𑁧𑁦. 𑀉𑀤𑁂𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁩𑁦. ‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀧𑀤𑀼𑀫𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

𑁩𑁩𑁧. ‘‘𑀦𑀤𑀺𑀬𑁄 𑀲𑀦𑁆𑀤𑀭𑁂 𑀢𑀢𑁆𑀣, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸;

𑀅𑀘𑁆𑀙𑁄𑀤𑀓𑀸 𑀲𑀻𑀢𑀚𑀮𑀸, 𑀲𑀦𑁆𑀤𑀭𑁂 𑀦𑀤𑀺𑀬𑁄 𑀲𑀤𑀸.

𑁩𑁩𑁨. ‘‘𑀧𑀸𑀞𑀻𑀦𑀸 𑀧𑀸𑀯𑀼𑀲𑀸 𑀫𑀘𑁆𑀙𑀸, 𑀩𑀮𑀚𑀸 𑀫𑀼𑀜𑁆𑀚𑀭𑁄𑀳𑀺𑀢𑀸;

𑀲𑁄𑀪𑁂𑀦𑁆𑀢𑀸 𑀦𑀤𑀺𑀬𑁄 𑀏𑀢𑁂, 𑀯𑀲𑀦𑁆𑀢𑀺 𑀦𑀤𑀺𑀬𑀸 𑀲𑀤𑀸.

𑁩𑁩𑁩. ‘‘𑀅𑀫𑁆𑀩𑀚𑀫𑁆𑀩𑀽𑀳𑀺 𑀲𑀜𑁆𑀙𑀦𑁆𑀦𑀸, 𑀓𑀭𑁂𑀭𑀺𑀢𑀺𑀮𑀓𑀸 𑀢𑀣𑀸;

𑀉𑀤𑁆𑀤𑀸𑀮𑀓𑀸 𑀧𑀸𑀝𑀮𑀺𑀬𑁄, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁩𑁪. ‘‘𑀅𑀗𑁆𑀓𑁄𑀮𑀓𑀸 𑀩𑀺𑀫𑁆𑀩𑀺𑀚𑀸𑀮𑀸, 𑀫𑀸𑀬𑀸𑀓𑀸𑀭𑀻 𑀘 𑀧𑀼𑀧𑁆𑀨𑀺𑀢𑀸;

𑀕𑀦𑁆𑀥𑁂𑀦 𑀉𑀧𑀯𑀸𑀬𑀦𑁆𑀢𑀸, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁩𑁫. ‘‘𑀅𑀢𑀺𑀫𑀼𑀢𑁆𑀢𑀸 𑀲𑀢𑁆𑀢𑀮𑀺𑀓𑀸, 𑀦𑀸𑀕𑀸 𑀲𑀸𑀮𑀸 𑀘 𑀧𑀼𑀧𑁆𑀨𑀺𑀢𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁩𑁬. ‘‘𑀓𑁄𑀲𑀫𑁆𑀩𑀸 𑀲𑀴𑀮𑀸 𑀦𑀻𑀧𑀸, 𑀅𑀝𑁆𑀞𑀗𑁆𑀕𑀸𑀧𑀺 𑀘 𑀧𑀼𑀧𑁆𑀨𑀺𑀢𑀸 [𑀅𑀝𑁆𑀞𑀗𑁆𑀕𑀸 𑀘 𑀲𑀼𑀧𑀼𑀧𑁆𑀨𑀺𑀢𑀸 (𑀲𑀻.), 𑀓𑀝𑁆𑀞𑀗𑁆𑀕𑀸 𑀘 𑀲𑀼𑀧𑀼𑀧𑁆𑀨𑀺𑀢𑀸 (𑀧𑀻.)];

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁩𑁭. ‘‘𑀳𑀭𑀻𑀢𑀓𑀸 𑀆𑀫𑀮𑀓𑀸, 𑀅𑀫𑁆𑀩𑀚𑀫𑁆𑀩𑀼𑀯𑀺𑀪𑀻𑀢𑀓𑀸;

𑀓𑁄𑀮𑀸 𑀪𑀮𑁆𑀮𑀸𑀢𑀓𑀸 𑀩𑀺𑀮𑁆𑀮𑀸, 𑀨𑀮𑀸𑀦𑀺 𑀩𑀳𑀼 𑀅𑀲𑁆𑀲𑀫𑁂.

