𑁫𑁨𑁮. 𑀫𑀳𑀸𑀩𑁄𑀥𑀺𑀚𑀸𑀢𑀓𑀁 (𑁩)

𑁧𑁨𑁪. ‘‘𑀓𑀺𑀁 𑀦𑀼 𑀤𑀡𑁆𑀟𑀁 𑀓𑀺𑀫𑀚𑀺𑀦𑀁, 𑀓𑀺𑀁 𑀙𑀢𑁆𑀢𑀁 𑀓𑀺𑀫𑀼𑀧𑀸𑀳𑀦𑀁;

𑀓𑀺𑀫𑀗𑁆𑀓𑀼𑀲𑀜𑁆𑀘 𑀧𑀢𑁆𑀢𑀜𑁆𑀘, 𑀲𑀗𑁆𑀖𑀸𑀝𑀺𑀜𑁆𑀘𑀸𑀧𑀺 𑀩𑁆𑀭𑀸𑀳𑁆𑀫𑀡;

𑀢𑀭𑀫𑀸𑀦𑀭𑀽𑀧𑁄𑀳𑀸𑀲𑀺 [𑀕𑀡𑁆𑀳𑀸𑀲𑀺 (𑀲𑀻. 𑀲𑁆𑀬𑀸. 𑀧𑀻.)], 𑀓𑀺𑀁 𑀦𑀼 𑀧𑀢𑁆𑀣𑀬𑀲𑁂 𑀤𑀺𑀲𑀁’’.

𑁧𑁨𑁫. ‘‘𑀤𑁆𑀯𑀸𑀤𑀲𑁂𑀢𑀸𑀦𑀺 𑀯𑀲𑁆𑀲𑀸𑀦𑀺, 𑀯𑀼𑀲𑀺𑀢𑀸𑀦𑀺 𑀢𑀯𑀦𑁆𑀢𑀺𑀓𑁂;

𑀦𑀸𑀪𑀺𑀚𑀸𑀦𑀸𑀫𑀺 𑀲𑁄𑀡𑁂𑀦, 𑀧𑀺𑀗𑁆𑀕𑀮𑁂𑀦𑀸𑀪𑀺𑀓𑀽𑀚𑀺𑀢𑀁.

𑁧𑁨𑁬. ‘‘𑀲𑁆𑀯𑀸𑀬𑀁 𑀤𑀺𑀢𑁆𑀢𑁄𑀯 𑀦𑀤𑀢𑀺, 𑀲𑀼𑀓𑁆𑀓𑀤𑀸𑀞𑀁 𑀯𑀺𑀤𑀁𑀲𑀬𑀁;

𑀢𑀯 𑀲𑀼𑀢𑁆𑀯𑀸 𑀲𑀪𑀭𑀺𑀬𑀲𑁆𑀲, 𑀯𑀻𑀢𑀲𑀤𑁆𑀥𑀲𑁆𑀲 𑀫𑀁 𑀧𑀢𑀺’’.

𑁧𑁨𑁭. ‘‘𑀅𑀳𑀼 𑀏𑀲 𑀓𑀢𑁄 𑀤𑁄𑀲𑁄, 𑀬𑀣𑀸 𑀪𑀸𑀲𑀲𑀺 𑀩𑁆𑀭𑀸𑀳𑁆𑀫𑀡;

𑀏𑀲 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺, 𑀯𑀲 𑀩𑁆𑀭𑀸𑀳𑁆𑀫𑀡 𑀫𑀸𑀕𑀫𑀸’’.

𑁧𑁨𑁮. ‘‘𑀲𑀩𑁆𑀩𑀲𑁂𑀢𑁄 𑀧𑀼𑀭𑁂 𑀆𑀲𑀺, 𑀢𑀢𑁄𑀧𑀺 𑀲𑀩𑀮𑁄 𑀅𑀳𑀼;

𑀲𑀩𑁆𑀩𑀮𑁄𑀳𑀺𑀢𑀓𑁄 𑀤𑀸𑀦𑀺, 𑀓𑀸𑀮𑁄 𑀧𑀓𑁆𑀓𑀫𑀺𑀢𑀼𑀁 𑀫𑀫.

𑁧𑁨𑁯. ‘‘𑀅𑀩𑁆𑀪𑀦𑁆𑀢𑀭𑀁 𑀧𑀼𑀭𑁂 𑀆𑀲𑀺, 𑀢𑀢𑁄 𑀫𑀚𑁆𑀛𑁂 𑀢𑀢𑁄 𑀩𑀳𑀺;

𑀧𑀼𑀭𑀸 𑀦𑀺𑀤𑁆𑀥𑀫𑀦𑀸 𑀳𑁄𑀢𑀺, 𑀲𑀬𑀫𑁂𑀯 𑀯𑀚𑀸𑀫𑀳𑀁.

𑁧𑁩𑁦. ‘‘𑀯𑀻𑀢𑀲𑀤𑁆𑀥𑀁 𑀦 𑀲𑁂𑀯𑁂𑀬𑁆𑀬, 𑀉𑀤𑀧𑀸𑀦𑀁𑀯𑀦𑁄𑀤𑀓𑀁;

𑀲𑀘𑁂𑀧𑀺 𑀦𑀁 𑀅𑀦𑀼𑀔𑀡𑁂, 𑀯𑀸𑀭𑀺 𑀓𑀤𑁆𑀤𑀫𑀕𑀦𑁆𑀥𑀺𑀓𑀁.

𑁧𑁩𑁧. ‘‘𑀧𑀲𑀦𑁆𑀦𑀫𑁂𑀯 𑀲𑁂𑀯𑁂𑀬𑁆𑀬, 𑀅𑀧𑁆𑀧𑀲𑀦𑁆𑀦𑀁 𑀯𑀺𑀯𑀚𑁆𑀚𑀬𑁂;

𑀧𑀲𑀦𑁆𑀦𑀁 𑀧𑀬𑀺𑀭𑀼𑀧𑀸𑀲𑁂𑀬𑁆𑀬, 𑀭𑀳𑀤𑀁 𑀯𑀼𑀤𑀓𑀢𑁆𑀣𑀺𑀓𑁄.

