𑁧𑁦. 𑀮𑀺𑀢𑁆𑀢𑀯𑀕𑁆𑀕𑁄

𑁯𑁧. 𑀮𑀺𑀢𑁆𑀢𑀁 𑀧𑀭𑀫𑁂𑀦 𑀢𑁂𑀚𑀲𑀸, 𑀕𑀺𑀮𑀫𑀓𑁆𑀔𑀁 𑀧𑀼𑀭𑀺𑀲𑁄 𑀦 𑀩𑀼𑀚𑁆𑀛𑀢𑀺;

𑀕𑀺𑀮 𑀭𑁂 𑀕𑀺𑀮 𑀧𑀸𑀧𑀥𑀼𑀢𑁆𑀢𑀓, 𑀧𑀘𑁆𑀙𑀸 𑀢𑁂 𑀓𑀝𑀼𑀓𑀁 𑀪𑀯𑀺𑀲𑁆𑀲𑀢𑀻𑀢𑀺.

𑀮𑀺𑀢𑁆𑀢𑀚𑀸𑀢𑀓𑀁 𑀧𑀞𑀫𑀁.

𑁯𑁨. 𑀉𑀓𑁆𑀓𑀝𑁆𑀞𑁂 𑀲𑀽𑀭𑀫𑀺𑀘𑁆𑀙𑀦𑁆𑀢𑀺, 𑀫𑀦𑁆𑀢𑀻𑀲𑀼 𑀅𑀓𑀼𑀢𑀽𑀳𑀮𑀁;

𑀧𑀺𑀬𑀜𑁆𑀘 𑀅𑀦𑁆𑀦𑀧𑀸𑀦𑀫𑁆𑀳𑀺, 𑀅𑀢𑁆𑀣𑁂 𑀚𑀸𑀢𑁂 𑀘 𑀧𑀡𑁆𑀟𑀺𑀢𑀦𑁆𑀢𑀺.

𑀫𑀳𑀸𑀲𑀸𑀭𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁯𑁩. 𑀦 𑀯𑀺𑀲𑁆𑀲𑀲𑁂 𑀅𑀯𑀺𑀲𑁆𑀲𑀢𑁆𑀣𑁂, 𑀯𑀺𑀲𑁆𑀲𑀢𑁆𑀣𑁂𑀧𑀺 𑀦 𑀯𑀺𑀲𑁆𑀲𑀲𑁂;

𑀯𑀺𑀲𑁆𑀲𑀸𑀲𑀸 𑀪𑀬𑀫𑀦𑁆𑀯𑁂𑀢𑀺, 𑀲𑀻𑀳𑀁𑀯 𑀫𑀺𑀕𑀫𑀸𑀢𑀼𑀓𑀸𑀢𑀺 [𑀫𑀺𑀕𑀫𑀸𑀢𑀼𑀬𑀸 (𑀓.)].

𑀯𑀺𑀲𑀸𑀲𑀪𑁄𑀚𑀦𑀚𑀸𑀢𑀓𑀁 𑀢𑀢𑀺𑀬𑀁.

𑁯𑁪. 𑀲𑁄𑀢𑀢𑁆𑀢𑁄 𑀲𑁄𑀲𑀺𑀦𑁆𑀤𑁄 [𑀲𑁄𑀲𑀻𑀢𑁄 (𑀲𑀻. 𑀲𑁆𑀬𑀸. 𑀧𑀻.), 𑀲𑁄𑀲𑀺𑀦𑁄 (𑀓.)] 𑀘𑁂𑀯, 𑀏𑀓𑁄 𑀪𑀺𑀁𑀲𑀦𑀓𑁂 𑀯𑀦𑁂;

𑀦𑀕𑁆𑀕𑁄 𑀦 𑀘𑀕𑁆𑀕𑀺𑀫𑀸𑀲𑀻𑀦𑁄, 𑀏𑀲𑀦𑀸𑀧𑀲𑀼𑀢𑁄 𑀫𑀼𑀦𑀻𑀢𑀺.

𑀮𑁄𑀫𑀳𑀁𑀲𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁯𑁫. 𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄𑀢𑀺.

𑀫𑀳𑀸𑀲𑀼𑀤𑀲𑁆𑀲𑀦𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁯𑁬. 𑀲𑀫𑀢𑀺𑀢𑁆𑀢𑀺𑀓𑀁 𑀅𑀦𑀯𑀲𑁂𑀓𑀁, 𑀢𑁂𑀮𑀧𑀢𑁆𑀢𑀁 𑀬𑀣𑀸 𑀧𑀭𑀺𑀳𑀭𑁂𑀬𑁆𑀬;

𑀏𑀯𑀁 𑀲𑀘𑀺𑀢𑁆𑀢𑀫𑀦𑀼𑀭𑀓𑁆𑀔𑁂, 𑀧𑀢𑁆𑀣𑀬𑀸𑀦𑁄 𑀤𑀺𑀲𑀁 𑀅𑀕𑀢𑀧𑀼𑀩𑁆𑀩𑀦𑁆𑀢𑀺.

𑀢𑁂𑀮𑀧𑀢𑁆𑀢𑀚𑀸𑀢𑀓𑀁 𑀙𑀝𑁆𑀞𑀁.

