𑁯. 𑀢𑀺𑀫𑀺𑀭𑀯𑀕𑁆𑀕𑁄

𑁧. 𑀢𑀺𑀫𑀺𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀅𑀦𑀼𑀲𑁄𑀢𑀁 𑀯𑀚𑀸𑀫𑀳𑀁;

𑀦𑀺𑀲𑀺𑀦𑁆𑀦𑀁 𑀲𑀫𑀡𑀁 𑀤𑀺𑀲𑁆𑀯𑀸, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁.

𑁨. ‘‘𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 [𑀧𑀲𑀸𑀤𑁂𑀲𑀺𑀁 (𑀲𑁆𑀬𑀸.)], 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

𑀢𑀸𑀭𑀬𑀺𑀲𑁆𑀲𑀢𑀺 𑀢𑀺𑀡𑁆𑀡𑁄𑀬𑀁, 𑀤𑀦𑁆𑀢𑁄𑀬𑀁 𑀤𑀫𑀬𑀺𑀲𑁆𑀲𑀢𑀺.

𑁩. ‘‘𑀅𑀲𑁆𑀲𑀸𑀲𑀺𑀲𑁆𑀲𑀢𑀺 𑀅𑀲𑁆𑀲𑀢𑁆𑀣𑁄, 𑀲𑀦𑁆𑀢𑁄 𑀘 𑀲𑀫𑀬𑀺𑀲𑁆𑀲𑀢𑀺;

𑀫𑁄𑀘𑀬𑀺𑀲𑁆𑀲𑀢𑀺 𑀫𑀼𑀢𑁆𑀢𑁄 𑀘, 𑀦𑀺𑀩𑁆𑀩𑀸𑀧𑁂𑀲𑁆𑀲𑀢𑀺 𑀦𑀺𑀩𑁆𑀩𑀼𑀢𑁄.

𑁪. ‘‘𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀲𑀺𑀤𑁆𑀥𑀢𑁆𑀣𑀲𑁆𑀲 𑀫𑀳𑁂𑀲𑀺𑀦𑁄;

𑀕𑀳𑁂𑀢𑁆𑀯𑀸 𑀢𑀺𑀫𑀺𑀭𑀧𑀼𑀧𑁆𑀨𑀁, 𑀫𑀢𑁆𑀣𑀓𑁂 𑀑𑀓𑀺𑀭𑀺𑀁 𑀅𑀳𑀁 [𑀢𑀤𑀸 (𑀲𑁆𑀬𑀸.)].

𑁫. ‘‘𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀓𑀢𑁆𑀯𑀸 𑀘 𑀦𑀁 𑀧𑀤𑀓𑁆𑀔𑀺𑀡𑀁;

𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀧𑀓𑁆𑀓𑀸𑀫𑀺𑀁 𑀅𑀧𑀭𑀁 𑀤𑀺𑀲𑀁.

𑁬. ‘‘𑀅𑀘𑀺𑀭𑀁 𑀕𑀢𑀫𑀢𑁆𑀢𑀁 𑀫𑀁, 𑀫𑀺𑀕𑀭𑀸𑀚𑀸 𑀯𑀺𑀳𑁂𑀞𑀬𑀺;

𑀧𑀧𑀸𑀢𑀫𑀦𑀼𑀕𑀘𑁆𑀙𑀦𑁆𑀢𑁄, 𑀢𑀢𑁆𑀣𑁂𑀯 𑀧𑀧𑀢𑀺𑀁 𑀅𑀳𑀁.

𑁭. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 [𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 (𑀲𑀻. 𑀲𑁆𑀬𑀸.)] 𑀨𑀮𑀁.

𑁮. ‘‘𑀙𑀧𑁆𑀧𑀜𑁆𑀜𑀸𑀲𑀫𑁆𑀳𑀺 𑀓𑀧𑁆𑀧𑀫𑁆𑀳𑀺, 𑀲𑀢𑁆𑀢𑁂𑀯𑀸𑀲𑀼𑀁 𑀫𑀳𑀸𑀬𑀲𑀸 [𑀫𑀳𑀸𑀭𑀳𑀸 (𑀲𑁆𑀬𑀸. 𑀓.)];

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀫𑀺𑀭𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀫𑀺𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀕𑀢𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦. ‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀅𑀯𑀦𑁆𑀤𑀺𑀁 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁧𑁧. ‘‘𑀲𑀢𑁆𑀢𑀦𑀗𑁆𑀕𑀮𑀓𑀻𑀧𑀼𑀧𑁆𑀨𑁂, 𑀆𑀓𑀸𑀲𑁂 𑀉𑀓𑁆𑀔𑀺𑀧𑀺𑀁 𑀅𑀳𑀁;

𑀢𑀺𑀲𑁆𑀲𑀁 𑀩𑀼𑀤𑁆𑀥𑀁 𑀲𑀫𑀼𑀤𑁆𑀤𑀺𑀲𑁆𑀲, 𑀅𑀦𑀦𑁆𑀢𑀕𑀼𑀡𑀲𑀸𑀕𑀭𑀁.

