𑁧𑁦. 𑀲𑀼𑀥𑀸𑀯𑀕𑁆𑀕𑁄

𑁧. 𑀲𑀼𑀥𑀸𑀧𑀺𑀡𑁆𑀟𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀽𑀚𑀸𑀭𑀳𑁂 𑀧𑀽𑀚𑀬𑀢𑁄, 𑀩𑀼𑀤𑁆𑀥𑁂 𑀬𑀤𑀺 𑀯 𑀲𑀸𑀯𑀓𑁂;

𑀧𑀧𑀜𑁆𑀘𑀲𑀫𑀢𑀺𑀓𑁆𑀓𑀦𑁆𑀢𑁂, 𑀢𑀺𑀡𑁆𑀡𑀲𑁄𑀓𑀧𑀭𑀺𑀤𑁆𑀤𑀯𑁂.

𑁨. ‘‘𑀢𑁂 𑀢𑀸𑀤𑀺𑀲𑁂 𑀧𑀽𑀚𑀬𑀢𑁄, 𑀦𑀺𑀩𑁆𑀩𑀼𑀢𑁂 𑀅𑀓𑀼𑀢𑁄𑀪𑀬𑁂;

𑀦 𑀲𑀓𑁆𑀓𑀸 𑀧𑀼𑀜𑁆𑀜𑀁 𑀲𑀗𑁆𑀔𑀸𑀢𑀼𑀁, 𑀇𑀫𑁂𑀢𑁆𑀢𑀫𑀧𑀺 [𑀇𑀤𑀫𑁆𑀫𑀢𑁆𑀢𑀦𑁆𑀢𑀺 (𑀲𑀻.), 𑀇𑀫𑁂𑀢𑁆𑀣𑀫𑀧𑀺 (𑀓.)] 𑀓𑁂𑀦𑀘𑀺.

𑁩. ‘‘𑀘𑀢𑀼𑀦𑁆𑀦𑀫𑀧𑀺 𑀤𑀻𑀧𑀸𑀦𑀁, 𑀇𑀲𑁆𑀲𑀭𑀁 𑀬𑁄𑀥 𑀓𑀸𑀭𑀬𑁂;

𑀏𑀓𑀺𑀲𑁆𑀲𑀸 𑀧𑀽𑀚𑀦𑀸𑀬𑁂𑀢𑀁, 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀁.

𑁪. ‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀦𑀭𑀕𑁆𑀕𑀲𑁆𑀲, 𑀘𑁂𑀢𑀺𑀬𑁂 𑀨𑀮𑀺𑀢𑀦𑁆𑀢𑀭𑁂;

𑀲𑀼𑀥𑀸𑀧𑀺𑀡𑁆𑀟𑁄 𑀫𑀬𑀸 𑀤𑀺𑀦𑁆𑀦𑁄, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁫. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀝𑀺𑀲𑀗𑁆𑀔𑀸𑀭𑀲𑁆𑀲𑀺𑀤𑀁 𑀨𑀮𑀁.

𑁬. ‘‘𑀇𑀢𑁄 𑀢𑀺𑀁𑀲𑀢𑀺𑀓𑀧𑁆𑀧𑀫𑁆𑀳𑀺, 𑀧𑀝𑀺𑀲𑀗𑁆𑀔𑀸𑀭𑀲𑀯𑁆𑀳𑀬𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀢𑁂𑀭𑀲 𑀘𑀓𑁆𑀓𑀯𑀢𑁆𑀢𑀺𑀦𑁄.

𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀥𑀸𑀧𑀺𑀡𑁆𑀟𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀥𑀸𑀧𑀺𑀡𑁆𑀟𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀲𑀼𑀘𑀺𑀦𑁆𑀢𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁮. ‘‘𑀢𑀺𑀲𑁆𑀲𑀲𑁆𑀲 𑀮𑁄𑀓𑀦𑀸𑀣𑀲𑁆𑀲, 𑀲𑀼𑀤𑁆𑀥𑀧𑀻𑀞𑀫𑀤𑀸𑀲𑀳𑀁;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀩𑀼𑀤𑁆𑀥𑀲𑁆𑀲𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑁄.