𑁧𑁩𑁨. ‘‘𑀪𑀚𑁂 𑀪𑀚𑀦𑁆𑀢𑀁 𑀧𑀼𑀭𑀺𑀲𑀁, 𑀅𑀪𑀚𑀦𑁆𑀢𑀁 𑀦 𑀪𑀚𑁆𑀚𑀬𑁂 [𑀪𑀸𑀚𑀬𑁂 (𑀧𑀻.)];

𑀅𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁄 𑀲𑁄, 𑀬𑁄 𑀪𑀚𑀦𑁆𑀢𑀁 𑀦 𑀪𑀚𑁆𑀚𑀢𑀺 [𑀪𑀸𑀚𑀢𑀺 (𑀧𑀻.)].

𑁧𑁩𑁩. ‘‘𑀬𑁄 𑀪𑀚𑀦𑁆𑀢𑀁 𑀦 𑀪𑀚𑀢𑀺, 𑀲𑁂𑀯𑀫𑀸𑀦𑀁 𑀦 𑀲𑁂𑀯𑀢𑀺;

𑀲 𑀯𑁂 𑀫𑀦𑀼𑀲𑁆𑀲𑀧𑀸𑀧𑀺𑀝𑁆𑀞𑁄, 𑀫𑀺𑀕𑁄 𑀲𑀸𑀔𑀲𑁆𑀲𑀺𑀢𑁄 𑀬𑀣𑀸.

𑁧𑁩𑁪. ‘‘𑀅𑀘𑁆𑀘𑀸𑀪𑀺𑀓𑁆𑀔𑀡𑀲𑀁𑀲𑀕𑁆𑀕𑀸, 𑀅𑀲𑀫𑁄𑀲𑀭𑀡𑁂𑀦 𑀘;

𑀏𑀢𑁂𑀦 𑀫𑀺𑀢𑁆𑀢𑀸 𑀚𑀻𑀭𑀦𑁆𑀢𑀺, 𑀅𑀓𑀸𑀮𑁂 𑀬𑀸𑀘𑀦𑀸𑀬 𑀘.

𑁧𑁩𑁫. ‘‘𑀢𑀲𑁆𑀫𑀸 𑀦𑀸𑀪𑀺𑀓𑁆𑀔𑀡𑀁 𑀕𑀘𑁆𑀙𑁂, 𑀦 𑀘 𑀕𑀘𑁆𑀙𑁂 𑀘𑀺𑀭𑀸𑀘𑀺𑀭𑀁;

𑀓𑀸𑀮𑁂𑀦 𑀬𑀸𑀘𑀁 𑀬𑀸𑀘𑁂𑀬𑁆𑀬, 𑀏𑀯𑀁 𑀫𑀺𑀢𑁆𑀢𑀸 𑀦 𑀚𑀻𑀬𑀭𑁂 [𑀚𑀻𑀭𑀭𑁂 (𑀲𑁆𑀬𑀸. 𑀧𑀻.)].

𑁧𑁩𑁬. ‘‘𑀅𑀢𑀺𑀘𑀺𑀭𑀁 𑀦𑀺𑀯𑀸𑀲𑁂𑀦, 𑀧𑀺𑀬𑁄 𑀪𑀯𑀢𑀺 𑀅𑀧𑁆𑀧𑀺𑀬𑁄;

𑀆𑀫𑀦𑁆𑀢 𑀔𑁄 𑀢𑀁 𑀕𑀘𑁆𑀙𑀸𑀫, 𑀧𑀼𑀭𑀸 𑀢𑁂 𑀳𑁄𑀫 𑀅𑀧𑁆𑀧𑀺𑀬𑀸’’.

𑁧𑁩𑁭. ‘‘𑀏𑀯𑀁 𑀘𑁂 𑀬𑀸𑀘𑀫𑀸𑀦𑀸𑀦𑀁, 𑀅𑀜𑁆𑀚𑀮𑀺𑀁 𑀦𑀸𑀯𑀩𑀼𑀚𑁆𑀛𑀲𑀺;

𑀧𑀭𑀺𑀘𑀸𑀭𑀓𑀸𑀦𑀁 𑀲𑀢𑀁 [𑀧𑀭𑀺𑀘𑀸𑀭𑀺𑀓𑀸𑀦𑀁 𑀲𑀢𑁆𑀢𑀸𑀦𑀁 (𑀲𑀻. 𑀲𑁆𑀬𑀸. 𑀧𑀻.)], 𑀯𑀘𑀦𑀁 𑀦 𑀓𑀭𑁄𑀲𑀺 𑀦𑁄;

𑀏𑀯𑀁 𑀢𑀁 𑀅𑀪𑀺𑀬𑀸𑀘𑀸𑀫, 𑀧𑀼𑀦 𑀓𑀬𑀺𑀭𑀸𑀲𑀺 𑀧𑀭𑀺𑀬𑀸𑀬𑀁’’.

𑁧𑁩𑁮. ‘‘𑀏𑀯𑀁 𑀘𑁂 𑀦𑁄 𑀯𑀺𑀳𑀭𑀢𑀁, 𑀅𑀦𑁆𑀢𑀭𑀸𑀬𑁄 𑀦 𑀳𑁂𑀲𑁆𑀲𑀢𑀺;

𑀢𑀼𑀬𑁆𑀳𑀁 𑀯𑀸𑀧𑀺 [𑀢𑀼𑀫𑁆𑀳𑀜𑁆𑀘𑀸𑀧𑀺 (𑀲𑀻.), 𑀢𑀼𑀬𑁆𑀳𑀜𑁆𑀘𑀸𑀧𑀺 (𑀧𑀻.)] 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀯𑀸 [𑀅𑀫𑁆𑀳𑀁 𑀯𑀸 (𑀲𑀻.), 𑀫𑀬𑁆𑀳𑀜𑁆𑀘 (𑀧𑀻.)] 𑀭𑀝𑁆𑀞𑀯𑀤𑁆𑀥𑀦;

𑀅𑀧𑁆𑀧𑁂𑀯 𑀦𑀸𑀫 𑀧𑀲𑁆𑀲𑁂𑀫, 𑀅𑀳𑁄𑀭𑀢𑁆𑀢𑀸𑀦𑀫𑀘𑁆𑀘𑀬𑁂’’.

