𑁭. 𑀲𑀓𑀘𑀺𑀦𑁆𑀢𑀦𑀺𑀬𑀯𑀕𑁆𑀕𑁄

𑁧. 𑀲𑀓𑀘𑀺𑀦𑁆𑀢𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀯𑀦𑀁 𑀓𑀸𑀦𑀦𑀁 𑀤𑀺𑀲𑁆𑀯𑀸, 𑀅𑀧𑁆𑀧𑀲𑀤𑁆𑀤𑀫𑀦𑁆𑀦𑀸𑀯𑀺𑀮𑀁;

𑀇𑀲𑀻𑀦𑀁 𑀅𑀦𑀼𑀘𑀺𑀡𑁆𑀡𑀁𑀯, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁.

𑁨. ‘‘𑀣𑀽𑀧𑀁 𑀓𑀢𑁆𑀯𑀸𑀦 𑀧𑀼𑀮𑀺𑀦𑀁 [𑀯𑁂𑀴𑀼𑀦𑀸 (𑀅𑀝𑁆𑀞.), 𑀯𑁂𑀴𑀺𑀦𑀁 (𑀲𑁆𑀬𑀸.)], 𑀦𑀸𑀦𑀸𑀧𑀼𑀧𑁆𑀨𑀁 𑀲𑀫𑁄𑀓𑀺𑀭𑀺𑀁;

𑀲𑀫𑁆𑀫𑀼𑀔𑀸 𑀯𑀺𑀬 𑀲𑀫𑁆𑀩𑀼𑀤𑁆𑀥𑀁, 𑀦𑀺𑀫𑁆𑀫𑀺𑀢𑀁 𑀅𑀪𑀺𑀯𑀦𑁆𑀤𑀳𑀁.

𑁩. ‘‘𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀭𑀸𑀚𑀸 𑀭𑀝𑁆𑀞𑀫𑁆𑀳𑀺 𑀇𑀲𑁆𑀲𑀭𑁄;

𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄𑀳𑀁, 𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 [𑀣𑀽𑀧𑀧𑀽𑀚𑀸𑀬𑀺𑀤𑀁 (𑀲𑀻.)] 𑀨𑀮𑀁.

𑁪. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 [𑀣𑀽𑀧𑀧𑀽𑀚𑀸𑀬𑀺𑀤𑀁 (𑀲𑀻.)] 𑀨𑀮𑀁.

𑁫. ‘‘𑀅𑀲𑀻𑀢𑀺𑀓𑀧𑁆𑀧𑁂𑀦𑀦𑁆𑀢𑀬𑀲𑁄, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑁄.

𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀓𑀘𑀺𑀦𑁆𑀢𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀓𑀘𑀺𑀦𑁆𑀢𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀅𑀯𑁄𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁭. ‘‘𑀯𑀺𑀳𑀸𑀭𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀅𑀩𑁆𑀪𑀼𑀝𑁆𑀞𑀳𑀺𑀬 [𑀅𑀩𑁆𑀪𑀼𑀝𑁆𑀞𑀸𑀲𑀺 𑀘 (𑀲𑁆𑀬𑀸. 𑀓.)] 𑀘𑀗𑁆𑀓𑀫𑁂;

𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑀦𑁆𑀢𑁄, 𑀤𑁂𑀲𑁂𑀢𑀺 [𑀤𑁂𑀲𑁂𑀦𑁆𑀢𑁄 (𑀲𑁆𑀬𑀸. 𑀓.)] 𑀅𑀫𑀢𑀁 𑀧𑀤𑀁.

𑁮. ‘‘𑀲𑀺𑀔𑀺𑀲𑁆𑀲 𑀕𑀺𑀭𑀫𑀜𑁆𑀜𑀸𑀬, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀦𑀸𑀦𑀸𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦, 𑀆𑀓𑀸𑀲𑀫𑁆𑀳𑀺 𑀲𑀫𑁄𑀓𑀺𑀭𑀺𑀁.

𑁯. ‘‘𑀢𑁂𑀦 𑀓𑀫𑁆𑀫𑁂𑀦 𑀤𑁆𑀯𑀺𑀧𑀤𑀺𑀦𑁆𑀤, 𑀮𑁄𑀓𑀚𑁂𑀝𑁆𑀞 𑀦𑀭𑀸𑀲𑀪;

𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀞𑀸𑀦𑀁, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬𑀁.

