𑁫𑁨𑁪. 𑀲𑀗𑁆𑀔𑀧𑀸𑀮𑀚𑀸𑀢𑀓𑀁 (𑁪)

𑁧𑁪𑁩. ‘‘𑀅𑀭𑀺𑀬𑀸𑀯𑀓𑀸𑀲𑁄𑀲𑀺 𑀧𑀲𑀦𑁆𑀦𑀦𑁂𑀢𑁆𑀢𑁄, 𑀫𑀜𑁆𑀜𑁂 𑀪𑀯𑀁 𑀧𑀩𑁆𑀩𑀚𑀺𑀢𑁄 𑀓𑀼𑀮𑀫𑁆𑀳𑀸;

𑀓𑀣𑀁 𑀦𑀼 𑀯𑀺𑀢𑁆𑀢𑀸𑀦𑀺 𑀧𑀳𑀸𑀬 𑀪𑁄𑀕𑁂, 𑀧𑀩𑁆𑀩𑀚𑀺 𑀦𑀺𑀓𑁆𑀔𑀫𑁆𑀫 𑀖𑀭𑀸 𑀲𑀧𑀜𑁆𑀜’’ [𑀲𑀧𑀜𑁆𑀜𑁄 (𑀲𑁆𑀬𑀸.), 𑀲𑀧𑀜𑁆𑀜𑀸 (𑀧𑀻.)].

𑁧𑁪𑁪. ‘‘𑀲𑀬𑀁 𑀯𑀺𑀫𑀸𑀦𑀁 𑀦𑀭𑀤𑁂𑀯 𑀤𑀺𑀲𑁆𑀯𑀸, 𑀫𑀳𑀸𑀦𑀼𑀪𑀸𑀯𑀲𑁆𑀲 𑀫𑀳𑁄𑀭𑀕𑀲𑁆𑀲;

𑀤𑀺𑀲𑁆𑀯𑀸𑀦 𑀧𑀼𑀜𑁆𑀜𑀸𑀦 𑀫𑀳𑀸𑀯𑀺𑀧𑀸𑀓𑀁, 𑀲𑀤𑁆𑀥𑀸𑀬𑀳𑀁 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚’’.

𑁧𑁪𑁫. ‘‘𑀦 𑀓𑀸𑀫𑀓𑀸𑀫𑀸 𑀦 𑀪𑀬𑀸 𑀦 𑀤𑁄𑀲𑀸, 𑀯𑀸𑀘𑀁 𑀫𑀼𑀲𑀸 𑀧𑀩𑁆𑀩𑀚𑀺𑀢𑀸 𑀪𑀡𑀦𑁆𑀢𑀺;

𑀅𑀓𑁆𑀔𑀸𑀳𑀺 𑀫𑁂 𑀧𑀼𑀘𑁆𑀙𑀺𑀢𑁄 𑀏𑀢𑀫𑀢𑁆𑀣𑀁, 𑀲𑀼𑀢𑁆𑀯𑀸𑀦 𑀫𑁂 𑀚𑀸𑀬𑀺𑀳𑀺𑀢𑀺𑀧𑁆𑀧𑀲𑀸𑀤𑁄’’.

𑁧𑁪𑁬. ‘‘𑀯𑀸𑀡𑀺𑀚𑁆𑀚 [𑀯𑀡𑀺𑀚𑁆𑀚 (𑀧𑀻.)] 𑀭𑀝𑁆𑀞𑀸𑀥𑀺𑀧 𑀕𑀘𑁆𑀙𑀫𑀸𑀦𑁄, 𑀧𑀣𑁂 𑀅𑀤𑁆𑀤𑀲𑀸𑀲𑀺𑀫𑁆𑀳𑀺 𑀪𑁄𑀚𑀧𑀼𑀢𑁆𑀢𑁂 [𑀫𑀺𑀮𑀸𑀘𑀧𑀼𑀢𑁆𑀢𑁂 (𑀲𑀻. 𑀧𑀻.)];

𑀧𑀯𑀤𑁆𑀥𑀓𑀸𑀬𑀁 𑀉𑀭𑀕𑀁 𑀫𑀳𑀦𑁆𑀢𑀁, 𑀆𑀤𑀸𑀬 𑀕𑀘𑁆𑀙𑀦𑁆𑀢𑁂 𑀧𑀫𑁄𑀤𑀫𑀸𑀦𑁂’’.

𑁧𑁪𑁭. ‘‘𑀲𑁄𑀳𑀁 𑀲𑀫𑀸𑀕𑀫𑁆𑀫 𑀚𑀦𑀺𑀦𑁆𑀤 𑀢𑁂𑀳𑀺, 𑀧𑀳𑀝𑁆𑀞𑀮𑁄𑀫𑁄 𑀅𑀯𑀘𑀫𑁆𑀳𑀺 𑀪𑀻𑀢𑁄;

𑀓𑀼𑀳𑀺𑀁 𑀅𑀬𑀁 𑀦𑀻𑀬𑀢𑀺 [𑀦𑀺𑀬𑁆𑀬𑀢𑀺 (𑀓.)] 𑀪𑀻𑀫𑀓𑀸𑀬𑁄, 𑀦𑀸𑀕𑁂𑀦 𑀓𑀺𑀁 𑀓𑀸𑀳𑀣 𑀪𑁄𑀚𑀧𑀼𑀢𑁆𑀢𑀸.

𑁧𑁪𑁮. ‘‘𑀦𑀸𑀕𑁄 𑀅𑀬𑀁 𑀦𑀻𑀬𑀢𑀺 𑀪𑁄𑀚𑀦𑀢𑁆𑀣𑀸 [𑀪𑁄𑀚𑀦𑀢𑁆𑀣𑀁 (𑀲𑀻. 𑀲𑁆𑀬𑀸. 𑀧𑀻.)], 𑀧𑀯𑀤𑁆𑀥𑀓𑀸𑀬𑁄 𑀉𑀭𑀕𑁄 𑀫𑀳𑀦𑁆𑀢𑁄;

𑀲𑀸𑀤𑀼𑀜𑁆𑀘 𑀣𑀽𑀮𑀜𑁆𑀘 𑀫𑀼𑀤𑀼𑀜𑁆𑀘 𑀫𑀁𑀲𑀁, 𑀦 𑀢𑁆𑀯𑀁 𑀭𑀲𑀜𑁆𑀜𑀸𑀲𑀺 𑀯𑀺𑀤𑁂𑀳𑀧𑀼𑀢𑁆𑀢.

