𑁪𑁪𑁪. 𑀓𑀡𑁆𑀳𑀤𑀻𑀧𑀸𑀬𑀦𑀚𑀸𑀢𑀓𑀁 (𑁬)

𑁬𑁨. 𑀲𑀢𑁆𑀢𑀸𑀳𑀫𑁂𑀯𑀸𑀳𑀁 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀧𑀼𑀜𑁆𑀜𑀢𑁆𑀣𑀺𑀓𑁄 𑀆𑀘𑀭𑀺𑀁 [𑀅𑀘𑀭𑀺𑀁 (𑀲𑀻. 𑀲𑁆𑀬𑀸. 𑀧𑀻.)] 𑀩𑁆𑀭𑀳𑁆𑀫𑀘𑀭𑀺𑀬𑀁;

𑀅𑀣𑀸𑀧𑀭𑀁 𑀬𑀁 𑀘𑀭𑀺𑀢𑀁 𑀫𑀫𑁂𑀤𑀁 [𑀫𑀫 𑀬𑀺𑀤𑀁 (𑀲𑁆𑀬𑀸.), 𑀫𑀫𑀸𑀬𑀺𑀤𑀁 (𑀧𑀻.)], 𑀯𑀲𑁆𑀲𑀸𑀦𑀺 𑀧𑀜𑁆𑀜𑀸𑀲 𑀲𑀫𑀸𑀥𑀺𑀓𑀸𑀦𑀺;

𑀅𑀓𑀸𑀫𑀓𑁄 𑀯𑀸𑀧𑀺 [𑀯𑀸𑀳𑀺 (𑀧𑀻. 𑀓.)] 𑀅𑀳𑀁 𑀘𑀭𑀸𑀫𑀺, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼;

𑀳𑀢𑀁 𑀯𑀺𑀲𑀁 𑀚𑀻𑀯𑀢𑀼 𑀬𑀜𑁆𑀜𑀤𑀢𑁆𑀢𑁄.

𑁬𑁩. 𑀬𑀲𑁆𑀫𑀸 𑀤𑀸𑀦𑀁 𑀦𑀸𑀪𑀺𑀦𑀦𑁆𑀤𑀺𑀁 𑀓𑀤𑀸𑀘𑀺, 𑀤𑀺𑀲𑁆𑀯𑀸𑀦𑀳𑀁 𑀅𑀢𑀺𑀣𑀺𑀁 𑀯𑀸𑀲𑀓𑀸𑀮𑁂;

𑀦 𑀘𑀸𑀧𑀺 𑀫𑁂 𑀅𑀧𑁆𑀧𑀺𑀬𑀢𑀁 𑀅𑀯𑁂𑀤𑀼𑀁, 𑀩𑀳𑀼𑀲𑁆𑀲𑀼𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘.

𑀅𑀓𑀸𑀫𑀓𑁄 𑀯𑀸𑀧𑀺 𑀅𑀳𑀁 𑀤𑀤𑀸𑀫𑀺, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼;

𑀳𑀢𑀁 𑀯𑀺𑀲𑀁 𑀚𑀻𑀯𑀢𑀼 𑀬𑀜𑁆𑀜𑀤𑀢𑁆𑀢𑁄.

𑁬𑁪. 𑀆𑀲𑀻𑀯𑀺𑀲𑁄 𑀢𑀸𑀢 𑀧𑀳𑀽𑀢𑀢𑁂𑀚𑁄, 𑀬𑁄 𑀢𑀁 𑀅𑀤𑀁𑀲𑀻 [𑀅𑀟𑀁𑀲𑀻 (𑀲𑁆𑀬𑀸.)] 𑀲𑀘𑀭𑀸 [𑀩𑀺𑀮𑀭𑀸 (𑀲𑀻.), 𑀧𑀺𑀴𑀸𑀭𑀸 (𑀲𑁆𑀬𑀸.), 𑀧𑀢𑀭𑀸 (𑀧𑀻.)] 𑀉𑀤𑀺𑀘𑁆𑀘;