𑁧𑁦. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁧. ‘‘𑀇𑀢𑁄 𑀯𑀻𑀲𑀢𑀺𑀓𑀧𑁆𑀧𑀫𑁆𑀳𑀺, 𑀲𑀼𑀫𑁂𑀥𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀯𑁄𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀯𑁄𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀧𑀘𑁆𑀘𑀸𑀕𑀫𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁩. ‘‘𑀲𑀺𑀦𑁆𑀥𑀼𑀬𑀸 𑀦𑀤𑀺𑀬𑀸 𑀢𑀻𑀭𑁂, 𑀘𑀓𑁆𑀓𑀯𑀸𑀓𑁄 𑀅𑀳𑀁 𑀢𑀤𑀸;

𑀲𑀼𑀤𑁆𑀥𑀲𑁂𑀯𑀸𑀮𑀪𑀓𑁆𑀔𑁄𑀳𑀁, 𑀧𑀸𑀧𑁂𑀲𑀼 𑀘 𑀲𑀼𑀲𑀜𑁆𑀜𑀢𑁄.

𑁧𑁪. ‘‘𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀕𑀘𑁆𑀙𑀦𑁆𑀢𑀁 𑀅𑀦𑀺𑀮𑀜𑁆𑀚𑀲𑁂;

𑀢𑀼𑀡𑁆𑀟𑁂𑀦 𑀲𑀸𑀮𑀁 𑀧𑀕𑁆𑀕𑀬𑁆𑀳, 𑀯𑀺𑀧𑀲𑁆𑀲𑀺𑀲𑁆𑀲𑀸𑀪𑀺𑀭𑁄𑀧𑀬𑀺𑀁.

𑁧𑁫. ‘‘𑀬𑀲𑁆𑀲 𑀲𑀤𑁆𑀥𑀸 𑀢𑀣𑀸𑀕𑀢𑁂, 𑀅𑀘𑀮𑀸 𑀲𑀼𑀧𑀢𑀺𑀝𑁆𑀞𑀺𑀢𑀸;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀤𑀼𑀕𑁆𑀕𑀢𑀺𑀁 𑀲𑁄 𑀦 𑀕𑀘𑁆𑀙𑀢𑀺.

𑁧𑁬. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑁂;

𑀯𑀺𑀳𑀗𑁆𑀕𑀫𑁂𑀦 𑀲𑀦𑁆𑀢𑁂𑀦, 𑀲𑀼𑀩𑀻𑀚𑀁 𑀭𑁄𑀧𑀺𑀢𑀁 𑀫𑀬𑀸.

𑁧𑁭. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 [𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 (𑀲𑀻.)] 𑀨𑀮𑀁.

𑁧𑁮. ‘‘𑀲𑀼𑀘𑀸𑀭𑀼𑀤𑀲𑁆𑀲𑀦𑀸 𑀦𑀸𑀫, 𑀅𑀝𑁆𑀞𑁂𑀢𑁂 𑀏𑀓𑀦𑀸𑀫𑀓𑀸;

𑀓𑀧𑁆𑀧𑁂 𑀲𑀢𑁆𑀢𑀭𑀲𑁂 𑀆𑀲𑀼𑀁, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀘𑁆𑀘𑀸𑀕𑀫𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀘𑁆𑀘𑀸𑀕𑀫𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀧𑀭𑀧𑁆𑀧𑀲𑀸𑀤𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁦. ‘‘𑀉𑀲𑀪𑀁 𑀧𑀯𑀭𑀁 𑀯𑀻𑀭𑀁, 𑀫𑀳𑁂𑀲𑀺𑀁 𑀯𑀺𑀚𑀺𑀢𑀸𑀯𑀺𑀦𑀁;

𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

𑁨𑁧. ‘‘𑀳𑀺𑀫𑀯𑀸𑀯𑀸𑀧𑀭𑀺𑀫𑁂𑀬𑁆𑀬𑁄, 𑀲𑀸𑀕𑀭𑁄𑀯 𑀤𑀼𑀭𑀼𑀢𑁆𑀢𑀭𑁄;

𑀢𑀣𑁂𑀯 𑀛𑀸𑀦𑀁 𑀩𑀼𑀤𑁆𑀥𑀲𑁆𑀲, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

𑁨𑁨. ‘‘𑀯𑀲𑀼𑀥𑀸 𑀬𑀣𑀸𑀧𑁆𑀧𑀫𑁂𑀬𑁆𑀬𑀸, 𑀘𑀺𑀢𑁆𑀢𑀸 𑀯𑀦𑀯𑀝𑀁𑀲𑀓𑀸;

