𑁧. 𑀧𑀞𑀫𑀯𑀕𑁆𑀕𑁄

𑁧. 𑀤𑀼𑀓𑁆𑀔𑀯𑀺𑀳𑀸𑀭𑀲𑀼𑀢𑁆𑀢𑀁

𑁨𑁮. (𑀤𑁆𑀯𑁂 𑀥𑀫𑁆𑀫𑁂 𑀅𑀦𑀼𑀓𑁆𑀓𑀝𑀺) [( ) 𑀲𑁆𑀬𑀸𑀫𑀧𑁄𑀢𑁆𑀣𑀓𑁂 𑀦𑀢𑁆𑀣𑀺] 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑁆𑀯𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺 𑀲𑀯𑀺𑀖𑀸𑀢𑀁 𑀲𑀉𑀧𑀸𑀬𑀸𑀲𑀁 𑀲𑀧𑀭𑀺𑀴𑀸𑀳𑀁; 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺? 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀬 [𑀅𑀕𑀼𑀢𑁆𑀢𑀤𑁆𑀯𑀸𑀭𑁄 (𑀅𑀝𑁆𑀞.)] 𑀘, 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸𑀬 [𑀅𑀫𑀢𑁆𑀢𑀜𑁆𑀜𑀽 (𑀅𑀝𑁆𑀞.)] 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺 𑀲𑀯𑀺𑀥𑀸𑀢𑀁 𑀲𑀉𑀧𑀸𑀬𑀸𑀲𑀁 𑀲𑀧𑀭𑀺𑀴𑀸𑀳𑀁; 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀘𑀓𑁆𑀔𑀼 𑀲𑁄𑀢𑀜𑁆𑀘 𑀖𑀸𑀦𑀜𑁆𑀘, 𑀚𑀺𑀯𑁆𑀳𑀸 𑀓𑀸𑀬𑁄 𑀢𑀣𑀸 𑀫𑀦𑁄;

𑀏𑀢𑀸𑀦𑀺 𑀬𑀲𑁆𑀲 𑀤𑁆𑀯𑀸𑀭𑀸𑀦𑀺, 𑀅𑀕𑀼𑀢𑁆𑀢𑀸𑀦𑀺𑀥 [𑀅𑀕𑀼𑀢𑁆𑀢𑀸𑀦𑀺 𑀘 (𑀲𑁆𑀬𑀸.)] 𑀪𑀺𑀓𑁆𑀔𑀼𑀦𑁄.

‘‘𑀪𑁄𑀚𑀦𑀫𑁆𑀳𑀺 𑀅𑀫𑀢𑁆𑀢𑀜𑁆𑀜𑀽, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀲𑀁𑀯𑀼𑀢𑁄;

𑀓𑀸𑀬𑀤𑀼𑀓𑁆𑀔𑀁 𑀘𑁂𑀢𑁄𑀤𑀼𑀓𑁆𑀔𑀁, 𑀤𑀼𑀓𑁆𑀔𑀁 𑀲𑁄 𑀅𑀥𑀺𑀕𑀘𑁆𑀙𑀢𑀺.

‘‘𑀟𑀬𑁆𑀳𑀫𑀸𑀦𑁂𑀦 𑀓𑀸𑀬𑁂𑀦, 𑀟𑀬𑁆𑀳𑀫𑀸𑀦𑁂𑀦 𑀘𑁂𑀢𑀲𑀸;

𑀤𑀺𑀯𑀸 𑀯𑀸 𑀬𑀤𑀺 𑀯𑀸 𑀭𑀢𑁆𑀢𑀺𑀁, 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺 𑀢𑀸𑀤𑀺𑀲𑁄’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀧𑀞𑀫𑀁.

