𑁫𑁨𑁫. 𑀘𑀽𑀴𑀲𑀼𑀢𑀲𑁄𑀫𑀚𑀸𑀢𑀓𑀁 (𑁫)

𑁧𑁯𑁫. ‘‘𑀆𑀫𑀦𑁆𑀢𑀬𑀸𑀫𑀺 𑀦𑀺𑀕𑀫𑀁, 𑀫𑀺𑀢𑁆𑀢𑀸𑀫𑀘𑁆𑀘𑁂 𑀧𑀭𑀺𑀲𑁆𑀲𑀚𑁂 [𑀧𑀸𑀭𑀺𑀲𑀚𑁆𑀚𑁂 (𑀲𑀻. 𑀲𑁆𑀬𑀸.)];

𑀲𑀺𑀭𑀲𑁆𑀫𑀺𑀁 𑀧𑀮𑀺𑀢𑀁 𑀚𑀸𑀢𑀁, 𑀧𑀩𑁆𑀩𑀚𑁆𑀚𑀁 𑀤𑀸𑀦𑀺 𑀭𑁄𑀘𑀳𑀁’’.

𑁧𑁯𑁬. ‘‘𑀅𑀪𑀼𑀫𑁆𑀫𑁂 𑀓𑀣𑀁 𑀦𑀼 𑀪𑀡𑀲𑀺, 𑀲𑀮𑁆𑀮𑀁 𑀫𑁂 𑀤𑁂𑀯 𑀉𑀭𑀲𑀺 𑀓𑀧𑁆𑀧𑁂𑀲𑀺 [𑀓𑀫𑁆𑀧𑁂𑀲𑀺 (𑀧𑀻.)];

𑀲𑀢𑁆𑀢𑀲𑀢𑀸 𑀢𑁂 𑀪𑀭𑀺𑀬𑀸, 𑀓𑀣𑀁 𑀦𑀼 𑀢𑁂 𑀢𑀸 𑀪𑀯𑀺𑀲𑁆𑀲𑀦𑁆𑀢𑀺’’.

𑁧𑁯𑁭. ‘‘𑀧𑀜𑁆𑀜𑀸𑀬𑀺𑀳𑀺𑀦𑁆𑀢𑀺 𑀏𑀢𑀸, 𑀤𑀳𑀭𑀸 𑀅𑀜𑁆𑀜𑀫𑁆𑀧𑀺 𑀢𑀸 𑀕𑀫𑀺𑀲𑁆𑀲𑀦𑁆𑀢𑀺;

𑀲𑀕𑁆𑀕𑀜𑁆𑀘𑀲𑁆𑀲 𑀧𑀢𑁆𑀣𑀬𑀸𑀦𑁄, 𑀢𑁂𑀦 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺’’.

𑁧𑁯𑁮. ‘‘𑀤𑀼𑀮𑁆𑀮𑀤𑁆𑀥𑀁 𑀫𑁂 𑀆𑀲𑀺 𑀲𑀼𑀢𑀲𑁄𑀫, 𑀬𑀲𑁆𑀲 𑀢𑁂 𑀳𑁄𑀫𑀳𑀁 𑀫𑀸𑀢𑀸;

𑀬𑀁 𑀫𑁂 𑀯𑀺𑀮𑀧𑀦𑁆𑀢𑀺𑀬𑀸, 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺 𑀤𑁂𑀯.

𑁧𑁯𑁯. ‘‘𑀤𑀼𑀮𑁆𑀮𑀤𑁆𑀥𑀁 𑀫𑁂 𑀆𑀲𑀺 𑀲𑀼𑀢𑀲𑁄𑀫, 𑀬𑀁 𑀢𑀁 𑀅𑀳𑀁 𑀯𑀺𑀚𑀸𑀬𑀺𑀲𑁆𑀲𑀁;

𑀬𑀁 𑀫𑁂 𑀯𑀺𑀮𑀧𑀦𑁆𑀢𑀺𑀬𑀸, 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺 𑀤𑁂𑀯’’.

𑁨𑁦𑁦. ‘‘𑀓𑁄 𑀦𑀸𑀫𑁂𑀲𑁄 𑀥𑀫𑁆𑀫𑁄, 𑀲𑀼𑀢𑀲𑁄𑀫 𑀓𑀸 𑀘 𑀦𑀸𑀫 𑀧𑀩𑁆𑀩𑀚𑁆𑀚𑀸;

𑀬𑀁 𑀦𑁄 𑀅𑀫𑁆𑀳𑁂 𑀚𑀺𑀡𑁆𑀡𑁂, 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺 𑀤𑁂𑀯.

