𑁪𑁭𑁬. 𑀚𑀯𑀦𑀳𑀁𑀲𑀚𑀸𑀢𑀓𑀁 (𑁩)

𑁨𑁭. 𑀇𑀥𑁂𑀯 𑀳𑀁𑀲 𑀦𑀺𑀧𑀢, 𑀧𑀺𑀬𑀁 𑀫𑁂 𑀢𑀯 𑀤𑀲𑁆𑀲𑀦𑀁;

𑀇𑀲𑁆𑀲𑀭𑁄𑀲𑀺 𑀅𑀦𑀼𑀧𑁆𑀧𑀢𑁆𑀢𑁄, 𑀬𑀫𑀺𑀥𑀢𑁆𑀣𑀺 𑀧𑀯𑁂𑀤𑀬.

𑁨𑁮. 𑀲𑀯𑀦𑁂𑀦 𑀏𑀓𑀲𑁆𑀲 𑀧𑀺𑀬𑀸 𑀪𑀯𑀦𑁆𑀢𑀺, 𑀤𑀺𑀲𑁆𑀯𑀸 𑀧𑀦𑁂𑀓𑀲𑁆𑀲 𑀯𑀺𑀬𑁂𑀢𑀺 [𑀯𑀺𑀦𑁂𑀢𑀺 (𑀲𑁆𑀬𑀸.), 𑀯𑀺𑀳𑁂𑀢𑀺 (𑀧𑀻.), 𑀯𑀺𑀕𑁂𑀢𑀺 (𑀓. 𑀅𑀝𑁆𑀞.)] 𑀙𑀦𑁆𑀤𑁄;

𑀤𑀺𑀲𑁆𑀯𑀸 𑀘 𑀲𑀼𑀢𑁆𑀯𑀸 𑀘 𑀧𑀺𑀬𑀸 𑀪𑀯𑀦𑁆𑀢𑀺, 𑀓𑀘𑁆𑀘𑀺𑀦𑁆𑀦𑀼 𑀫𑁂 𑀧𑀻𑀬𑀲𑀺 [𑀧𑀺𑀬𑁆𑀬𑀲𑀺 (𑀲𑀻. 𑀧𑀻.)] 𑀤𑀲𑁆𑀲𑀦𑁂𑀦.

𑁨𑁯. 𑀲𑀯𑀦𑁂𑀦 𑀧𑀺𑀬𑁄 𑀫𑁂𑀲𑀺, 𑀪𑀺𑀬𑁆𑀬𑁄 𑀘𑀸𑀕𑀫𑁆𑀫 𑀤𑀲𑁆𑀲𑀦𑀁;

𑀏𑀯𑀁 𑀧𑀺𑀬𑀤𑀲𑁆𑀲𑀦𑁄 𑀫𑁂 [𑀏𑀯𑀁 𑀧𑀺𑀬𑀤𑀲𑁆𑀲𑀦𑁄 𑀲𑀫𑀸𑀦𑁄 (𑀲𑀻. 𑀲𑁆𑀬𑀸. 𑀧𑀻.)], 𑀯𑀲 𑀳𑀁𑀲 𑀫𑀫𑀦𑁆𑀢𑀺𑀓𑁂 [𑀫𑀫 𑀲𑀦𑁆𑀢𑀺𑀓𑁂 (𑀲𑀻. 𑀲𑁆𑀬𑀸. 𑀧𑀻.)].

𑁩𑁦. 𑀯𑀲𑁂𑀬𑁆𑀬𑀸𑀫 𑀢𑀯𑀸𑀕𑀸𑀭𑁂, 𑀦𑀺𑀘𑁆𑀘𑀁 𑀲𑀓𑁆𑀓𑀢𑀧𑀽𑀚𑀺𑀢𑀸;

𑀫𑀢𑁆𑀢𑁄 𑀘 𑀏𑀓𑀤𑀸 𑀯𑀚𑁆𑀚𑁂 [𑀯𑀚𑁆𑀚𑀸 (𑀲𑀻. 𑀧𑀻.)], ‘‘𑀳𑀁𑀲𑀭𑀸𑀚𑀁 𑀧𑀘𑀦𑁆𑀢𑀼 𑀫𑁂’’.

