𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀯𑀺𑀢𑀓𑁆𑀓𑀲𑀼𑀢𑁆𑀢𑀁

𑁩𑁮. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀣𑀸𑀕𑀢𑀁, 𑀪𑀺𑀓𑁆𑀔𑀯𑁂, 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑁆𑀯𑁂 𑀯𑀺𑀢𑀓𑁆𑀓𑀸 𑀩𑀳𑀼𑀮𑀁 𑀲𑀫𑀼𑀤𑀸𑀘𑀭𑀦𑁆𑀢𑀺 𑁋 𑀔𑁂𑀫𑁄 𑀘 𑀯𑀺𑀢𑀓𑁆𑀓𑁄, 𑀧𑀯𑀺𑀯𑁂𑀓𑁄 𑀘 [𑀯𑀺𑀯𑁂𑀓𑁄 𑀘 (𑀲𑁆𑀬𑀸.)]. 𑀅𑀩𑁆𑀬𑀸𑀧𑀚𑁆𑀛𑀸𑀭𑀸𑀫𑁄 [𑀅𑀩𑁆𑀬𑀸𑀧𑀚𑁆𑀚𑀸𑀭𑀸𑀫𑁄 (𑀓.), 𑀅𑀩𑁆𑀬𑀸𑀩𑀚𑁆𑀛𑀸𑀭𑀸𑀫𑁄 (?)], 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀩𑁆𑀬𑀸𑀧𑀚𑁆𑀛𑀭𑀢𑁄. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀁 𑀅𑀩𑁆𑀬𑀸𑀧𑀚𑁆𑀛𑀸𑀭𑀸𑀫𑀁 𑀅𑀩𑁆𑀬𑀸𑀧𑀚𑁆𑀛𑀭𑀢𑀁 𑀏𑀲𑁂𑀯 𑀯𑀺𑀢𑀓𑁆𑀓𑁄 𑀩𑀳𑀼𑀮𑀁 𑀲𑀫𑀼𑀤𑀸𑀘𑀭𑀢𑀺 𑁋 ‘𑀇𑀫𑀸𑀬𑀸𑀳𑀁 𑀇𑀭𑀺𑀬𑀸𑀬 𑀦 𑀓𑀺𑀜𑁆𑀘𑀺 𑀩𑁆𑀬𑀸𑀩𑀸𑀥𑁂𑀫𑀺 𑀢𑀲𑀁 𑀯𑀸 𑀣𑀸𑀯𑀭𑀁 𑀯𑀸’𑀢𑀺.

‘‘𑀧𑀯𑀺𑀯𑁂𑀓𑀸𑀭𑀸𑀫𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀯𑀺𑀯𑁂𑀓𑀭𑀢𑁄. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀁 𑀧𑀯𑀺𑀯𑁂𑀓𑀸𑀭𑀸𑀫𑀁 𑀧𑀯𑀺𑀯𑁂𑀓𑀭𑀢𑀁 𑀏𑀲𑁂𑀯 𑀯𑀺𑀢𑀓𑁆𑀓𑁄 𑀩𑀳𑀼𑀮𑀁 𑀲𑀫𑀼𑀤𑀸𑀘𑀭𑀢𑀺 𑁋 ‘𑀬𑀁 𑀅𑀓𑀼𑀲𑀮𑀁 𑀢𑀁 𑀧𑀳𑀻𑀦’𑀦𑁆𑀢𑀺.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂𑀧𑀺 𑀅𑀩𑁆𑀬𑀸𑀧𑀚𑁆𑀛𑀸𑀭𑀸𑀫𑀸 𑀯𑀺𑀳𑀭𑀣 𑀅𑀩𑁆𑀬𑀸𑀧𑀚𑁆𑀛𑀭𑀢𑀸. 𑀢𑁂𑀲𑀁 𑀯𑁄, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀅𑀩𑁆𑀬𑀸𑀧𑀚𑁆𑀛𑀸𑀭𑀸𑀫𑀸𑀦𑀁 𑀯𑀺𑀳𑀭𑀢𑀁 𑀅𑀩𑁆𑀬𑀸𑀧𑀚𑁆𑀛𑀭𑀢𑀸𑀦𑀁 𑀏𑀲𑁂𑀯 𑀯𑀺𑀢𑀓𑁆𑀓𑁄 𑀩𑀳𑀼𑀮𑀁 𑀲𑀫𑀼𑀤𑀸𑀘𑀭𑀺𑀲𑁆𑀲𑀢𑀺 𑁋 ‘𑀇𑀫𑀸𑀬 𑀫𑀬𑀁 𑀇𑀭𑀺𑀬𑀸𑀬 𑀦 𑀓𑀺𑀜𑁆𑀘𑀺 𑀩𑁆𑀬𑀸𑀩𑀸𑀥𑁂𑀫 𑀢𑀲𑀁 𑀯𑀸 𑀣𑀸𑀯𑀭𑀁 𑀯𑀸’𑀢𑀺.

‘‘𑀧𑀯𑀺𑀯𑁂𑀓𑀸𑀭𑀸𑀫𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣 𑀧𑀯𑀺𑀯𑁂𑀓𑀭𑀢𑀸. 𑀢𑁂𑀲𑀁 𑀯𑁄, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀧𑀯𑀺𑀯𑁂𑀓𑀸𑀭𑀸𑀫𑀸𑀦𑀁 𑀯𑀺𑀳𑀭𑀢𑀁 𑀧𑀯𑀺𑀯𑁂𑀓𑀭𑀢𑀸𑀦𑀁 𑀏𑀲𑁂𑀯 𑀯𑀺𑀢𑀓𑁆𑀓𑁄 𑀩𑀳𑀼𑀮𑀁 𑀲𑀫𑀼𑀤𑀸𑀘𑀭𑀺𑀲𑁆𑀲𑀢𑀺 𑁋 ‘𑀓𑀺𑀁 𑀅𑀓𑀼𑀲𑀮𑀁, 𑀓𑀺𑀁 𑀅𑀧𑁆𑀧𑀳𑀻𑀦𑀁, 𑀓𑀺𑀁 𑀧𑀚𑀳𑀸𑀫𑀸’’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀢𑀣𑀸𑀕𑀢𑀁 𑀩𑀼𑀤𑁆𑀥𑀫𑀲𑀬𑁆𑀳𑀲𑀸𑀳𑀺𑀦𑀁, 𑀤𑀼𑀯𑁂 𑀯𑀺𑀢𑀓𑁆𑀓𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀁;

𑀔𑁂𑀫𑁄 𑀯𑀺𑀢𑀓𑁆𑀓𑁄 𑀧𑀞𑀫𑁄 𑀉𑀤𑀻𑀭𑀺𑀢𑁄, 𑀢𑀢𑁄 𑀯𑀺𑀯𑁂𑀓𑁄 𑀤𑀼𑀢𑀺𑀬𑁄 𑀧𑀓𑀸𑀲𑀺𑀢𑁄.