𑁨𑁦𑁧. ‘‘𑀧𑀼𑀢𑁆𑀢𑀸𑀧𑀺 𑀢𑀼𑀬𑁆𑀳𑀁 𑀩𑀳𑀯𑁄, 𑀤𑀳𑀭𑀸 𑀅𑀧𑁆𑀧𑀢𑁆𑀢𑀬𑁄𑀩𑁆𑀩𑀦𑀸;

𑀫𑀜𑁆𑀚𑀽 𑀢𑁂𑀧𑀺 [𑀢𑁂 (𑀲𑀻. 𑀧𑀻.)] 𑀢𑀁 𑀅𑀧𑀲𑁆𑀲𑀦𑁆𑀢𑀸, 𑀫𑀜𑁆𑀜𑁂 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀦𑁆𑀢𑀺’’.

𑁨𑁦𑁨. ‘‘𑀧𑀼𑀢𑁆𑀢𑁂𑀳𑀺 𑀘 𑀫𑁂 𑀏𑀢𑁂𑀳𑀺, 𑀤𑀳𑀭𑁂𑀳𑀺 𑀅𑀧𑁆𑀧𑀢𑁆𑀢𑀬𑁄𑀩𑁆𑀩𑀦𑁂𑀳𑀺;

𑀫𑀜𑁆𑀚𑀽𑀳𑀺 𑀲𑀩𑁆𑀩𑁂𑀳𑀺𑀧𑀺 𑀢𑀼𑀫𑁆𑀳𑁂𑀳𑀺, 𑀘𑀺𑀭𑀫𑁆𑀧𑀺 𑀞𑀢𑁆𑀯𑀸 𑀯𑀺𑀦𑀸𑀲𑀪𑀸𑀯𑁄’’ [𑀯𑀺𑀦𑀸𑀪𑀸𑀯𑁄 (𑀲𑀻. 𑀲𑁆𑀬𑀸. 𑀧𑀻.)].

𑁨𑁦𑁩. ‘‘𑀙𑀺𑀦𑁆𑀦𑀁 𑀦𑀼 𑀢𑀼𑀬𑁆𑀳𑀁 𑀳𑀤𑀬𑀁, 𑀅𑀤𑀼 𑀢𑁂 [𑀆𑀤𑀼 (𑀲𑀻. 𑀧𑀻.), 𑀆𑀤𑀽 (𑀲𑁆𑀬𑀸.)] 𑀓𑀭𑀼𑀡𑀸 𑀘 𑀦𑀢𑁆𑀣𑀺 𑀅𑀫𑁆𑀳𑁂𑀲𑀼;

𑀬𑀁 𑀦𑁄 𑀯𑀺𑀓𑀦𑁆𑀤𑀦𑁆𑀢𑀺𑀬𑁄 [𑀯𑀺𑀓𑁆𑀓𑀦𑁆𑀤𑀦𑁆𑀢𑀺𑀬𑁄 (𑀲𑀻.)], 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺 𑀤𑁂𑀯’’.

𑁨𑁦𑁪. ‘‘𑀦 𑀘 𑀫𑀬𑁆𑀳𑀁 𑀙𑀺𑀦𑁆𑀦𑀁 𑀳𑀤𑀬𑀁, 𑀅𑀢𑁆𑀣𑀺 𑀓𑀭𑀼𑀡𑀸𑀧𑀺 𑀫𑀬𑁆𑀳𑀁 𑀢𑀼𑀫𑁆𑀳𑁂𑀲𑀼;

𑀲𑀕𑁆𑀕𑀜𑁆𑀘 𑀧𑀢𑁆𑀣𑀬𑀸𑀦𑁄, 𑀢𑁂𑀦 𑀅𑀳𑀁 [𑀢𑁂𑀦𑀸𑀳𑀁 (𑀲𑀻. 𑀲𑁆𑀬𑀸.), 𑀢𑁂𑀦𑀫𑀳𑀁 (𑀧𑀻.)] 𑀧𑀩𑁆𑀩𑀚𑀺𑀲𑁆𑀲𑀸𑀫𑀺’’.

𑁨𑁦𑁫. ‘‘𑀤𑀼𑀮𑁆𑀮𑀤𑁆𑀥𑀁 𑀫𑁂 𑀆𑀲𑀺, 𑀲𑀼𑀢𑀲𑁄𑀫 𑀬𑀲𑁆𑀲 𑀢𑁂 𑀅𑀳𑀁 𑀪𑀭𑀺𑀬𑀸;

𑀬𑀁 𑀫𑁂 𑀯𑀺𑀮𑀧𑀦𑁆𑀢𑀺𑀬𑀸, 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺 𑀤𑁂𑀯.

