𑁨. 𑀲𑀻𑀮𑀯𑀕𑁆𑀕𑁄

𑁧𑁧. 𑀳𑁄𑀢𑀺 𑀲𑀻𑀮𑀯𑀢𑀁 𑀅𑀢𑁆𑀣𑁄, 𑀧𑀝𑀺𑀲𑀦𑁆𑀣𑀸𑀭 [𑀧𑀝𑀺𑀲𑀦𑁆𑀥𑀸𑀭 (𑀓.)] 𑀯𑀼𑀢𑁆𑀢𑀺𑀦𑀁;

𑀮𑀓𑁆𑀔𑀡𑀁 𑀧𑀲𑁆𑀲 𑀆𑀬𑀦𑁆𑀢𑀁, 𑀜𑀸𑀢𑀺𑀲𑀗𑁆𑀖𑀧𑀼𑀭𑀓𑁆𑀔𑀢𑀁 [𑀧𑀼𑀭𑀓𑁆𑀔𑀺𑀢𑀁 (𑀲𑁆𑀬𑀸.), 𑀧𑀼𑀭𑁂𑀓𑁆𑀔𑀺𑀢𑀁 (𑀓.)];

𑀅𑀣 𑀧𑀲𑁆𑀲𑀲𑀺𑀫𑀁 𑀓𑀸𑀴𑀁, 𑀲𑀼𑀯𑀺𑀳𑀻𑀦𑀁𑀯 𑀜𑀸𑀢𑀺𑀪𑀻𑀢𑀺.

𑀮𑀓𑁆𑀔𑀡𑀫𑀺𑀕𑀚𑀸𑀢𑀓𑀁 𑀧𑀞𑀫𑀁.

𑁧𑁨. 𑀦𑀺𑀕𑁆𑀭𑁄𑀥𑀫𑁂𑀯 𑀲𑁂𑀯𑁂𑀬𑁆𑀬, 𑀦 𑀲𑀸𑀔𑀫𑀼𑀧𑀲𑀁𑀯𑀲𑁂;

𑀦𑀺𑀕𑁆𑀭𑁄𑀥𑀲𑁆𑀫𑀺𑀁 𑀫𑀢𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀲𑀸𑀔𑀲𑁆𑀫𑀺 [𑀲𑀸𑀔𑀲𑁆𑀫𑀺𑀁 (𑀲𑀻. 𑀧𑀻.)] 𑀚𑀻𑀯𑀺𑀢𑀦𑁆𑀢𑀺.

𑀦𑀺𑀕𑁆𑀭𑁄𑀥𑀫𑀺𑀕𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁧𑁩. 𑀥𑀺𑀭𑀢𑁆𑀣𑀼 𑀓𑀡𑁆𑀟𑀺𑀦𑀁 𑀲𑀮𑁆𑀮𑀁, 𑀧𑀼𑀭𑀺𑀲𑀁 𑀕𑀸𑀴𑁆𑀳𑀯𑁂𑀥𑀺𑀦𑀁;

𑀥𑀺𑀭𑀢𑁆𑀣𑀼 𑀢𑀁 𑀚𑀦𑀧𑀤𑀁, 𑀬𑀢𑁆𑀣𑀺𑀢𑁆𑀣𑀻 𑀧𑀭𑀺𑀡𑀸𑀬𑀺𑀓𑀸;

𑀢𑁂 𑀘𑀸𑀧𑀺 𑀥𑀺𑀓𑁆𑀓𑀺𑀢𑀸 [𑀥𑀺𑀓𑁆𑀓𑀢𑀸 (?)] 𑀲𑀢𑁆𑀢𑀸, 𑀬𑁂 𑀇𑀢𑁆𑀣𑀻𑀦𑀁 𑀯𑀲𑀁𑀕𑀢𑀸𑀢𑀺.

𑀓𑀡𑁆𑀟𑀺𑀚𑀸𑀢𑀓𑀁 𑀢𑀢𑀺𑀬𑀁.

