𑁧𑁦. 𑀧𑀼𑀧𑁆𑀨𑀘𑀗𑁆𑀓𑁄𑀝𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁮. ‘‘𑀅𑀪𑀻𑀢𑀭𑀽𑀧𑀁 𑀲𑀻𑀳𑀁𑀯, 𑀕𑀭𑀼𑀴𑀕𑁆𑀕𑀁𑀯 𑀧𑀓𑁆𑀔𑀺𑀦𑀁;

𑀩𑁆𑀬𑀕𑁆𑀖𑀽𑀲𑀪𑀁𑀯 𑀧𑀯𑀭𑀁, 𑀅𑀪𑀺𑀚𑀸𑀢𑀁𑀯 𑀓𑁂𑀲𑀭𑀺𑀁.

𑁬𑁯. ‘‘𑀲𑀺𑀔𑀺𑀁 𑀢𑀺𑀮𑁄𑀓𑀲𑀭𑀡𑀁, 𑀅𑀦𑁂𑀚𑀁 𑀅𑀧𑀭𑀸𑀚𑀺𑀢𑀁;

𑀦𑀺𑀲𑀺𑀦𑁆𑀦𑀁 𑀲𑀫𑀡𑀸𑀦𑀕𑁆𑀕𑀁, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁.

𑁭𑁦. ‘‘𑀘𑀗𑁆𑀓𑁄𑀝𑀓𑁂 [𑀘𑀗𑁆𑀕𑁄𑀝𑀓𑁂 (𑀲𑀻.)] 𑀞𑀧𑁂𑀢𑁆𑀯𑀸𑀦, 𑀅𑀦𑁄𑀚𑀁 𑀧𑀼𑀧𑁆𑀨𑀫𑀼𑀢𑁆𑀢𑀫𑀁;

𑀲𑀳 𑀘𑀗𑁆𑀓𑁄𑀝𑀓𑁂𑀦𑁂𑀯, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀲𑀫𑁄𑀓𑀺𑀭𑀺𑀁.

𑁭𑁧. ‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀤𑁆𑀯𑀺𑀧𑀤𑀺𑀦𑁆𑀤 𑀦𑀭𑀸𑀲𑀪;

𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀞𑀸𑀦𑀁, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬𑀁.

𑁭𑁨. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁭𑁩. ‘‘𑀲𑀫𑁆𑀧𑀼𑀡𑁆𑀡𑁂 𑀢𑀺𑀁𑀲𑀓𑀧𑁆𑀧𑀫𑁆𑀳𑀺, 𑀤𑁂𑀯𑀪𑀽𑀢𑀺𑀲𑀦𑀸𑀫𑀓𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀧𑀜𑁆𑀘𑀸𑀲𑀼𑀁 𑀘𑀓𑁆𑀓𑀯𑀢𑁆𑀢𑀺𑀦𑁄.

𑁭𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀧𑁆𑀨𑀘𑀗𑁆𑀓𑁄𑀝𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀧𑁆𑀨𑀘𑀗𑁆𑀓𑁄𑀝𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀲𑀓𑀘𑀺𑀦𑁆𑀢𑀦𑀺𑀬𑀯𑀕𑁆𑀕𑁄 𑀲𑀢𑁆𑀢𑀫𑁄.