𑁯. 𑀲𑀼𑀫𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁨. ‘‘𑀲𑀼𑀫𑀦𑁄 𑀦𑀸𑀫 𑀦𑀸𑀫𑁂𑀦, 𑀫𑀸𑀮𑀸𑀓𑀸𑀭𑁄 𑀅𑀳𑀁 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀮𑁄𑀓𑀸𑀳𑀼𑀢𑀺𑀧𑀝𑀺𑀕𑁆𑀕𑀳𑀁.

𑁬𑁩. ‘‘𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀲𑀼𑀫𑀦𑀁 𑀧𑀼𑀧𑁆𑀨𑀫𑀼𑀢𑁆𑀢𑀫𑀁;

𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑁂𑀲𑀺𑀁, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄.

𑁬𑁪. ‘‘𑀇𑀫𑀸𑀬 𑀧𑀼𑀧𑁆𑀨𑀧𑀽𑀚𑀸𑀬, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁬𑁫. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 [𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 (𑀲𑀻.)] 𑀨𑀮𑀁.

𑁬𑁬. ‘‘𑀙𑀩𑁆𑀩𑀻𑀲𑀢𑀺𑀫𑁆𑀳𑀺 𑀓𑀧𑁆𑀧𑀫𑁆𑀳𑀺, 𑀘𑀢𑁆𑀢𑀸𑀭𑁄𑀲𑀼𑀁 𑀫𑀳𑀸𑀬𑀲𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀭𑀸𑀚𑀸𑀦𑁄 𑀘𑀓𑁆𑀓𑀯𑀢𑁆𑀢𑀺𑀦𑁄.

𑁬𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀫𑀦𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀫𑀦𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.