𑁧𑁨. ‘‘𑀲𑀼𑀕𑀢𑀸𑀦𑀼𑀕𑀢𑀁 𑀫𑀕𑁆𑀕𑀁, 𑀧𑀽𑀚𑁂𑀢𑁆𑀯𑀸 𑀳𑀝𑁆𑀞𑀫𑀸𑀦𑀲𑁄;

𑀅𑀜𑁆𑀚𑀮𑀺𑀜𑁆𑀘 [𑀅𑀜𑁆𑀚𑀮𑀺𑀲𑁆𑀲 (𑀓.)] 𑀢𑀤𑀸𑀓𑀸𑀲𑀺𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁧𑁩. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁪. ‘‘𑀇𑀢𑁄 𑀅𑀝𑁆𑀞𑀫𑀓𑁂 𑀓𑀧𑁆𑀧𑁂, 𑀢𑀬𑁄 𑀅𑀕𑁆𑀕𑀺𑀲𑀺𑀔𑀸 𑀅𑀳𑀼;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀕𑀢𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀕𑀢𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀦𑀺𑀧𑀦𑁆𑀦𑀜𑁆𑀚𑀮𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁬. ‘‘𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄𑀳𑀁, 𑀩𑁆𑀬𑀸𑀥𑀺𑀢𑁄 𑀧𑀭𑀫𑁂𑀦 𑀘;

𑀧𑀭𑀫𑀓𑀸𑀭𑀼𑀜𑁆𑀜𑀧𑀢𑁆𑀢𑁄𑀫𑁆𑀳𑀺, 𑀅𑀭𑀜𑁆𑀜𑁂 𑀓𑀸𑀦𑀦𑁂 𑀅𑀳𑀁.

𑁧𑁭. ‘‘𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀢𑀺𑀲𑁆𑀲𑁄 𑀲𑀢𑁆𑀣𑀸 𑀉𑀧𑁂𑀲𑀺 𑀫𑀁;

𑀲𑁄𑀳𑀁 𑀦𑀺𑀧𑀦𑁆𑀦𑀓𑁄 𑀲𑀦𑁆𑀢𑁄, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁.

𑁧𑁮. ‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀢𑁆𑀢𑀫𑀁;

𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁧𑁯. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀯𑀦𑁆𑀤𑀺𑀁 𑀧𑀼𑀭𑀺𑀲𑀼𑀢𑁆𑀢𑀫𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀯𑀦𑁆𑀤𑀦𑀸𑀬 𑀇𑀤𑀁 𑀨𑀮𑀁.

𑁨𑁦. ‘‘𑀇𑀢𑁄 𑀧𑀜𑁆𑀘𑀫𑀓𑁂 𑀓𑀧𑁆𑀧𑁂, 𑀧𑀜𑁆𑀘𑁂𑀯𑀸𑀲𑀼𑀁 𑀫𑀳𑀸𑀲𑀺𑀔𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁨𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀺𑀧𑀦𑁆𑀦𑀜𑁆𑀚𑀮𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀺𑀧𑀦𑁆𑀦𑀜𑁆𑀚𑀮𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀅𑀥𑁄𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁨. ‘‘𑀅𑀪𑀺𑀪𑀽 𑀦𑀸𑀫 𑀲𑁄 𑀪𑀺𑀓𑁆𑀔𑀼, 𑀲𑀺𑀔𑀺𑀦𑁄 𑀅𑀕𑁆𑀕𑀲𑀸𑀯𑀓𑁄;

𑀫𑀳𑀸𑀦𑀼𑀪𑀸𑀯𑁄 𑀢𑁂𑀯𑀺𑀚𑁆𑀚𑁄, 𑀳𑀺𑀫𑀯𑀦𑁆𑀢𑀁 𑀉𑀧𑀸𑀕𑀫𑀺.