𑁨𑁦𑁬. ‘‘𑀤𑀼𑀮𑁆𑀮𑀤𑁆𑀥𑀁 𑀫𑁂 𑀆𑀲𑀺, 𑀲𑀼𑀢𑀲𑁄𑀫 𑀬𑀲𑁆𑀲 𑀢𑁂 𑀅𑀳𑀁 𑀪𑀭𑀺𑀬𑀸;

𑀬𑀁 𑀫𑁂 𑀓𑀼𑀘𑁆𑀙𑀺𑀧𑀝𑀺𑀲𑀦𑁆𑀥𑀺𑀁 [𑀫𑀁 𑀓𑀼𑀘𑁆𑀙𑀺𑀫𑀢𑀺𑀁 𑀲𑀦𑁆𑀢𑀺𑀁 (𑀧𑀻.)], 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺 𑀤𑁂𑀯.

𑁨𑁦𑁭. ‘‘𑀧𑀭𑀺𑀧𑀓𑁆𑀓𑁄 𑀫𑁂 𑀕𑀩𑁆𑀪𑁄, 𑀓𑀼𑀘𑁆𑀙𑀺𑀕𑀢𑁄 𑀬𑀸𑀯 𑀦𑀁 𑀯𑀺𑀚𑀸𑀬𑀸𑀫𑀺;

𑀫𑀸𑀳𑀁 𑀏𑀓𑀸 𑀯𑀺𑀥𑀯𑀸, 𑀧𑀘𑁆𑀙𑀸 𑀤𑀼𑀓𑁆𑀔𑀸𑀦𑀺 𑀅𑀤𑁆𑀤𑀓𑁆𑀔𑀺𑀁’’.

𑁨𑁦𑁮. ‘‘𑀧𑀭𑀺𑀧𑀓𑁆𑀓𑁄 𑀢𑁂 𑀕𑀩𑁆𑀪𑁄, 𑀓𑀼𑀘𑁆𑀙𑀺𑀕𑀢𑁄 𑀇𑀗𑁆𑀖 𑀢𑁆𑀯𑀁 [𑀢𑁆𑀯 (𑀲𑀻.), 𑀦𑀁 (𑀧𑀻.)] 𑀯𑀺𑀚𑀸𑀬𑀲𑁆𑀲𑀼;

𑀧𑀼𑀢𑁆𑀢𑀁 𑀅𑀦𑁄𑀫𑀯𑀡𑁆𑀡𑀁, 𑀢𑀁 𑀳𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀺’’.

𑁨𑁦𑁯. ‘‘𑀫𑀸 𑀢𑁆𑀯𑀁 𑀘𑀦𑁆𑀤𑁂 𑀭𑀼𑀤𑀺, 𑀫𑀸 𑀲𑁄𑀘𑀺 𑀯𑀦𑀢𑀺𑀫𑀺𑀭𑀫𑀢𑁆𑀢𑀓𑁆𑀔𑀺;

𑀆𑀭𑁄𑀳 𑀯𑀭𑀧𑀸𑀲𑀸𑀤𑀁 [𑀘 𑀧𑀸𑀲𑀸𑀤𑀁 (𑀧𑀻.)], 𑀅𑀦𑀧𑁂𑀓𑁆𑀔𑁄 𑀅𑀳𑀁 𑀕𑀫𑀺𑀲𑁆𑀲𑀸𑀫𑀺’’.

𑁨𑁧𑁦. ‘‘𑀓𑁄 𑀢𑀁 𑀅𑀫𑁆𑀫 𑀓𑁄𑀧𑁂𑀲𑀺, 𑀓𑀺𑀁 𑀭𑁄𑀤𑀲𑀺 𑀧𑁂𑀓𑁆𑀔𑀲𑀺 𑀘 𑀫𑀁 𑀩𑀸𑀴𑁆𑀳𑀁;

𑀓𑀁 𑀅𑀯𑀚𑁆𑀛𑀁 𑀖𑀸𑀢𑁂𑀫𑀺 [𑀖𑀸𑀢𑁂𑀫𑀺 𑀓𑀁 𑀅𑀯𑀚𑁆𑀛𑀁 (𑀧𑀻.), 𑀢𑀁 𑀅𑀯𑀚𑁆𑀛𑀁 𑀖𑀸𑀢𑁂𑀫𑀺 (𑀓.)], 𑀜𑀸𑀢𑀻𑀦𑀁 𑀉𑀤𑀺𑀓𑁆𑀔𑀫𑀸𑀦𑀸𑀦𑀁’’.

𑁨𑁧𑁧. ‘‘𑀦 𑀳𑀺 𑀲𑁄 𑀲𑀓𑁆𑀓𑀸 𑀳𑀦𑁆𑀢𑀼𑀁, 𑀯𑀺𑀚𑀺𑀢𑀸𑀯𑀻 [𑀚𑀻𑀯𑀺𑀢𑀸𑀯𑀻 (𑀧𑀻.)] 𑀬𑁄 𑀫𑀁 𑀢𑀸𑀢 𑀓𑁄𑀧𑁂𑀲𑀺;

𑀧𑀺𑀢𑀸 𑀢𑁂 𑀫𑀁 𑀢𑀸𑀢 𑀅𑀯𑀘, 𑀅𑀦𑀧𑁂𑀓𑁆𑀔𑁄 𑀅𑀳𑀁 𑀕𑀫𑀺𑀲𑁆𑀲𑀸𑀫𑀺’’.

