𑁫. 𑀅𑀢𑁆𑀣𑀓𑀸𑀫𑀯𑀕𑁆𑀕𑁄

𑁪𑁧. 𑀬𑁄 𑀅𑀢𑁆𑀣𑀓𑀸𑀫𑀲𑁆𑀲 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑁄, 𑀑𑀯𑀚𑁆𑀚𑀫𑀸𑀦𑁄 𑀦 𑀓𑀭𑁄𑀢𑀺 𑀲𑀸𑀲𑀦𑀁;

𑀅𑀚𑀺𑀬𑀸 𑀧𑀸𑀤𑀫𑁄𑀮𑀫𑁆𑀩 [𑀧𑀸𑀤𑀫𑁄𑀮𑀼𑀫𑁆𑀩 (𑀲𑀻. 𑀲𑁆𑀬𑀸. 𑀧𑀻.)], 𑀫𑀺𑀢𑁆𑀢𑀓𑁄 𑀯𑀺𑀬 𑀲𑁄𑀘𑀢𑀻𑀢𑀺.

𑀮𑁄𑀲𑀓𑀚𑀸𑀢𑀓𑀁 𑀧𑀞𑀫𑀁.

𑁪𑁨. 𑀬𑁄 𑀅𑀢𑁆𑀣𑀓𑀸𑀫𑀲𑁆𑀲 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑁄, 𑀑𑀯𑀚𑁆𑀚𑀫𑀸𑀦𑁄 𑀦 𑀓𑀭𑁄𑀢𑀺 𑀲𑀸𑀲𑀦𑀁;

𑀓𑀧𑁄𑀢𑀓𑀲𑁆𑀲 𑀯𑀘𑀦𑀁 𑀅𑀓𑀢𑁆𑀯𑀸, 𑀅𑀫𑀺𑀢𑁆𑀢𑀳𑀢𑁆𑀣𑀢𑁆𑀣𑀕𑀢𑁄𑀯 𑀲𑁂𑀢𑀻𑀢𑀺.

𑀓𑀧𑁄𑀢𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁪𑁩. 𑀬𑁄 𑀅𑀢𑁆𑀣𑀓𑀸𑀫𑀲𑁆𑀲 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑁄, 𑀑𑀯𑀚𑁆𑀚𑀫𑀸𑀦𑁄 𑀦 𑀓𑀭𑁄𑀢𑀺 𑀲𑀸𑀲𑀦𑀁;

𑀏𑀯𑀁 𑀲𑁄 𑀦𑀺𑀳𑀢𑁄 𑀲𑁂𑀢𑀺, 𑀯𑁂𑀴𑀼𑀓𑀲𑁆𑀲 𑀬𑀣𑀸 𑀧𑀺𑀢𑀸𑀢𑀺.

𑀯𑁂𑀴𑀼𑀓𑀚𑀸𑀢𑀓𑀁 𑀢𑀢𑀺𑀬𑀁.

𑁪𑁪. 𑀲𑁂𑀬𑁆𑀬𑁄 𑀅𑀫𑀺𑀢𑁆𑀢𑁄 𑀫𑀢𑀺𑀬𑀸 𑀉𑀧𑁂𑀢𑁄, 𑀦 𑀢𑁆𑀯𑁂𑀯 𑀫𑀺𑀢𑁆𑀢𑁄 𑀫𑀢𑀺𑀯𑀺𑀧𑁆𑀧𑀳𑀻𑀦𑁄;

𑀫𑀓𑀲𑀁 𑀯𑀥𑀺𑀲𑁆𑀲𑀦𑁆𑀢𑀺 𑀳𑀺 𑀏𑀴𑀫𑀽𑀕𑁄, 𑀧𑀼𑀢𑁆𑀢𑁄 𑀧𑀺𑀢𑀼 𑀅𑀩𑁆𑀪𑀺𑀤𑀸 𑀉𑀢𑁆𑀢𑀫𑀗𑁆𑀕𑀦𑁆𑀢𑀺.

𑀫𑀓𑀲𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁪𑁫. 𑀲𑁂𑀬𑁆𑀬𑁄 𑀅𑀫𑀺𑀢𑁆𑀢𑁄 𑀫𑁂𑀥𑀸𑀯𑀻, 𑀬𑀜𑁆𑀘𑁂 𑀩𑀸𑀮𑀸𑀦𑀼𑀓𑀫𑁆𑀧𑀓𑁄;

𑀧𑀲𑁆𑀲 𑀭𑁄𑀳𑀺𑀡𑀺𑀓𑀁 𑀚𑀫𑁆𑀫𑀺𑀁, 𑀫𑀸𑀢𑀭𑀁 𑀳𑀦𑁆𑀢𑁆𑀯𑀸𑀦 𑀲𑁄𑀘𑀢𑀻𑀢𑀺.

𑀭𑁄𑀳𑀺𑀡𑀺𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁪𑁬. 𑀦 𑀯𑁂 𑀅𑀦𑀢𑁆𑀣𑀓𑀼𑀲𑀮𑁂𑀦, 𑀅𑀢𑁆𑀣𑀘𑀭𑀺𑀬𑀸 𑀲𑀼𑀔𑀸𑀯𑀳𑀸;

𑀳𑀸𑀧𑁂𑀢𑀺 𑀅𑀢𑁆𑀣𑀁 𑀤𑀼𑀫𑁆𑀫𑁂𑀥𑁄, 𑀓𑀧𑀺 𑀆𑀭𑀸𑀫𑀺𑀓𑁄 𑀬𑀣𑀸𑀢𑀺.

