𑁧. 𑀲𑀗𑁆𑀓𑀧𑁆𑀧𑀯𑀕𑁆𑀕𑁄

𑁨𑁫𑁧. 𑀲𑀗𑁆𑀓𑀧𑁆𑀧𑀭𑀸𑀕𑀚𑀸𑀢𑀓𑀁 (𑁩-𑁧-𑁧)

𑁧. 𑀲𑀗𑁆𑀓𑀧𑁆𑀧𑀭𑀸𑀕𑀥𑁄𑀢𑁂𑀦, 𑀯𑀺𑀢𑀓𑁆𑀓𑀦𑀺𑀲𑀺𑀢𑁂𑀦 𑀘;

𑀦𑀸𑀮𑀗𑁆𑀓𑀢𑁂𑀦 𑀪𑀤𑁆𑀭𑁂𑀦 [𑀦𑁂𑀯𑀸𑀮𑀗𑁆𑀓𑀢𑀪𑀤𑁆𑀭𑁂𑀦 (𑀲𑁆𑀬𑀸.)], 𑀉𑀲𑀼𑀓𑀸𑀭𑀸𑀓𑀢𑁂𑀦 𑀘 [𑀦 𑀉𑀲𑀼𑀓𑀸𑀭𑀓𑀢𑁂𑀦 𑀘 (𑀲𑀻. 𑀲𑁆𑀬𑀸. 𑀧𑀻.)].

𑁨. 𑀦 𑀓𑀡𑁆𑀡𑀸𑀬𑀢𑀫𑀼𑀢𑁆𑀢𑁂𑀦, 𑀦𑀸𑀧𑀺 𑀫𑁄𑀭𑀽𑀧𑀲𑁂𑀯𑀺𑀦𑀸;

𑀢𑁂𑀦𑀫𑁆𑀳𑀺 𑀳𑀤𑀬𑁂 𑀯𑀺𑀤𑁆𑀥𑁄, 𑀲𑀩𑁆𑀩𑀗𑁆𑀕𑀧𑀭𑀺𑀤𑀸𑀳𑀺𑀦𑀸.

𑁩. 𑀆𑀯𑁂𑀥𑀜𑁆𑀘 𑀦 𑀧𑀲𑁆𑀲𑀸𑀫𑀺, 𑀬𑀢𑁄 𑀭𑀼𑀳𑀺𑀭𑀫𑀲𑁆𑀲𑀯𑁂;

𑀬𑀸𑀯 𑀅𑀬𑁄𑀦𑀺𑀲𑁄 𑀘𑀺𑀢𑁆𑀢𑀁, 𑀲𑀬𑀁 𑀫𑁂 𑀤𑀼𑀓𑁆𑀔𑀫𑀸𑀪𑀢𑀦𑁆𑀢𑀺.

𑀲𑀗𑁆𑀓𑀧𑁆𑀧𑀭𑀸𑀕𑀚𑀸𑀢𑀓𑀁 𑀧𑀞𑀫𑀁.

𑁨𑁫𑁨. 𑀢𑀺𑀮𑀫𑀼𑀝𑁆𑀞𑀺𑀚𑀸𑀢𑀓𑀁 (𑁩-𑁧-𑁨)

𑁪. 𑀅𑀚𑁆𑀚𑀸𑀧𑀺 𑀫𑁂 𑀢𑀁 𑀫𑀦𑀲𑀺 [𑀲𑀭𑀲𑀺 (𑀓.)], 𑀬𑀁 𑀫𑀁 𑀢𑁆𑀯𑀁 𑀢𑀺𑀮𑀫𑀼𑀝𑁆𑀞𑀺𑀬𑀸;

𑀩𑀸𑀳𑀸𑀬 𑀫𑀁 𑀕𑀳𑁂𑀢𑁆𑀯𑀸𑀦, 𑀮𑀝𑁆𑀞𑀺𑀬𑀸 𑀅𑀦𑀼𑀢𑀸𑀴𑀬𑀺.

𑁫. 𑀦𑀦𑀼 𑀚𑀻𑀯𑀺𑀢𑁂 𑀦 𑀭𑀫𑀲𑀺, 𑀬𑁂𑀦𑀸𑀲𑀺 𑀩𑁆𑀭𑀸𑀳𑁆𑀫𑀡𑀸𑀕𑀢𑁄;

𑀬𑀁 𑀫𑀁 𑀩𑀸𑀳𑀸 𑀕𑀳𑁂𑀢𑁆𑀯𑀸𑀦, 𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑀼𑀢𑀸𑀴𑀬𑀺.