𑁩𑁧. 𑀥𑀺𑀭𑀢𑁆𑀣𑀼 𑀢𑀁 𑀫𑀚𑁆𑀚𑀧𑀸𑀦𑀁, 𑀬𑀁 𑀫𑁂 𑀧𑀺𑀬𑀢𑀭𑀁 𑀢𑀬𑀸;

𑀦 𑀘𑀸𑀧𑀺 𑀫𑀚𑁆𑀚𑀁 𑀧𑀺𑀲𑁆𑀲𑀸𑀫𑀺 [𑀧𑀺𑀯𑀺𑀲𑁆𑀲𑀸𑀫𑀺 (𑀲𑁆𑀬𑀸.), 𑀧𑀸𑀬𑀸𑀫𑀺 (𑀲𑀻. 𑀧𑀻.)], 𑀬𑀸𑀯 𑀫𑁂 𑀯𑀘𑁆𑀙𑀲𑀻 𑀖𑀭𑁂.

𑁩𑁨. 𑀲𑀼𑀯𑀺𑀚𑀸𑀦𑀁 𑀲𑀺𑀗𑁆𑀕𑀸𑀮𑀸𑀦𑀁, 𑀲𑀓𑀼𑀡𑀸𑀦𑀜𑁆𑀘 [𑀲𑀓𑀼𑀦𑁆𑀢𑀸𑀦𑀜𑁆𑀘 (𑀲𑀻. 𑀲𑁆𑀬𑀸. 𑀧𑀻.)] 𑀯𑀲𑁆𑀲𑀺𑀢𑀁;

𑀫𑀦𑀼𑀲𑁆𑀲𑀯𑀲𑁆𑀲𑀺𑀢𑀁 𑀭𑀸𑀚, 𑀤𑀼𑀩𑁆𑀩𑀺𑀚𑀸𑀦𑀢𑀭𑀁 𑀢𑀢𑁄.

𑁩𑁩. 𑀅𑀧𑀺 𑀘𑁂 𑀫𑀜𑁆𑀜𑀢𑀻 𑀧𑁄𑀲𑁄, 𑀜𑀸𑀢𑀺 𑀫𑀺𑀢𑁆𑀢𑁄 𑀲𑀔𑀸𑀢𑀺 𑀯𑀸;

𑀬𑁄 𑀧𑀼𑀩𑁆𑀩𑁂 𑀲𑀼𑀫𑀦𑁄 𑀳𑀼𑀢𑁆𑀯𑀸, 𑀧𑀘𑁆𑀙𑀸 𑀲𑀫𑁆𑀧𑀚𑁆𑀚𑀢𑁂 𑀤𑀺𑀲𑁄.

𑁩𑁪. 𑀬𑀲𑁆𑀫𑀺𑀁 𑀫𑀦𑁄 𑀦𑀺𑀯𑀺𑀲𑀢𑀺, 𑀅𑀯𑀺𑀤𑀽𑀭𑁂 𑀲𑀳𑀸𑀧𑀺 𑀲𑁄;

𑀲𑀦𑁆𑀢𑀺𑀓𑁂𑀧𑀺 𑀳𑀺 𑀲𑁄 𑀤𑀽𑀭𑁂, 𑀬𑀲𑁆𑀫𑀺𑀁 𑀦𑀸𑀯𑀺𑀲𑀢𑁂 [𑀬𑀲𑁆𑀫𑀸 𑀯𑀺𑀯𑀲𑀢𑁂 (𑀲𑀻. 𑀲𑁆𑀬𑀸. 𑀧𑀻.)] 𑀫𑀦𑁄.

𑁩𑁫. 𑀅𑀦𑁆𑀢𑁄𑀧𑀺 𑀲𑁄 𑀳𑁄𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀧𑀲𑀦𑁆𑀦𑀘𑀺𑀢𑁆𑀢𑁄;

𑀅𑀦𑁆𑀢𑁄𑀧𑀺 𑀲𑁄 𑀳𑁄𑀢𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑁄, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀧𑀤𑀼𑀝𑁆𑀞𑀘𑀺𑀢𑁆𑀢𑁄.

