𑁪𑁪𑁬. 𑀢𑀓𑁆𑀓𑀮𑀚𑀸𑀢𑀓𑀁 (𑁮)

𑁮𑁨. 𑀦 𑀢𑀓𑁆𑀓𑀮𑀸 𑀲𑀦𑁆𑀢𑀺 𑀦 𑀆𑀮𑀼𑀯𑀸𑀦𑀺 [𑀆𑀮𑀼𑀧𑀸𑀦𑀺 (𑀲𑀻. 𑀲𑁆𑀬𑀸. 𑀧𑀻.)], 𑀦 𑀩𑀺𑀴𑀸𑀮𑀺𑀬𑁄 𑀦 𑀓𑀴𑀫𑁆𑀩𑀸𑀦𑀺 𑀢𑀸𑀢;

𑀏𑀓𑁄 𑀅𑀭𑀜𑁆𑀜𑀫𑁆𑀳𑀺 𑀲𑀼𑀲𑀸𑀦𑀫𑀚𑁆𑀛𑁂, 𑀓𑀺𑀫𑀢𑁆𑀣𑀺𑀓𑁄 𑀢𑀸𑀢 𑀔𑀡𑀸𑀲𑀺 𑀓𑀸𑀲𑀼𑀁.

𑁮𑁩. 𑀧𑀺𑀢𑀸𑀫𑀳𑁄 𑀢𑀸𑀢 𑀲𑀼𑀤𑀼𑀩𑁆𑀩𑀮𑁄 𑀢𑁂, 𑀅𑀦𑁂𑀓𑀩𑁆𑀬𑀸𑀥𑀻𑀳𑀺 𑀤𑀼𑀔𑁂𑀦 𑀨𑀼𑀝𑁆𑀞𑁄;

𑀢𑀫𑀚𑁆𑀚𑀳𑀁 𑀦𑀺𑀔𑀡𑀺𑀲𑁆𑀲𑀸𑀫𑀺 𑀲𑁄𑀩𑁆𑀪𑁂, 𑀦 𑀳𑀺𑀲𑁆𑀲 𑀢𑀁 𑀚𑀻𑀯𑀺𑀢𑀁 𑀭𑁄𑀘𑀬𑀸𑀫𑀺.

𑁮𑁪. 𑀲𑀗𑁆𑀓𑀧𑁆𑀧𑀫𑁂𑀢𑀁 𑀧𑀝𑀺𑀮𑀤𑁆𑀥 𑀧𑀸𑀧𑀓𑀁, 𑀅𑀘𑁆𑀘𑀸𑀳𑀺𑀢𑀁 𑀓𑀫𑁆𑀫 𑀓𑀭𑁄𑀲𑀺 𑀮𑀼𑀤𑁆𑀤𑀁;

𑀫𑀬𑀸𑀧𑀺 𑀢𑀸𑀢 𑀧𑀝𑀺𑀮𑀘𑁆𑀙𑀲𑁂 𑀢𑀼𑀯𑀁, 𑀏𑀢𑀸𑀤𑀺𑀲𑀁 𑀓𑀫𑁆𑀫 𑀚𑀭𑀽𑀧𑀦𑀻𑀢𑁄;

𑀢𑀁 𑀓𑀼𑀮𑁆𑀮𑀯𑀢𑁆𑀢𑀁 𑀅𑀦𑀼𑀯𑀢𑁆𑀢𑀫𑀸𑀦𑁄, 𑀅𑀳𑀫𑁆𑀧𑀺 𑀢𑀁 𑀦𑀺𑀔𑀡𑀺𑀲𑁆𑀲𑀸𑀫𑀺 𑀲𑁄𑀩𑁆𑀪𑁂.

𑁮𑁫. 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀧𑀓𑀼𑀩𑁆𑀩𑀫𑀸𑀦𑁄, 𑀆𑀲𑀚𑁆𑀚 𑀫𑀁 𑀢𑁆𑀯𑀁 𑀯𑀤𑀲𑁂 𑀓𑀼𑀫𑀸𑀭;

𑀧𑀼𑀢𑁆𑀢𑁄 𑀫𑀫𑀁 𑀑𑀭𑀲𑀓𑁄 𑀲𑀫𑀸𑀦𑁄, 𑀅𑀳𑀺𑀢𑀸𑀦𑀼𑀓𑀫𑁆𑀧𑀻 𑀫𑀫 𑀢𑁆𑀯𑀁𑀲𑀺 𑀧𑀼𑀢𑁆𑀢.

𑁮𑁬. 𑀦 𑀢𑀸𑀳𑀁 [𑀢𑁆𑀬𑀸𑀳𑀁 (𑀲𑁆𑀬𑀸.)] 𑀢𑀸𑀢 𑀅𑀳𑀺𑀢𑀸𑀦𑀼𑀓𑀫𑁆𑀧𑀻, 𑀳𑀺𑀢𑀸𑀦𑀼𑀓𑀫𑁆𑀧𑀻 𑀢𑁂 𑀅𑀳𑀫𑁆𑀧𑀺 [𑀅𑀳𑀜𑁆𑀳𑀺 (𑀲𑁆𑀬𑀸.)] 𑀢𑀸𑀢;

𑀧𑀸𑀧𑀜𑁆𑀘 𑀢𑀁 𑀓𑀫𑁆𑀫 𑀧𑀓𑀼𑀩𑁆𑀩𑀫𑀸𑀦𑀁, 𑀅𑀭𑀳𑀸𑀫𑀺 𑀦𑁄 𑀯𑀸𑀭𑀬𑀺𑀢𑀼𑀁 𑀢𑀢𑁄.

