𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑀼𑀢𑁆𑀢𑀁

𑁭𑁦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑀺𑀝𑁆𑀞𑀸 𑀫𑀬𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸.

‘‘𑀢𑀁 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀦𑀸𑀜𑁆𑀜𑀲𑁆𑀲 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀲𑀼𑀢𑁆𑀯𑀸 𑀯𑀤𑀸𑀫𑀺. 𑀤𑀺𑀝𑁆𑀞𑀸 𑀫𑀬𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸. 𑀅𑀧𑀺 𑀘, 𑀪𑀺𑀓𑁆𑀔𑀯𑁂, 𑀬𑀤𑁂𑀯 𑀲𑀸𑀫𑀁 𑀜𑀸𑀢𑀁 𑀲𑀸𑀫𑀁 𑀤𑀺𑀝𑁆𑀞𑀁 𑀲𑀸𑀫𑀁 𑀯𑀺𑀤𑀺𑀢𑀁 𑀢𑀤𑁂𑀯𑀸𑀳𑀁 𑀯𑀤𑀸𑀫𑀺.

‘‘𑀤𑀺𑀝𑁆𑀞𑀸 𑀫𑀬𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀫𑀺𑀘𑁆𑀙𑀸 𑀫𑀦𑀁 𑀧𑀡𑀺𑀥𑀸𑀬, 𑀫𑀺𑀘𑁆𑀙𑀸 𑀯𑀸𑀘𑀜𑁆𑀘 𑀪𑀸𑀲𑀺𑀬 [𑀫𑀺𑀘𑀸 𑀯𑀸𑀘𑀁 𑀅𑀪𑀸𑀲𑀺𑀬 (𑀲𑀩𑁆𑀩𑀢𑁆𑀣)];

𑀫𑀺𑀘𑁆𑀙𑀸 𑀓𑀫𑁆𑀫𑀸𑀦𑀺 𑀓𑀢𑁆𑀯𑀸𑀦, 𑀓𑀸𑀬𑁂𑀦 𑀇𑀥 𑀧𑀼𑀕𑁆𑀕𑀮𑁄.

‘‘𑀅𑀧𑁆𑀧𑀲𑁆𑀲𑀼𑀢𑀸𑀧𑀼𑀜𑁆𑀜𑀓𑀭𑁄 [𑀅𑀧𑁆𑀧𑀲𑁆𑀲𑀼𑀢𑁄𑀧𑀼𑀜𑁆𑀜𑀓𑀭𑁄 (𑀲𑀻.), 𑀅𑀧𑁆𑀧𑀲𑁆𑀲𑀼𑀢𑁄 𑀅𑀧𑀼𑀜𑁆𑀜𑀓𑀭𑁄 (𑀲𑁆𑀬𑀸. 𑀧𑀻.)], 𑀅𑀧𑁆𑀧𑀲𑁆𑀫𑀺𑀁 𑀇𑀥 𑀚𑀻𑀯𑀺𑀢𑁂;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀻’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀧𑀞𑀫𑀁.

𑁨. 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑀼𑀢𑁆𑀢𑀁

𑁭𑁧. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑀺𑀝𑁆𑀞𑀸 𑀫𑀬𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸.

‘‘𑀢𑀁 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀦𑀸𑀜𑁆𑀜𑀲𑁆𑀲 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀲𑀼𑀢𑁆𑀯𑀸 𑀯𑀤𑀸𑀫𑀺. 𑀤𑀺𑀝𑁆𑀞𑀸 𑀫𑀬𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸. 𑀅𑀧𑀺 𑀘, 𑀪𑀺𑀓𑁆𑀔𑀯𑁂, 𑀬𑀤𑁂𑀯 𑀲𑀸𑀫𑀁 𑀜𑀸𑀢𑀁 𑀲𑀸𑀫𑀁 𑀤𑀺𑀝𑁆𑀞𑀁 𑀲𑀸𑀫𑀁 𑀯𑀺𑀤𑀺𑀢𑀁 𑀢𑀤𑁂𑀯𑀸𑀳𑀁 𑀯𑀤𑀸𑀫𑀺.

‘‘𑀤𑀺𑀝𑁆𑀞𑀸 𑀫𑀬𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀲𑀫𑁆𑀫𑀸 𑀫𑀦𑀁 𑀧𑀡𑀺𑀥𑀸𑀬, 𑀲𑀫𑁆𑀫𑀸 𑀯𑀸𑀘𑀜𑁆𑀘 𑀪𑀸𑀲𑀺𑀬 [𑀲𑀫𑁆𑀫𑀸 𑀯𑀸𑀘𑀁 𑀅𑀪𑀸𑀲𑀺𑀬 (𑀲𑀩𑁆𑀩𑀢𑁆𑀣)];

𑀲𑀫𑁆𑀫𑀸 𑀓𑀫𑁆𑀫𑀸𑀦𑀺 𑀓𑀢𑁆𑀯𑀸𑀦, 𑀓𑀸𑀬𑁂𑀦 𑀇𑀥 𑀧𑀼𑀕𑁆𑀕𑀮𑁄.

