𑁧𑁦. 𑀢𑀺𑀧𑀤𑀼𑀫𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁮. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀤𑀦𑁆𑀢𑁄 𑀤𑀦𑁆𑀢𑀧𑀭𑀺𑀯𑀼𑀢𑁄, 𑀦𑀕𑀭𑀸 𑀦𑀺𑀓𑁆𑀔𑀫𑀻 𑀢𑀤𑀸.

𑁪𑁯. ‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀁, 𑀅𑀳𑁄𑀲𑀺𑀁 𑀫𑀸𑀮𑀺𑀓𑁄 𑀢𑀤𑀸;

𑀬𑀁 𑀢𑀢𑁆𑀣 𑀉𑀢𑁆𑀢𑀫𑀁 𑀢𑁄𑀡𑀺, 𑀧𑀤𑁆𑀫𑀧𑀼𑀧𑁆𑀨𑀸𑀦𑀺 [𑀉𑀢𑁆𑀢𑀫𑀁 𑀧𑀼𑀧𑁆𑀨𑀁, 𑀢𑀻𑀡𑀺 𑀧𑀼𑀧𑁆𑀨𑀸𑀦𑀺 (𑀲𑀻.)] 𑀅𑀕𑁆𑀕𑀳𑀺𑀁.

𑁫𑁦. ‘‘𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀧𑀝𑀺𑀫𑀕𑁆𑀕𑀦𑁆𑀢𑀭𑀸𑀧𑀡𑁂;

𑀲𑀳 [𑀲𑁄𑀳𑀁 (𑀲𑀻.)] 𑀤𑀺𑀲𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸.

𑁫𑁧. ‘‘𑀓𑀺𑀁 𑀫𑁂 𑀇𑀫𑁂𑀳𑀺 𑀧𑀼𑀧𑁆𑀨𑁂𑀳𑀺, 𑀭𑀜𑁆𑀜𑁄 𑀉𑀧𑀦𑀺𑀢𑁂𑀳𑀺 𑀫𑁂;

𑀕𑀸𑀫𑀁 𑀯𑀸 𑀕𑀸𑀫𑀔𑁂𑀢𑁆𑀢𑀁 𑀯𑀸, 𑀲𑀳𑀲𑁆𑀲𑀁 𑀯𑀸 𑀮𑀪𑁂𑀬𑁆𑀬𑀳𑀁.

𑁫𑁨. ‘‘𑀅𑀤𑀦𑁆𑀢𑀤𑀫𑀦𑀁 𑀯𑀻𑀭𑀁, 𑀲𑀩𑁆𑀩𑀲𑀢𑁆𑀢𑀲𑀼𑀔𑀸𑀯𑀳𑀁;

𑀮𑁄𑀓𑀦𑀸𑀣𑀁 𑀧𑀽𑀚𑀬𑀺𑀢𑁆𑀯𑀸, 𑀮𑀘𑁆𑀙𑀸𑀫𑀺 𑀅𑀫𑀢𑀁 𑀥𑀦𑀁.

𑁫𑁩. ‘‘𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀢𑀻𑀡𑀺 𑀮𑁄𑀳𑀺𑀢𑀓𑁂 𑀕𑀬𑁆𑀳, 𑀆𑀓𑀸𑀲𑁂 𑀉𑀓𑁆𑀔𑀺𑀧𑀺𑀁 𑀢𑀤𑀸.

𑁫𑁪. ‘‘𑀫𑀬𑀸 𑀉𑀓𑁆𑀔𑀺𑀢𑁆𑀢𑀫𑀢𑁆𑀢𑀫𑁆𑀳𑀺, 𑀆𑀓𑀸𑀲𑁂 𑀧𑀢𑁆𑀣𑀭𑀺𑀁𑀲𑀼 𑀢𑁂;

𑀥𑀸𑀭𑀺𑀁𑀲𑀼 𑀫𑀢𑁆𑀣𑀓𑁂 𑀢𑀢𑁆𑀣, 𑀉𑀤𑁆𑀥𑀁𑀯𑀡𑁆𑀝𑀸 𑀅𑀥𑁄𑀫𑀼𑀔𑀸.

𑁫𑁫. ‘‘𑀬𑁂 𑀓𑁂𑀘𑀺 𑀫𑀦𑀼𑀚𑀸 𑀤𑀺𑀲𑁆𑀯𑀸, 𑀉𑀓𑁆𑀓𑀼𑀝𑁆𑀞𑀺𑀁 𑀲𑀫𑁆𑀧𑀯𑀢𑁆𑀢𑀬𑀼𑀁;

𑀤𑁂𑀯𑀢𑀸 𑀅𑀦𑁆𑀢𑀮𑀺𑀓𑁆𑀔𑀫𑁆𑀳𑀺, 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑀬𑀼𑀁.

