸𑀚𑀸, 𑀬𑀲𑁆𑀲 𑀬𑀽𑀧𑁄 𑀲𑀼𑀯𑀡𑁆𑀡𑀬𑁄;

𑀢𑀺𑀭𑀺𑀬𑀁 𑀲𑁄𑀴𑀲𑀼𑀩𑁆𑀩𑁂𑀥𑁄 [𑀲𑁄𑀴𑀲𑀧𑀩𑁆𑀩𑁂𑀥𑁄 (𑀲𑀻. 𑀧𑀻.)], 𑀉𑀤𑁆𑀥𑀫𑀸𑀳𑀼 [𑀉𑀘𑁆𑀘𑀫𑀸𑀳𑀼 (𑀲𑀻. 𑀲𑁆𑀬𑀸. 𑀧𑀻.)] 𑀲𑀳𑀲𑁆𑀲𑀥𑀸.

𑁪𑁧. 𑀲𑀳𑀲𑁆𑀲𑀓𑀡𑁆𑀟𑁄 𑀲𑀢𑀕𑁂𑀡𑁆𑀟𑀼 [𑀲𑀢𑀪𑁂𑀤𑁄 (𑀲𑀻. 𑀧𑀻.), 𑀲𑀢𑀪𑁂𑀡𑁆𑀟𑀼 (𑀲𑀻. 𑀦𑀺𑀲𑁆𑀲𑀬)], 𑀥𑀚𑀸𑀲𑀼 𑀳𑀭𑀺𑀢𑀸𑀫𑀬𑁄;

𑀅𑀦𑀘𑁆𑀘𑀼𑀁 𑀢𑀢𑁆𑀣 𑀕𑀦𑁆𑀥𑀩𑁆𑀩𑀸, 𑀙 𑀲𑀳𑀲𑁆𑀲𑀸𑀦𑀺 𑀲𑀢𑁆𑀢𑀥𑀸.

𑁪𑁨. 𑀏𑀯𑀫𑁂𑀢𑀁 [𑀏𑀯𑀫𑁂𑀯 (𑀓.)] 𑀢𑀤𑀸 𑀆𑀲𑀺, 𑀬𑀣𑀸 𑀪𑀸𑀲𑀲𑀺 𑀪𑀤𑁆𑀤𑀚𑀺;

𑀲𑀓𑁆𑀓𑁄 𑀅𑀳𑀁 𑀢𑀤𑀸 𑀆𑀲𑀺𑀁, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀢𑀯𑀸𑀢𑀺.

𑀫𑀳𑀸𑀧𑀦𑀸𑀤𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁨𑁬𑁫. 𑀔𑀼𑀭𑀧𑁆𑀧𑀚𑀸𑀢𑀓𑀁 (𑁩-𑁨-𑁫)

𑁪𑁩. 𑀤𑀺𑀲𑁆𑀯𑀸 𑀔𑀼𑀭𑀧𑁆𑀧𑁂 𑀥𑀦𑀼𑀯𑁂𑀕𑀦𑀼𑀦𑁆𑀦𑁂, 𑀔𑀕𑁆𑀕𑁂 𑀕𑀳𑀻𑀢𑁂 𑀢𑀺𑀔𑀺𑀡𑁂 𑀢𑁂𑀮𑀥𑁄𑀢𑁂;

𑀢𑀲𑁆𑀫𑀺𑀁 𑀪𑀬𑀲𑁆𑀫𑀺𑀁 𑀫𑀭𑀡𑁂 𑀯𑀺𑀬𑀽𑀴𑁆𑀳𑁂, 𑀓𑀲𑁆𑀫𑀸 𑀦𑀼 𑀢𑁂 𑀦𑀸𑀳𑀼 𑀙𑀫𑁆𑀪𑀺𑀢𑀢𑁆𑀢𑀁.