‘‘𑀩𑀳𑀼𑀲𑁆𑀲𑀼𑀢𑁄 𑀧𑀼𑀜𑁆𑀜𑀓𑀭𑁄, 𑀅𑀧𑁆𑀧𑀲𑁆𑀫𑀺𑀁 𑀇𑀥 𑀚𑀻𑀯𑀺𑀢𑁂;

𑀓𑀸𑀬𑀲𑁆𑀲 𑀪𑁂𑀤𑀸 𑀲𑀧𑁆𑀧𑀜𑁆𑀜𑁄, 𑀲𑀕𑁆𑀕𑀁 𑀲𑁄 𑀉𑀧𑀧𑀚𑁆𑀚𑀢𑀻’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀦𑀺𑀲𑁆𑀲𑀭𑀡𑀺𑀬𑀲𑀼𑀢𑁆𑀢𑀁

𑁭𑁨. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀭𑀡𑀺𑀬𑀸 [𑀦𑀺𑀲𑁆𑀲𑀸𑀭𑀡𑀻𑀬𑀸 (𑀅. 𑀦𑀺. 𑁫.𑁨𑁦𑁦)] 𑀥𑀸𑀢𑀼𑀬𑁄. 𑀓𑀢𑀫𑀸 𑀢𑀺𑀲𑁆𑀲𑁄? 𑀓𑀸𑀫𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫𑀁, 𑀭𑀽𑀧𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁 𑀬𑀤𑀺𑀤𑀁 𑀆𑀭𑀼𑀧𑁆𑀧𑀁, 𑀬𑀁 𑀔𑁄 𑀧𑀦 𑀓𑀺𑀜𑁆𑀘𑀺 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀦𑀺𑀭𑁄𑀥𑁄 𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀦𑀺𑀲𑁆𑀲𑀭𑀡𑀺𑀬𑀸 𑀥𑀸𑀢𑀼𑀬𑁄’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀓𑀸𑀫𑀦𑀺𑀲𑁆𑀲𑀭𑀡𑀁 𑀜𑀢𑁆𑀯𑀸, 𑀭𑀽𑀧𑀸𑀦𑀜𑁆𑀘 𑀅𑀢𑀺𑀓𑁆𑀓𑀫𑀁;

𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑀁, 𑀨𑀼𑀲𑀁 𑀆𑀢𑀸𑀧𑀺 𑀲𑀩𑁆𑀩𑀤𑀸.

‘‘𑀲 𑀯𑁂 𑀲𑀫𑁆𑀫𑀤𑁆𑀤𑀲𑁄 𑀪𑀺𑀓𑁆𑀔𑀼, 𑀬𑀢𑁄 𑀢𑀢𑁆𑀣 𑀯𑀺𑀫𑀼𑀘𑁆𑀘𑀢𑀺;

𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄 𑀲𑀦𑁆𑀢𑁄, 𑀲 𑀯𑁂 𑀬𑁄𑀕𑀸𑀢𑀺𑀕𑁄 𑀫𑀼𑀦𑀻’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀢𑀢𑀺𑀬𑀁.

𑁪. 𑀲𑀦𑁆𑀢𑀢𑀭𑀲𑀼𑀢𑁆𑀢𑀁

𑁭𑁩. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀭𑀽𑀧𑁂𑀳𑀺, 𑀪𑀺𑀓𑁆𑀔𑀯𑁂, 𑀅𑀭𑀽𑀧𑀸 [𑀆𑀭𑀼𑀧𑁆𑀧𑀸 (𑀲𑀻.)] 𑀲𑀦𑁆𑀢𑀢𑀭𑀸, 𑀅𑀭𑀽𑀧𑁂𑀳𑀺 𑀦𑀺𑀭𑁄𑀥𑁄 𑀲𑀦𑁆𑀢𑀢𑀭𑁄’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑁂 𑀘 𑀭𑀽𑀧𑀽𑀧𑀕𑀸 𑀲𑀢𑁆𑀢𑀸, 𑀬𑁂 𑀘 𑀅𑀭𑀽𑀧𑀝𑁆𑀞𑀸𑀬𑀺𑀦𑁄 [𑀆𑀭𑀼𑀧𑁆𑀧𑀝𑁆𑀞𑀸𑀬𑀺𑀦𑁄 (𑀲𑀻.)];

𑀦𑀺𑀭𑁄𑀥𑀁 𑀅𑀧𑁆𑀧𑀚𑀸𑀦𑀦𑁆𑀢𑀸, 𑀆𑀕𑀦𑁆𑀢𑀸𑀭𑁄 𑀧𑀼𑀦𑀩𑁆𑀪𑀯𑀁.

‘‘𑀬𑁂 𑀘 𑀭𑀽𑀧𑁂 𑀧𑀭𑀺𑀜𑁆𑀜𑀸𑀬, 𑀅𑀭𑀽𑀧𑁂𑀲𑀼 𑀅𑀲𑀡𑁆𑀞𑀺𑀢𑀸;

𑀦𑀺𑀭𑁄𑀥𑁂 𑀬𑁂 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀢𑁂 𑀚𑀦𑀸 𑀫𑀘𑁆𑀘𑀼𑀳𑀸𑀬𑀺𑀦𑁄.