𑁧𑁪𑁯. ‘‘𑀇𑀢𑁄 𑀫𑀬𑀁 𑀕𑀦𑁆𑀢𑁆𑀯𑀸 𑀲𑀓𑀁 𑀦𑀺𑀓𑁂𑀢𑀁 [𑀦𑀺𑀓𑁂𑀢𑀦𑀁 (𑀧𑀻.)], 𑀆𑀤𑀸𑀬 𑀲𑀢𑁆𑀣𑀸𑀦𑀺 𑀯𑀺𑀓𑁄𑀧𑀬𑀺𑀢𑁆𑀯𑀸;

𑀫𑀁𑀲𑀸𑀦𑀺 𑀪𑁄𑀓𑁆𑀔𑀸𑀫 [𑀪𑀓𑁆𑀔𑀸𑀫 (𑀲𑁆𑀬𑀸.)] 𑀧𑀫𑁄𑀤𑀫𑀸𑀦𑀸, 𑀫𑀬𑀜𑁆𑀳𑀺 𑀯𑁂 𑀲𑀢𑁆𑀢𑀯𑁄 𑀧𑀦𑁆𑀦𑀕𑀸𑀦𑀁.

𑁧𑁫𑁦. ‘‘𑀲𑀘𑁂 𑀅𑀬𑀁 𑀦𑀻𑀬𑀢𑀺 𑀪𑁄𑀚𑀦𑀢𑁆𑀣𑀸, 𑀧𑀯𑀤𑁆𑀥𑀓𑀸𑀬𑁄 𑀉𑀭𑀕𑁄 𑀫𑀳𑀦𑁆𑀢𑁄;

𑀤𑀤𑀸𑀫𑀺 𑀯𑁄 𑀩𑀮𑀺𑀩𑀤𑁆𑀤𑀸𑀦𑀺 [𑀩𑀮𑀺𑀯𑀤𑁆𑀤𑀸𑀦𑀺 (𑀧𑀻.)] 𑀲𑁄𑀴𑀲, 𑀦𑀸𑀕𑀁 𑀇𑀫𑀁 𑀫𑀼𑀜𑁆𑀘𑀣 𑀩𑀦𑁆𑀥𑀦𑀲𑁆𑀫𑀸.

𑁧𑁫𑁧. ‘‘𑀅𑀤𑁆𑀥𑀸 𑀳𑀺 𑀦𑁄 𑀪𑀓𑁆𑀔𑁄 𑀅𑀬𑀁 𑀫𑀦𑀸𑀧𑁄, 𑀩𑀳𑀽 𑀘 𑀦𑁄 𑀉𑀭𑀕𑀸 𑀪𑀼𑀢𑁆𑀢𑀧𑀼𑀩𑁆𑀩𑀸 [𑀩𑀳𑀼𑀁 𑀘 𑀦𑁄 𑀉𑀭𑀕𑁄 𑀪𑀼𑀢𑁆𑀢𑀧𑀼𑀩𑁆𑀩𑁄 (𑀓.)];

𑀓𑀭𑁄𑀫 𑀢𑁂 𑀢𑀁 𑀯𑀘𑀦𑀁 𑀅𑀴𑀸𑀭 [𑀆𑀴𑀸𑀭 (𑀓.) 𑀏𑀯𑀫𑀼𑀧𑀭𑀺𑀧𑀺], 𑀫𑀺𑀢𑁆𑀢𑀜𑁆𑀘 𑀦𑁄 𑀳𑁄𑀳𑀺 𑀯𑀺𑀤𑁂𑀳𑀧𑀼𑀢𑁆𑀢.

𑁧𑁫𑁨. ‘‘𑀢𑀤𑀲𑁆𑀲𑀼 𑀢𑁂 𑀩𑀦𑁆𑀥𑀦𑀸 𑀫𑁄𑀘𑀬𑀺𑀁𑀲𑀼, 𑀬𑀁 𑀦𑀢𑁆𑀣𑀼𑀢𑁄 𑀧𑀝𑀺𑀫𑁄𑀓𑁆𑀓𑀲𑁆𑀲 𑀧𑀸𑀲𑁂;

𑀫𑀼𑀢𑁆𑀢𑁄 𑀘 𑀲𑁄 𑀩𑀦𑁆𑀥𑀦𑀸 𑀦𑀸𑀕𑀭𑀸𑀚𑀸, 𑀧𑀓𑁆𑀓𑀸𑀫𑀺 𑀧𑀸𑀘𑀻𑀦𑀫𑀼𑀔𑁄 𑀫𑀼𑀳𑀼𑀢𑁆𑀢𑀁.

𑁧𑁫𑁩. ‘‘𑀕𑀦𑁆𑀢𑁆𑀯𑀸𑀦 𑀧𑀸𑀘𑀻𑀦𑀫𑀼𑀔𑁄 𑀫𑀼𑀳𑀼𑀢𑁆𑀢𑀁, 𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺 𑀧𑀮𑁄𑀓𑀬𑀻 𑀫𑀁;

𑀢𑀤𑀸𑀲𑁆𑀲𑀳𑀁 𑀧𑀺𑀝𑁆𑀞𑀺𑀢𑁄 𑀅𑀦𑁆𑀯𑀕𑀘𑁆𑀙𑀺𑀁, 𑀤𑀲𑀗𑁆𑀕𑀼𑀮𑀺𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸.

𑁧𑁫𑁪. ‘‘𑀕𑀘𑁆𑀙𑁂𑀯 𑀔𑁄 𑀢𑁆𑀯𑀁 𑀢𑀭𑀫𑀸𑀦𑀭𑀽𑀧𑁄, 𑀫𑀸 𑀢𑀁 𑀅𑀫𑀺𑀢𑁆𑀢𑀸 𑀧𑀼𑀦𑀭𑀕𑁆𑀕𑀳𑁂𑀲𑀼𑀁;

𑀤𑀼𑀓𑁆𑀔𑁄 𑀳𑀺 𑀮𑀼𑀤𑁆𑀤𑁂𑀳𑀺 𑀧𑀼𑀦𑀸 𑀲𑀫𑀸𑀕𑀫𑁄, 𑀅𑀤𑀲𑁆𑀲𑀦𑀁 𑀪𑁄𑀚𑀧𑀼𑀢𑁆𑀢𑀸𑀦 𑀕𑀘𑁆𑀙.