𑁯. ‘‘𑀅𑀝𑁆𑀞𑀸𑀭𑀲𑁂 [𑀅𑀝𑁆𑀞𑀢𑀺𑀁𑀲𑁂 (𑀲𑀻. 𑀲𑁆𑀬𑀸.)] 𑀇𑀢𑁄 𑀓𑀧𑁆𑀧𑁂, 𑀭𑀸𑀚𑀸 𑀆𑀲𑀺𑀁 𑀫𑀳𑀸𑀭𑀼𑀘𑀺;

𑀪𑁄𑀕𑁄 𑀘 𑀯𑀺𑀧𑀼𑀮𑁄 𑀆𑀲𑀺, 𑀲𑀬𑀦𑀜𑁆𑀘 𑀅𑀦𑀧𑁆𑀧𑀓𑀁.

𑁧𑁦. ‘‘𑀧𑀻𑀞𑀁 𑀩𑀼𑀤𑁆𑀥𑀲𑁆𑀲 𑀤𑀢𑁆𑀯𑀸𑀦, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀅𑀦𑀼𑀪𑁄𑀫𑀺 𑀲𑀓𑀁 𑀓𑀫𑁆𑀫𑀁, 𑀧𑀼𑀩𑁆𑀩𑁂 𑀲𑀼𑀓𑀢𑀫𑀢𑁆𑀢𑀦𑁄.

𑁧𑁧. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀻𑀞𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀻𑀞𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁨. ‘‘𑀅𑀝𑁆𑀞𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀢𑀬𑁄 𑀢𑁂 𑀘𑀓𑁆𑀓𑀯𑀢𑁆𑀢𑀺𑀦𑁄;

𑀭𑀼𑀘𑀺 𑀉𑀧𑀭𑀼𑀘𑀺 𑀘𑁂𑀯, 𑀫𑀳𑀸𑀭𑀼𑀘𑀺 𑀢𑀢𑀺𑀬𑀓𑁄.

𑁧𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀘𑀺𑀦𑁆𑀢𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀘𑀺𑀦𑁆𑀢𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀅𑀟𑁆𑀠𑀘𑁂𑀴𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁪. ‘‘𑀢𑀺𑀲𑁆𑀲𑀲𑁆𑀲𑀸𑀳𑀁 𑀪𑀕𑀯𑀢𑁄, 𑀉𑀧𑀟𑁆𑀠𑀤𑀼𑀲𑁆𑀲𑀫𑀤𑀸𑀲𑀳𑀁;

𑀧𑀭𑀫𑀓𑀸𑀧𑀜𑁆𑀜𑀧𑀢𑁆𑀢𑁄𑀫𑁆𑀳𑀺 [𑀧𑀭𑀫𑀓𑀸𑀭𑀼𑀜𑁆𑀜𑀧𑀢𑁆𑀢𑁄𑀫𑁆𑀳𑀺 (𑀲𑁆𑀬𑀸. 𑀓.)], 𑀤𑀼𑀕𑁆𑀕𑀢𑁂𑀦 [𑀤𑀼𑀕𑁆𑀕𑀦𑁆𑀥𑁂𑀦 (𑀲𑀻.)] 𑀲𑀫𑀧𑁆𑀧𑀺𑀢𑁄.

𑁧𑁫. ‘‘𑀉𑀧𑀟𑁆𑀠𑀤𑀼𑀲𑁆𑀲𑀁 𑀤𑀢𑁆𑀯𑀸𑀦, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀳𑀁;

𑀅𑀯𑀲𑁂𑀲𑁂𑀲𑀼 𑀓𑀧𑁆𑀧𑁂𑀲𑀼, 𑀓𑀼𑀲𑀮𑀁 𑀓𑀸𑀭𑀺𑀢𑀁 𑀫𑀬𑀸.

𑁧𑁬. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀤𑀼𑀲𑁆𑀲𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀤𑀼𑀲𑁆𑀲𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁭. ‘‘𑀏𑀓𑀽𑀦𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺 [𑀏𑀓𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺 (𑀲𑁆𑀬𑀸.)], 𑀭𑀸𑀚𑀸𑀦𑁄 𑀘𑀓𑁆𑀓𑀯𑀢𑁆𑀢𑀺𑀦𑁄;

𑀲𑀫𑀦𑁆𑀢𑀘𑁆𑀙𑀤𑀦𑀸 𑀦𑀸𑀫, 𑀩𑀸𑀢𑁆𑀢𑀺𑀁𑀲𑀸𑀲𑀼𑀁 [𑀔𑀢𑁆𑀢𑀺𑀬𑀸𑀲𑀼𑀁 (𑀲𑁆𑀬𑀸. 𑀓.)] 𑀚𑀦𑀸𑀥𑀺𑀧𑀸.