𑁩𑁩𑁮. ‘‘𑀓𑀮𑀫𑁆𑀩𑀸 𑀓𑀦𑁆𑀤𑀮𑀻 𑀢𑀢𑁆𑀣, 𑀧𑀼𑀧𑁆𑀨𑀦𑁆𑀢𑀺 𑀫𑀫 𑀅𑀲𑁆𑀲𑀫𑁂;

𑀤𑀺𑀩𑁆𑀩𑀕𑀦𑁆𑀥𑀁 [𑀤𑀺𑀩𑁆𑀩𑀕𑀦𑁆𑀥𑀸 (𑀲𑀻. 𑀲𑁆𑀬𑀸. 𑀧𑀻.) 𑀏𑀯𑀁 𑀧𑀭𑀢𑁆𑀣𑀧𑀺] 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁩𑁯. ‘‘𑀅𑀲𑁄𑀓𑀧𑀺𑀡𑁆𑀟𑀺𑀯𑀸𑀭𑀻 𑀘 [𑀅𑀲𑁄𑀓𑀧𑀺𑀡𑁆𑀟𑀻 𑀘 𑀯𑀭𑀻 (𑀲𑀻. 𑀲𑁆𑀬𑀸.), 𑀅𑀲𑁄𑀓𑀧𑀺𑀡𑁆𑀟𑀻 𑀘 𑀯𑀸𑀭𑀻 (𑀧𑀻.)], 𑀦𑀺𑀫𑁆𑀩𑀭𑀼𑀓𑁆𑀔𑀸 𑀘 𑀧𑀼𑀧𑁆𑀨𑀺𑀢𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁪𑁦. ‘‘𑀧𑀼𑀦𑁆𑀦𑀸𑀕𑀸 𑀕𑀺𑀭𑀺𑀧𑀼𑀦𑁆𑀦𑀸𑀕𑀸, 𑀢𑀺𑀫𑀺𑀭𑀸 𑀢𑀢𑁆𑀣 𑀧𑀼𑀧𑁆𑀨𑀺𑀢𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁪𑁧. ‘‘𑀦𑀺𑀕𑁆𑀕𑀼𑀡𑁆𑀟𑀻 𑀲𑀺𑀭𑀺𑀦𑀺𑀕𑁆𑀕𑀼𑀡𑁆𑀟𑀻, 𑀘𑀫𑁆𑀧𑀭𑀼𑀓𑁆𑀔𑁂𑀢𑁆𑀣 𑀧𑀼𑀧𑁆𑀨𑀺𑀢𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁪𑁨. ‘‘𑀅𑀯𑀺𑀤𑀽𑀭𑁂 𑀧𑁄𑀓𑁆𑀔𑀭𑀡𑀻, 𑀘𑀓𑁆𑀓𑀯𑀸𑀓𑀽𑀧𑀓𑀽𑀚𑀺𑀢𑀸;

𑀫𑀦𑁆𑀤𑀸𑀮𑀓𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀧𑀤𑀼𑀫𑀼𑀧𑁆𑀧𑀮𑀓𑁂𑀳𑀺 𑀘.

𑁩𑁪𑁩. ‘‘𑀅𑀘𑁆𑀙𑁄𑀤𑀓𑀸 𑀲𑀻𑀢𑀚𑀮𑀸, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸;

𑀅𑀘𑁆𑀙𑀸 𑀨𑀮𑀺𑀓𑀲𑀫𑀸𑀦𑀸, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁪𑁪. ‘‘𑀧𑀤𑀼𑀫𑀸 𑀧𑀼𑀧𑁆𑀨𑀭𑁂 𑀢𑀢𑁆𑀣, 𑀧𑀼𑀡𑁆𑀟𑀭𑀻𑀓𑀸 𑀘 𑀉𑀧𑁆𑀧𑀮𑀸;

