𑁪𑁪𑁨. 𑀲𑀗𑁆𑀔𑀚𑀸𑀢𑀓𑀁 (𑁪)

𑁩𑁯. 𑀩𑀳𑀼𑀲𑁆𑀲𑀼𑀢𑁄 𑀲𑀼𑀢𑀥𑀫𑁆𑀫𑁄𑀲𑀺 𑀲𑀗𑁆𑀔, 𑀤𑀺𑀝𑁆𑀞𑀸 𑀢𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘;

𑀅𑀣𑀓𑁆𑀔𑀡𑁂 𑀤𑀲𑁆𑀲𑀬𑀲𑁂 𑀯𑀺𑀮𑀸𑀧𑀁, 𑀅𑀜𑁆𑀜𑁄 𑀦𑀼 𑀓𑁄 𑀢𑁂 𑀧𑀝𑀺𑀫𑀦𑁆𑀢𑀓𑁄 𑀫𑀬𑀸.

𑁪𑁦. 𑀲𑀼𑀩𑁆𑀪𑀽 [𑀲𑀼𑀩𑁆𑀪𑀸 (𑀲𑁆𑀬𑀸.), 𑀲𑀼𑀫𑁆𑀪𑀸, 𑀲𑀼𑀪𑁆𑀫𑀸 (𑀓.)] 𑀲𑀼𑀪𑀸 𑀲𑀼𑀧𑁆𑀧𑀝𑀺𑀫𑀼𑀓𑁆𑀓𑀓𑀫𑁆𑀩𑀼, 𑀧𑀕𑁆𑀕𑀬𑁆𑀳 𑀲𑁄𑀯𑀡𑁆𑀡𑀫𑀬𑀸𑀬 𑀧𑀸𑀢𑀺𑀬𑀸;

‘‘𑀪𑀼𑀜𑁆𑀚𑀲𑁆𑀲𑀼 𑀪𑀢𑁆𑀢𑀁’’ 𑀇𑀢𑀺 𑀫𑀁 𑀯𑀤𑁂𑀢𑀺, 𑀲𑀤𑁆𑀥𑀸𑀯𑀺𑀢𑁆𑀢𑀸 [𑀲𑀤𑁆𑀥𑀸𑀘𑀺𑀢𑁆𑀢𑀸 (𑀲𑀻. 𑀧𑀻. 𑀓.)], 𑀢𑀫𑀳𑀁 𑀦𑁄𑀢𑀺 𑀩𑁆𑀭𑀽𑀫𑀺.

𑁪𑁧. 𑀏𑀢𑀸𑀤𑀺𑀲𑀁 𑀩𑁆𑀭𑀸𑀳𑁆𑀫𑀡 𑀤𑀺𑀲𑁆𑀯𑀸𑀦 [𑀤𑀺𑀲𑁆𑀯 (𑀲𑀻. 𑀧𑀻.)] 𑀬𑀓𑁆𑀔𑀁, 𑀧𑀼𑀘𑁆𑀙𑁂𑀬𑁆𑀬 𑀧𑁄𑀲𑁄 𑀲𑀼𑀔𑀫𑀸𑀲𑀺𑀲𑀸𑀦𑁄 [𑀲𑀼𑀔𑀫𑀸𑀲𑀲𑀸𑀦𑁄 (𑀲𑁆𑀬𑀸.), 𑀲𑀼𑀔𑀫𑀸𑀲𑀺𑀲𑀫𑀸𑀦𑁄 (𑀓.)];

𑀉𑀝𑁆𑀞𑁂𑀳𑀺 𑀦𑀁 𑀧𑀜𑁆𑀚𑀮𑀺𑀓𑀸𑀪𑀺𑀧𑀼𑀘𑁆𑀙, 𑀤𑁂𑀯𑀻 𑀦𑀼𑀲𑀺 𑀢𑁆𑀯𑀁 𑀉𑀤 𑀫𑀸𑀦𑀼𑀲𑀻 𑀦𑀼.

𑁪𑁨. 𑀬𑀁 𑀢𑁆𑀯𑀁 𑀲𑀼𑀔𑁂𑀦𑀸𑀪𑀺𑀲𑀫𑁂𑀓𑁆𑀔𑀲𑁂 𑀫𑀁, 𑀪𑀼𑀜𑁆𑀚𑀲𑁆𑀲𑀼 𑀪𑀢𑁆𑀢𑀁 𑀇𑀢𑀺 𑀫𑀁 𑀯𑀤𑁂𑀲𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀦𑀸𑀭𑀺 𑀫𑀳𑀸𑀦𑀼𑀪𑀸𑀯𑁂, 𑀤𑁂𑀯𑀻 𑀦𑀼𑀲𑀺 𑀢𑁆𑀯𑀁 𑀉𑀤 𑀫𑀸𑀦𑀼𑀲𑀻 𑀦𑀼.

𑁪𑁩. 𑀤𑁂𑀯𑀻 𑀅𑀳𑀁 𑀲𑀗𑁆𑀔 𑀫𑀳𑀸𑀦𑀼𑀪𑀸𑀯𑀸, 𑀇𑀥𑀸𑀕𑀢𑀸 𑀲𑀸𑀕𑀭𑀯𑀸𑀭𑀺𑀫𑀚𑁆𑀛𑁂;

𑀅𑀦𑀼𑀓𑀫𑁆𑀧𑀺𑀓𑀸 𑀦𑁄 𑀘 𑀧𑀤𑀼𑀝𑁆𑀞𑀘𑀺𑀢𑁆𑀢𑀸, 𑀢𑀯𑁂𑀯 𑀅𑀢𑁆𑀣𑀸𑀬 𑀇𑀥𑀸𑀕𑀢𑀸𑀲𑁆𑀫𑀺.

