𑁯. 𑀯𑁂𑀲𑁆𑀲𑀦𑁆𑀢𑀭𑀘𑀭𑀺𑀬𑀸

𑁬𑁭. ‘‘𑀬𑀸 𑀫𑁂 𑀅𑀳𑁄𑀲𑀺 𑀚𑀦𑀺𑀓𑀸, 𑀨𑀼𑀲𑁆𑀲𑀢𑀻 [𑀨𑀼𑀲𑀢𑀻 (𑀲𑀻.)] 𑀦𑀸𑀫 𑀔𑀢𑁆𑀢𑀺𑀬𑀸;

𑀲𑀸 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼, 𑀲𑀓𑁆𑀓𑀲𑁆𑀲 𑀫𑀳𑁂𑀲𑀻 𑀧𑀺𑀬𑀸.

𑁬𑁮. ‘‘𑀢𑀲𑁆𑀲𑀸 𑀆𑀬𑀼𑀓𑁆𑀔𑀬𑀁 𑀜𑀢𑁆𑀯𑀸, 𑀤𑁂𑀯𑀺𑀦𑁆𑀤𑁄 𑀏𑀢𑀤𑀩𑁆𑀭𑀯𑀺;

‘𑀤𑀤𑀸𑀫𑀺 𑀢𑁂 𑀤𑀲 𑀯𑀭𑁂, 𑀯𑀭𑀪𑀤𑁆𑀤𑁂 𑀬𑀤𑀺𑀘𑁆𑀙𑀲𑀺’.

𑁬𑁯. ‘‘𑀏𑀯𑀁 𑀯𑀼𑀢𑁆𑀢𑀸 𑀘 𑀲𑀸 𑀤𑁂𑀯𑀻, 𑀲𑀓𑁆𑀓𑀁 𑀧𑀼𑀦𑀺𑀤𑀫𑀩𑁆𑀭𑀯𑀺;

‘𑀓𑀺𑀁 𑀦𑀼 𑀫𑁂 𑀅𑀧𑀭𑀸𑀥𑀢𑁆𑀣𑀺, 𑀓𑀺𑀁 𑀦𑀼 𑀤𑁂𑀲𑁆𑀲𑀸 𑀅𑀳𑀁 𑀢𑀯;

𑀭𑀫𑁆𑀫𑀸 𑀘𑀸𑀯𑁂𑀲𑀺 𑀫𑀁 𑀞𑀸𑀦𑀸, 𑀯𑀸𑀢𑁄𑀯 𑀥𑀭𑀡𑀻𑀭𑀼𑀳𑀁’.

𑁭𑁦. ‘‘𑀏𑀯𑀁 𑀯𑀼𑀢𑁆𑀢𑁄 𑀘 𑀲𑁄 𑀲𑀓𑁆𑀓𑁄, 𑀧𑀼𑀦 𑀢𑀲𑁆𑀲𑀺𑀤𑀫𑀩𑁆𑀭𑀯𑀺;

‘𑀦 𑀘𑁂𑀯 𑀢𑁂 𑀓𑀢𑀁 𑀧𑀸𑀧𑀁, 𑀦 𑀘 𑀫𑁂 𑀢𑁆𑀯𑀁𑀲𑀺 𑀅𑀧𑁆𑀧𑀺𑀬𑀸.

𑁭𑁧. ‘‘‘𑀏𑀢𑁆𑀢𑀓𑀁𑀬𑁂𑀯 𑀢𑁂 𑀆𑀬𑀼, 𑀘𑀯𑀦𑀓𑀸𑀮𑁄 𑀪𑀯𑀺𑀲𑁆𑀲𑀢𑀺;

𑀧𑀝𑀺𑀕𑁆𑀕𑀡𑁆𑀳 𑀫𑀬𑀸 𑀤𑀺𑀦𑁆𑀦𑁂, 𑀯𑀭𑁂 𑀤𑀲 𑀯𑀭𑀼𑀢𑁆𑀢𑀫𑁂’.

𑁭𑁨. ‘‘𑀲𑀓𑁆𑀓𑁂𑀦 𑀲𑀸 𑀤𑀺𑀦𑁆𑀦𑀯𑀭𑀸, 𑀢𑀼𑀝𑁆𑀞𑀳𑀝𑁆𑀞𑀸 𑀧𑀫𑁄𑀤𑀺𑀢𑀸;

𑀫𑀫𑀁 𑀅𑀩𑁆𑀪𑀦𑁆𑀢𑀭𑀁 𑀓𑀢𑁆𑀯𑀸, 𑀨𑀼𑀲𑁆𑀲𑀢𑀻 𑀤𑀲 𑀯𑀭𑁂 𑀯𑀭𑀻.