𑀢𑀲𑁆𑀫𑀺𑀜𑁆𑀘 𑀫𑁂 𑀅𑀧𑁆𑀧𑀺𑀬𑀢𑀸𑀬 𑀅𑀚𑁆𑀚, 𑀧𑀺𑀢𑀭𑀺 𑀘 𑀢𑁂 𑀦𑀢𑁆𑀣𑀺 𑀓𑁄𑀘𑀺 𑀯𑀺𑀲𑁂𑀲𑁄;

𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼, 𑀳𑀢𑀁 𑀯𑀺𑀲𑀁 𑀚𑀻𑀯𑀢𑀼 𑀬𑀜𑁆𑀜𑀤𑀢𑁆𑀢𑁄.

𑁬𑁫. 𑀲𑀦𑁆𑀢𑀸 𑀤𑀦𑁆𑀢𑀸𑀬𑁂𑀯 [𑀤𑀦𑁆𑀢𑀸 𑀲𑀦𑁆𑀢𑀸 𑀬𑁂 𑀘 (𑀲𑁆𑀬𑀸. 𑀓.)] 𑀧𑀭𑀺𑀩𑁆𑀩𑀚𑀦𑁆𑀢𑀺, 𑀅𑀜𑁆𑀜𑀢𑁆𑀭 𑀓𑀡𑁆𑀳𑀸 𑀦𑀢𑁆𑀣𑀸𑀓𑀸𑀫𑀭𑀽𑀧𑀸 [𑀅𑀦𑀓𑀸𑀫𑀭𑀽𑀧𑀸 (𑀲𑀻. 𑀲𑁆𑀬𑀸. 𑀧𑀻.)];

𑀤𑀻𑀧𑀸𑀬𑀦 𑀓𑀺𑀲𑁆𑀲 𑀚𑀺𑀕𑀼𑀘𑁆𑀙𑀫𑀸𑀦𑁄, 𑀅𑀓𑀸𑀫𑀓𑁄 𑀘𑀭𑀲𑀺 𑀩𑁆𑀭𑀳𑁆𑀫𑀘𑀭𑀺𑀬𑀁.

𑁬𑁬. 𑀲𑀤𑁆𑀥𑀸𑀬 𑀦𑀺𑀓𑁆𑀔𑀫𑁆𑀫 𑀧𑀼𑀦𑀁 𑀦𑀺𑀯𑀢𑁆𑀢𑁄, 𑀲𑁄 𑀏𑀴𑀫𑀽𑀕𑁄𑀯 𑀩𑀸𑀮𑁄 [𑀏𑀴𑀫𑀽𑀕𑁄 𑀘𑀧𑀮𑁄 (𑀲𑁆𑀬𑀸. 𑀓.)] 𑀯𑀢𑀸𑀬𑀁;

𑀏𑀢𑀲𑁆𑀲 𑀯𑀸𑀤𑀲𑁆𑀲 𑀚𑀺𑀕𑀼𑀘𑁆𑀙𑀫𑀸𑀦𑁄, 𑀅𑀓𑀸𑀫𑀓𑁄 𑀘𑀭𑀸𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁;

𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀜𑁆𑀘 𑀲𑀢𑀜𑁆𑀘 𑀞𑀸𑀦𑀁 [𑀯𑀺𑀜𑁆𑀜𑀽𑀧𑀲𑀢𑁆𑀣𑀁 𑀯𑀲𑀺𑀢𑀁 𑀘 𑀞𑀸𑀦𑀁 (𑀓.)], 𑀏𑀯𑀫𑁆𑀧𑀳𑀁 𑀧𑀼𑀜𑁆𑀜𑀓𑀭𑁄 𑀪𑀯𑀸𑀫𑀺.

