𑁮. 𑀯𑀭𑀼𑀡𑀯𑀕𑁆𑀕𑁄

𑁭𑁧. 𑀬𑁄 𑀧𑀼𑀩𑁆𑀩𑁂 𑀓𑀭𑀡𑀻𑀬𑀸𑀦𑀺, 𑀧𑀘𑁆𑀙𑀸 𑀲𑁄 𑀓𑀸𑀢𑀼𑀫𑀺𑀘𑁆𑀙𑀢𑀺;

𑀯𑀭𑀼𑀡𑀓𑀝𑁆𑀞 [𑀯𑀭𑀡𑀓𑀝𑁆𑀞 (𑀲𑀻. 𑀧𑀻.)] 𑀪𑀜𑁆𑀚𑁄𑀯, 𑀲 𑀧𑀘𑁆𑀙𑀸 𑀫𑀦𑀼𑀢𑀧𑁆𑀧𑀢𑀻𑀢𑀺.

𑀯𑀭𑀼𑀡𑀚𑀸𑀢𑀓𑀁 𑀧𑀞𑀫𑀁.

𑁭𑁨. 𑀅𑀓𑀢𑀜𑁆𑀜𑀼𑀲𑁆𑀲 𑀧𑁄𑀲𑀲𑁆𑀲, 𑀦𑀺𑀘𑁆𑀘𑀁 𑀯𑀺𑀯𑀭𑀤𑀲𑁆𑀲𑀺𑀦𑁄;

𑀲𑀩𑁆𑀩𑀁 𑀘𑁂 𑀧𑀣𑀯𑀺𑀁 [𑀧𑀞𑀯𑀺𑀁 (𑀲𑀻. 𑀲𑁆𑀬𑀸. 𑀧𑀻.)] 𑀤𑀚𑁆𑀚𑀸, 𑀦𑁂𑀯 𑀦𑀁 𑀅𑀪𑀺𑀭𑀸𑀥𑀬𑁂𑀢𑀺.

𑀲𑀻𑀮𑀯𑀳𑀢𑁆𑀣𑀺𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁭𑁩. 𑀲𑀘𑁆𑀘𑀁 𑀓𑀺𑀭𑁂𑀯𑀫𑀸𑀳𑀁𑀲𑀼, 𑀦𑀭𑀸 𑀏𑀓𑀘𑁆𑀘𑀺𑀬𑀸 𑀇𑀥;

𑀓𑀝𑁆𑀞𑀁 𑀦𑀺𑀧𑁆𑀮𑀯𑀺𑀢𑀁 [𑀯𑀺𑀧𑁆𑀮𑀸𑀯𑀺𑀢𑀁 (𑀲𑀻. 𑀧𑀻.)] 𑀲𑁂𑀬𑁆𑀬𑁄, 𑀦 𑀢𑁆𑀯𑁂𑀯𑁂𑀓𑀘𑁆𑀘𑀺𑀬𑁄 𑀦𑀭𑁄𑀢𑀺.

𑀲𑀘𑁆𑀘𑀁𑀓𑀺𑀭𑀚𑀸𑀢𑀓𑀁 𑀢𑀢𑀺𑀬𑀁.

𑁭𑁪. 𑀲𑀸𑀥𑀽 𑀲𑀫𑁆𑀩𑀳𑀼𑀮𑀸 𑀜𑀸𑀢𑀻, 𑀅𑀧𑀺 𑀭𑀼𑀓𑁆𑀔𑀸 𑀅𑀭𑀜𑁆𑀜𑀚𑀸;

𑀯𑀸𑀢𑁄 𑀯𑀳𑀢𑀺 𑀏𑀓𑀝𑁆𑀞𑀁, 𑀩𑁆𑀭𑀳𑀦𑁆𑀢𑀫𑁆𑀧𑀺 𑀯𑀦𑀧𑁆𑀧𑀢𑀺𑀦𑁆𑀢𑀺.