𑁧𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀟𑁆𑀠𑀘𑁂𑀴𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀟𑁆𑀠𑀘𑁂𑀴𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀲𑀽𑀘𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁯. ‘‘𑀓𑀫𑁆𑀫𑀸𑀭𑁄𑀳𑀁 𑀧𑀼𑀭𑁂 𑀆𑀲𑀺𑀁, 𑀩𑀦𑁆𑀥𑀼𑀫𑀸𑀬𑀁 𑀧𑀼𑀭𑀼𑀢𑁆𑀢𑀫𑁂;

𑀲𑀽𑀘𑀺𑀤𑀸𑀦𑀁 𑀫𑀬𑀸 𑀤𑀺𑀦𑁆𑀦𑀁, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁦. ‘‘𑀯𑀚𑀺𑀭𑀕𑁆𑀕𑀲𑀫𑀁 𑀜𑀸𑀡𑀁, 𑀳𑁄𑀢𑀺 𑀓𑀫𑁆𑀫𑁂𑀦 𑀢𑀸𑀤𑀺𑀲𑀁;

𑀯𑀺𑀭𑀸𑀕𑁄𑀫𑁆𑀳𑀺 𑀯𑀺𑀫𑀼𑀢𑁆𑀢𑁄𑀫𑁆𑀳𑀺 [𑀯𑀺𑀪𑀯𑁄𑀫𑁆𑀳𑀺 𑀯𑀺𑀪𑀢𑁆𑀢𑁄𑀫𑁆𑀳𑀺 (𑀓.)], 𑀧𑀢𑁆𑀢𑁄𑀫𑁆𑀳𑀺 𑀆𑀲𑀯𑀓𑁆𑀔𑀬𑀁.

𑁨𑁧. ‘‘𑀅𑀢𑀻𑀢𑁂 𑀘 𑀪𑀯𑁂 𑀲𑀩𑁆𑀩𑁂, 𑀯𑀢𑁆𑀢𑀫𑀸𑀦𑁂 𑀘𑀦𑀸𑀕𑀢𑁂 [𑀅𑀢𑀻𑀢𑀸 𑀘 𑀪𑀯𑀸 𑀲𑀩𑁆𑀩𑁂, 𑀯𑀢𑁆𑀢𑀫𑀸𑀦𑀸 𑀘’𑀦𑀸𑀕𑀢𑀸 (𑀲𑁆𑀬𑀸. 𑀓.)];

𑀜𑀸𑀡𑁂𑀦 𑀯𑀺𑀘𑀺𑀦𑀺𑀁 𑀲𑀩𑁆𑀩𑀁, 𑀲𑀽𑀘𑀺𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁨. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀲𑀢𑁆𑀢𑀸𑀲𑀼𑀁 𑀯𑀚𑀺𑀭𑀯𑁆𑀳𑀬𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁨𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀽𑀘𑀺𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀽𑀘𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀕𑀦𑁆𑀥𑀫𑀸𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁪. ‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀕𑀦𑁆𑀥𑀣𑀽𑀧𑀁 𑀅𑀓𑀸𑀲𑀳𑀁;

𑀲𑀼𑀫𑀦𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀁, 𑀩𑀼𑀤𑁆𑀥𑀸𑀦𑀼𑀘𑁆𑀙𑀯𑀺𑀓𑀁 𑀓𑀢𑀁.

𑁨𑁫. ‘‘𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑀁, 𑀩𑀼𑀤𑁆𑀥𑀁 𑀮𑁄𑀓𑀕𑁆𑀕𑀦𑀸𑀬𑀓𑀁;

𑀇𑀦𑁆𑀤𑀻𑀯𑀭𑀁𑀯 𑀚𑀮𑀺𑀢𑀁, 𑀆𑀤𑀺𑀢𑁆𑀢𑀁𑀯 𑀳𑀼𑀢𑀸𑀲𑀦𑀁.

𑁨𑁬. ‘‘𑀩𑁆𑀬𑀕𑁆𑀖𑀽𑀲𑀪𑀁𑀯 𑀧𑀯𑀭𑀁, 𑀅𑀪𑀺𑀚𑀸𑀢𑀁𑀯 𑀓𑁂𑀲𑀭𑀺𑀁;

𑀦𑀺𑀲𑀺𑀦𑁆𑀦𑀁 𑀲𑀫𑀡𑀸𑀦𑀕𑁆𑀕𑀁, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁.

