𑁩. 𑀓𑀼𑀭𑀼𑀗𑁆𑀕𑀯𑀕𑁆𑀕𑁄

𑁨𑁧. 𑀜𑀸𑀢𑀫𑁂𑀢𑀁 𑀓𑀼𑀭𑀼𑀗𑁆𑀕𑀲𑁆𑀲, 𑀬𑀁 𑀢𑁆𑀯𑀁 𑀲𑁂𑀧𑀡𑁆𑀡𑀺 𑀲𑀺𑀬𑁆𑀬𑀲𑀺 [𑀲𑁂𑀬𑁆𑀬𑀲𑀺 (𑀲𑀻. 𑀲𑁆𑀬𑀸. 𑀧𑀻.)];

𑀅𑀜𑁆𑀜𑀁 𑀲𑁂𑀧𑀡𑁆𑀡𑀺 𑀕𑀘𑁆𑀙𑀸𑀫𑀺, 𑀦 𑀫𑁂 𑀢𑁂 𑀭𑀼𑀘𑁆𑀘𑀢𑁂 𑀨𑀮𑀦𑁆𑀢𑀺.

𑀓𑀼𑀭𑀼𑀗𑁆𑀕𑀫𑀺𑀕𑀚𑀸𑀢𑀓𑀁 𑀧𑀞𑀫𑀁.

𑁨𑁨. 𑀬𑁂 𑀓𑀼𑀓𑁆𑀓𑀼𑀭𑀸 𑀭𑀸𑀚𑀓𑀼𑀮𑀫𑁆𑀳𑀺 𑀯𑀤𑁆𑀥𑀸, 𑀓𑁄𑀮𑁂𑀬𑁆𑀬𑀓𑀸 𑀯𑀡𑁆𑀡𑀩𑀮𑀽𑀧𑀧𑀦𑁆𑀦𑀸;

𑀢𑁂𑀫𑁂 𑀦 𑀯𑀚𑁆𑀛𑀸 𑀫𑀬𑀫𑀲𑁆𑀫 𑀯𑀚𑁆𑀛𑀸, 𑀦𑀸𑀬𑀁 𑀲𑀖𑀘𑁆𑀘𑀸 𑀤𑀼𑀩𑁆𑀩𑀮𑀖𑀸𑀢𑀺𑀓𑀸𑀬𑀦𑁆𑀢𑀺.

𑀓𑀼𑀓𑁆𑀓𑀼𑀭𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁨𑁩. 𑀅𑀧𑀺 𑀧𑀲𑁆𑀲𑁂𑀦 𑀲𑁂𑀫𑀸𑀦𑁄, 𑀲𑀮𑁆𑀮𑁂𑀪𑀺 𑀲𑀮𑁆𑀮𑀮𑀻𑀓𑀢𑁄;

𑀲𑁂𑀬𑁆𑀬𑁄𑀯 𑀯𑀴𑀯𑀸 𑀕𑁄𑀚𑁄 [𑀪𑁄𑀚𑁆𑀚𑁄 (𑀲𑀻.), 𑀪𑁄𑀚𑁆𑀛𑁄 (𑀲𑁆𑀬𑀸. 𑀧𑀻.)], 𑀬𑀼𑀜𑁆𑀚 𑀫𑀜𑁆𑀜𑁂𑀯 𑀲𑀸𑀭𑀣𑀻𑀢𑀺.

𑀕𑁄𑀚𑀸𑀦𑀻𑀬 [𑀪𑁄𑀚𑀸𑀚𑀸𑀦𑀻𑀬 (𑀲𑀻. 𑀲𑁆𑀬𑀸. 𑀧𑀻.)] 𑀚𑀸𑀢𑀓𑀁 𑀢𑀢𑀺𑀬𑀁.

𑁨𑁪. 𑀬𑀤𑀸 𑀬𑀤𑀸 𑀬𑀢𑁆𑀣 𑀬𑀤𑀸, 𑀬𑀢𑁆𑀣 𑀬𑀢𑁆𑀣 𑀬𑀤𑀸 𑀬𑀤𑀸;

𑀆𑀚𑀜𑁆𑀜𑁄 𑀓𑀼𑀭𑀼𑀢𑁂 𑀯𑁂𑀕𑀁, 𑀳𑀸𑀬𑀦𑁆𑀢𑀺 𑀢𑀢𑁆𑀣 𑀯𑀸𑀴𑀯𑀸𑀢𑀺.

𑀆𑀚𑀜𑁆𑀜𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁨𑁫. 𑀅𑀜𑁆𑀜𑀫𑀜𑁆𑀜𑁂𑀳𑀺 𑀢𑀺𑀢𑁆𑀣𑁂𑀳𑀺, 𑀅𑀲𑁆𑀲𑀁 𑀧𑀸𑀬𑁂𑀳𑀺 𑀲𑀸𑀭𑀣𑀺;

𑀅𑀘𑁆𑀘𑀸𑀲𑀦𑀲𑁆𑀲 𑀧𑀼𑀭𑀺𑀲𑁄, 𑀧𑀸𑀬𑀸𑀲𑀲𑁆𑀲𑀧𑀺 𑀢𑀧𑁆𑀧𑀢𑀻𑀢𑀺.

