𑁫𑁨𑁭. 𑀉𑀫𑁆𑀫𑀸𑀤𑀦𑁆𑀢𑀻𑀚𑀸𑀢𑀓𑀁 (𑁨)

𑁫𑁭. ‘‘𑀦𑀺𑀯𑁂𑀲𑀦𑀁 𑀓𑀲𑁆𑀲 𑀦𑀼𑀤𑀁 𑀲𑀼𑀦𑀦𑁆𑀤, 𑀧𑀸𑀓𑀸𑀭𑁂𑀦 𑀧𑀡𑁆𑀟𑀼𑀫𑀬𑁂𑀦 𑀕𑀼𑀢𑁆𑀢𑀁;

𑀓𑀸 𑀤𑀺𑀲𑁆𑀲𑀢𑀺 𑀅𑀕𑁆𑀕𑀺𑀲𑀺𑀔𑀸𑀯 𑀤𑀽𑀭𑁂, 𑀯𑁂𑀳𑀸𑀬𑀲𑀁 [𑀯𑁂𑀳𑀸𑀲𑀬𑀁 (𑀲𑀻. 𑀧𑀻.)] 𑀧𑀩𑁆𑀩𑀢𑀕𑁆𑀕𑁂𑀯 𑀅𑀘𑁆𑀘𑀺.

𑁫𑁮. ‘‘𑀥𑀻𑀢𑀸 𑀦𑁆𑀯𑀬𑀁 [𑀦𑀬𑀁 (𑀲𑀻. 𑀧𑀻.), 𑀦𑁆𑀯𑀸𑀬𑀁 (𑀲𑁆𑀬𑀸.)] 𑀓𑀲𑁆𑀲 𑀲𑀼𑀦𑀦𑁆𑀤 𑀳𑁄𑀢𑀺, 𑀲𑀼𑀡𑀺𑀲𑀸 𑀦𑁆𑀯𑀬𑀁 [𑀦𑀬𑀁 (𑀲𑀻. 𑀧𑀻.), 𑀦𑁆𑀯𑀸𑀬𑀁 (𑀲𑁆𑀬𑀸.)] 𑀓𑀲𑁆𑀲 𑀅𑀣𑁄𑀧𑀺 𑀪𑀭𑀺𑀬𑀸;

𑀅𑀓𑁆𑀔𑀸𑀳𑀺 𑀫𑁂 𑀔𑀺𑀧𑁆𑀧𑀫𑀺𑀥𑁂𑀯 𑀧𑀼𑀝𑁆𑀞𑁄, 𑀅𑀯𑀸𑀯𑀝𑀸 𑀬𑀤𑀺 𑀯𑀸 𑀅𑀢𑁆𑀣𑀺 𑀪𑀢𑁆𑀢𑀸’’.

𑁫𑁯. ‘‘𑀅𑀳𑀜𑁆𑀳𑀺 𑀚𑀸𑀦𑀸𑀫𑀺 𑀚𑀦𑀺𑀦𑁆𑀤 𑀏𑀢𑀁, 𑀫𑀢𑁆𑀬𑀸 𑀘 𑀧𑁂𑀢𑁆𑀬𑀸 𑀘 𑀅𑀣𑁄𑀧𑀺 𑀅𑀲𑁆𑀲𑀸;

𑀢𑀯𑁂𑀯 𑀲𑁄 𑀧𑀼𑀭𑀺𑀲𑁄 𑀪𑀽𑀫𑀺𑀧𑀸𑀮, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀅𑀧𑁆𑀧𑀫𑀢𑁆𑀢𑁄 𑀢𑀯𑀢𑁆𑀣𑁂.

𑁬𑁦. ‘‘𑀇𑀤𑁆𑀥𑁄 𑀘 𑀨𑀻𑀢𑁄 𑀘 𑀲𑀼𑀯𑀟𑁆𑀠𑀺𑀢𑁄 [𑀲𑀼𑀩𑀸𑀴𑁆𑀳𑀺𑀓𑁄 (𑀧𑀻.)] 𑀘, 𑀅𑀫𑀘𑁆𑀘𑁄 𑀘 𑀢𑁂 𑀅𑀜𑁆𑀜𑀢𑀭𑁄 𑀚𑀦𑀺𑀦𑁆𑀤;

𑀢𑀲𑁆𑀲𑁂𑀲𑀸 𑀪𑀭𑀺𑀬𑀸𑀪𑀺𑀧𑀸𑀭𑀓𑀲𑁆𑀲 [𑀅𑀳𑀺𑀧𑀸𑀭𑀓𑀲𑁆𑀲 (𑀲𑀻. 𑀧𑀻.), 𑀅𑀪𑀺𑀧𑀸𑀤𑀓𑀲𑁆𑀲 (𑀓.)], 𑀉𑀫𑁆𑀫𑀸𑀤𑀦𑁆𑀢𑀻 [𑀉𑀫𑁆𑀫𑀸𑀤𑀦𑁆𑀢𑀻𑀢𑀺 (𑀓.)] 𑀦𑀸𑀫𑀥𑁂𑀬𑁆𑀬𑁂𑀦 𑀭𑀸𑀚’’.

𑁬𑁧. ‘‘𑀅𑀫𑁆𑀪𑁄 𑀅𑀫𑁆𑀪𑁄 𑀦𑀸𑀫𑀫𑀺𑀤𑀁 𑀇𑀫𑀺𑀲𑁆𑀲𑀸, 𑀫𑀢𑁆𑀬𑀸 𑀘 𑀧𑁂𑀢𑁆𑀬𑀸 𑀘 𑀓𑀢𑀁 𑀲𑀼𑀲𑀸𑀥𑀼;

𑀢𑀤𑀸 [𑀢𑀣𑀸 (𑀲𑀻. 𑀲𑁆𑀬𑀸. 𑀧𑀻.)] 𑀳𑀺 𑀫𑀬𑁆𑀳𑀁 𑀅𑀯𑀮𑁄𑀓𑀬𑀦𑁆𑀢𑀻, 𑀉𑀫𑁆𑀫𑀢𑁆𑀢𑀓𑀁 𑀉𑀫𑁆𑀫𑀤𑀦𑁆𑀢𑀻 𑀅𑀓𑀸𑀲𑀺’’.

𑁬𑁨. ‘‘𑀬𑀸 𑀧𑀼𑀡𑁆𑀡𑀫𑀸𑀲𑁂 [𑀧𑀼𑀡𑁆𑀡𑀫𑀸𑀬𑁂 (𑀓.)] 𑀫𑀺𑀕𑀫𑀦𑁆𑀤𑀮𑁄𑀘𑀦𑀸, 𑀉𑀧𑀸𑀯𑀺𑀲𑀺 𑀧𑀼𑀡𑁆𑀟𑀭𑀻𑀓𑀢𑁆𑀢𑀘𑀗𑁆𑀕𑀻;

𑀤𑁆𑀯𑁂 𑀧𑀼𑀡𑁆𑀡𑀫𑀸𑀬𑁄 𑀢𑀤𑀳𑀽 𑀅𑀫𑀜𑁆𑀜𑀳𑀁, 𑀤𑀺𑀲𑁆𑀯𑀸𑀦 𑀧𑀸𑀭𑀸𑀯𑀢𑀭𑀢𑁆𑀢𑀯𑀸𑀲𑀺𑀦𑀺𑀁.

