𑁯. 𑀚𑀢𑀼𑀓𑀡𑁆𑀡𑀺𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁭𑁬. ‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀅𑀳𑁄𑀲𑀳𑀁;

𑀲𑀫𑀧𑁆𑀧𑀺𑀢𑁄 𑀓𑀸𑀫𑀕𑀼𑀡𑁂, 𑀧𑀭𑀺𑀘𑀸𑀭𑁂𑀫𑀳𑀁 𑀢𑀤𑀸.

𑁨𑁭𑁭. ‘‘𑀢𑀢𑁄 [𑀢𑀬𑁄 (𑀲𑀻.)] 𑀧𑀸𑀲𑀸𑀤𑀫𑀸𑀭𑀼𑀬𑁆𑀳, 𑀫𑀳𑀸𑀪𑁄𑀕𑁂 𑀯𑀮𑀜𑁆𑀚𑀓𑁄 [𑀉𑀩𑁆𑀩𑀺𑀤𑁆𑀥𑀸 𑀕𑁂𑀳𑀮𑀼𑀜𑁆𑀚𑀓𑀸 (𑀓.), 𑀉𑀩𑁆𑀩𑀺𑀤𑁆𑀥𑀸𑀕𑁂𑀳𑀮𑀜𑁆𑀙𑀓𑀸 (𑀲𑀻.)];

𑀢𑀢𑁆𑀣 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺, 𑀧𑀭𑀺𑀘𑀸𑀭𑁂𑀫𑀳𑀁 𑀢𑀤𑀸.

𑁨𑁭𑁮. ‘‘𑀢𑀽𑀭𑀺𑀬𑀸 𑀆𑀳𑀢𑀸 𑀫𑀬𑁆𑀳𑀁, 𑀲𑀫𑁆𑀫𑀢𑀸𑀴𑀲𑀫𑀸𑀳𑀺𑀢𑀸;

𑀦𑀘𑁆𑀘𑀦𑁆𑀢𑀸 [𑀭𑀜𑁆𑀚𑀦𑁆𑀢𑀻 (𑀲𑁆𑀬𑀸.), 𑀭𑀚𑁆𑀚𑀦𑁆𑀢𑀸 (𑀓.)] 𑀇𑀢𑁆𑀣𑀺𑀬𑁄 𑀲𑀩𑁆𑀩𑀸, 𑀳𑀭𑀦𑁆𑀢𑀺𑀬𑁂𑀯 𑀫𑁂 𑀫𑀦𑁄.

𑁨𑁭𑁯. ‘‘𑀘𑁂𑀮𑀸𑀧𑀺𑀓𑀸 [𑀘𑁂𑀮𑀸𑀯𑀓𑀸 (𑀲𑁆𑀬𑀸.), 𑀯𑁂𑀮𑀸𑀫𑀺𑀓𑀸 (𑀧𑀻.)] 𑀮𑀸𑀫𑀡𑀺𑀓𑀸 [𑀯𑀸𑀫𑀦𑀺𑀓𑀸 (𑀲𑁆𑀬𑀸. 𑀧𑀻.)], 𑀓𑀼𑀜𑁆𑀚𑀯𑀸𑀲𑀻 𑀢𑀺𑀫𑀚𑁆𑀛𑀺𑀓𑀸 [𑀓𑀼𑀜𑁆𑀚𑀯𑀸 𑀲𑀻𑀳𑀺𑀫𑀚𑁆𑀛𑀺𑀢𑀸 (𑀲𑁆𑀬𑀸.), 𑀓𑀼𑀚𑁆𑀚𑀸 𑀯𑀸 𑀲𑀻𑀳𑀺𑀫𑀚𑁆𑀛𑀺𑀓𑀸 (𑀧𑀻.)];

𑀮𑀗𑁆𑀖𑀺𑀓𑀸 𑀲𑁄𑀓𑀚𑁆𑀛𑀸𑀬𑀻 𑀘, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁨𑁮𑁦. ‘‘𑀯𑁂𑀢𑀸𑀴𑀺𑀦𑁄 𑀓𑀼𑀫𑁆𑀪𑀣𑀽𑀦𑀻, 𑀦𑀝𑀸 𑀘 𑀦𑀘𑁆𑀘𑀓𑀸 𑀩𑀳𑀽;

