𑁬. 𑀆𑀲𑀻𑀲𑀯𑀕𑁆𑀕𑁄

𑁫𑁧. 𑀆𑀲𑀻𑀲𑁂𑀣𑁂𑀯 [𑀆𑀲𑀺𑀁𑀲𑁂𑀣𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸 𑀅𑀳𑀽𑀢𑀺.

𑀫𑀳𑀸𑀲𑀻𑀮𑀯𑀚𑀸𑀢𑀓𑀁 𑀧𑀞𑀫𑀁.

𑁫𑁨. 𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀉𑀤𑀓𑀸 𑀣𑀮𑀫𑀼𑀩𑁆𑀪𑀢𑀦𑁆𑀢𑀺.

𑀘𑀽𑀴𑀚𑀦𑀓𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁫𑁩. 𑀢𑀣𑁂𑀯 𑀧𑀼𑀡𑁆𑀡𑀸 𑀧𑀸𑀢𑀺𑀬𑁄, 𑀅𑀜𑁆𑀜𑀸𑀬𑀁 𑀯𑀢𑁆𑀢𑀢𑁂 𑀓𑀣𑀸;

𑀆𑀓𑀸𑀭𑀡𑁂𑀦 [𑀆𑀓𑀸𑀭𑀓𑁂𑀦 (𑀲𑀻. 𑀲𑁆𑀬𑀸. 𑀧𑀻.)] 𑀚𑀸𑀦𑀸𑀫𑀺, 𑀦 𑀘𑀸𑀬𑀁 𑀪𑀤𑁆𑀤𑀺𑀓𑀸 𑀲𑀼𑀭𑀸𑀢𑀺.

𑀧𑀼𑀡𑁆𑀡𑀧𑀸𑀢𑀺𑀚𑀸𑀢𑀓𑀁 𑀢𑀢𑀺𑀬𑀁.

𑁫𑁪. 𑀦𑀸𑀬𑀁 𑀭𑀼𑀓𑁆𑀔𑁄 𑀤𑀼𑀭𑀸𑀭𑀼𑀳𑁄, 𑀦𑀧𑀺 𑀕𑀸𑀫𑀢𑁄 𑀆𑀭𑀓𑀸;

𑀆𑀓𑀸𑀭𑀡𑁂𑀦 𑀚𑀸𑀦𑀸𑀫𑀺, 𑀦𑀸𑀬𑀁 𑀲𑀸𑀤𑀼𑀨𑀮𑁄 𑀤𑀼𑀫𑁄𑀢𑀺.

𑀓𑀺𑀁𑀨𑀮𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁫𑁫. 𑀬𑁄 𑀅𑀮𑀻𑀦𑁂𑀦 𑀘𑀺𑀢𑁆𑀢𑁂𑀦, 𑀅𑀮𑀻𑀦𑀫𑀦𑀲𑁄 𑀦𑀭𑁄;

𑀪𑀸𑀯𑁂𑀢𑀺 𑀓𑀼𑀲𑀮𑀁 𑀥𑀫𑁆𑀫𑀁, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸;

𑀧𑀸𑀧𑀼𑀡𑁂 𑀅𑀦𑀼𑀧𑀼𑀩𑁆𑀩𑁂𑀦, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀦𑁆𑀢𑀺.

𑀧𑀜𑁆𑀘𑀸𑀯𑀼𑀥𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁫𑁬. 𑀬𑁄 𑀧𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀧𑀳𑀝𑁆𑀞𑀫𑀦𑀲𑁄 𑀦𑀭𑁄;

𑀪𑀸𑀯𑁂𑀢𑀺 𑀓𑀼𑀲𑀮𑀁 𑀥𑀫𑁆𑀫𑀁, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸;

𑀧𑀸𑀧𑀼𑀡𑁂 𑀅𑀦𑀼𑀧𑀼𑀩𑁆𑀩𑁂𑀦, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀦𑁆𑀢𑀺.

𑀓𑀜𑁆𑀘𑀦𑀓𑁆𑀔𑀦𑁆𑀥𑀚𑀸𑀢𑀓𑀁 𑀙𑀝𑁆𑀞𑀁.