‘‘𑀓𑀸𑀬𑁂𑀦 𑀅𑀫𑀢𑀁 𑀥𑀸𑀢𑀼𑀁, 𑀨𑀼𑀲𑀬𑀺𑀢𑁆𑀯𑀸 𑀦𑀺𑀭𑀽𑀧𑀥𑀺𑀁;

𑀉𑀧𑀥𑀺𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀁, 𑀲𑀘𑁆𑀙𑀺𑀓𑀢𑁆𑀯𑀸 𑀅𑀦𑀸𑀲𑀯𑁄;

𑀤𑁂𑀲𑁂𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀅𑀲𑁄𑀓𑀁 𑀯𑀺𑀭𑀚𑀁 𑀧𑀤’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀼𑀢𑁆𑀢𑀲𑀼𑀢𑁆𑀢𑀁

𑁭𑁪. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀢𑁆𑀢𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀅𑀢𑀺𑀚𑀸𑀢𑁄, 𑀅𑀦𑀼𑀚𑀸𑀢𑁄, 𑀅𑀯𑀚𑀸𑀢𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀢𑁆𑀢𑁄 𑀅𑀢𑀺𑀚𑀸𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀳𑁄𑀦𑁆𑀢𑀺 𑀦 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸, 𑀦 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸, 𑀦 𑀲𑀗𑁆𑀖𑀁 𑀲𑀭𑀡𑀁 𑀕𑀢𑀸; 𑀧𑀸𑀡𑀸𑀢𑀺𑀧𑀸𑀢𑀸 𑀅𑀧𑁆𑀧𑀝𑀺𑀯𑀺𑀭𑀢𑀸, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀅𑀧𑁆𑀧𑀝𑀺𑀯𑀺𑀭𑀢𑀸, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀅𑀧𑁆𑀧𑀝𑀺𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀅𑀧𑁆𑀧𑀝𑀺𑀯𑀺𑀭𑀢𑀸, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀅𑀧𑁆𑀧𑀝𑀺𑀯𑀺𑀭𑀢𑀸, 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸. 𑀧𑀼𑀢𑁆𑀢𑁄 𑀘 𑀦𑁂𑀲𑀁 𑀳𑁄𑀢𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄; 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄, 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀢𑁆𑀢𑁄 𑀅𑀢𑀺𑀚𑀸𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀢𑁆𑀢𑁄 𑀅𑀦𑀼𑀚𑀸𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀳𑁄𑀦𑁆𑀢𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑀸; 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸, 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸. 𑀧𑀼𑀢𑁆𑀢𑁄𑀧𑀺 𑀦𑁂𑀲𑀁 𑀳𑁄𑀢𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄; 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄, 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀢𑁆𑀢𑁄 𑀅𑀦𑀼𑀚𑀸𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀢𑁆𑀢𑁄 𑀅𑀯𑀚𑀸𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀳𑁄𑀦𑁆𑀢𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑀸; 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸, 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸. 𑀧𑀼𑀢𑁆𑀢𑁄 𑀘 𑀦𑁂𑀲𑀁 𑀳𑁄𑀢𑀺 𑀦 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄, 𑀦 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄, 𑀦 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄; 𑀧𑀸𑀡𑀸𑀢𑀺𑀧𑀸𑀢𑀸 𑀅𑀧𑁆𑀧𑀝𑀺𑀯𑀺𑀭𑀢𑁄, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀅𑀧𑁆𑀧𑀝𑀺𑀯𑀺𑀭𑀢𑁄, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀅𑀧𑁆𑀧𑀝𑀺𑀯𑀺𑀭𑀢𑁄, 𑀫𑀼𑀲𑀸𑀯𑀸𑀤𑀸 𑀅𑀧𑁆𑀧𑀝𑀺𑀯𑀺𑀭𑀢𑁄, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀅𑀧𑁆𑀧𑀝𑀺𑀯𑀺𑀭𑀢𑁄, 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀢𑁆𑀢𑁄 𑀅𑀯𑀚𑀸𑀢𑁄 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀧𑀼𑀢𑁆𑀢𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀅𑀢𑀺𑀚𑀸𑀢𑀁 𑀅𑀦𑀼𑀚𑀸𑀢𑀁, 𑀧𑀼𑀢𑁆𑀢𑀫𑀺𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀅𑀯𑀚𑀸𑀢𑀁 𑀦 𑀇𑀘𑁆𑀙𑀦𑁆𑀢𑀺, 𑀬𑁄 𑀳𑁄𑀢𑀺 𑀓𑀼𑀮𑀕𑀦𑁆𑀥𑀦𑁄.