𑁬𑁩. ‘‘𑀅𑀴𑀸𑀭𑀧𑀫𑁆𑀳𑁂𑀳𑀺 𑀲𑀼𑀪𑁂𑀳𑀺 𑀯𑀕𑁆𑀕𑀼𑀪𑀺, 𑀧𑀮𑁄𑀪𑀬𑀦𑁆𑀢𑀻 𑀫𑀁 𑀬𑀤𑀸 𑀉𑀤𑀺𑀓𑁆𑀔𑀢𑀺;

𑀯𑀺𑀚𑀫𑁆𑀪𑀫𑀸𑀦𑀸 𑀳𑀭𑀢𑁂𑀯 𑀫𑁂 𑀫𑀦𑁄, 𑀚𑀸𑀢𑀸 𑀯𑀦𑁂 𑀓𑀺𑀫𑁆𑀧𑀼𑀭𑀺𑀲𑀻𑀯 𑀧𑀩𑁆𑀩𑀢𑁂.

𑁬𑁪. ‘‘𑀢𑀤𑀸 𑀳𑀺 𑀩𑁆𑀭𑀳𑀢𑀻 𑀲𑀸𑀫𑀸, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸;

𑀏𑀓𑀘𑁆𑀘𑀯𑀲𑀦𑀸 𑀦𑀸𑀭𑀻, 𑀫𑀺𑀕𑀻 𑀪𑀦𑁆𑀢𑀸𑀯𑀼𑀤𑀺𑀓𑁆𑀔𑀢𑀺.

𑁬𑁫. ‘‘𑀓𑀤𑀸𑀲𑁆𑀲𑀼 𑀫𑀁 𑀢𑀫𑁆𑀩𑀦𑀔𑀸 𑀲𑀼𑀮𑁄𑀫𑀸, 𑀩𑀸𑀳𑀸𑀫𑀼𑀤𑀽 𑀘𑀦𑁆𑀤𑀦𑀲𑀸𑀭𑀮𑀺𑀢𑁆𑀢𑀸;

𑀯𑀝𑁆𑀝𑀗𑁆𑀕𑀼𑀮𑀻 𑀲𑀦𑁆𑀦𑀢𑀥𑀻𑀭𑀓𑀼𑀢𑁆𑀢𑀺𑀬𑀸, 𑀦𑀸𑀭𑀻 𑀉𑀧𑀜𑁆𑀜𑀺𑀲𑁆𑀲𑀢𑀺 𑀲𑀻𑀲𑀢𑁄 𑀲𑀼𑀪𑀸.

𑁬𑁬. ‘‘𑀓𑀤𑀸𑀲𑁆𑀲𑀼 𑀫𑀁 𑀓𑀜𑁆𑀘𑀦𑀚𑀸𑀮𑀼𑀭𑀘𑁆𑀙𑀤𑀸, 𑀥𑀻𑀢𑀸 𑀢𑀺𑀭𑀻𑀝𑀺𑀲𑁆𑀲 𑀯𑀺𑀮𑀕𑁆𑀕𑀫𑀚𑁆𑀛𑀸;

𑀫𑀼𑀤𑀽𑀳𑀺 𑀩𑀸𑀳𑀸𑀳𑀺 𑀧𑀮𑀺𑀲𑁆𑀲𑀚𑀺𑀲𑁆𑀲𑀢𑀺, 𑀩𑁆𑀭𑀳𑀸𑀯𑀦𑁂 𑀚𑀸𑀢𑀤𑀼𑀫𑀁𑀯 𑀫𑀸𑀮𑀼𑀯𑀸.

𑁬𑁭. ‘‘𑀓𑀤𑀸𑀲𑁆𑀲𑀼 [𑀓𑀤𑀸𑀲𑁆𑀲𑀼 𑀫𑀁 (𑀲𑁆𑀬𑀸. 𑀓.)] 𑀮𑀸𑀔𑀸𑀭𑀲𑀭𑀢𑁆𑀢𑀲𑀼𑀘𑁆𑀙𑀯𑀻, 𑀩𑀺𑀦𑁆𑀤𑀼𑀢𑁆𑀣𑀦𑀻 𑀧𑀼𑀡𑁆𑀟𑀭𑀻𑀓𑀢𑁆𑀢𑀘𑀗𑁆𑀕𑀻;

𑀫𑀼𑀔𑀁 𑀫𑀼𑀔𑁂𑀦 𑀉𑀧𑀦𑀸𑀫𑀬𑀺𑀲𑁆𑀲𑀢𑀺, 𑀲𑁄𑀡𑁆𑀟𑁄𑀯 𑀲𑁄𑀡𑁆𑀟𑀲𑁆𑀲 𑀲𑀼𑀭𑀸𑀬 𑀣𑀸𑀮𑀁.

𑁬𑁮. ‘‘𑀬𑀤𑀸𑀤𑁆𑀤𑀲𑀁 [𑀬𑀣𑀸𑀤𑁆𑀤𑀲𑀁 (𑀧𑀻.)] 𑀢𑀁 𑀢𑀺𑀝𑁆𑀞𑀦𑁆𑀢𑀺𑀁, 𑀲𑀩𑁆𑀩𑀪𑀤𑁆𑀤𑀁 [𑀲𑀩𑁆𑀩𑀕𑀢𑁆𑀢𑀁 (𑀲𑀻. 𑀲𑁆𑀬𑀸. 𑀧𑀻.)] 𑀫𑀦𑁄𑀭𑀫𑀁;

𑀢𑀢𑁄 𑀲𑀓𑀲𑁆𑀲 𑀘𑀺𑀢𑁆𑀢𑀲𑁆𑀲, 𑀦𑀸𑀯𑀩𑁄𑀥𑀸𑀫𑀺 𑀓𑀜𑁆𑀘𑀺𑀦𑀁 [𑀓𑀺𑀜𑁆𑀘𑀺𑀦𑀁 (𑀓.), 𑀓𑀺𑀜𑁆𑀘𑀦𑀁 (𑀧𑀻.)].

𑁬𑁯. ‘‘𑀉𑀫𑁆𑀫𑀸𑀤𑀦𑁆𑀢𑀺𑀫𑀳𑀁 𑀤𑀝𑁆𑀞𑀸 [𑀤𑀺𑀝𑁆𑀞𑀸 (𑀲𑀻. 𑀲𑁆𑀬𑀸. 𑀧𑀻. 𑀓.)], 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀁;

𑀦 𑀲𑀼𑀧𑀸𑀫𑀺 𑀤𑀺𑀯𑀸𑀭𑀢𑁆𑀢𑀺𑀁, 𑀲𑀳𑀲𑁆𑀲𑀁𑀯 𑀧𑀭𑀸𑀚𑀺𑀢𑁄.

