𑁮. 𑀦𑀸𑀕𑀲𑀫𑀸𑀮𑀯𑀕𑁆𑀕𑁄

𑁧. 𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀅𑀧𑀸𑀝𑀮𑀺𑀁 𑀅𑀳𑀁 𑀧𑀼𑀧𑁆𑀨𑀁, 𑀉𑀚𑁆𑀛𑀺𑀢𑀁 𑀲𑀼𑀫𑀳𑀸𑀧𑀣𑁂;

𑀣𑀽𑀧𑀫𑁆𑀳𑀺 𑀅𑀪𑀺𑀭𑁄𑀧𑁂𑀲𑀺𑀁, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄.

𑁨. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀣𑀽𑀧𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩. ‘‘𑀇𑀢𑁄 𑀧𑀦𑁆𑀦𑀭𑀲𑁂 𑀓𑀧𑁆𑀧𑁂, 𑀪𑀽𑀫𑀺𑀬𑁄 [𑀧𑀼𑀧𑁆𑀨𑀺𑀬𑁄 (𑀲𑁆𑀬𑀸.)] 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀸𑀕𑀲𑀫𑀸𑀮𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀧𑀤𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫. ‘‘𑀅𑀓𑁆𑀓𑀦𑁆𑀢𑀜𑁆𑀘 𑀧𑀤𑀁 𑀤𑀺𑀲𑁆𑀯𑀸, 𑀢𑀺𑀲𑁆𑀲𑀲𑁆𑀲𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑁄;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀧𑀤𑁂 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁬. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀤𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁭. ‘‘𑀇𑀢𑁄 𑀲𑀢𑁆𑀢𑀫𑀓𑁂 𑀓𑀧𑁆𑀧𑁂, 𑀲𑀼𑀫𑁂𑀥𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑀻 𑀫𑀳𑀩𑁆𑀩𑀮𑁄.

𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀤𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀤𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀩𑀼𑀤𑁆𑀥𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁯. ‘‘𑀤𑀼𑀫𑀕𑁆𑀕𑁂 𑀧𑀁𑀲𑀼𑀓𑀽𑀮𑀺𑀓𑀁, 𑀮𑀕𑁆𑀕𑀁 𑀤𑀺𑀲𑁆𑀯𑀸𑀦 𑀲𑀢𑁆𑀣𑀼𑀦𑁄;

𑀢𑀢𑁄 𑀢𑀫𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀧𑀁𑀲𑀼𑀓𑀽𑀮𑀁 𑀅𑀯𑀦𑁆𑀤𑀳𑀁.

𑁧𑁦. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁧𑁧. ‘‘𑀇𑀢𑁄 𑀘𑀢𑀼𑀢𑁆𑀣𑀓𑁂 𑀓𑀧𑁆𑀧𑁂, 𑀤𑀼𑀫𑀲𑀸𑀭𑁄𑀲𑀺 𑀔𑀢𑁆𑀢𑀺𑀬𑁄;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑀼𑀤𑁆𑀥𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑀼𑀤𑁆𑀥𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀪𑀺𑀲𑀸𑀮𑀼𑀯𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁩. ‘‘𑀓𑀸𑀦𑀦𑀁 𑀯𑀦𑀫𑁄𑀕𑀬𑁆𑀳, 𑀯𑀲𑀸𑀫𑀺 𑀯𑀺𑀧𑀺𑀦𑁂 𑀅𑀳𑀁;

𑀯𑀺𑀧𑀲𑁆𑀲𑀺𑀁 𑀅𑀤𑁆𑀤𑀲𑀁 𑀩𑀼𑀤𑁆𑀥𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁.

𑁧𑁪. ‘‘𑀪𑀺𑀲𑀸𑀮𑀼𑀯𑀜𑁆𑀘 𑀧𑀸𑀤𑀸𑀲𑀺𑀁, 𑀉𑀤𑀓𑀁 𑀳𑀢𑁆𑀣𑀥𑁄𑀯𑀦𑀁;

𑀯𑀦𑁆𑀤𑀺𑀢𑁆𑀯𑀸 𑀲𑀺𑀭𑀲𑀸 𑀧𑀸𑀤𑁂, 𑀧𑀓𑁆𑀓𑀸𑀫𑀺 𑀉𑀢𑁆𑀢𑀭𑀸𑀫𑀼𑀔𑁄.