𑀭𑀼𑀓𑁆𑀔𑀥𑀫𑁆𑀫𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁭𑁫. 𑀅𑀪𑀺𑀢𑁆𑀣𑀦𑀬 𑀧𑀚𑁆𑀚𑀼𑀦𑁆𑀦, 𑀦𑀺𑀥𑀺𑀁 𑀓𑀸𑀓𑀲𑁆𑀲 𑀦𑀸𑀲𑀬;

𑀓𑀸𑀓𑀁 𑀲𑁄𑀓𑀸𑀬 𑀭𑀦𑁆𑀥𑁂𑀳𑀺, 𑀫𑀜𑁆𑀘 𑀲𑁄𑀓𑀸 𑀧𑀫𑁄𑀘𑀬𑀸𑀢𑀺.

𑀫𑀘𑁆𑀙𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁭𑁬. 𑀅𑀲𑀗𑁆𑀓𑀺𑀬𑁄𑀫𑁆𑀳𑀺 𑀕𑀸𑀫𑀫𑁆𑀳𑀺, 𑀅𑀭𑀜𑁆𑀜𑁂 𑀦𑀢𑁆𑀣𑀺 𑀫𑁂 𑀪𑀬𑀁;

𑀉𑀚𑀼𑀁 𑀫𑀕𑁆𑀕𑀁 𑀲𑀫𑀸𑀭𑀽𑀴𑁆𑀳𑁄, 𑀫𑁂𑀢𑁆𑀢𑀸𑀬 𑀓𑀭𑀼𑀡𑀸𑀬 𑀘𑀸𑀢𑀺.

𑀅𑀲𑀗𑁆𑀓𑀺𑀬𑀚𑀸𑀢𑀓𑀁 𑀙𑀝𑁆𑀞𑀁.

𑁭𑁭. 𑀉𑀲𑀪𑀸 𑀭𑀼𑀓𑁆𑀔𑀸 𑀕𑀸𑀯𑀺𑀬𑁄 𑀕𑀯𑀸 𑀘, 𑀅𑀲𑁆𑀲𑁄 𑀓𑀁𑀲𑁄 𑀲𑀺𑀗𑁆𑀕𑀸𑀮𑀻 [𑀲𑀺𑀕𑀸𑀲𑀻 (𑀲𑀻. 𑀲𑁆𑀬𑀸. 𑀧𑀻.)] 𑀘 𑀓𑀼𑀫𑁆𑀪𑁄;

𑀧𑁄𑀓𑁆𑀔𑀭𑀡𑀻 𑀘 𑀅𑀧𑀸𑀓𑀘𑀦𑁆𑀤𑀦𑀁, 𑀮𑀸𑀩𑀽𑀦𑀺 𑀲𑀻𑀤𑀦𑁆𑀢𑀺 𑀲𑀺𑀮𑀸 𑀧𑁆𑀮𑀯𑀦𑁆𑀢𑀺.

𑀫𑀡𑁆𑀟𑀽𑀓𑀺𑀬𑁄 𑀓𑀡𑁆𑀳𑀲𑀧𑁆𑀧𑁂 𑀕𑀺𑀮𑀦𑁆𑀢𑀺, 𑀓𑀸𑀓𑀁 𑀲𑀼𑀧𑀡𑁆𑀡𑀸 𑀧𑀭𑀺𑀯𑀸𑀭𑀬𑀦𑁆𑀢𑀺;

𑀢𑀲𑀸 𑀯𑀓𑀸 𑀏𑀴𑀓𑀸𑀦𑀁 𑀪𑀬𑀸𑀳𑀺, 𑀯𑀺𑀧𑀭𑀺𑀬𑀸𑀲𑁄 [𑀯𑀺𑀧𑀭𑀺𑀬𑀸𑀬𑁄 (𑀲𑁆𑀬𑀸. 𑀓.)] 𑀯𑀢𑁆𑀢𑀢𑀺 𑀦𑀬𑀺𑀥 𑀫𑀢𑁆𑀣𑀻𑀢𑀺.

𑀫𑀳𑀸𑀲𑀼𑀧𑀺𑀦𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁭𑁮. 𑀉𑀪𑁄 𑀔𑀜𑁆𑀚𑀸 𑀉𑀪𑁄 𑀓𑀼𑀡𑀻, 𑀉𑀪𑁄 𑀯𑀺𑀲𑀫𑀘𑀓𑁆𑀔𑀼𑀓𑀸 [𑀘𑀓𑁆𑀔𑀼𑀮𑀸 (𑀲𑀻. 𑀧𑀻.)];

𑀉𑀪𑀺𑀦𑁆𑀦𑀁 𑀧𑀺𑀴𑀓𑀸 [𑀧𑀻𑀴𑀓𑀸 (𑀲𑁆𑀬𑀸.)] 𑀚𑀸𑀢𑀸, 𑀦𑀸𑀳𑀁 𑀧𑀲𑁆𑀲𑀸𑀫𑀺 𑀇𑀮𑁆𑀮𑀺𑀲𑀦𑁆𑀢𑀺.