‘‘𑀏𑀢𑁂 𑀔𑁄 𑀧𑀼𑀢𑁆𑀢𑀸 𑀮𑁄𑀓𑀲𑁆𑀫𑀺𑀁, 𑀬𑁂 𑀪𑀯𑀦𑁆𑀢𑀺 𑀉𑀧𑀸𑀲𑀓𑀸;

𑀲𑀤𑁆𑀥𑀸 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑀸;

𑀘𑀦𑁆𑀤𑁄 𑀅𑀩𑁆𑀪𑀖𑀦𑀸 𑀫𑀼𑀢𑁆𑀢𑁄, 𑀧𑀭𑀺𑀲𑀸𑀲𑀼 𑀯𑀺𑀭𑁄𑀘𑀭𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀅𑀯𑀼𑀝𑁆𑀞𑀺𑀓𑀲𑀼𑀢𑁆𑀢𑀁

𑁭𑁫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀅𑀯𑀼𑀝𑁆𑀞𑀺𑀓𑀲𑀫𑁄, 𑀧𑀤𑁂𑀲𑀯𑀲𑁆𑀲𑀻, 𑀲𑀩𑁆𑀩𑀢𑁆𑀣𑀸𑀪𑀺𑀯𑀲𑁆𑀲𑀻.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀯𑀼𑀝𑁆𑀞𑀺𑀓𑀲𑀫𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑁂𑀲𑀜𑁆𑀜𑁂𑀯 𑀦 𑀤𑀸𑀢𑀸 𑀳𑁄𑀢𑀺, 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑀬𑀸𑀘𑀓𑀸𑀦𑀁 [… 𑀯𑀡𑀺𑀩𑁆𑀩𑀓𑀬𑀸𑀘𑀓𑀸𑀦𑀁 (𑀲𑀻.)] 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀯𑀼𑀝𑁆𑀞𑀺𑀓𑀲𑀫𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀤𑁂𑀲𑀯𑀲𑁆𑀲𑀻 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀏𑀓𑀘𑁆𑀘𑀸𑀦𑀁 𑀤𑀸𑀢𑀸 (𑀳𑁄𑀢𑀺) [( ) 𑀦𑀢𑁆𑀣𑀺 𑀲𑁆𑀬𑀸𑀫𑀧𑁄𑀢𑁆𑀣𑀓𑁂], 𑀏𑀓𑀘𑁆𑀘𑀸𑀦𑀁 𑀦 𑀤𑀸𑀢𑀸 𑀳𑁄𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀤𑁂𑀲𑀯𑀲𑁆𑀲𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀩𑁆𑀩𑀢𑁆𑀣𑀸𑀪𑀺𑀯𑀲𑁆𑀲𑀻 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑁂𑀲𑀁𑀯 𑀤𑁂𑀢𑀺, 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀩𑁆𑀩𑀢𑁆𑀣𑀸𑀪𑀺𑀯𑀲𑁆𑀲𑀻 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀦 𑀲𑀫𑀡𑁂 𑀦 𑀩𑁆𑀭𑀸𑀳𑁆𑀫𑀡𑁂, 𑀦 𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑁂;

𑀮𑀤𑁆𑀥𑀸𑀦 𑀲𑀁𑀯𑀺𑀪𑀸𑀚𑁂𑀢𑀺, 𑀅𑀦𑁆𑀦𑀁 𑀧𑀸𑀦𑀜𑁆𑀘 𑀪𑁄𑀚𑀦𑀁;

𑀢𑀁 𑀯𑁂 𑀅𑀯𑀼𑀝𑁆𑀞𑀺𑀓𑀲𑀫𑁄𑀢𑀺, 𑀆𑀳𑀼 𑀦𑀁 𑀧𑀼𑀭𑀺𑀲𑀸𑀥𑀫𑀁.

‘‘𑀏𑀓𑀘𑁆𑀘𑀸𑀦𑀁 𑀦 𑀤𑀤𑀸𑀢𑀺, 𑀏𑀓𑀘𑁆𑀘𑀸𑀦𑀁 𑀧𑀯𑁂𑀘𑁆𑀙𑀢𑀺;

𑀢𑀁 𑀯𑁂 𑀧𑀤𑁂𑀲𑀯𑀲𑁆𑀲𑀻𑀢𑀺, 𑀆𑀳𑀼 𑀫𑁂𑀥𑀸𑀯𑀺𑀦𑁄 𑀚𑀦𑀸.

‘‘𑀲𑀼𑀪𑀺𑀓𑁆𑀔𑀯𑀸𑀘𑁄 𑀧𑀼𑀭𑀺𑀲𑁄, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀓𑁄;

𑀆𑀫𑁄𑀤𑀫𑀸𑀦𑁄 𑀧𑀓𑀺𑀭𑁂𑀢𑀺, 𑀤𑁂𑀣 𑀤𑁂𑀣𑀸𑀢𑀺 𑀪𑀸𑀲𑀢𑀺.

‘‘𑀬𑀣𑀸𑀧𑀺 𑀫𑁂𑀖𑁄 𑀣𑀦𑀬𑀺𑀢𑁆𑀯𑀸, 𑀕𑀚𑁆𑀚𑀬𑀺𑀢𑁆𑀯𑀸 𑀧𑀯𑀲𑁆𑀲𑀢𑀺;

𑀣𑀮𑀁 𑀦𑀺𑀦𑁆𑀦𑀜𑁆𑀘 𑀧𑀽𑀭𑁂𑀢𑀺, 𑀅𑀪𑀺𑀲𑀦𑁆𑀤𑀦𑁆𑀢𑁄𑀯 [𑀅𑀪𑀺𑀲𑀦𑁆𑀤𑁂𑀦𑁆𑀢𑁄𑀯 (?)] 𑀯𑀸𑀭𑀺𑀦𑀸.