𑁨𑁧𑁨. ‘‘𑀬𑁄𑀳𑀁 𑀧𑀼𑀩𑁆𑀩𑁂 𑀦𑀺𑀬𑁆𑀬𑀸𑀫𑀺, 𑀉𑀬𑁆𑀬𑀸𑀦𑀁 𑀫𑀢𑁆𑀢𑀓𑀼𑀜𑁆𑀚𑀭𑁂 𑀘 𑀬𑁄𑀥𑁂𑀫𑀺;

𑀲𑀼𑀢𑀲𑁄𑀫𑁂 𑀧𑀩𑁆𑀩𑀚𑀺𑀢𑁂, 𑀓𑀣𑀁 𑀦𑀼 𑀤𑀸𑀦𑀺 𑀓𑀭𑀺𑀲𑁆𑀲𑀸𑀫𑀺’’.

𑁨𑁧𑁩. ‘‘𑀫𑀸𑀢𑀼𑀘𑁆𑀘 [𑀫𑀸𑀢𑀼 𑀘 (𑀲𑀻. 𑀲𑁆𑀬𑀸.)] 𑀫𑁂 𑀭𑀼𑀤𑀦𑁆𑀢𑁆𑀬𑀸 [𑀭𑀼𑀤𑀢𑁆𑀬𑀸 (𑀧𑀻.)], 𑀚𑁂𑀝𑁆𑀞𑀲𑁆𑀲 𑀘 𑀪𑀸𑀢𑀼𑀦𑁄 𑀅𑀓𑀸𑀫𑀲𑁆𑀲;

𑀳𑀢𑁆𑀣𑁂𑀧𑀺 𑀢𑁂 𑀕𑀳𑁂𑀲𑁆𑀲𑀁, 𑀦 𑀳𑀺 𑀕𑀘𑁆𑀙𑀲𑀺 [𑀕𑀜𑁆𑀙𑀺𑀲𑀺 (𑀧𑀻.)] 𑀦𑁄 𑀅𑀓𑀸𑀫𑀸𑀦𑀁’’.

𑁨𑁧𑁪. ‘‘𑀉𑀝𑁆𑀞𑁂𑀳𑀺 𑀢𑁆𑀯𑀁 𑀥𑀸𑀢𑀺, 𑀇𑀫𑀁 𑀓𑀼𑀫𑀸𑀭𑀁 𑀭𑀫𑁂𑀳𑀺 𑀅𑀜𑁆𑀜𑀢𑁆𑀣;

𑀫𑀸 𑀫𑁂 𑀧𑀭𑀺𑀧𑀦𑁆𑀣𑀫𑀓𑀸𑀲𑀺 [𑀫𑀓𑀸 (𑀲𑀻. 𑀧𑀻.)], 𑀲𑀕𑁆𑀕𑀁 𑀫𑀫 𑀧𑀢𑁆𑀣𑀬𑀸𑀦𑀲𑁆𑀲’’.

𑁨𑁧𑁫. ‘‘𑀬𑀁 𑀦𑀽𑀦𑀺𑀫𑀁 𑀤𑀤𑁂𑀬𑁆𑀬𑀁 [𑀚𑀳𑁂𑀬𑁆𑀬𑀁 (𑀧𑀻.)] 𑀧𑀪𑀗𑁆𑀓𑀭𑀁, 𑀓𑁄 𑀦𑀼 𑀫𑁂 𑀇𑀫𑀺𑀦𑀸𑀢𑁆𑀣𑁄 [𑀓𑁄 𑀦𑀼 𑀫𑁂 𑀇𑀫𑀺𑀦𑀸 𑀅𑀢𑁆𑀣𑁄 (𑀲𑀻. 𑀲𑁆𑀬𑀸.), 𑀓𑁄 𑀦𑀼 𑀫𑁂 𑀦𑀢𑁆𑀣𑁄 (𑀧𑀻.)];

𑀲𑀼𑀢𑀲𑁄𑀫𑁂 𑀧𑀩𑁆𑀩𑀚𑀺𑀢𑁂, 𑀓𑀺𑀁 𑀦𑀼 𑀫𑁂𑀦𑀁 𑀓𑀭𑀺𑀲𑁆𑀲𑀸𑀫𑀺’’.