𑀢𑀣𑁂𑀯 𑀲𑀻𑀮𑀁 𑀩𑀼𑀤𑁆𑀥𑀲𑁆𑀲, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

𑁨𑁩. ‘‘𑀅𑀦𑀺𑀮𑀜𑁆𑀚𑀲𑀸𑀲𑀗𑁆𑀔𑀼𑀩𑁆𑀪𑁄 [𑀅𑀦𑀺𑀮𑀚𑁄𑀯 𑀅𑀲𑀗𑁆𑀔𑁄𑀪𑁄 (𑀲𑀻.)], 𑀬𑀣𑀸𑀓𑀸𑀲𑁄 𑀅𑀲𑀗𑁆𑀔𑀺𑀬𑁄;

𑀢𑀣𑁂𑀯 𑀜𑀸𑀡𑀁 𑀩𑀼𑀤𑁆𑀥𑀲𑁆𑀲, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

𑁨𑁪. ‘‘𑀇𑀫𑀸𑀳𑀺 𑀘𑀢𑀼𑀕𑀸𑀣𑀸𑀳𑀺, 𑀩𑁆𑀭𑀸𑀳𑁆𑀫𑀡𑁄 𑀲𑁂𑀦𑀲𑀯𑁆𑀳𑀬𑁄;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀣𑀯𑀺𑀢𑁆𑀯𑀸𑀦, 𑀲𑀺𑀤𑁆𑀥𑀢𑁆𑀣𑀁 𑀅𑀧𑀭𑀸𑀚𑀺𑀢𑀁.

𑁨𑁫. ‘‘𑀘𑀢𑀼𑀦𑁆𑀦𑀯𑀼𑀢𑀺𑀓𑀧𑁆𑀧𑀸𑀦𑀺, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀣;

𑀲𑀼𑀕𑀢𑀺𑀁 𑀲𑀼𑀔𑀲𑀫𑁆𑀧𑀢𑁆𑀢𑀺𑀁 [𑀲𑀼𑀕𑀢𑀻𑀲𑀼 𑀲𑀼𑀲𑀼𑀫𑁆𑀧𑀢𑁆𑀢𑀺𑀁 (𑀲𑀻. 𑀲𑁆𑀬𑀸.)], 𑀅𑀦𑀼𑀪𑁄𑀲𑀺𑀫𑀦𑀧𑁆𑀧𑀓𑀁.

𑁨𑁬. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀣𑀯𑀺𑀢𑁆𑀯𑀸 𑀮𑁄𑀓𑀦𑀸𑀬𑀓𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀣𑁄𑀫𑀦𑀸𑀬 [𑀣𑁄𑀫𑀦𑀲𑁆𑀲 (𑀲𑁆𑀬𑀸.)] 𑀇𑀤𑀁 𑀨𑀮𑀁.

𑁨𑁭. ‘‘𑀘𑀸𑀢𑀼𑀤𑁆𑀤𑀲𑀫𑁆𑀳𑀺 𑀓𑀧𑁆𑀧𑀫𑁆𑀳𑀺, 𑀘𑀢𑀼𑀭𑁄 𑀆𑀲𑀼𑀫𑀼𑀕𑁆𑀕𑀢𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁨𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀭𑀧𑁆𑀧𑀲𑀸𑀤𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀭𑀧𑁆𑀧𑀲𑀸𑀤𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀪𑀺𑀲𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁯. ‘‘𑀯𑁂𑀲𑁆𑀲𑀪𑀽 𑀦𑀸𑀫 𑀦𑀸𑀫𑁂𑀦, 𑀇𑀲𑀻𑀦𑀁 𑀢𑀢𑀺𑀬𑁄 𑀅𑀳𑀼;

𑀓𑀸𑀦𑀦𑀁 𑀯𑀦𑀫𑁄𑀕𑀬𑁆𑀳, 𑀯𑀺𑀳𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁩𑁦. ‘‘𑀪𑀺𑀲𑀫𑀼𑀴𑀸𑀮𑀁 𑀕𑀡𑁆𑀳𑀺𑀢𑁆𑀯𑀸, 𑀅𑀕𑀫𑀁 𑀩𑀼𑀤𑁆𑀥𑀲𑀦𑁆𑀢𑀺𑀓𑀁;