‘‘𑀏𑀯𑀫𑁂𑀯 𑀇𑀥𑁂𑀓𑀘𑁆𑀘𑁄, 𑀧𑀼𑀕𑁆𑀕𑀮𑁄 𑀳𑁄𑀢𑀺 𑀢𑀸𑀤𑀺𑀲𑁄;

𑀥𑀫𑁆𑀫𑁂𑀦 𑀲𑀁𑀳𑀭𑀺𑀢𑁆𑀯𑀸𑀦, 𑀉𑀝𑁆𑀞𑀸𑀦𑀸𑀥𑀺𑀕𑀢𑀁 𑀥𑀦𑀁;

𑀢𑀧𑁆𑀧𑁂𑀢𑀺 𑀅𑀦𑁆𑀦𑀧𑀸𑀦𑁂𑀦, 𑀲𑀫𑁆𑀫𑀸 𑀧𑀢𑁆𑀢𑁂 𑀯𑀦𑀺𑀩𑁆𑀩𑀓𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀙𑀝𑁆𑀞𑀁.

𑁭. 𑀲𑀼𑀔𑀧𑀢𑁆𑀣𑀦𑀸𑀲𑀼𑀢𑁆𑀢𑀁

𑁭𑁬. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀸𑀦𑀺 𑀧𑀢𑁆𑀣𑀬𑀫𑀸𑀦𑁄 𑀲𑀻𑀮𑀁 𑀭𑀓𑁆𑀔𑁂𑀬𑁆𑀬 𑀧𑀡𑁆𑀟𑀺𑀢𑁄. 𑀓𑀢𑀫𑀸𑀦𑀺 𑀢𑀻𑀡𑀺? 𑀧𑀲𑀁𑀲𑀸 𑀫𑁂 𑀆𑀕𑀘𑁆𑀙𑀢𑀽𑀢𑀺 [𑀆𑀕𑀘𑁆𑀙𑀦𑁆𑀢𑀽𑀢𑀺 (𑀲𑁆𑀬𑀸.)] 𑀲𑀻𑀮𑀁 𑀭𑀓𑁆𑀔𑁂𑀬𑁆𑀬 𑀧𑀡𑁆𑀟𑀺𑀢𑁄, 𑀪𑁄𑀕𑀸 𑀫𑁂 𑀉𑀧𑁆𑀧𑀚𑁆𑀚𑀦𑁆𑀢𑀽𑀢𑀺 𑀲𑀻𑀮𑀁 𑀭𑀓𑁆𑀔𑁂𑀬𑁆𑀬 𑀧𑀡𑁆𑀟𑀺𑀢𑁄, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀲𑀻𑀮𑀁 𑀭𑀓𑁆𑀔𑁂𑀬𑁆𑀬 𑀧𑀡𑁆𑀟𑀺𑀢𑁄. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀲𑀼𑀔𑀸𑀦𑀺 𑀧𑀢𑁆𑀣𑀬𑀫𑀸𑀦𑁄 𑀲𑀻𑀮𑀁 𑀭𑀓𑁆𑀔𑁂𑀬𑁆𑀬 𑀧𑀡𑁆𑀟𑀺𑀢𑁄’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀲𑀻𑀮𑀁 𑀭𑀓𑁆𑀔𑁂𑀬𑁆𑀬 𑀫𑁂𑀥𑀸𑀯𑀻, 𑀧𑀢𑁆𑀣𑀬𑀸𑀦𑁄 𑀢𑀬𑁄 𑀲𑀼𑀔𑁂;

𑀧𑀲𑀁𑀲𑀁 𑀯𑀺𑀢𑁆𑀢𑀮𑀸𑀪𑀜𑁆𑀘, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀦𑀁.

‘‘𑀅𑀓𑀭𑁄𑀦𑁆𑀢𑁄𑀧𑀺 𑀘𑁂 𑀧𑀸𑀧𑀁, 𑀓𑀭𑁄𑀦𑁆𑀢𑀫𑀼𑀧𑀲𑁂𑀯𑀢𑀺;

𑀲𑀗𑁆𑀓𑀺𑀬𑁄 𑀳𑁄𑀢𑀺 𑀧𑀸𑀧𑀲𑁆𑀫𑀺𑀁, 𑀅𑀯𑀡𑁆𑀡𑁄 𑀘𑀲𑁆𑀲 𑀭𑀽𑀳𑀢𑀺.

‘‘𑀬𑀸𑀤𑀺𑀲𑀁 𑀓𑀼𑀭𑀼𑀢𑁂 𑀫𑀺𑀢𑁆𑀢𑀁, 𑀬𑀸𑀤𑀺𑀲𑀁 𑀘𑀽𑀧𑀲𑁂𑀯𑀢𑀺;

𑀲 𑀯𑁂 𑀢𑀸𑀤𑀺𑀲𑀓𑁄 𑀳𑁄𑀢𑀺, 𑀲𑀳𑀯𑀸𑀲𑁄 𑀳𑀺 [𑀲𑀳𑀯𑀸𑀲𑁄𑀧𑀺 (𑀲𑀻. 𑀓.)] 𑀢𑀸𑀤𑀺𑀲𑁄.