𑀇𑀮𑁆𑀮𑀺𑀲𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁭𑁯. 𑀬𑀢𑁄 𑀯𑀺𑀮𑀼𑀢𑁆𑀢𑀸 𑀘 𑀳𑀢𑀸 𑀘 𑀕𑀸𑀯𑁄, 𑀤𑀟𑁆𑀠𑀸𑀦𑀺 𑀕𑁂𑀳𑀸𑀦𑀺 𑀚𑀦𑁄 𑀘 𑀦𑀻𑀢𑁄;

𑀅𑀣𑀸𑀕𑀫𑀸 𑀧𑀼𑀢𑁆𑀢𑀳𑀢𑀸𑀬 𑀧𑀼𑀢𑁆𑀢𑁄, 𑀔𑀭𑀲𑁆𑀲𑀭𑀁 𑀟𑀺𑀡𑁆𑀟𑀺𑀫𑀁 [𑀤𑁂𑀡𑁆𑀟𑀺𑀫𑀁 (𑀲𑀻. 𑀲𑁆𑀬𑀸. 𑀧𑀻.), 𑀟𑀺𑀦𑁆𑀤𑀺𑀫𑀁 (𑀓.)] 𑀯𑀸𑀤𑀬𑀦𑁆𑀢𑁄𑀢𑀺.

𑀔𑀭𑀲𑁆𑀲𑀭𑀚𑀸𑀢𑀓𑀁 𑀦𑀯𑀫𑀁.

𑁮𑁦. 𑀬𑀁 𑀢𑁂 𑀧𑀯𑀺𑀓𑀢𑁆𑀣𑀺𑀢𑀁 𑀧𑀼𑀭𑁂, 𑀅𑀣 𑀢𑁂 𑀧𑀽𑀢𑀺𑀲𑀭𑀸 𑀲𑀚𑀦𑁆𑀢𑀺 𑀧𑀘𑁆𑀙𑀸;

𑀉𑀪𑀬𑀁 𑀦 𑀲𑀫𑁂𑀢𑀺 𑀪𑀻𑀫𑀲𑁂𑀦, 𑀬𑀼𑀤𑁆𑀥𑀓𑀣𑀸 𑀘 𑀇𑀤𑀜𑁆𑀘 𑀢𑁂 𑀯𑀺𑀳𑀜𑁆𑀜𑀦𑁆𑀢𑀺.

𑀪𑀻𑀫𑀲𑁂𑀦𑀚𑀸𑀢𑀓𑀁 𑀤𑀲𑀫𑀁.

𑀯𑀭𑀼𑀡𑀯𑀕𑁆𑀕𑁄 [𑀯𑀭𑀡𑀯𑀕𑁆𑀕𑁄 (𑀲𑀻. 𑀧𑀻.)] 𑀅𑀝𑁆𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀭𑀼𑀡𑀸 𑀅𑀓𑀢𑀜𑁆𑀜𑀽𑀯𑀭𑁂 𑀢𑀼 𑀲𑀘𑁆𑀘𑀯𑀭𑀁, 𑀲𑀯𑀦𑀧𑁆𑀧𑀢𑀺𑀦𑀸 𑀘 𑀅𑀪𑀺𑀢𑁆𑀣𑀦𑀬;

𑀓𑀭𑀼𑀡𑀸𑀬 𑀲𑀺𑀮𑀸𑀧𑁆𑀮𑀯 𑀇𑀮𑁆𑀮𑀺𑀲𑀢𑁄, 𑀧𑀼𑀦 𑀟𑀺𑀡𑁆𑀟𑀺𑀫𑀧𑀽𑀢𑀺𑀲𑀭𑁂𑀦 𑀤𑀲𑀸𑀢𑀺.