𑁬𑁭. 𑀲𑀫𑀡𑁂 𑀢𑀼𑀯𑀁 𑀩𑁆𑀭𑀸𑀳𑁆𑀫𑀡𑁂 𑀅𑀤𑁆𑀥𑀺𑀓𑁂 𑀘, 𑀲𑀦𑁆𑀢𑀧𑁆𑀧𑀬𑀸𑀲𑀺 𑀅𑀦𑁆𑀦𑀧𑀸𑀦𑁂𑀦 𑀪𑀺𑀓𑁆𑀔𑀁;

𑀑𑀧𑀸𑀦𑀪𑀽𑀢𑀁𑀯 𑀖𑀭𑀁 𑀢𑀯 𑀬𑀺𑀤𑀁, 𑀅𑀦𑁆𑀦𑁂𑀦 𑀧𑀸𑀦𑁂𑀦 𑀉𑀧𑁂𑀢𑀭𑀽𑀧𑀁;

𑀅𑀣 𑀓𑀺𑀲𑁆𑀲 𑀯𑀸𑀤𑀲𑁆𑀲 𑀚𑀺𑀕𑀼𑀘𑁆𑀙𑀫𑀸𑀦𑁄, 𑀅𑀓𑀸𑀫𑀓𑁄 𑀤𑀸𑀦𑀫𑀺𑀫𑀁 𑀤𑀤𑀸𑀲𑀺.

𑁬𑁮. 𑀧𑀺𑀢𑀭𑁄 𑀘 𑀫𑁂 𑀆𑀲𑀼𑀁 𑀧𑀺𑀢𑀸𑀫𑀳𑀸 𑀘, 𑀲𑀤𑁆𑀥𑀸 𑀅𑀳𑀼𑀁 𑀤𑀸𑀦𑀧𑀢𑀻 𑀯𑀤𑀜𑁆𑀜𑀽;

𑀢𑀁 𑀓𑀼𑀮𑁆𑀮𑀯𑀢𑁆𑀢𑀁 𑀅𑀦𑀼𑀯𑀢𑁆𑀢𑀫𑀸𑀦𑁄, 𑀫𑀸𑀳𑀁 𑀓𑀼𑀮𑁂 𑀅𑀦𑁆𑀢𑀺𑀫𑀕𑀦𑁆𑀥𑀦𑁄 [𑀕𑀦𑁆𑀥𑀺𑀦𑁄 (𑀲𑁆𑀬𑀸. 𑀧𑀻. 𑀓.), 𑀕𑀦𑁆𑀥𑀺𑀦𑀻 (𑀲𑀻.)] 𑀅𑀳𑀼𑀁;

𑀏𑀢𑀲𑁆𑀲 𑀯𑀸𑀤𑀲𑁆𑀲 𑀚𑀺𑀕𑀼𑀘𑁆𑀙𑀫𑀸𑀦𑁄, 𑀅𑀓𑀸𑀫𑀓𑁄 𑀤𑀸𑀦𑀫𑀺𑀫𑀁 𑀤𑀤𑀸𑀫𑀺.

𑁬𑁯. 𑀤𑀳𑀭𑀺𑀁 𑀓𑀼𑀫𑀸𑀭𑀺𑀁 𑀅𑀲𑀫𑀢𑁆𑀣𑀧𑀜𑁆𑀜𑀁, 𑀬𑀁 𑀢𑀸𑀦𑀬𑀺𑀁 𑀜𑀸𑀢𑀺𑀓𑀼𑀮𑀸 𑀲𑀼𑀕𑀢𑁆𑀢𑁂;

𑀦 𑀘𑀸𑀧𑀺 𑀫𑁂 𑀅𑀧𑁆𑀧𑀺𑀬𑀢𑀁 𑀅𑀯𑁂𑀤𑀺, 𑀅𑀜𑁆𑀜𑀢𑁆𑀭 𑀓𑀸𑀫𑀸 𑀧𑀭𑀺𑀘𑀸𑀭𑀬𑀦𑁆𑀢𑀸 [𑀧𑀭𑀺𑀘𑀸𑀭𑀬𑀦𑁆𑀢𑀻 (𑀲𑀻. 𑀧𑀻.)];

𑀅𑀣 𑀓𑁂𑀦 𑀯𑀡𑁆𑀡𑁂𑀦 𑀫𑀬𑀸 𑀢𑁂 𑀪𑁄𑀢𑀺, 𑀲𑀁𑀯𑀸𑀲𑀥𑀫𑁆𑀫𑁄 𑀅𑀳𑀼 𑀏𑀯𑀭𑀽𑀧𑁄.