𑁧𑁩𑁯. ‘‘𑀉𑀤𑀻𑀭𑀡𑀸 𑀘𑁂 𑀲𑀁𑀕𑀢𑁆𑀬𑀸, 𑀪𑀸𑀯𑀸𑀬 𑀫𑀦𑀼𑀯𑀢𑁆𑀢𑀢𑀺;

𑀅𑀓𑀸𑀫𑀸 𑀅𑀓𑀭𑀡𑀻𑀬𑀁 𑀯𑀸, 𑀓𑀭𑀡𑀻𑀬𑀁 𑀯𑀸𑀧𑀺 𑀓𑀼𑀩𑁆𑀩𑀢𑀺;

𑀆𑀓𑀸𑀫𑀸𑀓𑀭𑀡𑀻𑀬𑀫𑁆𑀳𑀺, 𑀓𑁆𑀯𑀺𑀥 𑀧𑀸𑀧𑁂𑀦 𑀮𑀺𑀧𑁆𑀧𑀢𑀺 [𑀮𑀺𑀫𑁆𑀧𑀢𑀺 (𑀲𑁆𑀬𑀸. 𑀓.)].

𑁧𑁪𑁦. ‘‘𑀲𑁄 𑀘𑁂 𑀅𑀢𑁆𑀣𑁄 𑀘 𑀥𑀫𑁆𑀫𑁄 𑀘, 𑀓𑀮𑁆𑀬𑀸𑀡𑁄 𑀦 𑀘 𑀧𑀸𑀧𑀓𑁄;

𑀪𑁄𑀢𑁄 𑀘𑁂 𑀯𑀘𑀦𑀁 𑀲𑀘𑁆𑀘𑀁, 𑀲𑀼𑀳𑀢𑁄 𑀯𑀸𑀦𑀭𑁄 𑀫𑀬𑀸.

𑁧𑁪𑁧. ‘‘𑀅𑀢𑁆𑀢𑀦𑁄 𑀘𑁂 𑀳𑀺 𑀯𑀸𑀤𑀲𑁆𑀲, 𑀅𑀧𑀭𑀸𑀥𑀁 𑀯𑀺𑀚𑀸𑀦𑀺𑀬𑀸 [𑀯𑀺𑀚𑀸𑀦𑀺𑀬 (𑀲𑀻. 𑀲𑁆𑀬𑀸. 𑀧𑀻.)];

𑀦 𑀫𑀁 𑀢𑁆𑀯𑀁 𑀕𑀭𑀳𑁂𑀬𑁆𑀬𑀸𑀲𑀺, 𑀪𑁄𑀢𑁄 𑀯𑀸𑀤𑁄 𑀳𑀺 𑀢𑀸𑀤𑀺𑀲𑁄’’.

𑁧𑁪𑁨. ‘‘𑀇𑀲𑁆𑀲𑀭𑁄 𑀲𑀩𑁆𑀩𑀮𑁄𑀓𑀲𑁆𑀲, 𑀲𑀘𑁂 𑀓𑀧𑁆𑀧𑁂𑀢𑀺 𑀚𑀻𑀯𑀺𑀢𑀁;

𑀇𑀤𑁆𑀥𑀺𑀁 [𑀇𑀤𑁆𑀥𑀺 (𑀧𑀻. 𑀓.)] 𑀩𑁆𑀬𑀲𑀦𑀪𑀸𑀯𑀜𑁆𑀘, 𑀓𑀫𑁆𑀫𑀁 𑀓𑀮𑁆𑀬𑀸𑀡𑀧𑀸𑀧𑀓𑀁;

𑀦𑀺𑀤𑁆𑀤𑁂𑀲𑀓𑀸𑀭𑀻 𑀧𑀼𑀭𑀺𑀲𑁄, 𑀇𑀲𑁆𑀲𑀭𑁄 𑀢𑁂𑀦 𑀮𑀺𑀧𑁆𑀧𑀢𑀺.

𑁧𑁪𑁩. ‘‘𑀲𑁄 𑀘𑁂 𑀅𑀢𑁆𑀣𑁄 𑀘 𑀥𑀫𑁆𑀫𑁄 𑀘, 𑀓𑀮𑁆𑀬𑀸𑀡𑁄 𑀦 𑀘 𑀧𑀸𑀧𑀓𑁄;

𑀪𑁄𑀢𑁄 𑀘𑁂 𑀯𑀘𑀦𑀁 𑀲𑀘𑁆𑀘𑀁, 𑀲𑀼𑀳𑀢𑁄 𑀯𑀸𑀦𑀭𑁄 𑀫𑀬𑀸.

𑁧𑁪𑁪. ‘‘𑀅𑀢𑁆𑀢𑀦𑁄 𑀘𑁂 𑀳𑀺 𑀯𑀸𑀤𑀲𑁆𑀲, 𑀅𑀧𑀭𑀸𑀥𑀁 𑀯𑀺𑀚𑀸𑀦𑀺𑀬𑀸;

𑀦 𑀫𑀁 𑀢𑁆𑀯𑀁 𑀕𑀭𑀳𑁂𑀬𑁆𑀬𑀸𑀲𑀺, 𑀪𑁄𑀢𑁄 𑀯𑀸𑀤𑁄 𑀳𑀺 𑀢𑀸𑀤𑀺𑀲𑁄’’.

𑁧𑁪𑁫. ‘‘𑀲𑀘𑁂 𑀧𑀼𑀩𑁆𑀩𑁂𑀓𑀢𑀳𑁂𑀢𑀼, 𑀲𑀼𑀔𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺;

𑀧𑁄𑀭𑀸𑀡𑀓𑀁 𑀓𑀢𑀁 𑀧𑀸𑀧𑀁, 𑀢𑀫𑁂𑀲𑁄 𑀫𑀼𑀘𑁆𑀘𑀢𑁂 [𑀫𑀼𑀜𑁆𑀘𑀢𑁂 (𑀲𑀻. 𑀲𑁆𑀬𑀸.)] 𑀇𑀡𑀁;

𑀧𑁄𑀭𑀸𑀡𑀓𑀇𑀡𑀫𑁄𑀓𑁆𑀔𑁄, 𑀓𑁆𑀯𑀺𑀥 𑀧𑀸𑀧𑁂𑀦 𑀮𑀺𑀧𑁆𑀧𑀢𑀺.