𑁭𑁦. ‘‘𑀲𑀓𑁆𑀓𑁄 𑀘𑁂 [𑀘 (𑀲𑀻. 𑀧𑀻.)] 𑀫𑁂 𑀯𑀭𑀁 𑀤𑀚𑁆𑀚𑀸, 𑀲𑁄 𑀘 𑀮𑀩𑁆𑀪𑁂𑀣 𑀫𑁂 𑀯𑀭𑁄;

𑀏𑀓𑀭𑀢𑁆𑀢𑀁 𑀤𑁆𑀯𑀺𑀭𑀢𑁆𑀢𑀁 [𑀤𑀺𑀭𑀢𑁆𑀢𑀁 (𑀧𑀻.)] 𑀯𑀸, 𑀪𑀯𑁂𑀬𑁆𑀬𑀁 𑀅𑀪𑀺𑀧𑀸𑀭𑀓𑁄;

𑀉𑀫𑁆𑀫𑀸𑀤𑀦𑁆𑀢𑁆𑀬𑀸 𑀭𑀫𑀺𑀢𑁆𑀯𑀸𑀦, 𑀲𑀺𑀯𑀺𑀭𑀸𑀚𑀸 𑀢𑀢𑁄 𑀲𑀺𑀬𑀁’’ [𑀲𑀺𑀬𑀸 (𑀲𑁆𑀬𑀸. 𑀧𑀻.)].

𑁭𑁧. ‘‘𑀪𑀽𑀢𑀸𑀦𑀺 𑀫𑁂 𑀪𑀽𑀢𑀧𑀢𑀻 𑀦𑀫𑀲𑁆𑀲𑀢𑁄, 𑀆𑀕𑀫𑁆𑀫 𑀬𑀓𑁆𑀔𑁄 𑀇𑀤𑀫𑁂𑀢𑀤𑀩𑁆𑀭𑀯𑀺;

𑀭𑀜𑁆𑀜𑁄 𑀫𑀦𑁄 𑀉𑀫𑁆𑀫𑀤𑀦𑁆𑀢𑁆𑀬𑀸 𑀦𑀺𑀯𑀺𑀝𑁆𑀞𑁄, 𑀤𑀤𑀸𑀫𑀺 𑀢𑁂 𑀢𑀁 𑀧𑀭𑀺𑀘𑀸𑀭𑀬𑀲𑁆𑀲𑀼’’.

𑁭𑁨. ‘‘𑀧𑀼𑀜𑁆𑀜𑀸 𑀯𑀺𑀥𑀁𑀲𑁂 𑀅𑀫𑀭𑁄 𑀦 𑀘𑀫𑁆𑀳𑀺, 𑀚𑀦𑁄 𑀘 𑀫𑁂 𑀧𑀸𑀧𑀫𑀺𑀤𑀜𑁆𑀘 [𑀧𑀸𑀧𑀫𑀺𑀤𑀦𑁆𑀢𑀺 (𑀲𑀻. 𑀧𑀻.)] 𑀚𑀜𑁆𑀜𑀸;

𑀪𑀼𑀲𑁄 𑀘 𑀢𑁆𑀬𑀲𑁆𑀲 𑀫𑀦𑀲𑁄 𑀯𑀺𑀖𑀸𑀢𑁄, 𑀤𑀢𑁆𑀯𑀸 𑀧𑀺𑀬𑀁 𑀉𑀫𑁆𑀫𑀤𑀦𑁆𑀢𑀺𑀁 𑀅𑀤𑀝𑁆𑀞𑀸’’.

𑁭𑁩. ‘‘𑀚𑀦𑀺𑀦𑁆𑀤 𑀦𑀸𑀜𑁆𑀜𑀢𑁆𑀭 𑀢𑀬𑀸 𑀫𑀬𑀸 𑀯𑀸, 𑀲𑀩𑁆𑀩𑀸𑀧𑀺 𑀓𑀫𑁆𑀫𑀲𑁆𑀲 𑀓𑀢𑀲𑁆𑀲 𑀚𑀜𑁆𑀜𑀸;

𑀬𑀁 𑀢𑁂 𑀫𑀬𑀸 𑀉𑀫𑁆𑀫𑀤𑀦𑁆𑀢𑀻 𑀧𑀤𑀺𑀦𑁆𑀦𑀸, 𑀪𑀼𑀲𑁂𑀳𑀺 𑀭𑀸𑀚𑀸 𑀯𑀦𑀣𑀁 𑀲𑀚𑀸𑀳𑀺’’.

𑁭𑁪. ‘‘𑀬𑁄 𑀧𑀸𑀧𑀓𑀁 𑀓𑀫𑁆𑀫 𑀓𑀭𑀁 𑀫𑀦𑀼𑀲𑁆𑀲𑁄, 𑀲𑁄 𑀫𑀜𑁆𑀜𑀢𑀺 𑀫𑀸𑀬𑀺𑀤 [𑀫𑀸𑀬𑀺𑀥 (𑀓.)] 𑀫𑀜𑁆𑀜𑀺𑀁𑀲𑀼 𑀅𑀜𑁆𑀜𑁂;

𑀧𑀲𑁆𑀲𑀦𑁆𑀢𑀺 𑀪𑀽𑀢𑀸𑀦𑀺 𑀓𑀭𑁄𑀦𑁆𑀢𑀫𑁂𑀢𑀁, 𑀬𑀼𑀢𑁆𑀢𑀸 𑀘 𑀬𑁂 𑀳𑁄𑀦𑁆𑀢𑀺 𑀦𑀭𑀸 𑀧𑀣𑀩𑁆𑀬𑀸.

𑁭𑁫. ‘‘𑀅𑀜𑁆𑀜𑁄 𑀦𑀼 𑀢𑁂 𑀓𑁄𑀘𑀺 [𑀓𑁄𑀥 (𑀧𑀻.)] 𑀦𑀭𑁄 𑀧𑀣𑀩𑁆𑀬𑀸, 𑀲𑀤𑁆𑀥𑁂𑀬𑁆𑀬 [𑀲𑀤𑁆𑀤𑀳𑁂𑀬𑁆𑀬 (𑀲𑀻.)] 𑀮𑁄𑀓𑀲𑁆𑀫𑀺 𑀦 𑀫𑁂 𑀧𑀺𑀬𑀸𑀢𑀺;

𑀪𑀼𑀲𑁄 𑀘 𑀢𑁆𑀬𑀲𑁆𑀲 𑀫𑀦𑀲𑁄 𑀯𑀺𑀖𑀸𑀢𑁄, 𑀤𑀢𑁆𑀯𑀸 𑀧𑀺𑀬𑀁 𑀉𑀫𑁆𑀫𑀤𑀦𑁆𑀢𑀺𑀁 𑀅𑀤𑀝𑁆𑀞𑀸’’.

𑁭𑁬. ‘‘𑀅𑀤𑁆𑀥𑀸 𑀧𑀺𑀬𑀸 𑀫𑀬𑁆𑀳 𑀚𑀦𑀺𑀦𑁆𑀤 𑀏𑀲𑀸, 𑀦 𑀲𑀸 𑀫𑀫𑀁 𑀅𑀧𑁆𑀧𑀺𑀬𑀸 𑀪𑀽𑀫𑀺𑀧𑀸𑀮;

𑀕𑀘𑁆𑀙𑁂𑀯 𑀢𑁆𑀯𑀁 𑀉𑀫𑁆𑀫𑀤𑀦𑁆𑀢𑀺𑀁 𑀪𑀤𑀦𑁆𑀢𑁂, 𑀲𑀻𑀳𑁄𑀯 𑀲𑁂𑀮𑀲𑁆𑀲 𑀕𑀼𑀳𑀁 𑀉𑀧𑁂𑀢𑀺’’.

