𑁭. 𑀫𑀸𑀢𑀗𑁆𑀕𑀘𑀭𑀺𑀬𑀸

𑁬𑁦. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀚𑀝𑀺𑀮𑁄 𑀉𑀕𑁆𑀕𑀢𑀸𑀧𑀦𑁄;

𑀫𑀸𑀢𑀗𑁆𑀕𑁄 𑀦𑀸𑀫 𑀦𑀸𑀫𑁂𑀦, 𑀲𑀻𑀮𑀯𑀸 𑀲𑀼𑀲𑀫𑀸𑀳𑀺𑀢𑁄.

𑁬𑁧. ‘‘𑀅𑀳𑀜𑁆𑀘 𑀩𑁆𑀭𑀸𑀳𑁆𑀫𑀡𑁄 𑀏𑀓𑁄, 𑀕𑀗𑁆𑀕𑀸𑀓𑀽𑀮𑁂 𑀯𑀲𑀸𑀫𑀼𑀪𑁄;

𑀅𑀳𑀁 𑀯𑀲𑀸𑀫𑀺 𑀉𑀧𑀭𑀺, 𑀳𑁂𑀝𑁆𑀞𑀸 𑀯𑀲𑀢𑀺 𑀩𑁆𑀭𑀸𑀳𑁆𑀫𑀡𑁄.

𑁬𑁨. ‘‘𑀯𑀺𑀘𑀭𑀦𑁆𑀢𑁄 𑀅𑀦𑀼𑀓𑀽𑀮𑀫𑁆𑀳𑀺, 𑀉𑀤𑁆𑀥𑀁 𑀫𑁂 𑀅𑀲𑁆𑀲𑀫𑀤𑁆𑀤𑀲;

𑀢𑀢𑁆𑀣 𑀫𑀁 𑀧𑀭𑀺𑀪𑀸𑀲𑁂𑀢𑁆𑀯𑀸, 𑀅𑀪𑀺𑀲𑀧𑀺 𑀫𑀼𑀤𑁆𑀥𑀨𑀸𑀮𑀦𑀁.

𑁬𑁩. ‘‘𑀬𑀤𑀺𑀳𑀁 𑀢𑀲𑁆𑀲 𑀧𑀓𑀼𑀧𑁆𑀧𑁂𑀬𑁆𑀬𑀁, 𑀬𑀤𑀺 𑀲𑀻𑀮𑀁 𑀦 𑀕𑁄𑀧𑀬𑁂;

𑀑𑀮𑁄𑀓𑁂𑀢𑁆𑀯𑀸𑀦𑀳𑀁 𑀢𑀲𑁆𑀲, 𑀓𑀭𑁂𑀬𑁆𑀬𑀁 𑀙𑀸𑀭𑀺𑀓𑀁 𑀯𑀺𑀬.

𑁬𑁪. ‘‘𑀬𑀁 𑀲𑁄 𑀢𑀤𑀸 𑀫𑀁 𑀅𑀪𑀺𑀲𑀧𑀺, 𑀓𑀼𑀧𑀺𑀢𑁄 𑀤𑀼𑀝𑁆𑀞𑀫𑀸𑀦𑀲𑁄;

𑀢𑀲𑁆𑀲𑁂𑀯 𑀫𑀢𑁆𑀣𑀓𑁂 𑀦𑀺𑀧𑀢𑀺, 𑀬𑁄𑀕𑁂𑀦 𑀢𑀁 𑀧𑀫𑁄𑀘𑀬𑀺𑀁.

𑁬𑁫. ‘‘𑀅𑀦𑀼𑀭𑀓𑁆𑀔𑀺𑀁 𑀫𑀫 𑀲𑀻𑀮𑀁, 𑀦𑀸𑀭𑀓𑁆𑀔𑀺𑀁 𑀫𑀫 𑀚𑀻𑀯𑀺𑀢𑀁;

𑀲𑀻𑀮𑀯𑀸 𑀳𑀺 𑀢𑀤𑀸 𑀆𑀲𑀺𑀁, 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸’’𑀢𑀺.

𑀫𑀸𑀢𑀗𑁆𑀕𑀘𑀭𑀺𑀬𑀁 𑀲𑀢𑁆𑀢𑀫𑀁.