𑁧𑁨. 𑀳𑀁𑀘𑀺𑀯𑀕𑁆𑀕𑁄

𑁧𑁧𑁧. 𑀕𑀤𑁆𑀭𑀪𑀧𑀜𑁆𑀳𑀚𑀸𑀢𑀓𑀁

𑁧𑁧𑁧. 𑀳𑀁𑀘𑀺 [𑀳𑀁𑀲𑀺 (𑀲𑀻. 𑀲𑁆𑀬𑀸.), 𑀳𑀜𑁆𑀘𑀺 (?)] 𑀢𑀼𑀯𑀁 𑀏𑀯𑀫𑀜𑁆𑀜𑀲𑀺 𑀲𑁂𑀬𑁆𑀬𑁄, 𑀧𑀼𑀢𑁆𑀢𑁂𑀦 𑀧𑀺𑀢𑀸𑀢𑀺 𑀭𑀸𑀚𑀲𑁂𑀝𑁆𑀞;

𑀳𑀦𑁆𑀤𑀲𑁆𑀲𑀢𑀭𑀲𑁆𑀲 𑀢𑁂 𑀅𑀬𑀁, 𑀅𑀲𑁆𑀲𑀢𑀭𑀲𑁆𑀲 𑀳𑀺 𑀕𑀤𑁆𑀭𑀪𑁄 𑀧𑀺𑀢𑀸𑀢𑀺.

𑀕𑀤𑁆𑀭𑀪𑀧𑀜𑁆𑀳𑀚𑀸𑀢𑀓𑀁 𑀧𑀞𑀫𑀁.

𑁧𑁧𑁨. 𑀅𑀫𑀭𑀸𑀤𑁂𑀯𑀻𑀧𑀜𑁆𑀳𑀚𑀸𑀢𑀓𑀁

𑁧𑁧𑁨. 𑀬𑁂𑀦 𑀲𑀢𑁆𑀢𑀼𑀩𑀺𑀮𑀗𑁆𑀕𑀸 𑀘, 𑀤𑀺𑀕𑀼𑀡𑀧𑀮𑀸𑀲𑁄 𑀘 𑀧𑀼𑀧𑁆𑀨𑀺𑀢𑁄;

𑀬𑁂𑀦 𑀤𑀤𑀸𑀫𑀺 [𑀬𑁂𑀦𑀸’𑀤𑀸𑀫𑀺 (𑀲𑀻. 𑀲𑁆𑀬𑀸.)] 𑀢𑁂𑀦 𑀯𑀤𑀸𑀫𑀺, 𑀬𑁂𑀦 𑀦 𑀤𑀤𑀸𑀫𑀺 [𑀬𑁂𑀦 𑀦𑀸’𑀤𑀸𑀫𑀺 (𑀲𑀻. 𑀲𑁆𑀬𑀸.)] 𑀦 𑀢𑁂𑀦 𑀯𑀤𑀸𑀫𑀺;

𑀏𑀲 𑀫𑀕𑁆𑀕𑁄 𑀬𑀯𑀫𑀚𑁆𑀛𑀓𑀲𑁆𑀲, 𑀏𑀢𑀁 𑀙𑀦𑁆𑀦𑀧𑀣𑀁 𑀯𑀺𑀚𑀸𑀦𑀸𑀳𑀻𑀢𑀺.

𑀅𑀫𑀭𑀸𑀤𑁂𑀯𑀻𑀧𑀜𑁆𑀳𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁧𑁧𑁩. 𑀲𑀺𑀗𑁆𑀕𑀸𑀮𑀚𑀸𑀢𑀓𑀁

𑁧𑁧𑁩. 𑀲𑀤𑁆𑀤𑀳𑀸𑀲𑀺 𑀲𑀺𑀗𑁆𑀕𑀸𑀮𑀲𑁆𑀲 [𑀲𑀺𑀕𑀸𑀮𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)], 𑀲𑀼𑀭𑀸𑀧𑀻𑀢𑀲𑁆𑀲 𑀩𑁆𑀭𑀸𑀳𑁆𑀫𑀡;

𑀲𑀺𑀧𑁆𑀧𑀺𑀓𑀸𑀦𑀁 𑀲𑀢𑀁 𑀦𑀢𑁆𑀣𑀺, 𑀓𑀼𑀢𑁄 𑀓𑀁𑀲𑀲𑀢𑀸 𑀤𑀼𑀯𑁂𑀢𑀺.

