𑁪. 𑀓𑀼𑀮𑀸𑀯𑀓𑀯𑀕𑁆𑀕𑁄

𑁩𑁧. 𑀓𑀼𑀮𑀸𑀯𑀓𑀸 𑀫𑀸𑀢𑀮𑀺 𑀲𑀺𑀫𑁆𑀩𑀮𑀺𑀲𑁆𑀫𑀺𑀁, 𑀈𑀲𑀸𑀫𑀼𑀔𑁂𑀦 𑀧𑀭𑀺𑀯𑀚𑁆𑀚𑀬𑀲𑁆𑀲𑀼;

𑀓𑀸𑀫𑀁 𑀘𑀚𑀸𑀫 𑀅𑀲𑀼𑀭𑁂𑀲𑀼 𑀧𑀸𑀡𑀁, 𑀫𑀸 𑀫𑁂 𑀤𑀺𑀚𑀸 𑀯𑀺𑀓𑁆𑀓𑀼𑀮𑀯𑀸 [𑀫𑀸𑀬𑀺𑀫𑁂 𑀤𑀺𑀚𑀸 𑀯𑀺𑀓𑀼𑀮𑀸𑀯𑀸 (𑀲𑀻. 𑀲𑁆𑀬𑀸. 𑀧𑀻.)] 𑀅𑀳𑁂𑀲𑀼𑀦𑁆𑀢𑀺.

𑀓𑀼𑀮𑀸𑀯𑀓𑀚𑀸𑀢𑀓𑀁 𑀧𑀞𑀫𑀁.

𑁩𑁨. 𑀭𑀼𑀤𑀁 𑀫𑀦𑀼𑀜𑁆𑀜𑀁 𑀭𑀼𑀘𑀺𑀭𑀸 𑀘 𑀧𑀺𑀝𑁆𑀞𑀺, 𑀯𑁂𑀴𑀼𑀭𑀺𑀬𑀯𑀡𑁆𑀡𑀽𑀧𑀦𑀺𑀪𑀸 [𑀯𑀡𑁆𑀡𑀽𑀧𑀝𑀺𑀪𑀸 (𑀲𑁆𑀬𑀸.), 𑀯𑀡𑁆𑀡𑀲𑀦𑁆𑀦𑀺𑀪𑀸 (𑀓.)] 𑀘 𑀕𑀻𑀯𑀸;

𑀩𑁆𑀬𑀸𑀫𑀫𑀢𑁆𑀢𑀸𑀦𑀺 𑀘 𑀧𑁂𑀔𑀼𑀡𑀸𑀦𑀺, 𑀦𑀘𑁆𑀘𑁂𑀦 𑀢𑁂 𑀥𑀻𑀢𑀭𑀁 𑀦𑁄 𑀤𑀤𑀸𑀫𑀻𑀢𑀺.

𑀦𑀘𑁆𑀘𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁩𑁩. 𑀲𑀫𑁆𑀫𑁄𑀤𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀚𑀸𑀮𑀫𑀸𑀤𑀸𑀬 𑀧𑀓𑁆𑀔𑀺𑀦𑁄;

𑀬𑀤𑀸 𑀢𑁂 𑀯𑀺𑀯𑀤𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀏𑀳𑀺𑀦𑁆𑀢𑀺 𑀫𑁂 𑀯𑀲𑀦𑁆𑀢𑀺.

𑀲𑀫𑁆𑀫𑁄𑀤𑀫𑀸𑀦𑀚𑀸𑀢𑀓𑀁 𑀢𑀢𑀺𑀬𑀁.

𑁩𑁪. 𑀦 𑀫𑀁 𑀲𑀻𑀢𑀁 𑀦 𑀫𑀁 𑀉𑀡𑁆𑀳𑀁, 𑀦 𑀫𑀁 𑀚𑀸𑀮𑀲𑁆𑀫𑀺 𑀩𑀸𑀥𑀦𑀁;

𑀬𑀜𑁆𑀘 𑀫𑀁 𑀫𑀜𑁆𑀜𑀢𑁂 𑀫𑀘𑁆𑀙𑀻, 𑀅𑀜𑁆𑀜𑀁 𑀲𑁄 𑀭𑀢𑀺𑀬𑀸 𑀕𑀢𑁄𑀢𑀺.

𑀫𑀘𑁆𑀙𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁩𑁫. 𑀲𑀦𑁆𑀢𑀺 𑀧𑀓𑁆𑀔𑀸 𑀅𑀧𑀢𑀦𑀸, 𑀲𑀦𑁆𑀢𑀺 𑀧𑀸𑀤𑀸 𑀅𑀯𑀜𑁆𑀘𑀦𑀸;

𑀫𑀸𑀢𑀸𑀧𑀺𑀢𑀸 𑀘 𑀦𑀺𑀓𑁆𑀔𑀦𑁆𑀢𑀸, 𑀚𑀸𑀢𑀯𑁂𑀤 𑀧𑀝𑀺𑀓𑁆𑀓𑀫𑀸𑀢𑀺.