𑁧𑁫. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀪𑀺𑀲𑀸𑀮𑀼𑀯𑀫𑀤𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁧𑁬. ‘‘𑀇𑀢𑁄 𑀢𑀢𑀺𑀬𑀓𑁂 𑀓𑀧𑁆𑀧𑁂, 𑀪𑀺𑀲𑀲𑀫𑁆𑀫𑀢𑀔𑀢𑁆𑀢𑀺𑀬𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀪𑀺𑀲𑀸𑀮𑀼𑀯𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀪𑀺𑀲𑀸𑀮𑀼𑀯𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑀙𑀝𑁆𑀞𑀪𑀸𑀡𑀯𑀸𑀭𑀁.

𑁫. 𑀏𑀓𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁮. ‘‘𑀔𑀡𑁆𑀟𑁄 𑀦𑀸𑀫𑀸𑀲𑀺 𑀦𑀸𑀫𑁂𑀦, 𑀯𑀺𑀧𑀲𑁆𑀲𑀺𑀲𑁆𑀲𑀕𑁆𑀕𑀲𑀸𑀯𑀓𑁄;

𑀏𑀓𑀸 𑀪𑀺𑀓𑁆𑀔𑀸 𑀫𑀬𑀸 𑀤𑀺𑀦𑁆𑀦𑀸, 𑀮𑁄𑀓𑀸𑀳𑀼𑀢𑀺𑀧𑀝𑀺𑀕𑁆𑀕𑀳𑁂.

𑁧𑁯. ‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀤𑁆𑀯𑀺𑀧𑀤𑀺𑀦𑁆𑀤 𑀦𑀭𑀸𑀲𑀪;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀏𑀓𑀪𑀺𑀓𑁆𑀔𑀸𑀬𑀺𑀤𑀁 𑀨𑀮𑀁.

𑁨𑁦. ‘‘𑀘𑀢𑁆𑀢𑀸𑀮𑀻𑀲𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀯𑀭𑀼𑀡𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀢𑀺𑀡𑀲𑀦𑁆𑀣𑀭𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁨. ‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀫𑀳𑀸𑀚𑀸𑀢𑀲𑁆𑀲𑀭𑁄 𑀅𑀳𑀼;

𑀲𑀢𑀧𑀢𑁆𑀢𑁂𑀳𑀺 𑀲𑀜𑁆𑀙𑀦𑁆𑀦𑁄, 𑀦𑀸𑀦𑀸𑀲𑀓𑀼𑀡𑀫𑀸𑀮𑀬𑁄.

𑁨𑁩. ‘‘𑀢𑀫𑁆𑀳𑀺 𑀦𑁆𑀳𑀢𑁆𑀯𑀸 𑀘 𑀧𑀺𑀢𑁆𑀯𑀸 [𑀧𑀻𑀢𑁆𑀯𑀸 (𑀲𑀻. 𑀲𑁆𑀬𑀸.)] 𑀘, 𑀅𑀯𑀺𑀤𑀽𑀭𑁂 𑀯𑀲𑀸𑀫𑀳𑀁;

𑀅𑀤𑁆𑀤𑀲𑀁 𑀲𑀫𑀡𑀸𑀦𑀕𑁆𑀕𑀁, 𑀕𑀘𑁆𑀙𑀦𑁆𑀢𑀁 𑀅𑀦𑀺𑀮𑀜𑁆𑀚𑀲𑁂.

𑁨𑁪. ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀅𑀩𑁆𑀪𑀢𑁄 𑀑𑀭𑀼𑀳𑀺𑀢𑁆𑀯𑀸𑀦, 𑀪𑀽𑀫𑀺𑀬𑀁𑀞𑀸𑀲𑀺 𑀢𑀸𑀯𑀤𑁂.

𑁨𑁫. ‘‘𑀯𑀺𑀲𑀸𑀡𑁂𑀦 [𑀮𑀸𑀬𑀦𑁂𑀦 (𑀲𑁆𑀬𑀸.)] 𑀢𑀺𑀡𑀁 𑀕𑀬𑁆𑀳, 𑀦𑀺𑀲𑀻𑀤𑀦𑀫𑀤𑀸𑀲𑀳𑀁;

𑀦𑀺𑀲𑀻𑀤𑀺 𑀪𑀕𑀯𑀸 𑀢𑀢𑁆𑀣, 𑀢𑀺𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄.