𑀦𑀝𑀓𑀸 𑀦𑀸𑀝𑀓𑀸 𑀘𑁂𑀯, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁨𑁮𑁧. ‘‘𑀓𑀧𑁆𑀧𑀓𑀸 𑀦𑁆𑀳𑀸𑀧𑀓𑀸 𑀲𑀽𑀤𑀸, 𑀫𑀸𑀮𑀸𑀓𑀸𑀭𑀸 𑀲𑀼𑀧𑀸𑀲𑀓𑀸 [𑀲𑀼𑀫𑀸𑀧𑀓𑀸 (𑀲𑀻. 𑀲𑁆𑀬𑀸.)];

𑀚𑀮𑁆𑀮𑀸 𑀫𑀮𑁆𑀮𑀸 𑀘 𑀢𑁂 𑀲𑀩𑁆𑀩𑁂, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁨𑁮𑁨. ‘‘𑀏𑀢𑁂𑀲𑀼 𑀓𑀻𑀴𑀫𑀸𑀦𑁂𑀲𑀼, 𑀲𑀺𑀓𑁆𑀔𑀺𑀢𑁂 𑀓𑀢𑀼𑀧𑀸𑀲𑀦𑁂;

𑀭𑀢𑁆𑀢𑀺𑀦𑁆𑀤𑀺𑀯𑀁 𑀦 𑀚𑀸𑀦𑀸𑀫𑀺, 𑀇𑀦𑁆𑀤𑁄𑀯 𑀢𑀺𑀤𑀲𑀗𑁆𑀕𑀡𑁂.

𑁨𑁮𑁩. ‘‘𑀅𑀤𑁆𑀥𑀺𑀓𑀸 𑀧𑀣𑀺𑀓𑀸 𑀲𑀩𑁆𑀩𑁂, 𑀬𑀸𑀘𑀓𑀸 𑀯𑀭𑀓𑀸 𑀩𑀳𑀽;

𑀉𑀧𑀕𑀘𑁆𑀙𑀦𑁆𑀢𑀺 𑀢𑁂 𑀦𑀺𑀘𑁆𑀘𑀁, 𑀪𑀺𑀓𑁆𑀔𑀬𑀦𑁆𑀢𑀸 𑀫𑀫𑀁 𑀖𑀭𑀁.

𑁨𑁮𑁪. ‘‘𑀲𑀫𑀡𑀸 𑀩𑁆𑀭𑀸𑀳𑁆𑀫𑀡𑀸 𑀘𑁂𑀯, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀸 𑀅𑀦𑀼𑀢𑁆𑀢𑀭𑀸;

𑀯𑀟𑁆𑀠𑀬𑀦𑁆𑀢𑀸 𑀫𑀫𑀁 𑀧𑀼𑀜𑁆𑀜𑀁, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁮𑁫. ‘‘𑀧𑀝𑀕𑀸 [𑀧𑀝𑀓𑀸 (𑀲𑀻. 𑀲𑁆𑀬𑀸.), 𑀧𑀤𑀓𑀸 (𑀧𑀻.)] 𑀮𑀝𑀼𑀓𑀸 [𑀮𑀝𑀓𑀸 (𑀲𑀻.)] 𑀲𑀩𑁆𑀩𑁂, 𑀦𑀺𑀕𑀡𑁆𑀞𑀸 𑀧𑀼𑀧𑁆𑀨𑀲𑀸𑀝𑀓𑀸;

𑀢𑁂𑀤𑀡𑁆𑀟𑀺𑀓𑀸 𑀏𑀓𑀲𑀺𑀔𑀸, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁮𑁬. ‘‘𑀆𑀚𑀻𑀯𑀓𑀸 𑀯𑀺𑀮𑀼𑀢𑁆𑀢𑀸𑀯𑀻, 𑀕𑁄𑀥𑀫𑁆𑀫𑀸 𑀤𑁂𑀯𑀥𑀫𑁆𑀫𑀺𑀓𑀸;

