𑁧. 𑀅𑀧𑀡𑁆𑀡𑀓𑀯𑀕𑁆𑀕𑁄

𑁧. 𑀅𑀧𑀡𑁆𑀡𑀓𑀚𑀸𑀢𑀓𑀁

𑁧. 𑀅𑀧𑀡𑁆𑀡𑀓𑀁 𑀞𑀸𑀦𑀫𑁂𑀓𑁂, 𑀤𑀼𑀢𑀺𑀬𑀁 𑀆𑀳𑀼 𑀢𑀓𑁆𑀓𑀺𑀓𑀸;

𑀏𑀢𑀤𑀜𑁆𑀜𑀸𑀬 𑀫𑁂𑀥𑀸𑀯𑀻, 𑀢𑀁 𑀕𑀡𑁆𑀳𑁂 𑀬𑀤𑀧𑀡𑁆𑀡𑀓𑀦𑁆𑀢𑀺 [𑀢𑀁 𑀕𑀡𑁆𑀳𑁂𑀬𑁆𑀬 𑀅𑀧𑀡𑁆𑀡𑀓𑀁 (𑀓.)].

𑀅𑀧𑀡𑁆𑀡𑀓𑀚𑀸𑀢𑀓𑀁 𑀧𑀞𑀫𑀁.

𑁨. 𑀯𑀡𑁆𑀡𑀼𑀧𑀣𑀚𑀸𑀢𑀓𑀁

𑁨. 𑀅𑀓𑀺𑀮𑀸𑀲𑀼𑀦𑁄 𑀯𑀡𑁆𑀡𑀼𑀧𑀣𑁂 [𑀯𑀡𑁆𑀡𑀧𑀣𑁂 (𑀓.)] 𑀔𑀡𑀦𑁆𑀢𑀸, 𑀉𑀤𑀗𑁆𑀕𑀡𑁂 𑀢𑀢𑁆𑀣 𑀧𑀧𑀁 𑀅𑀯𑀺𑀦𑁆𑀤𑀼𑀁;

𑀏𑀯𑀁 𑀫𑀼𑀦𑀻 𑀯𑀻𑀭𑀺𑀬 [𑀫𑀼𑀦𑀺 𑀯𑀺𑀭𑀺𑀬 (𑀧𑀻.), 𑀫𑀼𑀦𑀺 𑀯𑀻𑀭𑀺𑀬 (𑀲𑁆𑀬𑀸. 𑀓.)] 𑀩𑀮𑀽𑀧𑀧𑀦𑁆𑀦𑁄, 𑀅𑀓𑀺𑀮𑀸𑀲𑀼 𑀯𑀺𑀦𑁆𑀤𑁂 𑀳𑀤𑀬𑀲𑁆𑀲 𑀲𑀦𑁆𑀢𑀺𑀦𑁆𑀢𑀺.

𑀯𑀡𑁆𑀡𑀼𑀧𑀣𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁩. 𑀲𑁂𑀭𑀺𑀯𑀯𑀸𑀡𑀺𑀚𑀚𑀸𑀢𑀓𑀁

𑁩. 𑀇𑀥 𑀘𑁂 𑀦𑀁 [𑀇𑀥 𑀘𑁂 𑀳𑀺 𑀦𑀁 (𑀲𑀻. 𑀧𑀻.)] 𑀯𑀺𑀭𑀸𑀥𑁂𑀲𑀺, 𑀲𑀤𑁆𑀥𑀫𑁆𑀫𑀲𑁆𑀲 𑀦𑀺𑀬𑀸𑀫𑀢𑀁 [𑀦𑀺𑀬𑀸𑀫𑀓𑀁 (𑀲𑁆𑀬𑀸. 𑀓.)];

𑀘𑀺𑀭𑀁 𑀢𑁆𑀯𑀁 𑀅𑀦𑀼𑀢𑀧𑁆𑀧𑁂𑀲𑀺 [𑀅𑀦𑀼𑀢𑀧𑁂𑀲𑁆𑀲𑀲𑀺 (𑀲𑀻. 𑀧𑀻.), 𑀅𑀦𑀼𑀢𑀧𑁆𑀧𑀺𑀲𑁆𑀲𑀲𑀺 (?)], 𑀲𑁂𑀭𑀺𑀯𑀸𑀬𑀁𑀯 𑀯𑀸𑀡𑀺𑀚𑁄𑀢𑀺.

𑀲𑁂𑀭𑀺𑀯𑀯𑀸𑀡𑀺𑀚𑀚𑀸𑀢𑀓𑀁 𑀢𑀢𑀺𑀬𑀁.