‘‘𑀲𑁂𑀯𑀫𑀸𑀦𑁄 𑀲𑁂𑀯𑀫𑀸𑀦𑀁, 𑀲𑀫𑁆𑀨𑀼𑀝𑁆𑀞𑁄 𑀲𑀫𑁆𑀨𑀼𑀲𑀁 𑀧𑀭𑀁;

𑀲𑀭𑁄 𑀤𑀺𑀤𑁆𑀥𑁄 𑀓𑀮𑀸𑀧𑀁𑀯, 𑀅𑀮𑀺𑀢𑁆𑀢𑀫𑀼𑀧𑀮𑀺𑀫𑁆𑀧𑀢𑀺;

𑀉𑀧𑀮𑁂𑀧𑀪𑀬𑀸 [𑀉𑀧𑀮𑀺𑀫𑁆𑀧𑀪𑀬𑀸 (𑀓.)] 𑀥𑀻𑀭𑁄, 𑀦𑁂𑀯 𑀧𑀸𑀧𑀲𑀔𑀸 𑀲𑀺𑀬𑀸.

‘‘𑀧𑀽𑀢𑀺𑀫𑀘𑁆𑀙𑀁 𑀓𑀼𑀲𑀕𑁆𑀕𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀓𑀼𑀲𑀸𑀧𑀺 𑀧𑀽𑀢𑀺 𑀯𑀸𑀬𑀦𑁆𑀢𑀺, 𑀏𑀯𑀁 𑀩𑀸𑀮𑀽𑀧𑀲𑁂𑀯𑀦𑀸.

‘‘𑀢𑀕𑀭𑀜𑁆𑀘 𑀧𑀮𑀸𑀲𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀧𑀢𑁆𑀢𑀸𑀧𑀺 𑀲𑀼𑀭𑀪𑀺 𑀯𑀸𑀬𑀦𑁆𑀢𑀺, 𑀏𑀯𑀁 𑀥𑀻𑀭𑀽𑀧𑀲𑁂𑀯𑀦𑀸.

‘‘𑀢𑀲𑁆𑀫𑀸 𑀧𑀢𑁆𑀢𑀧𑀼𑀝𑀲𑁆𑀲𑁂𑀯 [𑀧𑀮𑀸𑀲𑀧𑀼𑀝𑀲𑁆𑀲𑁂𑀯 (𑀧𑀻. 𑀓.)], 𑀜𑀢𑁆𑀯𑀸 𑀲𑀫𑁆𑀧𑀸𑀓𑀫𑀢𑁆𑀢𑀦𑁄;

𑀅𑀲𑀦𑁆𑀢𑁂 𑀦𑀼𑀧𑀲𑁂𑀯𑁂𑀬𑁆𑀬, 𑀲𑀦𑁆𑀢𑁂 𑀲𑁂𑀯𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀅𑀲𑀦𑁆𑀢𑁄 𑀦𑀺𑀭𑀬𑀁 𑀦𑁂𑀦𑁆𑀢𑀺, 𑀲𑀦𑁆𑀢𑁄 𑀧𑀸𑀧𑁂𑀦𑁆𑀢𑀺 𑀲𑀼𑀕𑁆𑀕𑀢𑀺’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀪𑀺𑀤𑀼𑀭𑀲𑀼𑀢𑁆𑀢𑀁

𑁭𑁭. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀪𑀺𑀤𑀼𑀭𑀸𑀬𑀁 [𑀪𑀺𑀦𑁆𑀤𑀦𑁆𑀢𑀸𑀬𑀁 (𑀲𑁆𑀬𑀸. 𑀧𑀻. 𑀓.)], 𑀪𑀺𑀓𑁆𑀔𑀯𑁂, 𑀓𑀸𑀬𑁄, 𑀯𑀺𑀜𑁆𑀜𑀸𑀡𑀁 𑀯𑀺𑀭𑀸𑀕𑀥𑀫𑁆𑀫𑀁, 𑀲𑀩𑁆𑀩𑁂 𑀉𑀧𑀥𑀻 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀓𑀸𑀬𑀜𑁆𑀘 𑀪𑀺𑀤𑀼𑀭𑀁 [𑀪𑀺𑀦𑁆𑀤𑀦𑁆𑀢𑀁 (𑀲𑁆𑀬𑀸. 𑀧𑀻. 𑀓.)] 𑀜𑀢𑁆𑀯𑀸, 𑀯𑀺𑀜𑁆𑀜𑀸𑀡𑀜𑁆𑀘 𑀯𑀺𑀭𑀸𑀕𑀼𑀦𑀁 [𑀯𑀺𑀭𑀸𑀕𑀺𑀓𑀁 (𑀓. 𑀲𑀻.), 𑀧𑀪𑀗𑁆𑀕𑀼𑀡𑀁 (𑀲𑁆𑀬𑀸.)];