𑁨𑁩. ‘‘𑀅𑀳𑀫𑁆𑀧𑀺 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀭𑀫𑀡𑀻𑀬𑀲𑁆𑀲𑀫𑁂 𑀇𑀲𑀺;

𑀯𑀲𑀸𑀫𑀺 𑀅𑀧𑁆𑀧𑀫𑀜𑁆𑀜𑀸𑀲𑀼, 𑀇𑀤𑁆𑀥𑀻𑀲𑀼 𑀘 𑀢𑀤𑀸 𑀯𑀲𑀻.

𑁨𑁪. ‘‘𑀧𑀓𑁆𑀔𑀺𑀚𑀸𑀢𑁄 𑀯𑀺𑀬𑀸𑀓𑀸𑀲𑁂, 𑀧𑀩𑁆𑀩𑀢𑀁 𑀅𑀥𑀺𑀯𑀢𑁆𑀢𑀬𑀺𑀁 [𑀅𑀪𑀺𑀧𑀢𑁆𑀣𑀬𑀺𑀁 (𑀲𑁆𑀬𑀸.), 𑀅𑀪𑀺𑀫𑀢𑁆𑀣𑀬𑀺𑀁 (𑀓.), 𑀅𑀥𑀺𑀯𑀢𑁆𑀣𑀬𑀺𑀦𑁆𑀢𑀺 𑀧𑀩𑁆𑀩𑀢𑀲𑁆𑀲 𑀉𑀧𑀭𑀺 𑀕𑀘𑁆𑀙𑀺𑀦𑁆𑀢𑀺𑀅𑀢𑁆𑀣𑁄];

𑀅𑀥𑁄𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦, 𑀆𑀕𑀘𑁆𑀙𑀺𑀁 [𑀅𑀕𑀘𑁆𑀙𑀺𑀁 (𑀓.)] 𑀧𑀩𑁆𑀩𑀢𑀁 𑀅𑀳𑀁.

𑁨𑁫. ‘‘𑀲𑀢𑁆𑀢 𑀧𑀼𑀧𑁆𑀨𑀸𑀦𑀺 𑀕𑀡𑁆𑀳𑀺𑀢𑁆𑀯𑀸, 𑀫𑀢𑁆𑀣𑀓𑁂 𑀑𑀓𑀺𑀭𑀺𑀁 𑀅𑀳𑀁;

𑀆𑀮𑁄𑀓𑀺𑀢𑁂 [𑀆𑀮𑁄𑀓𑀺𑀢𑁄 (𑀲𑁆𑀬𑀸.)] 𑀘 𑀯𑀻𑀭𑁂𑀦, 𑀧𑀓𑁆𑀓𑀸𑀫𑀺𑀁 𑀧𑀸𑀘𑀺𑀦𑀸𑀫𑀼𑀔𑁄.

𑁨𑁬. ‘‘𑀆𑀯𑀸𑀲𑀁 𑀅𑀪𑀺𑀲𑀫𑁆𑀪𑁄𑀲𑀺𑀁, 𑀧𑀢𑁆𑀯𑀸𑀦 𑀅𑀲𑁆𑀲𑀫𑀁 𑀅𑀳𑀁;

𑀔𑀸𑀭𑀺𑀪𑀸𑀭𑀁 𑀕𑀳𑁂𑀢𑁆𑀯𑀸𑀦, 𑀧𑀸𑀬𑀸𑀲𑀺𑀁 [𑀧𑀸𑀯𑀺𑀲𑀺𑀁 (𑀲𑀻.)] 𑀧𑀩𑁆𑀩𑀢𑀦𑁆𑀢𑀭𑀁.

𑁨𑁭. ‘‘𑀅𑀚𑀕𑀭𑁄 𑀫𑀁 𑀧𑀻𑀴𑁂𑀲𑀺, 𑀖𑁄𑀭𑀭𑀽𑀧𑁄 𑀫𑀳𑀩𑁆𑀩𑀮𑁄;

𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁨𑁮. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀥𑁄𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀥𑁄𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀭𑀁𑀲𑀺𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁦. ‘‘𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀯𑀸𑀲𑀁 𑀓𑀧𑁆𑀧𑁂𑀲𑀳𑀁 𑀧𑀼𑀭𑁂;

𑀅𑀚𑀺𑀦𑀼𑀢𑁆𑀢𑀭𑀯𑀸𑀲𑁄𑀳𑀁, 𑀯𑀲𑀸𑀫𑀺 𑀧𑀩𑁆𑀩𑀢𑀦𑁆𑀢𑀭𑁂.