𑁧𑁪𑁬. ‘‘𑀲𑁄 𑀘𑁂 𑀅𑀢𑁆𑀣𑁄 𑀘 𑀥𑀫𑁆𑀫𑁄 𑀘, 𑀓𑀮𑁆𑀬𑀸𑀡𑁄 𑀦 𑀘 𑀧𑀸𑀧𑀓𑁄;

𑀪𑁄𑀢𑁄 𑀘𑁂 𑀯𑀘𑀦𑀁 𑀲𑀘𑁆𑀘𑀁, 𑀲𑀼𑀳𑀢𑁄 𑀯𑀸𑀦𑀭𑁄 𑀫𑀬𑀸.

𑁧𑁪𑁭. ‘‘𑀅𑀢𑁆𑀢𑀦𑁄 𑀘𑁂 𑀳𑀺 𑀯𑀸𑀤𑀲𑁆𑀲, 𑀅𑀧𑀭𑀸𑀥𑀁 𑀯𑀺𑀚𑀸𑀦𑀺𑀬𑀸;

𑀦 𑀫𑀁 𑀢𑁆𑀯𑀁 𑀕𑀭𑀳𑁂𑀬𑁆𑀬𑀸𑀲𑀺, 𑀪𑁄𑀢𑁄 𑀯𑀸𑀤𑁄 𑀳𑀺 𑀢𑀸𑀤𑀺𑀲𑁄’’.

𑁧𑁪𑁮. ‘‘𑀘𑀢𑀼𑀦𑁆𑀦𑀁𑀬𑁂𑀯𑀼𑀧𑀸𑀤𑀸𑀬, 𑀭𑀽𑀧𑀁 𑀲𑀫𑁆𑀪𑁄𑀢𑀺 𑀧𑀸𑀡𑀺𑀦𑀁;

𑀬𑀢𑁄 𑀘 𑀭𑀽𑀧𑀁 𑀲𑀫𑁆𑀪𑁄𑀢𑀺, 𑀢𑀢𑁆𑀣𑁂𑀯𑀸𑀦𑀼𑀧𑀕𑀘𑁆𑀙𑀢𑀺;

𑀇𑀥𑁂𑀯 𑀚𑀻𑀯𑀢𑀺 𑀚𑀻𑀯𑁄, 𑀧𑁂𑀘𑁆𑀘 𑀧𑁂𑀘𑁆𑀘 𑀯𑀺𑀦𑀲𑁆𑀲𑀢𑀺.

𑁧𑁪𑁯. 𑀉𑀘𑁆𑀙𑀺𑀚𑁆𑀚𑀢𑀺 𑀅𑀬𑀁 𑀮𑁄𑀓𑁄, 𑀬𑁂 𑀩𑀸𑀮𑀸 𑀬𑁂 𑀘 𑀧𑀡𑁆𑀟𑀺𑀢𑀸;

𑀉𑀘𑁆𑀙𑀺𑀚𑁆𑀚𑀫𑀸𑀦𑁂 𑀮𑁄𑀓𑀲𑁆𑀫𑀺𑀁, 𑀓𑁆𑀯𑀺𑀥 𑀧𑀸𑀧𑁂𑀦 𑀮𑀺𑀧𑁆𑀧𑀢𑀺.

𑁧𑁫𑁦. ‘‘𑀲𑁄 𑀘𑁂 𑀅𑀢𑁆𑀣𑁄 𑀘 𑀥𑀫𑁆𑀫𑁄 𑀘, 𑀓𑀮𑁆𑀬𑀸𑀡𑁄 𑀦 𑀘 𑀧𑀸𑀧𑀓𑁄;

𑀪𑁄𑀢𑁄 𑀘𑁂 𑀯𑀘𑀦𑀁 𑀲𑀘𑁆𑀘𑀁, 𑀲𑀼𑀳𑀢𑁄 𑀯𑀸𑀦𑀭𑁄 𑀫𑀬𑀸.

𑁧𑁫𑁧. ‘‘𑀅𑀢𑁆𑀢𑀦𑁄 𑀘𑁂 𑀳𑀺 𑀯𑀸𑀤𑀲𑁆𑀲, 𑀅𑀧𑀭𑀸𑀥𑀁 𑀯𑀺𑀚𑀸𑀦𑀺𑀬𑀸;

𑀦 𑀫𑀁 𑀢𑁆𑀯𑀁 𑀕𑀭𑀳𑁂𑀬𑁆𑀬𑀸𑀲𑀺, 𑀪𑁄𑀢𑁄 𑀯𑀸𑀤𑁄 𑀳𑀺 𑀢𑀸𑀤𑀺𑀲𑁄’’.

𑁧𑁫𑁨. ‘‘𑀆𑀳𑀼 𑀔𑀢𑁆𑀢𑀯𑀺𑀤𑀸 [𑀔𑀢𑁆𑀢𑀯𑀺𑀥𑀸 (𑀲𑀻. 𑀲𑁆𑀬𑀸. 𑀧𑀻.)] 𑀮𑁄𑀓𑁂, 𑀩𑀸𑀮𑀸 𑀧𑀡𑁆𑀟𑀺𑀢𑀫𑀸𑀦𑀺𑀦𑁄.

𑀫𑀸𑀢𑀭𑀁 𑀧𑀺𑀢𑀭𑀁 𑀳𑀜𑁆𑀜𑁂, 𑀅𑀣𑁄 𑀚𑁂𑀝𑁆𑀞𑀫𑁆𑀧𑀺 𑀪𑀸𑀢𑀭𑀁;

𑀳𑀦𑁂𑀬𑁆𑀬 𑀧𑀼𑀢𑁆𑀢 [𑀧𑀼𑀢𑁆𑀢𑁂 𑀘 (𑀧𑀻.)] 𑀤𑀸𑀭𑁂 𑀘, 𑀅𑀢𑁆𑀣𑁄 𑀘𑁂 𑀢𑀸𑀤𑀺𑀲𑁄 𑀲𑀺𑀬𑀸.