𑁨𑁬. ‘‘𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀅𑀯𑀦𑁆𑀤𑀺 𑀮𑁄𑀓𑀦𑀸𑀬𑀓𑀁;

𑀧𑀝𑀺𑀓𑀼𑀝𑀺𑀓𑁄 [𑀉𑀓𑁆𑀓𑀼𑀝𑀺𑀓𑁄 (𑀲𑁆𑀬𑀸. 𑀓.)] 𑀅𑀧𑀲𑀓𑁆𑀓𑀺𑀁, 𑀦𑀺𑀚𑁆𑀛𑀸𑀬𑀦𑁆𑀢𑁄 𑀫𑀳𑀸𑀫𑀼𑀦𑀺𑀁.

𑁨𑁭. ‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀦𑀺𑀫𑁆𑀫𑀸𑀦𑀁 𑀉𑀧𑀧𑀚𑁆𑀚𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀦𑁆𑀣𑀭𑀲𑁆𑀲 𑀇𑀤𑀁 𑀨𑀮𑀁.

𑁨𑁮. ‘‘𑀇𑀢𑁄 𑀤𑀼𑀢𑀺𑀬𑀓𑁂 𑀓𑀧𑁆𑀧𑁂, 𑀫𑀺𑀕 [𑀫𑀺𑀢𑁆𑀢 (𑀲𑁆𑀬𑀸.)] 𑀲𑀫𑁆𑀫𑀢𑀔𑀢𑁆𑀢𑀺𑀬𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀡𑀲𑀦𑁆𑀣𑀭𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀡𑀲𑀦𑁆𑀣𑀭𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀲𑀽𑀘𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁦. ‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑀦𑀸𑀬𑀓𑁄;

𑀲𑀼𑀫𑁂𑀥𑁄 𑀦𑀸𑀫 𑀦𑀸𑀫𑁂𑀦, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄.

𑁩𑁧. ‘‘𑀢𑀲𑁆𑀲 𑀓𑀜𑁆𑀘𑀦𑀯𑀡𑁆𑀡𑀲𑁆𑀲, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀢𑀸𑀤𑀺𑀦𑁄;

𑀧𑀜𑁆𑀘 𑀲𑀽𑀘𑀻 𑀫𑀬𑀸 𑀤𑀺𑀦𑁆𑀦𑀸, 𑀲𑀺𑀩𑁆𑀩𑀦𑀢𑁆𑀣𑀸𑀬 𑀘𑀻𑀯𑀭𑀁.

𑁩𑁨. ‘‘𑀢𑁂𑀦𑁂𑀯 𑀲𑀽𑀘𑀺𑀤𑀸𑀦𑁂𑀦, 𑀦𑀺𑀧𑀼𑀡𑀢𑁆𑀣𑀯𑀺𑀧𑀲𑁆𑀲𑀓𑀁;

𑀢𑀺𑀓𑁆𑀔𑀁 𑀮𑀳𑀼𑀜𑁆𑀘 𑀨𑀸𑀲𑀼𑀜𑁆𑀘, 𑀜𑀸𑀡𑀁 𑀫𑁂 𑀉𑀤𑀧𑀚𑁆𑀚𑀣.

𑁩𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁩𑁪. ‘‘𑀤𑁆𑀯𑀺𑀧𑀤𑀸𑀥𑀺𑀧𑀢𑀻 𑀦𑀸𑀫, 𑀭𑀸𑀚𑀸𑀦𑁄 𑀘𑀢𑀼𑀭𑁄 𑀅𑀳𑀼𑀁;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁩𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀽𑀘𑀺𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀽𑀘𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀧𑀸𑀝𑀮𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁬. ‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀕𑀘𑁆𑀙𑀦𑁆𑀢𑀁 𑀅𑀦𑁆𑀢𑀭𑀸𑀧𑀡𑁂;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑀁, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀁.

𑁩𑁭. ‘‘𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑀤𑀸 𑀆𑀲𑀺𑀁, 𑀲𑀼𑀔𑀼𑀫𑀸𑀮𑁄 𑀲𑀼𑀔𑁂𑀥𑀺𑀢𑁄;

𑀉𑀘𑁆𑀙𑀗𑁆𑀕𑁂 𑀧𑀸𑀝𑀮𑀺𑀧𑀼𑀧𑁆𑀨𑀁, 𑀓𑀢𑁆𑀯𑀸𑀦 [𑀓𑀢𑁆𑀯𑀸 𑀢𑀁 (𑀲𑀻. 𑀲𑁆𑀬𑀸.)] 𑀅𑀪𑀺𑀲𑀁𑀳𑀭𑀺𑀁.