𑀆𑀭𑀸𑀫𑀤𑀽𑀲𑀓𑀚𑀸𑀢𑀓𑀁 𑀙𑀝𑁆𑀞𑀁.

𑁪𑁭. 𑀦 𑀯𑁂 𑀅𑀦𑀢𑁆𑀣𑀓𑀼𑀲𑀮𑁂𑀦, 𑀅𑀢𑁆𑀣𑀘𑀭𑀺𑀬𑀸 𑀲𑀼𑀔𑀸𑀯𑀳𑀸;

𑀳𑀸𑀧𑁂𑀢𑀺 𑀅𑀢𑁆𑀣𑀁 𑀤𑀼𑀫𑁆𑀫𑁂𑀥𑁄, 𑀓𑁄𑀡𑁆𑀟𑀜𑁆𑀜𑁄 𑀯𑀸𑀭𑀼𑀡𑀺𑀁 𑀬𑀣𑀸𑀢𑀺.

𑀯𑀸𑀭𑀼𑀡𑀺𑀤𑀽𑀲𑀓𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁪𑁮. 𑀅𑀦𑀼𑀧𑀸𑀬𑁂𑀦 𑀬𑁄 𑀅𑀢𑁆𑀣𑀁, 𑀇𑀘𑁆𑀙𑀢𑀺 𑀲𑁄 𑀯𑀺𑀳𑀜𑁆𑀜𑀢𑀺;

𑀘𑁂𑀢𑀸 𑀳𑀦𑀺𑀁𑀲𑀼 𑀯𑁂𑀤𑀩𑁆𑀩𑀁 [𑀯𑁂𑀤𑀩𑁆𑀪𑀁 (𑀲𑀻. 𑀧𑀻.)], 𑀲𑀩𑁆𑀩𑁂 𑀢𑁂 𑀩𑁆𑀬𑀲𑀦𑀫𑀚𑁆𑀛𑀕𑀽𑀢𑀺.

𑀯𑁂𑀤𑀩𑁆𑀩 [𑀯𑁂𑀤𑀩𑁆𑀪 (𑀲𑀻. 𑀧𑀻.)] 𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁪𑁯. 𑀦𑀓𑁆𑀔𑀢𑁆𑀢𑀁 𑀧𑀝𑀺𑀫𑀸𑀦𑁂𑀦𑁆𑀢𑀁, 𑀅𑀢𑁆𑀣𑁄 𑀩𑀸𑀮𑀁 𑀉𑀧𑀘𑁆𑀘𑀕𑀸;

𑀅𑀢𑁆𑀣𑁄 𑀅𑀢𑁆𑀣𑀲𑁆𑀲 𑀦𑀓𑁆𑀔𑀢𑁆𑀢𑀁, 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀺 𑀢𑀸𑀭𑀓𑀸𑀢𑀺.

𑀦𑀓𑁆𑀔𑀢𑁆𑀢𑀚𑀸𑀢𑀓𑀁 𑀦𑀯𑀫𑀁.

𑁫𑁦. 𑀤𑀼𑀫𑁆𑀫𑁂𑀥𑀸𑀦𑀁 𑀲𑀳𑀲𑁆𑀲𑁂𑀦, 𑀬𑀜𑁆𑀜𑁄 𑀫𑁂 𑀉𑀧𑀬𑀸𑀘𑀺𑀢𑁄;

𑀇𑀤𑀸𑀦𑀺 𑀔𑁄𑀳𑀁 𑀬𑀚𑀺𑀲𑁆𑀲𑀸𑀫𑀺, 𑀩𑀳𑀼 [𑀩𑀳𑀽 (𑀲𑀻. 𑀧𑀻.), 𑀩𑀳𑀼𑀁 (𑀓.)] 𑀅𑀥𑀫𑁆𑀫𑀺𑀓𑁄 𑀚𑀦𑁄𑀢𑀺.

𑀤𑀼𑀫𑁆𑀫𑁂𑀥𑀚𑀸𑀢𑀓𑀁 𑀤𑀲𑀫𑀁.

𑀅𑀢𑁆𑀣𑀓𑀸𑀫𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀣 𑀫𑀺𑀢𑁆𑀢𑀓 𑀫𑀸𑀢𑀼 𑀓𑀧𑁄𑀢𑀯𑀭𑁄, 𑀢𑀣𑀸 𑀯𑁂𑀴𑀽𑀓 𑀏𑀴𑀫𑀽𑀕𑁄 𑀭𑁄𑀳𑀺𑀡𑀻;

𑀓𑀧𑀺 𑀯𑀸𑀭𑀼𑀡𑀺 𑀘𑁂𑀢𑀘𑀭𑀸 𑀘 𑀧𑀼𑀦, 𑀢𑀣𑀸 𑀢𑀸𑀭𑀓 𑀬𑀜𑁆𑀜𑀯𑀭𑁂𑀦 𑀤𑀲𑀸𑀢𑀺.

𑀧𑀞𑀫𑁄 𑀧𑀡𑁆𑀡𑀸𑀲𑀓𑁄.