‘‘𑀢𑀫𑁄𑀦𑀼𑀤𑀁 𑀧𑀸𑀭𑀕𑀢𑀁 𑀫𑀳𑁂𑀲𑀺𑀁, 𑀢𑀁 𑀧𑀢𑁆𑀢𑀺𑀧𑀢𑁆𑀢𑀁 𑀯𑀲𑀺𑀫𑀁 𑀅𑀦𑀸𑀲𑀯𑀁;

𑀯𑀺𑀲𑀦𑁆𑀢𑀭𑀁 [𑀯𑁂𑀲𑀦𑁆𑀢𑀭𑀁 (𑀲𑀻. 𑀓.), 𑀯𑀺𑀲𑁆𑀲𑀦𑁆𑀢𑀭𑀁 (𑀧𑀻.)] 𑀢𑀡𑁆𑀳𑀓𑁆𑀔𑀬𑁂 𑀯𑀺𑀫𑀼𑀢𑁆𑀢𑀁, 𑀢𑀁 𑀯𑁂 𑀫𑀼𑀦𑀺𑀁 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀺𑀁;

𑀫𑀸𑀭𑀜𑁆𑀚𑀳𑀁 [𑀫𑀸𑀭𑀚𑀳𑀁 (𑀲𑁆𑀬𑀸.), 𑀫𑀸𑀦𑀚𑀳𑀁 (𑀲𑀻. 𑀓.), 𑀫𑀸𑀦𑀁 𑀚𑀳𑀁 (𑀧𑀻.)] 𑀩𑁆𑀭𑀽𑀫𑀺 𑀚𑀭𑀸𑀬 𑀧𑀸𑀭𑀕𑀼𑀁.

‘‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄, 𑀬𑀣𑀸𑀧𑀺 𑀧𑀲𑁆𑀲𑁂 𑀚𑀦𑀢𑀁 𑀲𑀫𑀦𑁆𑀢𑀢𑁄;

𑀢𑀣𑀽𑀧𑀫𑀁 𑀥𑀫𑁆𑀫𑀫𑀬𑀁 𑀲𑀼𑀫𑁂𑀥𑁄, 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀼;

𑀲𑁄𑀓𑀸𑀯𑀢𑀺𑀡𑁆𑀡𑀁 𑀚𑀦𑀢𑀫𑀧𑁂𑀢𑀲𑁄𑀓𑁄, 𑀅𑀯𑁂𑀓𑁆𑀔𑀢𑀺 𑀚𑀸𑀢𑀺𑀚𑀭𑀸𑀪𑀺𑀪𑀽𑀢’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀧𑀞𑀫𑀁.

𑁨. 𑀤𑁂𑀲𑀦𑀸𑀲𑀼𑀢𑁆𑀢𑀁

𑁩𑁯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀤𑁆𑀯𑁂 𑀥𑀫𑁆𑀫𑀤𑁂𑀲𑀦𑀸 𑀧𑀭𑀺𑀬𑀸𑀬𑁂𑀦 𑀪𑀯𑀦𑁆𑀢𑀺. 𑀓𑀢𑀫𑀸 𑀤𑁆𑀯𑁂? ‘𑀧𑀸𑀧𑀁 𑀧𑀸𑀧𑀓𑀢𑁄 𑀧𑀲𑁆𑀲𑀣𑀸’𑀢𑀺 𑁋 𑀅𑀬𑀁 𑀧𑀞𑀫𑀸 𑀥𑀫𑁆𑀫𑀤𑁂𑀲𑀦𑀸; ‘𑀧𑀸𑀧𑀁 𑀧𑀸𑀧𑀓𑀢𑁄 𑀤𑀺𑀲𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀺𑀦𑁆𑀤𑀣 𑀯𑀺𑀭𑀚𑁆𑀚𑀣 𑀯𑀺𑀫𑀼𑀘𑁆𑀘𑀣𑀸’𑀢𑀺 𑁋 𑀅𑀬𑀁 𑀤𑀼𑀢𑀺𑀬𑀸 𑀥𑀫𑁆𑀫𑀤𑁂𑀲𑀦𑀸. 𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑀸 𑀤𑁆𑀯𑁂 𑀥𑀫𑁆𑀫𑀤𑁂𑀲𑀦𑀸 𑀧𑀭𑀺𑀬𑀸𑀬𑁂𑀦 𑀪𑀯𑀦𑁆𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀢𑀣𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀺𑀦𑁄;

𑀧𑀭𑀺𑀬𑀸𑀬𑀯𑀘𑀦𑀁 𑀧𑀲𑁆𑀲, 𑀤𑁆𑀯𑁂 𑀘 𑀥𑀫𑁆𑀫𑀸 𑀧𑀓𑀸𑀲𑀺𑀢𑀸.

