𑁧𑁩. 𑀓𑀼𑀲𑀦𑀸𑀴𑀺𑀯𑀕𑁆𑀕𑁄

𑁧𑁨𑁧. 𑀓𑀭𑁂 𑀲𑀭𑀺𑀓𑁆𑀔𑁄 𑀅𑀣 𑀯𑀸𑀧𑀺 𑀲𑁂𑀝𑁆𑀞𑁄, 𑀦𑀺𑀳𑀻𑀦𑀓𑁄 𑀯𑀸𑀧𑀺 𑀓𑀭𑁂𑀬𑁆𑀬 𑀏𑀓𑁄;

𑀓𑀭𑁂𑀬𑁆𑀬𑀼𑀫𑁂𑀢𑁂 [𑀓𑀭𑁂𑀬𑁆𑀬𑀼𑀁 𑀢𑁂 (𑀲𑀻. 𑀧𑀻.)] 𑀩𑁆𑀬𑀲𑀦𑁂 𑀉𑀢𑁆𑀢𑀫𑀢𑁆𑀣𑀁, 𑀬𑀣𑀸 𑀅𑀳𑀁 𑀓𑀼𑀲𑀦𑀸𑀴𑀺 𑀭𑀼𑀘𑀸𑀬𑀦𑁆𑀢𑀺.

𑀓𑀼𑀲𑀦𑀸𑀴𑀺𑀚𑀸𑀢𑀓𑀁 𑀧𑀞𑀫𑀁.

𑁧𑁨𑁨. 𑀬𑀲𑀁 𑀮𑀤𑁆𑀥𑀸𑀦 𑀤𑀼𑀫𑁆𑀫𑁂𑀥𑁄, 𑀅𑀦𑀢𑁆𑀣𑀁 𑀘𑀭𑀢𑀺 𑀅𑀢𑁆𑀢𑀦𑁄;

𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘, 𑀳𑀺𑀁𑀲𑀸𑀬 𑀧𑀝𑀺𑀧𑀚𑁆𑀚𑀢𑀻𑀢𑀺.

𑀤𑀼𑀫𑁆𑀫𑁂𑀥𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁧𑁨𑁩. 𑀅𑀲𑀩𑁆𑀩𑀢𑁆𑀣𑀕𑀸𑀫𑀺𑀁 𑀯𑀸𑀘𑀁, 𑀩𑀸𑀮𑁄 𑀲𑀩𑁆𑀩𑀢𑁆𑀣 𑀪𑀸𑀲𑀢𑀺;

𑀦𑀸𑀬𑀁 𑀤𑀥𑀺𑀁 𑀯𑁂𑀤𑀺 𑀦 [𑀦 𑀯𑁂𑀤𑀺 (𑀓.)] 𑀦𑀗𑁆𑀕𑀮𑀻𑀲𑀁, 𑀤𑀥𑀺𑀧𑁆𑀧𑀬𑀁 [𑀤𑀥𑀺𑀫𑁆𑀧𑀬𑀁 (𑀲𑀻. 𑀧𑀻.)] 𑀫𑀜𑁆𑀜𑀢𑀺 𑀦𑀗𑁆𑀕𑀮𑀻𑀲𑀦𑁆𑀢𑀺.

𑀦𑀗𑁆𑀕𑀮𑀻𑀲𑀚𑀸𑀢𑀓𑀁 𑀢𑀢𑀺𑀬𑀁.

𑁧𑁨𑁪. 𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀯𑀸𑀬𑀸𑀫𑀲𑁆𑀲 𑀨𑀮𑀁 𑀧𑀲𑁆𑀲, 𑀪𑀼𑀢𑁆𑀢𑀸 𑀅𑀫𑁆𑀩𑀸 𑀅𑀦𑀻𑀢𑀺𑀳𑀦𑁆𑀢𑀺.

𑀅𑀫𑁆𑀩𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁧𑁨𑁫. 𑀩𑀳𑀼𑀫𑁆𑀧𑀺 𑀲𑁄 𑀯𑀺𑀓𑀢𑁆𑀣𑁂𑀬𑁆𑀬, 𑀅𑀜𑁆𑀜𑀁 𑀚𑀦𑀧𑀤𑀁 𑀕𑀢𑁄;

𑀅𑀦𑁆𑀯𑀸𑀕𑀦𑁆𑀢𑁆𑀯𑀸𑀦 𑀤𑀽𑀲𑁂𑀬𑁆𑀬, 𑀪𑀼𑀜𑁆𑀚 𑀪𑁄𑀕𑁂 𑀓𑀝𑀸𑀳𑀓𑀸𑀢𑀺.

𑀓𑀝𑀸𑀳𑀓𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁧𑁨𑁬. 𑀢𑀤𑁂𑀯𑁂𑀓𑀲𑁆𑀲 [𑀢𑀣𑁂𑀯𑁂𑀓𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻. 𑀅𑀝𑁆𑀞. 𑀫𑀽𑀮𑀧𑀸𑀞𑁄)] 𑀓𑀮𑁆𑀬𑀸𑀡𑀁, 𑀢𑀤𑁂𑀯𑁂𑀓𑀲𑁆𑀲 𑀧𑀸𑀧𑀓𑀁;

𑀢𑀲𑁆𑀫𑀸 𑀲𑀩𑁆𑀩𑀁 𑀦 𑀓𑀮𑁆𑀬𑀸𑀡𑀁, 𑀲𑀩𑁆𑀩𑀁 𑀯𑀸𑀧𑀺 𑀦 𑀧𑀸𑀧𑀓𑀦𑁆𑀢𑀺.