𑁪𑁪. 𑀇𑀥𑀦𑁆𑀦𑀧𑀸𑀦𑀁 𑀲𑀬𑀦𑀸𑀲𑀦𑀜𑁆𑀘, 𑀬𑀸𑀦𑀸𑀦𑀺 𑀦𑀸𑀦𑀸𑀯𑀺𑀯𑀺𑀥𑀸𑀦𑀺 𑀲𑀗𑁆𑀔;

𑀲𑀩𑁆𑀩𑀲𑁆𑀲 𑀢𑁆𑀬𑀸𑀳𑀁 𑀧𑀝𑀺𑀧𑀸𑀤𑀬𑀸𑀫𑀺, 𑀬𑀁 𑀓𑀺𑀜𑁆𑀘𑀺 𑀢𑀼𑀬𑁆𑀳𑀁 𑀫𑀦𑀲𑀸𑀪𑀺𑀧𑀢𑁆𑀣𑀺𑀢𑀁.

𑁪𑁫. 𑀬𑀁 𑀓𑀺𑀜𑁆𑀘𑀺 𑀬𑀺𑀝𑁆𑀞𑀜𑁆𑀘 𑀳𑀼𑀢𑀜𑁆𑀘 [𑀬𑀺𑀝𑁆𑀞𑀁𑀯 𑀳𑀼𑀢𑀁𑀯 (𑀲𑀻. 𑀧𑀻.)] 𑀫𑀬𑁆𑀳𑀁, 𑀲𑀩𑁆𑀩𑀲𑁆𑀲 𑀦𑁄 𑀇𑀲𑁆𑀲𑀭𑀸 𑀢𑁆𑀯𑀁 𑀲𑀼𑀕𑀢𑁆𑀢𑁂;

𑀲𑀼𑀲𑁄𑀡𑀺 𑀲𑀼𑀩𑁆𑀪𑀫𑀼 [𑀲𑀼𑀩𑁆𑀪𑀼 (𑀲𑀻.), 𑀲𑀼𑀩𑁆𑀪𑀸 (𑀲𑁆𑀬𑀸.)] 𑀲𑀼𑀯𑀺𑀮𑀕𑁆𑀕𑀫𑀚𑁆𑀛𑁂 [𑀲𑀼𑀯𑀺𑀮𑀸𑀓𑀫𑀚𑁆𑀛𑁂 (𑀲𑁆𑀬𑀸. 𑀧𑀻. 𑀲𑀻. 𑀅𑀝𑁆𑀞.), 𑀲𑀼𑀯𑀺𑀮𑀸𑀢𑀫𑀚𑁆𑀛𑁂 (𑀓.)], 𑀓𑀺𑀲𑁆𑀲 𑀫𑁂 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄.

𑁪𑁬. 𑀖𑀫𑁆𑀫𑁂 𑀧𑀣𑁂 𑀩𑁆𑀭𑀸𑀳𑁆𑀫𑀡 𑀏𑀓𑀪𑀺𑀓𑁆𑀔𑀼𑀁, 𑀉𑀕𑁆𑀖𑀝𑁆𑀝𑀧𑀸𑀤𑀁 𑀢𑀲𑀺𑀢𑀁 𑀓𑀺𑀮𑀦𑁆𑀢𑀁;

𑀧𑀝𑀺𑀧𑀸𑀤𑀬𑀻 𑀲𑀗𑁆𑀔 𑀉𑀧𑀸𑀳𑀦𑀸𑀦𑀺 [𑀉𑀧𑀸𑀳𑀦𑀸𑀳𑀺 (𑀲𑀻. 𑀧𑀻.)], 𑀲𑀸 𑀤𑀓𑁆𑀔𑀺𑀡𑀸 𑀓𑀸𑀫𑀤𑀼𑀳𑀸 𑀢𑀯𑀚𑁆𑀚.

𑁪𑁭. 𑀲𑀸 𑀳𑁄𑀢𑀼 𑀦𑀸𑀯𑀸 𑀨𑀮𑀓𑀽𑀧𑀧𑀦𑁆𑀦𑀸, 𑀅𑀦𑀯𑀲𑁆𑀲𑀼𑀢𑀸 𑀏𑀭𑀓𑀯𑀸𑀢𑀬𑀼𑀢𑁆𑀢𑀸;

𑀅𑀜𑁆𑀜𑀲𑁆𑀲 𑀬𑀸𑀦𑀲𑁆𑀲 𑀦 𑀳𑁂𑀢𑁆𑀣 [𑀦 𑀳𑀢𑁆𑀣𑀺 (𑀧𑀻.)] 𑀪𑀽𑀫𑀺, 𑀅𑀚𑁆𑀚𑁂𑀯 𑀫𑀁 𑀫𑁄𑀴𑀺𑀦𑀺𑀁 𑀧𑀸𑀧𑀬𑀲𑁆𑀲𑀼.

𑁪𑁮. 𑀲𑀸 𑀢𑀢𑁆𑀣 𑀯𑀺𑀢𑁆𑀢𑀸 𑀲𑀼𑀫𑀦𑀸 𑀧𑀢𑀻𑀢𑀸, 𑀦𑀸𑀯𑀁 𑀲𑀼𑀘𑀺𑀢𑁆𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸;

𑀆𑀤𑀸𑀬 𑀲𑀗𑁆𑀔𑀁 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁, 𑀉𑀧𑀸𑀦𑀬𑀻 𑀦𑀕𑀭𑀁 𑀲𑀸𑀥𑀼𑀭𑀫𑁆𑀫𑀦𑁆𑀢𑀺.

𑀲𑀗𑁆𑀔𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.