𑁭𑁭. ‘‘𑀦 𑀧𑀻𑀴𑀺𑀢𑀸 𑀅𑀢𑁆𑀢𑀤𑀼𑀔𑁂𑀦 𑀥𑀻𑀭𑀸, 𑀲𑀼𑀔𑀧𑁆𑀨𑀮𑀁 𑀓𑀫𑁆𑀫 𑀧𑀭𑀺𑀘𑁆𑀘𑀚𑀦𑁆𑀢𑀺;

𑀲𑀫𑁆𑀫𑁄𑀳𑀺𑀢𑀸 𑀯𑀸𑀧𑀺 𑀲𑀼𑀔𑁂𑀦 𑀫𑀢𑁆𑀢𑀸, 𑀦 𑀧𑀸𑀧𑀓𑀫𑁆𑀫𑀜𑁆𑀘 [𑀧𑀸𑀧𑀓𑀁 𑀓𑀫𑁆𑀫 (𑀧𑀻.)] 𑀲𑀫𑀸𑀘𑀭𑀦𑁆𑀢𑀺’’.

𑁭𑁮. ‘‘𑀢𑀼𑀯𑀜𑁆𑀳𑀺 𑀫𑀸𑀢𑀸 𑀘 𑀧𑀺𑀢𑀸 𑀘 𑀫𑀬𑁆𑀳𑀁, 𑀪𑀢𑁆𑀢𑀸 𑀧𑀢𑀻 𑀧𑁄𑀲𑀓𑁄 𑀤𑁂𑀯𑀢𑀸 𑀘;

𑀤𑀸𑀲𑁄 𑀅𑀳𑀁 𑀢𑀼𑀬𑁆𑀳 𑀲𑀧𑀼𑀢𑁆𑀢𑀤𑀸𑀭𑁄, 𑀬𑀣𑀸𑀲𑀼𑀔𑀁 𑀲𑀸𑀫𑀺 [𑀲𑀺𑀩𑁆𑀩 (𑀲𑀻.), 𑀲𑀻𑀯𑀺 (𑀲𑁆𑀬𑀸.)] 𑀓𑀭𑁄𑀳𑀺 𑀓𑀸𑀫𑀁’’.

𑁭𑁯. ‘‘𑀬𑁄 𑀇𑀲𑁆𑀲𑀭𑁄𑀫𑁆𑀳𑀻𑀢𑀺 𑀓𑀭𑁄𑀢𑀺 𑀧𑀸𑀧𑀁, 𑀓𑀢𑁆𑀯𑀸 𑀘 𑀲𑁄 𑀦𑀼𑀢𑁆𑀢𑀲𑀢𑁂 [𑀦𑀼𑀢𑁆𑀢𑀧𑀢𑁂 (𑀧𑀻.)] 𑀧𑀭𑁂𑀲𑀁;

𑀦 𑀢𑁂𑀦 𑀲𑁄 𑀚𑀻𑀯𑀢𑀺 𑀤𑀻𑀖𑀫𑀸𑀬𑀼 [𑀤𑀻𑀖𑀫𑀸𑀬𑀼𑀁 (𑀲𑀻. 𑀲𑁆𑀬𑀸.)], 𑀤𑁂𑀯𑀸𑀧𑀺 𑀧𑀸𑀧𑁂𑀦 𑀲𑀫𑁂𑀓𑁆𑀔𑀭𑁂 𑀦𑀁.

𑁮𑁦. ‘‘𑀅𑀜𑁆𑀜𑀸𑀢𑀓𑀁 𑀲𑀸𑀫𑀺𑀓𑁂𑀳𑀻 𑀧𑀤𑀺𑀦𑁆𑀦𑀁, 𑀥𑀫𑁆𑀫𑁂 𑀞𑀺𑀢𑀸 𑀬𑁂 𑀧𑀝𑀺𑀘𑁆𑀙𑀦𑁆𑀢𑀺 𑀤𑀸𑀦𑀁;

𑀧𑀝𑀺𑀘𑁆𑀙𑀓𑀸 𑀤𑀸𑀬𑀓𑀸 𑀘𑀸𑀧𑀺 𑀢𑀢𑁆𑀣, 𑀲𑀼𑀔𑀧𑁆𑀨𑀮𑀜𑁆𑀜𑁂𑀯 𑀓𑀭𑁄𑀦𑁆𑀢𑀺 𑀓𑀫𑁆𑀫𑀁’’.

𑁮𑁧. ‘‘𑀅𑀜𑁆𑀜𑁄 𑀦𑀼 𑀢𑁂 𑀓𑁄𑀘𑀺 𑀦𑀭𑁄 𑀧𑀣𑀩𑁆𑀬𑀸, 𑀲𑀤𑁆𑀥𑁂𑀬𑁆𑀬 𑀮𑁄𑀓𑀲𑁆𑀫𑀺 𑀦 𑀫𑁂 𑀧𑀺𑀬𑀸𑀢𑀺;

𑀪𑀼𑀲𑁄 𑀘 𑀢𑁆𑀬𑀲𑁆𑀲 𑀫𑀦𑀲𑁄 𑀯𑀺𑀖𑀸𑀢𑁄, 𑀤𑀢𑁆𑀯𑀸 𑀧𑀺𑀬𑀁 𑀉𑀫𑁆𑀫𑀤𑀦𑁆𑀢𑀺𑀁 𑀅𑀤𑀝𑁆𑀞𑀸’’.

𑁮𑁨. ‘‘𑀅𑀤𑁆𑀥𑀸 𑀧𑀺𑀬𑀸 𑀫𑀬𑁆𑀳 𑀚𑀦𑀺𑀦𑁆𑀤 𑀏𑀲𑀸, 𑀦 𑀲𑀸 𑀫𑀫𑀁 𑀅𑀧𑁆𑀧𑀺𑀬𑀸 𑀪𑀽𑀫𑀺𑀧𑀸𑀮;

𑀬𑀁 𑀢𑁂 𑀫𑀬𑀸 𑀉𑀫𑁆𑀫𑀤𑀦𑁆𑀢𑀻 𑀧𑀤𑀺𑀦𑁆𑀦𑀸, 𑀪𑀼𑀲𑁂𑀳𑀺 𑀭𑀸𑀚𑀸 𑀯𑀦𑀣𑀁 𑀲𑀚𑀸𑀳𑀺’’.

𑁮𑁩. ‘‘𑀬𑁄 𑀅𑀢𑁆𑀢𑀤𑀼𑀓𑁆𑀔𑁂𑀦 𑀧𑀭𑀲𑁆𑀲 𑀤𑀼𑀓𑁆𑀔𑀁, 𑀲𑀼𑀔𑁂𑀦 𑀯𑀸 𑀅𑀢𑁆𑀢𑀲𑀼𑀔𑀁 𑀤𑀳𑀸𑀢𑀺;

𑀬𑀣𑁂𑀯𑀺𑀤𑀁 𑀫𑀬𑁆𑀳 𑀢𑀣𑀸 𑀧𑀭𑁂𑀲𑀁, 𑀬𑁄 [𑀲𑁄 (𑀧𑀻.)] 𑀏𑀯𑀁 𑀚𑀸𑀦𑀸𑀢𑀺 [𑀧𑀚𑀸𑀦𑀸𑀢𑀺 (𑀓.)] 𑀲 𑀯𑁂𑀤𑀺 𑀥𑀫𑁆𑀫𑀁.