‘‘𑀧𑀸𑀧𑀓𑀁 𑀧𑀲𑁆𑀲𑀣 𑀘𑁂𑀢𑀁 [𑀘𑁂𑀓𑀁 (𑀲𑀻. 𑀧𑀻.), 𑀙𑁂𑀓𑀸 (𑀲𑁆𑀬𑀸.)], 𑀢𑀢𑁆𑀣 𑀘𑀸𑀧𑀺 𑀯𑀺𑀭𑀚𑁆𑀚𑀣;

𑀢𑀢𑁄 𑀯𑀺𑀭𑀢𑁆𑀢𑀘𑀺𑀢𑁆𑀢𑀸𑀲𑁂, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀣𑀸’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀯𑀺𑀚𑁆𑀚𑀸𑀲𑀼𑀢𑁆𑀢𑀁

𑁪𑁦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀅𑀯𑀺𑀚𑁆𑀚𑀸, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑀗𑁆𑀕𑀫𑀸 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑁆𑀯𑀤𑁂𑀯 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁; 𑀯𑀺𑀚𑁆𑀚𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑀗𑁆𑀕𑀫𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑁆𑀯𑀤𑁂𑀯 𑀳𑀺𑀭𑁄𑀢𑁆𑀢𑀧𑁆𑀧’’𑀦𑁆𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑀸 𑀓𑀸𑀘𑀺𑀫𑀸 𑀤𑀼𑀕𑁆𑀕𑀢𑀺𑀬𑁄, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘;

𑀅𑀯𑀺𑀚𑁆𑀚𑀸𑀫𑀽𑀮𑀺𑀓𑀸 𑀲𑀩𑁆𑀩𑀸, 𑀇𑀘𑁆𑀙𑀸𑀮𑁄𑀪𑀲𑀫𑀼𑀲𑁆𑀲𑀬𑀸.

‘‘𑀬𑀢𑁄 𑀘 𑀳𑁄𑀢𑀺 𑀧𑀸𑀧𑀺𑀘𑁆𑀙𑁄, 𑀅𑀳𑀺𑀭𑀻𑀓𑁄 𑀅𑀦𑀸𑀤𑀭𑁄;

𑀢𑀢𑁄 𑀧𑀸𑀧𑀁 𑀧𑀲𑀯𑀢𑀺, 𑀅𑀧𑀸𑀬𑀁 𑀢𑁂𑀦 𑀕𑀘𑁆𑀙𑀢𑀺.

‘‘𑀢𑀲𑁆𑀫𑀸 𑀙𑀦𑁆𑀤𑀜𑁆𑀘 𑀮𑁄𑀪𑀜𑁆𑀘, 𑀅𑀯𑀺𑀚𑁆𑀚𑀜𑁆𑀘 𑀯𑀺𑀭𑀸𑀚𑀬𑀁;

𑀯𑀺𑀚𑁆𑀚𑀁 𑀉𑀧𑁆𑀧𑀸𑀤𑀬𑀁 𑀪𑀺𑀓𑁆𑀔𑀼, 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀢𑀢𑀺𑀬𑀁.

𑁪. 𑀧𑀜𑁆𑀜𑀸𑀧𑀭𑀺𑀳𑀻𑀦𑀲𑀼𑀢𑁆𑀢𑀁

𑁪𑁧. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑁂, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀼𑀧𑀭𑀺𑀳𑀻𑀦𑀸 𑀬𑁂 𑀅𑀭𑀺𑀬𑀸𑀬 𑀧𑀜𑁆𑀜𑀸𑀬 𑀧𑀭𑀺𑀳𑀻𑀦𑀸. 𑀢𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀯𑀺𑀳𑀭𑀦𑁆𑀢𑀺 𑀲𑀯𑀺𑀖𑀸𑀢𑀁 𑀲𑀉𑀧𑀸𑀬𑀸𑀲𑀁 𑀲𑀧𑀭𑀺𑀴𑀸𑀳𑀁; 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸. 𑀢𑁂 [𑀢𑁂 𑀘 𑀔𑁄 (?)], 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀭𑀺𑀳𑀻𑀦𑀸 𑀬𑁂 𑀅𑀭𑀺𑀬𑀸𑀬 𑀧𑀜𑁆𑀜𑀸𑀬 𑀅𑀧𑀭𑀺𑀳𑀻𑀦𑀸. 𑀢𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀁 𑀯𑀺𑀳𑀭𑀦𑁆𑀢𑀺 𑀅𑀯𑀺𑀖𑀸𑀢𑀁 𑀅𑀦𑀼𑀧𑀸𑀬𑀸𑀲𑀁 𑀅𑀧𑀭𑀺𑀴𑀸𑀳𑀁; 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺 𑀧𑀸𑀝𑀺𑀓𑀗𑁆𑀔𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀧𑀜𑁆𑀜𑀸𑀬 𑀧𑀭𑀺𑀳𑀸𑀦𑁂𑀦, 𑀧𑀲𑁆𑀲 𑀮𑁄𑀓𑀁 𑀲𑀤𑁂𑀯𑀓𑀁;

𑀦𑀺𑀯𑀺𑀝𑁆𑀞𑀁 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀇𑀤𑀁 𑀲𑀘𑁆𑀘𑀦𑁆𑀢𑀺 𑀫𑀜𑁆𑀜𑀢𑀺.

‘‘𑀧𑀜𑁆𑀜𑀸 𑀳𑀺 𑀲𑁂𑀝𑁆𑀞𑀸 𑀮𑁄𑀓𑀲𑁆𑀫𑀺𑀁, 𑀬𑀸𑀬𑀁 𑀦𑀺𑀩𑁆𑀩𑁂𑀥𑀕𑀸𑀫𑀺𑀦𑀻;

𑀬𑀸𑀬 𑀲𑀫𑁆𑀫𑀸 𑀧𑀚𑀸𑀦𑀸𑀢𑀺, 𑀚𑀸𑀢𑀺𑀪𑀯𑀧𑀭𑀺𑀓𑁆𑀔𑀬𑀁.