𑁨. 𑀲𑀼𑀔𑀯𑀺𑀳𑀸𑀭𑀲𑀼𑀢𑁆𑀢𑀁

𑁨𑁯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑁆𑀯𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀁 𑀯𑀺𑀳𑀭𑀢𑀺 𑀅𑀯𑀺𑀖𑀸𑀢𑀁 𑀅𑀦𑀼𑀧𑀸𑀬𑀸𑀲𑀁 𑀅𑀧𑀭𑀺𑀴𑀸𑀳𑀁; 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺 𑀧𑀸𑀝𑀺𑀓𑀗𑁆𑀔𑀸. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺? 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀬 𑀘, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀬 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀁 𑀯𑀺𑀳𑀭𑀢𑀺 𑀅𑀯𑀺𑀖𑀸𑀢𑀁 𑀅𑀦𑀼𑀧𑀸𑀬𑀸𑀲𑀁 𑀅𑀧𑀭𑀺𑀴𑀸𑀳𑀁; 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺 𑀧𑀸𑀝𑀺𑀓𑀗𑁆𑀔𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀘𑀓𑁆𑀔𑀼 𑀲𑁄𑀢𑀜𑁆𑀘 𑀖𑀸𑀦𑀜𑁆𑀘, 𑀚𑀺𑀯𑁆𑀳𑀸 𑀓𑀸𑀬𑁄 𑀢𑀣𑀸 [𑀅𑀣𑁄 (𑀲𑀻. 𑀲𑁆𑀬𑀸. 𑀓.)] 𑀫𑀦𑁄;

𑀏𑀢𑀸𑀦𑀺 𑀬𑀲𑁆𑀲 𑀤𑁆𑀯𑀸𑀭𑀸𑀦𑀺, 𑀲𑀼𑀕𑀼𑀢𑁆𑀢𑀸𑀦𑀺𑀥 𑀪𑀺𑀓𑁆𑀔𑀼𑀦𑁄.

‘‘𑀪𑁄𑀚𑀦𑀫𑁆𑀳𑀺 𑀘 𑀫𑀢𑁆𑀢𑀜𑁆𑀜𑀽, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀘 𑀲𑀁𑀯𑀼𑀢𑁄;

𑀓𑀸𑀬𑀲𑀼𑀔𑀁 𑀘𑁂𑀢𑁄𑀲𑀼𑀔𑀁, 𑀲𑀼𑀔𑀁 𑀲𑁄 𑀅𑀥𑀺𑀕𑀘𑁆𑀙𑀢𑀺.

‘‘𑀅𑀟𑀬𑁆𑀳𑀫𑀸𑀦𑁂𑀦 𑀓𑀸𑀬𑁂𑀦, 𑀅𑀟𑀬𑁆𑀳𑀫𑀸𑀦𑁂𑀦 𑀘𑁂𑀢𑀲𑀸;

𑀤𑀺𑀯𑀸 𑀯𑀸 𑀬𑀤𑀺 𑀯𑀸 𑀭𑀢𑁆𑀢𑀺𑀁, 𑀲𑀼𑀔𑀁 𑀯𑀺𑀳𑀭𑀢𑀺 𑀢𑀸𑀤𑀺𑀲𑁄’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀢𑀧𑀦𑀻𑀬𑀲𑀼𑀢𑁆𑀢𑀁

𑁩𑁦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀢𑀧𑀦𑀻𑀬𑀸. 𑀓𑀢𑀫𑁂 𑀤𑁆𑀯𑁂? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀓𑀢𑀓𑀮𑁆𑀬𑀸𑀡𑁄 𑀳𑁄𑀢𑀺, 𑀅𑀓𑀢𑀓𑀼𑀲𑀮𑁄, 𑀅𑀓𑀢𑀪𑀻𑀭𑀼𑀢𑁆𑀢𑀸𑀡𑁄, 𑀓𑀢𑀧𑀸𑀧𑁄, 𑀓𑀢𑀮𑀼𑀤𑁆𑀤𑁄, 𑀓𑀢𑀓𑀺𑀩𑁆𑀩𑀺𑀲𑁄. 𑀲𑁄 ‘𑀅𑀓𑀢𑀁 𑀫𑁂 𑀓𑀮𑁆𑀬𑀸𑀡’𑀦𑁆𑀢𑀺𑀧𑀺 𑀢𑀧𑁆𑀧𑀢𑀺, ‘𑀓𑀢𑀁 𑀫𑁂 𑀧𑀸𑀧’𑀦𑁆𑀢𑀺𑀧𑀺 𑀢𑀧𑁆𑀧𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀥𑀫𑁆𑀫𑀸 𑀢𑀧𑀦𑀻𑀬𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀢𑁆𑀯𑀸, 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺 𑀘;

𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀓𑀢𑁆𑀯𑀸, 𑀬𑀜𑁆𑀘𑀜𑁆𑀜𑀁 𑀤𑁄𑀲𑀲𑀜𑁆𑀳𑀺𑀢𑀁.

