𑁧𑁦. 𑀲𑀲𑀧𑀡𑁆𑀟𑀺𑀢𑀘𑀭𑀺𑀬𑀸

𑁧𑁨𑁫. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀲𑀲𑀓𑁄 𑀧𑀯𑀦𑀘𑀸𑀭𑀓𑁄;

𑀢𑀺𑀡𑀧𑀡𑁆𑀡𑀲𑀸𑀓𑀨𑀮𑀪𑀓𑁆𑀔𑁄, 𑀧𑀭𑀳𑁂𑀞𑀦𑀯𑀺𑀯𑀚𑁆𑀚𑀺𑀢𑁄.

𑁧𑁨𑁬. ‘‘𑀫𑀓𑁆𑀓𑀝𑁄 𑀘 𑀲𑀺𑀗𑁆𑀕𑀸𑀮𑁄 𑀘, 𑀲𑀼𑀢𑁆𑀢𑀧𑁄𑀢𑁄 𑀘𑀳𑀁 𑀢𑀤𑀸;

𑀯𑀲𑀸𑀫 𑀏𑀓𑀲𑀸𑀫𑀦𑁆𑀢𑀸, 𑀲𑀸𑀬𑀁 𑀧𑀸𑀢𑁄 𑀘 𑀤𑀺𑀲𑁆𑀲𑀭𑁂 [𑀲𑀸𑀬𑀁 𑀧𑀸𑀢𑁄 𑀧𑀤𑀺𑀲𑁆𑀲𑀭𑁂 (𑀓.)].

𑁧𑁨𑁭. ‘‘𑀅𑀳𑀁 𑀢𑁂 𑀅𑀦𑀼𑀲𑀸𑀲𑀸𑀫𑀺, 𑀓𑀺𑀭𑀺𑀬𑁂 𑀓𑀮𑁆𑀬𑀸𑀡𑀧𑀸𑀧𑀓𑁂;

‘𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑁂𑀣, 𑀓𑀮𑁆𑀬𑀸𑀡𑁂 𑀅𑀪𑀺𑀦𑀺𑀯𑀺𑀲𑁆𑀲𑀣’.

𑁧𑁨𑁮. ‘‘𑀉𑀧𑁄𑀲𑀣𑀫𑁆𑀳𑀺 𑀤𑀺𑀯𑀲𑁂, 𑀘𑀦𑁆𑀤𑀁 𑀤𑀺𑀲𑁆𑀯𑀸𑀦 𑀧𑀽𑀭𑀺𑀢𑀁;

𑀏𑀢𑁂𑀲𑀁 𑀢𑀢𑁆𑀣 𑀆𑀘𑀺𑀓𑁆𑀔𑀺𑀁, 𑀤𑀺𑀯𑀲𑁄 𑀅𑀚𑁆𑀚𑀼𑀧𑁄𑀲𑀣𑁄.

𑁧𑁨𑁯. ‘‘𑀤𑀸𑀦𑀸𑀦𑀺 𑀧𑀝𑀺𑀬𑀸𑀤𑁂𑀣, 𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀤𑀸𑀢𑀯𑁂;

𑀤𑀢𑁆𑀯𑀸 𑀤𑀸𑀦𑀁 𑀤𑀓𑁆𑀔𑀺𑀡𑁂𑀬𑁆𑀬𑁂, 𑀉𑀧𑀯𑀲𑁆𑀲𑀣𑀼𑀧𑁄𑀲𑀣𑀁.

𑁧𑁩𑁦. ‘‘𑀢𑁂 𑀫𑁂 𑀲𑀸𑀥𑀽𑀢𑀺 𑀯𑀢𑁆𑀯𑀸𑀦, 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁;

𑀤𑀸𑀦𑀸𑀦𑀺 𑀧𑀝𑀺𑀬𑀸𑀤𑁂𑀢𑁆𑀯𑀸, 𑀤𑀓𑁆𑀔𑀺𑀡𑁂𑀬𑁆𑀬𑀁 𑀕𑀯𑁂𑀲𑀺𑀲𑀼𑀁 [𑀕𑀯𑁂𑀲𑀬𑁆𑀬𑀼𑀁 (𑀓.)].