𑀅𑀲𑀺𑀮𑀓𑁆𑀔𑀡𑀚𑀸𑀢𑀓𑀁 𑀙𑀝𑁆𑀞𑀁.

𑁧𑁨𑁭. 𑀢𑁂 𑀤𑁂𑀲𑀸 𑀢𑀸𑀦𑀺 𑀯𑀢𑁆𑀣𑀽𑀦𑀺, 𑀅𑀳𑀜𑁆𑀘 𑀯𑀦𑀕𑁄𑀘𑀭𑁄;

𑀅𑀦𑀼𑀯𑀺𑀘𑁆𑀘 𑀔𑁄 𑀢𑀁 𑀕𑀡𑁆𑀳𑁂𑀬𑁆𑀬𑀼𑀁, 𑀧𑀺𑀯 [𑀧𑀺𑀧 (𑀲𑀻. 𑀧𑀻.)] 𑀔𑀻𑀭𑀁 𑀓𑀮𑀡𑁆𑀟𑀼𑀓𑀸𑀢𑀺.

𑀓𑀮𑀡𑁆𑀟𑀼𑀓𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁧𑁨𑁮. 𑀬𑁄 𑀯𑁂 𑀥𑀫𑁆𑀫𑀁 𑀥𑀚𑀁 [𑀥𑀫𑁆𑀫𑀥𑀚𑀁 (𑀲𑁆𑀬𑀸. 𑀧𑀻. 𑀓.)] 𑀓𑀢𑁆𑀯𑀸, 𑀦𑀺𑀕𑀽𑀴𑁆𑀳𑁄 𑀧𑀸𑀧𑀫𑀸𑀘𑀭𑁂;

𑀯𑀺𑀲𑁆𑀲𑀸𑀲𑀬𑀺𑀢𑁆𑀯𑀸 𑀪𑀽𑀢𑀸𑀦𑀺, 𑀩𑀺𑀴𑀸𑀭𑀁 𑀦𑀸𑀫 𑀢𑀁 𑀯𑀢𑀦𑁆𑀢𑀺.

𑀩𑀺𑀴𑀸𑀭𑀯𑀢𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁧𑁨𑁯. 𑀦𑀸𑀬𑀁 𑀲𑀺𑀔𑀸 𑀧𑀼𑀜𑁆𑀜𑀳𑁂𑀢𑀼, 𑀖𑀸𑀲𑀳𑁂𑀢𑀼 𑀅𑀬𑀁 𑀲𑀺𑀔𑀸;

𑀦𑀸𑀗𑁆𑀕𑀼𑀝𑁆𑀞𑀕𑀡𑀦𑀁 𑀬𑀸𑀢𑀺, 𑀅𑀮𑀁 𑀢𑁂 𑀳𑁄𑀢𑀼 𑀅𑀕𑁆𑀕𑀺𑀓𑀸𑀢𑀺.

𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀚𑀸𑀢𑀓𑀁 𑀦𑀯𑀫𑀁.

𑁧𑁩𑁦. 𑀬𑀣𑀸 𑀯𑀸𑀘𑀸 𑀘 𑀪𑀼𑀜𑁆𑀚𑀲𑁆𑀲𑀼, 𑀬𑀣𑀸 𑀪𑀼𑀢𑁆𑀢𑀜𑁆𑀘 𑀩𑁆𑀬𑀸𑀳𑀭;

𑀉𑀪𑀬𑀁 𑀢𑁂 𑀦 𑀲𑀫𑁂𑀢𑀺, 𑀯𑀸𑀘𑀸 𑀪𑀼𑀢𑁆𑀢𑀜𑁆𑀘 𑀓𑁄𑀲𑀺𑀬𑁂𑀢𑀺.

𑀓𑁄𑀲𑀺𑀬𑀚𑀸𑀢𑀓𑀁 𑀤𑀲𑀫𑀁.

𑀓𑀼𑀲𑀦𑀸𑀴𑀺𑀯𑀕𑁆𑀕𑁄 [𑀲𑀭𑀺𑀓𑁆𑀔𑀯𑀕𑁆𑀕𑁄 (𑀓.)] 𑀢𑁂𑀭𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀼𑀲𑀦𑀸𑀴𑀺𑀲𑀺𑀭𑀺𑀯𑁆𑀳𑀬𑀦𑁄 𑀘 𑀬𑀲𑀁, 𑀤𑀥𑀺 𑀫𑀫𑁆𑀩 𑀓𑀝𑀸𑀳𑀓𑀧𑀜𑁆𑀘𑀫𑀓𑁄;

𑀅𑀣 𑀧𑀸𑀧𑀓 𑀔𑀻𑀭 𑀩𑀺𑀴𑀸𑀭𑀯𑀢𑀁, 𑀲𑀺𑀔𑀺 𑀓𑁄𑀲𑀺𑀬𑀲𑀯𑁆𑀳𑀬𑀦𑁂𑀦 𑀤𑀲𑀸𑀢𑀺.