𑁩𑁮. ‘‘𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀧𑀼𑀧𑁆𑀨𑁂𑀳𑀺 𑀅𑀪𑀺𑀧𑀽𑀚𑀬𑀺𑀁;

𑀢𑀺𑀲𑁆𑀲𑀁 𑀮𑁄𑀓𑀯𑀺𑀤𑀼𑀁 𑀦𑀸𑀣𑀁, 𑀦𑀭𑀤𑁂𑀯𑀁 𑀦𑀫𑀲𑁆𑀲𑀳𑀁.

𑁩𑁯. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪𑁦. ‘‘𑀇𑀢𑁄 𑀢𑁂𑀲𑀝𑁆𑀞𑀺𑀓𑀧𑁆𑀧𑀫𑁆𑀳𑀺, 𑀅𑀪𑀺𑀲𑀫𑁆𑀫𑀢𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀸𑀝𑀮𑀺𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀸𑀝𑀮𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀞𑀺𑀢𑀜𑁆𑀚𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁨. ‘‘𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀁, 𑀅𑀭𑀜𑁆𑀜𑁂 𑀓𑀸𑀦𑀦𑁂 𑀅𑀳𑀁;

𑀢𑀢𑁆𑀣 𑀅𑀤𑁆𑀤𑀲𑀁 [𑀢𑀢𑁆𑀣𑀤𑁆𑀤𑀲𑀸𑀲𑀺𑀁 (𑀲𑀻. 𑀲𑁆𑀬𑀸.)] 𑀲𑀫𑁆𑀩𑀼𑀤𑁆𑀥𑀁, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀁.

𑁪𑁩. ‘‘𑀢𑀢𑁆𑀣𑀸𑀳𑀁 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀧𑀓𑁆𑀓𑀸𑀫𑀺𑀁 𑀧𑀸𑀘𑀺𑀦𑀸𑀫𑀼𑀔𑁄;

𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀲𑁆𑀲, 𑀦𑀺𑀬𑀓𑁂 𑀧𑀡𑁆𑀡𑀲𑀦𑁆𑀣𑀭𑁂.

𑁪𑁪. ‘‘𑀢𑀢𑁄 𑀫𑁂 𑀅𑀲𑀦𑀻𑀧𑀸𑀢𑁄, 𑀫𑀢𑁆𑀣𑀓𑁂 𑀦𑀺𑀧𑀢𑀻 𑀢𑀤𑀸;

𑀲𑁄𑀳𑀁 𑀫𑀭𑀡𑀓𑀸𑀮𑀫𑁆𑀳𑀺, 𑀅𑀓𑀸𑀲𑀺𑀁 𑀧𑀼𑀦𑀭𑀜𑁆𑀚𑀮𑀺𑀁.

𑁪𑁫. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀅𑀜𑁆𑀚𑀮𑀺𑀁 𑀅𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀜𑁆𑀚𑀮𑀺𑀲𑁆𑀲 𑀇𑀤𑀁 𑀨𑀮𑀁.

𑁪𑁬. ‘‘𑀘𑀢𑀼𑀧𑀡𑁆𑀡𑀸𑀲𑀓𑀧𑁆𑀧𑀫𑁆𑀳𑀺, 𑀫𑀺𑀕𑀓𑁂𑀢𑀼𑀲𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀞𑀺𑀢𑀜𑁆𑀚𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀞𑀺𑀢𑀜𑁆𑀚𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀢𑀺𑀧𑀤𑀼𑀫𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁮. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀤𑀦𑁆𑀢𑁄 𑀤𑀦𑁆𑀢𑀧𑀭𑀺𑀯𑀼𑀢𑁄, 𑀦𑀕𑀭𑀸 𑀦𑀺𑀓𑁆𑀔𑀫𑀻 𑀢𑀤𑀸.

𑁪𑁯. ‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀁, 𑀅𑀳𑁄𑀲𑀺𑀁 𑀫𑀸𑀮𑀺𑀓𑁄 𑀢𑀤𑀸;

𑀬𑀁 𑀢𑀢𑁆𑀣 𑀉𑀢𑁆𑀢𑀫𑀁 𑀢𑁄𑀡𑀺, 𑀧𑀤𑁆𑀫𑀧𑀼𑀧𑁆𑀨𑀸𑀦𑀺 [𑀉𑀢𑁆𑀢𑀫𑀁 𑀧𑀼𑀧𑁆𑀨𑀁, 𑀢𑀻𑀡𑀺 𑀧𑀼𑀧𑁆𑀨𑀸𑀦𑀺 (𑀲𑀻.)] 𑀅𑀕𑁆𑀕𑀳𑀺𑀁.