𑀭𑀚𑁄𑀚𑀮𑁆𑀮𑀥𑀭𑀸 𑀏𑀢𑁂, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁮𑁭. ‘‘𑀧𑀭𑀺𑀢𑁆𑀢𑀓𑀸 𑀲𑀦𑁆𑀢𑀺𑀧𑀢𑁆𑀢𑀸 [𑀧𑀭𑀺𑀯𑀢𑁆𑀢𑀓𑀸 𑀲𑀺𑀤𑁆𑀥𑀺𑀧𑀢𑁆𑀢𑀸 (𑀲𑀻. 𑀲𑁆𑀬𑀸. 𑀧𑀻.)], 𑀓𑁄𑀥𑀧𑀼𑀕𑁆𑀕𑀦𑀺𑀓𑀸 [𑀓𑁄𑀡𑁆𑀟𑀧𑀼𑀕𑁆𑀕𑀡𑀺𑀓𑀸 (𑀲𑀻.), 𑀓𑁄𑀡𑁆𑀟𑀧𑀼𑀕𑁆𑀕𑀮𑀺𑀓𑀸 (𑀧𑀻.)] 𑀩𑀳𑀽;

𑀢𑀧𑀲𑁆𑀲𑀻 𑀯𑀦𑀘𑀸𑀭𑀻 𑀘, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁮𑁮. ‘‘𑀑𑀟𑁆𑀟𑀓𑀸 𑀤𑀫𑀺𑀴𑀸 𑀘𑁂𑀯, 𑀲𑀸𑀓𑀼𑀴𑀸 𑀫𑀮𑀯𑀸𑀴𑀓𑀸 [𑀫𑀮𑀬𑀸𑀮𑀓𑀸 (𑀲𑀻. 𑀲𑁆𑀬𑀸. 𑀧𑀻.)];

𑀲𑀯𑀭𑀸 𑀬𑁄𑀦𑀓𑀸 𑀘𑁂𑀯, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁮𑁯. ‘‘𑀅𑀦𑁆𑀥𑀓𑀸 𑀫𑀼𑀡𑁆𑀟𑀓𑀸 𑀲𑀩𑁆𑀩𑁂, 𑀓𑁄𑀝𑀮𑀸 𑀳𑀦𑀼𑀯𑀺𑀦𑁆𑀤𑀓𑀸 [𑀓𑁄𑀮𑀓𑀸 𑀲𑀸𑀦𑀼𑀯𑀺𑀦𑁆𑀤𑀓𑀸 (𑀲𑀻. 𑀧𑀻.)];

𑀆𑀭𑀸𑀯𑀘𑀻𑀦𑀭𑀝𑁆𑀞𑀸 𑀘, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁯𑁦. ‘‘𑀅𑀮𑀲𑀦𑁆𑀤𑀓𑀸 [𑀅𑀮𑀲𑀦𑁆𑀢𑀸 (𑀓.)] 𑀧𑀮𑁆𑀮𑀯𑀓𑀸, 𑀥𑀫𑁆𑀫𑀭𑀸 𑀦𑀺𑀕𑁆𑀕𑀫𑀸𑀦𑀼𑀲𑀸 [𑀩𑀩𑁆𑀩𑀭𑀸 𑀪𑀕𑁆𑀕𑀓𑀸𑀭𑀼𑀲𑀸 (𑀲𑀻.)];

𑀕𑁂𑀳𑀺𑀓𑀸 [𑀭𑁄𑀳𑀺𑀢𑀸 (𑀲𑀻.), 𑀩𑀸𑀳𑀺𑀓𑀸 (𑀧𑀻.)] 𑀘𑁂𑀢𑀧𑀼𑀢𑁆𑀢𑀸 𑀘, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁯𑁧. ‘‘𑀫𑀸𑀥𑀼𑀭𑀓𑀸 𑀓𑁄𑀲𑀮𑀓𑀸, 𑀓𑀮𑀺𑀗𑁆𑀕𑀸 [𑀓𑀸𑀲𑀺𑀓𑀸 (𑀲𑀻.)] 𑀳𑀢𑁆𑀣𑀺𑀧𑁄𑀭𑀺𑀓𑀸;