𑁨𑁧𑁬. ‘‘𑀓𑁄𑀲𑁄 𑀘 𑀢𑀼𑀬𑁆𑀳𑀁 𑀯𑀺𑀧𑀼𑀮𑁄, 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀢𑀼𑀬𑁆𑀳𑀁 𑀧𑀭𑀺𑀧𑀽𑀭𑀁;

𑀧𑀣𑀯𑀻 𑀘 𑀢𑀼𑀬𑁆𑀳𑀁 𑀯𑀺𑀚𑀺𑀢𑀸, 𑀭𑀫𑀲𑁆𑀲𑀼 𑀫𑀸 𑀧𑀩𑁆𑀩𑀚𑀺 [𑀧𑀩𑁆𑀩𑀚𑀲𑁆𑀲𑀼 (𑀲𑀻.), 𑀧𑀩𑁆𑀩𑀚 (𑀧𑀻.)] 𑀤𑁂𑀯’’.

𑁨𑁧𑁭. ‘‘𑀓𑁄𑀲𑁄 𑀘 𑀫𑀬𑁆𑀳𑀁 𑀯𑀺𑀧𑀼𑀮𑁄, 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀫𑀬𑁆𑀳𑀁 𑀧𑀭𑀺𑀧𑀽𑀭𑀁;

𑀧𑀣𑀯𑀻 𑀘 𑀫𑀬𑁆𑀳𑀁 𑀯𑀺𑀚𑀺𑀢𑀸, 𑀢𑀁 𑀳𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀺’’.

𑁨𑁧𑁮. ‘‘𑀫𑀬𑁆𑀳𑀫𑁆𑀧𑀺 𑀥𑀦𑀁 𑀧𑀳𑀽𑀢𑀁, 𑀲𑀗𑁆𑀔𑀸𑀢𑀼𑀁 [𑀲𑀗𑁆𑀔𑁆𑀬𑀸𑀢𑀼𑀁 (𑀲𑀻.)] 𑀦𑁄𑀧𑀺 𑀤𑁂𑀯 𑀲𑀓𑁆𑀓𑁄𑀫𑀺;

𑀢𑀁 𑀢𑁂 𑀤𑀤𑀸𑀫𑀺 𑀲𑀩𑁆𑀩𑀫𑁆𑀧𑀺 [𑀢𑀁 𑀤𑁂𑀯 𑀢𑁂 𑀤𑀤𑀸𑀫𑀺 𑀲𑀩𑁆𑀩𑀫𑁆𑀧𑀺 (𑀲𑀻.), 𑀢𑀁 𑀢𑁂 𑀤𑀤𑀸𑀫𑀺 𑀲𑀩𑁆𑀩𑀁 (𑀧𑀻.)], 𑀭𑀫𑀲𑁆𑀲𑀼 𑀫𑀸 𑀧𑀩𑁆𑀩𑀚𑀺 𑀤𑁂𑀯’’.

𑁨𑁧𑁯. ‘‘𑀚𑀸𑀦𑀸𑀫𑀺 [𑀚𑀸𑀦𑀸𑀫𑀺 𑀢𑁂 (𑀲𑀻. 𑀲𑁆𑀬𑀸.)] 𑀥𑀦𑀁 𑀧𑀳𑀽𑀢𑀁, 𑀓𑀼𑀮𑀯𑀤𑁆𑀥𑀦 𑀧𑀽𑀚𑀺𑀢𑁄 𑀢𑀬𑀸 𑀘𑀲𑁆𑀫𑀺;

𑀲𑀕𑁆𑀕𑀜𑁆𑀘 𑀧𑀢𑁆𑀣𑀬𑀸𑀦𑁄, 𑀢𑁂𑀦 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺’’.

𑁨𑁨𑁦. ‘‘𑀉𑀓𑁆𑀓𑀡𑁆𑀞𑀺𑀢𑁄𑀲𑁆𑀫𑀺 𑀩𑀸𑀴𑁆𑀳𑀁, 𑀅𑀭𑀢𑀺 𑀫𑀁 𑀲𑁄𑀫𑀤𑀢𑁆𑀢 𑀆𑀯𑀺𑀲𑀢𑀺 [𑀆𑀯𑀻𑀲𑀢𑀺 (𑀓.)];

𑀩𑀳𑀼𑀓𑀸𑀧𑀺 [𑀩𑀳𑀼𑀓𑀸 𑀳𑀺 (𑀲𑀻. 𑀲𑁆𑀬𑀸.)] 𑀫𑁂 𑀅𑀦𑁆𑀢𑀭𑀸𑀬𑀸, 𑀅𑀚𑁆𑀚𑁂𑀯𑀸𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺’’.