𑁪. 𑀘𑀽𑀴𑀲𑁂𑀝𑁆𑀞𑀺𑀚𑀸𑀢𑀓𑀁

𑁪. 𑀅𑀧𑁆𑀧𑀓𑁂𑀦𑀧𑀺 𑀫𑁂𑀥𑀸𑀯𑀻, 𑀧𑀸𑀪𑀢𑁂𑀦 𑀯𑀺𑀘𑀓𑁆𑀔𑀡𑁄;

𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫𑀦𑁆𑀢𑀺.

𑀘𑀽𑀴 [𑀘𑀼𑀮𑁆𑀮 (𑀲𑀻.), 𑀘𑀼𑀮𑁆𑀮𑀓 (𑀲𑁆𑀬𑀸. 𑀧𑀻.)] 𑀲𑁂𑀝𑁆𑀞𑀺𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁫. 𑀢𑀡𑁆𑀟𑀼𑀮𑀦𑀸𑀴𑀺𑀚𑀸𑀢𑀓𑀁

𑁫. [𑀓𑀺𑀫𑀕𑁆𑀖𑀢𑀻 𑀢𑀡𑁆𑀟𑀼𑀮𑀦𑀸𑀴𑀺𑀓𑀸 𑀘, 𑀩𑀸𑀭𑀸𑀡𑀲𑀻 𑀅𑀦𑁆𑀢𑀭𑀩𑀸𑀳𑀺𑀭𑀸𑀦𑀺; 𑀅𑀲𑁆𑀲𑀧𑀜𑁆𑀘𑀲𑀢𑁂 𑀢𑀸𑀦𑀺, 𑀏𑀓𑀸 𑀢𑀡𑁆𑀟𑀼𑀮𑀦𑀸𑀴𑀺𑀓𑀸𑀢𑀺; (𑀲𑁆𑀬𑀸.)] 𑀓𑀺𑀫𑀕𑁆𑀖𑀢𑀺 𑀢𑀡𑁆𑀟𑀼𑀮𑀦𑀸𑀴𑀺𑀓𑀸𑀬, 𑀅𑀲𑁆𑀲𑀸𑀦 𑀫𑀽𑀮𑀸𑀬 𑀯𑀤𑁂𑀳𑀺 𑀭𑀸𑀚 [𑀦𑀸𑀴𑀺𑀓𑀸 𑀘 (𑀲𑀻.), 𑀦𑀸𑀴𑀺𑀓𑀸𑀬 (𑀓. 𑀲𑀻. 𑀅𑀝𑁆𑀞.)];

𑀩𑀸𑀭𑀸𑀡𑀲𑀺𑀁 𑀲𑀦𑁆𑀢𑀭𑀩𑀸𑀳𑀺𑀭𑀢𑁄 [𑀩𑀸𑀳𑀺𑀭𑀦𑁆𑀢𑀁 (𑀲𑀻.)], 𑀅𑀬𑀫𑀕𑁆𑀖𑀢𑀺 𑀢𑀡𑁆𑀟𑀼𑀮𑀦𑀸𑀴𑀺𑀓𑀸𑀢𑀺 [𑀓𑀺𑀫𑀕𑁆𑀖𑀢𑀻 𑀯𑀡𑁆𑀟𑀼𑀮𑀦𑀸𑀴𑀺𑀓𑀸 𑀘, 𑀩𑀸𑀭𑀸𑀡𑀲𑀻 𑀅𑀦𑁆𑀢𑀭𑀩𑀸𑀳𑀺𑀭𑀸𑀦𑀺; 𑀅𑀲𑁆𑀲𑀧𑀜𑁆𑀘𑀲𑀢𑁂 𑀢𑀸𑀦𑀺, 𑀏𑀓𑀸 𑀢𑀡𑁆𑀟𑀼𑀮𑀦𑀸𑀴𑀺𑀓𑀸𑀢𑀺; (𑀲𑁆𑀬𑀸.)].

𑀢𑀡𑁆𑀟𑀼𑀮𑀦𑀸𑀴𑀺𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁬. 𑀤𑁂𑀯𑀥𑀫𑁆𑀫𑀚𑀸𑀢𑀓𑀁

𑁬. 𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀸, 𑀲𑀼𑀓𑁆𑀓𑀥𑀫𑁆𑀫𑀲𑀫𑀸𑀳𑀺𑀢𑀸;

𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂, 𑀤𑁂𑀯𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀭𑁂𑀢𑀺.

𑀤𑁂𑀯𑀥𑀫𑁆𑀫𑀚𑀸𑀢𑀓𑀁 𑀙𑀝𑁆𑀞𑀁.