𑀢𑀜𑁆𑀘 𑀩𑀼𑀤𑁆𑀥𑀲𑁆𑀲 𑀧𑀸𑀤𑀸𑀲𑀺𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁩𑁧. ‘‘𑀓𑀭𑁂𑀦 𑀘 𑀧𑀭𑀸𑀫𑀝𑁆𑀞𑁄, 𑀯𑁂𑀲𑁆𑀲𑀪𑀽𑀯𑀭𑀩𑀼𑀤𑁆𑀥𑀺𑀦𑀸;

𑀲𑀼𑀔𑀸𑀳𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀫𑀁 𑀢𑁂𑀦 𑀓𑀼𑀢𑁄𑀢𑁆𑀢𑀭𑀺𑀁.

𑁩𑁨. ‘‘𑀘𑀭𑀺𑀫𑁄 𑀯𑀢𑁆𑀢𑀢𑁂 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀳𑀢𑁆𑀣𑀺𑀦𑀸𑀕𑁂𑀦 𑀲𑀦𑁆𑀢𑁂𑀦, 𑀓𑀼𑀲𑀮𑀁 𑀭𑁄𑀧𑀺𑀢𑀁 𑀫𑀬𑀸 [𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄 (𑀲𑁆𑀬𑀸.)].

𑁩𑁩. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑀺𑀲𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁩𑁪. ‘‘𑀲𑀫𑁄𑀥𑀸𑀦𑀸 𑀘 𑀭𑀸𑀚𑀸𑀦𑁄, 𑀲𑁄𑀴𑀲 𑀫𑀦𑀼𑀚𑀸𑀥𑀺𑀧𑀸;

𑀓𑀧𑁆𑀧𑀫𑁆𑀳𑀺 𑀘𑀼𑀤𑁆𑀤𑀲𑁂 [𑀢𑁂𑀭𑀲𑁂 (𑀲𑀻. 𑀲𑁆𑀬𑀸.)] 𑀆𑀲𑀼𑀁, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁩𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀪𑀺𑀲𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀪𑀺𑀲𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀲𑀼𑀘𑀺𑀦𑁆𑀢𑀺𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁬. ‘‘𑀕𑀺𑀭𑀺𑀤𑀼𑀕𑁆𑀕𑀘𑀭𑁄 𑀆𑀲𑀺𑀁, 𑀅𑀪𑀺𑀚𑀸𑀢𑁄𑀯 𑀓𑁂𑀲𑀭𑀻;

𑀫𑀺𑀕𑀲𑀗𑁆𑀖𑀁 𑀯𑀥𑀺𑀢𑁆𑀯𑀸𑀦, 𑀚𑀻𑀯𑀸𑀫𑀺 𑀧𑀩𑁆𑀩𑀢𑀦𑁆𑀢𑀭𑁂.

𑁩𑁭. ‘‘𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸, 𑀲𑀩𑁆𑀩𑀜𑁆𑀜𑀽 𑀯𑀤𑀢𑀁 𑀯𑀭𑁄;

𑀫𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑁄 𑀲𑁄, 𑀆𑀕𑀘𑁆𑀙𑀺 𑀧𑀩𑁆𑀩𑀢𑀼𑀢𑁆𑀢𑀫𑀁.

𑁩𑁮. ‘‘𑀧𑀲𑀤𑀜𑁆𑀘 𑀫𑀺𑀕𑀁 𑀳𑀦𑁆𑀢𑁆𑀯𑀸, 𑀪𑀓𑁆𑀔𑀺𑀢𑀼𑀁 𑀲𑀫𑀼𑀧𑀸𑀕𑀫𑀺𑀁;

𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂, 𑀪𑀺𑀓𑁆𑀔𑀫𑀸𑀦𑁄 [𑀲𑀺𑀓𑁆𑀔𑀸𑀘𑀸𑀭𑁄 (𑀲𑁆𑀬𑀸.)] 𑀉𑀧𑀸𑀕𑀫𑀺.

𑁩𑁯. ‘‘𑀯𑀭𑀫𑀁𑀲𑀸𑀦𑀺 𑀧𑀕𑁆𑀕𑀬𑁆𑀳, 𑀅𑀤𑀸𑀲𑀺𑀁 𑀢𑀲𑁆𑀲 𑀲𑀢𑁆𑀣𑀼𑀦𑁄;

𑀅𑀦𑀼𑀫𑁄𑀤𑀺 𑀫𑀳𑀸𑀯𑀻𑀭𑁄, 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀫𑀫𑀁 𑀢𑀤𑀸.

