𑁪𑁧. 𑀫𑁂𑀢𑁆𑀢𑁂𑀬𑁆𑀬𑀯𑀕𑁆𑀕𑁄

𑁧. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀩𑁆𑀪𑀸𑀭𑀓𑀽𑀝𑀁 𑀦𑀺𑀲𑁆𑀲𑀸𑀬, 𑀲𑁄𑀪𑀺𑀢𑁄 𑀦𑀸𑀫 𑀢𑀸𑀧𑀲𑁄;

𑀧𑀯𑀢𑁆𑀢𑀨𑀮𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀯𑀲𑀢𑀺 𑀧𑀩𑁆𑀩𑀢𑀦𑁆𑀢𑀭𑁂.

𑁨. ‘‘𑀅𑀕𑁆𑀕𑀺𑀁 𑀤𑀸𑀭𑀼𑀁 𑀆𑀳𑀭𑀺𑀢𑁆𑀯𑀸, 𑀉𑀚𑁆𑀚𑀸𑀮𑁂𑀲𑀺𑀁 𑀅𑀳𑀁 𑀢𑀤𑀸;

𑀉𑀢𑁆𑀢𑀫𑀢𑁆𑀣𑀁 𑀕𑀯𑁂𑀲𑀦𑁆𑀢𑁄, 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸.

𑁩. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑁄 𑀲𑁄, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑁂.

𑁪. ‘‘𑀓𑀺𑀁 𑀓𑀭𑁄𑀲𑀺 𑀫𑀳𑀸𑀧𑀼𑀜𑁆𑀜, 𑀤𑁂𑀳𑀺 𑀫𑁂 𑀅𑀕𑁆𑀕𑀺𑀤𑀸𑀭𑀼𑀓𑀁;

𑀅𑀳𑀫𑀕𑁆𑀕𑀺𑀁 𑀧𑀭𑀺𑀘𑀭𑁂, 𑀢𑀢𑁄 𑀫𑁂 𑀲𑀼𑀤𑁆𑀥𑀺 𑀳𑁄𑀳𑀺𑀢𑀺 [𑀳𑁂𑀳𑀺𑀢𑀺 (𑀲𑀻.)].

𑁫. ‘‘𑀲𑀼𑀪𑀤𑁆𑀤𑀓𑁄 𑀢𑁆𑀯𑀁 𑀫𑀦𑀼𑀚𑁂, 𑀤𑁂𑀯𑀢𑁂 𑀢𑁆𑀯𑀁 𑀧𑀚𑀸𑀦𑀲𑀺;

𑀢𑀼𑀯𑀁 𑀅𑀕𑁆𑀕𑀺𑀁 𑀧𑀭𑀺𑀘𑀭, 𑀳𑀦𑁆𑀤 𑀢𑁂 𑀅𑀕𑁆𑀕𑀺𑀤𑀸𑀭𑀼𑀓𑀁.

𑁬. ‘‘𑀢𑀢𑁄 𑀓𑀝𑁆𑀞𑀁 𑀕𑀳𑁂𑀢𑁆𑀯𑀸𑀦, 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑀬𑀻 𑀚𑀺𑀦𑁄;

𑀦 𑀢𑀢𑁆𑀣 𑀓𑀝𑁆𑀞𑀁 𑀧𑀚𑁆𑀛𑀸𑀬𑀺, 𑀧𑀸𑀝𑀺𑀳𑁂𑀭𑀁 𑀫𑀳𑁂𑀲𑀺𑀦𑁄.

𑁭. ‘‘𑀦 𑀢𑁂 𑀅𑀕𑁆𑀕𑀺 𑀧𑀚𑁆𑀚𑀮𑀢𑀺, 𑀆𑀳𑀼𑀢𑀻 𑀢𑁂 𑀦 𑀯𑀺𑀚𑁆𑀚𑀢𑀺;

𑀦𑀺𑀭𑀢𑁆𑀣𑀓𑀁 𑀯𑀢𑀁 𑀢𑀼𑀬𑁆𑀳𑀁, 𑀅𑀕𑁆𑀕𑀺𑀁 𑀧𑀭𑀺𑀘𑀭𑀲𑁆𑀲𑀼 𑀫𑁂.

𑁮. ‘‘𑀓𑀻𑀤𑀺𑀲𑁄 𑀲𑁄 [𑀢𑁂 (𑀲𑁆𑀬𑀸. 𑀓.)] 𑀫𑀳𑀸𑀯𑀻𑀭, 𑀅𑀕𑁆𑀕𑀺 𑀢𑀯 𑀧𑀯𑀼𑀘𑁆𑀘𑀢𑀺;

𑀫𑀬𑁆𑀳𑀫𑁆𑀧𑀺 𑀓𑀣𑀬𑀲𑁆𑀲𑁂𑀢𑀁, 𑀉𑀪𑁄 𑀧𑀭𑀺𑀘𑀭𑀸𑀫𑀲𑁂.