𑀫𑀦𑁆𑀤𑀸𑀮𑀓𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁪𑁫. ‘‘𑀧𑀸𑀞𑀻𑀦𑀸 𑀧𑀸𑀯𑀼𑀲𑀸 𑀫𑀘𑁆𑀙𑀸, 𑀩𑀮𑀚𑀸 𑀫𑀼𑀜𑁆𑀚𑀭𑁄𑀳𑀺𑀢𑀸;

𑀯𑀺𑀘𑀭𑀦𑁆𑀢𑀸𑀯 𑀢𑁂 𑀢𑀢𑁆𑀣, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁪𑁬. ‘‘𑀓𑀼𑀫𑁆𑀪𑀻𑀮𑀸 𑀲𑀼𑀲𑀼𑀫𑀸𑀭𑀸 𑀘, 𑀓𑀘𑁆𑀙𑀧𑀸 𑀘 𑀕𑀳𑀸 𑀩𑀳𑀽;

𑀑𑀕𑀳𑀸 𑀅𑀚𑀕𑀭𑀸 𑀘, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁪𑁭. ‘‘𑀧𑀸𑀭𑁂𑀯𑀢𑀸 𑀭𑀯𑀺𑀳𑀁𑀲𑀸, 𑀘𑀓𑁆𑀓𑀯𑀸𑀓𑀸 𑀦𑀤𑀻𑀘𑀭𑀸;

𑀤𑀺𑀦𑁆𑀤𑀺𑀪𑀸 𑀲𑀸𑀴𑀺𑀓𑀸 𑀘𑁂𑀢𑁆𑀣, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁪𑁮. ‘‘𑀦𑀬𑀺𑀢𑀸 𑀅𑀫𑁆𑀩𑀕𑀦𑁆𑀥𑀻 𑀘, 𑀓𑁂𑀢𑀓𑀸 𑀢𑀢𑁆𑀣 𑀧𑀼𑀧𑁆𑀨𑀺𑀢𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁪𑁯. ‘‘𑀲𑀻𑀳𑀸 𑀩𑁆𑀬𑀕𑁆𑀖𑀸 𑀘 𑀤𑀻𑀧𑀻 𑀘, 𑀅𑀘𑁆𑀙𑀓𑁄𑀓𑀢𑀭𑀘𑁆𑀙𑀓𑀸;

𑀅𑀦𑀼𑀲𑀜𑁆𑀘𑀭𑀦𑁆𑀢𑀸 𑀧𑀯𑀦𑁂, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁫𑁦. ‘‘𑀚𑀝𑀸𑀪𑀸𑀭𑁂𑀦 𑀪𑀭𑀺𑀢𑀸, 𑀅𑀚𑀺𑀦𑀼𑀢𑁆𑀢𑀭𑀯𑀸𑀲𑀦𑀸;

𑀅𑀦𑀼𑀲𑀜𑁆𑀘𑀭𑀦𑁆𑀢𑀸 𑀧𑀯𑀦𑁂, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁫𑁧. ‘‘𑀅𑀚𑀺𑀦𑀸𑀦𑀺𑀥𑀭𑀸 𑀏𑀢𑁂, 𑀦𑀺𑀧𑀓𑀸 𑀲𑀦𑁆𑀢𑀯𑀼𑀢𑁆𑀢𑀺𑀦𑁄;

𑀅𑀧𑁆𑀧𑀸𑀳𑀸𑀭𑀸𑀯 𑀢𑁂 𑀲𑀩𑁆𑀩𑁂, 𑀲𑁄𑀪𑁂𑀦𑁆𑀢𑀺 𑀫𑀫 𑀅𑀲𑁆𑀲𑀫𑀁.

