𑁯. 𑀅𑀧𑀸𑀬𑀺𑀫𑁆𑀳𑀯𑀕𑁆𑀕𑁄

𑁮𑁧. 𑀅𑀧𑀸𑀬𑀺𑀫𑁆𑀳 𑀅𑀦𑀘𑁆𑀘𑀺𑀫𑁆𑀳, 𑀅𑀕𑀸𑀬𑀺𑀫𑁆𑀳 𑀭𑀼𑀤𑀺𑀫𑁆𑀳 𑀘;

𑀯𑀺𑀲𑀜𑁆𑀜𑀺𑀓𑀭𑀡𑀺𑀁 𑀧𑀺𑀢𑁆𑀯𑀸 [𑀧𑀻𑀢𑁆𑀯𑀸 (𑀲𑀻. 𑀲𑁆𑀬𑀸. 𑀧𑀻.)], 𑀤𑀺𑀝𑁆𑀞𑀸 𑀦𑀸𑀳𑀼𑀫𑁆𑀳 𑀯𑀸𑀦𑀭𑀸𑀢𑀺.

𑀲𑀼𑀭𑀸𑀧𑀸𑀦𑀚𑀸𑀢𑀓𑀁 𑀧𑀞𑀫𑀁.

𑁮𑁨. 𑀅𑀢𑀺𑀓𑁆𑀓𑀫𑁆𑀫 𑀭𑀫𑀡𑀓𑀁, 𑀲𑀤𑀸𑀫𑀢𑁆𑀢𑀜𑁆𑀘 𑀤𑀽𑀪𑀓𑀁;

𑀲𑁆𑀯𑀸𑀲𑀺 𑀧𑀸𑀲𑀸𑀡𑀫𑀸𑀲𑀻𑀦𑁄, 𑀬𑀲𑁆𑀫𑀸 𑀚𑀻𑀯𑀁 𑀦 𑀫𑁄𑀓𑁆𑀔𑀲𑀻𑀢𑀺.

𑀫𑀺𑀢𑁆𑀢𑀯𑀺𑀦𑁆𑀤𑀓𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁮𑁩. 𑀫𑀺𑀢𑁆𑀢𑁄 𑀳𑀯𑁂 𑀲𑀢𑁆𑀢𑀧𑀤𑁂𑀦 𑀳𑁄𑀢𑀺, 𑀲𑀳𑀸𑀬𑁄 𑀧𑀦 𑀤𑁆𑀯𑀸𑀤𑀲𑀓𑁂𑀦 𑀳𑁄𑀢𑀺;

𑀫𑀸𑀲𑀟𑁆𑀠𑀫𑀸𑀲𑁂𑀦 𑀘 𑀜𑀸𑀢𑀺 𑀳𑁄𑀢𑀺, 𑀢𑀢𑀼𑀢𑁆𑀢𑀭𑀺𑀁 𑀅𑀢𑁆𑀢𑀲𑀫𑁄𑀧𑀺 𑀳𑁄𑀢𑀺;

𑀲𑁄𑀳𑀁 𑀓𑀣𑀁 𑀅𑀢𑁆𑀢𑀲𑀼𑀔𑀲𑁆𑀲 𑀳𑁂𑀢𑀼, 𑀘𑀺𑀭𑀲𑀦𑁆𑀣𑀼𑀢𑀁 [𑀘𑀺𑀭𑀲𑀦𑁆𑀥𑀯𑀁 (𑀓.), 𑀘𑀺𑀭𑀲𑀢𑁆𑀣𑀼𑀦𑀁 (𑀧𑀻.)] 𑀓𑀸𑀴𑀓𑀡𑁆𑀡𑀺𑀁 𑀚𑀳𑁂𑀬𑁆𑀬𑀦𑁆𑀢𑀺.

𑀓𑀸𑀮𑀓𑀡𑁆𑀡𑀺𑀚𑀸𑀢𑀓𑀁 𑀢𑀢𑀺𑀬𑀁.

𑁮𑁪. 𑀆𑀭𑁄𑀕𑁆𑀬𑀫𑀺𑀘𑁆𑀙𑁂 𑀧𑀭𑀫𑀜𑁆𑀘 𑀮𑀸𑀪𑀁, 𑀲𑀻𑀮𑀜𑁆𑀘 𑀯𑀼𑀤𑁆𑀥𑀸𑀦𑀼𑀫𑀢𑀁 𑀲𑀼𑀢𑀜𑁆𑀘;

𑀥𑀫𑁆𑀫𑀸𑀦𑀼𑀯𑀢𑁆𑀢𑀻 𑀘 𑀅𑀮𑀻𑀦𑀢𑀸 𑀘, 𑀅𑀢𑁆𑀣𑀲𑁆𑀲 𑀤𑁆𑀯𑀸𑀭𑀸 𑀧𑀫𑀼𑀔𑀸 𑀙𑀴𑁂𑀢𑁂𑀢𑀺.

𑀅𑀢𑁆𑀣𑀲𑁆𑀲𑀤𑁆𑀯𑀸𑀭𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁮𑁫. 𑀆𑀬𑀢𑀺𑀁 𑀤𑁄𑀲𑀁 𑀦𑀸𑀜𑁆𑀜𑀸𑀬, 𑀬𑁄 𑀓𑀸𑀫𑁂 𑀧𑀝𑀺𑀲𑁂𑀯𑀢𑀺;

𑀯𑀺𑀧𑀸𑀓𑀦𑁆𑀢𑁂 𑀳𑀦𑀦𑁆𑀢𑀺 𑀦𑀁, 𑀓𑀺𑀁𑀧𑀓𑁆𑀓𑀫𑀺𑀯 𑀪𑀓𑁆𑀔𑀺𑀢𑀦𑁆𑀢𑀺.