𑁫𑁬. ‘‘𑀅𑀘𑁆𑀙𑁂𑀭𑀁 𑀮𑁄𑀓𑁂 𑀉𑀧𑁆𑀧𑀦𑁆𑀦𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀯𑀸𑀳𑀲𑀸;

𑀲𑀩𑁆𑀩𑁂 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫, 𑀧𑀼𑀧𑁆𑀨𑀸𑀦𑀁 𑀯𑀸𑀳𑀲𑀸 𑀫𑀬𑀁.

𑁫𑁭. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀯𑀻𑀣𑀺𑀬𑀜𑁆𑀳𑀺 𑀞𑀺𑀢𑁄 𑀲𑀦𑁆𑀢𑁄, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁫𑁮. ‘‘‘𑀬𑁄 𑀲𑁄 𑀩𑀼𑀤𑁆𑀥𑀁 𑀅𑀧𑀽𑀚𑁂𑀲𑀺, 𑀭𑀢𑁆𑀢𑀧𑀤𑁆𑀫𑁂𑀳𑀺 [𑀭𑀢𑁆𑀢𑀧𑀤𑀼𑀫𑁂𑀳𑀺 (𑀲𑀻. 𑀲𑁆𑀬𑀸.)] 𑀫𑀸𑀡𑀯𑁄;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁫𑁯. ‘‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀢𑀺𑀁𑀲𑀓𑀧𑁆𑀧𑀸𑀦𑀺 [𑀢𑀺𑀁𑀲𑀓𑁆𑀔𑀢𑁆𑀢𑀼𑀜𑁆𑀘 (𑀲𑁆𑀬𑀸.)] 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

𑁬𑁦. ‘‘‘𑀫𑀳𑀸𑀯𑀺𑀢𑁆𑀣𑀸𑀭𑀺𑀓𑀁 𑀦𑀸𑀫, 𑀩𑁆𑀬𑀫𑁆𑀳𑀁 𑀳𑁂𑀲𑁆𑀲𑀢𑀺 𑀢𑀸𑀯𑀤𑁂;

𑀢𑀺𑀬𑁄𑀚𑀦𑀲𑀢𑀼𑀩𑁆𑀩𑀺𑀤𑁆𑀥𑀁, 𑀤𑀺𑀬𑀟𑁆𑀠𑀲𑀢𑀯𑀺𑀢𑁆𑀣𑀢𑀁.

𑁬𑁧. ‘‘‘𑀘𑀢𑁆𑀢𑀸𑀭𑀺𑀲𑀢𑀲𑀳𑀲𑁆𑀲𑀸𑀦𑀺, 𑀦𑀺𑀬𑁆𑀬𑀽𑀳𑀸 𑀘 𑀲𑀼𑀫𑀸𑀧𑀺𑀢𑀸;

𑀓𑀽𑀝𑀸𑀕𑀸𑀭𑀯𑀭𑀽𑀧𑁂𑀢𑀸, 𑀫𑀳𑀸𑀲𑀬𑀦𑀫𑀡𑁆𑀟𑀺𑀢𑀸.

𑁬𑁨. ‘‘‘𑀓𑁄𑀝𑀺𑀲𑀢𑀲𑀳𑀲𑁆𑀲𑀺𑀬𑁄, 𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀺 𑀅𑀘𑁆𑀙𑀭𑀸;

𑀓𑀼𑀲𑀮𑀸 𑀦𑀘𑁆𑀘𑀕𑀻𑀢𑀲𑁆𑀲, 𑀯𑀸𑀤𑀺𑀢𑁂𑀧𑀺 𑀧𑀤𑀓𑁆𑀔𑀺𑀡𑀸.

𑁬𑁩. ‘‘‘𑀏𑀢𑀸𑀤𑀺𑀲𑁂 𑀩𑁆𑀬𑀫𑁆𑀳𑀯𑀭𑁂, 𑀦𑀸𑀭𑀻𑀕𑀡𑀲𑀫𑀸𑀓𑀼𑀮𑁂;

𑀯𑀲𑁆𑀲𑀺𑀲𑁆𑀲𑀢𑀺 𑀧𑀼𑀧𑁆𑀨𑀯𑀲𑁆𑀲𑁄, 𑀤𑀺𑀩𑁆𑀩𑁄 [𑀧𑀤 (𑀓.)] 𑀮𑁄𑀳𑀺𑀢𑀓𑁄 𑀲𑀤𑀸.

𑁬𑁪. ‘‘‘𑀪𑀺𑀢𑁆𑀢𑀺𑀔𑀻𑀮𑁂 𑀦𑀸𑀕𑀤𑀦𑁆𑀢𑁂, 𑀤𑁆𑀯𑀸𑀭𑀩𑀸𑀳𑀸𑀬 𑀢𑁄𑀭𑀡𑁂;

𑀘𑀓𑁆𑀓𑀫𑀢𑁆𑀢𑀸 𑀮𑁄𑀳𑀺𑀢𑀓𑀸, 𑀑𑀮𑀫𑁆𑀩𑀺𑀲𑁆𑀲𑀦𑁆𑀢𑀺 𑀢𑀸𑀯𑀤𑁂.