𑁬. 𑀅𑀭𑀺𑀬𑁄 𑀅𑀦𑀭𑀺𑀬𑀁 𑀓𑀼𑀩𑁆𑀩𑀦𑁆𑀢𑀁 [𑀓𑀼𑀩𑁆𑀩𑀸𑀦𑀁 (𑀲𑀻. 𑀧𑀻.), 𑀓𑀼𑀩𑁆𑀩𑀁 (𑀲𑁆𑀬𑀸.)], 𑀬𑁄 𑀤𑀡𑁆𑀟𑁂𑀦 𑀦𑀺𑀲𑁂𑀥𑀢𑀺;

𑀲𑀸𑀲𑀦𑀁 𑀢𑀁 𑀦 𑀢𑀁 𑀯𑁂𑀭𑀁, 𑀇𑀢𑀺 𑀦𑀁 𑀧𑀡𑁆𑀟𑀺𑀢𑀸 𑀯𑀺𑀤𑀽𑀢𑀺.

𑀢𑀺𑀮𑀫𑀼𑀝𑁆𑀞𑀺𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁨𑁫𑁩. 𑀫𑀡𑀺𑀓𑀡𑁆𑀞𑀚𑀸𑀢𑀓𑀁 (𑁩-𑁧-𑁩)

𑁭. 𑀫𑀫𑀦𑁆𑀦𑀧𑀸𑀦𑀁 𑀯𑀺𑀧𑀼𑀮𑀁 𑀉𑀴𑀸𑀭𑀁, 𑀉𑀧𑁆𑀧𑀚𑁆𑀚𑀢𑀻𑀫𑀲𑁆𑀲 𑀫𑀡𑀺𑀲𑁆𑀲 𑀳𑁂𑀢𑀼;

𑀢𑀁 𑀢𑁂 𑀦 𑀤𑀲𑁆𑀲𑀁 𑀅𑀢𑀺𑀬𑀸𑀘𑀓𑁄𑀲𑀺, 𑀦 𑀘𑀸𑀧𑀺 𑀢𑁂 𑀅𑀲𑁆𑀲𑀫𑀫𑀸𑀕𑀫𑀺𑀲𑁆𑀲𑀁.

𑁮. 𑀲𑀼𑀲𑀽 𑀬𑀣𑀸 𑀲𑀓𑁆𑀔𑀭𑀥𑁄𑀢𑀧𑀸𑀡𑀻, 𑀢𑀸𑀲𑁂𑀲𑀺 𑀫𑀁 𑀲𑁂𑀮𑀁 𑀬𑀸𑀘𑀫𑀸𑀦𑁄;

𑀢𑀁 𑀢𑁂 𑀦 𑀤𑀲𑁆𑀲𑀁 𑀅𑀢𑀺𑀬𑀸𑀘𑀓𑁄𑀲𑀺, 𑀦 𑀘𑀸𑀧𑀺 𑀢𑁂 𑀅𑀲𑁆𑀲𑀫𑀫𑀸𑀕𑀫𑀺𑀲𑁆𑀲𑀁.

𑁯. 𑀦 𑀢𑀁 𑀬𑀸𑀘𑁂 𑀬𑀲𑁆𑀲 𑀧𑀺𑀬𑀁 𑀚𑀺𑀕𑀻𑀲𑁂 [𑀚𑀺𑀕𑀺𑀁𑀲𑁂 (𑀲𑀻. 𑀲𑁆𑀬𑀸. 𑀧𑀻.)], 𑀤𑁂𑀲𑁆𑀲𑁄 𑀳𑁄𑀢𑀺 𑀅𑀢𑀺𑀬𑀸𑀘𑀦𑀸𑀬;

𑀦𑀸𑀕𑁄 𑀫𑀡𑀺𑀁 𑀬𑀸𑀘𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦, 𑀅𑀤𑀲𑁆𑀲𑀦𑀁𑀬𑁂𑀯 𑀢𑀤𑀚𑁆𑀛𑀕𑀫𑀸𑀢𑀺.