𑁯. ‘‘𑀳𑁂𑀢𑀼𑀥𑀫𑁆𑀫𑀦𑀺𑀭𑁄𑀥𑀸𑀬, 𑀓𑀺𑀮𑁂𑀲𑀲𑀫𑀡𑀸𑀬 𑀘;

𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀳𑀺𑀢𑁆𑀯𑀸, 𑀢𑀬𑁄 𑀏𑀢𑁂 𑀫𑀫𑀸𑀳𑀼𑀢𑀻.

𑁧𑁦. ‘‘𑀓𑀻𑀤𑀺𑀲𑁄 𑀢𑁆𑀯𑀁 𑀫𑀳𑀸𑀯𑀻𑀭, 𑀓𑀣𑀁 𑀕𑁄𑀢𑁆𑀢𑁄𑀲𑀺 𑀫𑀸𑀭𑀺𑀲;

𑀆𑀘𑀸𑀭𑀧𑀝𑀺𑀧𑀢𑁆𑀢𑀺 𑀢𑁂, 𑀩𑀸𑀴𑁆𑀳𑀁 𑀔𑁄 𑀫𑀫 𑀭𑀼𑀘𑁆𑀘𑀢𑀺.

𑁧𑁧. ‘‘𑀔𑀢𑁆𑀢𑀺𑀬𑀫𑁆𑀳𑀺 𑀓𑀼𑀮𑁂 𑀚𑀸𑀢𑁄, 𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀁 𑀕𑀢𑁄;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁧𑁨. ‘‘𑀬𑀤𑀺 𑀩𑀼𑀤𑁆𑀥𑁄𑀲𑀺 𑀲𑀩𑁆𑀩𑀜𑁆𑀜𑀽, 𑀧𑀪𑀗𑁆𑀓𑀭 𑀢𑀫𑁄𑀦𑀼𑀤;

𑀦𑀫𑀲𑁆𑀲𑀺𑀲𑁆𑀲𑀸𑀫𑀺 𑀢𑀁 𑀤𑁂𑀯, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀢𑀼𑀯𑀁.

𑁧𑁩. ‘‘𑀧𑀢𑁆𑀣𑀭𑀺𑀢𑁆𑀯𑀸𑀚𑀺𑀦𑀘𑀫𑁆𑀫𑀁, 𑀦𑀺𑀲𑀻𑀤𑀦𑀫𑀤𑀸𑀲𑀳𑀁;

𑀦𑀺𑀲𑀻𑀤 𑀦𑀸𑀣 𑀲𑀩𑁆𑀩𑀜𑁆𑀜𑀼, 𑀉𑀧𑀝𑁆𑀞𑀺𑀲𑁆𑀲𑀸𑀫𑀳𑀁 𑀢𑀼𑀯𑀁.

𑁧𑁪. ‘‘𑀦𑀺𑀲𑀻𑀤𑀺 𑀪𑀕𑀯𑀸 𑀢𑀢𑁆𑀣, 𑀅𑀚𑀺𑀦𑀫𑁆𑀳𑀺 𑀲𑀼𑀯𑀺𑀢𑁆𑀣𑀢𑁂;

𑀦𑀺𑀫𑀦𑁆𑀢𑀬𑀺𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑀁, 𑀧𑀩𑁆𑀩𑀢𑀁 𑀅𑀕𑀫𑀸𑀲𑀳𑀁.

𑁧𑁫. ‘‘𑀔𑀸𑀭𑀺𑀪𑀸𑀭𑀜𑁆𑀘 𑀧𑀽𑀭𑁂𑀢𑁆𑀯𑀸, 𑀢𑀺𑀦𑁆𑀤𑀼𑀓𑀨𑀮𑀫𑀸𑀳𑀭𑀺𑀁;

𑀫𑀥𑀼𑀦𑀸 𑀬𑁄𑀚𑀬𑀺𑀢𑁆𑀯𑀸𑀦, 𑀨𑀮𑀁 𑀩𑀼𑀤𑁆𑀥𑀲𑁆𑀲𑀤𑀸𑀲𑀳𑀁.

𑁧𑁬. ‘‘𑀫𑀫 𑀦𑀺𑀚𑁆𑀛𑀸𑀬𑀫𑀸𑀦𑀲𑁆𑀲, 𑀧𑀭𑀺𑀪𑀼𑀜𑁆𑀚𑀺 𑀢𑀤𑀸 𑀚𑀺𑀦𑁄;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺𑀁, 𑀧𑁂𑀓𑁆𑀔𑀦𑁆𑀢𑁄 𑀮𑁄𑀓𑀦𑀸𑀬𑀓𑀁.