‘‘𑀢𑁂𑀲𑀁 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘, 𑀲𑀫𑁆𑀩𑀼𑀤𑁆𑀥𑀸𑀦𑀁 𑀲𑀢𑀻𑀫𑀢𑀁;

𑀧𑀺𑀳𑀬𑀦𑁆𑀢𑀺 𑀳𑀸𑀲𑀧𑀜𑁆𑀜𑀸𑀦𑀁 [𑀳𑀸𑀲𑀼𑀧𑀜𑁆𑀜𑀸𑀦𑀁 (𑀲𑀻. 𑀅𑀝𑁆𑀞.)], 𑀲𑀭𑀻𑀭𑀦𑁆𑀢𑀺𑀫𑀥𑀸𑀭𑀺𑀦’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀲𑀼𑀓𑁆𑀓𑀥𑀫𑁆𑀫𑀲𑀼𑀢𑁆𑀢𑀁

𑁪𑁨. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀧𑀸𑀮𑁂𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀳𑀺𑀭𑀻 [𑀳𑀺𑀭𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀘, 𑀑𑀢𑁆𑀢𑀧𑁆𑀧𑀜𑁆𑀘. 𑀇𑀫𑁂 𑀘𑁂, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀦 𑀧𑀸𑀮𑁂𑀬𑁆𑀬𑀼𑀁, 𑀦𑀬𑀺𑀥 𑀧𑀜𑁆𑀜𑀸𑀬𑁂𑀣 𑀫𑀸𑀢𑀸𑀢𑀺 𑀯𑀸 𑀫𑀸𑀢𑀼𑀘𑁆𑀙𑀸𑀢𑀺 𑀯𑀸 𑀫𑀸𑀢𑀼𑀮𑀸𑀦𑀻𑀢𑀺 𑀯𑀸 𑀆𑀘𑀭𑀺𑀬𑀪𑀭𑀺𑀬𑀸𑀢𑀺 𑀯𑀸 𑀕𑀭𑀽𑀦𑀁 𑀤𑀸𑀭𑀸𑀢𑀺 𑀯𑀸. 𑀲𑀫𑁆𑀪𑁂𑀤𑀁 𑀮𑁄𑀓𑁄 𑀅𑀕𑀫𑀺𑀲𑁆𑀲 𑀬𑀣𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀲𑁄𑀡𑀲𑀺𑀗𑁆𑀕𑀸𑀮𑀸 [𑀲𑁄𑀡𑀲𑀺𑀕𑀸𑀮𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀤𑁆𑀯𑁂 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀧𑀸𑀮𑁂𑀦𑁆𑀢𑀺 𑀢𑀲𑁆𑀫𑀸 𑀧𑀜𑁆𑀜𑀸𑀬𑀢𑀺 𑀫𑀸𑀢𑀸𑀢𑀺 𑀯𑀸 𑀫𑀸𑀢𑀼𑀘𑁆𑀙𑀸𑀢𑀺 𑀯𑀸 𑀫𑀸𑀢𑀼𑀮𑀸𑀦𑀻𑀢𑀺 𑀯𑀸 𑀆𑀘𑀭𑀺𑀬𑀪𑀭𑀺𑀬𑀸𑀢𑀺 𑀯𑀸 𑀕𑀭𑀽𑀦𑀁 𑀤𑀸𑀭𑀸𑀢𑀺 𑀯𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑁂𑀲𑀁 𑀘𑁂 𑀳𑀺𑀭𑀺𑀑𑀢𑁆𑀢𑀧𑁆𑀧𑀁, 𑀲𑀩𑁆𑀩𑀤𑀸 𑀘 𑀦 𑀯𑀺𑀚𑁆𑀚𑀢𑀺;

𑀯𑁄𑀓𑁆𑀓𑀦𑁆𑀢𑀸 𑀲𑀼𑀓𑁆𑀓𑀫𑀽𑀮𑀸 𑀢𑁂, 𑀚𑀸𑀢𑀺𑀫𑀭𑀡𑀕𑀸𑀫𑀺𑀦𑁄.

‘‘𑀬𑁂𑀲𑀜𑁆𑀘 𑀳𑀺𑀭𑀺𑀑𑀢𑁆𑀢𑀧𑁆𑀧𑀁, 𑀲𑀤𑀸 𑀲𑀫𑁆𑀫𑀸 𑀉𑀧𑀝𑁆𑀞𑀺𑀢𑀸;

𑀯𑀺𑀭𑀽𑀴𑁆𑀳𑀩𑁆𑀭𑀳𑁆𑀫𑀘𑀭𑀺𑀬𑀸 𑀢𑁂, 𑀲𑀦𑁆𑀢𑁄 𑀔𑀻𑀡𑀧𑀼𑀦𑀩𑁆𑀪𑀯𑀸’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀅𑀚𑀸𑀢𑀲𑀼𑀢𑁆𑀢𑀁

𑁪𑁩. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀁. 𑀦𑁄 𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀪𑀯𑀺𑀲𑁆𑀲 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀁, 𑀦𑀬𑀺𑀥 𑀚𑀸𑀢𑀲𑁆𑀲 𑀪𑀽𑀢𑀲𑁆𑀲 𑀓𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑁂𑀣. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀁, 𑀢𑀲𑁆𑀫𑀸 𑀚𑀸𑀢𑀲𑁆𑀲 𑀪𑀽𑀢𑀲𑁆𑀲 𑀓𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀚𑀸𑀢𑀁 𑀪𑀽𑀢𑀁 𑀲𑀫𑀼𑀧𑁆𑀧𑀦𑁆𑀦𑀁, 𑀓𑀢𑀁 𑀲𑀗𑁆𑀔𑀢𑀫𑀤𑁆𑀥𑀼𑀯𑀁;

𑀚𑀭𑀸𑀫𑀭𑀡𑀲𑀗𑁆𑀖𑀸𑀝𑀁, 𑀭𑁄𑀕𑀦𑀻𑀴𑀁 [𑀭𑁄𑀕𑀦𑀺𑀟𑁆𑀠𑀁 (𑀲𑀻.)] 𑀧𑀪𑀗𑁆𑀕𑀼𑀭𑀁 [𑀧𑀪𑀗𑁆𑀕𑀼𑀦𑀁 (𑀓. 𑀲𑀻. 𑀓.), 𑀧𑀪𑀗𑁆𑀕𑀼𑀡𑀁 (𑀲𑁆𑀬𑀸.)].