𑁪𑁦. ‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀕𑀺𑀭𑀺𑀤𑀼𑀕𑁆𑀕𑀁 𑀧𑀯𑀺𑀲𑀺𑀁 𑀅𑀳𑀁;

𑀧𑀻𑀢𑀺𑀁 𑀉𑀧𑁆𑀧𑀸𑀤𑀬𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁪𑁧. ‘‘𑀏𑀢𑁂𑀦 𑀫𑀁𑀲𑀤𑀸𑀦𑁂𑀦, 𑀘𑀺𑀢𑁆𑀢𑀲𑁆𑀲 𑀧𑀡𑀺𑀥𑀻𑀳𑀺 𑀘;

𑀧𑀦𑁆𑀦𑀭𑀲𑁂 𑀓𑀧𑁆𑀧𑀲𑀢𑁂, 𑀤𑁂𑀯𑀮𑁄𑀓𑁂 𑀭𑀫𑀺𑀁 𑀅𑀳𑀁.

𑁪𑁨. ‘‘𑀅𑀯𑀲𑁂𑀲𑁂𑀲𑀼 𑀓𑀧𑁆𑀧𑁂𑀲𑀼, 𑀓𑀼𑀲𑀮𑀁 𑀘𑀺𑀦𑁆𑀢𑀺𑀢𑀁 [𑀦𑀺𑀘𑀺𑀢𑀁 (𑀲𑀻.), 𑀓𑀭𑀺𑀢𑀁 (𑀲𑁆𑀬𑀸.)] 𑀫𑀬𑀸;

𑀢𑁂𑀦𑁂𑀯 𑀫𑀁𑀲𑀤𑀸𑀦𑁂𑀦, 𑀩𑀼𑀤𑁆𑀥𑀸𑀦𑀼𑀲𑁆𑀲𑀭𑀡𑁂𑀦 𑀘.

𑁪𑁩. ‘‘𑀅𑀝𑁆𑀞𑀢𑁆𑀢𑀺𑀁𑀲𑀫𑁆𑀳𑀺 𑀓𑀧𑁆𑀧𑀫𑁆𑀳𑀺, 𑀅𑀝𑁆𑀞 𑀤𑀻𑀖𑀸𑀬𑀼𑀦𑀸𑀫𑀓𑀸;

𑀲𑀝𑁆𑀞𑀺𑀫𑁆𑀳𑀺𑀢𑁄 𑀓𑀧𑁆𑀧𑀲𑀢𑁂, 𑀤𑀼𑀯𑁂 𑀯𑀭𑀼𑀡𑀦𑀸𑀫𑀓𑀸 [𑀲𑀭𑀡𑀦𑀸𑀫𑀓𑀸 (𑀲𑁆𑀬𑀸.)].

𑁪𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀘𑀺𑀦𑁆𑀢𑀺𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀘𑀺𑀦𑁆𑀢𑀺𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀯𑀢𑁆𑀣𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁫. ‘‘𑀧𑀓𑁆𑀔𑀺𑀚𑀸𑀢𑁄 𑀢𑀤𑀸 𑀆𑀲𑀺𑀁, 𑀲𑀼𑀧𑀡𑁆𑀡𑁄 𑀕𑀭𑀼𑀴𑀸𑀥𑀺𑀧𑁄;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀕𑀘𑁆𑀙𑀦𑁆𑀢𑀁 𑀕𑀦𑁆𑀥𑀫𑀸𑀤𑀦𑀁.

𑁪𑁬. ‘‘𑀚𑀳𑀺𑀢𑁆𑀯𑀸 𑀕𑀭𑀼𑀴𑀯𑀡𑁆𑀡𑀁, 𑀫𑀸𑀡𑀯𑀓𑀁 𑀅𑀥𑀸𑀭𑀬𑀺𑀁;

𑀏𑀓𑀁 𑀯𑀢𑁆𑀣𑀁 𑀫𑀬𑀸 𑀤𑀺𑀦𑁆𑀦𑀁, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀢𑀸𑀤𑀺𑀦𑁄.