𑁧𑁫𑁩. ‘‘𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;

𑀦 𑀢𑀲𑁆𑀲 𑀲𑀸𑀔𑀁 𑀪𑀜𑁆𑀚𑁂𑀬𑁆𑀬, 𑀫𑀺𑀢𑁆𑀢𑀤𑀼𑀩𑁆𑀪𑁄 [𑀫𑀺𑀢𑁆𑀢𑀤𑀽𑀪𑀻 (𑀧𑀻.)] 𑀳𑀺 𑀧𑀸𑀧𑀓𑁄.

𑁧𑁫𑁪. ‘‘𑀅𑀣 𑀅𑀢𑁆𑀣𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀲𑀫𑀽𑀮𑀫𑀧𑀺 𑀅𑀩𑁆𑀩𑀳𑁂 [𑀅𑀩𑁆𑀪𑀳𑁂 (𑀲𑁆𑀬𑀸. 𑀓.)];

𑀅𑀢𑁆𑀣𑁄 𑀫𑁂 𑀲𑀫𑁆𑀩𑀮𑁂𑀦𑀸𑀧𑀺, 𑀲𑀼𑀳𑀢𑁄 𑀯𑀸𑀦𑀭𑁄 𑀫𑀬𑀸.

𑁧𑁫𑁫. [𑀅𑀬𑀁 𑀕𑀸𑀣𑀸 𑀲𑀻𑀳𑀴𑀧𑁄𑀢𑁆𑀣𑀓𑁂 𑀦𑀢𑁆𑀣𑀺] ‘‘𑀲𑁄 𑀘𑁂 𑀅𑀢𑁆𑀣𑁄 𑀘 𑀥𑀫𑁆𑀫𑁄 𑀘, 𑀓𑀮𑁆𑀬𑀸𑀡𑁄 𑀦 𑀘 𑀧𑀸𑀧𑀓𑁄;

𑀪𑁄𑀢𑁄 𑀘𑁂 𑀯𑀘𑀦𑀁 𑀲𑀘𑁆𑀘𑀁, 𑀲𑀼𑀳𑀢𑁄 𑀯𑀸𑀦𑀭𑁄 𑀫𑀬𑀸 [𑀅𑀬𑀁 𑀕𑀸𑀣𑀸 𑀲𑀻𑀳𑀴𑀧𑁄𑀢𑁆𑀣𑀓𑁂 𑀦𑀢𑁆𑀣𑀺].

𑁧𑁫𑁬. ‘‘𑀅𑀢𑁆𑀢𑀦𑁄 𑀘𑁂 𑀳𑀺 𑀯𑀸𑀤𑀲𑁆𑀲, 𑀅𑀧𑀭𑀸𑀥𑀁 𑀯𑀺𑀚𑀸𑀦𑀺𑀬𑀸;

𑀦 𑀫𑀁 𑀢𑁆𑀯𑀁 𑀕𑀭𑀳𑁂𑀬𑁆𑀬𑀸𑀲𑀺, 𑀪𑁄𑀢𑁄 𑀯𑀸𑀤𑁄 𑀳𑀺 𑀢𑀸𑀤𑀺𑀲𑁄.

𑁧𑁫𑁭. ‘‘𑀅𑀳𑁂𑀢𑀼𑀯𑀸𑀤𑁄 𑀧𑀼𑀭𑀺𑀲𑁄, 𑀬𑁄 𑀘 𑀇𑀲𑁆𑀲𑀭𑀓𑀼𑀢𑁆𑀢𑀺𑀓𑁄;

𑀧𑀼𑀩𑁆𑀩𑁂𑀓𑀢𑀻 𑀘 𑀉𑀘𑁆𑀙𑁂𑀤𑀻, 𑀬𑁄 𑀘 𑀔𑀢𑁆𑀢𑀯𑀺𑀤𑁄 𑀦𑀭𑁄.

𑁧𑁫𑁮. ‘‘𑀏𑀢𑁂 𑀅𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂, 𑀩𑀸𑀮𑀸 𑀧𑀡𑁆𑀟𑀺𑀢𑀫𑀸𑀦𑀺𑀦𑁄;

𑀓𑀭𑁂𑀬𑁆𑀬 𑀢𑀸𑀤𑀺𑀲𑁄 𑀧𑀸𑀧𑀁, 𑀅𑀣𑁄 𑀅𑀜𑁆𑀜𑀫𑁆𑀧𑀺 𑀓𑀸𑀭𑀬𑁂;

𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑀕𑁆𑀕𑁄, 𑀤𑀼𑀓𑁆𑀔𑀦𑁆𑀢𑁄 [𑀤𑀼𑀓𑁆𑀓𑀝𑁄 (𑀲𑀻.)] 𑀓𑀝𑀼𑀓𑀼𑀤𑁆𑀭𑀬𑁄.

𑁧𑁫𑁯. ‘‘𑀉𑀭𑀩𑁆𑀪𑀭𑀽𑀧𑁂𑀦 𑀯𑀓𑀲𑁆𑀲𑀼 [𑀩𑀓𑀸𑀲𑀼 (𑀲𑀻. 𑀲𑁆𑀬𑀸.), 𑀯𑀓𑀸𑀲𑀼 (𑀧𑀻.)] 𑀧𑀼𑀩𑁆𑀩𑁂, 𑀅𑀲𑀁𑀓𑀺𑀢𑁄 𑀅𑀚𑀬𑀽𑀣𑀁 𑀉𑀧𑁂𑀢𑀺;

𑀳𑀦𑁆𑀢𑁆𑀯𑀸 𑀉𑀭𑀡𑀺𑀁 𑀅𑀚𑀺𑀓𑀁 [𑀅𑀚𑀺𑀬𑀁 (𑀲𑀻. 𑀲𑁆𑀬𑀸. 𑀧𑀻.)] 𑀅𑀚𑀜𑁆𑀘, 𑀉𑀢𑁆𑀭𑀸𑀲𑀬𑀺𑀢𑁆𑀯𑀸 [𑀘𑀺𑀢𑁆𑀭𑀸𑀲𑀬𑀺𑀢𑁆𑀯𑀸 (𑀲𑀻. 𑀧𑀻.)] 𑀬𑁂𑀦 𑀓𑀸𑀫𑀁 𑀧𑀮𑁂𑀢𑀺.