‘‘𑀆𑀳𑀸𑀭𑀦𑁂𑀢𑁆𑀢𑀺𑀧𑁆𑀧𑀪𑀯𑀁, 𑀦𑀸𑀮𑀁 𑀢𑀤𑀪𑀺𑀦𑀦𑁆𑀤𑀺𑀢𑀼𑀁;

𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀲𑀦𑁆𑀢𑀁, 𑀅𑀢𑀓𑁆𑀓𑀸𑀯𑀘𑀭𑀁 𑀥𑀼𑀯𑀁.

‘‘𑀅𑀚𑀸𑀢𑀁 𑀅𑀲𑀫𑀼𑀧𑁆𑀧𑀦𑁆𑀦𑀁, 𑀅𑀲𑁄𑀓𑀁 𑀯𑀺𑀭𑀚𑀁 𑀧𑀤𑀁;

𑀦𑀺𑀭𑁄𑀥𑁄 𑀤𑀼𑀓𑁆𑀔𑀥𑀫𑁆𑀫𑀸𑀦𑀁, 𑀲𑀗𑁆𑀔𑀸𑀭𑀽𑀧𑀲𑀫𑁄 𑀲𑀼𑀔𑁄’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀙𑀝𑁆𑀞𑀁.

𑁭. 𑀦𑀺𑀩𑁆𑀩𑀸𑀦𑀥𑀸𑀢𑀼𑀲𑀼𑀢𑁆𑀢𑀁

𑁪𑁪. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑁄. 𑀓𑀢𑀫𑁂 𑀤𑁆𑀯𑁂? 𑀲𑀉𑀧𑀸𑀤𑀺𑀲𑁂𑀲𑀸 𑀘 𑀦𑀺𑀩𑁆𑀩𑀸𑀦𑀥𑀸𑀢𑀼, 𑀅𑀦𑀼𑀧𑀸𑀤𑀺𑀲𑁂𑀲𑀸 𑀘 𑀦𑀺𑀩𑁆𑀩𑀸𑀦𑀥𑀸𑀢𑀼.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀳𑁄𑀢𑀺 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄. 𑀢𑀲𑁆𑀲 𑀢𑀺𑀝𑁆𑀞𑀦𑁆𑀢𑁂𑀯 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀬𑁂𑀲𑀁 𑀅𑀯𑀺𑀖𑀸𑀢𑀢𑁆𑀢𑀸 [𑀅𑀯𑀺𑀕𑀢𑀢𑁆𑀢𑀸 (𑀲𑀻. 𑀅𑀝𑁆𑀞.)] 𑀫𑀦𑀸𑀧𑀸𑀫𑀦𑀸𑀧𑀁 𑀧𑀘𑁆𑀘𑀦𑀼𑀪𑁄𑀢𑀺, 𑀲𑀼𑀔𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀢𑀲𑁆𑀲 𑀬𑁄 𑀭𑀸𑀕𑀓𑁆𑀔𑀬𑁄, 𑀤𑁄𑀲𑀓𑁆𑀔𑀬𑁄, 𑀫𑁄𑀳𑀓𑁆𑀔𑀬𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀳𑁄𑀢𑀺 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄. 𑀢𑀲𑁆𑀲 𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀯𑁂𑀤𑀬𑀺𑀢𑀸𑀦𑀺 𑀅𑀦𑀪𑀺𑀦𑀦𑁆𑀤𑀺𑀢𑀸𑀦𑀺 𑀲𑀻𑀢𑀺 𑀪𑀯𑀺𑀲𑁆𑀲𑀦𑁆𑀢𑀺 [𑀲𑀻𑀢𑀻𑀪𑀯𑀺𑀲𑁆𑀲𑀦𑁆𑀢𑀺 (?)]. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑁄’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀤𑀼𑀯𑁂 𑀇𑀫𑀸 𑀘𑀓𑁆𑀔𑀼𑀫𑀢𑀸 𑀧𑀓𑀸𑀲𑀺𑀢𑀸, 𑀦𑀺𑀩𑁆𑀩𑀸𑀦𑀥𑀸𑀢𑀽 𑀅𑀦𑀺𑀲𑁆𑀲𑀺𑀢𑁂𑀦 𑀢𑀸𑀤𑀺𑀦𑀸;

𑀏𑀓𑀸 𑀳𑀺 𑀥𑀸𑀢𑀼 𑀇𑀥 𑀤𑀺𑀝𑁆𑀞𑀥𑀫𑁆𑀫𑀺𑀓𑀸, 𑀲𑀉𑀧𑀸𑀤𑀺𑀲𑁂𑀲𑀸 𑀪𑀯𑀦𑁂𑀢𑁆𑀢𑀺𑀲𑀗𑁆𑀔𑀬𑀸;

𑀅𑀦𑀼𑀧𑀸𑀤𑀺𑀲𑁂𑀲𑀸 𑀧𑀦 𑀲𑀫𑁆𑀧𑀭𑀸𑀬𑀺𑀓𑀸, 𑀬𑀫𑁆𑀳𑀺 𑀦𑀺𑀭𑀼𑀚𑁆𑀛𑀦𑁆𑀢𑀺 𑀪𑀯𑀸𑀦𑀺 𑀲𑀩𑁆𑀩𑀲𑁄.

‘‘𑀬𑁂 𑀏𑀢𑀤𑀜𑁆𑀜𑀸𑀬 𑀧𑀤𑀁 𑀅𑀲𑀗𑁆𑀔𑀢𑀁, 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸 𑀪𑀯𑀦𑁂𑀢𑁆𑀢𑀺𑀲𑀗𑁆𑀔𑀬𑀸;

𑀢𑁂 𑀥𑀫𑁆𑀫𑀲𑀸𑀭𑀸𑀥𑀺𑀕𑀫𑀸 𑀔𑀬𑁂 𑀭𑀢𑀸, 𑀧𑀳𑀁𑀲𑀼 𑀢𑁂 𑀲𑀩𑁆𑀩𑀪𑀯𑀸𑀦𑀺 𑀢𑀸𑀤𑀺𑀦𑁄’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀧𑀝𑀺𑀲𑀮𑁆𑀮𑀸𑀦𑀲𑀼𑀢𑁆𑀢𑀁