𑁭𑁩. ‘‘𑀢𑀢𑁄 𑀘𑀼𑀢𑀸 𑀲𑀸 𑀨𑀼𑀲𑁆𑀲𑀢𑀻, 𑀔𑀢𑁆𑀢𑀺𑀬𑁂 𑀉𑀧𑀧𑀚𑁆𑀚𑀣;

𑀚𑁂𑀢𑀼𑀢𑁆𑀢𑀭𑀫𑁆𑀳𑀺 𑀦𑀕𑀭𑁂, 𑀲𑀜𑁆𑀚𑀬𑁂𑀦 𑀲𑀫𑀸𑀕𑀫𑀺.

𑁭𑁪. ‘‘𑀬𑀤𑀸𑀳𑀁 𑀨𑀼𑀲𑁆𑀲𑀢𑀺𑀬𑀸 𑀓𑀼𑀘𑁆𑀙𑀺𑀁, 𑀑𑀓𑁆𑀓𑀦𑁆𑀢𑁄 𑀧𑀺𑀬𑀫𑀸𑀢𑀼𑀬𑀸;

𑀫𑀫 𑀢𑁂𑀚𑁂𑀦 𑀫𑁂 𑀫𑀸𑀢𑀸, 𑀲𑀤𑀸 𑀤𑀸𑀦𑀭𑀢𑀸 𑀅𑀳𑀼.

𑁭𑁫. ‘‘𑀅𑀥𑀦𑁂 𑀆𑀢𑀼𑀭𑁂 𑀚𑀺𑀡𑁆𑀡𑁂, 𑀬𑀸𑀘𑀓𑁂 𑀅𑀤𑁆𑀥𑀺𑀓𑁂 [𑀧𑀣𑀺𑀓𑁂 (𑀓.)] 𑀚𑀦𑁂;

𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂 𑀔𑀻𑀡𑁂, 𑀤𑁂𑀢𑀺 𑀤𑀸𑀦𑀁 𑀅𑀓𑀺𑀜𑁆𑀘𑀦𑁂.

𑁭𑁬. ‘‘𑀤𑀲 𑀫𑀸𑀲𑁂 𑀥𑀸𑀭𑀬𑀺𑀢𑁆𑀯𑀸𑀦, 𑀓𑀭𑁄𑀦𑁆𑀢𑁂 𑀧𑀼𑀭𑀁 𑀧𑀤𑀓𑁆𑀔𑀺𑀡𑀁;

𑀯𑁂𑀲𑁆𑀲𑀸𑀦𑀁 𑀯𑀻𑀣𑀺𑀬𑀸 𑀫𑀚𑁆𑀛𑁂, 𑀚𑀦𑁂𑀲𑀺 𑀨𑀼𑀲𑁆𑀲𑀢𑀻 𑀫𑀫𑀁.

𑁭𑁭. ‘‘𑀦 𑀫𑀬𑁆𑀳𑀁 𑀫𑀢𑁆𑀢𑀺𑀓𑀁 𑀦𑀸𑀫𑀁, 𑀦𑀧𑀺 𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀁;

𑀚𑀸𑀢𑁂𑀢𑁆𑀣 𑀯𑁂𑀲𑁆𑀲𑀯𑀻𑀣𑀺𑀬𑀸, 𑀢𑀲𑁆𑀫𑀸 𑀯𑁂𑀲𑁆𑀲𑀦𑁆𑀢𑀭𑁄 𑀅𑀳𑀼.

𑁭𑁮. ‘‘𑀬𑀤𑀸𑀳𑀁 𑀤𑀸𑀭𑀓𑁄 𑀳𑁄𑀫𑀺, 𑀚𑀸𑀢𑀺𑀬𑀸 𑀅𑀝𑁆𑀞𑀯𑀲𑁆𑀲𑀺𑀓𑁄;

𑀢𑀤𑀸 𑀦𑀺𑀲𑀚𑁆𑀚 𑀧𑀸𑀲𑀸𑀤𑁂, 𑀤𑀸𑀦𑀁 𑀤𑀸𑀢𑀼𑀁 𑀯𑀺𑀘𑀺𑀦𑁆𑀢𑀬𑀺𑀁.

𑁭𑁯. ‘‘‘𑀳𑀤𑀬𑀁 𑀤𑀤𑁂𑀬𑁆𑀬𑀁 𑀘𑀓𑁆𑀔𑀼𑀁, 𑀫𑀁𑀲𑀫𑁆𑀧𑀺 𑀭𑀼𑀥𑀺𑀭𑀫𑁆𑀧𑀺 𑀘;

𑀤𑀤𑁂𑀬𑁆𑀬𑀁 𑀓𑀸𑀬𑀁 𑀲𑀸𑀯𑁂𑀢𑁆𑀯𑀸, 𑀬𑀤𑀺 𑀓𑁄𑀘𑀺 𑀬𑀸𑀘𑀬𑁂 𑀫𑀫𑀁’.