𑁩𑁫𑁨. ‘‘𑀔𑀸𑀭𑀺𑀪𑀸𑀭𑀁 𑀕𑀳𑁂𑀢𑁆𑀯𑀸𑀦, 𑀅𑀚𑁆𑀛𑁄𑀕𑀬𑁆𑀳 𑀯𑀦𑀁 𑀢𑀤𑀸;

𑀫𑀽𑀮𑀨𑀮𑀸𑀦𑀺 𑀪𑀼𑀜𑁆𑀚𑀦𑁆𑀢𑀸, 𑀯𑀲𑀦𑁆𑀢𑀺 𑀅𑀲𑁆𑀲𑀫𑁂 𑀢𑀤𑀸.

𑁩𑁫𑁩. ‘‘𑀦 𑀢𑁂 𑀤𑀸𑀭𑀼𑀁 𑀆𑀳𑀭𑀦𑁆𑀢𑀺, 𑀉𑀤𑀓𑀁 𑀧𑀸𑀤𑀥𑁄𑀯𑀦𑀁;

𑀲𑀩𑁆𑀩𑁂𑀲𑀁 𑀆𑀦𑀼𑀪𑀸𑀯𑁂𑀦, 𑀲𑀬𑀫𑁂𑀯𑀸𑀳𑀭𑀻𑀬𑀢𑀺.

𑁩𑁫𑁪. ‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀇𑀲𑀬𑁂𑀢𑁆𑀣 𑀲𑀫𑀸𑀕𑀢𑀸;

𑀲𑀩𑁆𑀩𑁂𑀯 𑀛𑀸𑀬𑀺𑀦𑁄 𑀏𑀢𑁂, 𑀉𑀢𑁆𑀢𑀫𑀢𑁆𑀣𑀕𑀯𑁂𑀲𑀓𑀸.

𑁩𑁫𑁫. ‘‘𑀢𑀧𑀲𑁆𑀲𑀺𑀦𑁄 𑀩𑁆𑀭𑀳𑁆𑀫𑀘𑀸𑀭𑀻, 𑀘𑁄𑀤𑁂𑀦𑁆𑀢𑀸 𑀅𑀧𑁆𑀧𑀦𑀸𑀯 𑀢𑁂;

𑀅𑀫𑁆𑀩𑀭𑀸𑀯𑀘𑀭𑀸 𑀲𑀩𑁆𑀩𑁂, 𑀯𑀲𑀦𑁆𑀢𑀺 𑀅𑀲𑁆𑀲𑀫𑁂 𑀢𑀤𑀸.

𑁩𑁫𑁬. ‘‘𑀧𑀜𑁆𑀘𑀸𑀳𑀁 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀏𑀓𑀕𑁆𑀕𑀸 𑀲𑀦𑁆𑀢𑀯𑀼𑀢𑁆𑀢𑀺𑀦𑁄;

𑀅𑀜𑁆𑀜𑁄𑀜𑁆𑀜𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀧𑀓𑁆𑀓𑀫𑀦𑁆𑀢𑀺 𑀤𑀺𑀲𑀸𑀫𑀼𑀔𑀸.

𑁩𑁫𑁭. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀢𑀫𑀦𑁆𑀥𑀓𑀸𑀭𑀁 𑀯𑀺𑀥𑀫𑀁, 𑀉𑀧𑁆𑀧𑀚𑁆𑀚𑀺 𑀢𑀸𑀯𑀤𑁂 𑀚𑀺𑀦𑁄.

𑁩𑁫𑁮. ‘‘𑀫𑀫 𑀅𑀲𑁆𑀲𑀫𑀲𑀸𑀫𑀦𑁆𑀢𑀸, 𑀬𑀓𑁆𑀔𑁄 𑀆𑀲𑀺 𑀫𑀳𑀺𑀤𑁆𑀥𑀺𑀓𑁄;

𑀲𑁄 𑀫𑁂 𑀲𑀁𑀲𑀺𑀢𑁆𑀣 𑀲𑀫𑁆𑀩𑀼𑀤𑁆𑀥𑀁, 𑀚𑀮𑀚𑀼𑀢𑁆𑀢𑀫𑀦𑀸𑀬𑀓𑀁.

𑁩𑁫𑁯. ‘‘𑀏𑀲 𑀩𑀼𑀤𑁆𑀥𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀫𑀼𑀦𑀺;

𑀔𑀺𑀧𑁆𑀧𑀁 𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀧𑀬𑀺𑀭𑀽𑀧𑀸𑀲 𑀫𑀸𑀭𑀺𑀲.