𑁨𑁨𑁧. ‘‘𑀇𑀤𑀜𑁆𑀘 𑀢𑀼𑀬𑁆𑀳𑀁 𑀭𑀼𑀘𑀺𑀢𑀁, 𑀲𑀼𑀢𑀲𑁄𑀫 𑀅𑀚𑁆𑀚𑁂𑀯 𑀤𑀸𑀦𑀺 𑀢𑁆𑀯𑀁 𑀧𑀩𑁆𑀩𑀚;

𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀦 𑀉𑀲𑁆𑀲𑀳𑁂 𑀢𑀬𑀸 𑀯𑀺𑀦𑀸 𑀅𑀳𑀁 𑀞𑀸𑀢𑀼𑀁’’.

𑁨𑁨𑁨. ‘‘𑀦 𑀳𑀺 𑀲𑀓𑁆𑀓𑀸 𑀧𑀩𑁆𑀩𑀚𑀺𑀢𑀼𑀁, 𑀦𑀕𑀭𑁂 𑀦 𑀳𑀺 𑀧𑀘𑁆𑀘𑀢𑀺 𑀚𑀦𑀧𑀤𑁂 𑀘’’;

‘‘𑀲𑀼𑀢𑀲𑁄𑀫𑁂 𑀧𑀩𑁆𑀩𑀚𑀺𑀢𑁂, 𑀓𑀣𑀁 𑀦𑀼 𑀤𑀸𑀦𑀺 𑀓𑀭𑀺𑀲𑁆𑀲𑀸𑀫’’.

𑁨𑁨𑁩. ‘‘𑀉𑀧𑀦𑀻𑀬𑀢𑀺𑀤𑀁 𑀫𑀜𑁆𑀜𑁂, 𑀧𑀭𑀺𑀢𑁆𑀢𑀁 𑀉𑀤𑀓𑀁𑀯 𑀘𑀗𑁆𑀓𑀯𑀸𑀭𑀫𑁆𑀳𑀺;

𑀏𑀯𑀁 𑀲𑀼𑀧𑀭𑀺𑀢𑁆𑀢𑀓𑁂 𑀚𑀻𑀯𑀺𑀢𑁂, 𑀦 𑀘 𑀧𑀫𑀚𑁆𑀚𑀺𑀢𑀼𑀁 𑀓𑀸𑀮𑁄.

𑁨𑁨𑁪. ‘‘𑀉𑀧𑀦𑀻𑀬𑀢𑀺𑀤𑀁 𑀫𑀜𑁆𑀜𑁂, 𑀧𑀭𑀺𑀢𑁆𑀢𑀁 𑀉𑀤𑀓𑀁𑀯 𑀘𑀗𑁆𑀓𑀯𑀸𑀭𑀫𑁆𑀳𑀺;

𑀏𑀯𑀁 𑀲𑀼𑀧𑀭𑀺𑀢𑁆𑀢𑀓𑁂 𑀚𑀻𑀯𑀺𑀢𑁂, 𑀅𑀦𑁆𑀥𑀩𑀸𑀮𑀸 [𑀅𑀣 𑀩𑀸𑀮𑀸 (𑀲𑀻. 𑀲𑁆𑀬𑀸. 𑀧𑀻.)] 𑀧𑀫𑀚𑁆𑀚𑀦𑁆𑀢𑀺.

𑁨𑁨𑁫. ‘‘𑀢𑁂 𑀯𑀟𑁆𑀠𑀬𑀦𑁆𑀢𑀺 𑀦𑀺𑀭𑀬𑀁, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀜𑁆𑀘 𑀧𑁂𑀢𑁆𑀢𑀺𑀯𑀺𑀲𑀬𑀜𑁆𑀘;

𑀢𑀡𑁆𑀳𑀸𑀬 𑀩𑀦𑁆𑀥𑀦𑀩𑀤𑁆𑀥𑀸, 𑀯𑀟𑁆𑀠𑁂𑀦𑁆𑀢𑀺 𑀅𑀲𑀼𑀭𑀓𑀸𑀬𑀁’’.

𑁨𑁨𑁬. ‘‘𑀊𑀳𑀜𑁆𑀜𑀢𑁂 𑀭𑀚𑀕𑁆𑀕𑀁, 𑀅𑀯𑀺𑀤𑀽𑀭𑁂 𑀧𑀼𑀩𑁆𑀩𑀓𑀫𑁆𑀳𑀺 𑀘 [𑀧𑀼𑀧𑁆𑀨𑀓𑀫𑁆𑀳𑀺 𑀘 (𑀲𑀻. 𑀧𑀻.)] 𑀧𑀸𑀲𑀸𑀤𑁂;

𑀫𑀜𑁆𑀜𑁂 𑀦𑁄 𑀓𑁂𑀲𑀸 𑀙𑀺𑀦𑁆𑀦𑀸, 𑀬𑀲𑀲𑁆𑀲𑀺𑀦𑁄 𑀥𑀫𑁆𑀫𑀭𑀸𑀚𑀲𑁆𑀲’’.