𑁮𑁦. ‘‘𑀲𑀪𑀸𑀯𑀁 𑀘𑀺𑀦𑁆𑀢𑀬𑀦𑁆𑀢𑀲𑁆𑀲, 𑀅𑀓𑀫𑁆𑀧𑀺𑀢𑀫𑀲𑀡𑁆𑀞𑀺𑀢𑀁;

𑀅𑀓𑀫𑁆𑀧𑀺 𑀢𑀢𑁆𑀣 𑀧𑀣𑀯𑀻, 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸.

𑁮𑁧. ‘‘𑀅𑀦𑁆𑀯𑀤𑁆𑀥𑀫𑀸𑀲𑁂 𑀧𑀦𑁆𑀦𑀭𑀲𑁂, 𑀧𑀼𑀡𑁆𑀡𑀫𑀸𑀲𑁂 𑀉𑀧𑁄𑀲𑀣𑁂;

𑀧𑀘𑁆𑀘𑀬𑀁 𑀦𑀸𑀕𑀫𑀸𑀭𑀼𑀬𑁆𑀳, 𑀤𑀸𑀦𑀁 𑀤𑀸𑀢𑀼𑀁 𑀉𑀧𑀸𑀕𑀫𑀺𑀁.

𑁮𑁨. ‘‘𑀓𑀮𑀺𑀗𑁆𑀕𑀭𑀝𑁆𑀞𑀯𑀺𑀲𑀬𑀸, 𑀩𑁆𑀭𑀸𑀳𑁆𑀫𑀡𑀸 𑀉𑀧𑀕𑀜𑁆𑀙𑀼 𑀫𑀁;

𑀅𑀬𑀸𑀘𑀼𑀁 𑀫𑀁 𑀳𑀢𑁆𑀣𑀺𑀦𑀸𑀕𑀁, 𑀥𑀜𑁆𑀜𑀁 𑀫𑀗𑁆𑀕𑀮𑀲𑀫𑁆𑀫𑀢𑀁.

𑁮𑁩. ‘‘𑀅𑀯𑀼𑀝𑁆𑀞𑀺𑀓𑁄 𑀚𑀦𑀧𑀤𑁄, 𑀤𑀼𑀩𑁆𑀪𑀺𑀓𑁆𑀔𑁄 𑀙𑀸𑀢𑀓𑁄 𑀫𑀳𑀸;

𑀤𑀤𑀸𑀳𑀺 𑀧𑀯𑀭𑀁 𑀦𑀸𑀕𑀁, 𑀲𑀩𑁆𑀩𑀲𑁂𑀢𑀁 𑀕𑀚𑀼𑀢𑁆𑀢𑀫𑀁.

𑁮𑁪. ‘‘𑀤𑀤𑀸𑀫𑀺 𑀦 𑀯𑀺𑀓𑀫𑁆𑀧𑀸𑀫𑀺, 𑀬𑀁 𑀫𑀁 𑀬𑀸𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀲𑀦𑁆𑀢𑀁 𑀦𑀧𑁆𑀧𑀢𑀺𑀕𑀽𑀳𑀸𑀫𑀺 [𑀦𑀧𑁆𑀧𑀢𑀺𑀕𑀼𑀬𑁆𑀳𑀸𑀫𑀺 (𑀲𑀻. 𑀓.)], 𑀤𑀸𑀦𑁂 𑀫𑁂 𑀭𑀫𑀢𑁂 𑀫𑀦𑁄.

𑁮𑁫. ‘‘𑀦 𑀫𑁂 𑀬𑀸𑀘𑀓𑀫𑀦𑀼𑀧𑁆𑀧𑀢𑁆𑀢𑁂, 𑀧𑀝𑀺𑀓𑁆𑀔𑁂𑀧𑁄 𑀅𑀦𑀼𑀘𑁆𑀙𑀯𑁄;

‘𑀫𑀸 𑀫𑁂 𑀪𑀺𑀚𑁆𑀚𑀺 𑀲𑀫𑀸𑀤𑀸𑀦𑀁, 𑀤𑀲𑁆𑀲𑀸𑀫𑀺 𑀯𑀺𑀧𑀼𑀮𑀁 𑀕𑀚𑀁’.

𑁮𑁬. ‘‘𑀦𑀸𑀕𑀁 𑀕𑀳𑁂𑀢𑁆𑀯𑀸 𑀲𑁄𑀡𑁆𑀟𑀸𑀬, 𑀪𑀺𑀗𑁆𑀕𑀸𑀭𑁂 𑀭𑀢𑀦𑀸𑀫𑀬𑁂;

𑀚𑀮𑀁 𑀳𑀢𑁆𑀣𑁂 𑀆𑀓𑀺𑀭𑀺𑀢𑁆𑀯𑀸, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀤𑀁 𑀕𑀚𑀁.

𑁮𑁭. ‘‘𑀧𑀼𑀦𑀸𑀧𑀭𑀁 𑀤𑀤𑀦𑁆𑀢𑀲𑁆𑀲, 𑀲𑀩𑁆𑀩𑀲𑁂𑀢𑀁 𑀕𑀚𑀼𑀢𑁆𑀢𑀫𑀁;

𑀢𑀤𑀸𑀧𑀺 𑀧𑀣𑀯𑀻 𑀓𑀫𑁆𑀧𑀺, 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸.