𑁧𑁭. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫𑀲𑁆𑀲𑀫𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁧𑁮. ‘‘‘𑀬𑁄 𑀫𑀁 𑀨𑀮𑁂𑀦 𑀢𑀧𑁆𑀧𑁂𑀲𑀺, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁧𑁯. ‘‘‘𑀧𑀜𑁆𑀘𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀁 𑀲𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁨𑁦. ‘‘‘𑀢𑀲𑁆𑀲 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀼𑀩𑁆𑀩𑀓𑀫𑁆𑀫𑀲𑀫𑀗𑁆𑀕𑀺𑀦𑁄;

𑀅𑀦𑁆𑀦𑀁 𑀧𑀸𑀦𑀜𑁆𑀘 𑀯𑀢𑁆𑀣𑀜𑁆𑀘, 𑀲𑀬𑀦𑀜𑁆𑀘 𑀫𑀳𑀸𑀭𑀳𑀁.

𑁨𑁧. ‘‘‘𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑀸, 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺 𑀢𑀸𑀯𑀤𑁂;

𑀲𑀤𑀸 𑀧𑀫𑀼𑀤𑀺𑀢𑁄 𑀘𑀸𑀬𑀁, 𑀪𑀯𑀺𑀲𑁆𑀲𑀢𑀺 𑀅𑀦𑀸𑀫𑀬𑁄.

𑁨𑁨. ‘‘‘𑀉𑀧𑀧𑀚𑁆𑀚𑀢𑀺 𑀬𑀁 𑀬𑁄𑀦𑀺𑀁, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑁄 𑀳𑀼𑀢𑁆𑀯𑀸, 𑀫𑀦𑀼𑀲𑁆𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺.

𑁨𑁩. ‘‘‘𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽;

𑀲𑀫𑁆𑀩𑀼𑀤𑁆𑀥𑀁 𑀉𑀧𑀕𑀦𑁆𑀢𑁆𑀯𑀸𑀦, 𑀅𑀭𑀳𑀸 𑀲𑁄 𑀪𑀯𑀺𑀲𑁆𑀲𑀢𑀺’.

𑁨𑁪. ‘‘𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦𑀁, 𑀬𑀢𑁄 𑀧𑀢𑁆𑀢𑁄𑀲𑁆𑀫𑀺 𑀯𑀺𑀜𑁆𑀜𑀼𑀢𑀁;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁫. ‘‘𑀯𑀭𑀥𑀫𑁆𑀫𑀫𑀦𑀼𑀧𑁆𑀧𑀢𑁆𑀢𑁄, 𑀭𑀸𑀕𑀤𑁄𑀲𑁂 𑀲𑀫𑀽𑀳𑀦𑀺𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁨𑁬. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁭. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀧𑀼𑀡𑁆𑀡𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁯. ‘‘𑀧𑀩𑁆𑀪𑀸𑀭𑀓𑀽𑀝𑀁 𑀦𑀺𑀲𑁆𑀲𑀸𑀬, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀆𑀩𑀸𑀥𑀺𑀓𑁄 𑀘 𑀲𑁄 [𑀆𑀩𑀸𑀥𑀺𑀓𑁄 𑀕𑀭𑀼 (𑀲𑀻.)] 𑀩𑀼𑀤𑁆𑀥𑁄, 𑀯𑀲𑀢𑀺 𑀧𑀩𑁆𑀩𑀢𑀦𑁆𑀢𑀭𑁂.

𑁩𑁦. ‘‘𑀫𑀫 𑀅𑀲𑁆𑀲𑀫𑀲𑀸𑀫𑀦𑁆𑀢𑀸, 𑀧𑀦𑀸𑀤𑁄 𑀆𑀲𑀺 𑀢𑀸𑀯𑀤𑁂;

𑀩𑀼𑀤𑁆𑀥𑁂 𑀦𑀺𑀩𑁆𑀩𑀸𑀬𑀫𑀸𑀦𑀫𑁆𑀳𑀺, 𑀆𑀮𑁄𑀓𑁄 𑀉𑀤𑀧𑀚𑁆𑀚𑀣 [𑀆𑀲𑀺 𑀢𑀸𑀯𑀤𑁂 (𑀲𑁆𑀬𑀸. 𑀓.)].

𑁩𑁧. ‘‘𑀬𑀸𑀯𑀢𑀸 𑀯𑀦𑀲𑀡𑁆𑀟𑀲𑁆𑀫𑀺𑀁, 𑀅𑀘𑁆𑀙𑀓𑁄𑀓𑀢𑀭𑀘𑁆𑀙𑀓𑀸;

𑀯𑀸𑀴𑀸 𑀘 [𑀩𑁆𑀬𑀕𑁆𑀖𑀸 (𑀲𑀻.)] 𑀓𑁂𑀲𑀭𑀻 𑀲𑀩𑁆𑀩𑁂, 𑀅𑀪𑀺𑀕𑀚𑁆𑀚𑀺𑀁𑀲𑀼 𑀢𑀸𑀯𑀤𑁂.

