𑁧𑁪. 𑀅𑀲𑀫𑁆𑀧𑀤𑀸𑀦𑀯𑀕𑁆𑀕𑁄

𑁧𑁩𑁧. 𑀅𑀲𑀫𑁆𑀧𑀤𑀸𑀦𑁂𑀦𑀺𑀢𑀭𑀻𑀢𑀭𑀲𑁆𑀲, 𑀩𑀸𑀮𑀲𑁆𑀲 𑀫𑀺𑀢𑁆𑀢𑀸𑀦𑀺 𑀓𑀮𑀻 𑀪𑀯𑀦𑁆𑀢𑀺;

𑀢𑀲𑁆𑀫𑀸 𑀳𑀭𑀸𑀫𑀺 𑀪𑀼𑀲𑀁 𑀅𑀟𑁆𑀠𑀫𑀸𑀦𑀁, 𑀫𑀸 𑀫𑁂 𑀫𑀺𑀢𑁆𑀢𑀺 𑀚𑀻𑀬𑀺𑀢𑁆𑀣 𑀲𑀲𑁆𑀲𑀢𑀸𑀬𑀦𑁆𑀢𑀺.

𑀅𑀲𑀫𑁆𑀧𑀤𑀸𑀦𑀚𑀸𑀢𑀓𑀁 𑀧𑀞𑀫𑀁.

𑁧𑁩𑁨. 𑀓𑀼𑀲𑀮𑀽𑀧𑀤𑁂𑀲𑁂 𑀥𑀺𑀢𑀺𑀬𑀸 𑀤𑀴𑁆𑀳𑀸𑀬 𑀘, 𑀅𑀦𑀺𑀯𑀢𑁆𑀢𑀺𑀢𑀢𑁆𑀢𑀸𑀪𑀬𑀪𑀻𑀭𑀼𑀢𑀸𑀬 [𑀅𑀯𑀢𑁆𑀣𑀺𑀢𑀢𑁆𑀢𑀸𑀪𑀬𑀪𑀻𑀭𑀼𑀢𑀸𑀬 (𑀲𑀻. 𑀲𑁆𑀬𑀸. 𑀧𑀻.)] 𑀘;

𑀦 𑀭𑀓𑁆𑀔𑀲𑀻𑀦𑀁 𑀯𑀲𑀫𑀸𑀕𑀫𑀺𑀫𑁆𑀳𑀲𑁂, 𑀲 𑀲𑁄𑀢𑁆𑀣𑀺𑀪𑀸𑀯𑁄 𑀫𑀳𑀢𑀸 𑀪𑀬𑁂𑀦 𑀫𑁂𑀢𑀺.

𑀪𑀻𑀭𑀼𑀓 [𑀧𑀜𑁆𑀘𑀕𑀭𑀼𑀓 (𑀲𑀻. 𑀧𑀻.), 𑀧𑀜𑁆𑀘𑀪𑀻𑀭𑀼𑀓 (𑀲𑁆𑀬𑀸.), 𑀅𑀪𑀬𑀪𑀻𑀭𑀼𑀢§(?)] 𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁧𑁩𑁩. 𑀔𑁂𑀫𑀁 𑀬𑀳𑀺𑀁 𑀢𑀢𑁆𑀣 𑀅𑀭𑀻 𑀉𑀤𑀻𑀭𑀺𑀢𑁄 [𑀅𑀭𑀺 𑀉𑀤𑁆𑀥𑀭𑀺𑀢𑁄 (𑀓.)], 𑀤𑀓𑀲𑁆𑀲 𑀫𑀚𑁆𑀛𑁂 𑀚𑀮𑀢𑁂 𑀖𑀢𑀸𑀲𑀦𑁄;

𑀦 𑀅𑀚𑁆𑀚 𑀯𑀸𑀲𑁄 𑀫𑀳𑀺𑀬𑀸 𑀫𑀳𑀻𑀭𑀼𑀳𑁂, 𑀤𑀺𑀲𑀸 𑀪𑀚𑀯𑁆𑀳𑁄 𑀲𑀭𑀡𑀸𑀚𑁆𑀚 𑀦𑁄 𑀪𑀬𑀦𑁆𑀢𑀺.

