𑁪. 𑀧𑀭𑀧𑁆𑀧𑀲𑀸𑀤𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁦. ‘‘𑀉𑀲𑀪𑀁 𑀧𑀯𑀭𑀁 𑀯𑀻𑀭𑀁, 𑀫𑀳𑁂𑀲𑀺𑀁 𑀯𑀺𑀚𑀺𑀢𑀸𑀯𑀺𑀦𑀁;

𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

𑁨𑁧. ‘‘𑀳𑀺𑀫𑀯𑀸𑀯𑀸𑀧𑀭𑀺𑀫𑁂𑀬𑁆𑀬𑁄, 𑀲𑀸𑀕𑀭𑁄𑀯 𑀤𑀼𑀭𑀼𑀢𑁆𑀢𑀭𑁄;

𑀢𑀣𑁂𑀯 𑀛𑀸𑀦𑀁 𑀩𑀼𑀤𑁆𑀥𑀲𑁆𑀲, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

𑁨𑁨. ‘‘𑀯𑀲𑀼𑀥𑀸 𑀬𑀣𑀸𑀧𑁆𑀧𑀫𑁂𑀬𑁆𑀬𑀸, 𑀘𑀺𑀢𑁆𑀢𑀸 𑀯𑀦𑀯𑀝𑀁𑀲𑀓𑀸;

𑀢𑀣𑁂𑀯 𑀲𑀻𑀮𑀁 𑀩𑀼𑀤𑁆𑀥𑀲𑁆𑀲, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

𑁨𑁩. ‘‘𑀅𑀦𑀺𑀮𑀜𑁆𑀚𑀲𑀸𑀲𑀗𑁆𑀔𑀼𑀩𑁆𑀪𑁄 [𑀅𑀦𑀺𑀮𑀚𑁄𑀯 𑀅𑀲𑀗𑁆𑀔𑁄𑀪𑁄 (𑀲𑀻.)], 𑀬𑀣𑀸𑀓𑀸𑀲𑁄 𑀅𑀲𑀗𑁆𑀔𑀺𑀬𑁄;

𑀢𑀣𑁂𑀯 𑀜𑀸𑀡𑀁 𑀩𑀼𑀤𑁆𑀥𑀲𑁆𑀲, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

𑁨𑁪. ‘‘𑀇𑀫𑀸𑀳𑀺 𑀘𑀢𑀼𑀕𑀸𑀣𑀸𑀳𑀺, 𑀩𑁆𑀭𑀸𑀳𑁆𑀫𑀡𑁄 𑀲𑁂𑀦𑀲𑀯𑁆𑀳𑀬𑁄;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀣𑀯𑀺𑀢𑁆𑀯𑀸𑀦, 𑀲𑀺𑀤𑁆𑀥𑀢𑁆𑀣𑀁 𑀅𑀧𑀭𑀸𑀚𑀺𑀢𑀁.

𑁨𑁫. ‘‘𑀘𑀢𑀼𑀦𑁆𑀦𑀯𑀼𑀢𑀺𑀓𑀧𑁆𑀧𑀸𑀦𑀺, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀣;

𑀲𑀼𑀕𑀢𑀺𑀁 𑀲𑀼𑀔𑀲𑀫𑁆𑀧𑀢𑁆𑀢𑀺𑀁 [𑀲𑀼𑀕𑀢𑀻𑀲𑀼 𑀲𑀼𑀲𑀼𑀫𑁆𑀧𑀢𑁆𑀢𑀺𑀁 (𑀲𑀻. 𑀲𑁆𑀬𑀸.)], 𑀅𑀦𑀼𑀪𑁄𑀲𑀺𑀫𑀦𑀧𑁆𑀧𑀓𑀁.

𑁨𑁬. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀣𑀯𑀺𑀢𑁆𑀯𑀸 𑀮𑁄𑀓𑀦𑀸𑀬𑀓𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀣𑁄𑀫𑀦𑀸𑀬 [𑀣𑁄𑀫𑀦𑀲𑁆𑀲 (𑀲𑁆𑀬𑀸.)] 𑀇𑀤𑀁 𑀨𑀮𑀁.

𑁨𑁭. ‘‘𑀘𑀸𑀢𑀼𑀤𑁆𑀤𑀲𑀫𑁆𑀳𑀺 𑀓𑀧𑁆𑀧𑀫𑁆𑀳𑀺, 𑀘𑀢𑀼𑀭𑁄 𑀆𑀲𑀼𑀫𑀼𑀕𑁆𑀕𑀢𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁨𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀭𑀧𑁆𑀧𑀲𑀸𑀤𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀭𑀧𑁆𑀧𑀲𑀸𑀤𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.