𑁮𑁮. ‘‘𑀢𑀲𑁆𑀲 𑀦𑀸𑀕𑀲𑁆𑀲 𑀤𑀸𑀦𑁂𑀦, 𑀲𑀺𑀯𑀬𑁄 𑀓𑀼𑀤𑁆𑀥𑀸 𑀲𑀫𑀸𑀕𑀢𑀸;

𑀧𑀩𑁆𑀩𑀸𑀚𑁂𑀲𑀼𑀁 𑀲𑀓𑀸 𑀭𑀝𑁆𑀞𑀸, ‘𑀯𑀗𑁆𑀓𑀁 𑀕𑀘𑁆𑀙𑀢𑀼 𑀧𑀩𑁆𑀩𑀢𑀁’.

𑁮𑁯. ‘‘𑀢𑁂𑀲𑀁 𑀦𑀺𑀘𑁆𑀙𑀼𑀪𑀫𑀸𑀦𑀸𑀦𑀁, 𑀅𑀓𑀫𑁆𑀧𑀺𑀢𑁆𑀣𑀫𑀲𑀡𑁆𑀞𑀺𑀢𑀁;

𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑀼𑀁, 𑀏𑀓𑀁 𑀯𑀭𑀫𑀬𑀸𑀘𑀺𑀲𑀁.

𑁯𑁦. ‘‘𑀬𑀸𑀘𑀺𑀢𑀸 𑀲𑀺𑀯𑀬𑁄 𑀲𑀩𑁆𑀩𑁂, 𑀏𑀓𑀁 𑀯𑀭𑀫𑀤𑀁𑀲𑀼 𑀫𑁂;

𑀲𑀸𑀯𑀬𑀺𑀢𑁆𑀯𑀸 𑀓𑀡𑁆𑀡𑀪𑁂𑀭𑀺𑀁, 𑀫𑀳𑀸𑀤𑀸𑀦𑀁 𑀤𑀤𑀸𑀫𑀳𑀁.

𑁯𑁧. ‘‘𑀅𑀣𑁂𑀢𑁆𑀣 𑀯𑀢𑁆𑀢𑀢𑀻 𑀲𑀤𑁆𑀤𑁄, 𑀢𑀼𑀫𑀼𑀮𑁄 𑀪𑁂𑀭𑀯𑁄 𑀫𑀳𑀸;

𑀤𑀸𑀦𑁂𑀦𑀺𑀫𑀁 𑀦𑀻𑀳𑀭𑀦𑁆𑀢𑀺, 𑀧𑀼𑀦 𑀤𑀸𑀦𑀁 𑀤𑀤𑀸𑀢𑀬𑀁.

𑁯𑁨. ‘‘𑀳𑀢𑁆𑀣𑀺𑀁 𑀅𑀲𑁆𑀲𑁂 𑀭𑀣𑁂 𑀤𑀢𑁆𑀯𑀸, 𑀤𑀸𑀲𑀺𑀁 𑀤𑀸𑀲𑀁 𑀕𑀯𑀁 𑀥𑀦𑀁;

𑀫𑀳𑀸𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀦𑀕𑀭𑀸 𑀦𑀺𑀓𑁆𑀔𑀫𑀺𑀁 𑀢𑀤𑀸.

𑁯𑁩. ‘‘𑀦𑀺𑀓𑁆𑀔𑀫𑀺𑀢𑁆𑀯𑀸𑀦 𑀦𑀕𑀭𑀸, 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀺𑀮𑁄𑀓𑀺𑀢𑁂;

𑀢𑀤𑀸𑀧𑀺 𑀧𑀣𑀯𑀻 𑀓𑀫𑁆𑀧𑀺, 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸.

𑁯𑁪. ‘‘𑀘𑀢𑀼𑀯𑀸𑀳𑀺𑀁 𑀭𑀣𑀁 𑀤𑀢𑁆𑀯𑀸, 𑀞𑀢𑁆𑀯𑀸 𑀘𑀸𑀢𑀼𑀫𑁆𑀫𑀳𑀸𑀧𑀣𑁂;

𑀏𑀓𑀸𑀓𑀺𑀬𑁄 𑀅𑀤𑀼𑀢𑀺𑀬𑁄, 𑀫𑀤𑁆𑀤𑀺𑀤𑁂𑀯𑀺𑀁 𑀇𑀤𑀫𑀩𑁆𑀭𑀯𑀺𑀁.

𑁯𑁫. ‘‘‘𑀢𑁆𑀯𑀁 𑀫𑀤𑁆𑀤𑀺 𑀓𑀡𑁆𑀳𑀁 𑀕𑀡𑁆𑀳𑀸𑀳𑀺, 𑀮𑀳𑀼𑀓𑀸 𑀏𑀲𑀸 𑀓𑀦𑀺𑀝𑁆𑀞𑀺𑀓𑀸;

𑀅𑀳𑀁 𑀚𑀸𑀮𑀺𑀁 𑀕𑀳𑁂𑀲𑁆𑀲𑀸𑀫𑀺, 𑀕𑀭𑀼𑀓𑁄 𑀪𑀸𑀢𑀺𑀓𑁄 𑀳𑀺 𑀲𑁄’.