𑁮𑁭. 𑀬𑁄 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀲𑀯𑀺𑀝𑁆𑀞 [𑀫𑀸𑀢𑀭𑀁 𑀧𑀺𑀢𑀭𑀁 𑀯𑀸 𑀯𑀲𑀺𑀝𑁆𑀞 (𑀲𑀻. 𑀧𑀻.)], 𑀅𑀤𑀽𑀲𑀓𑁂 𑀳𑀺𑀁𑀲𑀢𑀺 𑀧𑀸𑀧𑀥𑀫𑁆𑀫𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀅𑀲𑀁𑀲𑀬𑀁 𑀲𑁄 𑀦𑀺𑀭𑀬𑀁 𑀉𑀧𑁂𑀢𑀺 [𑀧𑀭𑁂𑀢𑀺 (𑀲𑀻. 𑀧𑀻.)].

𑁮𑁮. 𑀬𑁄 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀲𑀯𑀺𑀝𑁆𑀞, 𑀅𑀦𑁆𑀦𑁂𑀦 𑀧𑀸𑀦𑁂𑀦 𑀉𑀧𑀝𑁆𑀞𑀳𑀸𑀢𑀺;

𑀓𑀸𑀬𑀲𑁆𑀲 𑀪𑁂𑀤𑀸 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀅𑀲𑀁𑀲𑀬𑀁 𑀲𑁄 𑀲𑀼𑀕𑀢𑀺𑀁 𑀉𑀧𑁂𑀢𑀺.

𑁮𑁯. 𑀦 𑀫𑁂 𑀢𑁆𑀯𑀁 𑀧𑀼𑀢𑁆𑀢 𑀅𑀳𑀺𑀢𑀸𑀦𑀼𑀓𑀫𑁆𑀧𑀻, 𑀳𑀺𑀢𑀸𑀦𑀼𑀓𑀫𑁆𑀧𑀻 𑀫𑁂 [𑀫𑀫 (?)] 𑀢𑁆𑀯𑀁𑀲𑀺 𑀧𑀼𑀢𑁆𑀢;

𑀅𑀳𑀜𑁆𑀘 𑀢𑀁 𑀫𑀸𑀢𑀭𑀸 𑀯𑀼𑀘𑁆𑀘𑀫𑀸𑀦𑁄, 𑀏𑀢𑀸𑀤𑀺𑀲𑀁 𑀓𑀫𑁆𑀫 𑀓𑀭𑁄𑀫𑀺 𑀮𑀼𑀤𑁆𑀤𑀁.

𑁯𑁦. 𑀬𑀸 𑀢𑁂 𑀲𑀸 𑀪𑀭𑀺𑀬𑀸 𑀅𑀦𑀭𑀺𑀬𑀭𑀽𑀧𑀸, 𑀫𑀸𑀢𑀸 𑀫𑀫𑁂𑀲𑀸 𑀲𑀓𑀺𑀬𑀸 𑀚𑀦𑁂𑀢𑁆𑀢𑀺;

𑀦𑀺𑀤𑁆𑀥𑀸𑀧𑀬𑁂 [𑀦𑀺𑀤𑁆𑀥𑀸𑀫𑀲𑁂 (𑀧𑀻.)] 𑀢𑀜𑁆𑀘 𑀲𑀓𑀸 𑀅𑀕𑀸𑀭𑀸, 𑀅𑀜𑁆𑀜𑀫𑁆𑀧𑀺 𑀢𑁂 𑀲𑀸 𑀤𑀼𑀔𑀫𑀸𑀯𑀳𑁂𑀬𑁆𑀬.

𑁯𑁧. 𑀬𑀸 𑀢𑁂 𑀲𑀸 𑀪𑀭𑀺𑀬𑀸 𑀅𑀦𑀭𑀺𑀬𑀭𑀽𑀧𑀸, 𑀫𑀸𑀢𑀸 𑀫𑀫𑁂𑀲𑀸 𑀲𑀓𑀺𑀬𑀸 𑀚𑀦𑁂𑀢𑁆𑀢𑀺;

𑀤𑀦𑁆𑀢𑀸 𑀓𑀭𑁂𑀡𑀽𑀯 𑀯𑀲𑀽𑀧𑀦𑀻𑀢𑀸, 𑀲𑀸 𑀧𑀸𑀧𑀥𑀫𑁆𑀫𑀸 𑀧𑀼𑀦𑀭𑀸𑀯𑀚𑀸𑀢𑀽𑀢𑀺.

𑀢𑀓𑁆𑀓𑀮𑀚𑀸𑀢𑀓𑀁 𑀅𑀝𑁆𑀞𑀫𑀁.