𑁮𑁪. ‘‘𑀅𑀜𑁆𑀜𑁄 𑀦𑀼 𑀢𑁂 𑀓𑁄𑀘𑀺 𑀦𑀭𑁄 𑀧𑀣𑀩𑁆𑀬𑀸, 𑀲𑀤𑁆𑀥𑁂𑀬𑁆𑀬 𑀮𑁄𑀓𑀲𑁆𑀫𑀺 𑀦 𑀫𑁂 𑀧𑀺𑀬𑀸𑀢𑀺;

𑀪𑀼𑀲𑁄 𑀘 𑀢𑁆𑀬𑀲𑁆𑀲 𑀫𑀦𑀲𑁄 𑀯𑀺𑀖𑀸𑀢𑁄, 𑀤𑀢𑁆𑀯𑀸 𑀧𑀺𑀬𑀁 𑀉𑀫𑁆𑀫𑀤𑀦𑁆𑀢𑀺𑀁 𑀅𑀤𑀝𑁆𑀞𑀸’’.

𑁮𑁫. ‘‘𑀚𑀦𑀺𑀦𑁆𑀤 𑀚𑀸𑀦𑀸𑀲𑀺 𑀧𑀺𑀬𑀸 𑀫𑀫𑁂𑀲𑀸, 𑀦 𑀲𑀸 𑀫𑀫𑀁 𑀅𑀧𑁆𑀧𑀺𑀬𑀸 𑀪𑀽𑀫𑀺𑀧𑀸𑀮;

𑀧𑀺𑀬𑁂𑀦 𑀢𑁂 𑀤𑀫𑁆𑀫𑀺 𑀧𑀺𑀬𑀁 𑀚𑀦𑀺𑀦𑁆𑀤, 𑀧𑀺𑀬𑀤𑀸𑀬𑀺𑀦𑁄 𑀤𑁂𑀯 𑀧𑀺𑀬𑀁 𑀮𑀪𑀦𑁆𑀢𑀺’’.

𑁮𑁬. ‘‘𑀲𑁄 𑀦𑀽𑀦𑀸𑀳𑀁 𑀯𑀥𑀺𑀲𑁆𑀲𑀸𑀫𑀺, 𑀅𑀢𑁆𑀢𑀸𑀦𑀁 𑀓𑀸𑀫𑀳𑁂𑀢𑀼𑀓𑀁;

𑀦 𑀳𑀺 𑀥𑀫𑁆𑀫𑀁 𑀅𑀥𑀫𑁆𑀫𑁂𑀦, 𑀅𑀳𑀁 𑀯𑀥𑀺𑀢𑀼𑀫𑀼𑀲𑁆𑀲𑀳𑁂’’.

𑁮𑁭. ‘‘𑀲𑀘𑁂 𑀢𑀼𑀯𑀁 𑀫𑀬𑁆𑀳 𑀲𑀢𑀺𑀁 [𑀲𑀦𑁆𑀢𑀺 (𑀓.)] 𑀚𑀦𑀺𑀦𑁆𑀤, 𑀦 𑀓𑀸𑀫𑀬𑀸𑀲𑀺 𑀦𑀭𑀯𑀻𑀭 𑀲𑁂𑀝𑁆𑀞;

𑀘𑀚𑀸𑀫𑀺 𑀦𑀁 𑀲𑀩𑁆𑀩𑀚𑀦𑀲𑁆𑀲 𑀲𑀺𑀩𑁆𑀬𑀸 [𑀲𑀺𑀩𑁆𑀩 (𑀲𑀻. 𑀧𑀻.), 𑀫𑀚𑁆𑀛𑁂 (𑀲𑁆𑀬𑀸.)], 𑀫𑀬𑀸 𑀧𑀫𑀼𑀢𑁆𑀢𑀁 𑀢𑀢𑁄 𑀅𑀯𑁆𑀳𑀬𑁂𑀲𑀺 [𑀅𑀯𑁆𑀳𑀬𑀸𑀲𑀺 (𑀓.)] 𑀦𑀁’’.

𑁮𑁮. ‘‘𑀅𑀤𑀽𑀲𑀺𑀬𑀁 𑀘𑁂 𑀅𑀪𑀺𑀧𑀸𑀭𑀓 𑀢𑁆𑀯𑀁, 𑀘𑀚𑀸𑀲𑀺 𑀓𑀢𑁆𑀢𑁂 𑀅𑀳𑀺𑀢𑀸𑀬 𑀢𑁆𑀬𑀲𑁆𑀲;

𑀫𑀳𑀸 𑀘 𑀢𑁂 𑀉𑀧𑀯𑀸𑀤𑁄𑀧𑀺 𑀅𑀲𑁆𑀲, 𑀦 𑀘𑀸𑀧𑀺 𑀢𑁆𑀬𑀲𑁆𑀲 𑀦𑀕𑀭𑀫𑁆𑀳𑀺 𑀧𑀓𑁆𑀔𑁄’’.

𑁮𑁯. ‘‘𑀅𑀳𑀁 𑀲𑀳𑀺𑀲𑁆𑀲𑀁 𑀉𑀧𑀯𑀸𑀤𑀫𑁂𑀢𑀁, 𑀦𑀺𑀦𑁆𑀤𑀁 𑀧𑀲𑀁𑀲𑀁 𑀕𑀭𑀳𑀜𑁆𑀘 𑀲𑀩𑁆𑀩𑀁;

𑀫𑀫𑁂𑀢𑀫𑀸𑀕𑀘𑁆𑀙𑀢𑀼 𑀪𑀽𑀫𑀺𑀧𑀸𑀮, 𑀬𑀣𑀸𑀲𑀼𑀔𑀁 𑀲𑀺𑀯𑀺 [𑀲𑀺𑀩𑁆𑀩 (𑀲𑀻. 𑀧𑀻.)] 𑀓𑀭𑁄𑀳𑀺 𑀓𑀸𑀫𑀁’’.

𑁯𑁦. ‘‘𑀬𑁄 𑀦𑁂𑀯 𑀦𑀺𑀦𑁆𑀤𑀁 𑀦 𑀧𑀦𑀧𑁆𑀧𑀲𑀁𑀲𑀁, 𑀆𑀤𑀺𑀬𑀢𑀺 𑀕𑀭𑀳𑀁 𑀦𑁄𑀧𑀺 𑀧𑀽𑀚𑀁;

𑀲𑀺𑀭𑀻 𑀘 𑀮𑀓𑁆𑀔𑀻 𑀘 𑀅𑀧𑁂𑀢𑀺 𑀢𑀫𑁆𑀳𑀸, 𑀆𑀧𑁄 𑀲𑀼𑀯𑀼𑀝𑁆𑀞𑀻𑀯 𑀬𑀣𑀸 𑀣𑀮𑀫𑁆𑀳𑀸’’.