𑁯𑁬. ‘‘𑀧𑀤𑀼𑀫𑀁 𑀧𑀼𑀡𑁆𑀟𑀭𑀻𑀓𑀁𑀯, 𑀫𑀤𑁆𑀤𑀻 𑀓𑀡𑁆𑀳𑀸𑀚𑀺𑀦𑀕𑁆𑀕𑀳𑀻;

𑀅𑀳𑀁 𑀲𑀼𑀯𑀡𑁆𑀡𑀩𑀺𑀫𑁆𑀩𑀁𑀯, 𑀚𑀸𑀮𑀺𑀁 𑀔𑀢𑁆𑀢𑀺𑀬𑀫𑀕𑁆𑀕𑀳𑀺𑀁.

𑁯𑁭. ‘‘𑀅𑀪𑀺𑀚𑀸𑀢𑀸 𑀲𑀼𑀔𑀼𑀫𑀸𑀮𑀸, 𑀔𑀢𑁆𑀢𑀺𑀬𑀸 𑀘𑀢𑀼𑀭𑁄 𑀚𑀦𑀸;

𑀯𑀺𑀲𑀫𑀁 𑀲𑀫𑀁 𑀅𑀓𑁆𑀓𑀫𑀦𑁆𑀢𑀸, 𑀯𑀗𑁆𑀓𑀁 𑀕𑀘𑁆𑀙𑀸𑀫 𑀧𑀩𑁆𑀩𑀢𑀁.

𑁯𑁮. ‘‘𑀬𑁂 𑀓𑁂𑀘𑀺 𑀫𑀦𑀼𑀚𑀸 𑀏𑀦𑁆𑀢𑀺, 𑀅𑀦𑀼𑀫𑀕𑁆𑀕𑁂 𑀧𑀝𑀺𑀧𑁆𑀧𑀣𑁂;

𑀫𑀕𑁆𑀕𑀦𑁆𑀢𑁂 𑀧𑀝𑀺𑀧𑀼𑀘𑁆𑀙𑀸𑀫, ‘𑀓𑀼𑀳𑀺𑀁 𑀯𑀗𑁆𑀓𑀦𑁆𑀢 [𑀯𑀗𑁆𑀓𑀢 (𑀲𑀻.)] 𑀧𑀩𑁆𑀩𑀢𑁄’.

𑁯𑁯. ‘‘𑀢𑁂 𑀢𑀢𑁆𑀣 𑀅𑀫𑁆𑀳𑁂 𑀧𑀲𑁆𑀲𑀺𑀢𑁆𑀯𑀸, 𑀓𑀭𑀼𑀡𑀁 𑀕𑀺𑀭𑀫𑀼𑀤𑀻𑀭𑀬𑀼𑀁;

𑀤𑀼𑀓𑁆𑀔𑀁 𑀢𑁂 𑀧𑀝𑀺𑀯𑁂𑀤𑁂𑀦𑁆𑀢𑀺, 𑀤𑀽𑀭𑁂 𑀯𑀗𑁆𑀓𑀦𑁆𑀢𑀧𑀩𑁆𑀩𑀢𑁄.

𑁧𑁦𑁦. ‘‘𑀬𑀤𑀺 𑀧𑀲𑁆𑀲𑀦𑁆𑀢𑀺 𑀧𑀯𑀦𑁂, 𑀤𑀸𑀭𑀓𑀸 𑀨𑀮𑀺𑀦𑁂 𑀤𑀼𑀫𑁂;

𑀢𑁂𑀲𑀁 𑀨𑀮𑀸𑀦𑀁 𑀳𑁂𑀢𑀼𑀫𑁆𑀳𑀺, 𑀉𑀧𑀭𑁄𑀤𑀦𑁆𑀢𑀺 𑀤𑀸𑀭𑀓𑀸.

𑁧𑁦𑁧. ‘‘𑀭𑁄𑀤𑀦𑁆𑀢𑁂 𑀤𑀸𑀭𑀓𑁂 𑀤𑀺𑀲𑁆𑀯𑀸, 𑀉𑀩𑁆𑀩𑀺𑀤𑁆𑀥𑀸 [𑀉𑀩𑁆𑀩𑀺𑀕𑁆𑀕𑀸 (𑀲𑁆𑀬𑀸. 𑀓𑀁.)] 𑀯𑀺𑀧𑀼𑀮𑀸 𑀤𑀼𑀫𑀸;

𑀲𑀬𑀫𑁂𑀯𑁄𑀡𑀫𑀺𑀢𑁆𑀯𑀸𑀦, 𑀉𑀧𑀕𑀘𑁆𑀙𑀦𑁆𑀢𑀺 𑀤𑀸𑀭𑀓𑁂.