𑁧𑁫𑁫. ‘‘𑀅𑀕𑀫𑀸𑀲𑀺 𑀲𑁄 𑀭𑀳𑀤𑀁 𑀯𑀺𑀧𑁆𑀧𑀲𑀦𑁆𑀦𑀁, 𑀦𑀻𑀮𑁄𑀪𑀸𑀲𑀁 𑀭𑀫𑀡𑀻𑀬𑀁 𑀲𑀼𑀢𑀺𑀢𑁆𑀣𑀁;

𑀲𑀫𑁄𑀢𑀢𑀁 [𑀲𑀫𑁄𑀦𑀢𑀁 (𑀲𑁆𑀬𑀸. 𑀓.)] 𑀚𑀫𑁆𑀩𑀼𑀳𑀺 𑀯𑁂𑀢𑀲𑀸𑀳𑀺, 𑀧𑀸𑀯𑁂𑀓𑁆𑀔𑀺 𑀦𑀺𑀢𑁆𑀢𑀺𑀡𑁆𑀡𑀪𑀬𑁄 𑀧𑀢𑀻𑀢𑁄.

𑁧𑁫𑁬. ‘‘𑀲𑁄 𑀢𑀁 𑀧𑀯𑀺𑀲𑁆𑀲 𑀦 𑀘𑀺𑀭𑀲𑁆𑀲 𑀦𑀸𑀕𑁄, 𑀤𑀺𑀩𑁆𑀩𑁂𑀦 𑀫𑁂 𑀧𑀸𑀢𑀼𑀭𑀳𑀼𑀁 𑀚𑀦𑀺𑀦𑁆𑀤;

𑀉𑀧𑀝𑁆𑀞𑀳𑀻 𑀫𑀁 𑀧𑀺𑀢𑀭𑀁𑀯 𑀧𑀼𑀢𑁆𑀢𑁄, 𑀳𑀤𑀬𑀗𑁆𑀕𑀫𑀁 𑀓𑀡𑁆𑀡𑀲𑀼𑀔𑀁 𑀪𑀡𑀦𑁆𑀢𑁄.

𑁧𑁫𑁭. ‘‘𑀢𑁆𑀯𑀁 𑀫𑁂𑀲𑀺 𑀫𑀸𑀢𑀸 𑀘 𑀧𑀺𑀢𑀸 [𑀧𑀺𑀢𑀸 𑀘 (𑀧𑀻.)] 𑀅𑀴𑀸𑀭, 𑀅𑀩𑁆𑀪𑀦𑁆𑀢𑀭𑁄 𑀧𑀸𑀡𑀤𑀤𑁄 𑀲𑀳𑀸𑀬𑁄;

𑀲𑀓𑀜𑁆𑀘 𑀇𑀤𑁆𑀥𑀺𑀁 𑀧𑀝𑀺𑀮𑀸𑀪𑀓𑁄𑀲𑁆𑀫𑀺 [𑀧𑀝𑀺𑀮𑀸𑀪𑀺𑀢𑁄𑀲𑁆𑀫𑀺 (𑀧𑀻.)], 𑀅𑀴𑀸𑀭 𑀧𑀲𑁆𑀲 𑀫𑁂 𑀦𑀺𑀯𑁂𑀲𑀦𑀸𑀦𑀺;

𑀧𑀳𑀽𑀢𑀪𑀓𑁆𑀔𑀁 𑀩𑀳𑀼𑀅𑀦𑁆𑀦𑀧𑀸𑀦𑀁, 𑀫𑀲𑀓𑁆𑀓𑀲𑀸𑀭𑀁 𑀯𑀺𑀬 𑀯𑀸𑀲𑀯𑀲𑁆𑀲’’.

𑁧𑁫𑁮. ‘‘𑀢𑀁 𑀪𑀽𑀫𑀺𑀪𑀸𑀕𑁂𑀳𑀺 𑀉𑀧𑁂𑀢𑀭𑀽𑀧𑀁, 𑀅𑀲𑀓𑁆𑀔𑀭𑀸 𑀘𑁂𑀯 𑀫𑀼𑀤𑀽 𑀲𑀼𑀪𑀸 𑀘;

𑀦𑀻𑀘𑀢𑁆𑀢𑀺𑀡𑀸 [𑀦𑀻𑀘𑀸 𑀢𑀺𑀡𑀸 (𑀲𑁆𑀬𑀸. 𑀧𑀻.)] 𑀅𑀧𑁆𑀧𑀭𑀚𑀸 𑀘 𑀪𑀽𑀫𑀺, 𑀧𑀸𑀲𑀸𑀤𑀺𑀓𑀸 𑀬𑀢𑁆𑀣 𑀚𑀳𑀦𑁆𑀢𑀺 𑀲𑁄𑀓𑀁.

𑁧𑁫𑁯. ‘‘𑀅𑀦𑀸𑀯𑀓𑀼𑀮𑀸 𑀯𑁂𑀴𑀼𑀭𑀺𑀬𑀽𑀧𑀦𑀻𑀮𑀸, 𑀘𑀢𑀼𑀤𑁆𑀤𑀺𑀲𑀁 𑀅𑀫𑁆𑀩𑀯𑀦𑀁 𑀲𑀼𑀭𑀫𑁆𑀫𑀁;

𑀧𑀓𑁆𑀓𑀸 𑀘 𑀧𑁂𑀲𑀻 𑀘 𑀨𑀮𑀸 𑀲𑀼𑀨𑀼𑀮𑁆𑀮𑀸, 𑀦𑀺𑀘𑁆𑀘𑁄𑀢𑀼𑀓𑀸 𑀥𑀸𑀭𑀬𑀦𑁆𑀢𑀻 𑀨𑀮𑀸𑀦𑀺.

𑁧𑁬𑁦. ‘‘𑀢𑁂𑀲𑀁 𑀯𑀦𑀸𑀦𑀁 𑀦𑀭𑀤𑁂𑀯 𑀫𑀚𑁆𑀛𑁂, 𑀦𑀺𑀯𑁂𑀲𑀦𑀁 𑀪𑀲𑁆𑀲𑀭𑀲𑀦𑁆𑀦𑀺𑀓𑀸𑀲𑀁;

𑀭𑀚𑀢𑀕𑁆𑀕𑀴𑀁 𑀲𑁄𑀯𑀡𑁆𑀡𑀫𑀬𑀁 𑀉𑀴𑀸𑀭𑀁, 𑀑𑀪𑀸𑀲𑀢𑀻 𑀯𑀺𑀚𑁆𑀚𑀼𑀭𑀺𑀯𑀦𑁆𑀢𑀮𑀺𑀓𑁆𑀔𑁂.

