𑁭. 𑀇𑀢𑁆𑀣𑀺𑀯𑀕𑁆𑀕𑁄

𑁬𑁧. 𑀅𑀲𑀸 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀯𑁂𑀮𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀺;

𑀲𑀸𑀭𑀢𑁆𑀢𑀸 𑀘 𑀧𑀕𑀩𑁆𑀪𑀸 𑀘, 𑀲𑀺𑀔𑀻 𑀲𑀩𑁆𑀩𑀖𑀲𑁄 𑀬𑀣𑀸;

𑀢𑀸 𑀳𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀬𑀦𑁆𑀢𑀺.

𑀅𑀲𑀸𑀢𑀫𑀦𑁆𑀢𑀚𑀸𑀢𑀓𑀁 𑀧𑀞𑀫𑀁.

𑁬𑁨. 𑀬𑀁 𑀩𑁆𑀭𑀸𑀳𑁆𑀫𑀡𑁄 𑀅𑀯𑀸𑀤𑁂𑀲𑀺, 𑀯𑀻𑀡𑀁 𑀲𑀫𑀼𑀔𑀯𑁂𑀞𑀺𑀢𑁄;

𑀅𑀡𑁆𑀟𑀪𑀽𑀢𑀸 𑀪𑀢𑀸 𑀪𑀭𑀺𑀬𑀸, 𑀢𑀸𑀲𑀼 𑀓𑁄 𑀚𑀸𑀢𑀼 𑀯𑀺𑀲𑁆𑀲𑀲𑁂𑀢𑀺.

𑀅𑀡𑁆𑀟𑀪𑀽𑀢𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁬𑁩. 𑀓𑁄𑀥𑀦𑀸 𑀅𑀓𑀢𑀜𑁆𑀜𑀽 𑀘, 𑀧𑀺𑀲𑀼𑀡𑀸 𑀫𑀺𑀢𑁆𑀢𑀪𑁂𑀤𑀺𑀓𑀸 [𑀧𑀺𑀲𑀼𑀡𑀸 𑀘 𑀯𑀺𑀪𑁂𑀤𑀺𑀓𑀸 (𑀲𑀻. 𑀲𑁆𑀬𑀸. 𑀧𑀻.)];

𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭 𑀪𑀺𑀓𑁆𑀔𑀼, 𑀲𑁄 𑀲𑀼𑀔𑀁 𑀦 𑀯𑀺𑀳𑀸𑀳𑀲𑀻𑀢𑀺 [𑀧𑀺𑀳𑀸𑀳𑀺𑀲𑀻𑀢𑀺 (𑀲𑀻. 𑀲𑁆𑀬𑀸. 𑀧𑀻.), 𑀯𑀺𑀳𑀸𑀬𑀲𑀺 (𑀓.)].

𑀢𑀓𑁆𑀓𑀧𑀡𑁆𑀟𑀺𑀢𑀚𑀸𑀢𑀓𑀁 [𑀢𑀓𑁆𑀓𑀚𑀸𑀢𑀓𑀁 (𑀲𑀻. 𑀲𑁆𑀬𑀸. 𑀧𑀻. 𑀅𑀝𑁆𑀞.)] 𑀢𑀢𑀺𑀬𑀁.

𑁬𑁪. 𑀫𑀸 𑀲𑀼 𑀦𑀦𑁆𑀤𑀺 𑀇𑀘𑁆𑀙𑀢𑀺 𑀫𑀁, 𑀫𑀸 𑀲𑀼 𑀲𑁄𑀘𑀺 𑀦 𑀫𑀺𑀘𑁆𑀙𑀢𑀺 [𑀦 𑀇𑀘𑁆𑀙𑀢𑀺 (𑀲𑀻. 𑀲𑁆𑀬𑀸. 𑀧𑀻.)];

𑀣𑀻𑀦𑀁 𑀪𑀸𑀯𑁄 𑀤𑀼𑀭𑀸𑀚𑀸𑀦𑁄, 𑀫𑀘𑁆𑀙𑀲𑁆𑀲𑁂𑀯𑁄𑀤𑀓𑁂 𑀕𑀢𑀦𑁆𑀢𑀺.

𑀤𑀼𑀭𑀸𑀚𑀸𑀦𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁬𑁫. 𑀬𑀣𑀸 𑀦𑀤𑀻 𑀘 𑀧𑀦𑁆𑀣𑁄 𑀘, 𑀧𑀸𑀦𑀸𑀕𑀸𑀭𑀁 𑀲𑀪𑀸 𑀧𑀧𑀸;

𑀏𑀯𑀁 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀦𑀸𑀲𑀁 𑀓𑀼𑀚𑁆𑀛𑀦𑁆𑀢𑀺 𑀧𑀡𑁆𑀟𑀺𑀢𑀸𑀢𑀺.

𑀅𑀦𑀪𑀺𑀭𑀢𑀺𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁬𑁬. 𑀏𑀓𑀸 𑀇𑀘𑁆𑀙𑀸 𑀧𑀼𑀭𑁂 𑀆𑀲𑀺, 𑀅𑀮𑀤𑁆𑀥𑀸 𑀫𑀼𑀤𑀼𑀮𑀓𑁆𑀔𑀡𑀁;

𑀬𑀢𑁄 𑀮𑀤𑁆𑀥𑀸 𑀅𑀴𑀸𑀭𑀓𑁆𑀔𑀻, 𑀇𑀘𑁆𑀙𑀸 𑀇𑀘𑁆𑀙𑀁 𑀯𑀺𑀚𑀸𑀬𑀣𑀸𑀢𑀺.