𑁪𑁭. ‘‘𑀢𑀜𑁆𑀘 𑀤𑀼𑀲𑁆𑀲𑀁 𑀧𑀝𑀺𑀕𑁆𑀕𑀬𑁆𑀳, 𑀩𑀼𑀤𑁆𑀥𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑁄 𑀲𑀢𑁆𑀣𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁪𑁮. ‘‘‘𑀇𑀫𑀺𑀦𑀸 𑀯𑀢𑁆𑀣𑀤𑀸𑀦𑁂𑀦, 𑀘𑀺𑀢𑁆𑀢𑀲𑁆𑀲 𑀧𑀡𑀺𑀥𑀻𑀳𑀺 𑀘;

𑀧𑀳𑀸𑀬 𑀕𑀭𑀼𑀴𑀁 𑀬𑁄𑀦𑀺𑀁, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺’.

𑁪𑁯. ‘‘𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀯𑀢𑁆𑀣𑀤𑀸𑀦𑀁 𑀧𑀲𑀁𑀲𑀺𑀢𑁆𑀯𑀸, 𑀧𑀓𑁆𑀓𑀸𑀫𑀺 𑀉𑀢𑁆𑀢𑀭𑀸𑀫𑀼𑀔𑁄.

𑁫𑁦. ‘‘𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀳𑀺, 𑀳𑁄𑀦𑁆𑀢𑀺 𑀫𑁂 𑀯𑀢𑁆𑀣𑀲𑀫𑁆𑀧𑀤𑀸;

𑀆𑀓𑀸𑀲𑁂 𑀙𑀤𑀦𑀁 𑀳𑁄𑀢𑀺, 𑀯𑀢𑁆𑀣𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁧. ‘‘𑀅𑀭𑀼𑀡𑀯𑀸 [𑀅𑀭𑀼𑀡𑀓𑀸 (𑀲𑀻.), 𑀅𑀭𑀼𑀡𑀲𑀸 (𑀲𑁆𑀬𑀸.)] 𑀲𑀢𑁆𑀢 𑀚𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸;

𑀙𑀢𑁆𑀢𑀺𑀁𑀲𑀢𑀺𑀫𑁆𑀳𑀺 𑀆𑀲𑀺𑀁𑀲𑀼, 𑀓𑀧𑁆𑀧𑀫𑁆𑀳𑀺 𑀫𑀦𑀼𑀚𑀸𑀥𑀺𑀧𑀸.

𑁫𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑀢𑁆𑀣𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑀢𑁆𑀣𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀅𑀫𑁆𑀩𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁩. ‘‘𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸, 𑀦𑀺𑀲𑀺𑀦𑁆𑀦𑁄 𑀧𑀩𑁆𑀩𑀢𑀦𑁆𑀢𑀭𑁂;

𑀫𑁂𑀢𑁆𑀢𑀸𑀬 𑀅𑀨𑀭𑀺 𑀮𑁄𑀓𑁂, 𑀅𑀧𑁆𑀧𑀫𑀸𑀡𑁂 𑀦𑀺𑀭𑀽𑀧𑀥𑀺.

𑁫𑁪. ‘‘𑀓𑀧𑀺 𑀅𑀳𑀁 𑀢𑀤𑀸 𑀆𑀲𑀺𑀁, 𑀳𑀺𑀫𑀯𑀦𑁆𑀢𑁂 𑀦𑀕𑀼𑀢𑁆𑀢𑀫𑁂;

𑀤𑀺𑀲𑁆𑀯𑀸 𑀅𑀦𑁄𑀫𑀤𑀲𑁆𑀲𑀺𑀁 𑀢𑀁 [𑀅𑀦𑁄𑀫𑀁 𑀅𑀫𑀺𑀢𑀁 (𑀲𑀻.), 𑀅𑀦𑁄𑀫𑀫𑀥𑀺𑀢𑀁 (𑀲𑁆𑀬𑀸.)], 𑀩𑀼𑀤𑁆𑀥𑁂 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁫𑁫. ‘‘𑀅𑀯𑀺𑀤𑀽𑀭𑁂 𑀳𑀺𑀫𑀯𑀦𑁆𑀢𑀲𑁆𑀲, 𑀅𑀫𑁆𑀩𑀸𑀲𑀼𑀁 𑀨𑀮𑀺𑀦𑁄 𑀢𑀤𑀸;

𑀢𑀢𑁄 𑀧𑀓𑁆𑀓𑀁 𑀕𑀳𑁂𑀢𑁆𑀯𑀸𑀦, 𑀅𑀫𑁆𑀩𑀁 𑀲𑀫𑀥𑀼𑀓𑀁 𑀅𑀤𑀁.