𑁯𑁧. ‘‘𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀜𑁆𑀘 𑀲𑀼𑀔𑀜𑁆𑀘 𑀏𑀢𑁆𑀢𑁄, 𑀥𑀫𑁆𑀫𑀸𑀢𑀺𑀲𑀸𑀭𑀜𑁆𑀘 𑀫𑀦𑁄𑀯𑀺𑀖𑀸𑀢𑀁;

𑀉𑀭𑀲𑀸 𑀅𑀳𑀁 𑀧𑀘𑁆𑀘𑀼𑀢𑁆𑀢𑀭𑀺𑀲𑁆𑀲𑀸𑀫𑀺 [𑀧𑀝𑀺𑀘𑁆𑀙𑀺𑀲𑁆𑀲𑀸𑀫𑀺 (𑀲𑀻. 𑀲𑁆𑀬𑀸.), 𑀧𑀘𑁆𑀘𑀼𑀧𑀤𑀺𑀲𑁆𑀲𑀸𑀫𑀺 (𑀧𑀻.)] 𑀲𑀩𑁆𑀩𑀁, 𑀧𑀣𑀯𑀻 𑀬𑀣𑀸 𑀣𑀸𑀯𑀭𑀸𑀦𑀁 𑀢𑀲𑀸𑀦𑀁’’.

𑁯𑁨. ‘‘𑀥𑀫𑁆𑀫𑀸𑀢𑀺𑀲𑀸𑀭𑀜𑁆𑀘 𑀫𑀦𑁄𑀯𑀺𑀖𑀸𑀢𑀁, 𑀤𑀼𑀓𑁆𑀔𑀜𑁆𑀘 𑀦𑀺𑀘𑁆𑀙𑀸𑀫𑀺 𑀅𑀳𑀁 𑀧𑀭𑁂𑀲𑀁;

𑀏𑀓𑁄𑀯𑀺𑀫𑀁 𑀳𑀸𑀭𑀬𑀺𑀲𑁆𑀲𑀸𑀫𑀺 𑀪𑀸𑀭𑀁, 𑀥𑀫𑁆𑀫𑁂 𑀞𑀺𑀢𑁄 𑀓𑀺𑀜𑁆𑀘𑀺 𑀅𑀳𑀸𑀧𑀬𑀦𑁆𑀢𑁄’’.

𑁯𑁩. ‘‘𑀲𑀕𑁆𑀕𑀽𑀧𑀕𑀁 𑀧𑀼𑀜𑁆𑀜𑀓𑀫𑁆𑀫𑀁 𑀚𑀦𑀺𑀦𑁆𑀤, 𑀫𑀸 𑀫𑁂 𑀢𑀼𑀯𑀁 𑀅𑀦𑁆𑀢𑀭𑀸𑀬𑀁 𑀅𑀓𑀸𑀲𑀺;

𑀤𑀤𑀸𑀫𑀺 𑀢𑁂 𑀉𑀫𑁆𑀫𑀤𑀦𑁆𑀢𑀺𑀁 𑀧𑀲𑀦𑁆𑀦𑁄, 𑀭𑀸𑀚𑀸𑀯 𑀬𑀜𑁆𑀜𑁂 𑀥𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁’’.

𑁯𑁪. ‘‘𑀅𑀤𑁆𑀥𑀸 𑀢𑀼𑀯𑀁 𑀓𑀢𑁆𑀢𑁂 𑀳𑀺𑀢𑁂𑀲𑀺 𑀫𑀬𑁆𑀳𑀁, 𑀲𑀔𑀸 𑀫𑀫𑀁 𑀉𑀫𑁆𑀫𑀤𑀦𑁆𑀢𑀻 𑀢𑀼𑀯𑀜𑁆𑀘;

𑀦𑀺𑀦𑁆𑀤𑁂𑀬𑁆𑀬𑀼 𑀤𑁂𑀯𑀸 𑀧𑀺𑀢𑀭𑁄 𑀘 𑀲𑀩𑁆𑀩𑁂, 𑀧𑀸𑀧𑀜𑁆𑀘 𑀧𑀲𑁆𑀲𑀁 𑀅𑀪𑀺𑀲𑀫𑁆𑀧𑀭𑀸𑀬𑀁’’.

𑁯𑁫. ‘‘𑀦 𑀳𑁂𑀢𑀥𑀫𑁆𑀫𑀁 𑀲𑀺𑀯𑀺𑀭𑀸𑀚 𑀯𑀚𑁆𑀚𑀼𑀁, 𑀲𑀦𑁂𑀕𑀫𑀸 𑀚𑀸𑀦𑀧𑀤𑀸 𑀘 𑀲𑀩𑁆𑀩𑁂;

𑀬𑀁 𑀢𑁂 𑀫𑀬𑀸 𑀉𑀫𑁆𑀫𑀤𑀦𑁆𑀢𑀻 𑀧𑀤𑀺𑀦𑁆𑀦𑀸, 𑀪𑀼𑀲𑁂𑀳𑀺 𑀭𑀸𑀚𑀸 𑀯𑀦𑀣𑀁 𑀲𑀚𑀸𑀳𑀺’’.

𑁯𑁬. ‘‘𑀅𑀤𑁆𑀥𑀸 𑀢𑀼𑀯𑀁 𑀓𑀢𑁆𑀢𑁂 𑀳𑀺𑀢𑁂𑀲𑀺 𑀫𑀬𑁆𑀳𑀁, 𑀲𑀔𑀸 𑀫𑀫𑀁 𑀉𑀫𑁆𑀫𑀤𑀦𑁆𑀢𑀻 𑀢𑀼𑀯𑀜𑁆𑀘;

𑀲𑀢𑀜𑁆𑀘 𑀥𑀫𑁆𑀫𑀸𑀦𑀺 𑀲𑀼𑀓𑀺𑀢𑁆𑀢𑀺𑀢𑀸𑀦𑀺, 𑀲𑀫𑀼𑀤𑁆𑀤𑀯𑁂𑀮𑀸𑀯 𑀤𑀼𑀭𑀘𑁆𑀘𑀬𑀸𑀦𑀺’’.

𑁯𑁭. ‘‘𑀆𑀳𑀼𑀦𑁂𑀬𑁆𑀬𑁄 𑀫𑁂𑀲𑀺 𑀳𑀺𑀢𑀸𑀦𑀼𑀓𑀫𑁆𑀧𑀻, 𑀥𑀸𑀢𑀸 𑀯𑀺𑀥𑀸𑀢𑀸 𑀘𑀲𑀺 𑀓𑀸𑀫𑀧𑀸𑀮𑁄;

𑀢𑀬𑀻 𑀳𑀼𑀢𑀸 𑀭𑀸𑀚 𑀫𑀳𑀧𑁆𑀨𑀮𑀸 𑀳𑀺 [𑀫𑀳𑀧𑁆𑀨𑀮𑀸 𑀳𑀺 𑀫𑁂 (𑀧𑀻.)], 𑀓𑀸𑀫𑁂𑀦 𑀫𑁂 𑀉𑀫𑁆𑀫𑀤𑀦𑁆𑀢𑀺𑀁 𑀧𑀝𑀺𑀘𑁆𑀙’’.