𑀇𑀲𑀺𑀡𑁆𑀟𑀸 𑀫𑀓𑁆𑀓𑀮𑀸 𑀘𑁂𑀯, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁯𑁨. ‘‘𑀘𑁂𑀮𑀸𑀯𑀓𑀸 𑀆𑀭𑀩𑁆𑀪𑀸 [𑀅𑀭𑀫𑁆𑀫𑀸 (𑀲𑀻. 𑀧𑀻.)] 𑀘, 𑀑𑀖𑀼𑀴𑁆𑀳𑀸 [𑀑𑀓𑁆𑀓𑀮𑀸 (𑀲𑀻.)] 𑀫𑁂𑀖𑀮𑀸 𑀩𑀳𑀽;

𑀔𑀼𑀤𑁆𑀤𑀓𑀸 𑀲𑀼𑀤𑁆𑀤𑀓𑀸 𑀘𑁂𑀯, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁯𑁩. ‘‘𑀭𑁄𑀳𑀡𑀸 𑀲𑀺𑀦𑁆𑀥𑀯𑀸 𑀘𑁂𑀯, 𑀘𑀺𑀢𑀓𑀸 𑀏𑀓𑀓𑀡𑁆𑀡𑀺𑀓𑀸;

𑀲𑀼𑀭𑀝𑁆𑀞𑀸 𑀅𑀧𑀭𑀦𑁆𑀢𑀸 𑀘, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁯𑁪. ‘‘𑀲𑀼𑀧𑁆𑀧𑀸𑀭𑀓𑀸 𑀓𑀼𑀫𑀸𑀭𑀸 [𑀓𑀺𑀓𑀼𑀫𑀸𑀭𑀸 (𑀲𑀻. 𑀧𑀻.)] 𑀘, 𑀫𑀮𑁆𑀮𑀲𑁄𑀯𑀡𑁆𑀡𑀪𑀽𑀫𑀺𑀓𑀸 [𑀫𑀮𑀬𑀸 𑀲𑁄𑀡𑁆𑀡𑀪𑀽𑀫𑀺𑀓𑀸 (𑀲𑀻. 𑀲𑁆𑀬𑀸. 𑀧𑀻.)];

𑀯𑀚𑁆𑀚𑀻𑀢𑀗𑁆𑀕𑀸 [𑀯𑀚𑁆𑀚𑀻 𑀢𑀸𑀭𑀸 (𑀲𑀻.), 𑀯𑀚𑁆𑀚𑀻𑀳𑀸𑀭𑀸 (𑀲𑁆𑀬𑀸. 𑀧𑀻.)] 𑀘 𑀢𑁂 𑀲𑀩𑁆𑀩𑁂, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁯𑁫. ‘‘𑀦𑀴𑀓𑀸𑀭𑀸 𑀧𑁂𑀲𑀓𑀸𑀭𑀸, 𑀘𑀫𑁆𑀫𑀓𑀸𑀭𑀸 𑀘 𑀢𑀘𑁆𑀙𑀓𑀸;

𑀓𑀫𑁆𑀫𑀸𑀭𑀸 𑀓𑀼𑀫𑁆𑀪𑀓𑀸𑀭𑀸 𑀘, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁯𑁬. ‘‘𑀫𑀡𑀺𑀓𑀸𑀭𑀸 𑀮𑁄𑀳𑀓𑀸𑀭𑀸, 𑀲𑁄𑀡𑁆𑀡𑀓𑀸𑀭𑀸 𑀘 𑀤𑀼𑀲𑁆𑀲𑀺𑀓𑀸;