𑁪𑁫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀸 [𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀸 (𑀓.)], 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣 𑀧𑀝𑀺𑀲𑀮𑁆𑀮𑀸𑀦𑀭𑀢𑀸, 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑀸, 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑀸, 𑀯𑀺𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁. 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀸𑀦𑀁, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀢𑀁 𑀧𑀝𑀺𑀲𑀮𑁆𑀮𑀸𑀦𑀭𑀢𑀸𑀦𑀁 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑀸𑀦𑀁 𑀅𑀦𑀺𑀭𑀸𑀓𑀢𑀫𑀚𑁆𑀛𑀸𑀦𑀸𑀦𑀁 𑀯𑀺𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑀸𑀦𑀁 𑀩𑁆𑀭𑀽𑀳𑁂𑀢𑀸𑀦𑀁 𑀲𑀼𑀜𑁆𑀜𑀸𑀕𑀸𑀭𑀸𑀦𑀁 𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸, 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑁂 𑀲𑀦𑁆𑀢𑀘𑀺𑀢𑁆𑀢𑀸 𑀦𑀺𑀧𑀓𑀸, 𑀲𑀢𑀺𑀫𑀦𑁆𑀢𑁄 𑀘 [𑀲𑀢𑀺𑀫𑀦𑁆𑀢𑁄𑀯 (𑀲𑀻. 𑀓.)] 𑀛𑀸𑀬𑀺𑀦𑁄;

𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀦𑁆𑀢𑀺, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑁄.

‘‘𑀅𑀧𑁆𑀧𑀫𑀸𑀤𑀭𑀢𑀸 𑀲𑀦𑁆𑀢𑀸, 𑀧𑀫𑀸𑀤𑁂 𑀪𑀬𑀤𑀲𑁆𑀲𑀺𑀦𑁄;

𑀅𑀪𑀩𑁆𑀩𑀸 𑀧𑀭𑀺𑀳𑀸𑀦𑀸𑀬, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀲𑀦𑁆𑀢𑀺𑀓𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀲𑀺𑀓𑁆𑀔𑀸𑀦𑀺𑀲𑀁𑀲𑀲𑀼𑀢𑁆𑀢𑀁

𑁪𑁬. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀲𑀺𑀓𑁆𑀔𑀸𑀦𑀺𑀲𑀁𑀲𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣 𑀧𑀜𑁆𑀜𑀼𑀢𑁆𑀢𑀭𑀸 𑀯𑀺𑀫𑀼𑀢𑁆𑀢𑀺𑀲𑀸𑀭𑀸 𑀲𑀢𑀸𑀥𑀺𑀧𑀢𑁂𑀬𑁆𑀬𑀸. 𑀲𑀺𑀓𑁆𑀔𑀸𑀦𑀺𑀲𑀁𑀲𑀸𑀦𑀁, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀢𑀁 𑀧𑀜𑁆𑀜𑀼𑀢𑁆𑀢𑀭𑀸𑀦𑀁 𑀯𑀺𑀫𑀼𑀢𑁆𑀢𑀺𑀲𑀸𑀭𑀸𑀦𑀁 𑀲𑀢𑀸𑀥𑀺𑀧𑀢𑁂𑀬𑁆𑀬𑀸𑀦𑀁 𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸, 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀧𑀭𑀺𑀧𑀼𑀡𑁆𑀡𑀲𑀺𑀓𑁆𑀔𑀁 [𑀧𑀭𑀺𑀧𑀼𑀡𑁆𑀡𑀲𑁂𑀔𑀁 (𑀲𑀻.), 𑀧𑀭𑀺𑀧𑀼𑀡𑁆𑀡𑀲𑁂𑀓𑁆𑀔𑀁 (𑀲𑁆𑀬𑀸.)] 𑀅𑀧𑀳𑀸𑀦𑀥𑀫𑁆𑀫𑀁, 𑀧𑀜𑁆𑀜𑀼𑀢𑁆𑀢𑀭𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀺𑀁;

𑀢𑀁 𑀯𑁂 𑀫𑀼𑀦𑀺𑀁 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀺𑀁, 𑀫𑀸𑀭𑀜𑁆𑀚𑀳𑀁 𑀩𑁆𑀭𑀽𑀫𑀺 𑀚𑀭𑀸𑀬 𑀧𑀸𑀭𑀕𑀼𑀁.

‘‘𑀢𑀲𑁆𑀫𑀸 𑀲𑀤𑀸 𑀛𑀸𑀦𑀭𑀢𑀸 𑀲𑀫𑀸𑀳𑀺𑀢𑀸, 𑀆𑀢𑀸𑀧𑀺𑀦𑁄 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀺𑀦𑁄;

𑀫𑀸𑀭𑀁 𑀲𑀲𑁂𑀦𑀁 𑀅𑀪𑀺𑀪𑀼𑀬𑁆𑀬 𑀪𑀺𑀓𑁆𑀔𑀯𑁄, 𑀪𑀯𑀣 𑀚𑀸𑀢𑀺𑀫𑀭𑀡𑀲𑁆𑀲 𑀧𑀸𑀭𑀕𑀸’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀦𑀯𑀫𑀁.

𑁧𑁦. 𑀚𑀸𑀕𑀭𑀺𑀬𑀲𑀼𑀢𑁆𑀢𑀁

𑁪𑁭. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀚𑀸𑀕𑀭𑁄 𑀘𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀲𑀫𑀸𑀳𑀺𑀢𑁄 𑀧𑀫𑀼𑀤𑀺𑀢𑁄 𑀯𑀺𑀧𑁆𑀧𑀲𑀦𑁆𑀦𑁄 𑀘 𑀢𑀢𑁆𑀣 𑀓𑀸𑀮𑀯𑀺𑀧𑀲𑁆𑀲𑀻 𑀘 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀚𑀸𑀕𑀭𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀯𑀺𑀳𑀭𑀢𑁄 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀲𑀫𑀸𑀳𑀺𑀢𑀲𑁆𑀲 𑀧𑀫𑀼𑀤𑀺𑀢𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀲𑁆𑀲 𑀢𑀢𑁆𑀣 𑀓𑀸𑀮𑀯𑀺𑀧𑀲𑁆𑀲𑀺𑀦𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸, 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀚𑀸𑀕𑀭𑀦𑁆𑀢𑀸 𑀲𑀼𑀡𑀸𑀣𑁂𑀢𑀁, 𑀬𑁂 𑀲𑀼𑀢𑁆𑀢𑀸 𑀢𑁂 𑀧𑀩𑀼𑀚𑁆𑀛𑀣;

𑀲𑀼𑀢𑁆𑀢𑀸 𑀚𑀸𑀕𑀭𑀺𑀢𑀁 𑀲𑁂𑀬𑁆𑀬𑁄, 𑀦𑀢𑁆𑀣𑀺 𑀚𑀸𑀕𑀭𑀢𑁄 𑀪𑀬𑀁.