𑁩𑁬𑁦. ‘‘𑀬𑀓𑁆𑀔𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀅𑀲𑁆𑀲𑀫𑀁 𑀲𑀁𑀲𑀸𑀫𑁂𑀢𑁆𑀯𑀸𑀦, 𑀦𑀺𑀓𑁆𑀔𑀫𑀺𑀁 𑀯𑀺𑀧𑀺𑀦𑀸 𑀢𑀤𑀸.

𑁩𑁬𑁧. ‘‘𑀘𑁂𑀴𑁂𑀯 𑀟𑀬𑁆𑀳𑀫𑀸𑀦𑀫𑁆𑀳𑀺, 𑀦𑀺𑀓𑁆𑀔𑀫𑀺𑀢𑁆𑀯𑀸𑀦 𑀅𑀲𑁆𑀲𑀫𑀸;

𑀏𑀓𑀭𑀢𑁆𑀢𑀺𑀁 𑀦𑀺𑀯𑀸𑀲𑁂𑀢𑁆𑀯𑀸 [𑀦𑀺𑀯𑀲𑀺𑀢𑁆𑀯𑀸 (𑀲𑀻.), 𑀦𑀺𑀯𑀸𑀲𑁂𑀦 (?)], 𑀉𑀧𑀕𑀘𑁆𑀙𑀺𑀁 𑀯𑀺𑀦𑀸𑀬𑀓𑀁.

𑁩𑁬𑁨. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑁄, 𑀤𑁂𑀲𑁂𑀲𑀺 𑀅𑀫𑀢𑀁 𑀧𑀤𑀁.

𑁩𑁬𑁩. ‘‘𑀲𑀼𑀨𑀼𑀮𑁆𑀮𑀁 𑀧𑀤𑀼𑀫𑀁 𑀕𑀬𑁆𑀳, 𑀉𑀧𑀕𑀦𑁆𑀢𑁆𑀯𑀸 𑀫𑀳𑁂𑀲𑀺𑀦𑁄;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁩𑁬𑁪. ‘‘𑀧𑀽𑀚𑀬𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀚𑀮𑀚𑀼𑀢𑁆𑀢𑀫𑀦𑀸𑀬𑀓𑀁;

𑀏𑀓𑀁𑀲𑀁 𑀅𑀚𑀺𑀦𑀁 𑀓𑀢𑁆𑀯𑀸, 𑀲𑀦𑁆𑀣𑀯𑀺𑀁 𑀮𑁄𑀓𑀦𑀸𑀬𑀓𑀁.

𑁩𑁬𑁫. ‘‘𑀬𑁂𑀦 𑀜𑀸𑀡𑁂𑀦 𑀲𑀫𑁆𑀩𑀼𑀤𑁆𑀥𑁄, 𑀯𑀲𑀢𑀻𑀳 𑀅𑀦𑀸𑀲𑀯𑁄;

𑀢𑀁 𑀜𑀸𑀡𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁩𑁬𑁬. ‘‘‘𑀲𑀁𑀲𑀸𑀭𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀢𑀸𑀭𑁂𑀲𑀺 𑀲𑀩𑁆𑀩𑀧𑀸𑀡𑀺𑀦𑀁;

𑀢𑀯 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀢𑀡𑁆𑀳𑀸𑀲𑁄𑀢𑀁 𑀢𑀭𑀦𑁆𑀢𑀺 𑀢𑁂.

𑁩𑁬𑁭. ‘‘‘𑀢𑀼𑀯𑀁 𑀲𑀢𑁆𑀣𑀸 𑀘 𑀓𑁂𑀢𑀼 𑀘, 𑀥𑀚𑁄 𑀬𑀽𑀧𑁄 𑀘 𑀧𑀸𑀡𑀺𑀦𑀁;

𑀧𑀭𑀸𑀬𑀡𑁄 𑀧𑀢𑀺𑀝𑁆𑀞𑀸 𑀘, 𑀤𑀻𑀧𑁄 𑀘 𑀤𑁆𑀯𑀺𑀧𑀤𑀼𑀢𑁆𑀢𑀫 [𑀤𑀺𑀧𑀤𑀼𑀢𑁆𑀢𑀫 (𑀲𑀻. 𑀲𑁆𑀬𑀸. 𑀧𑀻.)].