𑀲𑀺𑀗𑁆𑀕𑀸𑀮𑀚𑀸𑀢𑀓𑀁 𑀢𑀢𑀺𑀬𑀁.

𑁧𑁧𑁪. 𑀫𑀺𑀢𑀘𑀺𑀦𑁆𑀢𑀺𑀚𑀸𑀢𑀓𑀁

𑁧𑁧𑁪. 𑀩𑀳𑀼𑀘𑀺𑀦𑁆𑀢𑀻 𑀅𑀧𑁆𑀧𑀘𑀺𑀦𑁆𑀢𑀻, 𑀉𑀪𑁄 𑀚𑀸𑀮𑁂 𑀅𑀩𑀚𑁆𑀛𑀭𑁂;

𑀫𑀺𑀢𑀘𑀺𑀦𑁆𑀢𑀻 𑀧𑀫𑁄𑀘𑁂𑀲𑀻, 𑀉𑀪𑁄 𑀢𑀢𑁆𑀣 𑀲𑀫𑀸𑀕𑀢𑀸𑀢𑀺.

𑀫𑀺𑀢𑀘𑀺𑀦𑁆𑀢𑀺𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁧𑁧𑁫. 𑀅𑀦𑀼𑀲𑀸𑀲𑀺𑀓𑀚𑀸𑀢𑀓𑀁

𑁧𑁧𑁫. 𑀬𑀸𑀬𑀜𑁆𑀜 [𑀬𑀸𑀬𑀜𑁆𑀜𑁂 (𑀓.)] 𑀫𑀦𑀼𑀲𑀸𑀲𑀢𑀺, 𑀲𑀬𑀁 𑀮𑁄𑀮𑀼𑀧𑁆𑀧𑀘𑀸𑀭𑀺𑀦𑀻;

𑀲𑀸𑀬𑀁 𑀯𑀺𑀧𑀓𑁆𑀔𑀺𑀓𑀸 𑀲𑁂𑀢𑀺, 𑀳𑀢𑀸 𑀘𑀓𑁆𑀓𑁂𑀦 𑀲𑀸𑀲𑀺𑀓𑀸𑀢𑀺 [𑀲𑀸𑀮𑀺𑀓𑀸𑀢𑀺 (𑀲𑀻. 𑀲𑁆𑀬𑀸. 𑀧𑀻.)].

𑀅𑀦𑀼𑀲𑀸𑀲𑀺𑀓𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁧𑁧𑁬. 𑀤𑀼𑀩𑁆𑀩𑀘𑀚𑀸𑀢𑀓𑀁

𑁧𑁧𑁬. 𑀅𑀢𑀺𑀓𑀭𑀫𑀓𑀭𑀸𑀘𑀭𑀺𑀬, 𑀫𑀬𑁆𑀳𑀫𑁆𑀧𑁂𑀢𑀁 𑀦 𑀭𑀼𑀘𑁆𑀘𑀢𑀺;

𑀘𑀢𑀼𑀢𑁆𑀣𑁂 𑀮𑀗𑁆𑀖𑀬𑀺𑀢𑁆𑀯𑀸𑀦, 𑀧𑀜𑁆𑀘𑀫𑀸𑀬𑀲𑀺 𑀆𑀯𑀼𑀢𑁄𑀢𑀺.

𑀤𑀼𑀩𑁆𑀩𑀘𑀚𑀸𑀢𑀓𑀁 𑀙𑀝𑁆𑀞𑀁.

𑁧𑁧𑁭. 𑀢𑀺𑀢𑁆𑀢𑀺𑀭𑀚𑀸𑀢𑀓𑀁

𑁧𑁧𑁭. 𑀅𑀘𑁆𑀘𑀼𑀕𑁆𑀕𑀢𑀸𑀢𑀺𑀮𑀧𑀢𑀸 [𑀅𑀢𑀺𑀩𑀮𑀢𑀸 (𑀲𑀻. 𑀲𑁆𑀬𑀸. 𑀧𑀻.), 𑀅𑀢𑀺𑀮𑀧𑀓𑀸 (𑀓𑀢𑁆𑀣𑀘𑀺)], 𑀅𑀢𑀺𑀯𑁂𑀮𑀁 𑀧𑀪𑀸𑀲𑀺𑀢𑀸;

𑀯𑀸𑀘𑀸 𑀳𑀦𑀢𑀺 𑀤𑀼𑀫𑁆𑀫𑁂𑀥𑀁, 𑀢𑀺𑀢𑁆𑀢𑀺𑀭𑀁𑀯𑀸𑀢𑀺𑀯𑀲𑁆𑀲𑀺𑀢𑀦𑁆𑀢𑀺.