‘‘𑀬𑁄 𑀚𑀸𑀕𑀭𑁄 𑀘 𑀲𑀢𑀺𑀫𑀸 𑀲𑀫𑁆𑀧𑀚𑀸𑀦𑁄, 𑀲𑀫𑀸𑀳𑀺𑀢𑁄 𑀫𑀼𑀤𑀺𑀢𑁄 𑀯𑀺𑀧𑁆𑀧𑀲𑀦𑁆𑀦𑁄 𑀘;

𑀓𑀸𑀮𑁂𑀦 𑀲𑁄 𑀲𑀫𑁆𑀫𑀸 𑀥𑀫𑁆𑀫𑀁 𑀧𑀭𑀺𑀯𑀻𑀫𑀁𑀲𑀫𑀸𑀦𑁄, 𑀏𑀓𑁄𑀤𑀺𑀪𑀽𑀢𑁄 𑀯𑀺𑀳𑀦𑁂 𑀢𑀫𑀁 𑀲𑁄.

‘‘𑀢𑀲𑁆𑀫𑀸 𑀳𑀯𑁂 𑀚𑀸𑀕𑀭𑀺𑀬𑀁 𑀪𑀚𑁂𑀣, 𑀆𑀢𑀸𑀧𑀻 𑀪𑀺𑀓𑁆𑀔𑀼 𑀦𑀺𑀧𑀓𑁄 𑀛𑀸𑀦𑀮𑀸𑀪𑀻;

𑀲𑀁𑀬𑁄𑀚𑀦𑀁 𑀚𑀸𑀢𑀺𑀚𑀭𑀸𑀬 𑀙𑁂𑀢𑁆𑀯𑀸, 𑀇𑀥𑁂𑀯 𑀲𑀫𑁆𑀩𑁄𑀥𑀺𑀫𑀦𑀼𑀢𑁆𑀢𑀭𑀁 𑀨𑀼𑀲𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀲𑀫𑀁.

𑁧𑁧. 𑀆𑀧𑀸𑀬𑀺𑀓𑀲𑀼𑀢𑁆𑀢𑀁

𑁪𑁮. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀆𑀧𑀸𑀬𑀺𑀓𑀸 𑀦𑁂𑀭𑀬𑀺𑀓𑀸 𑀇𑀤𑀫𑀧𑁆𑀧𑀳𑀸𑀬. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄, 𑀬𑁄 𑀘 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀁 𑀅𑀫𑀽𑀮𑀓𑁂𑀦 𑀅𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀆𑀧𑀸𑀬𑀺𑀓𑀸 𑀦𑁂𑀭𑀬𑀺𑀓𑀸 𑀇𑀤𑀫𑀧𑁆𑀧𑀳𑀸𑀬𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀅𑀪𑀽𑀢𑀯𑀸𑀤𑀻 𑀦𑀺𑀭𑀬𑀁 𑀉𑀧𑁂𑀢𑀺, 𑀬𑁄 𑀯𑀸𑀧𑀺 𑀓𑀢𑁆𑀯𑀸 𑀦 𑀓𑀭𑁄𑀫𑀺 𑀘𑀸𑀳;

𑀉𑀪𑁄𑀧𑀺 𑀢𑁂 𑀧𑁂𑀘𑁆𑀘 𑀲𑀫𑀸 𑀪𑀯𑀦𑁆𑀢𑀺, 𑀦𑀺𑀳𑀻𑀦𑀓𑀫𑁆𑀫𑀸 𑀫𑀦𑀼𑀚𑀸 𑀧𑀭𑀢𑁆𑀣.

‘‘𑀓𑀸𑀲𑀸𑀯𑀓𑀡𑁆𑀞𑀸 𑀩𑀳𑀯𑁄, 𑀧𑀸𑀧𑀥𑀫𑁆𑀫𑀸 𑀅𑀲𑀜𑁆𑀜𑀢𑀸;

𑀧𑀸𑀧𑀸 𑀧𑀸𑀧𑁂𑀳𑀺 𑀓𑀫𑁆𑀫𑁂𑀳𑀺, 𑀦𑀺𑀭𑀬𑀁 𑀢𑁂 𑀉𑀧𑀧𑀚𑁆𑀚𑀭𑁂.

‘‘𑀲𑁂𑀬𑁆𑀬𑁄 𑀅𑀬𑁄𑀕𑀼𑀴𑁄 𑀪𑀼𑀢𑁆𑀢𑁄, 𑀢𑀢𑁆𑀢𑁄 𑀅𑀕𑁆𑀕𑀺𑀲𑀺𑀔𑀽𑀧𑀫𑁄;

𑀬𑀜𑁆𑀘𑁂 𑀪𑀼𑀜𑁆𑀚𑁂𑀬𑁆𑀬 𑀤𑀼𑀲𑁆𑀲𑀻𑀮𑁄, 𑀭𑀝𑁆𑀞𑀧𑀺𑀡𑁆𑀟𑀫𑀲𑀜𑁆𑀜𑀢𑁄’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀏𑀓𑀸𑀤𑀲𑀫𑀁.