𑀢𑀺𑀢𑁆𑀣𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁨𑁬. 𑀧𑀼𑀭𑀸𑀡𑀘𑁄𑀭𑀸𑀦 𑀯𑀘𑁄 𑀦𑀺𑀲𑀫𑁆𑀫, 𑀫𑀳𑀺𑀴𑀸𑀫𑀼𑀔𑁄 𑀧𑁄𑀣𑀬𑀫𑀦𑁆𑀯𑀘𑀸𑀭𑀻;

𑀲𑀼𑀲𑀜𑁆𑀜𑀢𑀸𑀦𑀜𑁆𑀳𑀺 𑀯𑀘𑁄 𑀦𑀺𑀲𑀫𑁆𑀫, 𑀕𑀚𑀼𑀢𑁆𑀢𑀫𑁄 𑀲𑀩𑁆𑀩𑀕𑀼𑀡𑁂𑀲𑀼 𑀅𑀝𑁆𑀞𑀸𑀢𑀺.

𑀫𑀳𑀺𑀴𑀸𑀫𑀼𑀔𑀚𑀸𑀢𑀓𑀁 𑀙𑀝𑁆𑀞𑀁.

𑁨𑁭. 𑀦𑀸𑀮𑀁 𑀓𑀩𑀴𑀁 𑀧𑀤𑀸𑀢𑀯𑁂, 𑀦 𑀘 𑀧𑀺𑀡𑁆𑀟𑀁 𑀦 𑀓𑀼𑀲𑁂 𑀦 𑀖𑀁𑀲𑀺𑀢𑀼𑀁;

𑀫𑀜𑁆𑀜𑀸𑀫𑀺 𑀅𑀪𑀺𑀡𑁆𑀳𑀤𑀲𑁆𑀲𑀦𑀸, 𑀦𑀸𑀕𑁄 𑀲𑁆𑀦𑁂𑀳𑀫𑀓𑀸𑀲𑀺 [𑀲𑀺𑀦𑁂𑀳𑀫𑀓𑀸𑀲𑀺 (𑀲𑀻. 𑀲𑁆𑀬𑀸. 𑀧𑀻.)] 𑀓𑀼𑀓𑁆𑀓𑀼𑀭𑁂𑀢𑀺.

𑀅𑀪𑀺𑀡𑁆𑀳𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁨𑁮. 𑀫𑀦𑀼𑀜𑁆𑀜𑀫𑁂𑀯 𑀪𑀸𑀲𑁂𑀬𑁆𑀬, 𑀦𑀸𑀫𑀦𑀼𑀜𑁆𑀜𑀁 𑀓𑀼𑀤𑀸𑀘𑀦𑀁;

𑀫𑀦𑀼𑀜𑁆𑀜𑀁 𑀪𑀸𑀲𑀫𑀸𑀦𑀲𑁆𑀲, 𑀕𑀭𑀼𑀁 𑀪𑀸𑀭𑀁 𑀉𑀤𑀤𑁆𑀥𑀭𑀺;

𑀥𑀦𑀜𑁆𑀘 𑀦𑀁 𑀅𑀮𑀸𑀪𑁂𑀲𑀺, 𑀢𑁂𑀦 𑀘𑀢𑁆𑀢𑀫𑀦𑁄 𑀅𑀳𑀽𑀢𑀺.

𑀦𑀦𑁆𑀤𑀺𑀯𑀺𑀲𑀸𑀮𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁨𑁯. 𑀬𑀢𑁄 𑀬𑀢𑁄 𑀕𑀭𑀼 𑀥𑀼𑀭𑀁, 𑀬𑀢𑁄 𑀕𑀫𑁆𑀪𑀻𑀭𑀯𑀢𑁆𑀢𑀦𑀻;

𑀢𑀤𑀸𑀲𑁆𑀲𑀼 𑀓𑀡𑁆𑀳𑀁 𑀬𑀼𑀜𑁆𑀚𑀦𑁆𑀢𑀺, 𑀲𑁆𑀯𑀸𑀲𑁆𑀲𑀼 𑀢𑀁 𑀯𑀳𑀢𑁂 𑀥𑀼𑀭𑀦𑁆𑀢𑀺.

𑀓𑀡𑁆𑀳𑀚𑀸𑀢𑀓𑀁 𑀦𑀯𑀫𑀁.

𑁩𑁦. 𑀫𑀸 𑀫𑀼𑀦𑀺𑀓𑀲𑁆𑀲 𑀧𑀺𑀳𑀬𑀺, 𑀆𑀢𑀼𑀭𑀦𑁆𑀦𑀸𑀦𑀺 𑀪𑀼𑀜𑁆𑀚𑀢𑀺;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀼𑀲𑀁 𑀔𑀸𑀤, 𑀏𑀢𑀁 𑀤𑀻𑀖𑀸𑀬𑀼𑀮𑀓𑁆𑀔𑀡𑀦𑁆𑀢𑀺.

𑀫𑀼𑀦𑀺𑀓𑀚𑀸𑀢𑀓𑀁 𑀤𑀲𑀫𑀁.

𑀓𑀼𑀭𑀼𑀗𑁆𑀕𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀼𑀭𑀼𑀗𑁆𑀕𑀲𑁆𑀲 𑀓𑀼𑀓𑁆𑀓𑀼𑀭𑀕𑁄𑀚𑀯𑀭𑁄, 𑀧𑀼𑀦 𑀯𑀸𑀴𑀯𑀲𑁆𑀲𑀲𑀺𑀭𑀺𑀯𑁆𑀳𑀬𑀦𑁄 [𑀲𑀺𑀭𑀺𑀯𑀬𑀦𑁄 (𑀲𑀩𑁆𑀩𑀢𑁆𑀣)];

𑀫𑀳𑀺𑀴𑀸𑀫𑀼𑀔𑀦𑀸𑀫𑀦𑀼𑀜𑁆𑀜𑀯𑀭𑁄, 𑀯𑀳𑀢𑁂 𑀥𑀼𑀭 𑀫𑀼𑀦𑀺𑀓𑁂𑀦 𑀤𑀲𑀸𑀢𑀺.