𑁧𑁩𑁧. ‘‘𑀅𑀳𑀁 𑀦𑀺𑀲𑀚𑁆𑀚 𑀘𑀺𑀦𑁆𑀢𑁂𑀲𑀺𑀁, 𑀤𑀸𑀦𑀁 𑀤𑀓𑁆𑀔𑀺𑀡𑀦𑀼𑀘𑁆𑀙𑀯𑀁;

‘𑀬𑀤𑀺𑀳𑀁 𑀮𑀪𑁂 𑀤𑀓𑁆𑀔𑀺𑀡𑁂𑀬𑁆𑀬𑀁, 𑀓𑀺𑀁 𑀫𑁂 𑀤𑀸𑀦𑀁 𑀪𑀯𑀺𑀲𑁆𑀲𑀢𑀺.

𑁧𑁩𑁨. ‘‘‘𑀦 𑀫𑁂 𑀅𑀢𑁆𑀣𑀺 𑀢𑀺𑀮𑀸 𑀫𑀼𑀕𑁆𑀕𑀸, 𑀫𑀸𑀲𑀸 𑀯𑀸 𑀢𑀡𑁆𑀟𑀼𑀮𑀸 𑀖𑀢𑀁;

𑀅𑀳𑀁 𑀢𑀺𑀡𑁂𑀦 𑀬𑀸𑀧𑁂𑀫𑀺, 𑀦 𑀲𑀓𑁆𑀓𑀸 𑀢𑀺𑀡 𑀤𑀸𑀢𑀯𑁂.

𑁧𑁩𑁩. ‘‘‘𑀬𑀤𑀺 𑀓𑁄𑀘𑀺 𑀏𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄, 𑀪𑀺𑀓𑁆𑀔𑀸𑀬 𑀫𑀫 𑀲𑀦𑁆𑀢𑀺𑀓𑁂;

𑀤𑀚𑁆𑀚𑀸𑀳𑀁 𑀲𑀓𑀫𑀢𑁆𑀢𑀸𑀦𑀁, 𑀦 𑀲𑁄 𑀢𑀼𑀘𑁆𑀙𑁄 𑀕𑀫𑀺𑀲𑁆𑀲𑀢𑀺’.

𑁧𑁩𑁪. ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀓𑁆𑀓𑁄 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑀺𑀦𑀸;

𑀆𑀲𑀬𑀁 𑀫𑁂 𑀉𑀧𑀸𑀕𑀘𑁆𑀙𑀺, 𑀤𑀸𑀦𑀯𑀻𑀫𑀁𑀲𑀦𑀸𑀬 𑀫𑁂.

𑁧𑁩𑁫. ‘‘𑀢𑀫𑀳𑀁 𑀤𑀺𑀲𑁆𑀯𑀸𑀦 𑀲𑀦𑁆𑀢𑀼𑀝𑁆𑀞𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁;

‘𑀲𑀸𑀥𑀼 𑀔𑁄𑀲𑀺 𑀅𑀦𑀼𑀧𑁆𑀧𑀢𑁆𑀢𑁄, 𑀖𑀸𑀲𑀳𑁂𑀢𑀼 𑀫𑀫𑀦𑁆𑀢𑀺𑀓𑁂.

𑁧𑁩𑁬. ‘‘‘𑀅𑀤𑀺𑀦𑁆𑀦𑀧𑀼𑀩𑁆𑀩𑀁 𑀤𑀸𑀦𑀯𑀭𑀁, 𑀅𑀚𑁆𑀚 𑀤𑀲𑁆𑀲𑀸𑀫𑀺 𑀢𑁂 𑀅𑀳𑀁;

𑀢𑀼𑀯𑀁 𑀲𑀻𑀮𑀕𑀼𑀡𑀽𑀧𑁂𑀢𑁄, 𑀅𑀬𑀼𑀢𑁆𑀢𑀁 𑀢𑁂 𑀧𑀭𑀳𑁂𑀞𑀦𑀁.