𑁭. 𑀓𑀝𑁆𑀞𑀳𑀸𑀭𑀺𑀚𑀸𑀢𑀓𑀁

𑁭. 𑀧𑀼𑀢𑁆𑀢𑁄 𑀢𑁆𑀬𑀸𑀳𑀁 𑀫𑀳𑀸𑀭𑀸𑀚, 𑀢𑁆𑀯𑀁 𑀫𑀁 𑀧𑁄𑀲 𑀚𑀦𑀸𑀥𑀺𑀧;

𑀅𑀜𑁆𑀜𑁂𑀧𑀺 𑀤𑁂𑀯𑁄 𑀧𑁄𑀲𑁂𑀢𑀺, 𑀓𑀺𑀜𑁆𑀘 [𑀓𑀺𑀜𑁆𑀘𑀺 (𑀓.)] 𑀤𑁂𑀯𑁄 𑀲𑀓𑀁 𑀧𑀚𑀦𑁆𑀢𑀺.

𑀓𑀝𑁆𑀞𑀳𑀸𑀭𑀺 [𑀓𑀝𑁆𑀞𑀯𑀸𑀳𑀦 (𑀓.)] 𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁮. 𑀕𑀸𑀫𑀡𑀺𑀚𑀸𑀢𑀓𑀁

𑁮. 𑀅𑀧𑀺 𑀅𑀢𑀭𑀫𑀸𑀦𑀸𑀦𑀁, 𑀨𑀮𑀸𑀲𑀸𑀯 𑀲𑀫𑀺𑀚𑁆𑀛𑀢𑀺;

𑀯𑀺𑀧𑀓𑁆𑀓𑀩𑁆𑀭𑀳𑁆𑀫𑀘𑀭𑀺𑀬𑁄𑀲𑁆𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀕𑀸𑀫𑀡𑀻𑀢𑀺.

𑀕𑀸𑀫𑀡𑀺𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁯. 𑀫𑀖𑀤𑁂𑀯𑀚𑀸𑀢𑀓𑀁

𑁯. 𑀉𑀢𑁆𑀢𑀫𑀗𑁆𑀕𑀭𑀼𑀳𑀸 𑀫𑀬𑁆𑀳𑀁, 𑀇𑀫𑁂 𑀚𑀸𑀢𑀸 𑀯𑀬𑁄𑀳𑀭𑀸;

𑀧𑀸𑀢𑀼𑀪𑀽𑀢𑀸 𑀤𑁂𑀯𑀤𑀽𑀢𑀸, 𑀧𑀩𑁆𑀩𑀚𑁆𑀚𑀸𑀲𑀫𑀬𑁄 𑀫𑀫𑀸𑀢𑀺.

𑀫𑀖𑀤𑁂𑀯 [𑀫𑀔𑀸𑀤𑁂𑀯 (𑀲𑀻. 𑀧𑀻.), 𑀤𑁂𑀯𑀤𑀽𑀢 (𑀓.)] 𑀚𑀸𑀢𑀓𑀁 𑀦𑀯𑀫𑀁.

𑁧𑁦. 𑀲𑀼𑀔𑀯𑀺𑀳𑀸𑀭𑀺𑀚𑀸𑀢𑀓𑀁

𑁧𑁦. 𑀬𑀜𑁆𑀘 𑀅𑀜𑁆𑀜𑁂 𑀦 𑀭𑀓𑁆𑀔𑀦𑁆𑀢𑀺, 𑀬𑁄 𑀘 𑀅𑀜𑁆𑀜𑁂 𑀦 𑀭𑀓𑁆𑀔𑀢𑀺;

𑀲 𑀯𑁂 𑀭𑀸𑀚 𑀲𑀼𑀔𑀁 𑀲𑁂𑀢𑀺, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀯𑀸𑀢𑀺.

𑀲𑀼𑀔𑀯𑀺𑀳𑀸𑀭𑀺𑀚𑀸𑀢𑀓𑀁 𑀤𑀲𑀫𑀁.

𑀅𑀧𑀡𑁆𑀡𑀓𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀭𑀸𑀧𑀡𑁆𑀡𑀓 𑀯𑀡𑁆𑀡𑀼𑀧𑀣 𑀲𑁂𑀭𑀺𑀯𑀭𑁄, 𑀲𑀼𑀯𑀺𑀘𑀓𑁆𑀔𑀡 𑀢𑀡𑁆𑀟𑀼𑀮𑀦𑀸𑀴𑀺𑀓𑀲𑁆𑀲𑀸;

𑀳𑀺𑀭𑀺 𑀧𑀼𑀢𑁆𑀢𑀯𑀭𑀼𑀢𑁆𑀢𑀕𑀸𑀫𑀡𑀺𑀦𑀸, 𑀬𑁄 𑀘 𑀦 𑀭𑀓𑁆𑀔𑀢𑀺 𑀢𑁂𑀦 𑀤𑀲𑀸𑀢𑀺.