‘‘𑀅𑀓𑀢𑁆𑀯𑀸 𑀓𑀼𑀲𑀮𑀁 𑀓𑀫𑁆𑀫𑀁, 𑀓𑀢𑁆𑀯𑀸𑀦𑀸𑀓𑀼𑀲𑀮𑀁 𑀩𑀳𑀼𑀁;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀻’’𑀢𑀺 [𑀦𑀺𑀭𑀬𑀁 𑀲𑁄 𑀉𑀧𑀧𑀚𑁆𑀚𑀢𑀻𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)].

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀢𑀢𑀺𑀬𑀁.

𑁪. 𑀅𑀢𑀧𑀦𑀻𑀬𑀲𑀼𑀢𑁆𑀢𑀁

𑁩𑁧. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀢𑀧𑀦𑀻𑀬𑀸. 𑀓𑀢𑀫𑁂 𑀤𑁆𑀯𑁂? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀓𑀢𑀓𑀮𑁆𑀬𑀸𑀡𑁄 𑀳𑁄𑀢𑀺, 𑀓𑀢𑀓𑀼𑀲𑀮𑁄, 𑀓𑀢𑀪𑀻𑀭𑀼𑀢𑁆𑀢𑀸𑀡𑁄, 𑀅𑀓𑀢𑀧𑀸𑀧𑁄, 𑀅𑀓𑀢𑀮𑀼𑀤𑁆𑀤𑁄, 𑀅𑀓𑀢𑀓𑀺𑀩𑁆𑀩𑀺𑀲𑁄. 𑀲𑁄 ‘𑀓𑀢𑀁 𑀫𑁂 𑀓𑀮𑁆𑀬𑀸𑀡’𑀦𑁆𑀢𑀺𑀧𑀺 𑀦 𑀢𑀧𑁆𑀧𑀢𑀺, ‘𑀅𑀓𑀢𑀁 𑀫𑁂 𑀧𑀸𑀧’𑀦𑁆𑀢𑀺𑀧𑀺 𑀦 𑀢𑀧𑁆𑀧𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀥𑀫𑁆𑀫𑀸 𑀅𑀢𑀧𑀦𑀻𑀬𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺 𑀘;

𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀬𑀜𑁆𑀘𑀜𑁆𑀜𑀁 𑀤𑁄𑀲𑀲𑀜𑁆𑀳𑀺𑀢𑀁.

‘‘𑀅𑀓𑀢𑁆𑀯𑀸𑀓𑀼𑀲𑀮𑀁 𑀓𑀫𑁆𑀫𑀁, 𑀓𑀢𑁆𑀯𑀸𑀦 𑀓𑀼𑀲𑀮𑀁 𑀩𑀳𑀼𑀁;

𑀓𑀸𑀬𑀲𑁆𑀲 𑀪𑁂𑀤𑀸 𑀲𑀧𑁆𑀧𑀜𑁆𑀜𑁄, 𑀲𑀕𑁆𑀕𑀁 𑀲𑁄 𑀉𑀧𑀧𑀚𑁆𑀚𑀢𑀻’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀲𑀻𑀮𑀲𑀼𑀢𑁆𑀢𑀁

𑁩𑁨. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑁆𑀯𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺? 𑀧𑀸𑀧𑀓𑁂𑀦 𑀘 𑀲𑀻𑀮𑁂𑀦, 𑀧𑀸𑀧𑀺𑀓𑀸𑀬 𑀘 𑀤𑀺𑀝𑁆𑀞𑀺𑀬𑀸. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀧𑀸𑀧𑀓𑁂𑀦 𑀘 𑀲𑀻𑀮𑁂𑀦, 𑀧𑀸𑀧𑀺𑀓𑀸𑀬 𑀘 𑀤𑀺𑀝𑁆𑀞𑀺𑀬𑀸;