𑁩𑁨. ‘‘𑀉𑀧𑁆𑀧𑀸𑀢𑀁 𑀢𑀫𑀳𑀁 𑀤𑀺𑀲𑁆𑀯𑀸, 𑀧𑀩𑁆𑀪𑀸𑀭𑀁 𑀅𑀕𑀫𑀸𑀲𑀳𑀁;

𑀢𑀢𑁆𑀣𑀤𑁆𑀤𑀲𑁆𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀦𑀺𑀩𑁆𑀩𑀼𑀢𑀁 𑀅𑀧𑀭𑀸𑀚𑀺𑀢𑀁.

𑁩𑁩. ‘‘𑀲𑀼𑀨𑀼𑀮𑁆𑀮𑀁 𑀲𑀸𑀮𑀭𑀸𑀚𑀁𑀯, 𑀲𑀢𑀭𑀁𑀲𑀺𑀁𑀯 𑀉𑀕𑁆𑀕𑀢𑀁;

𑀯𑀻𑀢𑀘𑁆𑀘𑀺𑀓𑀁𑀯 𑀅𑀗𑁆𑀕𑀸𑀭𑀁, 𑀦𑀺𑀩𑁆𑀩𑀼𑀢𑀁 𑀅𑀧𑀭𑀸𑀚𑀺𑀢𑀁.

𑁩𑁪. ‘‘𑀢𑀺𑀡𑀁 𑀓𑀝𑁆𑀞𑀜𑁆𑀘 𑀧𑀽𑀭𑁂𑀢𑁆𑀯𑀸, 𑀘𑀺𑀢𑀓𑀁 𑀢𑀢𑁆𑀣𑀓𑀸𑀲𑀳𑀁;

𑀘𑀺𑀢𑀓𑀁 𑀲𑀼𑀓𑀢𑀁 𑀓𑀢𑁆𑀯𑀸, 𑀲𑀭𑀻𑀭𑀁 𑀛𑀸𑀧𑀬𑀺𑀁 𑀅𑀳𑀁.

𑁩𑁫. ‘‘𑀲𑀭𑀻𑀭𑀁 𑀛𑀸𑀧𑀬𑀺𑀢𑁆𑀯𑀸𑀦, 𑀕𑀦𑁆𑀥𑀢𑁄𑀬𑀁 𑀲𑀫𑁄𑀓𑀺𑀭𑀺𑀁;

𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑁄 𑀬𑀓𑁆𑀔𑁄, 𑀦𑀸𑀫𑀫𑀕𑁆𑀕𑀳𑀺 𑀢𑀸𑀯𑀤𑁂.

𑁩𑁬. ‘‘𑀬𑀁 𑀧𑀽𑀭𑀺𑀢𑀁 [𑀢𑀁 𑀧𑀽𑀭𑀺𑀢𑀁 (𑀲𑁆𑀬𑀸.), 𑀲𑀧𑁆𑀧𑀼𑀭𑀺𑀲 (𑀓.)] 𑀢𑀬𑀸 𑀓𑀺𑀘𑁆𑀘𑀁, 𑀲𑀬𑀫𑁆𑀪𑀼𑀲𑁆𑀲 𑀫𑀳𑁂𑀲𑀺𑀦𑁄;

𑀧𑀼𑀡𑁆𑀡𑀓𑁄 𑀦𑀸𑀫 𑀦𑀸𑀫𑁂𑀦, 𑀲𑀤𑀸 𑀳𑁄𑀳𑀺 𑀢𑀼𑀯𑀁 [𑀬𑀤𑀸 𑀳𑁄𑀲𑀺 𑀢𑀼𑀯𑀁 (𑀲𑁆𑀬𑀸.), 𑀲𑀤𑀸 𑀳𑁄𑀳𑀺𑀢𑀺 𑀢𑁆𑀯𑀁 (𑀓.)] 𑀫𑀼𑀦𑁂.

𑁩𑁭. ‘‘𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸𑀦, 𑀤𑁂𑀯𑀮𑁄𑀓𑀁 𑀅𑀕𑀘𑁆𑀙𑀳𑀁;

𑀢𑀢𑁆𑀣 𑀤𑀺𑀩𑁆𑀩𑀫𑀬𑁄 𑀕𑀦𑁆𑀥𑁄, 𑀅𑀦𑁆𑀢𑀮𑀺𑀓𑁆𑀔𑀸 𑀧𑀯𑀲𑁆𑀲𑀢𑀺 [𑀅𑀦𑁆𑀢𑀮𑀺𑀓𑁆𑀔𑁂 𑀧𑀯𑀸𑀬𑀢𑀺 (𑀲𑀻.)].

𑁩𑁮. ‘‘𑀢𑀢𑁆𑀭𑀸𑀧𑀺 𑀦𑀸𑀫𑀥𑁂𑀬𑁆𑀬𑀁 𑀫𑁂, 𑀧𑀼𑀡𑁆𑀡𑀓𑁄𑀢𑀺 𑀅𑀳𑀽 𑀢𑀤𑀸;

𑀤𑁂𑀯𑀪𑀽𑀢𑁄 𑀫𑀦𑀼𑀲𑁆𑀲𑁄 𑀯𑀸, 𑀲𑀗𑁆𑀓𑀧𑁆𑀧𑀁 𑀧𑀽𑀭𑀬𑀸𑀫𑀳𑀁.

