𑁬. 𑀭𑀼𑀭𑀼𑀭𑀸𑀚𑀘𑀭𑀺𑀬𑀸

𑁪𑁮. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀲𑀼𑀢𑀢𑁆𑀢𑀓𑀦𑀓𑀲𑀦𑁆𑀦𑀺𑀪𑁄;

𑀫𑀺𑀕𑀭𑀸𑀚𑀸 𑀭𑀼𑀭𑀼𑀦𑀸𑀫, 𑀧𑀭𑀫𑀲𑀻𑀮𑀲𑀫𑀸𑀳𑀺𑀢𑁄.

𑁪𑁯. ‘‘𑀭𑀫𑁆𑀫𑁂 𑀧𑀤𑁂𑀲𑁂 𑀭𑀫𑀡𑀻𑀬𑁂, 𑀯𑀺𑀯𑀺𑀢𑁆𑀢𑁂 𑀅𑀫𑀦𑀼𑀲𑁆𑀲𑀓𑁂;

𑀢𑀢𑁆𑀣 𑀯𑀸𑀲𑀁 𑀉𑀧𑀕𑀜𑁆𑀙𑀺𑀁, 𑀕𑀗𑁆𑀕𑀸𑀓𑀽𑀮𑁂 𑀫𑀦𑁄𑀭𑀫𑁂.

𑁫𑁦. ‘‘𑀅𑀣 𑀉𑀧𑀭𑀺 𑀕𑀗𑁆𑀕𑀸𑀬, 𑀥𑀦𑀺𑀓𑁂𑀳𑀺 𑀧𑀭𑀺𑀧𑀻𑀴𑀺𑀢𑁄;

𑀧𑀼𑀭𑀺𑀲𑁄 𑀕𑀗𑁆𑀕𑀸𑀬 𑀧𑀧𑀢𑀺, ‘𑀚𑀻𑀯𑀸𑀫𑀺 𑀯𑀸 𑀫𑀭𑀸𑀫𑀺 𑀯𑀸’.

𑁫𑁧. ‘‘𑀭𑀢𑁆𑀢𑀺𑀦𑁆𑀤𑀺𑀯𑀁 𑀲𑁄 𑀕𑀗𑁆𑀕𑀸𑀬, 𑀯𑀼𑀬𑁆𑀳𑀫𑀸𑀦𑁄 𑀫𑀳𑁄𑀤𑀓𑁂;

𑀭𑀯𑀦𑁆𑀢𑁄 𑀓𑀭𑀼𑀡𑀁 𑀭𑀯𑀁, 𑀫𑀚𑁆𑀛𑁂 𑀕𑀗𑁆𑀕𑀸𑀬 𑀕𑀘𑁆𑀙𑀢𑀺.

𑁫𑁨. ‘‘𑀢𑀲𑁆𑀲𑀸𑀳𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸𑀦, 𑀓𑀭𑀼𑀡𑀁 𑀧𑀭𑀺𑀤𑁂𑀯𑀢𑁄;

𑀕𑀗𑁆𑀕𑀸𑀬 𑀢𑀻𑀭𑁂 𑀞𑀢𑁆𑀯𑀸𑀦, 𑀅𑀧𑀼𑀘𑁆𑀙𑀺𑀁 ‘𑀓𑁄𑀲𑀺 𑀢𑁆𑀯𑀁 𑀦𑀭𑁄’.

𑁫𑁩. ‘‘𑀲𑁄 𑀫𑁂 𑀧𑀼𑀝𑁆𑀞𑁄 𑀘 𑀩𑁆𑀬𑀸𑀓𑀸𑀲𑀺, 𑀅𑀢𑁆𑀢𑀦𑁄 𑀓𑀭𑀡𑀁 𑀢𑀤𑀸;

‘𑀥𑀦𑀺𑀓𑁂𑀳𑀺 𑀪𑀻𑀢𑁄 𑀢𑀲𑀺𑀢𑁄, 𑀧𑀓𑁆𑀔𑀦𑁆𑀤𑁄𑀳𑀁 𑀫𑀳𑀸𑀦𑀤𑀺𑀁’.