𑀫𑀡𑀺𑀓𑀡𑁆𑀞𑀚𑀸𑀢𑀓𑀁 𑀢𑀢𑀺𑀬𑀁.

𑁨𑁫𑁪. 𑀓𑀼𑀡𑁆𑀟𑀓𑀓𑀼𑀘𑁆𑀙𑀺𑀲𑀺𑀦𑁆𑀥𑀯𑀚𑀸𑀢𑀓𑀁 (𑁩-𑁧-𑁪)

𑁧𑁦. 𑀪𑀼𑀢𑁆𑀯𑀸 𑀢𑀺𑀡𑀧𑀭𑀺𑀖𑀸𑀲𑀁, 𑀪𑀼𑀢𑁆𑀯𑀸 𑀆𑀘𑀸𑀫𑀓𑀼𑀡𑁆𑀟𑀓𑀁;

𑀏𑀢𑀁 𑀢𑁂 𑀪𑁄𑀚𑀦𑀁 𑀆𑀲𑀺, 𑀓𑀲𑁆𑀫𑀸 𑀤𑀸𑀦𑀺 𑀦 𑀪𑀼𑀜𑁆𑀚𑀲𑀺.

𑁧𑁧. 𑀬𑀢𑁆𑀣 𑀧𑁄𑀲𑀁 𑀦 𑀚𑀸𑀦𑀦𑁆𑀢𑀺, 𑀚𑀸𑀢𑀺𑀬𑀸 𑀯𑀺𑀦𑀬𑁂𑀦 𑀯𑀸;

𑀩𑀳𑀼𑀁 [𑀧𑀳𑀽 (𑀲𑀻. 𑀧𑀻.), 𑀧𑀳𑀼𑀁 (𑀲𑁆𑀬𑀸. 𑀓.)] 𑀢𑀢𑁆𑀣 𑀫𑀳𑀸𑀩𑁆𑀭𑀫𑁆𑀳𑁂, 𑀅𑀧𑀺 𑀆𑀘𑀸𑀫𑀓𑀼𑀡𑁆𑀟𑀓𑀁.

𑁧𑁨. 𑀢𑁆𑀯𑀜𑁆𑀘 𑀔𑁄 𑀫𑀁 𑀧𑀚𑀸𑀦𑀸𑀲𑀺, 𑀬𑀸𑀤𑀺𑀲𑀸𑀬𑀁 𑀳𑀬𑀼𑀢𑁆𑀢𑀫𑁄;

𑀚𑀸𑀦𑀦𑁆𑀢𑁄 𑀚𑀸𑀦𑀫𑀸𑀕𑀫𑁆𑀫, 𑀦 𑀢𑁂 𑀪𑀓𑁆𑀔𑀸𑀫𑀺 𑀓𑀼𑀡𑁆𑀟𑀓𑀦𑁆𑀢𑀺.

𑀓𑀼𑀡𑁆𑀟𑀓𑀓𑀼𑀘𑁆𑀙𑀺𑀲𑀺𑀦𑁆𑀥𑀯𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁨𑁫𑁫. 𑀲𑀼𑀓𑀚𑀸𑀢𑀓𑀁 (𑁩-𑁧-𑁫)

𑁧𑁩. 𑀬𑀸𑀯 𑀲𑁄 𑀫𑀢𑁆𑀢𑀫𑀜𑁆𑀜𑀸𑀲𑀺, 𑀪𑁄𑀚𑀦𑀲𑁆𑀫𑀺𑀁 𑀯𑀺𑀳𑀗𑁆𑀕𑀫𑁄;

𑀢𑀸𑀯 𑀅𑀤𑁆𑀥𑀸𑀦𑀫𑀸𑀧𑀸𑀤𑀺, 𑀫𑀸𑀢𑀭𑀜𑁆𑀘 𑀅𑀧𑁄𑀲𑀬𑀺.

𑁧𑁪. 𑀬𑀢𑁄 𑀘 𑀔𑁄 𑀩𑀳𑀼𑀢𑀭𑀁, 𑀪𑁄𑀚𑀦𑀁 𑀅𑀚𑁆𑀛𑀯𑀸𑀳𑀭𑀺 [𑀅𑀚𑁆𑀛𑀼𑀧𑀸𑀳𑀭𑀺 (𑀲𑀻. 𑀧𑀻.)];

𑀢𑀢𑁄 𑀢𑀢𑁆𑀣𑁂𑀯 𑀲𑀁𑀲𑀻𑀤𑀺, 𑀅𑀫𑀢𑁆𑀢𑀜𑁆𑀜𑀽 𑀳𑀺 𑀲𑁄 𑀅𑀳𑀼.