𑁧𑁬𑁧. ‘‘𑀫𑀡𑀻𑀫𑀬𑀸 𑀲𑁄𑀡𑁆𑀡𑀫𑀬𑀸 [𑀲𑁄𑀯𑀡𑁆𑀡𑀫𑀬𑀸 (𑀲𑀻. 𑀲𑁆𑀬𑀸. 𑀧𑀻.)] 𑀉𑀴𑀸𑀭𑀸, 𑀅𑀦𑁂𑀓𑀘𑀺𑀢𑁆𑀢𑀸 𑀲𑀢𑀢𑀁 𑀲𑀼𑀦𑀺𑀫𑁆𑀫𑀺𑀢𑀸;

𑀧𑀭𑀺𑀧𑀽𑀭𑀸 𑀓𑀜𑁆𑀜𑀸𑀳𑀺 𑀅𑀮𑀗𑁆𑀓𑀢𑀸𑀪𑀺, 𑀲𑀼𑀯𑀡𑁆𑀡𑀓𑀸𑀬𑀽𑀭𑀥𑀭𑀸𑀳𑀺 𑀭𑀸𑀚.

𑁧𑁬𑁨. ‘‘𑀲𑁄 𑀲𑀗𑁆𑀔𑀧𑀸𑀮𑁄 𑀢𑀭𑀫𑀸𑀦𑀭𑀽𑀧𑁄, 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀅𑀦𑁄𑀫𑀯𑀡𑁆𑀡𑁄;

𑀲𑀳𑀲𑁆𑀲𑀣𑀫𑁆𑀪𑀁 𑀅𑀢𑀼𑀮𑀸𑀦𑀼𑀪𑀸𑀯𑀁, 𑀬𑀢𑁆𑀣𑀲𑁆𑀲 𑀪𑀭𑀺𑀬𑀸 𑀫𑀳𑁂𑀲𑀻 𑀅𑀳𑁄𑀲𑀺.

𑁧𑁬𑁩. ‘‘𑀏𑀓𑀸 𑀘 𑀦𑀸𑀭𑀻 𑀢𑀭𑀫𑀸𑀦𑀭𑀽𑀧𑀸, 𑀆𑀤𑀸𑀬 𑀯𑁂𑀴𑀼𑀭𑀺𑀬𑀫𑀬𑀁 𑀫𑀳𑀕𑁆𑀖𑀁;

𑀲𑀼𑀪𑀁 𑀫𑀡𑀺𑀁 𑀚𑀸𑀢𑀺𑀫𑀦𑁆𑀢𑀽𑀧𑀧𑀦𑁆𑀦𑀁, 𑀅𑀘𑁄𑀤𑀺𑀢𑀸 𑀆𑀲𑀦𑀫𑀩𑁆𑀪𑀺𑀳𑀸𑀲𑀺.

𑁧𑁬𑁪. ‘‘𑀢𑀢𑁄 𑀫𑀁 𑀉𑀭𑀕𑁄 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸, 𑀦𑀺𑀲𑀻𑀤𑀬𑀻 𑀧𑀸𑀫𑀼𑀔𑀆𑀲𑀦𑀲𑁆𑀫𑀺𑀁;

𑀇𑀤𑀫𑀸𑀲𑀦𑀁 𑀅𑀢𑁆𑀭 𑀪𑀯𑀁 𑀦𑀺𑀲𑀻𑀤𑀢𑀼, 𑀪𑀯𑀜𑁆𑀳𑀺 𑀫𑁂 𑀅𑀜𑁆𑀜𑀢𑀭𑁄 𑀕𑀭𑀽𑀦𑀁.

𑁧𑁬𑁫. ‘‘𑀅𑀜𑁆𑀜𑀸 𑀘 𑀦𑀸𑀭𑀻 𑀢𑀭𑀫𑀸𑀦𑀭𑀽𑀧𑀸, 𑀆𑀤𑀸𑀬 𑀯𑀸𑀭𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸;

𑀧𑀸𑀤𑀸𑀦𑀺 𑀧𑀓𑁆𑀔𑀸𑀮𑀬𑀻 𑀫𑁂 𑀚𑀦𑀺𑀦𑁆𑀤, 𑀪𑀭𑀺𑀬𑀸𑀯 [𑀪𑀭𑀺𑀬𑀸 𑀘 (𑀧𑀻.)] 𑀪𑀢𑁆𑀢𑀽 𑀧𑀢𑀺𑀦𑁄 𑀧𑀺𑀬𑀲𑁆𑀲.

𑁧𑁬𑁬. ‘‘𑀅𑀧𑀭𑀸 𑀘 𑀦𑀸𑀭𑀻 𑀢𑀭𑀫𑀸𑀦𑀭𑀽𑀧𑀸, 𑀧𑀕𑁆𑀕𑀬𑁆𑀳 𑀲𑁄𑀯𑀡𑁆𑀡𑀫𑀬𑀸𑀬 [𑀲𑁄𑀯𑀡𑁆𑀡𑀫𑀬𑀸 (𑀧𑀻.)] 𑀧𑀸𑀢𑀺𑀬𑀸;

𑀅𑀦𑁂𑀓𑀲𑀽𑀧𑀁 𑀯𑀺𑀯𑀺𑀥𑀁 𑀯𑀺𑀬𑀜𑁆𑀚𑀦𑀁, 𑀉𑀧𑀦𑀸𑀫𑀬𑀻 𑀪𑀢𑁆𑀢 𑀫𑀦𑀼𑀜𑁆𑀜𑀭𑀽𑀧𑀁.

𑁧𑁬𑁭. ‘‘𑀢𑀼𑀭𑀺𑀬𑁂𑀳𑀺 [𑀢𑀽𑀭𑀺𑀬𑁂𑀳𑀺 (𑀓.)] 𑀫𑀁 𑀪𑀸𑀭𑀢 𑀪𑀼𑀢𑁆𑀢𑀯𑀦𑁆𑀢𑀁, 𑀉𑀧𑀝𑁆𑀞𑀳𑀼𑀁 𑀪𑀢𑁆𑀢𑀼 𑀫𑀦𑁄 𑀯𑀺𑀤𑀺𑀢𑁆𑀯𑀸;

𑀢𑀢𑀼𑀢𑁆𑀢𑀭𑀺𑀁 [𑀢𑀤𑀼𑀢𑁆𑀢𑀭𑀺𑀁 (𑀓.)] 𑀫𑀁 𑀦𑀺𑀧𑀢𑀻 𑀫𑀳𑀦𑁆𑀢𑀁, 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀅𑀦𑀧𑁆𑀧𑀓𑁂𑀳𑀺.