𑁨𑁭. ‘‘𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀧𑀓𑁆𑀓𑀸𑀫𑀺𑀁 𑀉𑀢𑁆𑀢𑀭𑀸𑀫𑀼𑀔𑁄;

𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀕𑀦𑁆𑀥𑀫𑀸𑀮𑀁 𑀬𑀢𑁄 𑀅𑀤𑀁.

𑁨𑁮. ‘‘𑀩𑀼𑀤𑁆𑀥𑁂 𑀓𑀢𑀲𑁆𑀲 𑀓𑀸𑀭𑀲𑁆𑀲, 𑀨𑀮𑁂𑀦𑀸𑀳𑀁 𑀯𑀺𑀲𑁂𑀲𑀢𑁄;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁯. ‘‘𑀘𑀢𑁆𑀢𑀸𑀭𑀻𑀲𑀫𑁆𑀳𑀺 𑀏𑀓𑀽𑀦𑁂, 𑀓𑀧𑁆𑀧𑁂 𑀆𑀲𑀺𑀁𑀲𑀼 𑀲𑁄𑀴𑀲;

𑀤𑁂𑀯𑀕𑀦𑁆𑀥𑀲𑀦𑀸𑀫𑀸 𑀢𑁂, 𑀭𑀸𑀚𑀸𑀦𑁄 𑀘𑀓𑁆𑀓𑀯𑀢𑁆𑀢𑀺𑀦𑁄.

𑁩𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀕𑀦𑁆𑀥𑀫𑀸𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀕𑀦𑁆𑀥𑀫𑀸𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀢𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁧. ‘‘𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀁, 𑀅𑀭𑀜𑁆𑀜𑁂 𑀓𑀸𑀦𑀦𑁂 𑀅𑀳𑀁 [𑀩𑁆𑀭𑀳𑀸 (𑀲𑁆𑀬𑀸.)];

𑀧𑀸𑀝𑀮𑀺𑀁 𑀳𑀭𑀺𑀢𑀁 𑀤𑀺𑀲𑁆𑀯𑀸, 𑀢𑀻𑀡𑀺 𑀧𑀼𑀧𑁆𑀨𑀸𑀦𑀺 𑀑𑀓𑀺𑀭𑀺𑀁.

𑁩𑁨. ‘‘𑀧𑀢𑀺𑀢𑀧𑀢𑁆𑀢𑀸𑀦𑀺 [𑀲𑀢𑁆𑀢𑀧𑀢𑁆𑀢𑀸𑀦𑀺 (𑀲𑀻.), 𑀲𑀢𑀧𑀢𑁆𑀢𑀸𑀦𑀺 (𑀓.), 𑀲𑀼𑀓𑁆𑀔𑀧𑀡𑁆𑀡𑀸𑀦𑀺 (𑀲𑁆𑀬𑀸.)] 𑀕𑀡𑁆𑀳𑀺𑀢𑁆𑀯𑀸, 𑀩𑀳𑀺 𑀙𑀟𑁆𑀟𑁂𑀲𑀳𑀁 𑀢𑀤𑀸;

𑀅𑀦𑁆𑀢𑁄𑀲𑀼𑀤𑁆𑀥𑀁 𑀩𑀳𑀺𑀲𑀼𑀤𑁆𑀥𑀁, 𑀲𑀼𑀯𑀺𑀫𑀼𑀢𑁆𑀢𑀁 𑀅𑀦𑀸𑀲𑀯𑀁.

𑁩𑁩. ‘‘𑀲𑀫𑁆𑀫𑀼𑀔𑀸 𑀯𑀺𑀬 𑀲𑀫𑁆𑀩𑀼𑀤𑁆𑀥𑀁, 𑀯𑀺𑀧𑀲𑁆𑀲𑀺𑀁 𑀮𑁄𑀓𑀦𑀸𑀬𑀓𑀁;

𑀧𑀸𑀝𑀮𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁩𑁪. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑁄𑀥𑀺𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑁄𑀥𑀺𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁫. ‘‘𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀦𑀸𑀫, 𑀢𑁂𑀭𑀲𑀸𑀲𑀺𑀁𑀲𑀼 𑀭𑀸𑀚𑀺𑀦𑁄;