𑁧𑁩𑁭. ‘‘‘𑀏𑀳𑀺 𑀅𑀕𑁆𑀕𑀺𑀁 𑀧𑀤𑀻𑀧𑁂𑀳𑀺, 𑀦𑀸𑀦𑀸𑀓𑀝𑁆𑀞𑁂 𑀲𑀫𑀸𑀦𑀬;

𑀅𑀳𑀁 𑀧𑀘𑀺𑀲𑁆𑀲𑀫𑀢𑁆𑀢𑀸𑀦𑀁, 𑀧𑀓𑁆𑀓𑀁 𑀢𑁆𑀯𑀁 𑀪𑀓𑁆𑀔𑀬𑀺𑀲𑁆𑀲𑀲𑀺’.

𑁧𑁩𑁮. ‘‘‘𑀲𑀸𑀥𑀽’𑀢𑀺 𑀲𑁄 𑀳𑀝𑁆𑀞𑀫𑀦𑁄, 𑀦𑀸𑀦𑀸𑀓𑀝𑁆𑀞𑁂 𑀲𑀫𑀸𑀦𑀬𑀺;

𑀫𑀳𑀦𑁆𑀢𑀁 𑀅𑀓𑀸𑀲𑀺 𑀘𑀺𑀢𑀓𑀁, 𑀓𑀢𑁆𑀯𑀸 𑀅𑀗𑁆𑀕𑀸𑀭𑀕𑀩𑁆𑀪𑀓𑀁.

𑁧𑁩𑁯. ‘‘𑀅𑀕𑁆𑀕𑀺𑀁 𑀢𑀢𑁆𑀣 𑀧𑀤𑀻𑀧𑁂𑀲𑀺, 𑀬𑀣𑀸 𑀲𑁄 𑀔𑀺𑀧𑁆𑀧𑀁 𑀫𑀳𑀸 𑀪𑀯𑁂;

𑀨𑁄𑀝𑁂𑀢𑁆𑀯𑀸 𑀭𑀚𑀕𑀢𑁂 𑀕𑀢𑁆𑀢𑁂, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺𑀁.

𑁧𑁪𑁦. ‘‘𑀬𑀤𑀸 𑀫𑀳𑀸𑀓𑀝𑁆𑀞𑀧𑀼𑀜𑁆𑀚𑁄, 𑀆𑀤𑀺𑀢𑁆𑀢𑁄 𑀥𑀫𑀥𑀫𑀸𑀬𑀢𑀺 [𑀥𑀼𑀫𑀥𑀼𑀫𑀸𑀬𑀢𑀺 (𑀲𑀻.), 𑀥𑀫𑀫𑀸𑀬𑀢𑀺 (𑀓.)];

𑀢𑀤𑀼𑀧𑁆𑀧𑀢𑀺𑀢𑁆𑀯𑀸 𑀧𑀧𑀢𑀺𑀁, 𑀫𑀚𑁆𑀛𑁂 𑀚𑀸𑀮𑀲𑀺𑀔𑀦𑁆𑀢𑀭𑁂.

𑁧𑁪𑁧. ‘‘𑀬𑀣𑀸 𑀲𑀻𑀢𑁄𑀤𑀓𑀁 𑀦𑀸𑀫, 𑀧𑀯𑀺𑀝𑁆𑀞𑀁 𑀬𑀲𑁆𑀲 𑀓𑀲𑁆𑀲𑀘𑀺;

𑀲𑀫𑁂𑀢𑀺 𑀤𑀭𑀣𑀧𑀭𑀺𑀴𑀸𑀳𑀁, 𑀅𑀲𑁆𑀲𑀸𑀤𑀁 𑀤𑁂𑀢𑀺 𑀧𑀻𑀢𑀺 𑀘.