𑁧𑁪. 𑀦 𑀓𑀺𑀭𑀢𑁆𑀣𑀺 𑀭𑀲𑁂𑀳𑀺 𑀧𑀸𑀧𑀺𑀬𑁄, 𑀆𑀯𑀸𑀲𑁂𑀳𑀺 𑀯 [𑀯𑀸 (𑀲𑀩𑁆𑀩𑀢𑁆𑀣)] 𑀲𑀦𑁆𑀣𑀯𑁂𑀳𑀺 𑀯𑀸;

𑀯𑀸𑀢𑀫𑀺𑀕𑀁 𑀕𑀳𑀦𑀦𑀺𑀲𑁆𑀲𑀺𑀢𑀁 [𑀕𑁂𑀳𑀦𑀺𑀲𑁆𑀲𑀺𑀢𑀁 (𑀲𑀻. 𑀧𑀻.)], 𑀯𑀲𑀫𑀸𑀦𑁂𑀲𑀺 𑀭𑀲𑁂𑀳𑀺 𑀲𑀜𑁆𑀚𑀬𑁄𑀢𑀺.

𑀯𑀸𑀢𑀫𑀺𑀕𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁧𑁫. 𑀅𑀝𑁆𑀞𑀓𑁆𑀔𑀼𑀭𑀁 𑀔𑀭𑀸𑀤𑀺𑀬𑁂, 𑀫𑀺𑀕𑀁 𑀯𑀗𑁆𑀓𑀸𑀢𑀺𑀯𑀗𑁆𑀓𑀺𑀦𑀁;

𑀲𑀢𑁆𑀢𑀳𑀺 𑀓𑀸𑀮𑀸𑀢𑀺𑀓𑁆𑀓𑀦𑁆𑀢𑀁 [𑀲𑀢𑁆𑀢𑀳𑀺 𑀓𑀮𑀸𑀳’𑀢𑀺𑀓𑁆𑀓𑀦𑁆𑀢𑀁 (𑀲𑀻.), 𑀲𑀢𑁆𑀢𑀓𑀸𑀮𑁂𑀳’𑀢𑀺𑀓𑁆𑀓𑀦𑁆𑀢𑀁 (𑀲𑁆𑀬𑀸.), 𑀲𑀢𑁆𑀢𑀳𑀺 𑀓𑀸𑀮𑀸𑀳’𑀢𑀺𑀓𑁆𑀓𑀦𑁆𑀢𑀁 (𑀧𑀻.)], 𑀦 𑀦𑀁 𑀑𑀯𑀤𑀺𑀢𑀼𑀲𑁆𑀲𑀳𑁂𑀢𑀺.

𑀔𑀭𑀸𑀤𑀺𑀬𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁧𑁬. 𑀫𑀺𑀕𑀁 𑀢𑀺𑀧𑀮𑁆𑀮𑀢𑁆𑀣 [𑀢𑀺𑀧𑀮𑁆𑀮𑀢𑁆𑀢 (𑀓.)] 𑀫𑀦𑁂𑀓𑀫𑀸𑀬𑀁, 𑀅𑀝𑁆𑀞𑀓𑁆𑀔𑀼𑀭𑀁 𑀅𑀟𑁆𑀠𑀭𑀢𑁆𑀢𑀸𑀧𑀧𑀸𑀬𑀺𑀁 [𑀅𑀟𑁆𑀠𑀭𑀢𑁆𑀢𑀸𑀯𑀧𑀸𑀬𑀺𑀁 (𑀲𑀻. 𑀧𑀻.)];

𑀏𑀓𑁂𑀦 𑀲𑁄𑀢𑁂𑀦 𑀙𑀫𑀸𑀲𑁆𑀲𑀲𑀦𑁆𑀢𑁄, 𑀙𑀳𑀺 𑀓𑀮𑀸𑀳𑀺𑀢𑀺𑀪𑁄𑀢𑀺 [𑀓𑀮𑀸𑀳𑀢𑀺𑀪𑁄𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀪𑀸𑀕𑀺𑀦𑁂𑀬𑁆𑀬𑁄𑀢𑀺.

𑀢𑀺𑀧𑀮𑁆𑀮𑀢𑁆𑀣𑀫𑀺𑀕𑀚𑀸𑀢𑀓𑀁 𑀙𑀝𑁆𑀞𑀁.

𑁧𑁭. 𑀓𑀸𑀴𑁂 𑀯𑀸 𑀬𑀤𑀺 𑀯𑀸 𑀚𑀼𑀡𑁆𑀳𑁂, 𑀬𑀤𑀸 𑀯𑀸𑀬𑀢𑀺 𑀫𑀸𑀮𑀼𑀢𑁄;

𑀯𑀸𑀢𑀚𑀸𑀦𑀺 𑀳𑀺 𑀲𑀻𑀢𑀸𑀦𑀺, 𑀉𑀪𑁄𑀢𑁆𑀣𑀫𑀧𑀭𑀸𑀚𑀺𑀢𑀸𑀢𑀺.