𑁨𑁨𑁭. ‘‘𑀅𑀬𑀫𑀲𑁆𑀲 𑀧𑀸𑀲𑀸𑀤𑁄, 𑀲𑁄𑀯𑀡𑁆𑀡 [𑀲𑁄𑀯𑀡𑁆𑀡𑁄 (𑀧𑀻.)] 𑀧𑀼𑀧𑁆𑀨𑀫𑀸𑀮𑁆𑀬𑀯𑀻𑀢𑀺𑀓𑀺𑀡𑁆𑀡𑁄;

𑀬𑀳𑀺 [𑀬𑀫𑁆𑀳𑀺 (𑀧𑀻.)] 𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.

𑁨𑁨𑁮. ‘‘𑀅𑀬𑀫𑀲𑁆𑀲 𑀧𑀸𑀲𑀸𑀤𑁄, 𑀲𑁄𑀯𑀡𑁆𑀡𑀧𑀼𑀧𑁆𑀨𑀫𑀸𑀮𑁆𑀬𑀯𑀻𑀢𑀺𑀓𑀺𑀡𑁆𑀡𑁄;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦.

𑁨𑁨𑁯. ‘‘𑀇𑀤𑀫𑀲𑁆𑀲 𑀓𑀽𑀝𑀸𑀕𑀸𑀭𑀁, 𑀲𑁄𑀯𑀡𑁆𑀡𑀧𑀼𑀧𑁆𑀨𑀫𑀸𑀮𑁆𑀬𑀯𑀻𑀢𑀺𑀓𑀺𑀡𑁆𑀡𑀁;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.

𑁨𑁩𑁦. ‘‘𑀇𑀤𑀫𑀲𑁆𑀲 𑀓𑀽𑀝𑀸𑀕𑀸𑀭𑀁, 𑀲𑁄𑀯𑀡𑁆𑀡 [𑀲𑁄𑀯𑀡𑁆𑀡𑀁 (𑀧𑀻.)] 𑀧𑀼𑀧𑁆𑀨𑀫𑀸𑀮𑁆𑀬𑀯𑀻𑀢𑀺𑀓𑀺𑀡𑁆𑀡𑀁;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦.

𑁨𑁩𑁧. ‘‘𑀅𑀬𑀫𑀲𑁆𑀲 𑀅𑀲𑁄𑀓𑀯𑀦𑀺𑀓𑀸, 𑀲𑀼𑀧𑀼𑀧𑁆𑀨𑀺𑀢𑀸 𑀲𑀩𑁆𑀩𑀓𑀸𑀮𑀺𑀓𑀸 𑀭𑀫𑁆𑀫𑀸;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.

𑁨𑁩𑁨. ‘‘𑀅𑀬𑀫𑀲𑁆𑀲 𑀅𑀲𑁄𑀓𑀯𑀦𑀺𑀓𑀸, 𑀲𑀼𑀧𑀼𑀧𑁆𑀨𑀺𑀢𑀸 𑀲𑀩𑁆𑀩𑀓𑀸𑀮𑀺𑀓𑀸 𑀭𑀫𑁆𑀫𑀸;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦.

𑁨𑁩𑁩. ‘‘𑀇𑀤𑀫𑀲𑁆𑀲 𑀉𑀬𑁆𑀬𑀸𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.

𑁨𑁩𑁪. ‘‘𑀇𑀤𑀫𑀲𑁆𑀲 𑀉𑀬𑁆𑀬𑀸𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦.

𑁨𑁩𑁫. ‘‘𑀇𑀤𑀫𑀲𑁆𑀲 𑀓𑀡𑀺𑀓𑀸𑀭𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.

𑁨𑁩𑁬. ‘‘𑀇𑀤𑀫𑀲𑁆𑀲 𑀓𑀡𑀺𑀓𑀸𑀭𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦.

𑁨𑁩𑁭. ‘‘𑀇𑀤𑀫𑀲𑁆𑀲 𑀧𑀸𑀝𑀮𑀺𑀯𑀦𑀁 [𑀧𑀸𑀝𑀮𑀻𑀯𑀦𑀁 (𑀲𑀻.)], 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.

𑁨𑁩𑁮. ‘‘𑀇𑀤𑀫𑀲𑁆𑀲 𑀧𑀸𑀝𑀮𑀺𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦.

𑁨𑁩𑁯. ‘‘𑀇𑀤𑀫𑀲𑁆𑀲 𑀅𑀫𑁆𑀩𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.

𑁨𑁪𑁦. ‘‘𑀇𑀤𑀫𑀲𑁆𑀲 𑀅𑀫𑁆𑀩𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦.