𑁧𑁬𑁮. ‘‘𑀪𑀭𑀺𑀬𑀸 𑀫𑀫𑁂𑀢𑀸 𑀢𑀺𑀲𑀢𑀸 𑀅𑀴𑀸𑀭, 𑀲𑀩𑁆𑀩𑀢𑁆𑀢𑀫𑀚𑁆𑀛𑀸 𑀧𑀤𑀼𑀫𑀼𑀢𑁆𑀢𑀭𑀸𑀪𑀸;

𑀅𑀴𑀸𑀭 𑀏𑀢𑀸𑀲𑁆𑀲𑀼 𑀢𑁂 𑀓𑀸𑀫𑀓𑀸𑀭𑀸, 𑀤𑀤𑀸𑀫𑀺 𑀢𑁂 𑀢𑀸 𑀧𑀭𑀺𑀘𑀸𑀭𑀬𑀲𑁆𑀲𑀼.

𑁧𑁬𑁯. ‘‘𑀲𑀁𑀯𑀘𑁆𑀙𑀭𑀁 𑀤𑀺𑀩𑁆𑀩𑀭𑀲𑀸𑀦𑀼𑀪𑀼𑀢𑁆𑀯𑀸, 𑀢𑀤𑀸𑀲𑁆𑀲𑀼𑀳𑀁 [𑀢𑀤𑀲𑁆𑀲𑀳𑀁 (𑀧𑀻.)] 𑀉𑀢𑁆𑀢𑀭𑀺𑀫𑀚𑁆𑀛𑀪𑀸𑀲𑀺𑀁 [𑀉𑀢𑁆𑀢𑀭𑀺 𑀧𑀘𑁆𑀘𑀪𑀸𑀲𑀺𑀁 (𑀲𑀻. 𑀲𑁆𑀬𑀸.), 𑀉𑀢𑁆𑀢𑀭𑀺𑀁 𑀧𑀘𑁆𑀘𑀪𑀸𑀲𑀺𑀁 (𑀧𑀻.)];

𑀦𑀸𑀕𑀲𑁆𑀲𑀺𑀤𑀁 𑀓𑀺𑀦𑁆𑀢𑀺 𑀓𑀣𑀜𑁆𑀘 𑀮𑀤𑁆𑀥𑀁, 𑀓𑀣𑀚𑁆𑀛𑀕𑀫𑀸𑀲𑀺 𑀯𑀺𑀫𑀸𑀦𑀲𑁂𑀝𑁆𑀞𑀁’’.

𑁧𑁭𑁦. ‘‘𑀅𑀥𑀺𑀘𑁆𑀘 𑀮𑀤𑁆𑀥𑀁 𑀧𑀭𑀺𑀡𑀸𑀫𑀚𑀁 𑀢𑁂, 𑀲𑀬𑀁𑀓𑀢𑀁 𑀉𑀤𑀸𑀳𑀼 𑀤𑁂𑀯𑁂𑀳𑀺 𑀤𑀺𑀦𑁆𑀦𑀁;

𑀧𑀼𑀘𑁆𑀙𑀸𑀫𑀺 𑀢𑀁 [𑀢𑁂 (𑀧𑀻.)] 𑀦𑀸𑀕𑀭𑀸𑀚𑁂𑀢𑀫𑀢𑁆𑀣𑀁, 𑀓𑀣𑀚𑁆𑀛𑀕𑀫𑀸𑀲𑀺 𑀯𑀺𑀫𑀸𑀦𑀲𑁂𑀝𑁆𑀞𑀁’’.

𑁧𑁭𑁧. ‘‘𑀦𑀸𑀥𑀺𑀘𑁆𑀘 𑀮𑀤𑁆𑀥𑀁 𑀦 𑀧𑀭𑀺𑀡𑀸𑀫𑀚𑀁 𑀫𑁂, 𑀦 𑀲𑀬𑀁𑀓𑀢𑀁 𑀦𑀸𑀧𑀺 𑀤𑁂𑀯𑁂𑀳𑀺 𑀤𑀺𑀦𑁆𑀦𑀁;

𑀲𑀓𑁂𑀳𑀺 𑀓𑀫𑁆𑀫𑁂𑀳𑀺 𑀅𑀧𑀸𑀧𑀓𑁂𑀳𑀺, 𑀧𑀼𑀜𑁆𑀜𑁂𑀳𑀺 𑀫𑁂 𑀮𑀤𑁆𑀥𑀫𑀺𑀤𑀁 𑀯𑀺𑀫𑀸𑀦𑀁’’.

𑁧𑁭𑁨. ‘‘𑀓𑀺𑀁 𑀢𑁂 𑀯𑀢𑀁 𑀓𑀺𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀺𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀅𑀓𑁆𑀔𑀸𑀳𑀺 𑀫𑁂 𑀦𑀸𑀕𑀭𑀸𑀚𑁂𑀢𑀫𑀢𑁆𑀣𑀁, 𑀓𑀣𑀁 𑀦𑀼 𑀢𑁂 𑀮𑀤𑁆𑀥𑀫𑀺𑀤𑀁 𑀯𑀺𑀫𑀸𑀦𑀁’’.

𑁧𑁭𑁩. ‘‘𑀭𑀸𑀚𑀸 𑀅𑀳𑁄𑀲𑀺𑀁 𑀫𑀕𑀥𑀸𑀦𑀫𑀺𑀲𑁆𑀲𑀭𑁄, 𑀤𑀼𑀬𑁆𑀬𑁄𑀥𑀦𑁄 𑀦𑀸𑀫 𑀫𑀳𑀸𑀦𑀼𑀪𑀸𑀯𑁄;

𑀲𑁄 𑀇𑀢𑁆𑀢𑀭𑀁 𑀚𑀻𑀯𑀺𑀢𑀁 𑀲𑀁𑀯𑀺𑀤𑀺𑀢𑁆𑀯𑀸, 𑀅𑀲𑀲𑁆𑀲𑀢𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁.

𑁧𑁭𑁪. ‘‘𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀸𑀲𑀺𑀁 [𑀅𑀤𑀸𑀲𑀺 (𑀧𑀻.)];

𑀑𑀧𑀸𑀦𑀪𑀽𑀢𑀁 𑀫𑁂 𑀖𑀭𑀁 𑀢𑀤𑀸𑀲𑀺, 𑀲𑀦𑁆𑀢𑀧𑁆𑀧𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘.