𑁭𑁦. 𑀆𑀭𑀸 𑀤𑀽𑀭𑁂 𑀦𑀬𑀺𑀥 𑀓𑀤𑀸𑀘𑀺 𑀅𑀢𑁆𑀣𑀺, 𑀧𑀭𑀫𑁆𑀧𑀭𑀸 𑀦𑀸𑀫 𑀓𑀼𑀮𑁂 𑀇𑀫𑀲𑁆𑀫𑀺𑀁;

𑀢𑀁 𑀓𑀼𑀮𑁆𑀮𑀯𑀢𑁆𑀢𑀁 𑀅𑀦𑀼𑀯𑀢𑁆𑀢𑀫𑀸𑀦𑀸, 𑀫𑀸𑀳𑀁 𑀓𑀼𑀮𑁂 𑀅𑀦𑁆𑀢𑀺𑀫𑀕𑀦𑁆𑀥𑀺𑀦𑀻 𑀅𑀳𑀼𑀁;

𑀏𑀢𑀲𑁆𑀲 𑀯𑀸𑀤𑀲𑁆𑀲 𑀚𑀺𑀕𑀼𑀘𑁆𑀙𑀫𑀸𑀦𑀸, 𑀅𑀓𑀸𑀫𑀺𑀓𑀸 𑀧𑀤𑁆𑀥𑀘𑀭𑀸𑀫𑁆𑀳𑀺 [𑀧𑀝𑁆𑀞𑀘𑀭𑀸𑀫𑁆𑀳𑀺 (𑀲𑁆𑀬𑀸. 𑀓.)] 𑀢𑀼𑀬𑁆𑀳𑀁.

𑁭𑁧. 𑀫𑀡𑁆𑀟𑀩𑁆𑀬 𑀪𑀸𑀲𑀺𑀁 𑀬𑀫𑀪𑀸𑀲𑀦𑁂𑀬𑁆𑀬𑀁 [𑀪𑀸𑀲𑀺𑀲𑁆𑀲𑀁 𑀅𑀪𑀸𑀲𑀦𑁂𑀬𑁆𑀬𑀁 (𑀲𑀻. 𑀲𑁆𑀬𑀸. 𑀧𑀻.), 𑀪𑀸𑀲𑀺𑀲𑁆𑀲’𑀫𑀪𑀸𑀲𑀦𑁂𑀬𑁆𑀬𑀁 (?)], 𑀢𑀁 𑀔𑀫𑁆𑀬𑀢𑀁 𑀧𑀼𑀢𑁆𑀢𑀓𑀳𑁂𑀢𑀼 𑀫𑀚𑁆𑀚;

𑀧𑀼𑀢𑁆𑀢𑀧𑁂𑀫𑀸 𑀦 𑀇𑀥 𑀧𑀭𑀢𑁆𑀣𑀺 𑀓𑀺𑀜𑁆𑀘𑀺, 𑀲𑁄 𑀦𑁄 𑀅𑀬𑀁 𑀚𑀻𑀯𑀢𑀺 𑀬𑀜𑁆𑀜𑀤𑀢𑁆𑀢𑁄𑀢𑀺.

𑀓𑀡𑁆𑀳𑀤𑀻𑀧𑀸𑀬𑀦𑀚𑀸𑀢𑀓𑀁 [𑀫𑀡𑁆𑀟𑀩𑁆𑀬𑀚𑀸𑀢𑀓𑀁 (𑀲𑁆𑀬𑀸. 𑀓.)] 𑀙𑀝𑁆𑀞𑀁.