𑀫𑀼𑀤𑀼𑀮𑀓𑁆𑀔𑀡𑀚𑀸𑀢𑀓𑀁 𑀙𑀝𑁆𑀞𑀁.

𑁬𑁭. 𑀉𑀘𑁆𑀙𑀗𑁆𑀕𑁂 𑀤𑁂𑀯 𑀫𑁂 𑀧𑀼𑀢𑁆𑀢𑁄, 𑀧𑀣𑁂 𑀥𑀸𑀯𑀦𑁆𑀢𑀺𑀬𑀸 𑀧𑀢𑀺;

𑀢𑀜𑁆𑀘 𑀤𑁂𑀲𑀁 𑀦 𑀧𑀲𑁆𑀲𑀸𑀫𑀺, 𑀬𑀢𑁄 𑀲𑁄𑀤𑀭𑀺𑀬𑀫𑀸𑀦𑀬𑁂𑀢𑀺 [𑀲𑁄𑀤𑀭𑀺𑀬𑀁 𑀦𑀬𑁂 (𑀓.)].

𑀉𑀘𑁆𑀙𑀗𑁆𑀕𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁬𑁮. 𑀬𑀲𑁆𑀫𑀺𑀁 𑀫𑀦𑁄 𑀦𑀺𑀯𑀺𑀲𑀢𑀺, 𑀘𑀺𑀢𑁆𑀢𑀜𑁆𑀘𑀸𑀧𑀺 [𑀘𑀺𑀢𑁆𑀢𑀁 𑀯𑀸𑀧𑀺 (𑀓𑀢𑁆𑀣𑀘𑀺)] 𑀧𑀲𑀻𑀤𑀢𑀺;

𑀅𑀤𑀺𑀝𑁆𑀞𑀧𑀼𑀩𑁆𑀩𑀓𑁂 𑀧𑁄𑀲𑁂, 𑀓𑀸𑀫𑀁 𑀢𑀲𑁆𑀫𑀺𑀫𑁆𑀧𑀺 𑀯𑀺𑀲𑁆𑀲𑀲𑁂𑀢𑀺.

𑀲𑀸𑀓𑁂𑀢𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁬𑁯. 𑀥𑀺𑀭𑀢𑁆𑀣𑀼 𑀢𑀁 𑀯𑀺𑀲𑀁 𑀯𑀦𑁆𑀢𑀁, 𑀬𑀫𑀳𑀁 𑀚𑀻𑀯𑀺𑀢𑀓𑀸𑀭𑀡𑀸;

𑀯𑀦𑁆𑀢𑀁 𑀧𑀘𑁆𑀘𑀸𑀯𑀫𑀺𑀲𑁆𑀲𑀸𑀫𑀺 [𑀧𑀘𑁆𑀘𑀸𑀳𑀭𑀺𑀲𑁆𑀲𑀸𑀫𑀺 (𑀓.)], 𑀫𑀢𑀁 𑀫𑁂 𑀚𑀻𑀯𑀺𑀢𑀸 𑀯𑀭𑀦𑁆𑀢𑀺.

𑀯𑀺𑀲𑀯𑀦𑁆𑀢𑀚𑀸𑀢𑀓𑀁 𑀦𑀯𑀫𑀁.

𑁭𑁦. 𑀦 𑀢𑀁 𑀚𑀺𑀢𑀁 𑀲𑀸𑀥𑀼 𑀚𑀺𑀢𑀁, 𑀬𑀁 𑀚𑀺𑀢𑀁 𑀅𑀯𑀚𑀻𑀬𑀢𑀺;

𑀢𑀁 𑀔𑁄 𑀚𑀺𑀢𑀁 𑀲𑀸𑀥𑀼 𑀚𑀺𑀢𑀁, 𑀬𑀁 𑀚𑀺𑀢𑀁 𑀦𑀸𑀯𑀚𑀻𑀬𑀢𑀻𑀢𑀺.

𑀓𑀼𑀤𑁆𑀤𑀸𑀮𑀚𑀸𑀢𑀓𑀁 𑀤𑀲𑀫𑀁.

𑀇𑀢𑁆𑀣𑀺𑀯𑀕𑁆𑀕𑁄 𑀲𑀢𑁆𑀢𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀺𑀔𑀻𑀲𑀩𑁆𑀩𑀖𑀲𑁄𑀧𑀺 𑀘 𑀯𑀻𑀡𑀯𑀭𑁄, 𑀧𑀺𑀲𑀼𑀡𑀸 𑀫𑀺𑀢𑁆𑀢𑀪𑁂𑀤𑀺𑀓𑀸 𑀦𑀦𑁆𑀤𑀻 𑀦𑀤𑀻;

𑀫𑀼𑀤𑀼𑀮𑀓𑁆𑀔𑀡 𑀲𑁄𑀤𑀭𑀺𑀬𑀸 𑀘 𑀫𑀦𑁄, 𑀯𑀺𑀲 𑀲𑀸𑀥𑀼𑀚𑀺𑀢𑁂𑀦 𑀪𑀯𑀦𑁆𑀢𑀺 𑀤𑀲𑀸𑀢𑀺.