𑁪𑁪. 𑀤𑀺𑀲𑁆𑀯𑀸 𑀔𑀼𑀭𑀧𑁆𑀧𑁂 𑀥𑀦𑀼𑀯𑁂𑀕𑀦𑀼𑀦𑁆𑀦𑁂, 𑀔𑀕𑁆𑀕𑁂 𑀕𑀳𑀻𑀢𑁂 𑀢𑀺𑀔𑀺𑀡𑁂 𑀢𑁂𑀮𑀥𑁄𑀢𑁂;

𑀢𑀲𑁆𑀫𑀺𑀁 𑀪𑀬𑀲𑁆𑀫𑀺𑀁 𑀫𑀭𑀡𑁂 𑀯𑀺𑀬𑀽𑀴𑁆𑀳𑁂, 𑀯𑁂𑀤𑀁 𑀅𑀮𑀢𑁆𑀣𑀁 𑀯𑀺𑀧𑀼𑀮𑀁 𑀉𑀴𑀸𑀭𑀁.

𑁪𑁫. 𑀲𑁄 𑀯𑁂𑀤𑀚𑀸𑀢𑁄 𑀅𑀚𑁆𑀛𑀪𑀯𑀺𑀁 𑀅𑀫𑀺𑀢𑁆𑀢𑁂, 𑀧𑀼𑀩𑁆𑀩𑁂𑀯 𑀫𑁂 𑀚𑀻𑀯𑀺𑀢𑀫𑀸𑀲𑀺 𑀘𑀢𑁆𑀢𑀁;

𑀦 𑀳𑀺 𑀚𑀻𑀯𑀺𑀢𑁂 𑀆𑀮𑀬𑀁 𑀓𑀼𑀩𑁆𑀩𑀫𑀸𑀦𑁄, 𑀲𑀽𑀭𑁄 𑀓𑀬𑀺𑀭𑀸 𑀲𑀽𑀭𑀓𑀺𑀘𑁆𑀘𑀁 𑀓𑀤𑀸𑀘𑀻𑀢𑀺.

𑀔𑀼𑀭𑀧𑁆𑀧𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁨𑁬𑁬. 𑀯𑀸𑀢𑀕𑁆𑀕𑀲𑀺𑀦𑁆𑀥𑀯𑀚𑀸𑀢𑀓𑀁 (𑁩-𑁨-𑁬)

𑁪𑁬. 𑀬𑁂𑀦𑀸𑀲𑀺 𑀓𑀺𑀲𑀺𑀬𑀸 𑀧𑀡𑁆𑀟𑀼, 𑀬𑁂𑀦 𑀪𑀢𑁆𑀢𑀁 𑀦 𑀭𑀼𑀘𑁆𑀘𑀢𑀺;

𑀅𑀬𑀁 𑀲𑁄 𑀆𑀕𑀢𑁄 𑀪𑀢𑁆𑀢𑀸 [𑀢𑀸𑀢𑁄 (𑀲𑀻. 𑀲𑁆𑀬𑀸. 𑀧𑀻.)], 𑀓𑀲𑁆𑀫𑀸 𑀤𑀸𑀦𑀺 𑀧𑀮𑀸𑀬𑀲𑀺.

𑁪𑁭. 𑀲𑀘𑁂 [𑀦 𑀔𑁄 (𑀲𑁆𑀬𑀸. 𑀓.)] 𑀧𑀦𑀸𑀤𑀺𑀓𑁂𑀦𑁂𑀯, 𑀲𑀦𑁆𑀣𑀯𑁄 𑀦𑀸𑀫 𑀚𑀸𑀬𑀢𑀺;

𑀬𑀲𑁄 𑀳𑀸𑀬𑀢𑀺 𑀇𑀢𑁆𑀣𑀻𑀦𑀁, 𑀢𑀲𑁆𑀫𑀸 𑀢𑀸𑀢 𑀧𑀮𑀸𑀬𑀳𑀁 [𑀧𑀮𑀸𑀬𑀺𑀳𑀁 (𑀲𑁆𑀬𑀸.), 𑀧𑀮𑀸𑀬𑀺𑀢𑀁 (𑀓.)].