𑀇𑀢𑁄 𑀢𑁂𑀢𑁆𑀢𑀺𑀁𑀲𑀓𑀧𑁆𑀧𑀫𑁆𑀳𑀺 [𑀢𑀺𑀁𑀲𑀢𑀺𑀓𑀧𑁆𑀧𑀫𑁆𑀳𑀺 (𑀲𑁆𑀬𑀸.)], 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁩𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀫𑀥𑀼𑀧𑀺𑀡𑁆𑀟𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁭. ‘‘𑀯𑀺𑀧𑀺𑀦𑁂 [𑀯𑀺𑀯𑀦𑁂 (𑀲𑁆𑀬𑀸. 𑀅𑀝𑁆𑀞.)] 𑀓𑀸𑀦𑀦𑁂 𑀤𑀺𑀲𑁆𑀯𑀸, 𑀅𑀧𑁆𑀧𑀲𑀤𑁆𑀤𑁂 𑀦𑀺𑀭𑀸𑀓𑀼𑀮𑁂;

𑀲𑀺𑀤𑁆𑀥𑀢𑁆𑀣𑀁 𑀇𑀲𑀺𑀦𑀁 𑀲𑁂𑀝𑁆𑀞𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁.

𑁩𑁮. ‘‘𑀦𑀺𑀩𑁆𑀩𑀼𑀢𑀢𑁆𑀢𑀁 [𑀦𑀺𑀩𑁆𑀩𑀼𑀢𑀕𑁆𑀕𑀁 (𑀓.), 𑀦𑀺𑀩𑁆𑀩𑀽𑀢𑀺𑀓𑀁 (𑀲𑁆𑀬𑀸.)] 𑀫𑀳𑀸𑀦𑀸𑀕𑀁, 𑀦𑀺𑀲𑀪𑀸𑀚𑀸𑀦𑀺𑀬𑀁 𑀬𑀣𑀸;

𑀑𑀲𑀥𑀺𑀁𑀯 𑀯𑀺𑀭𑁄𑀘𑀦𑁆𑀢𑀁, 𑀤𑁂𑀯𑀲𑀗𑁆𑀖𑀦𑀫𑀲𑁆𑀲𑀺𑀢𑀁.

𑁩𑁯. ‘‘𑀯𑀺𑀢𑁆𑀢𑀺 𑀫𑀫𑀸𑀳𑀼 𑀢𑀸𑀯𑀤𑁂 [𑀯𑀺𑀢𑁆𑀢𑀺 𑀫𑁂 𑀧𑀸𑀳𑀼𑀦𑀸 𑀢𑀸𑀯 (𑀲𑀻. 𑀲𑁆𑀬𑀸.)], 𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀢𑀸𑀯𑀤𑁂;

𑀯𑀼𑀝𑁆𑀞𑀺𑀢𑀲𑁆𑀲 𑀲𑀫𑀸𑀥𑀺𑀫𑁆𑀳𑀸, 𑀫𑀥𑀼𑀁 𑀤𑀢𑁆𑀯𑀸𑀦 𑀲𑀢𑁆𑀣𑀼𑀦𑁄.

𑁪𑁦. ‘‘𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀧𑀓𑁆𑀓𑀸𑀫𑀺𑀁 𑀧𑀸𑀘𑀺𑀦𑀸𑀫𑀼𑀔𑁄;

𑀘𑀢𑀼𑀢𑁆𑀢𑀺𑀁𑀲𑀫𑁆𑀳𑀺 𑀓𑀧𑁆𑀧𑀫𑁆𑀳𑀺, 𑀭𑀸𑀚𑀸 𑀆𑀲𑀺𑀁 𑀲𑀼𑀤𑀲𑁆𑀲𑀦𑁄.

𑁪𑁧. ‘‘𑀫𑀥𑀼 𑀪𑀺𑀲𑁂𑀳𑀺 𑀲𑀯𑀢𑀺, 𑀪𑁄𑀚𑀦𑀫𑁆𑀳𑀺 𑀘 𑀢𑀸𑀯𑀤𑁂;

𑀫𑀥𑀼𑀯𑀲𑁆𑀲𑀁 𑀧𑀯𑀲𑁆𑀲𑀺𑀢𑁆𑀣, 𑀧𑀼𑀩𑁆𑀩𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁪𑁨. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀫𑀥𑀼𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀫𑀥𑀼𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁩. ‘‘𑀘𑀢𑀼𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀘𑀢𑁆𑀢𑀸𑀭𑁄 𑀢𑁂 𑀲𑀼𑀤𑀲𑁆𑀲𑀦𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁪𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀥𑀼𑀧𑀺𑀡𑁆𑀟𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀥𑀼𑀧𑀺𑀡𑁆𑀟𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀲𑁂𑀦𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁫. ‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀅𑀤𑀸𑀲𑀺𑀁 𑀧𑀡𑁆𑀡𑀲𑀦𑁆𑀣𑀭𑀁;