𑁧𑁦𑁨. ‘‘𑀇𑀤𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁;

𑀲𑀸𑀳𑀼𑀓𑀸𑀭𑀁 [𑀲𑀸𑀥𑀼𑀓𑀸𑀭𑀁 (𑀲𑀩𑁆𑀩𑀢𑁆𑀣)] 𑀧𑀯𑀢𑁆𑀢𑁂𑀲𑀺, 𑀫𑀤𑁆𑀤𑀻 𑀲𑀩𑁆𑀩𑀗𑁆𑀕𑀲𑁄𑀪𑀦𑀸.

𑁧𑁦𑁩. ‘‘𑀅𑀘𑁆𑀙𑁂𑀭𑀁 𑀯𑀢 𑀮𑁄𑀓𑀲𑁆𑀫𑀺𑀁, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁;

𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀢𑁂𑀚𑁂𑀦, 𑀲𑀬𑀫𑁂𑀯𑁄𑀡𑀢𑀸 𑀤𑀼𑀫𑀸.

𑁧𑁦𑁪. ‘‘𑀲𑀗𑁆𑀔𑀺𑀧𑀺𑀁𑀲𑀼 𑀧𑀣𑀁 𑀬𑀓𑁆𑀔𑀸, 𑀅𑀦𑀼𑀓𑀫𑁆𑀧𑀸𑀬 𑀤𑀸𑀭𑀓𑁂;

𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑁂𑀦𑁂𑀯 [𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑁂𑀬𑁂𑀯 (𑀲𑀻.)], 𑀘𑁂𑀢𑀭𑀝𑁆𑀞𑀫𑀼𑀧𑀸𑀕𑀫𑀼𑀁.

𑁧𑁦𑁫. ‘‘𑀲𑀝𑁆𑀞𑀺𑀭𑀸𑀚𑀲𑀳𑀲𑁆𑀲𑀸𑀦𑀺, 𑀢𑀤𑀸 𑀯𑀲𑀦𑁆𑀢𑀺 𑀫𑀸𑀢𑀼𑀮𑁂;

𑀲𑀩𑁆𑀩𑁂 𑀧𑀜𑁆𑀚𑀮𑀺𑀓𑀸 𑀳𑀼𑀢𑁆𑀯𑀸, 𑀭𑁄𑀤𑀫𑀸𑀦𑀸 𑀉𑀧𑀸𑀕𑀫𑀼𑀁.

𑁧𑁦𑁬. ‘‘𑀢𑀢𑁆𑀣 𑀯𑀢𑁆𑀢𑁂𑀢𑁆𑀯𑀸 𑀲𑀮𑁆𑀮𑀸𑀧𑀁, 𑀘𑁂𑀢𑁂𑀳𑀺 𑀘𑁂𑀢𑀧𑀼𑀢𑁆𑀢𑁂𑀳𑀺;

𑀢𑁂 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀯𑀗𑁆𑀓𑀁 𑀅𑀕𑀫𑀼 𑀧𑀩𑁆𑀩𑀢𑀁.

𑁧𑁦𑁭. ‘‘𑀆𑀫𑀦𑁆𑀢𑀬𑀺𑀢𑁆𑀯𑀸 𑀤𑁂𑀯𑀺𑀦𑁆𑀤𑁄, 𑀯𑀺𑀲𑁆𑀲𑀓𑀫𑁆𑀫𑀁 [𑀯𑀺𑀲𑀼𑀓𑀫𑁆𑀫𑀁 (𑀓.)] 𑀫𑀳𑀺𑀤𑁆𑀥𑀺𑀓𑀁;

𑀅𑀲𑁆𑀲𑀫𑀁 𑀲𑀼𑀓𑀢𑀁 𑀭𑀫𑁆𑀫𑀁, 𑀧𑀡𑁆𑀡𑀲𑀸𑀮𑀁 𑀲𑀼𑀫𑀸𑀧𑀬.

𑁧𑁦𑁮. ‘‘𑀲𑀓𑁆𑀓𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀯𑀺𑀲𑁆𑀲𑀓𑀫𑁆𑀫𑁄 𑀫𑀳𑀺𑀤𑁆𑀥𑀺𑀓𑁄;

𑀅𑀲𑁆𑀲𑀫𑀁 𑀲𑀼𑀓𑀢𑀁 𑀭𑀫𑁆𑀫𑀁, 𑀧𑀡𑁆𑀡𑀲𑀸𑀮𑀁 𑀲𑀼𑀫𑀸𑀧𑀬𑀺.

𑁧𑁦𑁯. ‘‘𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀯𑀦𑀁, 𑀅𑀧𑁆𑀧𑀲𑀤𑁆𑀤𑀁 𑀦𑀺𑀭𑀸𑀓𑀼𑀮𑀁;

𑀘𑀢𑀼𑀭𑁄 𑀚𑀦𑀸 𑀫𑀬𑀁 𑀢𑀢𑁆𑀣, 𑀯𑀲𑀸𑀫 𑀧𑀩𑁆𑀩𑀢𑀦𑁆𑀢𑀭𑁂.