𑁪𑁮. 𑀬𑀲𑁆𑀲𑀲𑁆𑀲𑀺𑀦𑀁 𑀓𑀼𑀮𑁂 𑀚𑀸𑀢𑀁, 𑀆𑀕𑀢𑀁 𑀬𑀸 𑀦 𑀇𑀘𑁆𑀙𑀢𑀺;

𑀲𑁄𑀘𑀢𑀺 𑀘𑀺𑀭𑀭𑀢𑁆𑀢𑀸𑀬, 𑀯𑀸𑀢𑀕𑁆𑀕𑀫𑀺𑀯 𑀪𑀤𑁆𑀤𑀮𑀻𑀢𑀺 [𑀓𑀼𑀦𑁆𑀤𑀮𑀻𑀢𑀺 (𑀲𑀻. 𑀧𑀻.), 𑀕𑀤𑁆𑀭𑀪𑀻𑀢𑀺 (𑀲𑁆𑀬𑀸.)].

𑀯𑀸𑀢𑀕𑁆𑀕𑀲𑀺𑀦𑁆𑀥𑀯𑀚𑀸𑀢𑀓𑀁 𑀙𑀝𑁆𑀞𑀁.

𑁨𑁬𑁭. 𑀓𑀓𑁆𑀓𑀝𑀓𑀚𑀸𑀢𑀓𑀁 (𑁩-𑁨-𑁭)

𑁪𑁯. 𑀲𑀺𑀗𑁆𑀕𑀻𑀫𑀺𑀕𑁄 𑀆𑀬𑀢𑀘𑀓𑁆𑀔𑀼𑀦𑁂𑀢𑁆𑀢𑁄, 𑀅𑀝𑁆𑀞𑀺𑀢𑁆𑀢𑀘𑁄 𑀯𑀸𑀭𑀺𑀲𑀬𑁄 𑀅𑀮𑁄𑀫𑁄;

𑀢𑁂𑀦𑀸𑀪𑀺𑀪𑀽𑀢𑁄 𑀓𑀧𑀡𑀁 𑀭𑀼𑀤𑀸𑀫𑀺, 𑀫𑀸 𑀳𑁂𑀯 𑀫𑀁 𑀧𑀸𑀡𑀲𑀫𑀁 𑀚𑀳𑁂𑀬𑁆𑀬 [𑀚𑀳𑁂𑀬𑁆𑀬𑀸 (𑀧𑀻.) 𑀚𑀳𑀸’𑀬𑁆𑀬𑁂 (?)].

𑁫𑁦. 𑀅𑀬𑁆𑀬 𑀦 𑀢𑀁 𑀚𑀳𑀺𑀲𑁆𑀲𑀸𑀫𑀺, 𑀓𑀼𑀜𑁆𑀚𑀭𑀁 𑀲𑀝𑁆𑀞𑀺𑀳𑀸𑀬𑀦𑀁 [𑀓𑀼𑀜𑁆𑀚𑀭 𑀲𑀝𑁆𑀞𑀺𑀳𑀸𑀬𑀦 (𑀲𑀻. 𑀧𑀻.)];

𑀧𑀣𑀩𑁆𑀬𑀸 𑀘𑀸𑀢𑀼𑀭𑀦𑁆𑀢𑀸𑀬, 𑀲𑀼𑀧𑁆𑀧𑀺𑀬𑁄 𑀳𑁄𑀲𑀺 𑀫𑁂 𑀢𑀼𑀯𑀁.

𑁫𑁧. 𑀬𑁂 𑀓𑀼𑀴𑀻𑀭𑀸 𑀲𑀫𑀼𑀤𑁆𑀤𑀲𑁆𑀫𑀺𑀁, 𑀕𑀗𑁆𑀕𑀸𑀬 𑀬𑀫𑀼𑀦𑀸𑀬 [𑀦𑀫𑁆𑀫𑀤𑀸𑀬 (𑀲𑀻. 𑀧𑀻.)] 𑀘;

𑀢𑁂𑀲𑀁 𑀢𑁆𑀯𑀁 𑀯𑀸𑀭𑀺𑀚𑁄 𑀲𑁂𑀝𑁆𑀞𑁄, 𑀫𑀼𑀜𑁆𑀘 𑀭𑁄𑀤𑀦𑁆𑀢𑀺𑀬𑀸 𑀧𑀢𑀺𑀦𑁆𑀢𑀺.