𑀖𑀢𑀸𑀲𑀦𑀚𑀸𑀢𑀓𑀁 𑀢𑀢𑀺𑀬𑀁.

𑁧𑁩𑁪. 𑀬𑁂 𑀲𑀜𑁆𑀜𑀺𑀦𑁄 𑀢𑁂𑀧𑀺 𑀤𑀼𑀕𑁆𑀕𑀢𑀸, 𑀬𑁂𑀧𑀺 𑀅𑀲𑀜𑁆𑀜𑀺𑀦𑁄 𑀢𑁂𑀧𑀺 𑀤𑀼𑀕𑁆𑀕𑀢𑀸;

𑀏𑀢𑀁 𑀉𑀪𑀬𑀁 𑀯𑀺𑀯𑀚𑁆𑀚𑀬, 𑀢𑀁 𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀅𑀦𑀗𑁆𑀕𑀡𑀦𑁆𑀢𑀺.

𑀛𑀸𑀦𑀲𑁄𑀥𑀦𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁧𑁩𑁫. 𑀘𑀦𑁆𑀤𑀸𑀪𑀁 𑀲𑀽𑀭𑀺𑀬𑀸𑀪𑀜𑁆𑀘, 𑀬𑁄𑀥 𑀧𑀜𑁆𑀜𑀸𑀬 𑀕𑀸𑀥𑀢𑀺.

𑀅𑀯𑀺𑀢𑀓𑁆𑀓𑁂𑀦 𑀛𑀸𑀦𑁂𑀦, 𑀳𑁄𑀢𑀺 𑀆𑀪𑀲𑁆𑀲𑀭𑀽𑀧𑀕𑁄𑀢𑀺.

𑀘𑀦𑁆𑀤𑀸𑀪𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁧𑁩𑁬. 𑀬𑀁 𑀮𑀤𑁆𑀥𑀁 𑀢𑁂𑀦 𑀢𑀼𑀝𑁆𑀞𑀩𑁆𑀩𑀁, 𑀅𑀢𑀺𑀮𑁄𑀪𑁄 𑀳𑀺 𑀧𑀸𑀧𑀓𑁄;

𑀳𑀁𑀲𑀭𑀸𑀚𑀁 𑀕𑀳𑁂𑀢𑁆𑀯𑀸𑀦, 𑀲𑀼𑀯𑀡𑁆𑀡𑀸 𑀧𑀭𑀺𑀳𑀸𑀬𑀣𑀸𑀢𑀺.

𑀲𑀼𑀯𑀡𑁆𑀡𑀳𑀁𑀲𑀚𑀸𑀢𑀓𑀁 𑀙𑀝𑁆𑀞𑀁.

𑁧𑁩𑁭. 𑀬𑀢𑁆𑀣𑁂𑀓𑁄 𑀮𑀪𑀢𑁂 𑀩𑀩𑁆𑀩𑀼, 𑀤𑀼𑀢𑀺𑀬𑁄 𑀢𑀢𑁆𑀣 𑀚𑀸𑀬𑀢𑀺;

𑀢𑀢𑀺𑀬𑁄 𑀘 𑀘𑀢𑀼𑀢𑁆𑀣𑁄 𑀘, 𑀇𑀤𑀁 𑀢𑁂 𑀩𑀩𑁆𑀩𑀼𑀓𑀸 𑀩𑀺𑀮𑀦𑁆𑀢𑀺.