𑀢𑀺𑀧𑀼𑀓𑀸𑀭𑀸 𑀘 𑀢𑁂 𑀲𑀩𑁆𑀩𑁂, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁯𑁭. ‘‘𑀉𑀲𑀼𑀓𑀸𑀭𑀸 𑀪𑀫𑀓𑀸𑀭𑀸, 𑀧𑁂𑀲𑀓𑀸𑀭𑀸 𑀘 𑀕𑀦𑁆𑀥𑀺𑀓𑀸;

𑀭𑀚𑀓𑀸 𑀢𑀼𑀦𑁆𑀦𑀯𑀸𑀬𑀸 𑀘, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁯𑁮. ‘‘𑀢𑁂𑀮𑀺𑀓𑀸 𑀓𑀝𑁆𑀞𑀳𑀸𑀭𑀸 𑀘, 𑀉𑀤𑀳𑀸𑀭𑀸 𑀘 𑀧𑁂𑀲𑁆𑀲𑀺𑀓𑀸;

𑀲𑀽𑀧𑀺𑀓𑀸 𑀲𑀽𑀧𑀭𑀓𑁆𑀔𑀸 𑀘, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁨𑁯𑁯. ‘‘𑀤𑁄𑀯𑀸𑀭𑀺𑀓𑀸 𑀅𑀦𑀻𑀓𑀝𑁆𑀞𑀸, 𑀩𑀦𑁆𑀥𑀺𑀓𑀸 [𑀯𑀦𑁆𑀤𑀺𑀓𑀸 (𑀲𑀻.), 𑀕𑀦𑁆𑀣𑀺𑀓𑀸 (𑀲𑁆𑀬𑀸.), 𑀲𑀦𑁆𑀤𑀺𑀓𑀸 (𑀧𑀻.)] 𑀧𑀼𑀧𑁆𑀨𑀙𑀟𑁆𑀟𑀓𑀸;

𑀳𑀢𑁆𑀣𑀸𑀭𑀼𑀳𑀸 𑀳𑀢𑁆𑀣𑀺𑀧𑀸𑀮𑀸, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀁 𑀖𑀭𑀁.

𑁩𑁦𑁦. ‘‘𑀆𑀦𑀦𑁆𑀤𑀲𑁆𑀲 𑀫𑀳𑀸𑀭𑀜𑁆𑀜𑁄 [𑀆𑀦𑀦𑁆𑀤𑀲𑁆𑀲 𑀦𑀸𑀫 𑀭𑀜𑁆𑀜𑁄 (𑀲𑁆𑀬𑀸.), 𑀅𑀭𑀺𑀦𑁆𑀤𑀫𑀦𑀸𑀫 𑀭𑀜𑁆𑀜𑁄 (𑀧𑀻.)], 𑀫𑀫𑀢𑁆𑀣𑀲𑁆𑀲 [𑀧𑀫𑀢𑁆𑀢𑀲𑁆𑀲 (𑀲𑀻. 𑀧𑀻.), 𑀲𑀫𑀕𑁆𑀕𑀲𑁆𑀲 (𑀲𑁆𑀬𑀸.)] 𑀅𑀤𑀸𑀲𑀳𑀁;

𑀲𑀢𑁆𑀢𑀯𑀡𑁆𑀡𑁂𑀦 𑀭𑀢𑀦𑁂𑀦, 𑀊𑀦𑀢𑁆𑀣𑀁 [𑀊𑀦𑀢𑁆𑀢𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑀽𑀭𑀬𑀸𑀫𑀳𑀁.

𑁩𑁦𑁧. ‘‘𑀬𑁂 𑀫𑀬𑀸 𑀓𑀺𑀢𑁆𑀢𑀺𑀢𑀸 𑀲𑀩𑁆𑀩𑁂, 𑀦𑀸𑀦𑀸𑀯𑀡𑁆𑀡𑀸 𑀩𑀳𑀽 𑀚𑀦𑀸;

𑀢𑁂𑀲𑀸𑀳𑀁 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀢𑀧𑁆𑀧𑀬𑀺𑀁 𑀭𑀢𑀦𑁂𑀦𑀳𑀁.