𑁫𑁬. ‘‘𑀢𑀁 𑀫𑁂 𑀩𑀼𑀤𑁆𑀥𑁄 𑀯𑀺𑀬𑀸𑀓𑀸𑀲𑀺, 𑀅𑀦𑁄𑀫𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀇𑀫𑀺𑀦𑀸 𑀫𑀥𑀼𑀤𑀸𑀦𑁂𑀦, 𑀅𑀫𑁆𑀩𑀤𑀸𑀦𑁂𑀦 𑀘𑀽𑀪𑀬𑀁.

𑁫𑁭. ‘‘𑀲𑀢𑁆𑀢𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀅𑀯𑀲𑁂𑀲𑁂𑀲𑀼 𑀓𑀧𑁆𑀧𑁂𑀲𑀼, 𑀯𑁄𑀓𑀺𑀡𑁆𑀡𑀁 𑀲𑀁𑀲𑀭𑀺𑀲𑁆𑀲𑀢𑀺.

𑁫𑁮. ‘‘𑀔𑁂𑀧𑁂𑀢𑁆𑀯𑀸 𑀧𑀸𑀧𑀓𑀁 𑀓𑀫𑁆𑀫𑀁, 𑀧𑀭𑀺𑀧𑀓𑁆𑀓𑀸𑀬 𑀩𑀼𑀤𑁆𑀥𑀺𑀬𑀸;

𑀯𑀺𑀦𑀺𑀧𑀸𑀢𑀫𑀕𑀦𑁆𑀢𑁆𑀯𑀸𑀦, 𑀓𑀺𑀮𑁂𑀲𑁂 𑀛𑀸𑀧𑀬𑀺𑀲𑁆𑀲𑀢𑀺.

𑁫𑁯. ‘‘𑀤𑀫𑁂𑀦 𑀉𑀢𑁆𑀢𑀫𑁂𑀦𑀸𑀳𑀁, 𑀤𑀫𑀺𑀢𑁄𑀫𑁆𑀳𑀺 𑀫𑀳𑁂𑀲𑀺𑀦𑀸;

𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀞𑀸𑀦𑀁, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬𑀁.

𑁬𑁦. ‘‘𑀲𑀢𑁆𑀢𑀲𑀢𑁆𑀢𑀢𑀺𑀓𑀧𑁆𑀧𑀲𑀢𑁂, 𑀅𑀫𑁆𑀩𑀝𑁆𑀞𑀚𑀲𑀦𑀸𑀫𑀓𑀸;

𑀘𑀢𑀼𑀤𑁆𑀤𑀲 𑀢𑁂 𑀭𑀸𑀚𑀸𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁬𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀫𑁆𑀩𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀫𑁆𑀩𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀲𑀼𑀫𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁨. ‘‘𑀲𑀼𑀫𑀦𑁄 𑀦𑀸𑀫 𑀦𑀸𑀫𑁂𑀦, 𑀫𑀸𑀮𑀸𑀓𑀸𑀭𑁄 𑀅𑀳𑀁 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀮𑁄𑀓𑀸𑀳𑀼𑀢𑀺𑀧𑀝𑀺𑀕𑁆𑀕𑀳𑀁.

𑁬𑁩. ‘‘𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀲𑀼𑀫𑀦𑀁 𑀧𑀼𑀧𑁆𑀨𑀫𑀼𑀢𑁆𑀢𑀫𑀁;

𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑁂𑀲𑀺𑀁, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄.

𑁬𑁪. ‘‘𑀇𑀫𑀸𑀬 𑀧𑀼𑀧𑁆𑀨𑀧𑀽𑀚𑀸𑀬, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁬𑁫. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 [𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 (𑀲𑀻.)] 𑀨𑀮𑀁.

𑁬𑁬. ‘‘𑀙𑀩𑁆𑀩𑀻𑀲𑀢𑀺𑀫𑁆𑀳𑀺 𑀓𑀧𑁆𑀧𑀫𑁆𑀳𑀺, 𑀘𑀢𑁆𑀢𑀸𑀭𑁄𑀲𑀼𑀁 𑀫𑀳𑀸𑀬𑀲𑀸;