𑁯𑁮. ‘‘𑀅𑀤𑁆𑀥𑀸 𑀳𑀺 𑀲𑀩𑁆𑀩𑀁 𑀅𑀪𑀺𑀧𑀸𑀭𑀓 𑀢𑁆𑀯𑀁, 𑀥𑀫𑁆𑀫𑀁 𑀅𑀘𑀸𑀭𑀻 𑀫𑀫 𑀓𑀢𑁆𑀢𑀼𑀧𑀼𑀢𑁆𑀢;

𑀅𑀜𑁆𑀜𑁄 𑀦𑀼 𑀢𑁂 𑀓𑁄 𑀇𑀥 𑀲𑁄𑀢𑁆𑀣𑀺𑀓𑀢𑁆𑀢𑀸, 𑀤𑁆𑀯𑀺𑀧𑀤𑁄 𑀦𑀭𑁄 𑀅𑀭𑀼𑀡𑁂 𑀚𑀻𑀯𑀮𑁄𑀓𑁂’’.

𑁯𑁯. ‘‘𑀢𑀼𑀯𑀁 𑀦𑀼 𑀲𑁂𑀝𑁆𑀞𑁄 𑀢𑁆𑀯𑀫𑀦𑀼𑀢𑁆𑀢𑀭𑁄𑀲𑀺, 𑀢𑁆𑀯𑀁 𑀥𑀫𑁆𑀫𑀕𑀽 [𑀥𑀫𑁆𑀫𑀕𑀼𑀢𑁆𑀢𑁄 (𑀲𑀻.)] 𑀥𑀫𑁆𑀫𑀯𑀺𑀤𑀽 𑀲𑀼𑀫𑁂𑀥𑁄;

𑀲𑁄 𑀥𑀫𑁆𑀫𑀕𑀼𑀢𑁆𑀢𑁄 𑀘𑀺𑀭𑀫𑁂𑀯 𑀚𑀻𑀯, 𑀥𑀫𑁆𑀫𑀜𑁆𑀘 𑀫𑁂 𑀤𑁂𑀲𑀬 𑀥𑀫𑁆𑀫𑀧𑀸𑀮’’.

𑁧𑁦𑁦. ‘‘𑀢𑀤𑀺𑀗𑁆𑀖 𑀅𑀪𑀺𑀧𑀸𑀭𑀓, 𑀲𑀼𑀡𑁄𑀳𑀺 𑀯𑀘𑀦𑀁 𑀫𑀫;

𑀥𑀫𑁆𑀫𑀁 𑀢𑁂 𑀤𑁂𑀲𑀬𑀺𑀲𑁆𑀲𑀸𑀫𑀺, 𑀲𑀢𑀁 𑀆𑀲𑁂𑀯𑀺𑀢𑀁 𑀅𑀳𑀁.

𑁧𑁦𑁧. ‘‘𑀲𑀸𑀥𑀼 𑀥𑀫𑁆𑀫𑀭𑀼𑀘𑀺 𑀭𑀸𑀚𑀸, 𑀲𑀸𑀥𑀼 𑀧𑀜𑁆𑀜𑀸𑀡𑀯𑀸 𑀦𑀭𑁄;

𑀲𑀸𑀥𑀼 𑀫𑀺𑀢𑁆𑀢𑀸𑀦𑀫𑀤𑁆𑀤𑀼𑀩𑁆𑀪𑁄, 𑀧𑀸𑀧𑀲𑁆𑀲𑀸𑀓𑀭𑀡𑀁 𑀲𑀼𑀔𑀁.

𑁧𑁦𑁨. ‘‘𑀅𑀓𑁆𑀓𑁄𑀥𑀦𑀲𑁆𑀲 𑀯𑀺𑀚𑀺𑀢𑁂, 𑀞𑀺𑀢𑀥𑀫𑁆𑀫𑀲𑁆𑀲 𑀭𑀸𑀚𑀺𑀦𑁄;

𑀲𑀼𑀔𑀁 𑀫𑀦𑀼𑀲𑁆𑀲𑀸 𑀆𑀲𑁂𑀣, 𑀲𑀻𑀢𑀘𑁆𑀙𑀸𑀬𑀸𑀬 𑀲𑀗𑁆𑀖𑀭𑁂.

𑁧𑁦𑁩. ‘‘𑀦 𑀘𑀸𑀳𑀫𑁂𑀢𑀁 𑀅𑀪𑀺𑀭𑁄𑀘𑀬𑀸𑀫𑀺, 𑀓𑀫𑁆𑀫𑀁 𑀅𑀲𑀫𑁂𑀓𑁆𑀔𑀓𑀢𑀁 𑀅𑀲𑀸𑀥𑀼;

𑀬𑁂 𑀯𑀸𑀧𑀺 𑀜𑀢𑁆𑀯𑀸𑀦 𑀲𑀬𑀁 𑀓𑀭𑁄𑀦𑁆𑀢𑀺, 𑀉𑀧𑀫𑀸 𑀇𑀫𑀸 𑀫𑀬𑁆𑀳𑀁 𑀢𑀼𑀯𑀁 𑀲𑀼𑀡𑁄𑀳𑀺.

𑁧𑁦𑁪. ‘‘𑀕𑀯𑀁 𑀘𑁂 𑀢𑀭𑀫𑀸𑀦𑀸𑀦𑀁, 𑀚𑀺𑀫𑁆𑀳𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀢𑀸 𑀚𑀺𑀫𑁆𑀳𑀁 𑀕𑀘𑁆𑀙𑀦𑁆𑀢𑀺, 𑀦𑁂𑀢𑁆𑀢𑁂 𑀚𑀺𑀫𑁆𑀳𑀁 𑀕𑀢𑁂 𑀲𑀢𑀺.

𑁧𑁦𑁫. ‘‘𑀏𑀯𑀫𑁂𑀯 [𑀏𑀯𑀫𑁂𑀯𑀁 (𑀧𑀻.)] 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀘𑁂 𑀅𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;

𑀲𑀩𑁆𑀩𑀁 𑀭𑀝𑁆𑀞𑀁 𑀤𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀅𑀥𑀫𑁆𑀫𑀺𑀓𑁄.

𑁧𑁦𑁬. ‘‘𑀕𑀯𑀁 𑀘𑁂 𑀢𑀭𑀫𑀸𑀦𑀸𑀦𑀁, 𑀉𑀚𑀼𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀕𑀸𑀯𑀻 𑀉𑀚𑀼𑀁 𑀬𑀦𑁆𑀢𑀺, 𑀦𑁂𑀢𑁆𑀢𑁂 𑀉𑀚𑀼𑀁 𑀕𑀢𑁂 𑀲𑀢𑀺.

𑁧𑁦𑁭. ‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀲𑀘𑁂 𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;

𑀲𑀩𑁆𑀩𑀁 𑀭𑀝𑁆𑀞𑀁 𑀲𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀥𑀫𑁆𑀫𑀺𑀓𑁄.

𑁧𑁦𑁮. ‘‘𑀦 𑀘𑀸𑀧𑀸𑀳𑀁 𑀅𑀥𑀫𑁆𑀫𑁂𑀦, 𑀅𑀫𑀭𑀢𑁆𑀢𑀫𑀪𑀺𑀧𑀢𑁆𑀣𑀬𑁂;

𑀇𑀫𑀁 𑀯𑀸 𑀧𑀣𑀯𑀺𑀁 𑀲𑀩𑁆𑀩𑀁, 𑀯𑀺𑀚𑁂𑀢𑀼𑀁 𑀅𑀪𑀺𑀧𑀸𑀭𑀓.