𑁯𑁭. 𑀚𑀻𑀯𑀓𑀜𑁆𑀘 𑀫𑀢𑀁 𑀤𑀺𑀲𑁆𑀯𑀸, 𑀥𑀦𑀧𑀸𑀮𑀺𑀜𑁆𑀘 𑀤𑀼𑀕𑁆𑀕𑀢𑀁;

𑀧𑀦𑁆𑀣𑀓𑀜𑁆𑀘 𑀯𑀦𑁂 𑀫𑀽𑀴𑁆𑀳𑀁, 𑀧𑀸𑀧𑀓𑁄 𑀧𑀼𑀦𑀭𑀸𑀕𑀢𑁄𑀢𑀺.

𑀦𑀸𑀫𑀲𑀺𑀤𑁆𑀥𑀺𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁯𑁮. 𑀲𑀸𑀥𑀼 𑀔𑁄 𑀧𑀡𑁆𑀟𑀺𑀢𑁄 𑀦𑀸𑀫, 𑀦 𑀢𑁆𑀯𑁂𑀯 𑀅𑀢𑀺𑀧𑀡𑁆𑀟𑀺𑀢𑁄;

𑀅𑀢𑀺𑀧𑀡𑁆𑀟𑀺𑀢𑁂𑀦 𑀧𑀼𑀢𑁆𑀢𑁂𑀦, 𑀫𑀦𑀫𑁆𑀳𑀺 𑀉𑀧𑀓𑀽𑀴𑀺𑀢𑁄𑀢𑀺 [𑀉𑀧𑀓𑀽𑀮𑀺𑀢𑁄𑀢𑀺 (𑀲𑀻.), 𑀉𑀧𑀓𑀼𑀝𑁆𑀞𑀺𑀢𑁄𑀢𑀺 (𑀲𑁆𑀬𑀸.), 𑀉𑀧𑀓𑀼𑀝𑀺𑀢𑁄 (𑀓.)].

𑀓𑀽𑀝𑀯𑀸𑀡𑀺𑀚𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁯𑁯. 𑀧𑀭𑁄𑀲𑀳𑀲𑁆𑀲𑀫𑁆𑀧𑀺 𑀲𑀫𑀸𑀕𑀢𑀸𑀦𑀁, 𑀓𑀦𑁆𑀤𑁂𑀬𑁆𑀬𑀼𑀁 𑀢𑁂 𑀯𑀲𑁆𑀲𑀲𑀢𑀁 𑀅𑀧𑀜𑁆𑀜𑀸;

𑀏𑀓𑁄𑀯 𑀲𑁂𑀬𑁆𑀬𑁄 𑀧𑀼𑀭𑀺𑀲𑁄 𑀲𑀧𑀜𑁆𑀜𑁄, 𑀬𑁄 𑀪𑀸𑀲𑀺𑀢𑀲𑁆𑀲 𑀯𑀺𑀚𑀸𑀦𑀸𑀢𑀺 𑀅𑀢𑁆𑀣𑀦𑁆𑀢𑀺.

𑀧𑀭𑁄𑀲𑀳𑀲𑁆𑀲𑀚𑀸𑀢𑀓𑀁 𑀦𑀯𑀫𑀁.

𑁧𑁦𑁦. 𑀅𑀲𑀸𑀢𑀁 𑀲𑀸𑀢𑀭𑀽𑀧𑁂𑀦, 𑀧𑀺𑀬𑀭𑀽𑀧𑁂𑀦 𑀅𑀧𑁆𑀧𑀺𑀬𑀁;

𑀤𑀼𑀓𑁆𑀔𑀁 𑀲𑀼𑀔𑀲𑁆𑀲 𑀭𑀽𑀧𑁂𑀦, 𑀧𑀫𑀢𑁆𑀢𑀫𑀢𑀺𑀯𑀢𑁆𑀢𑀢𑀻𑀢𑀺.

𑀅𑀲𑀸𑀢𑀭𑀽𑀧𑀚𑀸𑀢𑀓𑀁 𑀤𑀲𑀫𑀁.

𑀮𑀺𑀢𑁆𑀢𑀯𑀕𑁆𑀕𑁄 𑀤𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀕𑀺𑀮𑀫𑀓𑁆𑀔𑀓𑀼𑀢𑀽𑀳𑀮 𑀫𑀸𑀢𑀼𑀓𑀲𑁆𑀲𑀸, 𑀫𑀼𑀦𑀺𑀦𑀸 𑀘 𑀅𑀦𑀺𑀘𑁆𑀘𑀢 𑀧𑀢𑁆𑀢𑀯𑀭𑀁;

𑀥𑀦𑀧𑀸𑀮𑀺𑀯𑀭𑁄 𑀅𑀢𑀺𑀧𑀡𑁆𑀟𑀺𑀢𑀓𑁄, 𑀲𑀧𑀭𑁄𑀲𑀳𑀲𑁆𑀲𑀅𑀲𑀸𑀢𑀤𑀲𑀸𑀢𑀺.

𑀫𑀚𑁆𑀛𑀺𑀫𑁄 𑀧𑀡𑁆𑀡𑀸𑀲𑀓𑁄.