𑀓𑀓𑁆𑀓𑀝𑀓 [𑀓𑀼𑀴𑀻𑀭 (𑀓.)] 𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁨𑁬𑁮. 𑀆𑀭𑀸𑀫𑀤𑀽𑀲𑀓𑀚𑀸𑀢𑀓𑀁 (𑁩-𑁨-𑁮)

𑁫𑁨. 𑀬𑁄 𑀯𑁂 𑀲𑀩𑁆𑀩𑀲𑀫𑁂𑀢𑀸𑀦𑀁, 𑀅𑀳𑀼𑀯𑀸 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀢𑀲𑁆𑀲𑀸𑀬𑀁 𑀏𑀤𑀺𑀲𑀻 𑀧𑀜𑁆𑀜𑀸, 𑀓𑀺𑀫𑁂𑀯 𑀇𑀢𑀭𑀸 𑀧𑀚𑀸.

𑁫𑁩. 𑀏𑀯𑀫𑁂𑀯 𑀢𑀼𑀯𑀁 𑀩𑁆𑀭𑀳𑁆𑀫𑁂, 𑀅𑀦𑀜𑁆𑀜𑀸𑀬 𑀯𑀺𑀦𑀺𑀦𑁆𑀤𑀲𑀺;

𑀓𑀣𑀁 𑀫𑀽𑀮𑀁 𑀅𑀤𑀺𑀲𑁆𑀯𑀸𑀦 [𑀓𑀣𑀁𑀳𑀺 𑀫𑀽𑀮𑀁 𑀅𑀤𑀺𑀢𑁆𑀯𑀸 (𑀲𑁆𑀬𑀸. 𑀧𑀻.)], 𑀭𑀼𑀓𑁆𑀔𑀁 𑀚𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀁.

𑁫𑁪. 𑀦𑀸𑀳𑀁 𑀢𑀼𑀫𑁆𑀳𑁂 𑀯𑀺𑀦𑀺𑀦𑁆𑀤𑀸𑀫𑀺, 𑀬𑁂 𑀘𑀜𑁆𑀜𑁂 𑀯𑀸𑀦𑀭𑀸 𑀯𑀦𑁂;

𑀯𑀺𑀲𑁆𑀲𑀲𑁂𑀦𑁄𑀯 𑀕𑀸𑀭𑀬𑁆𑀳𑁄, 𑀬𑀲𑁆𑀲𑀢𑁆𑀣𑀸 𑀭𑀼𑀓𑁆𑀔𑀭𑁄𑀧𑀓𑀸𑀢𑀺.

𑀆𑀭𑀸𑀫𑀤𑀽𑀲𑀓𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁨𑁬𑁯. 𑀲𑀼𑀚𑀸𑀢𑀚𑀸𑀢𑀓𑀁 (𑁩-𑁨-𑁯)

𑁫𑁫. 𑀦 𑀳𑀺 𑀯𑀡𑁆𑀡𑁂𑀦 𑀲𑀫𑁆𑀧𑀦𑁆𑀦𑀸, 𑀫𑀜𑁆𑀚𑀼𑀓𑀸 𑀧𑀺𑀬𑀤𑀲𑁆𑀲𑀦𑀸;

𑀔𑀭𑀯𑀸𑀘𑀸 𑀧𑀺𑀬𑀸 𑀳𑁄𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

𑁫𑁬. 𑀦𑀦𑀼 𑀧𑀲𑁆𑀲𑀲𑀺𑀫𑀁 𑀓𑀸𑀴𑀺𑀁, 𑀤𑀼𑀩𑁆𑀩𑀡𑁆𑀡𑀁 𑀢𑀺𑀮𑀓𑀸𑀳𑀢𑀁;

𑀓𑁄𑀓𑀺𑀮𑀁 𑀲𑀡𑁆𑀳𑀯𑀸𑀘𑁂𑀦, 𑀩𑀳𑀽𑀦𑀁 𑀧𑀸𑀡𑀺𑀦𑀁 𑀧𑀺𑀬𑀁.