𑁧𑁦𑁯. ‘‘𑀬𑀜𑁆𑀳𑀺 𑀓𑀺𑀜𑁆𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀭𑀢𑀦𑀁 𑀇𑀥 𑀯𑀺𑀚𑁆𑀚𑀢𑀺;

𑀕𑀸𑀯𑁄 𑀤𑀸𑀲𑁄 𑀳𑀺𑀭𑀜𑁆𑀜𑀜𑁆𑀘, 𑀯𑀢𑁆𑀣𑀺𑀬𑀁 𑀳𑀭𑀺𑀘𑀦𑁆𑀤𑀦𑀁.

𑁧𑁧𑁦. ‘‘𑀅𑀲𑁆𑀲𑀺𑀢𑁆𑀣𑀺𑀬𑁄 [𑀅𑀲𑁆𑀲𑀺𑀢𑁆𑀣𑀺𑀬𑁄 𑀘 (𑀲𑀻.)] 𑀭𑀢𑀦𑀁 𑀫𑀡𑀺𑀓𑀜𑁆𑀘, 𑀬𑀜𑁆𑀘𑀸𑀧𑀺 𑀫𑁂 𑀘𑀦𑁆𑀤𑀲𑀽𑀭𑀺𑀬𑀸 𑀅𑀪𑀺𑀧𑀸𑀮𑀬𑀦𑁆𑀢𑀺;

𑀦 𑀢𑀲𑁆𑀲 𑀳𑁂𑀢𑀼 𑀯𑀺𑀲𑀫𑀁 𑀘𑀭𑁂𑀬𑁆𑀬𑀁, 𑀫𑀚𑁆𑀛𑁂 𑀲𑀺𑀯𑀻𑀦𑀁 𑀉𑀲𑀪𑁄𑀫𑁆𑀳𑀺 𑀚𑀸𑀢𑁄.

𑁧𑁧𑁧. ‘‘𑀦𑁂𑀢𑀸 𑀳𑀺𑀢𑀸 [𑀦𑁂𑀢𑀸𑀪𑀺 𑀢𑀸 (𑀲𑀻.)] 𑀉𑀕𑁆𑀕𑀢𑁄 𑀭𑀝𑁆𑀞𑀧𑀸𑀮𑁄, 𑀥𑀫𑁆𑀫𑀁 𑀲𑀺𑀯𑀻𑀦𑀁 𑀅𑀧𑀘𑀸𑀬𑀫𑀸𑀦𑁄;

𑀲𑁄 𑀥𑀫𑁆𑀫𑀫𑁂𑀯𑀸𑀦𑀼𑀯𑀺𑀘𑀺𑀦𑁆𑀢𑀬𑀦𑁆𑀢𑁄, 𑀢𑀲𑁆𑀫𑀸 𑀲𑀓𑁂 𑀘𑀺𑀢𑁆𑀢𑀯𑀲𑁂 𑀦 𑀯𑀢𑁆𑀢𑁄’’.

𑁧𑁧𑁨. ‘‘𑀅𑀤𑁆𑀥𑀸 𑀢𑀼𑀯𑀁 𑀫𑀳𑀸𑀭𑀸𑀚, 𑀦𑀺𑀘𑁆𑀘𑀁 𑀅𑀩𑁆𑀬𑀲𑀦𑀁 𑀲𑀺𑀯𑀁;

𑀓𑀭𑀺𑀲𑁆𑀲𑀲𑀺 𑀘𑀺𑀭𑀁 𑀭𑀚𑁆𑀚𑀁, 𑀧𑀜𑁆𑀜𑀸 𑀳𑀺 𑀢𑀯 𑀢𑀸𑀤𑀺𑀲𑀻.

𑁧𑁧𑁩. ‘‘𑀏𑀢𑀁 𑀢𑁂 𑀅𑀦𑀼𑀫𑁄𑀤𑀸𑀫, 𑀬𑀁 𑀥𑀫𑁆𑀫𑀁 𑀦𑀧𑁆𑀧𑀫𑀚𑁆𑀚𑀲𑀺;

𑀥𑀫𑁆𑀫𑀁 𑀧𑀫𑀚𑁆𑀚 𑀔𑀢𑁆𑀢𑀺𑀬𑁄, 𑀭𑀝𑁆𑀞𑀸 [𑀞𑀸𑀦𑀸 (𑀲𑀻.)] 𑀘𑀯𑀢𑀺 𑀇𑀲𑁆𑀲𑀭𑁄.

𑁧𑁧𑁪. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀫𑀸𑀢𑀸𑀧𑀺𑀢𑀽𑀲𑀼 𑀔𑀢𑁆𑀢𑀺𑀬;

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.

𑁧𑁧𑁫. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀧𑀼𑀢𑁆𑀢𑀤𑀸𑀭𑁂𑀲𑀼 𑀔𑀢𑁆𑀢𑀺𑀬…𑀧𑁂….

𑁧𑁧𑁬. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀫𑀺𑀢𑁆𑀢𑀸𑀫𑀘𑁆𑀘𑁂𑀲𑀼 𑀔𑀢𑁆𑀢𑀺𑀬…𑀧𑁂….

𑁧𑁧𑁭. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀯𑀸𑀳𑀦𑁂𑀲𑀼 𑀩𑀮𑁂𑀲𑀼 𑀘…𑀧𑁂….

𑁧𑁧𑁮. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀕𑀸𑀫𑁂𑀲𑀼 𑀦𑀺𑀕𑀫𑁂𑀲𑀼 𑀘…𑀧𑁂….

𑁧𑁧𑁯. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀭𑀝𑁆𑀞𑁂𑀲𑀼 𑀚𑀦𑀧𑀤𑁂𑀲𑀼 𑀘…𑀧𑁂….

𑁧𑁨𑁦. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀘…𑀧𑁂….

𑁧𑁨𑁧. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀫𑀺𑀕𑀧𑀓𑁆𑀔𑀻𑀲𑀼 𑀔𑀢𑁆𑀢𑀺𑀬…𑀧𑁂….

𑁧𑁨𑁨. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀥𑀫𑁆𑀫𑁄 𑀘𑀺𑀡𑁆𑀡𑁄 𑀲𑀼𑀔𑀸𑀯𑀳𑁄;

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.

𑁧𑁨𑁩. ‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀲𑀇𑀦𑁆𑀤𑀸 𑀤𑁂𑀯𑀸 𑀲𑀩𑁆𑀭𑀳𑁆𑀫𑀓𑀸;

𑀲𑀼𑀘𑀺𑀡𑁆𑀡𑁂𑀦 𑀤𑀺𑀯𑀁 𑀧𑀢𑁆𑀢𑀸, 𑀫𑀸 𑀥𑀫𑁆𑀫𑀁 𑀭𑀸𑀚 𑀧𑀸𑀫𑀤𑁄’’𑀢𑀺.

𑀉𑀫𑁆𑀫𑀸𑀤𑀦𑁆𑀢𑀻𑀚𑀸𑀢𑀓𑀁 𑀤𑀼𑀢𑀺𑀬𑀁.