𑁫𑁦. ‘‘𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀧𑀝𑀺𑀫𑀕𑁆𑀕𑀦𑁆𑀢𑀭𑀸𑀧𑀡𑁂;

𑀲𑀳 [𑀲𑁄𑀳𑀁 (𑀲𑀻.)] 𑀤𑀺𑀲𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸.

𑁫𑁧. ‘‘𑀓𑀺𑀁 𑀫𑁂 𑀇𑀫𑁂𑀳𑀺 𑀧𑀼𑀧𑁆𑀨𑁂𑀳𑀺, 𑀭𑀜𑁆𑀜𑁄 𑀉𑀧𑀦𑀺𑀢𑁂𑀳𑀺 𑀫𑁂;

𑀕𑀸𑀫𑀁 𑀯𑀸 𑀕𑀸𑀫𑀔𑁂𑀢𑁆𑀢𑀁 𑀯𑀸, 𑀲𑀳𑀲𑁆𑀲𑀁 𑀯𑀸 𑀮𑀪𑁂𑀬𑁆𑀬𑀳𑀁.

𑁫𑁨. ‘‘𑀅𑀤𑀦𑁆𑀢𑀤𑀫𑀦𑀁 𑀯𑀻𑀭𑀁, 𑀲𑀩𑁆𑀩𑀲𑀢𑁆𑀢𑀲𑀼𑀔𑀸𑀯𑀳𑀁;

𑀮𑁄𑀓𑀦𑀸𑀣𑀁 𑀧𑀽𑀚𑀬𑀺𑀢𑁆𑀯𑀸, 𑀮𑀘𑁆𑀙𑀸𑀫𑀺 𑀅𑀫𑀢𑀁 𑀥𑀦𑀁.

𑁫𑁩. ‘‘𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀢𑀻𑀡𑀺 𑀮𑁄𑀳𑀺𑀢𑀓𑁂 𑀕𑀬𑁆𑀳, 𑀆𑀓𑀸𑀲𑁂 𑀉𑀓𑁆𑀔𑀺𑀧𑀺𑀁 𑀢𑀤𑀸.

𑁫𑁪. ‘‘𑀫𑀬𑀸 𑀉𑀓𑁆𑀔𑀺𑀢𑁆𑀢𑀫𑀢𑁆𑀢𑀫𑁆𑀳𑀺, 𑀆𑀓𑀸𑀲𑁂 𑀧𑀢𑁆𑀣𑀭𑀺𑀁𑀲𑀼 𑀢𑁂;

𑀥𑀸𑀭𑀺𑀁𑀲𑀼 𑀫𑀢𑁆𑀣𑀓𑁂 𑀢𑀢𑁆𑀣, 𑀉𑀤𑁆𑀥𑀁𑀯𑀡𑁆𑀝𑀸 𑀅𑀥𑁄𑀫𑀼𑀔𑀸.

𑁫𑁫. ‘‘𑀬𑁂 𑀓𑁂𑀘𑀺 𑀫𑀦𑀼𑀚𑀸 𑀤𑀺𑀲𑁆𑀯𑀸, 𑀉𑀓𑁆𑀓𑀼𑀝𑁆𑀞𑀺𑀁 𑀲𑀫𑁆𑀧𑀯𑀢𑁆𑀢𑀬𑀼𑀁;

𑀤𑁂𑀯𑀢𑀸 𑀅𑀦𑁆𑀢𑀮𑀺𑀓𑁆𑀔𑀫𑁆𑀳𑀺, 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑀬𑀼𑀁.

𑁫𑁬. ‘‘𑀅𑀘𑁆𑀙𑁂𑀭𑀁 𑀮𑁄𑀓𑁂 𑀉𑀧𑁆𑀧𑀦𑁆𑀦𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀯𑀸𑀳𑀲𑀸;

𑀲𑀩𑁆𑀩𑁂 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫, 𑀧𑀼𑀧𑁆𑀨𑀸𑀦𑀁 𑀯𑀸𑀳𑀲𑀸 𑀫𑀬𑀁.

