𑁩. 𑀦𑀺𑀲𑁆𑀲𑀭𑀡𑀺𑀬𑀲𑀼𑀢𑁆𑀢𑀁

𑁭𑁨. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀭𑀡𑀺𑀬𑀸 [𑀦𑀺𑀲𑁆𑀲𑀸𑀭𑀡𑀻𑀬𑀸 (𑀅. 𑀦𑀺. 𑁫.𑁨𑁦𑁦)] 𑀥𑀸𑀢𑀼𑀬𑁄. 𑀓𑀢𑀫𑀸 𑀢𑀺𑀲𑁆𑀲𑁄? 𑀓𑀸𑀫𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫𑀁, 𑀭𑀽𑀧𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁 𑀬𑀤𑀺𑀤𑀁 𑀆𑀭𑀼𑀧𑁆𑀧𑀁, 𑀬𑀁 𑀔𑁄 𑀧𑀦 𑀓𑀺𑀜𑁆𑀘𑀺 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀦𑀺𑀭𑁄𑀥𑁄 𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀦𑀺𑀲𑁆𑀲𑀭𑀡𑀺𑀬𑀸 𑀥𑀸𑀢𑀼𑀬𑁄’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀓𑀸𑀫𑀦𑀺𑀲𑁆𑀲𑀭𑀡𑀁 𑀜𑀢𑁆𑀯𑀸, 𑀭𑀽𑀧𑀸𑀦𑀜𑁆𑀘 𑀅𑀢𑀺𑀓𑁆𑀓𑀫𑀁;

𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑀁, 𑀨𑀼𑀲𑀁 𑀆𑀢𑀸𑀧𑀺 𑀲𑀩𑁆𑀩𑀤𑀸.

‘‘𑀲 𑀯𑁂 𑀲𑀫𑁆𑀫𑀤𑁆𑀤𑀲𑁄 𑀪𑀺𑀓𑁆𑀔𑀼, 𑀬𑀢𑁄 𑀢𑀢𑁆𑀣 𑀯𑀺𑀫𑀼𑀘𑁆𑀘𑀢𑀺;

𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄 𑀲𑀦𑁆𑀢𑁄, 𑀲 𑀯𑁂 𑀬𑁄𑀕𑀸𑀢𑀺𑀕𑁄 𑀫𑀼𑀦𑀻’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀢𑀢𑀺𑀬𑀁.