𑁧𑁬𑁦. ‘‘𑀢𑀣𑀸𑀯𑀺𑀥𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, 𑀙𑀤𑀦𑀁 𑀓𑀢𑁆𑀯𑀸 𑀯𑀜𑁆𑀘𑀬𑀦𑁆𑀢𑀺 𑀫𑀦𑀼𑀲𑁆𑀲𑁂;

𑀅𑀦𑀸𑀲𑀓𑀸 𑀣𑀡𑁆𑀟𑀺𑀮𑀲𑁂𑀬𑁆𑀬𑀓𑀸 𑀘, 𑀭𑀚𑁄𑀚𑀮𑁆𑀮𑀁 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀁;

𑀧𑀭𑀺𑀬𑀸𑀬𑀪𑀢𑁆𑀢𑀜𑁆𑀘 𑀅𑀧𑀸𑀦𑀓𑀢𑁆𑀢𑀸, 𑀧𑀸𑀧𑀸𑀘𑀸𑀭𑀸 𑀅𑀭𑀳𑀦𑁆𑀢𑁄 𑀯𑀤𑀸𑀦𑀸.

𑁧𑁬𑁧. ‘‘𑀏𑀢𑁂 𑀅𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂, 𑀩𑀸𑀮𑀸 𑀧𑀡𑁆𑀟𑀺𑀢𑀫𑀸𑀦𑀺𑀦𑁄;

𑀓𑀭𑁂𑀬𑁆𑀬 𑀢𑀸𑀤𑀺𑀲𑁄 𑀧𑀸𑀧𑀁, 𑀅𑀣𑁄 𑀅𑀜𑁆𑀜𑀫𑁆𑀧𑀺 𑀓𑀸𑀭𑀬𑁂;

𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑀕𑁆𑀕𑁄, 𑀤𑀼𑀓𑁆𑀔𑀦𑁆𑀢𑁄 𑀓𑀝𑀼𑀓𑀼𑀤𑁆𑀭𑀬𑁄.

𑁧𑁬𑁨. ‘‘𑀬𑀫𑀸𑀳𑀼 𑀦𑀢𑁆𑀣𑀺 𑀯𑀻𑀭𑀺𑀬𑀦𑁆𑀢𑀺, 𑀅𑀳𑁂𑀢𑀼𑀜𑁆𑀘 𑀧𑀯𑀤𑀦𑁆𑀢𑀺 [𑀳𑁂𑀢𑀼𑀜𑁆𑀘 𑀅𑀧𑀯𑀤𑀦𑁆𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀬𑁂;

𑀧𑀭𑀓𑀸𑀭𑀁 𑀅𑀢𑁆𑀢𑀓𑀸𑀭𑀜𑁆𑀘, 𑀬𑁂 𑀢𑀼𑀘𑁆𑀙𑀁 𑀲𑀫𑀯𑀡𑁆𑀡𑀬𑀼𑀁.

𑁧𑁬𑁩. ‘‘𑀏𑀢𑁂 𑀅𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂, 𑀩𑀸𑀮𑀸 𑀧𑀡𑁆𑀟𑀺𑀢𑀫𑀸𑀦𑀺𑀦𑁄;

𑀓𑀭𑁂𑀬𑁆𑀬 𑀢𑀸𑀤𑀺𑀲𑁄 𑀧𑀸𑀧𑀁, 𑀅𑀣𑁄 𑀅𑀜𑁆𑀜𑀫𑁆𑀧𑀺 𑀓𑀸𑀭𑀬𑁂;

𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑀕𑁆𑀕𑁄, 𑀤𑀼𑀓𑁆𑀔𑀦𑁆𑀢𑁄 𑀓𑀝𑀼𑀓𑀼𑀤𑁆𑀭𑀬𑁄.

𑁧𑁬𑁪. ‘‘𑀲𑀘𑁂 𑀳𑀺 𑀯𑀻𑀭𑀺𑀬𑀁 𑀦𑀸𑀲𑁆𑀲, 𑀓𑀫𑁆𑀫𑀁 𑀓𑀮𑁆𑀬𑀸𑀡𑀧𑀸𑀧𑀓𑀁;

𑀦 𑀪𑀭𑁂 𑀯𑀟𑁆𑀠𑀓𑀺𑀁 𑀭𑀸𑀚𑀸, 𑀦𑀧𑀺 𑀬𑀦𑁆𑀢𑀸𑀦𑀺 𑀓𑀸𑀭𑀬𑁂.

𑁧𑁬𑁫. ‘‘𑀬𑀲𑁆𑀫𑀸 𑀘 𑀯𑀻𑀭𑀺𑀬𑀁 𑀅𑀢𑁆𑀣𑀺, 𑀓𑀫𑁆𑀫𑀁 𑀓𑀮𑁆𑀬𑀸𑀡𑀧𑀸𑀧𑀓𑀁;

𑀢𑀲𑁆𑀫𑀸 𑀬𑀦𑁆𑀢𑀸𑀦𑀺 𑀓𑀸𑀭𑁂𑀢𑀺, 𑀭𑀸𑀚𑀸 𑀪𑀭𑀢𑀺 𑀯𑀟𑁆𑀠𑀓𑀺𑀁.