𑁩𑁦𑁨. ‘‘𑀯𑀕𑁆𑀕𑀽𑀲𑀼 𑀪𑀸𑀲𑀫𑀸𑀦𑀸𑀲𑀼, 𑀯𑀚𑁆𑀚𑀫𑀸𑀦𑀸𑀲𑀼 𑀪𑁂𑀭𑀺𑀲𑀼;

𑀲𑀗𑁆𑀔𑁂𑀲𑀼 𑀥𑀫𑀬𑀦𑁆𑀢𑁂𑀲𑀼, 𑀲𑀓𑀕𑁂𑀳𑁂 𑀭𑀫𑀸𑀫𑀳𑀁.

𑁩𑁦𑁩. ‘‘𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂, 𑀧𑀤𑀼𑀫𑀼𑀢𑁆𑀢𑀭𑀦𑀸𑀬𑀓𑁄;

𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺, 𑀧𑀭𑀺𑀓𑁆𑀔𑀻𑀡𑀸𑀲𑀯𑁂𑀳𑀺 𑀲𑁄.

𑁩𑁦𑁪. ‘‘𑀪𑀺𑀓𑁆𑀔𑀽𑀳𑀺 𑀲𑀳𑀺𑀢𑁄 𑀯𑀻𑀣𑀺𑀁, 𑀧𑀝𑀺𑀧𑀚𑁆𑀚𑀺𑀢𑁆𑀣 𑀘𑀓𑁆𑀔𑀼𑀫𑀸;

𑀑𑀪𑀸𑀲𑁂𑀦𑁆𑀢𑁄 𑀤𑀺𑀲𑀸 𑀲𑀩𑁆𑀩𑀸, 𑀤𑀻𑀧𑀭𑀼𑀓𑁆𑀔𑁄𑀯 𑀚𑁄𑀢𑀢𑀺.

𑁩𑁦𑁫. ‘‘𑀯𑀚𑁆𑀚𑀦𑁆𑀢𑀺 𑀪𑁂𑀭𑀺𑀬𑁄 𑀲𑀩𑁆𑀩𑀸, 𑀕𑀘𑁆𑀙𑀦𑁆𑀢𑁂 𑀮𑁄𑀓𑀦𑀸𑀬𑀓𑁂;

𑀧𑀪𑀸 𑀦𑀺𑀤𑁆𑀥𑀸𑀯𑀢𑁂 𑀢𑀲𑁆𑀲, 𑀲𑀢𑀭𑀁𑀲𑀻𑀯 𑀉𑀕𑁆𑀕𑀢𑁄.

𑁩𑁦𑁬. ‘‘𑀓𑀯𑀸𑀝𑀦𑁆𑀢𑀭𑀺𑀓𑀸𑀬𑀸𑀧𑀺, 𑀧𑀯𑀺𑀝𑁆𑀞𑁂𑀦 𑀘 𑀭𑀲𑁆𑀫𑀺𑀦𑀸;

𑀅𑀦𑁆𑀢𑁄𑀖𑀭𑁂𑀲𑀼 𑀯𑀺𑀧𑀼𑀮𑁄, 𑀆𑀮𑁄𑀓𑁄 𑀆𑀲𑀺 𑀢𑀸𑀯𑀤𑁂.

𑁩𑁦𑁭. ‘‘𑀧𑀪𑀁 𑀤𑀺𑀲𑁆𑀯𑀸𑀦 𑀩𑀼𑀤𑁆𑀥𑀲𑁆𑀲, 𑀧𑀸𑀭𑀺𑀲𑀚𑁆𑀚𑁂 𑀅𑀯𑁄𑀘𑀳𑀁;

𑀦𑀺𑀲𑁆𑀲𑀁𑀲𑀬𑀁 𑀩𑀼𑀤𑁆𑀥𑀲𑁂𑀝𑁆𑀞𑁄, 𑀇𑀫𑀁 𑀯𑀻𑀣𑀺𑀫𑀼𑀧𑀸𑀕𑀢𑁄.