𑀢𑀺𑀢𑁆𑀢𑀺𑀭𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁧𑁧𑁮. 𑀯𑀝𑁆𑀝𑀓𑀚𑀸𑀢𑀓𑀁

𑁧𑁧𑁮. 𑀦𑀸𑀘𑀺𑀦𑁆𑀢𑀬𑀦𑁆𑀢𑁄 𑀧𑀼𑀭𑀺𑀲𑁄, 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀺;

𑀘𑀺𑀦𑁆𑀢𑀺𑀢𑀲𑁆𑀲 𑀨𑀮𑀁 𑀧𑀲𑁆𑀲, 𑀫𑀼𑀢𑁆𑀢𑁄𑀲𑁆𑀫𑀺 𑀯𑀥𑀩𑀦𑁆𑀥𑀦𑀸𑀢𑀺.

𑀯𑀝𑁆𑀝𑀓𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁧𑁧𑁯. 𑀅𑀓𑀸𑀮𑀭𑀸𑀯𑀺𑀚𑀸𑀢𑀓𑀁

𑁧𑁧𑁯. 𑀅𑀫𑀸𑀢𑀸𑀧𑀺𑀢𑀭𑀲𑀁𑀯𑀤𑁆𑀥𑁄 [𑀧𑀺𑀢𑀭𑀺 (𑀲𑀻. 𑀧𑀻.), 𑀧𑀺𑀢𑀼 (𑀲𑁆𑀬𑀸.)], 𑀅𑀦𑀸𑀘𑁂𑀭𑀓𑀼𑀮𑁂 𑀯𑀲𑀁;

𑀦𑀸𑀬𑀁 𑀓𑀸𑀮𑀁 𑀅𑀓𑀸𑀮𑀁 𑀯𑀸, 𑀅𑀪𑀺𑀚𑀸𑀦𑀸𑀢𑀺 𑀓𑀼𑀓𑁆𑀓𑀼𑀝𑁄𑀢𑀺.

𑀅𑀓𑀸𑀮𑀭𑀸𑀯𑀺𑀚𑀸𑀢𑀓𑀁 𑀦𑀯𑀫𑀁.

𑁧𑁨𑁦. 𑀩𑀦𑁆𑀥𑀦𑀫𑁄𑀓𑁆𑀔𑀚𑀸𑀢𑀓𑀁

𑁧𑁨𑁦. 𑀅𑀩𑀤𑁆𑀥𑀸 𑀢𑀢𑁆𑀣 𑀩𑀚𑁆𑀛𑀦𑁆𑀢𑀺, 𑀬𑀢𑁆𑀣 𑀩𑀸𑀮𑀸 𑀧𑀪𑀸𑀲𑀭𑁂;

𑀩𑀤𑁆𑀥𑀸𑀧𑀺 𑀢𑀢𑁆𑀣 𑀫𑀼𑀘𑁆𑀘𑀦𑁆𑀢𑀺, 𑀬𑀢𑁆𑀣 𑀥𑀻𑀭𑀸 𑀧𑀪𑀸𑀲𑀭𑁂𑀢𑀺.

𑀩𑀦𑁆𑀥𑀦𑀫𑁄𑀓𑁆𑀔𑀚𑀸𑀢𑀓𑀁 𑀤𑀲𑀫𑀁.

𑀳𑀁𑀘𑀺𑀯𑀕𑁆𑀕𑁄 [𑀳𑀁𑀲𑀺𑀯𑀕𑁆𑀕𑁄 (𑀲𑀻. 𑀲𑁆𑀬𑀸.)] 𑀤𑁆𑀯𑀸𑀤𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀣 𑀕𑀤𑁆𑀭𑀪 𑀲𑀢𑁆𑀢𑀼𑀯 𑀓𑀁𑀲𑀲𑀢𑀁, 𑀩𑀳𑀼𑀘𑀺𑀦𑁆𑀢𑀺 𑀲𑀸𑀲𑀺𑀓𑀸𑀬𑀸𑀢𑀺𑀓𑀭;

𑀅𑀢𑀺𑀯𑁂𑀮 𑀯𑀺𑀲𑁂𑀲𑀫𑀦𑀸𑀘𑀭𑀺𑀬𑁄𑀯, 𑀥𑀻𑀭𑀸𑀧𑀪𑀸𑀲𑀭𑀢𑁂𑀦 𑀤𑀲𑀸𑀢𑀺.