𑀓𑀺𑀁𑀧𑀓𑁆𑀓𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁮𑁬. 𑀲𑀻𑀮𑀁 𑀓𑀺𑀭𑁂𑀯 𑀓𑀮𑁆𑀬𑀸𑀡𑀁, 𑀲𑀻𑀮𑀁 𑀮𑁄𑀓𑁂 𑀅𑀦𑀼𑀢𑁆𑀢𑀭𑀁;

𑀧𑀲𑁆𑀲 𑀖𑁄𑀭𑀯𑀺𑀲𑁄 𑀦𑀸𑀕𑁄, 𑀲𑀻𑀮𑀯𑀸𑀢𑀺 𑀦 𑀳𑀜𑁆𑀜𑀢𑀻𑀢𑀺.

𑀲𑀻𑀮𑀯𑀻𑀫𑀁𑀲𑀓𑀚𑀸𑀢𑀓𑀁 𑀙𑀝𑁆𑀞𑀁.

𑁮𑁭. 𑀬𑀲𑁆𑀲 𑀫𑀗𑁆𑀕𑀮𑀸 𑀲𑀫𑀽𑀳𑀢𑀸𑀲𑁂 [𑀲𑀫𑀽𑀳𑀢𑀸 (𑀲𑀻. 𑀲𑁆𑀬𑀸. 𑀧𑀻. 𑀲𑀼. 𑀦𑀺. 𑁩𑁬𑁨], 𑀉𑀧𑁆𑀧𑀸𑀢𑀸 [𑀉𑀧𑁆𑀧𑀸𑀤𑀸 (𑀧𑀻.)] 𑀲𑀼𑀧𑀺𑀦𑀸 𑀘 𑀮𑀓𑁆𑀔𑀡𑀸 𑀘;

𑀲𑁄 [𑀲 (𑀲𑀻. 𑀧𑀻. 𑀓.)] 𑀫𑀗𑁆𑀕𑀮𑀤𑁄𑀲𑀯𑀻𑀢𑀺𑀯𑀢𑁆𑀢𑁄, 𑀬𑀼𑀕𑀬𑁄𑀕𑀸𑀥𑀺𑀕𑀢𑁄 𑀦 𑀚𑀸𑀢𑀼𑀫𑁂𑀢𑀻𑀢𑀺.

𑀫𑀗𑁆𑀕𑀮𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁮𑁮. 𑀓𑀮𑁆𑀬𑀸𑀡𑀺𑀫𑁂𑀯 𑀫𑀼𑀜𑁆𑀘𑁂𑀬𑁆𑀬, 𑀦 𑀳𑀺 𑀫𑀼𑀜𑁆𑀘𑁂𑀬𑁆𑀬 𑀧𑀸𑀧𑀺𑀓𑀁;

𑀫𑁄𑀓𑁆𑀔𑁄 𑀓𑀮𑁆𑀬𑀸𑀡𑀺𑀬𑀸 𑀲𑀸𑀥𑀼, 𑀫𑀼𑀢𑁆𑀯𑀸 𑀢𑀧𑁆𑀧𑀢𑀺 𑀧𑀸𑀧𑀺𑀓𑀦𑁆𑀢𑀺.

𑀲𑀸𑀭𑀫𑁆𑀪𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁮𑁯. 𑀯𑀸𑀘𑀸𑀯 𑀓𑀺𑀭 𑀢𑁂 𑀆𑀲𑀺, 𑀲𑀡𑁆𑀳𑀸 𑀲𑀔𑀺𑀮𑀪𑀸𑀡𑀺𑀦𑁄;

𑀢𑀺𑀡𑀫𑀢𑁆𑀢𑁂 𑀅𑀲𑀚𑁆𑀚𑀺𑀢𑁆𑀣𑁄, 𑀦𑁄 𑀘 𑀦𑀺𑀓𑁆𑀔𑀲𑀢𑀁 𑀳𑀭𑀦𑁆𑀢𑀺.

𑀓𑀼𑀳𑀓𑀚𑀸𑀢𑀓𑀁 𑀦𑀯𑀫𑀁.

𑁯𑁦. 𑀬𑁄 𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄, 𑀓𑀢𑀢𑁆𑀣𑁄 𑀦𑀸𑀯𑀩𑀼𑀚𑁆𑀛𑀢𑀺;

𑀧𑀘𑁆𑀙𑀸 𑀓𑀺𑀘𑁆𑀘𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀓𑀢𑁆𑀢𑀸𑀭𑀁 𑀦𑀸𑀥𑀺𑀕𑀘𑁆𑀙𑀢𑀻𑀢𑀺.

𑀅𑀓𑀢𑀜𑁆𑀜𑀼𑀚𑀸𑀢𑀓𑀁 𑀤𑀲𑀫𑀁.

𑀅𑀧𑀸𑀬𑀺𑀫𑁆𑀳𑀯𑀕𑁆𑀕𑁄 𑀦𑀯𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀧𑀸𑀬𑀺𑀫𑁆𑀳 𑀘 𑀤𑀽𑀪𑀓𑀁 𑀲𑀢𑁆𑀢𑀧𑀤𑀁, 𑀙𑀴𑀤𑁆𑀯𑀭 𑀘 𑀆𑀬𑀢𑀺𑀦𑀸 𑀘 𑀧𑀼𑀦;

𑀅𑀳𑀺𑀲𑀻𑀮𑀯 𑀫𑀗𑁆𑀕𑀮𑀺 𑀧𑀸𑀧𑀺𑀓𑀲𑁆𑀲𑀸, 𑀲𑀢𑀁𑀦𑀺𑀓𑁆𑀔 𑀓𑀢𑀢𑁆𑀣𑀯𑀭𑁂𑀦 𑀤𑀲𑀸𑀢𑀺.