𑁧𑁫. 𑀢𑀲𑁆𑀫𑀸 𑀫𑀢𑁆𑀢𑀜𑁆𑀜𑀼𑀢𑀸 𑀲𑀸𑀥𑀼, 𑀪𑁄𑀚𑀦𑀲𑁆𑀫𑀺𑀁 𑀅𑀕𑀺𑀤𑁆𑀥𑀢𑀸 [𑀅𑀕𑀺𑀤𑁆𑀥𑀺𑀢𑀸 (𑀲𑁆𑀬𑀸. 𑀓.)];

𑀅𑀫𑀢𑁆𑀢𑀜𑁆𑀜𑀽 𑀳𑀺 𑀲𑀻𑀤𑀦𑁆𑀢𑀺, 𑀫𑀢𑁆𑀢𑀜𑁆𑀜𑀽 𑀘 𑀦 𑀲𑀻𑀤𑀭𑁂𑀢𑀺.

𑀲𑀼𑀓𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁨𑁫𑁬. 𑀚𑀭𑀽𑀤𑀧𑀸𑀦𑀚𑀸𑀢𑀓𑀁 (𑁩-𑁧-𑁬)

𑁧𑁬. 𑀚𑀭𑀽𑀤𑀧𑀸𑀦𑀁 𑀔𑀡𑀫𑀸𑀦𑀸, 𑀯𑀸𑀡𑀺𑀚𑀸 𑀉𑀤𑀓𑀢𑁆𑀣𑀺𑀓𑀸;

𑀅𑀚𑁆𑀛𑀕𑀫𑀼𑀁 𑀅𑀬𑀲𑀁 𑀮𑁄𑀳𑀁 [𑀅𑀚𑁆𑀛𑀕𑀁𑀲𑀼 𑀅𑀬𑁄𑀮𑁄𑀳𑀁 (𑀲𑀻. 𑀲𑁆𑀬𑀸. 𑀧𑀻.)], 𑀢𑀺𑀧𑀼𑀲𑀻𑀲𑀜𑁆𑀘 𑀯𑀸𑀡𑀺𑀚𑀸;

𑀭𑀚𑀢𑀁 𑀚𑀸𑀢𑀭𑀽𑀧𑀜𑁆𑀘, 𑀫𑀼𑀢𑁆𑀢𑀸 𑀯𑁂𑀴𑀽𑀭𑀺𑀬𑀸 𑀩𑀳𑀽.

𑁧𑁭. 𑀢𑁂 𑀘 𑀢𑁂𑀦 𑀅𑀲𑀦𑁆𑀢𑀼𑀝𑁆𑀞𑀸, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀅𑀔𑀸𑀡𑀺𑀲𑀼𑀁;

𑀢𑁂 𑀢𑀢𑁆𑀣𑀸𑀲𑀻𑀯𑀺𑀲𑁄 [𑀢𑀢𑁆𑀣 𑀆𑀲𑀻𑀯𑀺𑀲𑁄 (𑀓.), 𑀢𑀢𑁆𑀣𑀧𑀸𑀲𑀻𑀯𑀺𑀲𑁄 (𑀲𑁆𑀬𑀸.)] 𑀖𑁄𑀭𑁄, 𑀢𑁂𑀚𑀲𑁆𑀲𑀻 𑀢𑁂𑀚𑀲𑀸 𑀳𑀦𑀺.

𑁧𑁮. 𑀢𑀲𑁆𑀫𑀸 𑀔𑀡𑁂 𑀦𑀸𑀢𑀺𑀔𑀡𑁂, 𑀅𑀢𑀺𑀔𑀸𑀢𑀁 [𑀅𑀢𑀺𑀔𑀡𑀁 (𑀓.)] 𑀳𑀺 𑀧𑀸𑀧𑀓𑀁;

𑀔𑀸𑀢𑁂𑀦 𑀘 [𑀔𑀡𑁂𑀦 𑀘 (𑀓.), 𑀔𑀡𑀦𑁂𑀦 (𑀲𑁆𑀬𑀸.)] 𑀥𑀦𑀁 𑀮𑀤𑁆𑀥𑀁, 𑀅𑀢𑀺𑀔𑀸𑀢𑁂𑀦 [𑀅𑀢𑀺𑀔𑀡𑁂𑀦 (𑀓.)] 𑀦𑀸𑀲𑀺𑀢𑀦𑁆𑀢𑀺.