𑁧𑁧𑁦. ‘‘𑀅𑀳𑀜𑁆𑀘 𑀫𑀤𑁆𑀤𑀺𑀤𑁂𑀯𑀻 𑀘, 𑀚𑀸𑀮𑀻 𑀓𑀡𑁆𑀳𑀸𑀚𑀺𑀦𑀸 𑀘𑀼𑀪𑁄;

𑀅𑀜𑁆𑀜𑀫𑀜𑁆𑀜𑀁 𑀲𑁄𑀓𑀦𑀼𑀤𑀸, 𑀯𑀲𑀸𑀫 𑀅𑀲𑁆𑀲𑀫𑁂 𑀢𑀤𑀸.

𑁧𑁧𑁧. ‘‘𑀤𑀸𑀭𑀓𑁂 𑀅𑀦𑀼𑀭𑀓𑁆𑀔𑀦𑁆𑀢𑁄, 𑀅𑀲𑀼𑀜𑁆𑀜𑁄 𑀳𑁄𑀫𑀺 𑀅𑀲𑁆𑀲𑀫𑁂;

𑀫𑀤𑁆𑀤𑀻 𑀨𑀮𑀁 𑀆𑀳𑀭𑀺𑀢𑁆𑀯𑀸, 𑀧𑁄𑀲𑁂𑀢𑀺 𑀲𑀸 𑀢𑀬𑁄 𑀚𑀦𑁂.

𑁧𑁧𑁨. ‘‘𑀧𑀯𑀦𑁂 𑀯𑀲𑀫𑀸𑀦𑀲𑁆𑀲, 𑀅𑀤𑁆𑀥𑀺𑀓𑁄 𑀫𑀁 𑀉𑀧𑀸𑀕𑀫𑀺;

𑀆𑀬𑀸𑀘𑀺 𑀧𑀼𑀢𑁆𑀢𑀓𑁂 𑀫𑀬𑁆𑀳𑀁, 𑀚𑀸𑀮𑀺𑀁 𑀓𑀡𑁆𑀳𑀸𑀚𑀺𑀦𑀁 𑀘𑀼𑀪𑁄.

𑁧𑁧𑁩. ‘‘𑀬𑀸𑀘𑀓𑀁 𑀉𑀧𑀕𑀢𑀁 𑀤𑀺𑀲𑁆𑀯𑀸, 𑀳𑀸𑀲𑁄 𑀫𑁂 𑀉𑀧𑀧𑀚𑁆𑀚𑀣;

𑀉𑀪𑁄 𑀧𑀼𑀢𑁆𑀢𑁂 𑀕𑀳𑁂𑀢𑁆𑀯𑀸𑀦, 𑀅𑀤𑀸𑀲𑀺𑀁 𑀩𑁆𑀭𑀸𑀳𑁆𑀫𑀡𑁂 𑀢𑀤𑀸.

𑁧𑁧𑁪. ‘‘𑀲𑀓𑁂 𑀧𑀼𑀢𑁆𑀢𑁂 𑀘𑀚𑀦𑁆𑀢𑀲𑁆𑀲, 𑀚𑀽𑀚𑀓𑁂 𑀩𑁆𑀭𑀸𑀳𑁆𑀫𑀡𑁂 𑀬𑀤𑀸;

𑀢𑀤𑀸𑀧𑀺 𑀧𑀣𑀯𑀻 𑀓𑀫𑁆𑀧𑀺, 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸.

𑁧𑁧𑁫. ‘‘𑀧𑀼𑀦𑀤𑁂𑀯 𑀲𑀓𑁆𑀓𑁄 𑀑𑀭𑀼𑀬𑁆𑀳, 𑀳𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑀦𑁆𑀦𑀺𑀪𑁄;

𑀆𑀬𑀸𑀘𑀺 𑀫𑀁 𑀫𑀤𑁆𑀤𑀺𑀤𑁂𑀯𑀺𑀁, 𑀲𑀻𑀮𑀯𑀦𑁆𑀢𑀺𑀁 𑀧𑀢𑀺𑀩𑁆𑀩𑀢𑀁.

𑁧𑁧𑁬. ‘‘𑀫𑀤𑁆𑀤𑀺𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸𑀦, 𑀉𑀤𑀓𑀜𑁆𑀚𑀮𑀺 𑀧𑀽𑀭𑀺𑀬;

𑀧𑀲𑀦𑁆𑀦𑀫𑀦𑀲𑀗𑁆𑀓𑀧𑁆𑀧𑁄, 𑀢𑀲𑁆𑀲 𑀫𑀤𑁆𑀤𑀺𑀁 𑀅𑀤𑀸𑀲𑀳𑀁.