𑁫𑁭. 𑀢𑀲𑁆𑀫𑀸 𑀲𑀔𑀺𑀮𑀯𑀸𑀘𑀲𑁆𑀲, 𑀫𑀦𑁆𑀢𑀪𑀸𑀡𑀻 𑀅𑀦𑀼𑀤𑁆𑀥𑀢𑁄;

𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀤𑀻𑀧𑁂𑀢𑀺, 𑀫𑀥𑀼𑀭𑀁 𑀢𑀲𑁆𑀲 𑀪𑀸𑀲𑀺𑀢𑀦𑁆𑀢𑀺.

𑀲𑀼𑀚𑀸𑀢𑀚𑀸𑀢𑀓𑀁 𑀦𑀯𑀫𑀁.

𑁨𑁭𑁦. 𑀉𑀮𑀽𑀓𑀚𑀸𑀢𑀓𑀁 (𑁩-𑁨-𑁧𑁦)

𑁫𑁮. 𑀲𑀩𑁆𑀩𑁂𑀳𑀺 𑀓𑀺𑀭 𑀜𑀸𑀢𑀻𑀳𑀺, 𑀓𑁄𑀲𑀺𑀬𑁄 𑀇𑀲𑁆𑀲𑀭𑁄 𑀓𑀢𑁄;

𑀲𑀘𑁂 𑀜𑀸𑀢𑀻𑀳𑀺 𑀅𑀦𑀼𑀜𑁆𑀜𑀸𑀢𑁄 [𑀜𑀸𑀢𑀻𑀳𑀦𑀼𑀜𑁆𑀜𑀸𑀢𑁄 (𑀲𑀻. 𑀧𑀻.)], 𑀪𑀡𑁂𑀬𑁆𑀬𑀸𑀳𑀁 𑀏𑀓𑀯𑀸𑀘𑀺𑀓𑀁.

𑁫𑁯. 𑀪𑀡 𑀲𑀫𑁆𑀫 𑀅𑀦𑀼𑀜𑁆𑀜𑀸𑀢𑁄, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀓𑁂𑀯𑀮𑀁;

𑀲𑀦𑁆𑀢𑀺 𑀳𑀺 𑀤𑀳𑀭𑀸 𑀧𑀓𑁆𑀔𑀻, 𑀧𑀜𑁆𑀜𑀯𑀦𑁆𑀢𑁄 𑀚𑀼𑀢𑀺𑀦𑁆𑀥𑀭𑀸.

𑁬𑁦. 𑀦 𑀫𑁂 𑀭𑀼𑀘𑁆𑀘𑀢𑀺 𑀪𑀤𑁆𑀤𑀁 𑀯𑁄 [𑀪𑀤𑀦𑁆𑀢𑁂 (𑀓.)], 𑀉𑀮𑀽𑀓𑀲𑁆𑀲𑀸𑀪𑀺𑀲𑁂𑀘𑀦𑀁;

𑀅𑀓𑁆𑀓𑀼𑀤𑁆𑀥𑀲𑁆𑀲 𑀫𑀼𑀔𑀁 𑀧𑀲𑁆𑀲, 𑀓𑀣𑀁 𑀓𑀼𑀤𑁆𑀥𑁄 𑀓𑀭𑀺𑀲𑁆𑀲𑀢𑀻𑀢𑀺.

𑀉𑀮𑀽𑀓𑀚𑀸𑀢𑀓𑀁 𑀤𑀲𑀫𑀁.

𑀧𑀤𑀼𑀫𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀤𑀼𑀫𑀼𑀢𑁆𑀢𑀫 𑀦𑀸𑀕𑀲𑀺𑀭𑀺𑀯𑁆𑀳𑀬𑀦𑁄, 𑀲-𑀫𑀳𑀡𑁆𑀡𑀯 𑀬𑀽𑀧 𑀔𑀼𑀭𑀧𑁆𑀧𑀯𑀭𑁄;

𑀅𑀣 𑀪𑀤𑁆𑀤𑀮𑀻 𑀓𑀼𑀜𑁆𑀚𑀭 𑀭𑀼𑀓𑁆𑀔 𑀧𑀼𑀦, 𑀔𑀭𑀯𑀸𑀘 𑀉𑀮𑀽𑀓𑀯𑀭𑁂𑀦 𑀤𑀲𑀸𑀢𑀺.