𑁧𑁬𑁬. ‘‘𑀬𑀤𑀺 𑀯𑀲𑁆𑀲𑀲𑀢𑀁 𑀤𑁂𑀯𑁄, 𑀦 𑀯𑀲𑁆𑀲𑁂 𑀦 𑀳𑀺𑀫𑀁 𑀧𑀢𑁂;

𑀉𑀘𑁆𑀙𑀺𑀚𑁆𑀚𑁂𑀬𑁆𑀬 𑀅𑀬𑀁 𑀮𑁄𑀓𑁄, 𑀯𑀺𑀦𑀲𑁆𑀲𑁂𑀬𑁆𑀬 𑀅𑀬𑀁 𑀧𑀚𑀸.

𑁧𑁬𑁭. ‘‘𑀬𑀲𑁆𑀫𑀸 𑀘 𑀯𑀲𑁆𑀲𑀢𑀻 𑀤𑁂𑀯𑁄, 𑀳𑀺𑀫𑀜𑁆𑀘𑀸𑀦𑀼𑀨𑀼𑀲𑀸𑀬𑀢𑀺;

𑀢𑀲𑁆𑀫𑀸 𑀲𑀲𑁆𑀲𑀸𑀦𑀺 𑀧𑀘𑁆𑀘𑀦𑁆𑀢𑀺, 𑀭𑀝𑁆𑀞𑀜𑁆𑀘 𑀧𑀸𑀮𑀺𑀢𑁂 [𑀧𑀮𑁆𑀮𑀢𑁂 (𑀲𑀻. 𑀧𑀻.), 𑀧𑁄𑀮𑀬𑀢𑁂 (𑀲𑁆𑀬𑀸.)] 𑀘𑀺𑀭𑀁.

𑁧𑁬𑁮. ‘‘𑀕𑀯𑀁 𑀘𑁂 𑀢𑀭𑀫𑀸𑀦𑀸𑀦𑀁, 𑀚𑀺𑀫𑁆𑀳𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀢𑀸 𑀚𑀺𑀫𑁆𑀳𑀁 𑀕𑀘𑁆𑀙𑀦𑁆𑀢𑀺, 𑀦𑁂𑀢𑁆𑀢𑁂 𑀚𑀺𑀫𑁆𑀳𑀁 [𑀚𑀺𑀫𑁆𑀳 (𑀧𑀻.)] 𑀕𑀢𑁂 𑀲𑀢𑀺.

𑁧𑁬𑁯. ‘‘𑀏𑀯𑀫𑁂𑀯 [𑀏𑀯𑀫𑁂𑀯𑀁 (𑀧𑀻.)] 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀘𑁂 𑀅𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;

𑀲𑀩𑁆𑀩𑀁 𑀭𑀝𑁆𑀞𑀁 𑀤𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀅𑀥𑀫𑁆𑀫𑀺𑀓𑁄.

𑁧𑁭𑁦. ‘‘𑀕𑀯𑀁 𑀘𑁂 𑀢𑀭𑀫𑀸𑀦𑀸𑀦𑀁, 𑀉𑀚𑀼𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀕𑀸𑀯𑀻 𑀉𑀚𑀼𑀁 𑀬𑀦𑁆𑀢𑀺, 𑀦𑁂𑀢𑁆𑀢𑁂 𑀉𑀚𑀼𑀁 [𑀉𑀚𑀽 (𑀧𑀻.)] 𑀕𑀢𑁂 𑀲𑀢𑀺.

𑁧𑁭𑁧. ‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀲𑀘𑁂 [𑀘𑁂𑀯 (𑀲𑀻.), 𑀘𑁂𑀧𑀺 (𑀓.)] 𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;

𑀲𑀩𑁆𑀩𑀁 𑀭𑀝𑁆𑀞𑀁 𑀲𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀥𑀫𑁆𑀫𑀺𑀓𑁄.

𑁧𑁭𑁨. ‘‘𑀫𑀳𑀸𑀭𑀼𑀓𑁆𑀔𑀲𑁆𑀲 𑀨𑀮𑀺𑀦𑁄, 𑀆𑀫𑀁 𑀙𑀺𑀦𑁆𑀤𑀢𑀺 𑀬𑁄 𑀨𑀮𑀁;

𑀭𑀲𑀜𑁆𑀘𑀲𑁆𑀲 𑀦 𑀚𑀸𑀦𑀸𑀢𑀺, 𑀩𑀻𑀚𑀜𑁆𑀘𑀲𑁆𑀲 𑀯𑀺𑀦𑀲𑁆𑀲𑀢𑀺.

𑁧𑁭𑁩. ‘‘𑀫𑀳𑀸𑀭𑀼𑀓𑁆𑀔𑀽𑀧𑀫𑀁 𑀭𑀝𑁆𑀞𑀁, 𑀅𑀥𑀫𑁆𑀫𑁂𑀦 𑀧𑀲𑀸𑀲𑀢𑀺;

𑀭𑀲𑀜𑁆𑀘𑀲𑁆𑀲 𑀦 𑀚𑀸𑀦𑀸𑀢𑀺, 𑀭𑀝𑁆𑀞𑀜𑁆𑀘𑀲𑁆𑀲 𑀯𑀺𑀦𑀲𑁆𑀲𑀢𑀺.

𑁧𑁭𑁪. ‘‘𑀫𑀳𑀸𑀭𑀼𑀓𑁆𑀔𑀲𑁆𑀲 𑀨𑀮𑀺𑀦𑁄, 𑀧𑀓𑁆𑀓𑀁 𑀙𑀺𑀦𑁆𑀤𑀢𑀺 𑀬𑁄 𑀨𑀮𑀁;

𑀭𑀲𑀜𑁆𑀘𑀲𑁆𑀲 𑀯𑀺𑀚𑀸𑀦𑀸𑀢𑀺, 𑀩𑀻𑀚𑀜𑁆𑀘𑀲𑁆𑀲 𑀦 𑀦𑀲𑁆𑀲𑀢𑀺.

𑁧𑁭𑁫. ‘‘𑀫𑀳𑀸𑀭𑀼𑀓𑁆𑀔𑀽𑀧𑀫𑀁 𑀭𑀝𑁆𑀞𑀁, 𑀥𑀫𑁆𑀫𑁂𑀦 𑀬𑁄 𑀧𑀲𑀸𑀲𑀢𑀺;

𑀭𑀲𑀜𑁆𑀘𑀲𑁆𑀲 𑀯𑀺𑀚𑀸𑀦𑀸𑀢𑀺, 𑀭𑀝𑁆𑀞𑀜𑁆𑀘𑀲𑁆𑀲 𑀦 𑀦𑀲𑁆𑀲𑀢𑀺.