𑁩𑁧. ‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀲𑀢𑀭𑀁𑀲𑀺𑀁𑀯 𑀪𑀸𑀡𑀼𑀫𑀁;

𑀯𑀦𑀦𑁆𑀢𑀭𑀕𑀢𑀁 𑀤𑀺𑀲𑁆𑀯𑀸, 𑀲𑀸𑀮𑀭𑀸𑀚𑀁𑀯 𑀧𑀼𑀧𑁆𑀨𑀺𑀢𑀁.

𑁩𑁨. ‘‘𑀭𑀁𑀲𑁆𑀬𑀸 [𑀭𑀁𑀲𑁂 (𑀲𑁆𑀬𑀸. 𑀓.)] 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄;

𑀧𑀕𑁆𑀕𑀬𑁆𑀳 𑀅𑀜𑁆𑀚𑀮𑀺𑀁 𑀯𑀦𑁆𑀤𑀺𑀁, 𑀲𑀺𑀭𑀲𑀸 𑀉𑀓𑁆𑀓𑀼𑀝𑀻 [𑀲𑀺𑀭𑀲𑀸 𑀉𑀓𑁆𑀓𑀼𑀝𑀺𑀓𑁄 (𑀲𑁆𑀬𑀸.), 𑀲𑀺𑀭𑀲𑀼𑀓𑁆𑀓𑀼𑀝𑀺𑀓𑁄 (𑀓.)] 𑀅𑀳𑀁.

𑁩𑁩. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀭𑀁𑀲𑀺𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁩𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀭𑀁𑀲𑀺𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀭𑀁𑀲𑀺𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀭𑀁𑀲𑀺𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁫. ‘‘𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀯𑀸𑀓𑀘𑀻𑀭𑀥𑀭𑁄 𑀅𑀳𑀁;

𑀘𑀗𑁆𑀓𑀫𑀜𑁆𑀘 𑀲𑀫𑀸𑀭𑀽𑀴𑁆𑀳𑁄, 𑀦𑀺𑀲𑀻𑀤𑀺𑀁 𑀧𑀸𑀘𑀺𑀦𑀸𑀫𑀼𑀔𑁄.

𑁩𑁬. ‘‘𑀧𑀩𑁆𑀩𑀢𑁂 𑀲𑀼𑀕𑀢𑀁 𑀤𑀺𑀲𑁆𑀯𑀸, 𑀨𑀼𑀲𑁆𑀲𑀁 𑀛𑀸𑀦𑀭𑀢𑀁 𑀢𑀤𑀸;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀭𑀁𑀲𑁆𑀬𑀸 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁩𑁭. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀭𑀁𑀲𑀺𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁩𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀭𑀁𑀲𑀺𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀤𑀼𑀢𑀺𑀬𑀭𑀁𑀲𑀺𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁯. ‘‘𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀔𑀭𑀸𑀚𑀺𑀦𑀥𑀭𑁄 𑀅𑀳𑀁;

𑀨𑀼𑀲𑁆𑀲𑀁 𑀚𑀺𑀦𑀯𑀭𑀁 𑀤𑀺𑀲𑁆𑀯𑀸, 𑀨𑀮𑀳𑀢𑁆𑀣𑁄 𑀨𑀮𑀁 𑀅𑀤𑀁.

𑁪𑁦. ‘‘𑀬𑀫𑀳𑀁 𑀨𑀮𑀫𑀤𑀸𑀲𑀺𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀳𑀺, 𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑁂 𑀫𑀫.

𑁪𑁧. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀲𑀤𑁆𑀤𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁩. ‘‘𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀯𑀲𑀸𑀫𑀺 𑀧𑀡𑁆𑀡𑀲𑀦𑁆𑀣𑀭𑁂;

𑀨𑀼𑀲𑁆𑀲𑀲𑁆𑀲 𑀥𑀫𑁆𑀫𑀁 𑀪𑀡𑀢𑁄, 𑀲𑀤𑁆𑀤𑁂 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁪𑁪. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁪𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀤𑁆𑀤𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀤𑁆𑀤𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀩𑁄𑀥𑀺𑀲𑀺𑀜𑁆𑀘𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁬. ‘‘𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄, 𑀫𑀳𑀸𑀩𑁄𑀥𑀺𑀫𑀳𑁄 𑀅𑀳𑀼;

𑀧𑀩𑁆𑀩𑀚𑁆𑀚𑀼𑀧𑀕𑀢𑁄 𑀲𑀦𑁆𑀢𑁄, 𑀉𑀧𑀕𑀘𑁆𑀙𑀺𑀁 𑀅𑀳𑀁 𑀢𑀤𑀸.