𑁩𑁦𑁮. ‘‘𑀔𑀺𑀧𑁆𑀧𑀁 𑀑𑀭𑀼𑀬𑁆𑀳 𑀧𑀸𑀲𑀸𑀤𑀸, 𑀅𑀕𑀫𑀺𑀁 𑀅𑀦𑁆𑀢𑀭𑀸𑀧𑀡𑀁;

𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁩𑁦𑁯. ‘‘‘𑀅𑀦𑀼𑀓𑀫𑁆𑀧𑀢𑀼 𑀫𑁂 𑀩𑀼𑀤𑁆𑀥𑁄, 𑀚𑀮𑀚𑀼𑀢𑁆𑀢𑀫𑀦𑀸𑀬𑀓𑁄;

𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺, 𑀅𑀥𑀺𑀯𑀸𑀲𑁂𑀲𑀺 𑀲𑁄 𑀫𑀼𑀦𑀺’.

𑁩𑁧𑁦. ‘‘𑀦𑀺𑀫𑀦𑁆𑀢𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀅𑀪𑀺𑀦𑁂𑀲𑀺𑀁 𑀲𑀓𑀁 𑀖𑀭𑀁;

𑀢𑀢𑁆𑀣 𑀅𑀦𑁆𑀦𑁂𑀦 𑀧𑀸𑀦𑁂𑀦, 𑀲𑀦𑁆𑀢𑀧𑁆𑀧𑁂𑀲𑀺𑀁 𑀫𑀳𑀸𑀫𑀼𑀦𑀺𑀁.

𑁩𑁧𑁧. ‘‘𑀪𑀼𑀢𑁆𑀢𑀸𑀯𑀺𑀁 𑀓𑀸𑀮𑀫𑀜𑁆𑀜𑀸𑀬, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀲𑀢𑀗𑁆𑀕𑀺𑀓𑁂𑀦 𑀢𑀽𑀭𑀺𑀬𑁂𑀦, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀝𑁆𑀞𑀳𑀺𑀁.

𑁩𑁧𑁨. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀅𑀦𑁆𑀢𑁄𑀖𑀭𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁩𑁧𑁩. ‘‘‘𑀬𑁄 𑀫𑀁 𑀢𑀽𑀭𑀺𑀬𑁂𑀳𑀼𑀧𑀝𑁆𑀞𑀸𑀲𑀺, 𑀅𑀦𑁆𑀦𑀧𑀸𑀦𑀜𑁆𑀘𑀤𑀸𑀲𑀺 𑀫𑁂;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁩𑁧𑁪. ‘‘‘𑀧𑀳𑀽𑀢𑀪𑀓𑁆𑀔𑁄 𑀳𑀼𑀢𑁆𑀯𑀸𑀦, 𑀲𑀳𑀺𑀭𑀜𑁆𑀜𑁄 𑀲𑀪𑁄𑀚𑀦𑁄;

𑀘𑀢𑀼𑀤𑀻𑀧𑁂 𑀏𑀓𑀭𑀚𑁆𑀚𑀁, 𑀓𑀸𑀭𑀬𑀺𑀲𑁆𑀲𑀢𑀺𑀬𑀁 𑀦𑀭𑁄.

𑁩𑁧𑁫. ‘‘‘𑀧𑀜𑁆𑀘𑀲𑀻𑀮𑁂 𑀲𑀫𑀸𑀤𑀸𑀬, 𑀤𑀲𑀓𑀫𑁆𑀫𑀧𑀣𑁂 𑀢𑀢𑁄;

𑀲𑀫𑀸𑀤𑀸𑀬 𑀧𑀯𑀢𑁆𑀢𑁂𑀦𑁆𑀢𑁄, 𑀧𑀭𑀺𑀲𑀁 𑀲𑀺𑀓𑁆𑀔𑀸𑀧𑀬𑀺𑀲𑁆𑀲𑀢𑀺.