𑁩𑁬𑁮. ‘‘‘𑀬𑀸𑀯𑀢𑀸 𑀕𑀡𑀺𑀦𑁄 𑀮𑁄𑀓𑁂, 𑀲𑀢𑁆𑀣𑀯𑀸𑀳𑀸 𑀧𑀯𑀼𑀘𑁆𑀘𑀭𑁂;

𑀢𑀼𑀯𑀁 𑀅𑀕𑁆𑀕𑁄𑀲𑀺 𑀲𑀩𑁆𑀩𑀜𑁆𑀜𑀼, 𑀢𑀯 𑀅𑀦𑁆𑀢𑁄𑀕𑀥𑀸𑀯 𑀢𑁂.

𑁩𑁬𑁯. ‘‘‘𑀢𑀯 𑀜𑀸𑀡𑁂𑀦 𑀲𑀩𑁆𑀩𑀜𑁆𑀜𑀼, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁;

𑀢𑀯 𑀤𑀲𑁆𑀲𑀦𑀫𑀸𑀕𑀫𑁆𑀫, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀭𑁂.

𑁩𑁭𑁦. ‘‘‘𑀬𑁂 𑀓𑁂𑀘𑀺𑀫𑁂 𑀕𑀦𑁆𑀥𑀚𑀸𑀢𑀸, 𑀮𑁄𑀓𑁂 𑀯𑀸𑀬𑀦𑁆𑀢𑀺 𑀘𑀓𑁆𑀔𑀼𑀫;

𑀢𑀯 𑀕𑀦𑁆𑀥𑀲𑀫𑁄 𑀦𑀢𑁆𑀣𑀺, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀫𑀳𑀸𑀫𑀼𑀦𑁂’.

𑁩𑁭𑁧. ‘‘‘𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀦𑀺𑀭𑀬𑀁, 𑀧𑀭𑀺𑀫𑁄𑀘𑁂𑀲𑀺 [𑀧𑀭𑀺𑀫𑁄𑀘𑁂𑀳𑀺 (𑀲𑁆𑀬𑀸. 𑀓.)] 𑀘𑀓𑁆𑀔𑀼𑀫;

𑀅𑀲𑀗𑁆𑀔𑀢𑀁 𑀧𑀤𑀁 𑀲𑀦𑁆𑀢𑀁, 𑀤𑁂𑀲𑁂𑀲𑀺 [𑀤𑁂𑀲𑁂𑀳𑀺 (𑀲𑁆𑀬𑀸. 𑀓.)] 𑀢𑁆𑀯𑀁 𑀫𑀳𑀸𑀫𑀼𑀦𑁂’.

𑁩𑁭𑁨. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁩𑁭𑁩. ‘‘‘𑀬𑁄 𑀫𑁂 𑀜𑀸𑀡𑀁 𑀅𑀧𑀽𑀚𑁂𑀲𑀺, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁩𑁭𑁪. ‘‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺’.

𑁩𑁭𑁫. ‘‘𑀲𑀼𑀮𑀤𑁆𑀥𑀮𑀸𑀪𑀁 𑀮𑀤𑁆𑀥𑁄𑀫𑁆𑀳𑀺, 𑀢𑁄𑀲𑀬𑀺𑀢𑁆𑀯𑀸𑀦 𑀲𑀼𑀩𑁆𑀩𑀢𑀁;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁭𑁬. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁭𑁭. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁭𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀤𑁂𑀦𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀤𑁂𑀦𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀫𑁂𑀢𑁆𑀢𑁂𑀬𑁆𑀬𑀯𑀕𑁆𑀕𑁄 𑀏𑀓𑀘𑀢𑁆𑀢𑀸𑀮𑀻𑀲𑀫𑁄.