𑁧𑁦. 𑀲𑁄𑀫𑀦𑀲𑁆𑀲𑀲𑀼𑀢𑁆𑀢𑀁

𑁩𑁭. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑁆𑀯𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀲𑁄𑀫𑀦𑀲𑁆𑀲𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀬𑁄𑀦𑀺 𑀘𑀲𑁆𑀲 [𑀬𑁄𑀦𑀺𑀲𑁄 (𑀲𑀻. 𑀲𑁆𑀬𑀸. 𑀧𑀻.), 𑀬𑁄𑀦𑀺𑀲𑁆𑀲 (𑀓.)] 𑀆𑀭𑀤𑁆𑀥𑀸 𑀳𑁄𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺? 𑀲𑀁𑀯𑁂𑀚𑀦𑀻𑀬𑁂𑀲𑀼 𑀞𑀸𑀦𑁂𑀲𑀼 𑀲𑀁𑀯𑁂𑀚𑀦𑁂𑀦, 𑀲𑀁𑀯𑀺𑀕𑁆𑀕𑀲𑁆𑀲 𑀘 𑀬𑁄𑀦𑀺𑀲𑁄 𑀧𑀥𑀸𑀦𑁂𑀦. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀲𑁄𑀫𑀦𑀲𑁆𑀲𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀲𑀁𑀯𑁂𑀚𑀦𑀻𑀬𑀝𑁆𑀞𑀸𑀦𑁂𑀲𑀼 [𑀲𑀁𑀯𑁂𑀚𑀦𑀻𑀬𑁂𑀲𑀼 𑀞𑀸𑀦𑁂𑀲𑀼 (𑀲𑁆𑀬𑀸. 𑀧𑀻.)], 𑀲𑀁𑀯𑀺𑀚𑁆𑀚𑁂𑀣𑁂𑀯 𑀧𑀡𑁆𑀟𑀺𑀢𑁄;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀧𑀜𑁆𑀜𑀸𑀬 𑀲𑀫𑀯𑁂𑀓𑁆𑀔𑀺𑀬.

‘‘𑀏𑀯𑀁 𑀯𑀺𑀳𑀸𑀭𑀻 𑀆𑀢𑀸𑀧𑀻, 𑀲𑀦𑁆𑀢𑀯𑀼𑀢𑁆𑀢𑀺 𑀅𑀦𑀼𑀤𑁆𑀥𑀢𑁄;

𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄, 𑀔𑀬𑀁 𑀤𑀼𑀓𑁆𑀔𑀲𑁆𑀲 𑀧𑀸𑀧𑀼𑀡𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑁆𑀯𑁂 𑀘 𑀪𑀺𑀓𑁆𑀔𑀽 𑀢𑀧𑀦𑀻𑀬𑀸, 𑀢𑀧𑀦𑀻𑀬𑀸 𑀧𑀭𑀢𑁆𑀣𑁂𑀳𑀺;

𑀆𑀢𑀸𑀧𑀻 [𑀤𑁆𑀯𑁂 𑀧𑀸𑀤𑀸 (𑀓.), 𑀤𑁆𑀯𑁂 𑀆𑀢𑀸𑀧𑀻 (𑀲𑀻.)] 𑀦𑀓𑀼𑀳𑀦𑀸 𑀤𑁆𑀯𑁂 [𑀦 𑀓𑀼𑀳𑀦𑀸 𑀘 (𑀲𑀩𑁆𑀩𑀢𑁆𑀣)], 𑀲𑁄𑀫𑀦𑀲𑁆𑀲𑁂𑀦 𑀢𑁂 𑀤𑀲𑀸𑀢𑀺.