𑁫𑁪. ‘‘𑀢𑀲𑁆𑀲 𑀓𑀢𑁆𑀯𑀸𑀦 𑀓𑀸𑀭𑀼𑀜𑁆𑀜𑀁, 𑀘𑀚𑀺𑀢𑁆𑀯𑀸 𑀫𑀫 𑀚𑀻𑀯𑀺𑀢𑀁;

𑀧𑀯𑀺𑀲𑀺𑀢𑁆𑀯𑀸 𑀦𑀻𑀳𑀭𑀺𑀁 𑀢𑀲𑁆𑀲, 𑀅𑀦𑁆𑀥𑀓𑀸𑀭𑀫𑁆𑀳𑀺 𑀭𑀢𑁆𑀢𑀺𑀬𑀸.

𑁫𑁫. ‘‘𑀅𑀲𑁆𑀲𑀢𑁆𑀣𑀓𑀸𑀮𑀫𑀜𑁆𑀜𑀸𑀬, 𑀢𑀲𑁆𑀲𑀸𑀳𑀁 𑀇𑀤𑀫𑀩𑁆𑀭𑀯𑀺𑀁;

‘𑀏𑀓𑀁 𑀢𑀁 𑀯𑀭𑀁 𑀬𑀸𑀘𑀸𑀫𑀺, 𑀫𑀸 𑀫𑀁 𑀓𑀲𑁆𑀲𑀘𑀺 𑀧𑀸𑀯𑀤’.

𑁫𑁬. ‘‘𑀦𑀕𑀭𑀁 𑀕𑀦𑁆𑀢𑁆𑀯𑀸𑀦 𑀆𑀘𑀺𑀓𑁆𑀔𑀺, 𑀧𑀼𑀘𑁆𑀙𑀺𑀢𑁄 𑀥𑀦𑀳𑁂𑀢𑀼𑀓𑁄;

𑀭𑀸𑀚𑀸𑀦𑀁 𑀲𑁄 𑀕𑀳𑁂𑀢𑁆𑀯𑀸𑀦, 𑀉𑀧𑀕𑀜𑁆𑀙𑀺 𑀫𑀫𑀦𑁆𑀢𑀺𑀓𑀁.

𑁫𑁭. ‘‘𑀬𑀸𑀯𑀢𑀸 𑀓𑀭𑀡𑀁 𑀲𑀩𑁆𑀩𑀁, 𑀭𑀜𑁆𑀜𑁄 𑀆𑀭𑁄𑀘𑀺𑀢𑀁 𑀫𑀬𑀸;

𑀭𑀸𑀚𑀸 𑀲𑀼𑀢𑁆𑀯𑀸𑀦 𑀯𑀘𑀦𑀁, 𑀉𑀲𑀼𑀁 𑀢𑀲𑁆𑀲 𑀧𑀓𑀧𑁆𑀧𑀬𑀺;

‘𑀇𑀥𑁂𑀯 𑀖𑀸𑀢𑀬𑀺𑀲𑁆𑀲𑀸𑀫𑀺, 𑀫𑀺𑀢𑁆𑀢𑀤𑀼𑀩𑁆𑀪𑀺𑀁 [𑀫𑀺𑀢𑁆𑀢𑀤𑀽𑀪𑀺𑀁 (𑀲𑀻.)] 𑀅𑀦𑀸𑀭𑀺𑀬𑀁’.

𑁫𑁮. ‘‘𑀢𑀫𑀳𑀁 𑀅𑀦𑀼𑀭𑀓𑁆𑀔𑀦𑁆𑀢𑁄, 𑀦𑀺𑀫𑁆𑀫𑀺𑀦𑀺𑀁 𑀫𑀫 𑀅𑀢𑁆𑀢𑀦𑀸;

‘𑀢𑀺𑀝𑁆𑀞𑀢𑁂𑀲𑁄 𑀫𑀳𑀸𑀭𑀸𑀚, 𑀓𑀸𑀫𑀓𑀸𑀭𑁄 𑀪𑀯𑀸𑀫𑀺 𑀢𑁂’.

𑁫𑁯. ‘‘𑀅𑀦𑀼𑀭𑀓𑁆𑀔𑀺𑀁 𑀫𑀫 𑀲𑀻𑀮𑀁, 𑀦𑀸𑀭𑀓𑁆𑀔𑀺𑀁 𑀫𑀫 𑀚𑀻𑀯𑀺𑀢𑀁;

𑀲𑀻𑀮𑀯𑀸 𑀳𑀺 𑀢𑀤𑀸 𑀆𑀲𑀺𑀁, 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸’’𑀢𑀺.

𑀭𑀼𑀭𑀼𑀭𑀸𑀚𑀘𑀭𑀺𑀬𑀁 𑀙𑀝𑁆𑀞𑀁.