𑀏𑀢𑁂𑀳𑀺 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺, 𑀬𑁄 𑀲𑀫𑀦𑁆𑀦𑀸𑀕𑀢𑁄 𑀦𑀭𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀻’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀲𑀻𑀮𑀲𑀼𑀢𑁆𑀢𑀁

𑁩𑁩. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑁆𑀯𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺? 𑀪𑀤𑁆𑀤𑀓𑁂𑀦 𑀘 𑀲𑀻𑀮𑁂𑀦, 𑀪𑀤𑁆𑀤𑀺𑀓𑀸𑀬 𑀘 𑀤𑀺𑀝𑁆𑀞𑀺𑀬𑀸. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀪𑀤𑁆𑀤𑀓𑁂𑀦 𑀘 𑀲𑀻𑀮𑁂𑀦, 𑀪𑀤𑁆𑀤𑀺𑀓𑀸𑀬 𑀘 𑀤𑀺𑀝𑁆𑀞𑀺𑀬𑀸;

𑀏𑀢𑁂𑀳𑀺 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺, 𑀬𑁄 𑀲𑀫𑀦𑁆𑀦𑀸𑀕𑀢𑁄 𑀦𑀭𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀲𑀧𑁆𑀧𑀜𑁆𑀜𑁄, 𑀲𑀕𑁆𑀕𑀁 𑀲𑁄 𑀉𑀧𑀧𑀚𑁆𑀚𑀢𑀻’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀙𑀝𑁆𑀞𑀁.

𑁭. 𑀆𑀢𑀸𑀧𑀻𑀲𑀼𑀢𑁆𑀢𑀁

𑁩𑁪. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀅𑀦𑀸𑀢𑀸𑀧𑀻, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑁄𑀢𑁆𑀢𑀸𑀧𑀻 [𑀅𑀦𑁄𑀢𑁆𑀢𑀧𑁆𑀧𑀻 (𑀩𑀳𑀽𑀲𑀼) 𑀅𑀝𑁆𑀞𑀓𑀣𑀸 𑀧𑀲𑁆𑀲𑀺𑀢𑀩𑁆𑀩𑀸] 𑀅𑀪𑀩𑁆𑀩𑁄 𑀲𑀫𑁆𑀩𑁄𑀥𑀸𑀬, 𑀅𑀪𑀩𑁆𑀩𑁄 𑀦𑀺𑀩𑁆𑀩𑀸𑀦𑀸𑀬, 𑀅𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀆𑀢𑀸𑀧𑀻 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀑𑀢𑁆𑀢𑀸𑀧𑀻 [𑀑𑀢𑁆𑀢𑀧𑁆𑀧𑀻 (𑀩𑀳𑀽𑀲𑀼)] 𑀪𑀩𑁆𑀩𑁄 𑀲𑀫𑁆𑀩𑁄𑀥𑀸𑀬, 𑀪𑀩𑁆𑀩𑁄 𑀦𑀺𑀩𑁆𑀩𑀸𑀦𑀸𑀬, 𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀅𑀦𑀸𑀢𑀸𑀧𑀻 𑀅𑀦𑁄𑀢𑁆𑀢𑀸𑀧𑀻, 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄;

𑀬𑁄 𑀣𑀻𑀦𑀫𑀺𑀤𑁆𑀥𑀩𑀳𑀼𑀮𑁄, 𑀅𑀳𑀺𑀭𑀻𑀓𑁄 𑀅𑀦𑀸𑀤𑀭𑁄;

𑀅𑀪𑀩𑁆𑀩𑁄 𑀢𑀸𑀤𑀺𑀲𑁄 𑀪𑀺𑀓𑁆𑀔𑀼, 𑀨𑀼𑀝𑁆𑀞𑀼𑀁 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

‘‘𑀬𑁄 𑀘 𑀲𑀢𑀺𑀫𑀸 𑀦𑀺𑀧𑀓𑁄 𑀛𑀸𑀬𑀻, 𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 𑀘 𑀅𑀧𑁆𑀧𑀫𑀢𑁆𑀢𑁄;