𑁩𑁯. ‘‘𑀇𑀤𑀁 𑀧𑀘𑁆𑀙𑀺𑀫𑀓𑀁 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀇𑀥𑀸𑀧𑀺 𑀧𑀼𑀡𑁆𑀡𑀓𑁄 𑀦𑀸𑀫, 𑀦𑀸𑀫𑀥𑁂𑀬𑁆𑀬𑀁 𑀧𑀓𑀸𑀲𑀢𑀺.

𑁪𑁦. ‘‘𑀢𑁄𑀲𑀬𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀕𑁄𑀢𑀫𑀁 𑀲𑀓𑁆𑀬𑀧𑀼𑀗𑁆𑀕𑀯𑀁;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁧. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀦𑀼𑀓𑀺𑀘𑁆𑀘𑀲𑁆𑀲𑀺𑀤𑀁 𑀨𑀮𑀁.

𑁪𑁨. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁩. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀡𑁆𑀡𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀡𑁆𑀡𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀫𑁂𑀢𑁆𑀢𑀕𑀼𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁫. ‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀅𑀲𑁄𑀓𑁄 𑀦𑀸𑀫 𑀧𑀩𑁆𑀩𑀢𑁄;

𑀢𑀢𑁆𑀣𑀸𑀲𑀺 𑀅𑀲𑁆𑀲𑀫𑁄 𑀫𑀬𑁆𑀳𑀁, 𑀯𑀺𑀲𑁆𑀲𑀓𑀫𑁆𑀫𑁂𑀦 [𑀯𑀺𑀲𑀼𑀓𑀫𑁆𑀫𑁂𑀦 (𑀲𑀻. 𑀲𑁆𑀬𑀸. 𑀓.)] 𑀫𑀸𑀧𑀺𑀢𑁄.

𑁪𑁬. ‘‘𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀅𑀕𑁆𑀕𑁄 𑀓𑀸𑀭𑀼𑀡𑀺𑀓𑁄 𑀫𑀼𑀦𑀺;

𑀦𑀺𑀯𑀸𑀲𑀬𑀺𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑁂, 𑀧𑀺𑀡𑁆𑀟𑀸𑀬 𑀫𑁂 [𑀫𑀁 (𑀲𑀻.)] 𑀉𑀧𑀸𑀕𑀫𑀺.

𑁪𑁭. ‘‘𑀉𑀧𑀸𑀕𑀢𑀁 𑀫𑀳𑀸𑀯𑀻𑀭𑀁, 𑀲𑀼𑀫𑁂𑀥𑀁 𑀮𑁄𑀓𑀦𑀸𑀬𑀓𑀁;

𑀧𑀕𑁆𑀕𑀬𑁆𑀳 𑀲𑀼𑀕𑀢𑀧𑀢𑁆𑀢𑀁 [𑀲𑀼𑀕𑀢𑀁 𑀧𑀢𑁆𑀢𑀁 (𑀲𑀻.), 𑀲𑀼𑀪𑀓𑀁 𑀧𑀢𑁆𑀢𑀁 (𑀧𑀻.)], 𑀲𑀧𑁆𑀧𑀺𑀢𑁂𑀮𑀁 𑀅𑀧𑀽𑀭𑀬𑀺𑀁 [𑀲𑀧𑁆𑀧𑀺𑀢𑁂𑀮𑁂𑀦 𑀧𑀽𑀭𑀬𑀺𑀁 (𑀲𑀻.), 𑀲𑀧𑁆𑀧𑀺𑀢𑁂𑀮𑀲𑁆𑀲’𑀧𑀽𑀭𑀬𑀺𑀁 (?)].

𑁪𑁮. ‘‘𑀤𑀢𑁆𑀯𑀸𑀦𑀳𑀁 𑀩𑀼𑀤𑁆𑀥𑀲𑁂𑀝𑁆𑀞𑁂, 𑀲𑀼𑀫𑁂𑀥𑁂 𑀮𑁄𑀓𑀦𑀸𑀬𑀓𑁂;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀪𑀺𑀬𑁆𑀬𑁄 [𑀪𑀻𑀬𑁄 (𑀲𑀻.), 𑀪𑀻𑀬𑁆𑀬𑁄 (𑀧𑀻.)] 𑀳𑀸𑀲𑀁 𑀚𑀦𑁂𑀲𑀳𑀁.

𑁪𑁯. ‘‘𑀇𑀫𑀺𑀦𑀸 𑀲𑀧𑁆𑀧𑀺𑀤𑀸𑀦𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀤𑁂𑀯𑀪𑀽𑀢𑁄 𑀫𑀦𑀼𑀲𑁆𑀲𑁄 𑀯𑀸, 𑀮𑀪𑀸𑀫𑀺 𑀯𑀺𑀧𑀼𑀮𑀁 𑀲𑀼𑀔𑀁.