𑁩𑁧𑁬. ‘‘‘𑀢𑀽𑀭𑀺𑀬𑀲𑀢𑀲𑀳𑀲𑁆𑀲𑀸𑀦𑀺, 𑀪𑁂𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀯𑀚𑁆𑀚𑀬𑀺𑀲𑁆𑀲𑀦𑁆𑀢𑀺𑀫𑀁 𑀦𑀺𑀘𑁆𑀘𑀁, 𑀉𑀧𑀝𑁆𑀞𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁩𑁧𑁭. ‘‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀘𑀢𑀼𑀲𑀝𑁆𑀞𑀺𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

𑁩𑁧𑁮. ‘‘‘𑀘𑀢𑀼𑀲𑀝𑁆𑀞𑀺𑀓𑁆𑀔𑀢𑁆𑀢𑀼𑀁 𑀭𑀸𑀚𑀸, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁩𑁧𑁯. ‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁩𑁨𑁦. ‘‘‘𑀉𑀧𑀧𑀚𑁆𑀚𑀢𑀺 𑀬𑀁 𑀬𑁄𑀦𑀺𑀁, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀅𑀦𑀽𑀦𑀪𑁄𑀕𑁄 𑀳𑀼𑀢𑁆𑀯𑀸𑀦, 𑀫𑀦𑀼𑀲𑁆𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺.

𑁩𑁨𑁧. ‘‘‘𑀅𑀚𑁆𑀛𑀸𑀬𑀓𑁄 𑀪𑀯𑀺𑀢𑁆𑀯𑀸𑀦, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽;

𑀉𑀢𑁆𑀢𑀫𑀢𑁆𑀣𑀁 𑀕𑀯𑁂𑀲𑀦𑁆𑀢𑁄, 𑀘𑀭𑀺𑀲𑁆𑀲𑀢𑀺 𑀫𑀳𑀺𑀁 𑀇𑀫𑀁.

𑁩𑁨𑁨. ‘‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀲𑀸𑀲𑀦𑁂𑀪𑀺𑀭𑀫𑀺𑀲𑁆𑀲𑀢𑀺.

𑁩𑁨𑁩. ‘‘‘𑀆𑀭𑀸𑀥𑀬𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀕𑁄𑀢𑀫𑀁 𑀲𑀓𑁆𑀬𑀧𑀼𑀗𑁆𑀕𑀯𑀁;

𑀓𑀺𑀮𑁂𑀲𑁂 𑀛𑀸𑀧𑀬𑀺𑀢𑁆𑀯𑀸𑀦, 𑀅𑀭𑀳𑀸𑀬𑀁 𑀪𑀯𑀺𑀲𑁆𑀲𑀢𑀺’.

𑁩𑁨𑁪. ‘‘𑀯𑀺𑀧𑀺𑀦𑁂 𑀩𑁆𑀬𑀕𑁆𑀖𑀭𑀸𑀚𑀸𑀯, 𑀫𑀺𑀕𑀭𑀸𑀚𑀸𑀯 𑀓𑁂𑀲𑀭𑀻;

𑀅𑀪𑀻𑀢𑁄 𑀯𑀺𑀳𑀭𑀸𑀫𑀚𑁆𑀚, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

𑁩𑁨𑁫. ‘‘𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑁂 𑀯𑀸, 𑀤𑀮𑀺𑀤𑁆𑀤𑁂 𑀤𑀼𑀕𑁆𑀕𑀢𑀺𑀫𑁆𑀳𑀺 𑀯𑀸;

𑀦𑀺𑀩𑁆𑀩𑀢𑁆𑀢𑀺𑀁 𑀫𑁂 𑀦 𑀧𑀲𑁆𑀲𑀸𑀫𑀺, 𑀉𑀧𑀝𑁆𑀞𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁩𑁨𑁬. ‘‘𑀯𑀺𑀯𑁂𑀓𑀫𑀦𑀼𑀬𑀼𑀢𑁆𑀢𑁄𑀫𑁆𑀳𑀺, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁨𑁭. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁨𑁮. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁨𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀚𑀢𑀼𑀓𑀡𑁆𑀡𑀺𑀢𑁆𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀚𑀢𑀼𑀓𑀡𑁆𑀡𑀺𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.