𑀲𑀁𑀬𑁄𑀚𑀦𑀁 𑀚𑀸𑀢𑀺𑀚𑀭𑀸𑀬 𑀙𑁂𑀢𑁆𑀯𑀸, 𑀇𑀥𑁂𑀯 𑀲𑀫𑁆𑀩𑁄𑀥𑀺𑀫𑀦𑀼𑀢𑁆𑀢𑀭𑀁 𑀨𑀼𑀲𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀧𑀞𑀫𑀦𑀓𑀼𑀳𑀦𑀲𑀼𑀢𑁆𑀢𑀁

𑁩𑁫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀦𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀚𑀦𑀓𑀼𑀳𑀦𑀢𑁆𑀣𑀁, 𑀦 𑀚𑀦𑀮𑀧𑀦𑀢𑁆𑀣𑀁, 𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀸𑀦𑀺𑀲𑀁𑀲𑀢𑁆𑀣𑀁, 𑀦 ‘𑀇𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺. 𑀅𑀣 𑀔𑁄 𑀇𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀲𑀁𑀯𑀭𑀢𑁆𑀣𑀜𑁆𑀘𑁂𑀯 𑀧𑀳𑀸𑀦𑀢𑁆𑀣𑀜𑁆𑀘𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀲𑀁𑀯𑀭𑀢𑁆𑀣𑀁 𑀧𑀳𑀸𑀦𑀢𑁆𑀣𑀁, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀦𑀻𑀢𑀺𑀳𑀁;

𑀅𑀤𑁂𑀲𑀬𑀺 𑀲𑁄 𑀪𑀕𑀯𑀸, 𑀦𑀺𑀩𑁆𑀩𑀸𑀦𑁄𑀕𑀥𑀕𑀸𑀫𑀺𑀦𑀁.

‘‘𑀏𑀲 𑀫𑀕𑁆𑀕𑁄 𑀫𑀳𑀢𑁆𑀢𑁂𑀳𑀺 [𑀫𑀳𑀦𑁆𑀢𑁂𑀳𑀺 (𑀲𑀻. 𑀓.), 𑀫𑀳𑀢𑁆𑀣𑁂𑀳𑀺 (𑀲𑁆𑀬𑀸.)], 𑀅𑀦𑀼𑀬𑀸𑀢𑁄 𑀫𑀳𑁂𑀲𑀺𑀪𑀺 [𑀫𑀳𑁂𑀲𑀺𑀦𑁄 (𑀲𑀻. 𑀓.)];

𑀬𑁂 𑀬𑁂 𑀢𑀁 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀦𑁄’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀤𑀼𑀢𑀺𑀬𑀦𑀓𑀼𑀳𑀦𑀲𑀼𑀢𑁆𑀢𑀁

𑁩𑁬. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀦𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀚𑀦𑀓𑀼𑀳𑀦𑀢𑁆𑀣𑀁, 𑀦 𑀚𑀦𑀮𑀧𑀦𑀢𑁆𑀣𑀁, 𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀸𑀦𑀺𑀲𑀁𑀲𑀢𑁆𑀣𑀁, 𑀦 ‘𑀇𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺. 𑀅𑀣 𑀔𑁄 𑀇𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀅𑀪𑀺𑀜𑁆𑀜𑀢𑁆𑀣𑀜𑁆𑀘𑁂𑀯 𑀧𑀭𑀺𑀜𑁆𑀜𑀢𑁆𑀣𑀜𑁆𑀘𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀅𑀪𑀺𑀜𑁆𑀜𑀢𑁆𑀣𑀁 𑀧𑀭𑀺𑀜𑁆𑀜𑀢𑁆𑀣𑀁, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀦𑀻𑀢𑀺𑀳𑀁;

𑀅𑀤𑁂𑀲𑀬𑀺 𑀲𑁄 𑀪𑀕𑀯𑀸, 𑀦𑀺𑀩𑁆𑀩𑀸𑀦𑁄𑀕𑀥𑀕𑀸𑀫𑀺𑀦𑀁.