𑀚𑀭𑀽𑀤𑀧𑀸𑀦𑀚𑀸𑀢𑀓𑀁 𑀙𑀝𑁆𑀞𑀁.

𑁨𑁫𑁭. 𑀕𑀸𑀫𑀡𑀺𑀘𑀦𑁆𑀤𑀚𑀸𑀢𑀓𑀁 (𑁩-𑁧-𑁭)

𑁧𑁯. 𑀦𑀸𑀬𑀁 𑀖𑀭𑀸𑀦𑀁 𑀓𑀼𑀲𑀮𑁄, 𑀮𑁄𑀮𑁄 𑀅𑀬𑀁 𑀯𑀮𑀻𑀫𑀼𑀔𑁄;

𑀓𑀢𑀁 𑀓𑀢𑀁 𑀔𑁄 𑀤𑀽𑀲𑁂𑀬𑁆𑀬, 𑀏𑀯𑀁𑀥𑀫𑁆𑀫𑀫𑀺𑀤𑀁 𑀓𑀼𑀮𑀁.

𑁨𑁦. 𑀦𑀬𑀺𑀤𑀁 𑀘𑀺𑀢𑁆𑀢𑀯𑀢𑁄 𑀮𑁄𑀫𑀁, 𑀦𑀸𑀬𑀁 𑀅𑀲𑁆𑀲𑀸𑀲𑀺𑀓𑁄 𑀫𑀺𑀕𑁄;

𑀲𑀺𑀝𑁆𑀞𑀁 [𑀲𑀢𑁆𑀣𑀁 (𑀲𑀻. 𑀲𑁆𑀬𑀸. 𑀧𑀻.)] 𑀫𑁂 𑀚𑀦𑀲𑀦𑁆𑀥𑁂𑀦, 𑀦𑀸𑀬𑀁 𑀓𑀺𑀜𑁆𑀘𑀺 𑀯𑀺𑀚𑀸𑀦𑀢𑀺.

𑁨𑁧. 𑀦 𑀫𑀸𑀢𑀭𑀁 𑀧𑀺𑀢𑀭𑀁 𑀯𑀸, 𑀪𑀸𑀢𑀭𑀁 𑀪𑀕𑀺𑀦𑀺𑀁 𑀲𑀓𑀁;

𑀪𑀭𑁂𑀬𑁆𑀬 𑀢𑀸𑀤𑀺𑀲𑁄 𑀧𑁄𑀲𑁄, 𑀲𑀺𑀝𑁆𑀞𑀁 𑀤𑀲𑀭𑀣𑁂𑀦 𑀫𑁂𑀢𑀺.

𑀕𑀸𑀫𑀡𑀺𑀘𑀦𑁆𑀤 [𑀕𑀸𑀫𑀡𑀺𑀘𑀡𑁆𑀟 (𑀲𑀻. 𑀧𑀻.)] 𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁨𑁫𑁮. 𑀫𑀦𑁆𑀥𑀸𑀢𑀼𑀚𑀸𑀢𑀓𑀁 (𑁩-𑁧-𑁮)

𑁨𑁨. 𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀧𑀭𑀺𑀳𑀭𑀦𑁆𑀢𑀺 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀦𑀸 [𑀯𑀺𑀭𑁄𑀘𑀫𑀸𑀦𑀸 (𑀓.)];

𑀲𑀩𑁆𑀩𑁂𑀯 𑀤𑀸𑀲𑀸 𑀫𑀦𑁆𑀥𑀸𑀢𑀼, 𑀬𑁂 𑀧𑀸𑀡𑀸 𑀧𑀣𑀯𑀺𑀲𑁆𑀲𑀺𑀢𑀸 [𑀧𑀞𑀯𑀺𑀦𑀺𑀲𑁆𑀲𑀺𑀢𑀸 (𑀲𑀻. 𑀧𑀻.), 𑀧𑀞𑀯𑀺𑀲𑁆𑀲𑀺𑀢𑀸 (𑀲𑁆𑀬𑀸.)].