𑁧𑁨. 𑀤𑀺𑀝𑁆𑀞𑀺𑀕𑀢𑀲𑀼𑀢𑁆𑀢𑀁

𑁪𑁯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑁆𑀯𑀻𑀳𑀺, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀕𑀢𑁂𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑀸 𑀤𑁂𑀯𑀫𑀦𑀼𑀲𑁆𑀲𑀸 𑀑𑀮𑀻𑀬𑀦𑁆𑀢𑀺 𑀏𑀓𑁂, 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂; 𑀘𑀓𑁆𑀔𑀼𑀫𑀦𑁆𑀢𑁄 𑀘 𑀧𑀲𑁆𑀲𑀦𑁆𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀑𑀮𑀻𑀬𑀦𑁆𑀢𑀺 𑀏𑀓𑁂? 𑀪𑀯𑀸𑀭𑀸𑀫𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀫𑀦𑀼𑀲𑁆𑀲𑀸 𑀪𑀯𑀭𑀢𑀸 𑀪𑀯𑀲𑀫𑁆𑀫𑀼𑀤𑀺𑀢𑀸 𑀢𑁂𑀲𑀁 𑀪𑀯𑀦𑀺𑀭𑁄𑀥𑀸𑀬 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦 𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀑𑀮𑀻𑀬𑀦𑁆𑀢𑀺 𑀏𑀓𑁂.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂? 𑀪𑀯𑁂𑀦𑁂𑀯 𑀔𑁄 𑀧𑀦𑁂𑀓𑁂 𑀅𑀝𑁆𑀝𑀻𑀬𑀫𑀸𑀦𑀸 𑀳𑀭𑀸𑀬𑀫𑀸𑀦𑀸 𑀚𑀺𑀕𑀼𑀘𑁆𑀙𑀫𑀸𑀦𑀸 𑀯𑀺𑀪𑀯𑀁 𑀅𑀪𑀺𑀦𑀦𑁆𑀤𑀦𑁆𑀢𑀺 𑁋 𑀬𑀢𑁄 𑀓𑀺𑀭, 𑀪𑁄, 𑀅𑀬𑀁 𑀅𑀢𑁆𑀢𑀸 [𑀲𑀢𑁆𑀢𑁄 (𑀲𑀻. 𑀓.)] 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸; 𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀁 𑀏𑀢𑀁 𑀬𑀸𑀣𑀸𑀯𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀫𑀦𑁆𑀢𑁄 𑀧𑀲𑁆𑀲𑀦𑁆𑀢𑀺? 𑀇𑀥 𑀪𑀺𑀓𑁆𑀔𑀼 𑀪𑀽𑀢𑀁 𑀪𑀽𑀢𑀢𑁄 𑀧𑀲𑁆𑀲𑀢𑀺; 𑀪𑀽𑀢𑀁 𑀪𑀽𑀢𑀢𑁄 𑀤𑀺𑀲𑁆𑀯𑀸 𑀪𑀽𑀢𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀫𑀦𑁆𑀢𑁄 𑀧𑀲𑁆𑀲𑀦𑁆𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑁂 [𑀬𑁄 (𑀲𑁆𑀬𑀸. 𑀓.)] 𑀪𑀽𑀢𑀁 𑀪𑀽𑀢𑀢𑁄 𑀤𑀺𑀲𑁆𑀯𑀸, 𑀪𑀽𑀢𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀬𑀣𑀸𑀪𑀽𑀢𑁂 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀪𑀯𑀢𑀡𑁆𑀳𑀸 𑀧𑀭𑀺𑀓𑁆𑀔𑀬𑀸.

‘‘𑀲 𑀯𑁂 [𑀲𑀘𑁂 (𑀓. 𑀲𑀻. 𑀲𑁆𑀬𑀸. 𑀧𑀻.)] 𑀪𑀽𑀢𑀧𑀭𑀺𑀜𑁆𑀜𑁄, 𑀲𑁄 𑀯𑀻𑀢𑀢𑀡𑁆𑀳𑁄 𑀪𑀯𑀸𑀪𑀯𑁂;

𑀪𑀽𑀢𑀲𑁆𑀲 𑀯𑀺𑀪𑀯𑀸 𑀪𑀺𑀓𑁆𑀔𑀼, 𑀦𑀸𑀕𑀘𑁆𑀙𑀢𑀺 𑀧𑀼𑀦𑀩𑁆𑀪𑀯’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑁆𑀯𑀸𑀤𑀲𑀫𑀁.

𑀤𑀼𑀢𑀺𑀬𑁄 𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸 𑀤𑁆𑀯𑁂 𑀢𑀧𑀦𑀻𑀬𑀸, 𑀲𑀻𑀮𑁂𑀦 𑀅𑀧𑀭𑁂 𑀤𑀼𑀯𑁂;

𑀅𑀦𑁄𑀢𑁆𑀢𑀸𑀧𑀻 𑀓𑀼𑀳𑀦𑀸 𑀤𑁆𑀯𑁂 𑀘, 𑀲𑀁𑀯𑁂𑀚𑀦𑀻𑀬𑁂𑀦 𑀢𑁂 𑀤𑀲.

𑀯𑀺𑀢𑀓𑁆𑀓𑀸 𑀤𑁂𑀲𑀦𑀸 𑀯𑀺𑀚𑁆𑀚𑀸, 𑀧𑀜𑁆𑀜𑀸 𑀥𑀫𑁆𑀫𑁂𑀦 𑀧𑀜𑁆𑀘𑀫𑀁;

𑀅𑀚𑀸𑀢𑀁 𑀥𑀸𑀢𑀼𑀲𑀮𑁆𑀮𑀸𑀦𑀁, 𑀲𑀺𑀓𑁆𑀔𑀸 𑀚𑀸𑀕𑀭𑀺𑀬𑁂𑀦 𑀘;

𑀅𑀧𑀸𑀬𑀤𑀺𑀝𑁆𑀞𑀺𑀬𑀸 𑀘𑁂𑀯 [𑀬𑁂𑀯 (𑀲𑀻. 𑀲𑁆𑀬𑀸.)], 𑀩𑀸𑀯𑀻𑀲𑀢𑀺 𑀧𑀓𑀸𑀲𑀺𑀢𑀸𑀢𑀺.

𑀤𑀼𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.