𑀲𑀫𑀦𑁆𑀢𑀸 𑀉𑀧𑀳𑀸𑀭𑀜𑁆𑀘, 𑀓𑀼𑀲𑀼𑀫𑀁 𑀑𑀓𑀺𑀭𑀺𑀁 𑀅𑀳𑀁.

𑁪𑁬. ‘‘𑀧𑀸𑀲𑀸𑀤𑁂𑀯𑀁 𑀕𑀼𑀡𑀁 𑀭𑀫𑁆𑀫𑀁 [𑀧𑀸𑀲𑀸𑀤𑁂 𑀘 𑀕𑀼𑀳𑀁 𑀭𑀫𑁆𑀫𑀁 (𑀲𑁆𑀬𑀸.)], 𑀅𑀦𑀼𑀪𑁄𑀫𑀺 𑀫𑀳𑀸𑀭𑀳𑀁;

𑀫𑀳𑀕𑁆𑀖𑀸𑀦𑀺 𑀘 𑀧𑀼𑀧𑁆𑀨𑀸𑀦𑀺, 𑀲𑀬𑀦𑁂𑀪𑀺𑀲𑀯𑀦𑁆𑀢𑀺 𑀫𑁂.

𑁪𑁭. ‘‘𑀲𑀬𑀦𑁂𑀳𑀁 𑀢𑀼𑀯𑀝𑁆𑀝𑀸𑀫𑀺, 𑀯𑀺𑀘𑀺𑀢𑁆𑀢𑁂 𑀧𑀼𑀧𑁆𑀨𑀲𑀦𑁆𑀣𑀢𑁂;

𑀧𑀼𑀧𑁆𑀨𑀯𑀼𑀝𑁆𑀞𑀺 𑀘 𑀲𑀬𑀦𑁂, 𑀅𑀪𑀺𑀯𑀲𑁆𑀲𑀢𑀺 𑀢𑀸𑀯𑀤𑁂.

𑁪𑁮. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀅𑀤𑀸𑀲𑀺𑀁 𑀧𑀡𑁆𑀡𑀲𑀦𑁆𑀣𑀭𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀦𑁆𑀣𑀭𑀲𑁆𑀲 𑀇𑀤𑀁 𑀨𑀮𑀁.

𑁪𑁯. ‘‘𑀢𑀺𑀡𑀲𑀦𑁆𑀣𑀭𑀓𑀸 𑀦𑀸𑀫, 𑀲𑀢𑁆𑀢𑁂𑀢𑁂 𑀘𑀓𑁆𑀓𑀯𑀢𑁆𑀢𑀺𑀦𑁄;

𑀇𑀢𑁄 𑀢𑁂 𑀧𑀜𑁆𑀘𑀫𑁂 𑀓𑀧𑁆𑀧𑁂, 𑀉𑀧𑁆𑀧𑀚𑁆𑀚𑀺𑀁𑀲𑀼 𑀚𑀦𑀸𑀥𑀺𑀧𑀸.

𑁫𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑁂𑀦𑀸𑀲𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑁂𑀦𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀯𑁂𑀬𑁆𑀬𑀸𑀯𑀘𑁆𑀘𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁧. ‘‘𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄, 𑀫𑀳𑀸𑀧𑀽𑀕𑀕𑀡𑁄 𑀅𑀳𑀼;

𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀆𑀲𑀺𑀁, 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀯𑀸𑀯𑀝𑁄 [𑀩𑁆𑀬𑀸𑀯𑀝𑁄 (𑀲𑀻. 𑀲𑁆𑀬𑀸.)].

𑁫𑁨. ‘‘𑀤𑁂𑀬𑁆𑀬𑀥𑀫𑁆𑀫𑁄 𑀘 𑀫𑁂 𑀦𑀢𑁆𑀣𑀺, 𑀲𑀼𑀕𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀅𑀯𑀦𑁆𑀤𑀺𑀁 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁫𑁩. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀯𑁂𑀬𑁆𑀬𑀸𑀯𑀘𑁆𑀘𑀁 𑀅𑀓𑀸𑀲𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀯𑁂𑀬𑁆𑀬𑀸𑀯𑀘𑁆𑀘𑀲𑁆𑀲𑀺𑀤𑀁 𑀨𑀮𑀁.

