𑁪. 𑀲𑀦𑁆𑀢𑀢𑀭𑀲𑀼𑀢𑁆𑀢𑀁

𑁭𑁩. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀭𑀽𑀧𑁂𑀳𑀺, 𑀪𑀺𑀓𑁆𑀔𑀯𑁂, 𑀅𑀭𑀽𑀧𑀸 [𑀆𑀭𑀼𑀧𑁆𑀧𑀸 (𑀲𑀻.)] 𑀲𑀦𑁆𑀢𑀢𑀭𑀸, 𑀅𑀭𑀽𑀧𑁂𑀳𑀺 𑀦𑀺𑀭𑁄𑀥𑁄 𑀲𑀦𑁆𑀢𑀢𑀭𑁄’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑁂 𑀘 𑀭𑀽𑀧𑀽𑀧𑀕𑀸 𑀲𑀢𑁆𑀢𑀸, 𑀬𑁂 𑀘 𑀅𑀭𑀽𑀧𑀝𑁆𑀞𑀸𑀬𑀺𑀦𑁄 [𑀆𑀭𑀼𑀧𑁆𑀧𑀝𑁆𑀞𑀸𑀬𑀺𑀦𑁄 (𑀲𑀻.)];

𑀦𑀺𑀭𑁄𑀥𑀁 𑀅𑀧𑁆𑀧𑀚𑀸𑀦𑀦𑁆𑀢𑀸, 𑀆𑀕𑀦𑁆𑀢𑀸𑀭𑁄 𑀧𑀼𑀦𑀩𑁆𑀪𑀯𑀁.

‘‘𑀬𑁂 𑀘 𑀭𑀽𑀧𑁂 𑀧𑀭𑀺𑀜𑁆𑀜𑀸𑀬, 𑀅𑀭𑀽𑀧𑁂𑀲𑀼 𑀅𑀲𑀡𑁆𑀞𑀺𑀢𑀸;

𑀦𑀺𑀭𑁄𑀥𑁂 𑀬𑁂 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀢𑁂 𑀚𑀦𑀸 𑀫𑀘𑁆𑀘𑀼𑀳𑀸𑀬𑀺𑀦𑁄.

‘‘𑀓𑀸𑀬𑁂𑀦 𑀅𑀫𑀢𑀁 𑀥𑀸𑀢𑀼𑀁, 𑀨𑀼𑀲𑀬𑀺𑀢𑁆𑀯𑀸 𑀦𑀺𑀭𑀽𑀧𑀥𑀺𑀁;

𑀉𑀧𑀥𑀺𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀁, 𑀲𑀘𑁆𑀙𑀺𑀓𑀢𑁆𑀯𑀸 𑀅𑀦𑀸𑀲𑀯𑁄;

𑀤𑁂𑀲𑁂𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀅𑀲𑁄𑀓𑀁 𑀯𑀺𑀭𑀚𑀁 𑀧𑀤’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀘𑀢𑀼𑀢𑁆𑀣𑀁.