𑀉𑀧𑀥𑀻𑀲𑀼 𑀪𑀬𑀁 𑀤𑀺𑀲𑁆𑀯𑀸, 𑀚𑀸𑀢𑀺𑀫𑀭𑀡𑀫𑀘𑁆𑀘𑀕𑀸;

𑀲𑀫𑁆𑀧𑀢𑁆𑀯𑀸 𑀧𑀭𑀫𑀁 𑀲𑀦𑁆𑀢𑀺𑀁, 𑀓𑀸𑀮𑀁 𑀓𑀗𑁆𑀔𑀢𑀺 𑀪𑀸𑀯𑀺𑀢𑀢𑁆𑀢𑁄’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀥𑀸𑀢𑀼𑀲𑁄𑀲𑀁𑀲𑀦𑁆𑀤𑀦𑀲𑀼𑀢𑁆𑀢𑀁

𑁭𑁮. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀥𑀸𑀢𑀼𑀲𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺. 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁂𑀳𑀺 𑀲𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺, 𑀓𑀮𑁆𑀬𑀸𑀡𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀓𑀮𑁆𑀬𑀸𑀡𑀸𑀥𑀺𑀫𑀼𑀢𑁆𑀢𑀺𑀓𑁂𑀳𑀺 𑀲𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺.

‘‘𑀅𑀢𑀻𑀢𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀸𑀦𑀁 𑀥𑀸𑀢𑀼𑀲𑁄𑀯 𑀲𑀢𑁆𑀢𑀸 𑀲𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀁𑀲𑀼 𑀲𑀫𑀺𑀁𑀲𑀼. 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁂𑀳𑀺 𑀲𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀁𑀲𑀼 𑀲𑀫𑀺𑀁𑀲𑀼, 𑀓𑀮𑁆𑀬𑀸𑀡𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀓𑀮𑁆𑀬𑀸𑀡𑀸𑀥𑀺𑀫𑀼𑀢𑁆𑀢𑀺𑀓𑁂𑀳𑀺 𑀲𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀁𑀲𑀼 𑀲𑀫𑀺𑀁𑀲𑀼.

‘‘𑀅𑀦𑀸𑀕𑀢𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀸𑀦𑀁 𑀥𑀸𑀢𑀼𑀲𑁄𑀯 𑀲𑀢𑁆𑀢𑀸 𑀲𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀲𑁆𑀲𑀦𑁆𑀢𑀺 𑀲𑀫𑁂𑀲𑁆𑀲𑀦𑁆𑀢𑀺. 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁂𑀳𑀺 𑀲𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀲𑁆𑀲𑀦𑁆𑀢𑀺 𑀲𑀫𑁂𑀲𑁆𑀲𑀦𑁆𑀢𑀺, 𑀓𑀮𑁆𑀬𑀸𑀡𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀓𑀮𑁆𑀬𑀸𑀡𑀸𑀥𑀺𑀫𑀼𑀢𑁆𑀢𑀺𑀓𑁂𑀳𑀺 𑀲𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀲𑁆𑀲𑀦𑁆𑀢𑀺 𑀲𑀫𑁂𑀲𑁆𑀲𑀦𑁆𑀢𑀺.

‘‘𑀏𑀢𑀭𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀼𑀧𑁆𑀧𑀦𑀁 𑀅𑀤𑁆𑀥𑀸𑀦𑀁 𑀥𑀸𑀢𑀼𑀲𑁄𑀯 𑀲𑀢𑁆𑀢𑀸 𑀲𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺. 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁂𑀳𑀺 𑀲𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺, 𑀓𑀮𑁆𑀬𑀸𑀡𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀓𑀮𑁆𑀬𑀸𑀡𑀸𑀥𑀺𑀫𑀼𑀢𑁆𑀢𑀺𑀓𑁂𑀳𑀺 𑀲𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀲𑀁𑀲𑀕𑁆𑀕𑀸 𑀯𑀦𑀣𑁄 𑀚𑀸𑀢𑁄, 𑀅𑀲𑀁𑀲𑀕𑁆𑀕𑁂𑀦 𑀙𑀺𑀚𑁆𑀚𑀢𑀺;

𑀧𑀭𑀺𑀢𑁆𑀢𑀁 𑀤𑀸𑀭𑀼𑀫𑀸𑀭𑀼𑀬𑁆𑀳, 𑀬𑀣𑀸 𑀲𑀻𑀤𑁂 𑀫𑀳𑀡𑁆𑀡𑀯𑁂.

‘‘𑀏𑀯𑀁 𑀓𑀼𑀲𑀻𑀢𑀫𑀸𑀕𑀫𑁆𑀫, 𑀲𑀸𑀥𑀼𑀚𑀻𑀯𑀻𑀧𑀺 𑀲𑀻𑀤𑀢𑀺;

𑀢𑀲𑁆𑀫𑀸 𑀢𑀁 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀓𑀼𑀲𑀻𑀢𑀁 𑀳𑀻𑀦𑀯𑀻𑀭𑀺𑀬𑀁.