𑁫𑁦. ‘‘𑀯𑀺𑀦𑀺𑀧𑀸𑀢𑀁 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀲𑀁𑀲𑀭𑀸𑀫𑀺 𑀪𑀯𑀸𑀪𑀯𑁂;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀡𑀺𑀥𑀺𑀢𑁆𑀯𑀸, 𑀮𑀪𑀸𑀫𑀺 𑀅𑀘𑀮𑀁 𑀧𑀤𑀁.

𑁫𑁧. ‘‘𑀮𑀸𑀪𑀸 𑀢𑀼𑀬𑁆𑀳𑀁 𑀲𑀼𑀮𑀤𑁆𑀥𑀁 𑀢𑁂, 𑀬𑀁 𑀫𑀁 𑀅𑀤𑁆𑀤𑀓𑁆𑀔𑀺 𑀩𑁆𑀭𑀸𑀳𑁆𑀫𑀡;

𑀫𑀫 𑀤𑀲𑁆𑀲𑀦𑀫𑀸𑀕𑀫𑁆𑀫, 𑀅𑀭𑀳𑀢𑁆𑀢𑀁 𑀪𑀯𑀺𑀲𑁆𑀲𑀢𑀺 [𑀅𑀭𑀳𑀸 𑀢𑁆𑀯𑀁 𑀪𑀯𑀺𑀲𑁆𑀲𑀲𑀺 (𑀲𑀻. 𑀧𑀻.), 𑀅𑀭𑀳𑀢𑁆𑀢𑀁 𑀕𑀫𑀺𑀲𑁆𑀲𑀲𑀺 (𑀲𑁆𑀬𑀸.)].

𑁫𑁨. ‘‘𑀯𑀺𑀲𑁆𑀲𑀢𑁆𑀣𑁄 [𑀯𑀺𑀲𑁆𑀲𑀝𑁆𑀞𑁄 (𑀲𑁆𑀬𑀸. 𑀧𑀻.), 𑀯𑀺𑀲𑀝𑁆𑀞𑁄 (𑀓.)] 𑀳𑁄𑀳𑀺 𑀫𑀸 𑀪𑀸𑀬𑀺, 𑀅𑀥𑀺𑀕𑀦𑁆𑀢𑁆𑀯𑀸 𑀫𑀳𑀸𑀬𑀲𑀁;

𑀫𑀫𑀜𑁆𑀳𑀺 𑀲𑀧𑁆𑀧𑀺𑀁 𑀤𑀢𑁆𑀯𑀸𑀦, 𑀧𑀭𑀺𑀫𑁄𑀓𑁆𑀔𑀲𑀺 𑀚𑀸𑀢𑀺𑀬𑀸.

𑁫𑁩. ‘‘𑀇𑀫𑀺𑀦𑀸 𑀲𑀧𑁆𑀧𑀺𑀤𑀸𑀦𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀤𑁂𑀯𑀪𑀽𑀢𑁄 𑀫𑀦𑀼𑀲𑁆𑀲𑁄 𑀯𑀸, 𑀮𑀪𑀲𑁂 𑀯𑀺𑀧𑀼𑀮𑀁 𑀲𑀼𑀔𑀁.

𑁫𑁪. ‘‘𑀇𑀫𑀺𑀦𑀸 𑀲𑀧𑁆𑀧𑀺𑀤𑀸𑀦𑁂𑀦, 𑀫𑁂𑀢𑁆𑀢𑀘𑀺𑀢𑁆𑀢𑀯𑀢𑀸𑀬 𑀘;

𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀲𑀺.

𑁫𑁫. ‘‘𑀅𑀝𑁆𑀞𑀢𑀺𑀁𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀸𑀚𑀸 𑀪𑀯𑀺𑀲𑁆𑀲𑀲𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁫𑁬. ‘‘𑀏𑀓𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀲𑀺;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀚𑀫𑁆𑀩𑀼𑀫𑀡𑁆𑀟𑀲𑁆𑀲 [𑀚𑀫𑁆𑀩𑀼𑀲𑀡𑁆𑀟𑀲𑁆𑀲 (𑀲𑀻. 𑀧𑀻.)] 𑀇𑀲𑁆𑀲𑀭𑁄.

𑁫𑁭. ‘‘𑀫𑀳𑀸𑀲𑀫𑀼𑀤𑁆𑀤𑁄𑀯𑀓𑁆𑀔𑁄𑀪𑁄, 𑀤𑀼𑀤𑁆𑀥𑀭𑁄 𑀧𑀣𑀯𑀻 𑀬𑀣𑀸;

𑀏𑀯𑀫𑁂𑀯 𑀘 𑀢𑁂 𑀪𑁄𑀕𑀸, 𑀅𑀧𑁆𑀧𑀫𑁂𑀬𑁆𑀬𑀸 𑀪𑀯𑀺𑀲𑁆𑀲𑀭𑁂.