𑁫𑁪. ‘‘𑀇𑀢𑁄 𑀘 𑀅𑀝𑁆𑀞𑀫𑁂 𑀓𑀧𑁆𑀧𑁂, 𑀭𑀸𑀚𑀸 𑀆𑀲𑀺𑀁 𑀲𑀼𑀘𑀺𑀦𑁆𑀢𑀺𑀢𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁫𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑁂𑀬𑁆𑀬𑀸𑀯𑀘𑁆𑀘𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁬. ‘‘𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄, 𑀅𑀳𑁄𑀲𑀺𑀁 𑀲𑀗𑁆𑀔𑀥𑀫𑁆𑀫𑀓𑁄;

𑀦𑀺𑀘𑁆𑀘𑀼𑀧𑀝𑁆𑀞𑀸𑀦𑀬𑀼𑀢𑁆𑀢𑁄𑀫𑁆𑀳𑀺, 𑀲𑀼𑀕𑀢𑀲𑁆𑀲 𑀫𑀳𑁂𑀲𑀺𑀦𑁄.

𑁫𑁭. ‘‘𑀉𑀧𑀝𑁆𑀞𑀸𑀦𑀨𑀮𑀁 𑀧𑀲𑁆𑀲, 𑀮𑁄𑀓𑀦𑀸𑀣𑀲𑁆𑀲 𑀢𑀸𑀤𑀺𑀦𑁄;

𑀲𑀝𑁆𑀞𑀺𑀢𑀽𑀭𑀺𑀬𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁫𑁮. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀉𑀧𑀝𑁆𑀞𑀳𑀺𑀁 𑀫𑀳𑀸𑀇𑀲𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀧𑀝𑁆𑀞𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁯. ‘‘𑀘𑀢𑀼𑀯𑀻𑀲𑁂 [𑀘𑀢𑀼𑀦𑀯𑀼𑀢𑁂 (𑀲𑁆𑀬𑀸.)] 𑀇𑀢𑁄 𑀓𑀧𑁆𑀧𑁂, 𑀫𑀳𑀸𑀦𑀺𑀕𑁆𑀖𑁄𑀲𑀦𑀸𑀫𑀓𑀸;

𑀲𑁄𑀴𑀲𑀸𑀲𑀺𑀁𑀲𑀼 𑀭𑀸𑀚𑀸𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁬𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀲𑀼𑀥𑀸𑀯𑀕𑁆𑀕𑁄 𑀤𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀼𑀥𑀸 𑀲𑀼𑀘𑀺𑀦𑁆𑀢𑀺 𑀘𑁂𑀴𑀜𑁆𑀘, 𑀲𑀽𑀘𑀻 𑀘 𑀕𑀦𑁆𑀥𑀫𑀸𑀮𑀺𑀬𑁄;

𑀢𑀺𑀧𑀼𑀧𑁆𑀨𑀺𑀬𑁄 𑀫𑀥𑀼𑀲𑁂𑀦𑀸, 𑀯𑁂𑀬𑁆𑀬𑀸𑀯𑀘𑁆𑀘𑁄 𑀘𑀼𑀧𑀝𑁆𑀞𑀓𑁄;

𑀲𑀫𑀲𑀝𑁆𑀞𑀺 𑀘 𑀕𑀸𑀣𑀸𑀬𑁄, 𑀅𑀲𑁆𑀫𑀺𑀁 𑀯𑀕𑁆𑀕𑁂 𑀧𑀓𑀺𑀢𑁆𑀢𑀺𑀢𑀸.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀩𑀼𑀤𑁆𑀥𑀯𑀕𑁆𑀕𑁄 𑀳𑀺 𑀧𑀞𑀫𑁄, 𑀲𑀻𑀳𑀸𑀲𑀦𑀺 𑀲𑀼𑀪𑀽𑀢𑀺 𑀘;

𑀓𑀼𑀡𑁆𑀟𑀥𑀸𑀦𑁄 𑀉𑀧𑀸𑀮𑀺 𑀘, 𑀩𑀻𑀚𑀦𑀺𑀲𑀓𑀘𑀺𑀦𑁆𑀢𑀺 𑀘.