𑁩𑁬. 𑀲𑀁𑀯𑀲𑀦𑁆𑀢𑀸 𑀯𑀺𑀯𑀲𑀦𑁆𑀢𑀺, 𑀬𑁂 𑀤𑀺𑀲𑀸 𑀢𑁂 𑀭𑀣𑁂𑀲𑀪;

𑀆𑀭𑀸 𑀲𑀦𑁆𑀢𑁄 𑀲𑀁𑀯𑀲𑀦𑁆𑀢𑀺, 𑀫𑀦𑀲𑀸 𑀭𑀝𑁆𑀞𑀯𑀟𑁆𑀠𑀦.

𑁩𑁭. 𑀅𑀢𑀺𑀘𑀺𑀭𑀁 𑀦𑀺𑀯𑀸𑀲𑁂𑀦, 𑀧𑀺𑀬𑁄 𑀪𑀯𑀢𑀺 𑀅𑀧𑁆𑀧𑀺𑀬𑁄;

𑀆𑀫𑀦𑁆𑀢 𑀔𑁄 𑀢𑀁 𑀕𑀘𑁆𑀙𑀸𑀫 [𑀕𑀘𑁆𑀙𑀸𑀫𑀺 (𑀲𑁆𑀬𑀸.)], 𑀧𑀼𑀭𑀸 𑀢𑁂 𑀳𑁄𑀫 𑀅𑀧𑁆𑀧𑀺𑀬𑀸 [𑀳𑁄𑀫𑀺 𑀅𑀧𑁆𑀧𑀺𑀬𑁄 (𑀲𑁆𑀬𑀸.)].

𑁩𑁮. 𑀏𑀯𑀁 𑀘𑁂 𑀬𑀸𑀘𑀫𑀸𑀦𑀸𑀦𑀁, 𑀅𑀜𑁆𑀚𑀮𑀺𑀁 𑀦𑀸𑀯𑀩𑀼𑀚𑁆𑀛𑀲𑀺;

𑀧𑀭𑀺𑀘𑀸𑀭𑀓𑀸𑀦𑀁 𑀲𑀢𑀁 [𑀲𑀦𑁆𑀢𑀸𑀦𑀁 (𑀲𑀻. 𑀲𑁆𑀬𑀸.), 𑀲𑀢𑁆𑀢𑀸𑀦𑀁 (𑀧𑀻.)], 𑀯𑀘𑀦𑀁 𑀦 𑀓𑀭𑁄𑀲𑀺 𑀦𑁄;

𑀏𑀯𑀁 𑀢𑀁 𑀅𑀪𑀺𑀬𑀸𑀘𑀸𑀫, 𑀧𑀼𑀦 𑀓𑀬𑀺𑀭𑀸𑀲𑀺 𑀧𑀭𑀺𑀬𑀸𑀬𑀁.

𑁩𑁯. 𑀏𑀯𑀁 𑀘𑁂 𑀦𑁄 𑀯𑀺𑀳𑀭𑀢𑀁, 𑀅𑀦𑁆𑀢𑀭𑀸𑀬𑁄 𑀦 𑀳𑁂𑀲𑁆𑀲𑀢𑀺;

𑀢𑀼𑀬𑁆𑀳𑀜𑁆𑀘𑀸𑀧𑀺 [𑀯𑀸𑀧𑀺 (𑀲𑁆𑀬𑀸. 𑀧𑀻. 𑀓.)] 𑀫𑀳𑀸𑀭𑀸𑀚, 𑀫𑀬𑁆𑀳𑀜𑁆𑀘 [𑀯𑀸 (𑀩𑀳𑀽𑀲𑀼)] 𑀭𑀝𑁆𑀞𑀯𑀟𑁆𑀠𑀦;

𑀅𑀧𑁆𑀧𑁂𑀯 𑀦𑀸𑀫 𑀧𑀲𑁆𑀲𑁂𑀫𑀼 [𑀧𑀲𑁆𑀲𑁂𑀫 (𑀲𑀻. 𑀲𑁆𑀬𑀸. 𑀧𑀻.)], 𑀅𑀳𑁄𑀭𑀢𑀸𑀦𑀫𑀘𑁆𑀘𑀬𑁂𑀢𑀺.

𑀚𑀯𑀦𑀳𑀁𑀲𑀚𑀸𑀢𑀓𑀁 𑀢𑀢𑀺𑀬𑀁.