𑁫𑁭. 𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸, 𑀯𑀸𑀦𑀭𑀺𑀦𑁆𑀤 𑀬𑀣𑀸 𑀢𑀯;

𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 [𑀥𑀺𑀢𑀻 (𑀲𑀻. 𑀧𑀻.)] 𑀘𑀸𑀕𑁄, 𑀤𑀺𑀝𑁆𑀞𑀁 𑀲𑁄 𑀅𑀢𑀺𑀯𑀢𑁆𑀢𑀢𑀻𑀢𑀺.

𑀯𑀸𑀦𑀭𑀺𑀦𑁆𑀤𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁫𑁮. 𑀬𑀲𑁆𑀲𑁂𑀢𑁂 𑀘 [𑀬𑀲𑁆𑀲 𑀏𑀢𑁂 (𑀲𑀻. 𑀧𑀻.)] 𑀢𑀬𑁄 𑀥𑀫𑁆𑀫𑀸, 𑀯𑀸𑀦𑀭𑀺𑀦𑁆𑀤 𑀬𑀣𑀸 𑀢𑀯;

𑀤𑀓𑁆𑀔𑀺𑀬𑀁 𑀲𑀽𑀭𑀺𑀬𑀁 𑀧𑀜𑁆𑀜𑀸, 𑀤𑀺𑀝𑁆𑀞𑀁 𑀲𑁄 𑀅𑀢𑀺𑀯𑀢𑁆𑀢𑀢𑀻𑀢𑀺.

𑀢𑀬𑁄𑀥𑀫𑁆𑀫𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁫𑁯. 𑀥𑀫𑁂 𑀥𑀫𑁂 𑀦𑀸𑀢𑀺𑀥𑀫𑁂, 𑀅𑀢𑀺𑀥𑀦𑁆𑀢𑀜𑁆𑀳𑀺 𑀧𑀸𑀧𑀓𑀁;

𑀥𑀦𑁆𑀢𑁂𑀦 𑀳𑀺 𑀲𑀢𑀁 𑀮𑀤𑁆𑀥𑀁, 𑀅𑀢𑀺𑀥𑀦𑁆𑀢𑁂𑀦 𑀦𑀸𑀲𑀺𑀢𑀦𑁆𑀢𑀺.

𑀪𑁂𑀭𑀺𑀯𑀸𑀤𑀓𑀚𑀸𑀢𑀓𑀁 𑀦𑀯𑀫𑀁.

𑁬𑁦. 𑀥𑀫𑁂 𑀥𑀫𑁂 𑀦𑀸𑀢𑀺𑀥𑀫𑁂, 𑀅𑀢𑀺𑀥𑀦𑁆𑀢𑀜𑁆𑀳𑀺 𑀧𑀸𑀧𑀓𑀁;

𑀥𑀦𑁆𑀢𑁂𑀦𑀸𑀥𑀺𑀕𑀢𑀸 𑀪𑁄𑀕𑀸, 𑀢𑁂 𑀢𑀸𑀢𑁄 𑀯𑀺𑀥𑀫𑀻 𑀥𑀫𑀦𑁆𑀢𑀺.

𑀲𑀗𑁆𑀔𑀥𑀫𑀚𑀸𑀢𑀓𑀁 𑀤𑀲𑀫𑀁.

𑀆𑀲𑀻𑀲𑀯𑀕𑁆𑀕𑁄 𑀙𑀝𑁆𑀞𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸𑀳𑀼𑀤𑀓𑀸 𑀣𑀮𑀸, 𑀲𑀼𑀭 𑀲𑀸𑀤𑀼𑀨𑀮𑁄 𑀘 𑀅𑀮𑀻𑀦𑀫𑀦𑁄;

𑀲𑀫𑁆𑀧𑀳𑀝𑁆𑀞𑀫𑀦𑁄 𑀘𑀢𑀼𑀭𑁄 𑀘 𑀢𑀬𑁄, 𑀲𑀢𑀮𑀤𑁆𑀥𑀓 𑀪𑁄𑀕𑀥𑀦𑁂𑀦 𑀤𑀲𑀸𑀢𑀺.