𑁬𑁫. ‘‘‘𑀧𑀢𑁆𑀢𑁂𑀦 𑀧𑀢𑁆𑀢𑀲𑀜𑁆𑀙𑀦𑁆𑀦𑁂, 𑀅𑀦𑁆𑀢𑁄𑀩𑁆𑀬𑀫𑁆𑀳𑀯𑀭𑁂 𑀇𑀫𑀁;

𑀅𑀢𑁆𑀣𑀭𑀺𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸, 𑀢𑀼𑀯𑀝𑁆𑀝𑀺𑀲𑁆𑀲𑀦𑁆𑀢𑀺 𑀢𑀸𑀯𑀤𑁂.

𑁬𑁬. ‘‘‘𑀪𑀯𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀲𑀫𑀦𑁆𑀢𑀸 𑀲𑀢𑀬𑁄𑀚𑀦𑁂;

𑀢𑁂𑀧𑀺 𑀧𑀤𑁆𑀫𑀸 [𑀢𑁂 𑀯𑀺𑀲𑀼𑀤𑁆𑀥𑀸 (𑀲𑀻. 𑀲𑁆𑀬𑀸.)] 𑀮𑁄𑀳𑀺𑀢𑀓𑀸, 𑀤𑀺𑀩𑁆𑀩𑀕𑀦𑁆𑀥𑀁 𑀧𑀯𑀸𑀬𑀭𑁂.

𑁬𑁭. ‘‘‘𑀧𑀜𑁆𑀘𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁬𑁮. ‘‘‘𑀲𑀫𑁆𑀧𑀢𑁆𑀢𑀺𑀬𑁄 𑀤𑀼𑀯𑁂 𑀪𑀼𑀢𑁆𑀯𑀸, 𑀅𑀦𑀻𑀢𑀺 𑀅𑀦𑀼𑀧𑀤𑁆𑀤𑀯𑁄;

𑀲𑀫𑁆𑀧𑀢𑁆𑀢𑁂 𑀧𑀭𑀺𑀬𑁄𑀲𑀸𑀦𑁂, 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺’ [𑀨𑀲𑁆𑀲𑀬𑀺𑀲𑁆𑀲𑀢𑀺 (𑀲𑀻.), 𑀧𑀲𑁆𑀲𑀬𑀺𑀲𑁆𑀲𑀢𑀺 (𑀓.)].

𑁬𑁯. ‘‘𑀲𑀼𑀤𑀺𑀝𑁆𑀞𑁄 𑀯𑀢 𑀫𑁂 𑀩𑀼𑀤𑁆𑀥𑁄, 𑀯𑀸𑀡𑀺𑀚𑁆𑀚𑀁 𑀲𑀼𑀧𑀬𑁄𑀚𑀺𑀢𑀁;

𑀧𑀤𑁆𑀫𑀸𑀦𑀺 𑀢𑀻𑀡𑀺 𑀧𑀽𑀚𑁂𑀢𑁆𑀯𑀸, 𑀅𑀦𑀼𑀪𑁄𑀲𑀺𑀁 𑀢𑀺𑀲𑀫𑁆𑀧𑀤𑀸 [𑀅𑀦𑀼𑀪𑀽𑀬𑀦𑁆𑀢𑀺 𑀲𑀫𑁆𑀧𑀤𑀸 (𑀓.)].

𑁭𑁦. ‘‘𑀅𑀚𑁆𑀚 𑀫𑁂 𑀥𑀫𑁆𑀫𑀧𑁆𑀧𑀢𑁆𑀢𑀲𑁆𑀲, 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲 𑀲𑀩𑁆𑀩𑀲𑁄;

𑀲𑀼𑀧𑀼𑀧𑁆𑀨𑀺𑀢𑀁 𑀮𑁄𑀳𑀺𑀢𑀓𑀁, 𑀥𑀸𑀭𑀬𑀺𑀲𑁆𑀲𑀢𑀺 𑀫𑀢𑁆𑀣𑀓𑁂.

𑁭𑁧. ‘‘𑀫𑀫 𑀓𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲, 𑀧𑀤𑀼𑀫𑀼𑀢𑁆𑀢𑀭𑀲𑀢𑁆𑀣𑀼𑀦𑁄;

𑀲𑀢𑀧𑀸𑀡𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁭𑁨. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀺𑀧𑀤𑀼𑀫𑀸𑀦𑀺𑀤𑀁 𑀨𑀮𑀁.

𑁭𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁭𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀧𑀤𑀼𑀫𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀧𑀤𑀼𑀫𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀦𑀸𑀕𑀲𑀫𑀸𑀮𑀯𑀕𑁆𑀕𑁄 𑀅𑀝𑁆𑀞𑀫𑁄.