𑁧𑁭𑁬. ‘‘𑀬𑁄 𑀘 𑀭𑀸𑀚𑀸 𑀚𑀦𑀧𑀤𑀁, 𑀅𑀥𑀫𑁆𑀫𑁂𑀦 𑀧𑀲𑀸𑀲𑀢𑀺;

𑀲𑀩𑁆𑀩𑁄𑀲𑀥𑀻𑀳𑀺 𑀲𑁄 𑀭𑀸𑀚𑀸, 𑀯𑀺𑀭𑀼𑀤𑁆𑀥𑁄 𑀳𑁄𑀢𑀺 𑀔𑀢𑁆𑀢𑀺𑀬𑁄.

𑁧𑁭𑁭. ‘‘𑀢𑀣𑁂𑀯 𑀦𑁂𑀕𑀫𑁂 𑀳𑀺𑀁𑀲𑀁, 𑀬𑁂 𑀬𑀼𑀢𑁆𑀢𑀸 𑀓𑀬𑀯𑀺𑀓𑁆𑀓𑀬𑁂;

𑀑𑀚𑀤𑀸𑀦𑀩𑀮𑀻𑀓𑀸𑀭𑁂, 𑀲 𑀓𑁄𑀲𑁂𑀦 𑀯𑀺𑀭𑀼𑀚𑁆𑀛𑀢𑀺.

𑁧𑁭𑁮. ‘‘𑀧𑀳𑀸𑀭𑀯𑀭𑀔𑁂𑀢𑁆𑀢𑀜𑁆𑀜𑀽, 𑀲𑀗𑁆𑀕𑀸𑀫𑁂 𑀓𑀢𑀦𑀺𑀲𑁆𑀲𑀫𑁂 [𑀓𑀢𑀦𑀺𑀬𑀫𑁂 (𑀓.)];

𑀉𑀲𑁆𑀲𑀺𑀢𑁂 𑀳𑀺𑀁𑀲𑀬𑀁 𑀭𑀸𑀚𑀸, 𑀲 𑀩𑀮𑁂𑀦 𑀯𑀺𑀭𑀼𑀚𑁆𑀛𑀢𑀺.

𑁧𑁭𑁯. ‘‘𑀢𑀣𑁂𑀯 𑀇𑀲𑀬𑁄 𑀳𑀺𑀁𑀲𑀁, 𑀲𑀜𑁆𑀜𑀢𑁂 [𑀲𑀁𑀬𑀫𑁂 (𑀲𑁆𑀬𑀸. 𑀓.)] 𑀩𑁆𑀭𑀳𑁆𑀫𑀘𑀸𑀭𑀺𑀬𑁄 [𑀩𑁆𑀭𑀳𑁆𑀫𑀘𑀸𑀭𑀺𑀦𑁄 (𑀲𑀻.)];

𑀅𑀥𑀫𑁆𑀫𑀘𑀸𑀭𑀻 𑀔𑀢𑁆𑀢𑀺𑀬𑁄, 𑀲𑁄 𑀲𑀕𑁆𑀕𑁂𑀦 𑀯𑀺𑀭𑀼𑀚𑁆𑀛𑀢𑀺.

𑁧𑁮𑁦. ‘‘𑀬𑁄 𑀘 𑀭𑀸𑀚𑀸 𑀅𑀥𑀫𑁆𑀫𑀝𑁆𑀞𑁄, 𑀪𑀭𑀺𑀬𑀁 𑀳𑀦𑁆𑀢𑀺 𑀅𑀤𑀽𑀲𑀺𑀓𑀁;

𑀮𑀼𑀤𑁆𑀤𑀁 𑀧𑀲𑀯𑀢𑁂 𑀞𑀸𑀦𑀁 [𑀧𑀸𑀧𑀁 (𑀲𑀻.)], 𑀧𑀼𑀢𑁆𑀢𑁂𑀳𑀺 𑀘 𑀯𑀺𑀭𑀼𑀚𑁆𑀛𑀢𑀺.

𑁧𑁮𑁧. ‘‘𑀥𑀫𑁆𑀫𑀁 𑀘𑀭𑁂 𑀚𑀸𑀦𑀧𑀤𑁂, 𑀦𑁂𑀕𑀫𑁂𑀲𑀼 [𑀦𑀺𑀕𑀫𑁂𑀲𑀼 (𑀲𑀻.)] 𑀩𑀮𑁂𑀲𑀼 𑀘;

𑀇𑀲𑀬𑁄 𑀘 𑀦 𑀳𑀺𑀁𑀲𑁂𑀬𑁆𑀬, 𑀧𑀼𑀢𑁆𑀢𑀤𑀸𑀭𑁂 𑀲𑀫𑀁 𑀘𑀭𑁂.

𑁧𑁮𑁨. ‘‘𑀲 𑀢𑀸𑀤𑀺𑀲𑁄 𑀪𑀽𑀫𑀺𑀧𑀢𑀺, 𑀭𑀝𑁆𑀞𑀧𑀸𑀮𑁄 𑀅𑀓𑁄𑀥𑀦𑁄;

𑀲𑀧𑀢𑁆𑀢𑁂 [𑀲𑀸𑀫𑀦𑁆𑀢𑁂 (𑀲𑀻. 𑀲𑁆𑀬𑀸. 𑀧𑀻.)] 𑀲𑀫𑁆𑀧𑀓𑀫𑁆𑀧𑁂𑀢𑀺, 𑀇𑀦𑁆𑀤𑁄𑀯 𑀅𑀲𑀼𑀭𑀸𑀥𑀺𑀧𑁄’’𑀢𑀺.

𑀫𑀳𑀸𑀩𑁄𑀥𑀺𑀚𑀸𑀢𑀓𑀁 𑀢𑀢𑀺𑀬𑀁.

𑀧𑀡𑁆𑀡𑀸𑀲𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.