𑁫𑁭. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀯𑀻𑀣𑀺𑀬𑀜𑁆𑀳𑀺 𑀞𑀺𑀢𑁄 𑀲𑀦𑁆𑀢𑁄, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁫𑁮. ‘‘‘𑀬𑁄 𑀲𑁄 𑀩𑀼𑀤𑁆𑀥𑀁 𑀅𑀧𑀽𑀚𑁂𑀲𑀺, 𑀭𑀢𑁆𑀢𑀧𑀤𑁆𑀫𑁂𑀳𑀺 [𑀭𑀢𑁆𑀢𑀧𑀤𑀼𑀫𑁂𑀳𑀺 (𑀲𑀻. 𑀲𑁆𑀬𑀸.)] 𑀫𑀸𑀡𑀯𑁄;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁫𑁯. ‘‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀢𑀺𑀁𑀲𑀓𑀧𑁆𑀧𑀸𑀦𑀺 [𑀢𑀺𑀁𑀲𑀓𑁆𑀔𑀢𑁆𑀢𑀼𑀜𑁆𑀘 (𑀲𑁆𑀬𑀸.)] 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

𑁬𑁦. ‘‘‘𑀫𑀳𑀸𑀯𑀺𑀢𑁆𑀣𑀸𑀭𑀺𑀓𑀁 𑀦𑀸𑀫, 𑀩𑁆𑀬𑀫𑁆𑀳𑀁 𑀳𑁂𑀲𑁆𑀲𑀢𑀺 𑀢𑀸𑀯𑀤𑁂;

𑀢𑀺𑀬𑁄𑀚𑀦𑀲𑀢𑀼𑀩𑁆𑀩𑀺𑀤𑁆𑀥𑀁, 𑀤𑀺𑀬𑀟𑁆𑀠𑀲𑀢𑀯𑀺𑀢𑁆𑀣𑀢𑀁.

𑁬𑁧. ‘‘‘𑀘𑀢𑁆𑀢𑀸𑀭𑀺𑀲𑀢𑀲𑀳𑀲𑁆𑀲𑀸𑀦𑀺, 𑀦𑀺𑀬𑁆𑀬𑀽𑀳𑀸 𑀘 𑀲𑀼𑀫𑀸𑀧𑀺𑀢𑀸;

𑀓𑀽𑀝𑀸𑀕𑀸𑀭𑀯𑀭𑀽𑀧𑁂𑀢𑀸, 𑀫𑀳𑀸𑀲𑀬𑀦𑀫𑀡𑁆𑀟𑀺𑀢𑀸.

𑁬𑁨. ‘‘‘𑀓𑁄𑀝𑀺𑀲𑀢𑀲𑀳𑀲𑁆𑀲𑀺𑀬𑁄, 𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀺 𑀅𑀘𑁆𑀙𑀭𑀸;

𑀓𑀼𑀲𑀮𑀸 𑀦𑀘𑁆𑀘𑀕𑀻𑀢𑀲𑁆𑀲, 𑀯𑀸𑀤𑀺𑀢𑁂𑀧𑀺 𑀧𑀤𑀓𑁆𑀔𑀺𑀡𑀸.

𑁬𑁩. ‘‘‘𑀏𑀢𑀸𑀤𑀺𑀲𑁂 𑀩𑁆𑀬𑀫𑁆𑀳𑀯𑀭𑁂, 𑀦𑀸𑀭𑀻𑀕𑀡𑀲𑀫𑀸𑀓𑀼𑀮𑁂;

𑀯𑀲𑁆𑀲𑀺𑀲𑁆𑀲𑀢𑀺 𑀧𑀼𑀧𑁆𑀨𑀯𑀲𑁆𑀲𑁄, 𑀤𑀺𑀩𑁆𑀩𑁄 [𑀧𑀤 (𑀓.)] 𑀮𑁄𑀳𑀺𑀢𑀓𑁄 𑀲𑀤𑀸.

𑁬𑁪. ‘‘‘𑀪𑀺𑀢𑁆𑀢𑀺𑀔𑀻𑀮𑁂 𑀦𑀸𑀕𑀤𑀦𑁆𑀢𑁂, 𑀤𑁆𑀯𑀸𑀭𑀩𑀸𑀳𑀸𑀬 𑀢𑁄𑀭𑀡𑁂;

𑀘𑀓𑁆𑀓𑀫𑀢𑁆𑀢𑀸 𑀮𑁄𑀳𑀺𑀢𑀓𑀸, 𑀑𑀮𑀫𑁆𑀩𑀺𑀲𑁆𑀲𑀦𑁆𑀢𑀺 𑀢𑀸𑀯𑀤𑁂.