𑀯𑀝𑁆𑀝𑀓𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁩𑁬. 𑀬𑀁 𑀦𑀺𑀲𑁆𑀲𑀺𑀢𑀸 𑀚𑀕𑀢𑀺𑀭𑀼𑀳𑀁 𑀯𑀺𑀳𑀗𑁆𑀕𑀫𑀸, 𑀲𑁆𑀯𑀸𑀬𑀁 𑀅𑀕𑁆𑀕𑀺𑀁 𑀧𑀫𑀼𑀜𑁆𑀘𑀢𑀺;

𑀤𑀺𑀲𑀸 𑀪𑀚𑀣 𑀯𑀓𑁆𑀓𑀗𑁆𑀕𑀸 [𑀯𑀗𑁆𑀓𑀗𑁆𑀕𑀸 (𑀲𑁆𑀬𑀸.)], 𑀚𑀸𑀢𑀁 𑀲𑀭𑀡𑀢𑁄 𑀪𑀬𑀦𑁆𑀢𑀺.

𑀲𑀓𑀼𑀡𑀚𑀸𑀢𑀓𑀁 𑀙𑀝𑁆𑀞𑀁.

𑁩𑁭. 𑀬𑁂 𑀯𑀼𑀟𑁆𑀠 [𑀯𑀤𑁆𑀥 (𑀲𑀻. 𑀧𑀻.)] 𑀫𑀧𑀘𑀸𑀬𑀦𑁆𑀢𑀺, 𑀦𑀭𑀸 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀲𑀁𑀲𑀸, 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀕𑁆𑀕𑀢𑀻𑀢𑀺.

𑀢𑀺𑀢𑁆𑀢𑀺𑀭𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁩𑁮. 𑀦𑀸𑀘𑁆𑀘𑀦𑁆𑀢𑀁 𑀦𑀺𑀓𑀢𑀺𑀧𑁆𑀧𑀜𑁆𑀜𑁄, 𑀦𑀺𑀓𑀢𑁆𑀬𑀸 𑀲𑀼𑀔𑀫𑁂𑀥𑀢𑀺;

𑀆𑀭𑀸𑀥𑁂𑀢𑀺 𑀦𑀺𑀓𑀢𑀺𑀧𑁆𑀧𑀜𑁆𑀜𑁄 [𑀆𑀭𑀸𑀥𑁂 𑀦𑀺𑀓𑀢𑀺𑀧𑁆𑀧𑀜𑁆𑀜𑁄 (𑀧𑀻.)], 𑀩𑀓𑁄 𑀓𑀓𑁆𑀓𑀝𑀓𑀸𑀫𑀺𑀯𑀸𑀢𑀺.

𑀩𑀓𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁩𑁯. 𑀫𑀜𑁆𑀜𑁂 𑀲𑁄𑀯𑀡𑁆𑀡𑀬𑁄 𑀭𑀸𑀲𑀺, 𑀲𑁄𑀡𑁆𑀡𑀫𑀸𑀮𑀸 𑀘 𑀦𑀦𑁆𑀤𑀓𑁄;

𑀬𑀢𑁆𑀣 𑀤𑀸𑀲𑁄 𑀆𑀫𑀚𑀸𑀢𑁄, 𑀞𑀺𑀢𑁄 𑀣𑀼𑀮𑁆𑀮𑀸𑀦𑀺 [𑀣𑀽𑀮𑀸𑀦𑀺 (𑀓.)] 𑀕𑀚𑁆𑀚𑀢𑀻𑀢𑀺.

𑀦𑀦𑁆𑀤𑀚𑀸𑀢𑀓𑀁 𑀦𑀯𑀫𑀁.

𑁪𑁦. 𑀓𑀸𑀫𑀁 𑀧𑀢𑀸𑀫𑀺 𑀦𑀺𑀭𑀬𑀁, 𑀉𑀤𑁆𑀥𑀁𑀧𑀸𑀤𑁄 𑀅𑀯𑀁𑀲𑀺𑀭𑁄;

𑀦𑀸𑀦𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀳𑀦𑁆𑀤 𑀧𑀺𑀡𑁆𑀟𑀁 𑀧𑀝𑀺𑀕𑁆𑀕𑀳𑀸𑀢𑀺.

𑀔𑀤𑀺𑀭𑀗𑁆𑀕𑀸𑀭𑀚𑀸𑀢𑀓𑀁 𑀤𑀲𑀫𑀁.

𑀓𑀼𑀮𑀸𑀯𑀓𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀺𑀭𑀺𑀫𑀸𑀢𑀮𑀺 𑀥𑀻𑀢𑀭 𑀧𑀓𑁆𑀔𑀺𑀯𑀭𑁄, 𑀭𑀢𑀺𑀬𑀸𑀕𑀢𑁄 𑀫𑀸𑀢𑀸𑀧𑀺𑀢𑀸 𑀘 𑀧𑀼𑀦;

𑀚𑀕𑀢𑀻𑀭𑀼𑀳 𑀯𑀼𑀟𑁆𑀠 𑀲𑀼𑀓𑀓𑁆𑀓𑀝𑀓𑁄, 𑀢𑀣𑀸 𑀦𑀦𑁆𑀤𑀓𑀧𑀺𑀡𑁆𑀟𑀯𑀭𑁂𑀦 𑀤𑀲𑀸𑀢𑀺.