𑁧𑁭𑁫. [𑀅𑀬𑀁 𑀕𑀸𑀣𑀸 𑀧𑀻. 𑀧𑁄𑀢𑁆𑀣𑀓𑁂 𑀦𑀢𑁆𑀣𑀺] ‘‘𑀫𑀸𑀮𑀜𑁆𑀘 𑀕𑀦𑁆𑀥𑀜𑁆𑀘 𑀯𑀺𑀮𑁂𑀧𑀦𑀜𑁆𑀘, 𑀧𑀤𑀻𑀧𑀺𑀬𑀁 [𑀧𑀤𑀻𑀧𑀬𑀁 (𑀲𑁆𑀬𑀸. 𑀓.)] 𑀬𑀸𑀦𑀫𑀼𑀧𑀲𑁆𑀲𑀬𑀜𑁆𑀘;

𑀅𑀘𑁆𑀙𑀸𑀤𑀦𑀁 𑀲𑁂𑀬𑁆𑀬𑀫𑀣𑀦𑁆𑀦𑀧𑀸𑀦𑀁, 𑀲𑀓𑁆𑀓𑀘𑁆𑀘 𑀤𑀸𑀦𑀸𑀦𑀺 𑀅𑀤𑀫𑁆𑀳 𑀢𑀢𑁆𑀣 [𑀅𑀬𑀁 𑀕𑀸𑀣𑀸 𑀧𑀻. 𑀧𑁄𑀢𑁆𑀣𑀓𑁂 𑀦𑀢𑁆𑀣𑀺].

𑁧𑁭𑁬. ‘‘𑀢𑀁 𑀫𑁂 𑀯𑀢𑀁 𑀢𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀢𑁂𑀦𑁂𑀯 𑀫𑁂 𑀮𑀤𑁆𑀥𑀫𑀺𑀤𑀁 𑀯𑀺𑀫𑀸𑀦𑀁, 𑀧𑀳𑀽𑀢𑀪𑀓𑁆𑀔𑀁 𑀩𑀳𑀼𑀅𑀦𑁆𑀦𑀧𑀸𑀦𑀁’’;

‘‘𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀘𑀼𑀧𑁂𑀢𑀭𑀽𑀧𑀁, 𑀘𑀺𑀭𑀝𑁆𑀞𑀺𑀢𑀺𑀓𑀁 𑀦 𑀘 𑀲𑀲𑁆𑀲𑀢𑀸𑀬𑀁.

𑁧𑁭𑁭. ‘‘𑀅𑀧𑁆𑀧𑀸𑀦𑀼𑀪𑀸𑀯𑀸 𑀢𑀁 𑀫𑀳𑀸𑀦𑀼𑀪𑀸𑀯𑀁, 𑀢𑁂𑀚𑀲𑁆𑀲𑀺𑀦𑀁 𑀳𑀦𑁆𑀢𑀺 𑀅𑀢𑁂𑀚𑀯𑀦𑁆𑀢𑁄;

𑀓𑀺𑀫𑁂𑀯 𑀤𑀸𑀞𑀸𑀯𑀼𑀥 𑀓𑀺𑀁 𑀧𑀝𑀺𑀘𑁆𑀘, 𑀳𑀢𑁆𑀣𑀢𑁆𑀢 [𑀳𑀢𑁆𑀣𑀢𑁆𑀣 (𑀲𑀻. 𑀲𑁆𑀬𑀸. 𑀧𑀻.)] 𑀫𑀸𑀕𑀘𑁆𑀙𑀺 𑀯𑀦𑀺𑀩𑁆𑀩𑀓𑀸𑀦𑀁 [𑀯𑀡𑀺𑀩𑁆𑀩𑀓𑀸𑀦𑀁 (𑀲𑀻.)].

𑁧𑁭𑁮. ‘‘𑀪𑀬𑀁 𑀦𑀼 𑀢𑁂 𑀅𑀦𑁆𑀯𑀕𑀢𑀁 𑀫𑀳𑀦𑁆𑀢𑀁, 𑀢𑁂𑀚𑁄 𑀦𑀼 𑀢𑁂 𑀦𑀸𑀦𑁆𑀯𑀕𑀁 𑀤𑀦𑁆𑀢𑀫𑀽𑀮𑀁;

𑀓𑀺𑀫𑁂𑀯 𑀤𑀸𑀞𑀸𑀯𑀼𑀥 𑀓𑀺𑀁 𑀧𑀝𑀺𑀘𑁆𑀘, 𑀓𑀺𑀮𑁂𑀲𑀫𑀸𑀧𑀚𑁆𑀚𑀺 𑀯𑀦𑀺𑀩𑁆𑀩𑀓𑀸𑀦𑀁’’.

𑁧𑁭𑁯. ‘‘𑀦 𑀫𑁂 𑀪𑀬𑀁 𑀅𑀦𑁆𑀯𑀕𑀢𑀁 𑀫𑀳𑀦𑁆𑀢𑀁, 𑀢𑁂𑀚𑁄 𑀦 𑀲𑀓𑁆𑀓𑀸 𑀫𑀫 𑀢𑁂𑀳𑀺 𑀳𑀦𑁆𑀢𑀼𑀁 [𑀢𑁂𑀪𑀺𑀳𑀦𑁆𑀢𑀼𑀁 (𑀲𑁆𑀬𑀸. 𑀓.)];

𑀲𑀢𑀜𑁆𑀘 𑀥𑀫𑁆𑀫𑀸𑀦𑀺 𑀲𑀼𑀓𑀺𑀢𑁆𑀢𑀺𑀢𑀸𑀦𑀺, 𑀲𑀫𑀼𑀤𑁆𑀤𑀯𑁂𑀮𑀸𑀯 𑀤𑀼𑀭𑀘𑁆𑀘𑀬𑀸𑀦𑀺.

𑁧𑁮𑁦. ‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁 𑀅𑀴𑀸𑀭, 𑀉𑀧𑁄𑀲𑀣𑀁 𑀦𑀺𑀘𑁆𑀘𑀫𑀼𑀧𑀸𑀯𑀲𑀸𑀫𑀺;

𑀅𑀣𑀸𑀕𑀫𑀼𑀁 𑀲𑁄𑀴𑀲 𑀪𑁄𑀚𑀧𑀼𑀢𑁆𑀢𑀸, 𑀭𑀚𑁆𑀚𑀼𑀁 𑀕𑀳𑁂𑀢𑁆𑀯𑀸𑀦 𑀤𑀴𑁆𑀳𑀜𑁆𑀘 𑀧𑀸𑀲𑀁.