𑁨𑁩. 𑀦 𑀓𑀳𑀸𑀧𑀡𑀯𑀲𑁆𑀲𑁂𑀦, 𑀢𑀺𑀢𑁆𑀢𑀺 𑀓𑀸𑀫𑁂𑀲𑀼 𑀯𑀺𑀚𑁆𑀚𑀢𑀺;

𑀅𑀧𑁆𑀧𑀲𑁆𑀲𑀸𑀤𑀸 𑀤𑀼𑀔𑀸 𑀓𑀸𑀫𑀸, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄.

𑁨𑁪. 𑀅𑀧𑀺 𑀤𑀺𑀩𑁆𑀩𑁂𑀲𑀼 𑀓𑀸𑀫𑁂𑀲𑀼, 𑀭𑀢𑀺𑀁 𑀲𑁄 𑀦𑀸𑀥𑀺𑀕𑀘𑁆𑀙𑀢𑀺;

𑀢𑀡𑁆𑀳𑀓𑁆𑀔𑀬𑀭𑀢𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄𑀢𑀺.

𑀫𑀦𑁆𑀥𑀸𑀢𑀼𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁨𑁫𑁯. 𑀢𑀺𑀭𑀻𑀝𑀯𑀘𑁆𑀙𑀚𑀸𑀢𑀓𑀁 (𑁩-𑁧-𑁯)

𑁨𑁫. 𑀦𑀬𑀺𑀫𑀲𑁆𑀲 𑀯𑀺𑀚𑁆𑀚𑀸𑀫𑀬𑀫𑀢𑁆𑀣𑀺 𑀓𑀺𑀜𑁆𑀘𑀺, 𑀦 𑀩𑀦𑁆𑀥𑀯𑁄 𑀦𑁄 𑀧𑀦 𑀢𑁂 𑀲𑀳𑀸𑀬𑁄;

𑀅𑀣 𑀓𑁂𑀦 𑀯𑀡𑁆𑀡𑁂𑀦 𑀢𑀺𑀭𑀻𑀝𑀯𑀘𑁆𑀙𑁄 [𑀢𑀺𑀭𑀻𑀝𑀺𑀯𑀘𑁆𑀙𑁄 (𑀲𑁆𑀬𑀸. 𑀓.)], 𑀢𑁂𑀤𑀡𑁆𑀟𑀺𑀓𑁄 𑀪𑀼𑀜𑁆𑀚𑀢𑀺 𑀅𑀕𑁆𑀕𑀧𑀺𑀡𑁆𑀟𑀁.

𑁨𑁬. 𑀆𑀧𑀸𑀲𑀼 [𑀆𑀯𑀸𑀲𑀼 (𑀓.)] 𑀫𑁂 𑀬𑀼𑀤𑁆𑀥𑀧𑀭𑀸𑀚𑀺𑀢𑀲𑁆𑀲, 𑀏𑀓𑀲𑁆𑀲 𑀓𑀢𑁆𑀯𑀸 𑀯𑀺𑀯𑀦𑀲𑁆𑀫𑀺 𑀖𑁄𑀭𑁂;

𑀧𑀲𑀸𑀭𑀬𑀻 𑀓𑀺𑀘𑁆𑀙𑀕𑀢𑀲𑁆𑀲 𑀧𑀸𑀡𑀺𑀁, 𑀢𑁂𑀦𑀽𑀤𑀢𑀸𑀭𑀺𑀁 𑀤𑀼𑀔𑀲𑀁𑀧𑀭𑁂𑀢𑁄.