𑀫𑀸𑀮𑀼𑀢𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁧𑁮. 𑀏𑀯𑀁 𑀘𑁂 𑀲𑀢𑁆𑀢𑀸 𑀚𑀸𑀦𑁂𑀬𑁆𑀬𑀼𑀁, 𑀤𑀼𑀓𑁆𑀔𑀸𑀬𑀁 𑀚𑀸𑀢𑀺𑀲𑀫𑁆𑀪𑀯𑁄;

𑀦 𑀧𑀸𑀡𑁄 𑀧𑀸𑀡𑀺𑀦𑀁 𑀳𑀜𑁆𑀜𑁂, 𑀧𑀸𑀡𑀖𑀸𑀢𑀻 𑀳𑀺 𑀲𑁄𑀘𑀢𑀻𑀢𑀺.

𑀫𑀢𑀓𑀪𑀢𑁆𑀢𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁧𑁯. 𑀲𑀘𑁂 𑀫𑀼𑀘𑁆𑀘𑁂 [𑀫𑀼𑀜𑁆𑀘𑁂 (𑀲𑀻. 𑀲𑁆𑀬𑀸. 𑀧𑀻.)] 𑀧𑁂𑀘𑁆𑀘 𑀫𑀼𑀘𑁆𑀘𑁂 [𑀫𑀼𑀜𑁆𑀘𑁂 (𑀲𑀻. 𑀲𑁆𑀬𑀸. 𑀧𑀻.)], 𑀫𑀼𑀘𑁆𑀘𑀫𑀸𑀦𑁄 𑀳𑀺 𑀩𑀚𑁆𑀛𑀢𑀺;

𑀦 𑀳𑁂𑀯𑀁 𑀥𑀻𑀭𑀸 𑀫𑀼𑀘𑁆𑀘𑀦𑁆𑀢𑀺, 𑀫𑀼𑀢𑁆𑀢𑀺 𑀩𑀸𑀮𑀲𑁆𑀲 𑀩𑀦𑁆𑀥𑀦𑀦𑁆𑀢𑀺.

𑀆𑀬𑀸𑀘𑀺𑀢𑀪𑀢𑁆𑀢𑀚𑀸𑀢𑀓𑀁 𑀦𑀯𑀫𑀁.

𑁨𑁦. 𑀤𑀺𑀲𑁆𑀯𑀸 𑀧𑀤𑀫𑀦𑀼𑀢𑁆𑀢𑀺𑀡𑁆𑀡𑀁, 𑀤𑀺𑀲𑁆𑀯𑀸𑀦𑁄𑀢𑀭𑀺𑀢𑀁 𑀧𑀤𑀁;

𑀦𑀴𑁂𑀦 𑀯𑀸𑀭𑀺𑀁 𑀧𑀺𑀲𑁆𑀲𑀸𑀫 [𑀧𑀺𑀯𑀺𑀲𑁆𑀲𑀸𑀫 (𑀲𑀻. 𑀲𑁆𑀬𑀸. 𑀧𑀻.)], 𑀦𑁂𑀯 [𑀦 𑀘 (𑀓.)] 𑀫𑀁 𑀢𑁆𑀯𑀁 𑀯𑀥𑀺𑀲𑁆𑀲𑀲𑀻𑀢𑀺.

𑀦𑀴𑀧𑀸𑀦𑀚𑀸𑀢𑀓𑀁 𑀤𑀲𑀫𑀁.

𑀲𑀻𑀮𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀣 𑀮𑀓𑁆𑀔𑀡 𑀲𑀸𑀔 𑀥𑀺𑀭𑀢𑁆𑀣𑀼 𑀧𑀼𑀦, 𑀦 𑀓𑀺𑀭𑀢𑁆𑀣𑀺 𑀭𑀲𑁂𑀳𑀺 𑀔𑀭𑀸𑀤𑀺𑀬𑀸;

𑀅𑀢𑀺𑀪𑁄𑀢𑀺 𑀯𑀭 [𑀭𑀲 (𑀲𑀩𑁆𑀩𑀢𑁆𑀣)] 𑀫𑀸𑀮𑀼𑀢 𑀧𑀸𑀡, 𑀫𑀼𑀘𑁆𑀘𑁂𑀦 𑀦𑀴𑀅𑀯𑁆𑀳𑀬𑀦𑁂𑀦 𑀪𑀯𑀦𑁆𑀢𑀺 𑀤𑀲𑀸𑀢𑀺.