𑁧𑁮𑁧. ‘‘𑀪𑁂𑀢𑁆𑀯𑀸𑀦 𑀦𑀸𑀲𑀁 𑀅𑀢𑀺𑀓𑀲𑁆𑀲 [𑀅𑀦𑁆𑀢𑀓𑀲𑁆𑀲 (𑀓.)] 𑀭𑀚𑁆𑀚𑀼𑀁, 𑀦𑀬𑀺𑀁𑀲𑀼 𑀫𑀁 𑀲𑀫𑁆𑀧𑀭𑀺𑀕𑀬𑁆𑀳 𑀮𑀼𑀤𑁆𑀤𑀸;

𑀏𑀢𑀸𑀤𑀺𑀲𑀁 𑀤𑀼𑀓𑁆𑀔𑀫𑀳𑀁 𑀢𑀺𑀢𑀺𑀓𑁆𑀔𑀁 [𑀢𑀺𑀢𑀺𑀓𑁆𑀔𑀺𑀁 (𑀧𑀻.)], 𑀉𑀧𑁄𑀲𑀣𑀁 𑀅𑀧𑁆𑀧𑀝𑀺𑀓𑁄𑀧𑀬𑀦𑁆𑀢𑁄’’.

𑁧𑁮𑁨. ‘‘𑀏𑀓𑀸𑀬𑀦𑁂 𑀢𑀁 𑀧𑀣𑁂 𑀅𑀤𑁆𑀤𑀲𑀁𑀲𑀼, 𑀩𑀮𑁂𑀦 𑀯𑀡𑁆𑀡𑁂𑀦 𑀘𑀼𑀧𑁂𑀢𑀭𑀽𑀧𑀁;

𑀲𑀺𑀭𑀺𑀬𑀸 𑀧𑀜𑁆𑀜𑀸𑀬 𑀘 𑀪𑀸𑀯𑀺𑀢𑁄𑀲𑀺, 𑀓𑀺𑀁 𑀧𑀢𑁆𑀣𑀬𑀁 [𑀓𑀺𑀫𑀢𑁆𑀣𑀺𑀬𑀁 (𑀲𑀻. 𑀲𑁆𑀬𑀸. 𑀧𑀻.)] 𑀦𑀸𑀕 𑀢𑀧𑁄 𑀓𑀭𑁄𑀲𑀺.

𑁧𑁮𑁩. ‘‘𑀦 𑀧𑀼𑀢𑁆𑀢𑀳𑁂𑀢𑀽 𑀦 𑀥𑀦𑀲𑁆𑀲 𑀳𑁂𑀢𑀼, 𑀦 𑀆𑀬𑀼𑀦𑁄 𑀘𑀸𑀧𑀺 𑀅𑀴𑀸𑀭 𑀳𑁂𑀢𑀼;

𑀫𑀦𑀼𑀲𑁆𑀲𑀬𑁄𑀦𑀺𑀁 𑀅𑀪𑀺𑀧𑀢𑁆𑀣𑀬𑀸𑀦𑁄, 𑀢𑀲𑁆𑀫𑀸 𑀧𑀭𑀓𑁆𑀓𑀫𑁆𑀫 𑀢𑀧𑁄 𑀓𑀭𑁄𑀫𑀺’’.

𑁧𑁮𑁪. ‘‘𑀢𑁆𑀯𑀁 𑀮𑁄𑀳𑀺𑀢𑀓𑁆𑀔𑁄 𑀯𑀺𑀳𑀢𑀦𑁆𑀢𑀭𑀁𑀲𑁄, 𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼;

𑀲𑀼𑀭𑁄𑀲𑀺𑀢𑁄 𑀮𑁄𑀳𑀺𑀢𑀘𑀦𑁆𑀤𑀦𑁂𑀦, 𑀕𑀦𑁆𑀥𑀩𑁆𑀩𑀭𑀸𑀚𑀸𑀯 𑀤𑀺𑀲𑀸 𑀧𑀪𑀸𑀲𑀲𑀺 [𑀧𑀪𑀸𑀲𑀺 (𑀓.)].

𑁧𑁮𑁫. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄, 𑀲𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑁄;

𑀧𑀼𑀘𑁆𑀙𑀸𑀫𑀺 𑀢𑀁 𑀦𑀸𑀕𑀭𑀸𑀚𑁂𑀢𑀫𑀢𑁆𑀣𑀁, 𑀲𑁂𑀬𑁆𑀬𑁄 𑀇𑀢𑁄 𑀓𑁂𑀦 𑀫𑀦𑀼𑀲𑁆𑀲𑀮𑁄𑀓𑁄’’.

𑁧𑁮𑁬. ‘‘𑀅𑀴𑀸𑀭 𑀦𑀸𑀜𑁆𑀜𑀢𑁆𑀭 𑀫𑀦𑀼𑀲𑁆𑀲𑀮𑁄𑀓𑀸, 𑀲𑀼𑀤𑁆𑀥𑀻 𑀯 𑀲𑀁𑀯𑀺𑀚𑁆𑀚𑀢𑀺 𑀲𑀁𑀬𑀫𑁄 𑀯𑀸;

𑀅𑀳𑀜𑁆𑀘 𑀮𑀤𑁆𑀥𑀸𑀦 𑀫𑀦𑀼𑀲𑁆𑀲𑀬𑁄𑀦𑀺𑀁, 𑀓𑀸𑀳𑀸𑀫𑀺 𑀚𑀸𑀢𑀺𑀫𑀭𑀡𑀲𑁆𑀲 𑀅𑀦𑁆𑀢𑀁’’.

𑁧𑁮𑁭. ‘‘𑀲𑀁𑀯𑀘𑁆𑀙𑀭𑁄 𑀫𑁂 𑀯𑀲𑀢𑁄 [𑀯𑀼𑀲𑀺𑀢𑁄 (𑀧𑀻.)] 𑀢𑀯𑀦𑁆𑀢𑀺𑀓𑁂, 𑀅𑀦𑁆𑀦𑁂𑀦 𑀧𑀸𑀦𑁂𑀦 𑀉𑀧𑀝𑁆𑀞𑀺𑀢𑁄𑀲𑁆𑀫𑀺;

𑀆𑀫𑀦𑁆𑀢𑀬𑀺𑀢𑁆𑀯𑀸𑀦 𑀧𑀮𑁂𑀫𑀺 𑀦𑀸𑀕, 𑀘𑀺𑀭𑀧𑁆𑀧𑀯𑀼𑀝𑁆𑀞𑁄𑀲𑁆𑀫𑀺 [𑀘𑀺𑀭𑀧𑁆𑀧𑀯𑀼𑀢𑁆𑀣𑁄 𑀅𑀲𑁆𑀫𑀺 (𑀧𑀻.)] 𑀅𑀳𑀁 𑀚𑀦𑀺𑀦𑁆𑀤’’.