𑁨𑁭. 𑀏𑀢𑀲𑁆𑀲 𑀓𑀺𑀘𑁆𑀘𑁂𑀦 𑀇𑀥𑀸𑀦𑀼𑀧𑀢𑁆𑀢𑁄, 𑀯𑁂𑀲𑀸𑀬𑀺𑀦𑁄 𑀯𑀺𑀲𑀬𑀸 𑀚𑀻𑀯𑀮𑁄𑀓𑁂;

𑀮𑀸𑀪𑀸𑀭𑀳𑁄 𑀢𑀸𑀢 𑀢𑀺𑀭𑀻𑀝𑀯𑀘𑁆𑀙𑁄, 𑀤𑁂𑀣𑀲𑁆𑀲 𑀪𑁄𑀕𑀁 𑀬𑀚𑀣𑀜𑁆𑀘 [𑀬𑀚𑀢𑀜𑁆𑀘 (𑀲𑀻. 𑀧𑀻.), 𑀬𑀚𑀺𑀢𑀜𑁆𑀘 (𑀲𑁆𑀬𑀸.)] 𑀬𑀜𑁆𑀜𑀦𑁆𑀢𑀺.

𑀢𑀺𑀭𑀻𑀝𑀯𑀘𑁆𑀙𑀚𑀸𑀢𑀓𑀁 𑀦𑀯𑀫𑀁.

𑁨𑁬𑁦. 𑀤𑀽𑀢𑀚𑀸𑀢𑀓𑀁 (𑁩-𑁧-𑁧𑁦)

𑁨𑁮. 𑀬𑀲𑁆𑀲𑀢𑁆𑀣𑀸 𑀤𑀽𑀭𑀫𑀸𑀬𑀦𑁆𑀢𑀺, 𑀅𑀫𑀺𑀢𑁆𑀢𑀫𑀧𑀺 𑀬𑀸𑀘𑀺𑀢𑀼𑀁;

𑀢𑀲𑁆𑀲𑀽𑀤𑀭𑀲𑁆𑀲𑀳𑀁 𑀤𑀽𑀢𑁄, 𑀫𑀸 𑀫𑁂 𑀓𑀼𑀚𑁆𑀛 [𑀓𑀼𑀚𑁆𑀛𑀺 (𑀲𑀻. 𑀧𑀻.)] 𑀭𑀣𑁂𑀲𑀪.

𑁨𑁯. 𑀬𑀲𑁆𑀲 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀯𑀲𑀫𑀸𑀬𑀦𑁆𑀢𑀺 𑀫𑀸𑀡𑀯𑀸;

𑀢𑀲𑁆𑀲𑀽𑀤𑀭𑀲𑁆𑀲𑀳𑀁 𑀤𑀽𑀢𑁄, 𑀫𑀸 𑀫𑁂 𑀓𑀼𑀚𑁆𑀛 [𑀓𑀼𑀚𑁆𑀛𑀺 (𑀲𑀻. 𑀧𑀻.)] 𑀭𑀣𑁂𑀲𑀪.

𑁩𑁦. 𑀤𑀤𑀸𑀫𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀭𑁄𑀳𑀺𑀡𑀻𑀦𑀁, 𑀕𑀯𑀁 𑀲𑀳𑀲𑁆𑀲𑀁 𑀲𑀳 𑀧𑀼𑀗𑁆𑀕𑀯𑁂𑀦;

𑀤𑀽𑀢𑁄 𑀳𑀺 𑀤𑀽𑀢𑀲𑁆𑀲 𑀓𑀣𑀁 𑀦 𑀤𑀚𑁆𑀚𑀁, 𑀫𑀬𑀫𑁆𑀧𑀺 𑀢𑀲𑁆𑀲𑁂𑀯 𑀪𑀯𑀸𑀫 𑀤𑀽𑀢𑀸𑀢𑀺.

𑀤𑀽𑀢𑀚𑀸𑀢𑀓𑀁 𑀤𑀲𑀫𑀁.

𑀲𑀗𑁆𑀓𑀧𑁆𑀧𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀉𑀲𑀼𑀓𑀸𑀭𑀯𑀭𑁄 𑀢𑀺𑀮𑀫𑀼𑀝𑁆𑀞𑀺 𑀫𑀡𑀺, 𑀳𑀬𑀭𑀸𑀚 𑀯𑀺𑀳𑀗𑁆𑀕𑀫 𑀆𑀲𑀺𑀯𑀺𑀲𑁄;

𑀚𑀦𑀲𑀦𑁆𑀥 𑀓𑀳𑀸𑀧𑀡𑀯𑀲𑁆𑀲 𑀧𑀼𑀦, 𑀢𑀺𑀭𑀺𑀝𑀁 𑀧𑀼𑀦 𑀤𑀽𑀢𑀯𑀭𑁂𑀦 𑀤𑀲𑀸𑀢𑀺.