𑁧𑁧𑁭. ‘‘𑀫𑀤𑁆𑀤𑀺𑀬𑀸 𑀤𑀻𑀬𑀫𑀸𑀦𑀸𑀬, 𑀕𑀕𑀦𑁂 𑀤𑁂𑀯𑀸 𑀧𑀫𑁄𑀤𑀺𑀢𑀸;

𑀢𑀤𑀸𑀧𑀺 𑀧𑀣𑀯𑀻 𑀓𑀫𑁆𑀧𑀺, 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸.

𑁧𑁧𑁮. ‘‘𑀚𑀸𑀮𑀺𑀁 𑀓𑀡𑁆𑀳𑀸𑀚𑀺𑀦𑀁 𑀥𑀻𑀢𑀁, 𑀫𑀤𑁆𑀤𑀺𑀤𑁂𑀯𑀺𑀁 𑀧𑀢𑀺𑀩𑁆𑀩𑀢𑀁;

𑀘𑀚𑀫𑀸𑀦𑁄 𑀦 𑀘𑀺𑀦𑁆𑀢𑁂𑀲𑀺𑀁, 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸.

𑁧𑁧𑁯. ‘‘𑀦 𑀫𑁂 𑀤𑁂𑀲𑁆𑀲𑀸 𑀉𑀪𑁄 𑀧𑀼𑀢𑁆𑀢𑀸, 𑀫𑀤𑁆𑀤𑀺𑀤𑁂𑀯𑀻 𑀦 𑀤𑁂𑀲𑁆𑀲𑀺𑀬𑀸;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀧𑀺𑀬𑁂 𑀅𑀤𑀸𑀲𑀳𑀁.

𑁧𑁨𑁦. ‘‘𑀧𑀼𑀦𑀸𑀧𑀭𑀁 𑀩𑁆𑀭𑀳𑀸𑀭𑀜𑁆𑀜𑁂, 𑀫𑀸𑀢𑀸𑀧𑀺𑀢𑀼𑀲𑀫𑀸𑀕𑀫𑁂;

𑀓𑀭𑀼𑀡𑀁 𑀧𑀭𑀺𑀤𑁂𑀯𑀦𑁆𑀢𑁂, 𑀲𑀮𑁆𑀮𑀧𑀦𑁆𑀢𑁂 𑀲𑀼𑀔𑀁 𑀤𑀼𑀔𑀁.

𑁧𑁨𑁧. ‘‘𑀳𑀺𑀭𑁄𑀢𑁆𑀢𑀧𑁆𑀧𑁂𑀦 𑀕𑀭𑀼𑀦𑀸 [𑀕𑀭𑀼𑀦𑀁 (𑀲𑁆𑀬𑀸. 𑀓.)], 𑀉𑀪𑀺𑀦𑁆𑀦𑀁 𑀉𑀧𑀲𑀗𑁆𑀓𑀫𑀺;

𑀢𑀤𑀸𑀧𑀺 𑀧𑀣𑀯𑀻 𑀓𑀫𑁆𑀧𑀺, 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸.

𑁧𑁨𑁨. ‘‘𑀧𑀼𑀦𑀸𑀧𑀭𑀁 𑀩𑁆𑀭𑀳𑀸𑀭𑀜𑁆𑀜𑀸, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀜𑀸𑀢𑀺𑀪𑀺;

𑀧𑀯𑀺𑀲𑀸𑀫𑀺 𑀧𑀼𑀭𑀁 𑀭𑀫𑁆𑀫𑀁, 𑀚𑁂𑀢𑀼𑀢𑁆𑀢𑀭𑀁 𑀧𑀼𑀭𑀼𑀢𑁆𑀢𑀫𑀁.

𑁧𑁨𑁩. ‘‘𑀭𑀢𑀦𑀸𑀦𑀺 𑀲𑀢𑁆𑀢 𑀯𑀲𑁆𑀲𑀺𑀁𑀲𑀼, 𑀫𑀳𑀸𑀫𑁂𑀖𑁄 𑀧𑀯𑀲𑁆𑀲𑀣;

𑀢𑀤𑀸𑀧𑀺 𑀧𑀣𑀯𑀻 𑀓𑀫𑁆𑀧𑀺, 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸.

𑁧𑁨𑁪. ‘‘𑀅𑀘𑁂𑀢𑀦𑀸𑀬𑀁 𑀧𑀣𑀯𑀻, 𑀅𑀯𑀺𑀜𑁆𑀜𑀸𑀬 𑀲𑀼𑀔𑀁 𑀤𑀼𑀔𑀁;

𑀲𑀸𑀧𑀺 𑀤𑀸𑀦𑀩𑀮𑀸 𑀫𑀬𑁆𑀳𑀁, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀓𑀫𑁆𑀧𑀣𑀸’’𑀢𑀺.

𑀯𑁂𑀲𑁆𑀲𑀦𑁆𑀢𑀭𑀘𑀭𑀺𑀬𑀁 𑀦𑀯𑀫𑀁.