𑁨𑁪𑁧. ‘‘𑀅𑀬𑀫𑀲𑁆𑀲 𑀧𑁄𑀓𑁆𑀔𑀭𑀡𑀻, 𑀲𑀜𑁆𑀙𑀦𑁆𑀦𑀸 𑀅𑀡𑁆𑀟𑀚𑁂𑀳𑀺 𑀯𑀻𑀢𑀺𑀓𑀺𑀡𑁆𑀡𑀸;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.

𑁨𑁪𑁨. ‘‘𑀅𑀬𑀫𑀲𑁆𑀲 𑀧𑁄𑀓𑁆𑀔𑀭𑀡𑀻, 𑀲𑀜𑁆𑀙𑀦𑁆𑀦𑀸 𑀅𑀡𑁆𑀟𑀚𑁂𑀳𑀺 𑀯𑀻𑀢𑀺𑀓𑀺𑀡𑁆𑀡𑀸;

𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦’’.

𑁨𑁪𑁩. ‘‘𑀭𑀸𑀚𑀸 𑀯𑁄 𑀔𑁄 [𑀭𑀸𑀚𑀸 𑀔𑁄 (𑀲𑀻. 𑀲𑁆𑀬𑀸. 𑀧𑀻.)] 𑀧𑀩𑁆𑀩𑀚𑀺𑀢𑁄, 𑀲𑀼𑀢𑀲𑁄𑀫𑁄 𑀭𑀚𑁆𑀚𑀁 𑀇𑀫𑀁 𑀧𑀳𑀢𑁆𑀯𑀸𑀦 [𑀧𑀳𑀦𑁆𑀢𑁆𑀯𑀸𑀦 (𑀲𑁆𑀬𑀸. 𑀓.)];

𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑁄, 𑀦𑀸𑀕𑁄𑀯 𑀏𑀓𑀓𑁄 [𑀏𑀓𑀓𑁄𑀯 (𑀲𑀻.)] 𑀘𑀭𑀢𑀺’’.

𑁨𑁪𑁪. ‘‘𑀫𑀸𑀲𑁆𑀲𑀼 𑀧𑀼𑀩𑁆𑀩𑁂 𑀭𑀢𑀺𑀓𑀻𑀴𑀺𑀢𑀸𑀦𑀺, 𑀳𑀲𑀺𑀢𑀸𑀦𑀺 𑀘 𑀅𑀦𑀼𑀲𑁆𑀲𑀭𑀺𑀢𑁆𑀣 [𑀅𑀦𑀼𑀲𑁆𑀲𑀭𑀺𑀢𑁆𑀣𑁄 (𑀧𑀻.)];

𑀫𑀸 𑀯𑁄 𑀓𑀸𑀫𑀸 𑀳𑀦𑀺𑀁𑀲𑀼, 𑀭𑀫𑁆𑀫𑀁 𑀳𑀺 [𑀲𑀼𑀭𑀫𑁆𑀫𑀜𑁆𑀳𑀺 (𑀲𑁆𑀬𑀸. 𑀓.)] 𑀲𑀼𑀤𑀲𑁆𑀲𑀦𑀁 [𑀲𑀼𑀤𑀲𑁆𑀲𑀦𑀁 𑀦𑀸𑀫 (𑀲𑀻.)] 𑀦𑀕𑀭𑀁.

𑁨𑁪𑁫. ‘‘𑀫𑁂𑀢𑁆𑀢𑀘𑀺𑀢𑁆𑀢𑀜𑁆𑀘 [𑀫𑁂𑀢𑁆𑀢𑀜𑁆𑀘 (𑀧𑀻.)] 𑀪𑀸𑀯𑁂𑀣, 𑀅𑀧𑁆𑀧𑀫𑀸𑀡𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘;

𑀅𑀕𑀘𑁆𑀙𑀺𑀢𑁆𑀣 [𑀅𑀣 𑀕𑀜𑁆𑀙𑀺𑀢𑁆𑀣 (𑀲𑀻. 𑀲𑁆𑀬𑀸. 𑀧𑀻.)] 𑀤𑁂𑀯𑀧𑀼𑀭, 𑀆𑀯𑀸𑀲𑀁 𑀧𑀼𑀜𑁆𑀜𑀓𑀫𑁆𑀫𑀺𑀦’’𑀦𑁆𑀢𑀺 [𑀧𑀼𑀜𑁆𑀜𑀓𑀫𑁆𑀫𑀸𑀦𑀦𑁆𑀢𑀺 (𑀧𑀻.)].

𑀘𑀽𑀴𑀲𑀼𑀢𑀲𑁄𑀫𑀚𑀸𑀢𑀓𑀁 𑀧𑀜𑁆𑀘𑀫𑀁.

𑀘𑀢𑁆𑀢𑀸𑀮𑀻𑀲𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.