‘‘𑀧𑀯𑀺𑀯𑀺𑀢𑁆𑀢𑁂𑀳𑀺 𑀅𑀭𑀺𑀬𑁂𑀳𑀺, 𑀧𑀳𑀺𑀢𑀢𑁆𑀢𑁂𑀳𑀺 𑀛𑀸𑀬𑀺𑀪𑀺;

𑀦𑀺𑀘𑁆𑀘𑀁 𑀆𑀭𑀤𑁆𑀥𑀯𑀻𑀭𑀺𑀬𑁂𑀳𑀺, 𑀧𑀡𑁆𑀟𑀺𑀢𑁂𑀳𑀺 𑀲𑀳𑀸𑀯𑀲𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀦𑀯𑀫𑀁.

𑁧𑁦. 𑀧𑀭𑀺𑀳𑀸𑀦𑀲𑀼𑀢𑁆𑀢𑀁

𑁭𑁯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀢𑀬𑁄? 𑀇𑀥, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 𑀓𑀫𑁆𑀫𑀸𑀭𑀸𑀫𑁄 𑀳𑁄𑀢𑀺, 𑀓𑀫𑁆𑀫𑀭𑀢𑁄, 𑀓𑀫𑁆𑀫𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑁄; 𑀪𑀲𑁆𑀲𑀸𑀭𑀸𑀫𑁄 𑀳𑁄𑀢𑀺, 𑀪𑀲𑁆𑀲𑀭𑀢𑁄, 𑀪𑀲𑁆𑀲𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑁄; 𑀦𑀺𑀤𑁆𑀤𑀸𑀭𑀸𑀫𑁄 𑀳𑁄𑀢𑀺, 𑀦𑀺𑀤𑁆𑀤𑀸𑀭𑀢𑁄, 𑀦𑀺𑀤𑁆𑀤𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀢𑀬𑁄? 𑀇𑀥, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 𑀦 𑀓𑀫𑁆𑀫𑀸𑀭𑀸𑀫𑁄 𑀳𑁄𑀢𑀺, 𑀦 𑀓𑀫𑁆𑀫𑀭𑀢𑁄, 𑀦 𑀓𑀫𑁆𑀫𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑁄; 𑀦 𑀪𑀲𑁆𑀲𑀸𑀭𑀸𑀫𑁄 𑀳𑁄𑀢𑀺, 𑀦 𑀪𑀲𑁆𑀲𑀭𑀢𑁄, 𑀦 𑀪𑀲𑁆𑀲𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑁄; 𑀦 𑀦𑀺𑀤𑁆𑀤𑀸𑀭𑀸𑀫𑁄 𑀳𑁄𑀢𑀺, 𑀦 𑀦𑀺𑀤𑁆𑀤𑀸𑀭𑀢𑁄, 𑀦 𑀦𑀺𑀤𑁆𑀤𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀓𑀫𑁆𑀫𑀸𑀭𑀸𑀫𑁄 𑀪𑀲𑁆𑀲𑀸𑀭𑀸𑀫𑁄 [𑀪𑀲𑁆𑀲𑀭𑀢𑁄 (𑀲𑀩𑁆𑀩𑀣)], 𑀦𑀺𑀤𑁆𑀤𑀸𑀭𑀸𑀫𑁄 𑀘 𑀉𑀤𑁆𑀥𑀢𑁄;

𑀅𑀪𑀩𑁆𑀩𑁄 𑀢𑀸𑀤𑀺𑀲𑁄 𑀪𑀺𑀓𑁆𑀔𑀼, 𑀨𑀼𑀝𑁆𑀞𑀼𑀁 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

‘‘𑀢𑀲𑁆𑀫𑀸 𑀳𑀺 𑀅𑀧𑁆𑀧𑀓𑀺𑀘𑁆𑀘𑀲𑁆𑀲, 𑀅𑀧𑁆𑀧𑀫𑀺𑀤𑁆𑀥𑁄 𑀅𑀦𑀼𑀤𑁆𑀥𑀢𑁄;

𑀪𑀩𑁆𑀩𑁄 𑀲𑁄 𑀢𑀸𑀤𑀺𑀲𑁄 𑀪𑀺𑀓𑁆𑀔𑀼, 𑀨𑀼𑀝𑁆𑀞𑀼𑀁 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀲𑀫𑀁.

𑀢𑀢𑀺𑀬𑁄 𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑁆𑀯𑁂 𑀤𑀺𑀝𑁆𑀞𑀻 𑀦𑀺𑀲𑁆𑀲𑀭𑀡𑀁 𑀭𑀽𑀧𑀁, 𑀧𑀼𑀢𑁆𑀢𑁄 𑀅𑀯𑀼𑀝𑁆𑀞𑀺𑀓𑁂𑀦 𑀘;

𑀲𑀼𑀔𑀸 𑀘 𑀪𑀺𑀤𑀼𑀭𑁄 [𑀪𑀺𑀦𑁆𑀤𑀦𑀸 (𑀲𑀩𑁆𑀩𑀢𑁆𑀣)] 𑀥𑀸𑀢𑀼, 𑀧𑀭𑀺𑀳𑀸𑀦𑁂𑀦 𑀢𑁂 𑀤𑀲𑀸𑀢𑀺.