𑀩𑀩𑁆𑀩𑀼𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁧𑁩𑁮. 𑀓𑀺𑀁 𑀢𑁂 𑀚𑀝𑀸𑀳𑀺 𑀤𑀼𑀫𑁆𑀫𑁂𑀥, 𑀓𑀺𑀁 𑀢𑁂 𑀅𑀚𑀺𑀦𑀲𑀸𑀝𑀺𑀬𑀸;

𑀅𑀩𑁆𑀪𑀦𑁆𑀢𑀭𑀁 𑀢𑁂 𑀕𑀳𑀦𑀁, 𑀩𑀸𑀳𑀺𑀭𑀁 𑀧𑀭𑀺𑀫𑀚𑁆𑀚𑀲𑀻𑀢𑀺.

𑀕𑁄𑀥𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁧𑁩𑁯. 𑀅𑀓𑁆𑀔𑀻 𑀪𑀺𑀦𑁆𑀦𑀸 𑀧𑀝𑁄 𑀦𑀝𑁆𑀞𑁄, 𑀲𑀔𑀺𑀕𑁂𑀳𑁂 𑀘 𑀪𑀡𑁆𑀟𑀦𑀁;

𑀉𑀪𑀢𑁄 𑀧𑀤𑀼𑀝𑁆𑀞𑀸 𑀓𑀫𑁆𑀫𑀦𑁆𑀢𑀸 [𑀧𑀤𑀼𑀝𑁆𑀞𑀓𑀫𑁆𑀫𑀦𑁆𑀢𑁄 (𑀲𑀻.), 𑀧𑀤𑀼𑀝𑁆𑀞𑁄 𑀓𑀫𑁆𑀫𑀦𑁆𑀢𑁄 (𑀧𑀻.)], 𑀉𑀤𑀓𑀫𑁆𑀳𑀺 𑀣𑀮𑀫𑁆𑀳𑀺 𑀘𑀸𑀢𑀺.

𑀉𑀪𑀢𑁄𑀪𑀝𑁆𑀞𑀚𑀸𑀢𑀓𑀁 𑀦𑀯𑀫𑀁.

𑁧𑁪𑁦. 𑀦𑀺𑀘𑁆𑀘𑀁 𑀉𑀩𑁆𑀩𑀺𑀕𑁆𑀕𑀳𑀤𑀬𑀸, 𑀲𑀩𑁆𑀩𑀮𑁄𑀓𑀯𑀺𑀳𑁂𑀲𑀓𑀸;

𑀢𑀲𑁆𑀫𑀸 𑀦𑁂𑀲𑀁 𑀯𑀲𑀸 𑀦𑀢𑁆𑀣𑀺, 𑀓𑀸𑀓𑀸𑀦𑀫𑁆𑀳𑀸𑀓 [𑀓𑀸𑀓𑀸𑀦𑀲𑁆𑀫𑀸𑀓 (𑀲𑀻. 𑀲𑁆𑀬𑀸. 𑀧𑀻.)] 𑀜𑀸𑀢𑀺𑀦𑀦𑁆𑀢𑀺.

𑀓𑀸𑀓𑀚𑀸𑀢𑀓𑀁 𑀤𑀲𑀫𑀁.

𑀅𑀲𑀫𑁆𑀧𑀤𑀸𑀦𑀯𑀕𑁆𑀕𑁄 𑀘𑀼𑀤𑁆𑀤𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀇𑀢𑀭𑀻𑀢𑀭 𑀭𑀓𑁆𑀔𑀲𑀺 𑀔𑁂𑀫𑀺𑀬𑁄 𑀘, 𑀧𑀭𑁄𑀲𑀢𑀧𑀜𑁆𑀳𑁂𑀦 𑀆𑀪𑀲𑁆𑀲𑀭𑁄 𑀧𑀼𑀦;

𑀅𑀣 𑀳𑀁𑀲𑀯𑀭𑀼𑀢𑁆𑀢𑀫𑀩𑀩𑁆𑀩𑀼𑀚𑀝𑀁, 𑀧𑀝𑀦𑀝𑁆𑀞𑀓 𑀓𑀸𑀓𑀯𑀭𑁂𑀦 𑀤𑀲𑀸𑀢𑀺.