𑁧𑁪𑁨. ‘‘𑀢𑀣𑁂𑀯 𑀚𑀮𑀺𑀢𑀁 𑀅𑀕𑁆𑀕𑀺𑀁, 𑀧𑀯𑀺𑀝𑁆𑀞𑀲𑁆𑀲 𑀫𑀫𑀁 𑀢𑀤𑀸;

𑀲𑀩𑁆𑀩𑀁 𑀲𑀫𑁂𑀢𑀺 𑀤𑀭𑀣𑀁, 𑀬𑀣𑀸 𑀲𑀻𑀢𑁄𑀤𑀓𑀁 𑀯𑀺𑀬.

𑁧𑁪𑁩. ‘‘𑀙𑀯𑀺𑀁 𑀘𑀫𑁆𑀫𑀁 𑀫𑀁𑀲𑀁 𑀦𑁆𑀳𑀸𑀭𑀼𑀁, 𑀅𑀝𑁆𑀞𑀺𑀁 𑀳𑀤𑀬𑀩𑀦𑁆𑀥𑀦𑀁;

𑀓𑁂𑀯𑀮𑀁 𑀲𑀓𑀮𑀁 𑀓𑀸𑀬𑀁, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀤𑀸𑀲𑀳’’𑀦𑁆𑀢𑀺.

𑀲𑀲𑀧𑀡𑁆𑀟𑀺𑀢𑀘𑀭𑀺𑀬𑀁 𑀤𑀲𑀫𑀁.

𑀅𑀓𑀺𑀢𑁆𑀢𑀺𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀓𑀺𑀢𑁆𑀢𑀺𑀩𑁆𑀭𑀸𑀳𑁆𑀫𑀡𑁄 𑀲𑀗𑁆𑀔𑁄, 𑀓𑀼𑀭𑀼𑀭𑀸𑀚𑀸 𑀥𑀦𑀜𑁆𑀘𑀬𑁄;

𑀫𑀳𑀸𑀲𑀼𑀤𑀲𑁆𑀲𑀦𑁄 𑀭𑀸𑀚𑀸, 𑀫𑀳𑀸𑀕𑁄𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑁄.

𑀦𑀺𑀫𑀺 𑀘𑀦𑁆𑀤𑀓𑀼𑀫𑀸𑀭𑁄 𑀘, 𑀲𑀺𑀯𑀺 𑀯𑁂𑀲𑁆𑀲𑀦𑁆𑀢𑀭𑁄 𑀲𑀲𑁄;

𑀅𑀳𑀫𑁂𑀯 𑀢𑀤𑀸 𑀆𑀲𑀺𑀁, 𑀬𑁄 𑀢𑁂 𑀤𑀸𑀦𑀯𑀭𑁂 𑀅𑀤𑀸.

𑀏𑀢𑁂 𑀤𑀸𑀦𑀧𑀭𑀺𑀓𑁆𑀔𑀸𑀭𑀸, 𑀏𑀢𑁂 𑀤𑀸𑀦𑀲𑁆𑀲 𑀧𑀸𑀭𑀫𑀻;

𑀚𑀻𑀯𑀺𑀢𑀁 𑀬𑀸𑀘𑀓𑁂 𑀤𑀢𑁆𑀯𑀸, 𑀇𑀫𑀁 𑀧𑀸𑀭𑀫𑀺 𑀧𑀽𑀭𑀬𑀺𑀁.

𑀪𑀺𑀓𑁆𑀔𑀸𑀬 𑀉𑀧𑀕𑀢𑀁 𑀤𑀺𑀲𑁆𑀯𑀸, 𑀲𑀓𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀺𑀁;

𑀤𑀸𑀦𑁂𑀦 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀤𑀸𑀦𑀧𑀸𑀭𑀫𑀻𑀢𑀺.

𑀤𑀸𑀦𑀧𑀸𑀭𑀫𑀺𑀦𑀺𑀤𑁆𑀤𑁂𑀲𑁄 𑀦𑀺𑀝𑁆𑀞𑀺𑀢𑁄.