𑁫𑁮. ‘‘𑀲𑀝𑁆𑀞𑀺𑀓𑁄𑀝𑀻 𑀳𑀺𑀭𑀜𑁆𑀜𑀲𑁆𑀲, 𑀘𑀚𑀺𑀢𑁆𑀯𑀸 [𑀘𑀢𑁆𑀯𑀸𑀦 (𑀲𑀻. 𑀓.), 𑀤𑀢𑁆𑀯𑀸𑀦 (𑀲𑁆𑀬𑀸. 𑀧𑀻.)] 𑀧𑀩𑁆𑀩𑀚𑀺𑀁 𑀅𑀳𑀁;

𑀓𑀺𑀁 𑀓𑀼𑀲𑀮𑀁 𑀕𑀯𑁂𑀲𑀦𑁆𑀢𑁄, 𑀩𑀸𑀯𑀭𑀺𑀁 𑀉𑀧𑀲𑀗𑁆𑀓𑀫𑀺𑀁.

𑁫𑁯. ‘‘𑀢𑀢𑁆𑀣 𑀫𑀦𑁆𑀢𑁂 𑀅𑀥𑀻𑀬𑀸𑀫𑀺, 𑀙𑀴𑀗𑁆𑀕𑀁 𑀦𑀸𑀫 𑀮𑀓𑁆𑀔𑀡𑀁;

𑀢𑀫𑀦𑁆𑀥𑀓𑀸𑀭𑀁 𑀯𑀺𑀥𑀫𑀁, 𑀉𑀧𑁆𑀧𑀚𑁆𑀚𑀺 𑀢𑁆𑀯𑀁 𑀫𑀳𑀸𑀫𑀼𑀦𑀺.

𑁬𑁦. ‘‘𑀢𑀯 𑀤𑀲𑁆𑀲𑀦𑀓𑀸𑀫𑁄𑀳𑀁, 𑀆𑀕𑀢𑁄𑀫𑁆𑀳𑀺 𑀫𑀳𑀸𑀫𑀼𑀦𑀺;

𑀢𑀯 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁬𑁧. ‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀲𑀧𑁆𑀧𑀺𑀁 𑀩𑀼𑀤𑁆𑀥𑀲𑁆𑀲𑀤𑀸𑀲𑀳𑀁;

𑀏𑀢𑁆𑀣𑀦𑁆𑀢𑀭𑁂 𑀦𑀸𑀪𑀺𑀚𑀸𑀦𑁂, 𑀲𑀧𑁆𑀧𑀺𑀁 𑀯𑀺𑀜𑁆𑀜𑀸𑀧𑀺𑀢𑀁 [𑀯𑀺𑀜𑁆𑀜𑀸𑀧𑀺𑀢𑀸 (?)] 𑀫𑀬𑀸.

𑁬𑁨. ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀉𑀧𑁆𑀧𑀚𑁆𑀚𑀢𑀺 𑀬𑀤𑀺𑀘𑁆𑀙𑀓𑀁;

𑀘𑀺𑀢𑁆𑀢𑀫𑀜𑁆𑀜𑀸𑀬 𑀦𑀺𑀩𑁆𑀩𑀢𑁆𑀢𑀁, 𑀲𑀩𑁆𑀩𑁂 𑀲𑀦𑁆𑀢𑀧𑁆𑀧𑀬𑀸𑀫𑀳𑀁.

𑁬𑁩. ‘‘𑀅𑀳𑁄 𑀩𑀼𑀤𑁆𑀥𑀸 𑀅𑀳𑁄 𑀥𑀫𑁆𑀫𑀸 [𑀅𑀳𑁄 𑀩𑀼𑀤𑁆𑀥𑁄 𑀅𑀳𑁄 𑀥𑀫𑁆𑀫𑁄 (𑀲𑀻.) 𑀣𑁂𑀭𑀕𑀸. 𑁨𑁦𑁧 𑀣𑁂𑀭𑀕𑀸𑀣𑀸𑀬 𑀢𑀤𑀝𑁆𑀞𑀓𑀣𑀸𑀬 𑀘 𑀲𑀁𑀲𑀦𑁆𑀤𑁂𑀢𑀩𑁆𑀩𑀁], 𑀅𑀳𑁄 𑀦𑁄 𑀲𑀢𑁆𑀣𑀼 𑀲𑀫𑁆𑀧𑀤𑀸;

𑀣𑁄𑀓𑀜𑁆𑀳𑀺 𑀲𑀧𑁆𑀧𑀺𑀁 𑀤𑀢𑁆𑀯𑀸𑀦, 𑀅𑀧𑁆𑀧𑀫𑁂𑀬𑁆𑀬𑀁 𑀮𑀪𑀸𑀫𑀳𑀁.