𑁧𑁮𑁮. ‘‘𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀅𑀦𑀼𑀚𑀻𑀯𑀺𑀦𑁄 𑀘 [𑀘’𑀦𑀼𑀚𑀻𑀯𑀺𑀦𑁄 (𑀲𑁆𑀬𑀸. 𑀧𑀻.)], 𑀦𑀺𑀘𑁆𑀘𑀸𑀦𑀼𑀲𑀺𑀝𑁆𑀞𑀸 𑀉𑀧𑀢𑀺𑀝𑁆𑀞𑀢𑁂 𑀢𑀁;

𑀓𑀘𑁆𑀘𑀺𑀦𑁆𑀦𑀼 𑀢𑀁 𑀦𑀸𑀪𑀺𑀲𑀧𑀺𑀢𑁆𑀣 [𑀦𑀸𑀪𑀺𑀲𑀁𑀲𑀺𑀢𑁆𑀣 (𑀲𑁆𑀬𑀸. 𑀧𑀻.)] 𑀓𑁄𑀘𑀺, 𑀧𑀺𑀬𑀜𑁆𑀳𑀺 𑀫𑁂 𑀤𑀲𑁆𑀲𑀦𑀁 𑀢𑀼𑀬𑁆𑀳𑀁 [𑀢𑀼𑀬𑁆𑀳 (𑀧𑀻.)] 𑀅𑀴𑀸𑀭’’.

𑁧𑁮𑁯. ‘‘𑀬𑀣𑀸𑀧𑀺 𑀫𑀸𑀢𑀽 𑀘 𑀧𑀺𑀢𑀽 𑀅𑀕𑀸𑀭𑁂, 𑀧𑀼𑀢𑁆𑀢𑁄 𑀧𑀺𑀬𑁄 𑀧𑀝𑀺𑀯𑀺𑀳𑀺𑀢𑁄 𑀯𑀲𑁂𑀬𑁆𑀬 [𑀲𑁂𑀬𑁆𑀬𑁄 (𑀧𑀻.)];

𑀢𑀢𑁄𑀧𑀺 𑀫𑀬𑁆𑀳𑀁 𑀇𑀥𑀫𑁂𑀯 𑀲𑁂𑀬𑁆𑀬𑁄, 𑀘𑀺𑀢𑁆𑀢𑀜𑁆𑀳𑀺 𑀢𑁂 𑀦𑀸𑀕 𑀫𑀬𑀻 𑀧𑀲𑀦𑁆𑀦𑀁’’.

𑁧𑁯𑁦. ‘‘𑀫𑀡𑀻 𑀫𑀫𑀁 𑀯𑀺𑀚𑁆𑀚𑀢𑀺 𑀮𑁄𑀳𑀺𑀢𑀗𑁆𑀓𑁄 [𑀮𑁄𑀳𑀺𑀢𑀗𑁆𑀕𑁄 (𑀓.)], 𑀥𑀦𑀸𑀳𑀭𑁄 𑀫𑀡𑀺𑀭𑀢𑀦𑀁 𑀉𑀴𑀸𑀭𑀁;

𑀆𑀤𑀸𑀬 𑀢𑁆𑀯𑀁 [𑀢𑀁 (𑀧𑀻.)] 𑀕𑀘𑁆𑀙 𑀲𑀓𑀁 𑀦𑀺𑀓𑁂𑀢𑀁, 𑀮𑀤𑁆𑀥𑀸 𑀥𑀦𑀁 𑀢𑀁 𑀫𑀡𑀺𑀫𑁄𑀲𑁆𑀲𑀚𑀲𑁆𑀲𑀼’’.

𑁧𑁯𑁧. ‘‘𑀤𑀺𑀝𑁆𑀞𑀸 𑀫𑀬𑀸 𑀫𑀸𑀦𑀼𑀲𑀓𑀸𑀧𑀺 𑀓𑀸𑀫𑀸, 𑀅𑀲𑀲𑁆𑀲𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸;

𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀲𑀤𑁆𑀥𑀸𑀬𑀳𑀁 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚.

𑁧𑁯𑁨. ‘‘𑀤𑀼𑀫𑀧𑁆𑀨𑀮𑀸𑀦𑀻𑀯 𑀧𑀢𑀦𑁆𑀢𑀺 𑀫𑀸𑀡𑀯𑀸, 𑀤𑀳𑀭𑀸 𑀘 𑀯𑀼𑀤𑁆𑀥𑀸 𑀘 𑀲𑀭𑀻𑀭𑀪𑁂𑀤𑀸;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚, 𑀅𑀧𑀡𑁆𑀡𑀓𑀁 𑀲𑀸𑀫𑀜𑁆𑀜𑀫𑁂𑀯 𑀲𑁂𑀬𑁆𑀬𑁄’’.

𑁧𑁯𑁩. ‘‘𑀅𑀤𑁆𑀥𑀸 𑀳𑀯𑁂 𑀲𑁂𑀯𑀺𑀢𑀩𑁆𑀩𑀸 𑀲𑀧𑀜𑁆𑀜𑀸, 𑀩𑀳𑀼𑀲𑁆𑀲𑀼𑀢𑀸 𑀬𑁂 𑀩𑀳𑀼𑀞𑀸𑀦𑀘𑀺𑀦𑁆𑀢𑀺𑀦𑁄;

𑀦𑀸𑀕𑀜𑁆𑀘 𑀲𑀼𑀢𑁆𑀯𑀸𑀦 𑀢𑀯𑀜𑁆𑀘𑀴𑀸𑀭, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀺’’.

𑁧𑁯𑁪. ‘‘𑀅𑀤𑁆𑀥𑀸 𑀳𑀯𑁂 𑀲𑁂𑀯𑀺𑀢𑀩𑁆𑀩𑀸 𑀲𑀧𑀜𑁆𑀜𑀸, 𑀩𑀳𑀼𑀲𑁆𑀲𑀼𑀢𑀸 𑀬𑁂 𑀩𑀳𑀼𑀞𑀸𑀦𑀘𑀺𑀦𑁆𑀢𑀺𑀦𑁄;

𑀦𑀸𑀕𑀜𑁆𑀘 𑀲𑀼𑀢𑁆𑀯𑀸𑀦 𑀫𑀫𑀜𑁆𑀘 𑀭𑀸𑀚, 𑀓𑀭𑁄𑀳𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀻’’𑀢𑀺.

𑀲𑀗𑁆𑀔𑀧𑀸𑀮𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.