‘‘𑀏𑀲 𑀫𑀕𑁆𑀕𑁄 𑀫𑀳𑀢𑁆𑀢𑁂𑀳𑀺, 𑀅𑀦𑀼𑀬𑀸𑀢𑁄 𑀫𑀳𑁂𑀲𑀺𑀪𑀺;

𑀬𑁂 𑀬𑁂 𑀢𑀁 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀦𑁄’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀦𑀯𑀫𑀁.

𑁧𑁦. 𑀲𑁄𑀫𑀦𑀲𑁆𑀲𑀲𑀼𑀢𑁆𑀢𑀁

𑁩𑁭. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑁆𑀯𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀲𑁄𑀫𑀦𑀲𑁆𑀲𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀬𑁄𑀦𑀺 𑀘𑀲𑁆𑀲 [𑀬𑁄𑀦𑀺𑀲𑁄 (𑀲𑀻. 𑀲𑁆𑀬𑀸. 𑀧𑀻.), 𑀬𑁄𑀦𑀺𑀲𑁆𑀲 (𑀓.)] 𑀆𑀭𑀤𑁆𑀥𑀸 𑀳𑁄𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺? 𑀲𑀁𑀯𑁂𑀚𑀦𑀻𑀬𑁂𑀲𑀼 𑀞𑀸𑀦𑁂𑀲𑀼 𑀲𑀁𑀯𑁂𑀚𑀦𑁂𑀦, 𑀲𑀁𑀯𑀺𑀕𑁆𑀕𑀲𑁆𑀲 𑀘 𑀬𑁄𑀦𑀺𑀲𑁄 𑀧𑀥𑀸𑀦𑁂𑀦. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀲𑁄𑀫𑀦𑀲𑁆𑀲𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀲𑀁𑀯𑁂𑀚𑀦𑀻𑀬𑀝𑁆𑀞𑀸𑀦𑁂𑀲𑀼 [𑀲𑀁𑀯𑁂𑀚𑀦𑀻𑀬𑁂𑀲𑀼 𑀞𑀸𑀦𑁂𑀲𑀼 (𑀲𑁆𑀬𑀸. 𑀧𑀻.)], 𑀲𑀁𑀯𑀺𑀚𑁆𑀚𑁂𑀣𑁂𑀯 𑀧𑀡𑁆𑀟𑀺𑀢𑁄;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀧𑀜𑁆𑀜𑀸𑀬 𑀲𑀫𑀯𑁂𑀓𑁆𑀔𑀺𑀬.

‘‘𑀏𑀯𑀁 𑀯𑀺𑀳𑀸𑀭𑀻 𑀆𑀢𑀸𑀧𑀻, 𑀲𑀦𑁆𑀢𑀯𑀼𑀢𑁆𑀢𑀺 𑀅𑀦𑀼𑀤𑁆𑀥𑀢𑁄;

𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄, 𑀔𑀬𑀁 𑀤𑀼𑀓𑁆𑀔𑀲𑁆𑀲 𑀧𑀸𑀧𑀼𑀡𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑁆𑀯𑁂 𑀘 𑀪𑀺𑀓𑁆𑀔𑀽 𑀢𑀧𑀦𑀻𑀬𑀸, 𑀢𑀧𑀦𑀻𑀬𑀸 𑀧𑀭𑀢𑁆𑀣𑁂𑀳𑀺;

𑀆𑀢𑀸𑀧𑀻 [𑀤𑁆𑀯𑁂 𑀧𑀸𑀤𑀸 (𑀓.), 𑀤𑁆𑀯𑁂 𑀆𑀢𑀸𑀧𑀻 (𑀲𑀻.)] 𑀦𑀓𑀼𑀳𑀦𑀸 𑀤𑁆𑀯𑁂 [𑀦 𑀓𑀼𑀳𑀦𑀸 𑀘 (𑀲𑀩𑁆𑀩𑀢𑁆𑀣)], 𑀲𑁄𑀫𑀦𑀲𑁆𑀲𑁂𑀦 𑀢𑁂 𑀤𑀲𑀸𑀢𑀺.