𑁬𑁪. ‘‘𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁, 𑀬𑀸𑀯𑀢𑀸 𑀦𑁂𑀭𑀼𑀧𑀲𑁆𑀲𑀢𑁄;

𑀫𑀫 𑀲𑀧𑁆𑀧𑀺𑀁 𑀉𑀧𑀸𑀤𑀸𑀬, 𑀓𑀮𑀪𑀸𑀕𑀁 𑀦 𑀳𑁂𑀲𑁆𑀲𑀢𑀺 [𑀳𑀺𑀲𑁆𑀲𑀢𑀺 (𑀲𑁆𑀬𑀸. 𑀓.), 𑀏𑀲𑁆𑀲𑀢𑀺 (𑀲𑀻.)].

𑁬𑁫. ‘‘𑀬𑀸𑀯𑀢𑀸 𑀘𑀓𑁆𑀓𑀯𑀸𑀴𑀲𑁆𑀲, 𑀓𑀭𑀺𑀬𑀦𑁆𑀢𑀲𑁆𑀲 [𑀓𑀸𑀭𑀬𑀦𑁆𑀢𑀲𑁆𑀲 (𑀲𑁆𑀬𑀸.), 𑀓𑀬𑀺𑀭𑀦𑁆𑀢𑀲𑁆𑀲 (𑀧𑀻.), 𑀆𑀳𑀭𑀦𑁆𑀢𑀲𑁆𑀲 (𑀓.)] 𑀭𑀸𑀲𑀺𑀢𑁄;

𑀫𑀫 𑀦𑀺𑀩𑁆𑀩𑀢𑁆𑀢𑀯𑀢𑁆𑀣𑀸𑀦𑀁 [𑀫𑀬𑀸 𑀦𑀺𑀯𑀢𑁆𑀣𑀯𑀢𑁆𑀣𑀸𑀦𑀁 (𑀧𑀻.)], 𑀑𑀓𑀸𑀲𑁄 𑀲𑁄 𑀦 𑀲𑀫𑁆𑀫𑀢𑀺.

𑁬𑁬. ‘‘𑀧𑀩𑁆𑀩𑀢𑀭𑀸𑀚𑀸 𑀳𑀺𑀫𑀯𑀸, 𑀧𑀯𑀭𑁄𑀧𑀺 𑀲𑀺𑀮𑀼𑀘𑁆𑀘𑀬𑁄;

𑀫𑀫𑀸𑀦𑀼𑀮𑀺𑀢𑁆𑀢𑀕𑀦𑁆𑀥𑀲𑁆𑀲, 𑀉𑀧𑀦𑀺𑀥𑀺𑀁 [𑀉𑀧𑀦𑀺𑀥𑀁 (𑀲𑀻. 𑀲𑁆𑀬𑀸. 𑀓.), 𑀉𑀧𑀦𑀻𑀬𑀁 (𑀧𑀻.)] 𑀦 𑀳𑁂𑀲𑁆𑀲𑀢𑀺.

𑁬𑁭. ‘‘𑀯𑀢𑁆𑀣𑀁 𑀕𑀦𑁆𑀥𑀜𑁆𑀘 𑀲𑀧𑁆𑀧𑀺𑀜𑁆𑀘, 𑀅𑀜𑁆𑀜𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀺𑀓𑀁;

𑀅𑀲𑀗𑁆𑀔𑀢𑀜𑁆𑀘 𑀦𑀺𑀩𑁆𑀩𑀸𑀦𑀁, 𑀲𑀧𑁆𑀧𑀺𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁮. ‘‘𑀲𑀢𑀺𑀧𑀝𑁆𑀞𑀸𑀦𑀲𑀬𑀦𑁄, 𑀲𑀫𑀸𑀥𑀺𑀛𑀸𑀦𑀕𑁄𑀘𑀭𑁄;

𑀩𑁄𑀚𑁆𑀛𑀗𑁆𑀕𑀪𑁄𑀚𑀦𑁄 [… 𑀚𑀦𑀦𑁄 (𑀲𑁆𑀬𑀸. 𑀓.)] 𑀅𑀚𑁆𑀚, 𑀲𑀧𑁆𑀧𑀺𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁯. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁦. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑁂𑀢𑁆𑀢𑀕𑀽 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑁂𑀢𑁆𑀢𑀕𑀼𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀥𑁄𑀢𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁨. ‘‘𑀕𑀗𑁆𑀕𑀸 𑀪𑀸𑀕𑀻𑀭𑀣𑀻 𑀦𑀸𑀫, 𑀳𑀺𑀫𑀯𑀦𑁆𑀢𑀸 𑀧𑀪𑀸𑀯𑀺𑀢𑀸 [𑀳𑀺𑀫𑀯𑀦𑁆𑀢𑀧𑁆𑀧𑀪𑀸𑀯𑀺𑀢𑀸 (𑀲𑀻.)];

𑀳𑀁𑀲𑀯𑀢𑀺𑀬𑀸 𑀤𑁆𑀯𑀸𑀭𑁂𑀦, 𑀅𑀦𑀼𑀲𑀦𑁆𑀤𑀢𑀺 𑀢𑀸𑀯𑀤𑁂.