𑁫. 𑀪𑀺𑀲𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁯. ‘‘𑀯𑁂𑀲𑁆𑀲𑀪𑀽 𑀦𑀸𑀫 𑀦𑀸𑀫𑁂𑀦, 𑀇𑀲𑀻𑀦𑀁 𑀢𑀢𑀺𑀬𑁄 𑀅𑀳𑀼;

𑀓𑀸𑀦𑀦𑀁 𑀯𑀦𑀫𑁄𑀕𑀬𑁆𑀳, 𑀯𑀺𑀳𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁩𑁦. ‘‘𑀪𑀺𑀲𑀫𑀼𑀴𑀸𑀮𑀁 𑀕𑀡𑁆𑀳𑀺𑀢𑁆𑀯𑀸, 𑀅𑀕𑀫𑀁 𑀩𑀼𑀤𑁆𑀥𑀲𑀦𑁆𑀢𑀺𑀓𑀁;

𑀢𑀜𑁆𑀘 𑀩𑀼𑀤𑁆𑀥𑀲𑁆𑀲 𑀧𑀸𑀤𑀸𑀲𑀺𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁩𑁧. ‘‘𑀓𑀭𑁂𑀦 𑀘 𑀧𑀭𑀸𑀫𑀝𑁆𑀞𑁄, 𑀯𑁂𑀲𑁆𑀲𑀪𑀽𑀯𑀭𑀩𑀼𑀤𑁆𑀥𑀺𑀦𑀸;

𑀲𑀼𑀔𑀸𑀳𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀫𑀁 𑀢𑁂𑀦 𑀓𑀼𑀢𑁄𑀢𑁆𑀢𑀭𑀺𑀁.

𑁩𑁨. ‘‘𑀘𑀭𑀺𑀫𑁄 𑀯𑀢𑁆𑀢𑀢𑁂 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀳𑀢𑁆𑀣𑀺𑀦𑀸𑀕𑁂𑀦 𑀲𑀦𑁆𑀢𑁂𑀦, 𑀓𑀼𑀲𑀮𑀁 𑀭𑁄𑀧𑀺𑀢𑀁 𑀫𑀬𑀸 [𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄 (𑀲𑁆𑀬𑀸.)].

𑁩𑁩. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑀺𑀲𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁩𑁪. ‘‘𑀲𑀫𑁄𑀥𑀸𑀦𑀸 𑀘 𑀭𑀸𑀚𑀸𑀦𑁄, 𑀲𑁄𑀴𑀲 𑀫𑀦𑀼𑀚𑀸𑀥𑀺𑀧𑀸;

𑀓𑀧𑁆𑀧𑀫𑁆𑀳𑀺 𑀘𑀼𑀤𑁆𑀤𑀲𑁂 [𑀢𑁂𑀭𑀲𑁂 (𑀲𑀻. 𑀲𑁆𑀬𑀸.)] 𑀆𑀲𑀼𑀁, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁩𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀪𑀺𑀲𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀪𑀺𑀲𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.