𑁪𑁭. ‘‘𑀓𑀼𑀲𑀼𑀫𑁄𑀤𑀓𑀫𑀸𑀤𑀸𑀬, 𑀩𑁄𑀥𑀺𑀬𑀸 𑀑𑀓𑀺𑀭𑀺𑀁 𑀅𑀳𑀁;

𑀫𑁄𑀘𑀬𑀺𑀲𑁆𑀲𑀢𑀺 𑀦𑁄 𑀫𑀼𑀢𑁆𑀢𑁄, 𑀦𑀺𑀩𑁆𑀩𑀸𑀧𑁂𑀲𑁆𑀲𑀢𑀺 𑀦𑀺𑀩𑁆𑀩𑀼𑀢𑁄.

𑁪𑁮. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑁄𑀥𑀺𑀫𑀪𑀺𑀲𑀺𑀜𑁆𑀘𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑁄𑀥𑀺𑀲𑀺𑀜𑁆𑀘𑀸𑀬𑀺𑀤𑀁 𑀨𑀮𑀁.

𑁪𑁯. ‘‘𑀢𑁂𑀢𑁆𑀢𑀺𑀁𑀲𑁂 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀓𑀧𑁆𑀧𑁂 𑀆𑀲𑀼𑀁 𑀚𑀦𑀸𑀥𑀺𑀧𑀸;

𑀉𑀤𑀓𑀲𑁂𑀘𑀦𑀸 𑀦𑀸𑀫, 𑀅𑀝𑁆𑀞𑁂𑀢𑁂 𑀘𑀓𑁆𑀓𑀯𑀢𑁆𑀢𑀺𑀦𑁄.

𑁫𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑁄𑀥𑀺𑀲𑀺𑀜𑁆𑀘𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑁄𑀥𑀺𑀲𑀺𑀜𑁆𑀘𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀧𑀤𑀼𑀫𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁧. ‘‘𑀧𑁄𑀓𑁆𑀔𑀭𑀯𑀦𑀁 𑀧𑀯𑀺𑀝𑁆𑀞𑁄, 𑀪𑀜𑁆𑀚𑀦𑁆𑀢𑁄 𑀧𑀤𑀼𑀫𑀸𑀦𑀺𑀳𑀁;

𑀢𑀢𑁆𑀣𑀤𑁆𑀤𑀲𑀁 𑀨𑀼𑀲𑁆𑀲𑀁 𑀩𑀼𑀤𑁆𑀥𑀁 [𑀅𑀤𑁆𑀤𑀲𑀁 𑀨𑀼𑀲𑁆𑀲𑀲𑀫𑁆𑀩𑀼𑀤𑁆𑀥𑀁 (𑀲𑀻. 𑀲𑁆𑀬𑀸.)], 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀁.

𑁫𑁨. ‘‘𑀧𑀤𑀼𑀫𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦, 𑀆𑀓𑀸𑀲𑁂 𑀉𑀓𑁆𑀔𑀺𑀧𑀺𑀁 𑀅𑀳𑀁;

𑀧𑀸𑀧𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁫𑁩. ‘‘𑀧𑀩𑁆𑀩𑀚𑀺𑀢𑁆𑀯𑀸𑀦 𑀓𑀸𑀬𑁂𑀦, 𑀫𑀦𑀲𑀸 𑀲𑀁𑀯𑀼𑀢𑁂𑀦 𑀘;

𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀆𑀚𑀻𑀯𑀁 𑀧𑀭𑀺𑀲𑁄𑀥𑀬𑀺𑀁.

𑁫𑁪. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁫𑁫. ‘‘𑀧𑀤𑀼𑀫𑀸𑀪𑀸𑀲𑀦𑀸𑀫𑀸 𑀘, 𑀅𑀝𑁆𑀞𑀸𑀭𑀲 𑀫𑀳𑀻𑀧𑀢𑀻;

𑀅𑀝𑁆𑀞𑀸𑀭𑀲𑁂𑀲𑀼 𑀓𑀧𑁆𑀧𑁂𑀲𑀼, 𑀅𑀝𑁆𑀞𑀢𑀸𑀮𑀻𑀲𑀫𑀸𑀲𑀺𑀲𑀼𑀁.

𑁫𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀤𑀼𑀫𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀧𑀤𑀼𑀫𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀢𑀺𑀫𑀺𑀭𑀯𑀕𑁆𑀕𑁄 𑀦𑀯𑀫𑁄.